REGOLAMENT TA’ IMPLIMENTAZZJONI TAL-KUMMISSJONI (UE) Nru 929/2013

tas-26 ta’ Settembru 2013

li jemenda l-Anness VIII tar-Regolament tal-Kunsill (KE) Nru 73/2009 li jistabbilixxi regoli komuni għal skemi ta’ appoġġ dirett għal bdiewa fi ħdan il-politika agrikola komuni

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KE) Nru 73/2009 tad-19 ta’ Jannar 2009 li jistabbilixxi regoli komuni għal skemi ta’ appoġġ dirett għal bdiewa fi ħdan il-politika agrikola komuni u li jistabbilixxi ċerti skemi ta’ appoġġ għal bdiewa, u li jemenda r-Regolamenti (KE) Nru 1290/2005, (KE) Nru 247/2006, (KE) Nru 378/2007 u li jirrevoka r-Regolament (KE) Nru 1782/2003 (1), u b’mod partikolari it-tieni subparagrafu tal-Artikolu 40(1) u l-Artikolu 57a(7) tiegħu,

Billi:

(1)

Skont l-ewwel subparagrafu tal-Artikolu 40(1) tar-Regolament (KE) Nru 73/2009 il-valur totali tad-drittijiet għal pagament allokati kollha u tal-limiti massimi ffissati skont l-Artikoli 51(2) u 69(3) ta’ dan ir-Regolament, jew, għall-2009, skont l-Artikolu 64(2) tar-Regolament (KE) Nru 1782/2003 ma għandux jaqbeż il-limitu massimu nazzjonali rispettiv stabbilit fl-Anness VIII tar-Regolament (KE) Nru 73/2009.

(2)

Skont it-tieni subparagrafu tal-Artikolu 40(1) tar-Regolament (KE) Nru 73/2009, il-limiti nazzjonali għas-sena tat-talba 2013 kif imsemmi fl-Artikolu 40(1) tar-Regolament (KE) Nru 73/2009 għall-Greċja, Spanja, il-Lussemburgu, Malta u r-Renju Unit ġew adattati permezz tar-Regolament ta’ Implimentazzjoni tal-Kummissjoni (UE) Nru 287/2013 (2) wara n-notifiki ta’ dawn l-Istati Membri dwar l-intenzjoni tagħhom li għall-2014 jipprovdu appoġġ lil min ikabbar id-dwieli billi jallokaw drittijiet għal pagament skont l-Artikolu 103o tar-Regolament tal-Kunsill (KE) Nru 1234/2007 (3). Fost l-Istati Membri kkonċernati, il-Lussemburgu u Malta nnotifikaw l-intenzjoni tagħhom li jkomplu jittrasferixxu l-ammont sħiħ tal-baġit tagħhom għall-programmi ta’ appoġġ fis-settur tal-inbid kif stipulat fl-Anness Xb tar-Regolament (KE) Nru 1234/2007. Madankollu, il-fatt li l-ammont kien żdied kemm kemm għas-sena finanzjarja 2014 meta mqabbel ma’ dak li huwa disponibbli għas-sena finanzjarja 2013 għal dawn iż-żewġ Stati Membri ma tqiesx fl-adattament tal-limiti massimi nazzjonali għal pagamenti diretti għas-sena tat-talba 2013. Għalhekk il-limiti massimi nazzjonali rispettivi msemmija fl-Artikolu 40(1) tar-Regolament (KE) Nru 73/2009 għandhom jiġu adattati skont dan.

(3)

Skont l-Artikolu 103n tar-Regolament (KE) Nru 1234/2007, Spanja, il-Lussemburgu, Malta u r-Renju Unit innotifikaw lill-Kummissjoni dwar l-intenzjoni tagħhom li b’mod definittiv jittrasferrixxu parti minn jew l-ammont kollu disponibbli għall-programmi ta’ appoġġ imsemmija fl-Anness Xb tar-Regolament (KE) Nru 1234/2007 sabiex iżidu l-limiti massimi nazzjonali tagħhom għall-pagamenti diretti msemmija fl-Artikolu 40 tar-Regolament (KE) Nru 73/2009 għas-snin tat-talba 2014 ‘il quddiem. Għalhekk il-limiti massimi nazzjonali rispettivi msemmija fl-Artikolu 40(1) tar-Regolament (KE) Nru 73/2009 għandhom jiġu adattati skont dan.

(4)

Skont l-Artikolu 57a(9) tar-Regolament (KE) Nru 73/2009, il-Kroazja nnotifikat lill-Kummissjoni dwar iż-żona ta’ art li tnaddfet mill-mini u ġiet iddikjarata mill-bdiewa fl-applikazzjonijiet għall-għajnuna mressqa fir-rigward tas-sena tat-talba 2013 u li mill-ġdid reġgħet lura għall-użu ta’ attivitajiet agrikoli bejn l-1 ta’ Jannar 2005 u l-31 ta’ Diċembru 2012. Din in-notifika inkludiet ukoll it-tqassim ta’ art bejn ettari ta’ art bil-ħaxix u l-mergħat u l-ettari l-oħra eliġibbli, kif ukoll l-informazzjoni dwar il-pakketti baġitarji li jikkorrispondu għal kull kategorija ta’ art imnaddfa mill-mini: EUR 46 000 għall-art bil-ħaxix u l-mergħat u EUR 6 646 000 għall-ettari eliġibbli l-oħra. Abbażi tal-iskeda ta’ żidiet inkrementali msemmija fl-Artikolu 121 tar-Regolament (KE) Nru 73/2009, u skont l-Artikolu 57a(7) ta’ dak ir-Regolament, il-limiti massimi nazzjonali rispettivi kif imsemmi fl-Artikolu 40(1) tar-Regolament (KE) Nru 73/2009 għandhom għalhekk jiġu adattati skont dan.

