ANNESS II

DOKUMENT UNIKU

Ir-Regolament tal-Kunsill (KE) Nru 510/2006 dwar il-protezzjoni tal-indikazzjonijiet ġeografiċi u d-denominazzjonijiet tal-oriġini għall-prodotti agrikoli u l-oġġetti tal-ikel. (1)

“ PASAS DE MÁLAGA ”

Nru tal-KE: ES-PDO-0005-00849-24.1.2011

PGI () PDO (X)

1. Isem

“Pasas de Málaga”

2. Stat Membru jew pajjiż terz

Spanja

3. Deskrizzjoni tal-prodott agrikolu jew tal-oġġett tal-ikel

3.1. Tip ta’ prodott

Klassi 1.6

Frott, ħaxix u ċereali, friski jew ipproċessati

3.2. Deskrizzjoni tal-prodott li għalih japplika l-isem f’(1)

Definizzjoni:

Il-“Pasas de Málaga” tradizzjonali jinkisbu mit-tnixxif fix-xemx tal-frott matur tal-Vitis vinífera L, tal-varjetà Muscat ta’ Lixandra, ukoll magħruf bħala Moscatel Gordo jew Moscatel de Málaga.

Karatteristiċi fiżiċi

—	Kif stipulat fil-Lista Deskrittiva tal-varjetajiet u speċijiet tal-Vitis tal-Organizzazzjoni Internazzjonali tad-Dielja u l-Inbid (OIV) fir-rigward tat-tul u l-wisa’ tal-għeneb, il-varjetà tal-Muscat ta’ Lixandra għandha frott żgħir ta’ tul (7) u wisa’ (7) kbir li jipproduċu żbib kbar u nixfin.

—	Kulur: iswed fil-vjola uniformi.

—	Forma: Ittondjata.

—	Il-pendukulu jista’ jibqa’ mal-frott jekk il-frotta tiġi maqtugħa bl-idejn.

—

Konsistenza tal-qoxra: Skont il-kodiċi tal-OIV, il-“ħxuna tal-qoxra” huwa ggradat kif ġej: 1 = irqiqa ħafna, 3 = irqiqa, 5 = medja, 7 = ħoxna u 9 = ħoxna ħafna, il-varjetà tal-Muscat ta’ Lixandra taqa’ taħt il-kategorija 5 (“medja”). Iż-żbib għandhom qoxra ta’ ħxuna medja minħabba li l-għeneb ma jgħaddi minn ebda trattament li jolqot ħażin il-qoxra.

Karatteristiċi kimiċi:

Il-grad tal-umdità tal-iżbib għandu jkun anqas mill-35 %. Il-kontenut taz-zokkor għandu jkun iżjed mill-50 % p/p.

—	Aċidità, minn 1,2 u 1,7 % espressa bħala aċidu tartariku.

—	pH bejn 3,5-4,5.

—	Is-solidi solubbli fl-ilma huma superjuri għal 65 Brix.

Karatteristiċi organolettiċi:

—

Iż-żbib iżommu t-togħma karatteristika tal-għeneb Muscat li jiġu prodotti minnu: Skont il-kodiċi tal-OIV, it-“togħma partikolari” hija ggradata kif ġej: 1 = xejn, 2 = togħma ta’ Muscat, 3 = togħma foxé (tal-Vitis vulpina), 4 = togħma erbaċja, 5 = togħma oħra; il-varjetà tal-Muscat ta’ Lixandra hija kklassifikata bħala 2, minħabba li l-varjetà ta’ Muscat hija referuta speċifikament f’dak il-grad tal-OIV.

—	It-togħma ta’ Muscat hija msaħħa b’aroma retronażali ddominata mit-terpineoli li ġejjin: a-terpineol (ħwawar aromatiċi), linalol (ward), ġeranjol (ġeranju) u b-ċitronellol (ċitru).

—	Il-grad tal-aċidità, deskritt hawn fuq, jgħin biex joħloq il-bilanċ partikolari bejn il-ħlewwa u l-qrusa.

—	Il-piż medju, il-grad tal-umdità u l-valur Brix jagħtu liż-żbib kwalità elastika u flessibbli, u meta kkonsmati, il-laħma tagħhom tinħass mlaħħma u mmerqa, sensazzjonijiet li huma differenti mis-sensazzjonijiet li ta’ spiss issib fil-frott niexef, li s-soltu tkun niexfa u mhux elastika.

3.3. Materja prima (għall-prodotti pproċessati biss)

Il-frott matur tal-Vitis vinífera L, tal-varjetà Muscat ta’ Lixandra, magħruf wkoll bħala Moscatel Gordo jew Moscatel de Málaga.

3.4. Għalf (għall-prodotti li ġejjin mill-annimali biss)

Mhux applikabbli.

3.5. Passi speċifiċi fil-produzzjoni li jridu jseħħu fiż-żona ġeografika definita

Il-produzzjoni u l-ippakkjar iridu jsiru fiż-żona ġeografika ddefinita fil-punt 4.

Il-produzzjoni tibda bil-ħsad tal-għeneb matur u b’saħħtu, li qatt ma jseħħ qabel l-istadju fenoloġiku tal-maturazzjoni (Baggiolini, 1952), filwaqt li jiġi evitat il-frott li mhuwiex intatt, qed jitħassar minħabba xi marda jew waqa’ fl-art qabel il-ħsad.

Il-pass li jmiss huwa t-tnixxif tal-għeneb bl-espożizzjoni diretta tal-għenieqed għax-xemx, hekk kif dawn ma għandhomx jiġu mnixxfa b’mod artifiċjali. It-tnixxif isir manwalment, b’segwiment ta’ kuljum, fejn il-bidwi jrid idawwar l-għenieqed għat-tnixxif, sabiex iż-żewġ naħat tal-għanqud jinxfu b’mod indaqs.

Ladarba l-għenieqed ikunu nixfu, l-għeneb jiġi maqtugħ bi proċess li jissejjaħ picado, li jsir manwalment bl-użu ta’ mqass li għandu daqs u forma speċjalment addattati għal dan it-tip ta’ xogħol, sabiex il-kwalità tal-frott maqtugħ mill-għenieqed ma tiddetterjorax, jew bil-magni tal-fabbriki.

Ladarba ż-żbib ikunu lesti, kemm fl-għenieqed u kemm maqtugħin, il-proċess ta’ produzzjoni jkompli fil-fabbriki tal-iżbib, u qabel ma’ ż-żbib ippakkjati jitpoġġew fis-suq, għandhom jitwettqu l-kompiti li ġejjin:

—	Wasla u ġbir tal-iżbib ipprovduti mill-bdiewa kkonċernati.

—	Iż-żbib jitneħħew mill-għanqud, sakemm dan ma jkunx diġà sar mill-bidwi.

—	Dawn jiġu kklassifikati skont id-daqs medju tal-frotta, imkejjel bħala l-għadd ta’ żbib għal kull 100 gramma.

—	It-tħejjija għall-ippakkjar: jiġifieri s-separazzjoni f’unitajiet ta’ frott li diġà ġie kklassifikat u maħżun. Irid ikun hemm dejjem inqas minn 80 frotta għal kull 100 gramma netta.

—

Ippakkjar: Dan huwa l-aħħar stadju tal-produzzjoni, u jista’ jsir manwalment jew bil-magni. Għandu rwol importanti fil-protezzjoni tal-karatteristiċi tal-kwalità tal-prodott matul iż-żmien. Iseħħ biss billi l-prodott jiġi separat mill-ambjent għal ġo pakkett nadif u magħluq sewwa sabiex iżomm il-bilanċ delikat tiegħu tal-umdità, bilanċ li huwa tant importanti għall-karatteristiċi tiegħu.

3.6. Regoli speċifiċi dwar it-tqattigħ, it-tħakkik, l-ippakkjar, eċċ.

Mhux applikabbli.

3.7. Regoli speċifiċi dwar it-tikkettar

L-ippakkjar għandu juri l-informazzjoni li ġejja:

—	Id-denominazzjoni li taħtu jinbiegħ il-prodott: id-denominazzjoni “Pasas de Málaga” għandu jintwera b’mod prominenti, bil-kliem “Denominación de Origen” immedjatament taħtu.

—	Il-kwantità netta, f’kilogrammi (kg) jew grammi (g).

—	Data ta’ durabilità minima.

—	L-isem, l-isem kummerċjali jew id-denominazzjoni tal-produttur jew dak li jippakkja u, fil-każijiet kollha, l-indirizz tal-uffiċċju reġistrat tagħhom.

—

Il-lott.

Id-denominazzjoni li taħtha jinbiegħ il-prodott, il-kwantità netta u d-data ta’ skadenza għandhom jidhru fl-istess kamp viżiv.

Fil-każijiet kollha, l-indikazzjonijiet obbligatorji għandhom jinftiehmu faċilment, ikunu murija b’mod prominenti, ikunu faċilment viżibbli, jinqraw b’mod ċar u b’mod li ma jistgħux jitħassru. Bl-ebda mod ma għandhom ikunu moħbija, oskurati jew interrotti b’xi element miktub jew grafiku.

L-ippakkjar kollu għandu jinkludi tikketta li turi l-logo tad-DPO u l-kliem “Denominación de Origen Protegida” u “Pasas de Málaga”, kif ukoll kodiċi uniku għal kull unità.

4. Deskrizzjoni fil-qosor taż-żona ġeografika

POST

PAJJIŻ: SPANJA

KOMUNITÀ AWTONOMA: ANDALUCÍA

PROVINĊJA: MÁLAGA

Hemm żoni ta’ dwieli mifruxin mal-Provinċja kollha ta’ Malaga, kemm fit-tramuntana kif ukoll fin-nofsinhar, fil-lvant u fil-punent. Fi tnejn minn dawn iż-żoni, tradizzjonalment, il-biċċa l-kbira tal-għeneb ġew imkabbra għall-produzzjoni tal-iżbib. Iż-żona prinċipali hija l-comarca (distrett) ta’ Axarquía fil-lvant tal-provinċja, fil-lvant tal-belt kapitali. Iż-żona l-oħra tinsab fuq in-naħa estrema tal-punent tal-kosta ta’ Malaga. Iż-żona ġeografika ddefinita tinkludi l-muniċipalitajiet li ġejjin:

MINUĊIPALITAJIET:

AXARQUÍA
Alcaucín	Alfarnate	Alfarnatejo	Algarrobo
Almáchar	Árchez	Arenas	Benamargosa
Benamocarra	El Borge	Canillas de Acietuno	Canillas de Albaida
Colmenar	Comares	Cómpeta	Cútar
Frigiliana	Iznate	Macharaviaya	Málaga
Moclinejo	Nerja	Periana	Rincón de la Victoria
Riogordo	Salares	Sayalonga	Sedella
Torrox	Totalán	Vélez Málaga	Viñuela
ZONA MANILVA
Casares	Manilva		Estepona

5. Rabta maż-żona ġeografika

5.1. Speċifiċità taż-żona ġeografika

Ir-referenzi għar-rabta bejn it-tkabbir tad-dwieli u ż-żona ġeografika ddefinita huma antiki ferm u għadhom jeżistu sal-ġurnata tal-lum: Plinio El Viejo (l-ewwel seklu wara Kristu) semma l-fatt li kien hemm dwieli f’Malaga fix-xogħol tiegħu “Historia Natural” (“L-Istorja Naturali”); waqt l-era tad-dinastija Nasrid (sekli XIII-XV), kienet imħeġġa il-produzzjoni agrikola, partikolarment dik tat-tkabbir tal-għeneb għall-produzzjoni tal-iżbib. It-tkabbir tad-dwieli ffjorixxa sa tmiem is-seklu XIX, meta kombinazzjoni sfortunata ta’ fatturi kummerċjali u problemi marbuta mas-saħħa tal-pjanti, partikolarment il-fillossera (Viteus vitifoliae, Fitch) wasslu għall-kollass tas-settur, u b’riżultat ta’ dan, id-dwieli attwali huma mifruxin mal-provinċja kollha. Fi tnejn minn dawn iż-żoni, tradizzjonalment, il-biċċa l-kbira tal-għeneb ġew imkabbra għall-produzzjoni tal-iżbib. Dawn iż-żewġ żoni ta’ produzzjoni jinstabu fin-nofsinhar tal-provinċja u jmissu mal-baħar Mediterran, u għalhekk għandhom klima subtropikali Mediterranja; min-naħa l-oħra, l-orografija wieqfa hija karatteristika ġenerali tal-Provinċja ta’ Málaga. Anke jekk l-għeneb imkabbar għall-produzzjoni tal-iżbib ma għadhomx jieħdu daqshekk post daqs kemm kienu jieħdu fiż-żmien qabel il-fillossera, dawn għadhom fattur importanti fl-ekonomija u l-ambjent soċjokulturali f’sezzjoni kbira tal-provinċja ta’ Málaga, billi jitkabbru f’aktar minn 35 muniċipalità minn iżjed minn 1 800 bidwi, fuq superfiċje totali ta’ 2 200 ha.

L-ambjent ġeografiku jiddetermina l-kwalitajiet tal-prodott finali magħruf bħala “Pasas de Málaga”, bl-orografija wieqfa li hija waħda mill-karatteristiċi tagħha, u bil-pajsaġġ kompost minn sensiela ta’ għoljiet u qigħan tan-nixxigħat b’pendili ta’ aktar minn 30 %. It-territorju, bil-firxa għolja u muntanjuża fit-tramuntana u l-baħar Mediterran fin-nofsinhar, huwa sensiela ta’ widien fondi u qigħan tan-nixxigħat li jiffurmaw pajsaġġ partikolari ħafna b’għoljiet weqfin, u b’hekk l-Axarquía hija bħal ġenb ta’ għolja li tinżel sal-baħar. Fiż-żona ta’ Manilva, fejn id-dwieli jinsabu qrib il-baħar, ir-riżalt huwa iktar moderat minn dak f’Axarquia.

Il-ħamrija hija essenzjalment taflija, ta’ kwalità baxxa, mhux profonda, u b’kapaċità baxxa li żżomm l-ilma. Il-klima hija Mediterranja subtropika, b’temperaturi moderati fix-xitwa, sjuf niexfin, ftit xita u sigħat twal ta’ dawl tax-xemx (medja ta’ 2,974 siegħa tul l-aħħar għaxar snin).

5.2. Speċifiċità tal-prodott:

Id-daqs tal-“Pasas de Málaga” huwa wieħed mill-karatteristiċi l-aktar apprezzati u li tiddistingwihom; jitqies daqs kbir, u b’hekk ċarament superjur għal ta’ prodotti oħra tal-istess tip, bħas-sultana, il-passolini u t-Thompson Seedless ta’ California.

Iż-żbib iżommu t-togħma tipika tal-għeneb Muscat li minnu jiġu prodotti, u din il-varjetà ta’ Muscat hija r-referenza OIV għal wieħed mill-gradi ta’ “togħma partikolari”.

