(1)

L-Artikolu 29(2) tar-Regolament (KE) Nru 73/2009 jistipula li pagamenti taħt skemi ta’ appoġġ elenkati fl-Anness I ta’ dak ir-Regolament għandhom isiru matul il-perjodu mill-1 ta’ Diċembru sat-30 ta’ Ġunju tas-sena kalendarja ta’ wara. Madanakollu, l-Artikolu 29(4)(a) ta’ dak ir-Regolament jippermetti lill-Kummissjoni li tipprovdi għall-pagamenti bil-quddiem.

(2)

It-temp xejn favorevoli fl-Ewropa, b’xitwa u ammonti tax-xita qliel li wasslu għal għargħar qawwi f’xi Stati Membri, ikkawżaw ħsarat serji lill-produzzjoni tal-għelejjel tar-raba’ u tal-għalf fl-2013. B’riżultat ta’ dan, il-bdiewa kellhom jaffrontaw diffikultajiet finanzjarji enormi, b’mod partikolari l-produtturi tal-ifrat. Dawn id-diffikultajiet ikomplu jiżdiedu bl-effetti tal-kriżi finanzjarja li għaddejja bħalissa li wasslet sabiex diversi bdiewa kellhom jaffrontaw problemi serji ta’ likwidità. Sabiex il-bdiewa jkunu megħjuna jtaffu dawn id-diffikultajiet, ikun xieraq li dawn ikunu jistgħu jirċievu pagamenti bil-quddiem sa 50 % tal-iskemi ta’ appoġġ elenkati fl-Anness I tar-Regolament (KE) Nru 73/2009. Fir-rigward tal-pagamenti taċ-ċanga u l-vitella stipulati fit-Taqsima 11 tal-Kapitolu 1 tat-Titolu IV tar-Regolament (KE) Nru 73/2009, l-Istati Membri għandhom jiġu awtorizzati wkoll biex iżidu l-ħlas tal-pagamenti bil-quddiem kif imsemmija fl-Artikolu 82 tar-Regolament tal-Kummissjoni (KE) Nru 1121/2009 (2), sa 80 % tal-ħlas.

(3)

Sabiex ikun żgurat li l-pagamenti bil-quddiem jingħaddu mas-sena tal-baġit 2014, dawn għandhom isiru mis-16 ta’ Ottubru 2013. Il-verifika meħtieġa dwar il-kundizzjonijiet ta’ eliġibbiltà skont l-Artikolu 29(3) tar-Regolament (KE) Nru 73/2009 għandha ssir xorta waħda qabel il-ħlas tal-pagamenti bil-quddiem, fl-interess ta’ ġestjoni finanzjarja tajba.

(4)

Skont l-Artikolu 18(5) tar-Regolament tal-Kunsill (KE) Nru 1290/2005 (3), il-Kunsill jista’ jadotta r-rata ta’ aġġustament għall-ħlasijiet diretti sal-1 ta’ Diċembru, fuq proposta mill-Kummissjoni, abbażi ta’ tagħrif ġdid fil-pussess tagħha. Bħala konsegwenza, ir-rata ta’ aġġustament ta’ dixxiplina finanzjarja msemmija fl-Artikolu 11 tar-Regolament (KE) Nru 73/2009 eventwalment applikata tista’ ma tkunx magħrufa sas-16 ta’ Ottubru 2013. Għaldaqstant l-akbar ħlas bil-quddiem li jista’ jitħallas għandu jiġi stabbilit bħala persentaġġ tal-pagamenti diretti qabel l-aġġustament imsemmi fl-Artikolu 11 tar-Regolament (KE) Nru 73/2009. Il-ħlas definittiv wara l-1 ta’ Diċembru 2013 se jqis ir-rata ta’ aġġustament finali ta’ dixxiplina finanzjarja applikabbli f’dak iż-żmien.

(5)

Il-miżuri stipulati f’dan ir-Regolament huma konformi mal-opinjoni tal-Kumitat ta’ Ġestjoni għall-Pagamenti Diretti,