(1)

Fid-9 ta’ Diċembru 2011, l-Istati Membri tal-Unjoni u l-Kroazja ffirmaw it-Trattat dwar l-adeżjoni tal-Kroazja mal-Unjoni Ewropea (“it-Trattat tal-Adeżjoni”). Bis-saħħa tal-Artikolu 3(3) tat-Trattat tal-Adeżjoni huwa għandu jidħol fis-seħħ fl-1 ta’ Lulju 2013 sakemm l-istrumenti ta’ ratifika kollha jkunu ġew depożitati qabel dik id-data.

(2)

Skont l-Artikolu 2 tal-Att dwar il-kundizzjonijiet tal-adeżjoni tal-Kroazja u l-aġġustamenti għat-Trattat dwar l-Unjoni Ewropea, it-Trattat dwar il-Funzjonament tal-Unjoni Ewropea u t-Trattat li jistabbilixxi l-Komunità Ewropea tal-Enerġija Atomika (“l-Att dwar il-kundizzjonijiet tal-Adeżjoni”), mid-data tal-adeżjoni, id-dispożizzjonijiet tat-Trattati oriġinali u l-atti adottati mill-istituzzjonijiet qabel l-adeżjoni għandhom jorbtu lill-Kroazja taħt il-kundizzjonijiet stabbiliti f’dawk it-Trattati u fl-Att li jikkonċernaw il-kundizzjonijiet tal-adeżjoni.

(3)

It-territorju ta’ Neum (“Kuridur Neum”) huwa post fejn it-territorju tal-Bożnja u Ħerzegovina jasal sal-Kosta Adrijatika, u hekk jissepara ż-żona ta’ Dubrovnik mill-bqija tat-territorju tal-Kroazja. It-turiżmu huwa ta’ importanza sinifikanti għall-ekonomija lokali, li hija mmexxija minn intrapriżi ta’ daqs żgħir u medju dipendenti fuq provvisti mill-bqija tat-territorju tal-Kroazja. Il-valur ta’ tali forniment ġeneralment ma jaqbiżx l-EUR 10 000 għal kull kunsinna u 89 % ta’ dawk l-oġġetti għandhom l-istatus ta’ merkanzija għal ċirkolazzjoni ħielsa fit-territorju tal-Kroazja.

(4)

L-Artikolu 43 tal-Att li jikkonċerna l-kundizzjonijiet tal-adeżjoni jistipula li l-Kunsill, waqt li jaġixxi b’maġġoranza kwalifikata fuq proposta mill-Kummissjoni, għandu jiddefinixxi l-kundizzjonijiet li taħthom ir-rekwiżiti għal dikjarazzjoni sommarja ta’ dħul jew ħruġ jistgħu jiġu mneħħija rigward merkanzija li tkun qed tinġarr permezz tal-Kuridur Neum.

(5)

Skont l-Artikoli 36a, 36b, 182a u 182b tar-Regolament tal-Kunsill (KEE) Nru 2913/92 tat-12 ta’ Ottubru 1992 li jistabbilixxi l-Kodiċi Doganali tal-Komunità (1) (“il-Kodiċi Doganali tal-Komunità”), merkanzija li tiddaħħal jew toħroġ mit-territorju doganali tal-Unjoni għandha tkun koperta, bil-quddiem, b’dikjarazzjoni fil-qosor sottomessa elettronikament li jkun fiha d-dettalji meħtieġa għat-twettiq tal-analiżi tar-riskju.

(6)

Minħabba l-karatteristiċi speċifiċi tal-ekonomija lokali huwa xieraq li jsir provvediment għal eżenzjonijiet mill-obbligu li jiġu preżentati dikjarazzjonijiet fil-qosor tad-dħul u l-ħruġ għal merkanzija tal-Unjoni li taqsam il-Kuridur Neum.

(7)

L-awtoritajiet doganali għandhom iwettqu analiżi tar-riskju effettiva u l-kontrolli doganali tas-sigurtà fuq il-bażi tad-dejta preżenti fuq il-fattura u tad-dokumenti tat-trasport li jakkumpanjaw il-merkanzija.