5.3. Rabta kawżali bejn iż-żona ġeografika u l-kwalità jew il-karatteristiċi tal-prodott (għad-DPO) jew il-kwalità speċifika, ir-reputazzjoni jew karatteristiċi oħra tal-prodott (għall-IĠP)

Ir-rabta bejn iż-żona ġeografika u l-kwalità speċifika tal-prodott ġejja direttament mill-kundizzjonijiet li fihom jiġu prodotti iż-żbib. L-orografija tiffaċilita l-esponiment naturali tal-għenieqed għax-xemx għat-tnixxif: dan il-metodu ta’ tnixxif iħares il-kwalità tal-qoxra u jagħti izjed qawwa lit-togħma tal-Muscat billi jikkonċentra l-aromi. It-temp sħun u niexef fil-perjodu ta’ ħsad huwa tajjeb għall-maturazzjoni u l-akkumulu tal-materja niexfa u taz-zokkor fl-għeneb, li huma importanti biex it-tnixxif isir tajjeb, u li mbagħad jippermettu li l-laħma żżomm il-meraq u l-elastiċità tipiċi tagħha. Is-sigħat tax-xemx ifissru li l-għenieqed jistgħu jiġu esposti fix-xemx għal perjodi qosra, sabiex iż-żbib iżommu l-aċidità tal-għeneb.

Huwa minħabba l-kundizzjonijiet diffiċli ta’ tkabbir li, biż-żmien, il-Muscat ta’ Lixandra saret il-varjetà ewlenija kkultivata, peress li hija dik adatta l-aktar għal dan l-ambjent partikolari. Il-varjetà għandha l-potenzjal ġenetiku li toħloq distinzjoni bejn il-karatteristiċi bħad-daqs tal-frotta, il-kwalità tal-qoxra, il-karatteristiċi tal-laħma, l-aromi tal-Muscat u proporzjon għoli ta’ solidi solubbli (fibra) li jinsabu l-aktar fiż-żrieragħ.

Minħabba l-art diffiċli, il-produzzjoni tal-iżbib saret attività artiġjanali, fejn kompiti bħall-ħsad, it-tqegħid ta’ għenieqed ta’ għeneb barra għat-tnixxif fix-xemx, u t-tidwir tagħhom hekk kif jinxfu, kif ukoll l-għażla tal-frott, isiru kollha manwalment u tingħata attenzjoni kbira lill-kwalità. Il-kompitu li jitneħħa l-għeneb mill-għanqud (picado) ukoll isir manwalment, u huwa għalhekk li l-“Pasas de Málaga” ta’ spiss ikollhom il-pendunkulu mwaħħal.

It-tnixxif huwa mod antik u naturali ta’ kif jibqa’ ppreservat l-ikel, billi d-deterjorament jiġi evitat bit-tneħħija tal-ilma żejjed. Huwa biss permezz tal-esperjenza u l-għarfien miksuba tul is-snin li huwa possibbli li jintlaħaq il-bilanċ delikat tal-umdità, li jagħti lill-prodott uħud mill-karatteristiċi organolettiċi l-aktar magħrufa tiegħu, kif deskritt f’din l-ispeċifikazzjoni.

Referenza għall-pubblikazzjoni tal-ispeċifikazzjoni

(L-Artikolu 5(7) tar-Regolament (KE) Nru 510/2006 (2))

http://www.juntadeandalucia.es/agriculturaypesca/portal/export/sites/default/comun/galerias/galeriaDescargas/cap/industrias-agroalimentarias/denominacion-de-origen/Pliegos/PliegoPasas.pdf

(1) Sostitwit bir-Regolament (UE) Nru 1151/2012 tal-Parlament Ewropew u tal-Kunsill tal-21 ta’ Novembru 2012 dwar skemi ta’ kwalità għal prodotti agrikoli u oġġetti tal-ikel.

(2) Sostitwit bir-Regolament (UE) Nru 1151/2012 tal-Parlament Ewropew u tal-Kunsill tal-21 ta’ Novembru 2012 dwar skemi ta’ kwalità għal prodotti agrikoli u oġġetti tal-ikel.