(5)	L-Anness VIII tar-Regolament (KE) Nru 73/2009 għandu għalhekk jiġi emendat skont dan.

(6)	Il-miżuri stipulati f’dan ir-Regolament huma konformi mal-opinjoni tal-Kumitat ta’ Ġestjoni għall-Pagamenti Diretti,

ADOTTAT DAN IR-REGOLAMENT:

Artikolu 1

L-Anness VIII tar-Regolament (KE) Nru 73/2009 huwa emendat skont l-Anness ta’ dan ir-Regolament.

Artikolu 2

Dan ir-Regolament għandu jidħol fis-seħħ fis-seba’ jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-26 ta’ Settembru 2013.

Għall-Kummissjoni

Il-President

José Manuel BARROSO

(1) ĠU L 30, 31.1.2009, p. 16.

(2) Ir-Regolament ta’ Implimentazzjoni tal-Kummissjoni (UE) Nru 287/2013 tat- 22 ta’ Marzu 2013 li jemenda l-Anness IV u l-Anness VIII tar-Regolament tal-Kunsill (KE) Nru 73/2009 li jistabbilixxi regoli komuni għal skemi ta’ appoġġ dirett għal bdiewa fi ħdan il-politika agrikola komuni (ĠU L 86, 26.3.2013, p. 12).

(3) Ir-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (ir-Regolament Waħdieni dwar l-OKS) (ĠU L 299, 16.11.2007, p. 1).

ANNESS

L-Anness VIII tar-Regolament (KE) Nru 73/2009 jinbidel b’dan li ġej:

“ANNESS VIII

Limiti nazzjonali msemmija fl-Artikolu 40

Tabella 1

(eluf ta’ EUR)
Stat Membru	2009	2010	2011	2012	2013	2014	2015	2016 u snin ta’ wara
Il-Belġju	614 179	611 817	611 817	614 855	614 855	614 855	614 855	614 855
Id-Danimarka	1 030 478	1 031 321	1 031 321	1 049 002	1 049 002	1 049 002	1 049 002	1 049 002
Il-Ġermanja	5 770 254	5 771 981	5 771 994	5 852 938	5 852 938	5 852 938	5 852 938	5 852 938
Il-Greċja	2 380 713	2 228 588	2 231 798	2 233 227	2 233 227	2 217 227	2 217 227	2 217 227
Spanja	4 858 043	5 119 045	5 125 032	5 304 642	5 304 642	5 304 642	5 304 642	5 304 642
Franza	8 407 555	8 423 196	8 425 326	8 527 494	8 527 494	8 527 494	8 527 494	8 527 494
L-Irlanda	1 342 268	1 340 521	1 340 521	1 340 869	1 340 869	1 340 869	1 340 869	1 340 869
L-Italja	4 143 175	4 210 875	4 234 364	4 379 985	4 379 985	4 379 985	4 379 985	4 379 985
Il-Lussemburgu	37 518	37 569	37 679	37 671	37 672	37 672	37 672	37 672
Il-Pajjiżi l-Baxxi	853 090	853 169	853 169	897 751	897 751	897 751	897 751	897 751
L-Awstrija	745 561	747 344	747 425	751 788	751 788	751 788	751 788	751 788
Il-Portugall	608 751	589 811	589 991	606 551	606 551	606 551	606 551	606 551
Il-Finlandja	566 801	565 520	565 823	570 548	570 548	570 548	570 548	570 548
L-Isvezja	763 082	765 229	765 229	770 906	770 906	770 906	770 906	770 906
Ir-Renju Unit	3 985 895	3 976 425	3 976 482	3 988 042	3 988 042	3 988 042	3 988 042	3 988 042

Tabella 2 (1)

(eluf ta’ EUR)
Stat Membru	2009	2010	2011	2012	2013	2014	2015	2016 u snin ta’ wara
Il-Bulgarija	287 399	336 041	416 372	499 327	580 087	660 848	741 606	814 295
Ir-Repubblika Ċeka	559 622	654 241	739 941	832 144	909 313	909 313	909 313	909 313
L-Estonja	60 500	71 603	81 703	92 042	101 165	101 165	101 165	101 165
Ċipru	31 670	38 928	43 749	49 146	53 499	53 499	53 499	53 499
Il-Latvja	90 016	105 368	119 268	133 978	146 479	146 479	146 479	146 479
Il-Litwanja	230 560	271 029	307 729	346 958	380 109	380 109	380 109	380 109
L-Ungerija	807 366	947 114	1 073 824	1 205 037	1 318 975	1 318 975	1 318 975	1 318 975
Malta	3 752	4 231	4 726	5 137	5 504	5 504	5 504	5 504
Il-Polonja	1 877 107	2 192 294	2 477 294	2 788 247	3 044 518	3 044 518	3 044 518	3 044 518
Ir-Rumanija	623 399	729 863	907 473	1 086 608	1 264 472	1 442 335	1 620 201	1 780 406
Is-Slovenja	87 942	103 394	117 423	131 575	144 274	144 274	144 274	144 274
Is-Slovakkja	240 014	280 364	316 964	355 242	388 176	388 176	388 176	388 176

Tabella 3 (1)

(eluf ta’ EUR)
Stat Membru	2013	2014	2015	2016	2017	2018	2019	2020	2021	2022
Il-Kroazja	94 923	113 908	132 893	151 877	189 847	227 816	265 785	303 754	341 724	379 693

(1) Limiti massimi kkalkulati bl-inklużjoni tal-iskeda ta’ inkrementi stipulata fl-Artikolu 121.”