(8)

L-arranġamenti attwali jidderogaw mill-prinċipju elettroniku ta’ sottomissjoni elettronika ta’ qabel it-tluq u ta’ qabel il-wasla tad-dejta tas-sikurezza u sigurtà stabbilita taħt il-Kodiċi Doganali tal-Komunità. Sabiex tiżgura analiżi tar-riskju effettiv u effiċjenti u kontrolli għall-għanijiet ta’ sikurezza u sigurtà, il-Kroazja għandha tiżgura li l-punti tal-qsim tal-fruntiera fil-Kuridur Neum ikollhom ir-riżorsi umani, tagħmir u kontrolli neċessarji.

(9)

Meta kunsinna tkun instabet li ma tissodisfax ir-rekwiżiti ta’ dan ir-Regolament, il-kunsinna in kwistjoni ma għandhiex titħalla terġa’ tidħol fit-territorju tal-Kroazja sakemm ma ssirx stima tar-riskji involuti u jiġu adottati miżuri effettivi u mmirati bbażati fuq analiżi tar-riskju.

(10)

Minbarra l-iskambju ta’ tagħrif għall-finijiet ta’ sikurezza u sigurtà kif provdut taħt l-Artikolu 4g(2) tar-Regolament (KEE) Nru 2454/93 tat-2 ta’ Lulju 1993 li jiffissa d-dispożizzjonijiet għall-implementazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (2), il-Kroazja għandha tinforma lill-Kummissjoni regolarment taħt il-proċeduri ta’ Qafas Komuni għall-Ġestjoni tar-Riskju dwar irregolaritajiet misjuba u, fejn applikabbli, tal-miżuri adottati sussegwentement rigward iċ-ċaqliq tal-merkanzija min-naħa għall-oħra tal-Kuridur Neum.

(11)

Evalwazzjoni għall-fini tal-verifika ta’ applikazzjoni korretta ta’ dan ir-Regolament għandha ssir mill-Kummissjoni mhux aktar tard minn sentejn wara d-data tal-adeżjoni tal-Kroazja,

(a)

ir-rekwiżit għal dikjarazzjoni fil-qosor tal-ħruġ tkun eżentata għal merkanzija tal-Unjoni li tkun ħierġa mit-territorju tal-Kroazja biex jaqsmu l-Kuridur Neum;

(b)

ir-rekwiżit għal dikjarazzjoni fil-qosor tad-dħul hija eżentata għal merkanzija tal-Unjoni meta terġa’ tidħol fit-territorju tal-Kroazja wara li tkun qasmet il-Kuridur Neum.

(1)

“merkanzija tal-Unjoni” tfisser il-merkanzija definita fl-Artikolu 4(7) tal-Kodiċi Doganali tal-Komunità;

(2)

“iż-żona ta’ Dubrovnik” tfisser Dubrovnik u ż-żona ta’ madwarha fit-territorju tal-Kroazja li hija sseparata mill-Kuridur Neum mit-territorju kontinentali tal-Kroazja;

(3)

“it-territorju kontinentali tal-Kroazja” tfisser it-territorju tal-Kroazja ħlief għaż-żona ta’ Dubrovnik;

(4)

“Il-Kuridur Neum” tfisser iż-żona li hi parti mit-territorju tal-Bożnja u Ħerzegovina li tissepara ż-żona ta’ Dubrovnik mit-territorju kontinentali tal-Kroazja;

(5)

“Awtoritajiet doganali” tfisser l-awtoritajiet doganali tal-Kroazja fil-punti tal-qsim tal-fruntieri tal-ħruġ u d-dħul tal-Kuridur Neum;

(6)

“Ħruġ” tfisser il-ħruġ ta’ merkanzija, jew miż-żona ta’ Dubrovnik fit-territorju kontinentali tal-Kroazja permezz tal-Kuridur Neum, jew mit-territorju kontinentali tal-Kroazja fiż-żona ta’ Dubrovnik permezz tal-Kuridur Neum;

(7)

“Dħul mill-ġdid” tfisser id-dħul ta’ merkanzija fiż-żona ta’ Dubrovnik mit-territorju kontinentali tal-Kroazja permezz tal-Kuridur Neum, jew fit-territorju kontinentali tal-Kroazja miż-żona ta’ Dubrovnik permezz tal-Kuridur Neum;

(a)

Il-valur totali ta’ kull kunsinna ta’ merkanzija tal-Unjoni mċaqalqa min-naħa għall-oħra tal-Kuridur Neum ma jaqbiżx EUR 10 000 jew l-ekwivalenti fil-munita lokali;

(b)

Il-merkanzija msemmija fil-punt (a) ta’ dan l-Artikolu tiġi akkumpanjata minn fatturi jew dokumenti tat-trasport li: