15.5.2013   

MT

Il-Ġurnal Uffiċjali tal-Unjoni Ewropea

L 131/1

(1)

Il-Kummissjoni, bir-Regolament (UE) Nru 1072/2012 (2) (“ir-Regolament provviżorju”), imponiet dazju antidumping provviżorju fuq l-importazzjonijiet ta' oġġetti taċ-ċeramika li jintuzaw fuq il-mejda u fil-kċina li joriġinaw mir-Repubblika Popolari taċ-Ċina (“RPĊ” jew “il-pajjiż ikkonċernat”).

(2)

Il-proċedura bdiet wara lment li ġie ppreżentat fis-16 ta’ Frar 2012 (3) f’isem il-produtturi tal-UE (“il-kwerelanti”), li jirrappreżentaw aktar minn 30 % tal-produzzjoni totali tal-Unjoni ta’ oġġetti taċ-ċeramika li jintużaw fuq il-mejda u fil-kċina.

(3)

Kif stipulat fil-premessa (22) tar-Regolament proviżorju, l-investigazzjoni ta’ dumping u ħsara kopriet il-perjodu mill-1 ta’ Jannar 2011 sal-31 ta’ Diċembru 2011 (“il-perjodu ta’ investigazzjoni” jew il-“PI”). L-eżami tax-xejriet relevanti għall-evalwazzjoni tal-ħsara kopra l-perjodu mill-1 ta’ Jannar 2008 sa tmiem il-PI (il-“perjodu kkunsidrat”).

(4)

Wara li ġew żvelati l-fatti u l-kunsiderazzjonijiet essenzjali, li abbazi tagħhom ġie deċiż li jkun impost dazju proviżorju tal-antidumping (“żvelar proviżorju”), għadd ta’ partijiet interessati ressqu sottomissjonijiet bil-miktub li bihom urew il-fehmiet tagħhom dwar is-sejbiet proviżorji. Il-partijiet li għamlu din it-talba ngħataw opportunità li jinstemgħu. Żewġ importaturi u produttur esportatur wieħed talbu u ngħataw smigħ fil-preżenza tal-Uffiċjal tas-Seduta tad-Direttorat Ġeneral għall-Kummerċ.

(5)

Il-Kummissjoni kompliet tfittex u tivverifika l-informazzjoni kollha li dehrilha li kienet meħtieġa għas-sejbiet definittivi tagħha. Il-kummenti verbali u bil-miktub ippreżentati mill-partijiet interessati tqiesu u, fejn xieraq, is-sejbiet proviżorji ġew immodifikati skont dan.

(6)

Barra minn hekk, kif spjegat fil-premessa (55) hawn taħt, saret żjara ta' verifika lil produttur Tajlandiż li l-għan tagħha kien li tkun investigata l-idoneita tat-Tajlandja bħala pajjiż analogu xieraq.

(7)

Sussegwentement, il-partijiet kollha kienu infurmati bil-fatti u l-konsiderazzjonijiet essenzjali li fuq il-bażi tagħhom huwa maħsub li tkun rakkomandata l-impożizzjoni ta’ dazju antidumping definittiv fuq importazzjonijiet ta’ oġġetti taċ-ċeramika li jintużaw fuq il-mejda u fil-kċina, li joriġinaw fir-RPĊ u l-ġbir definittiv tal-ammonti garantiti permezz tad-dazju provviżorju (“divulgazzjoni finali”). Il-partijiet kollha ngħataw perjodu li fih setgħu jagħmlu kummenti dwar id-divulgazzjoni finali. Il-Kamra tal-Kummerċ taċ-Ċina għall-Importazzjoni u l-Esportazzjoni ta' Prodotti Industrijali Żgħar u Prodotti Artistiċi u Artiġjanali (Chinese Chamber of Commerce for Import and Export of Light Industrial Products and Arts-crafts (CCCLA)) u grupp ta' importatuti talbu u ngħataw id-dritt li jinstemgħu il-preżenza tal-Uffiċjal tas-Seduta tad-Direttorat Ġenerali għall-Kummerċ.

(8)

Il-kummenti sottomessi mill-partijiet interessati ġew ikkunsidrati u tqiesu fejn kien xieraq.

(9)

Wara d-divulgazzjoni provviżorja, diversi partijiet interessati appellaw il-kampjun tal-produtturi esportaturi mir-RPĊ u argumentaw li l-kampjun ma kienx wieħed rappreżentattiv, peress li hu bbażat biss fuq l-ikbar volumi esportati u għaldaqstant ma kkunsidrax fatturi oħra li jikkaratterizzaw id-diversità u l-frammentazzjoni tal-industrija taċ-ċeramika fir-RPĊ.

(10)

Skont l-Artikolu 17(1) tar-Regolament (KE) Nru 1225/2009 (“ir-Regolament bażiku”), l-għażla tal-kumpaniji li għandhom ikunu inklużi fil-kampjun tista' tkun limitata għall-ikbar volum rappreżentattiv ta' esportazzjonijiet li jistgħu jkunu investigati b'mod raġonevoli fiż-żmien disponibbli. Fl-isfond tal-frammentazzjoni tal-industrija, ġie kkunsidrat li għażla bbażata fuq volumi ta' esportazzjoni jippermettu kampjun rappreżentattiv li jista' jkun investigat fiż-żmien disponibbli. F'dan ir-rigward, għandu madanakollu jkun innutat li l-kumpaniji magħżula jinsabu fi tliet reġjuni differenti fir-RPĊ u għandhom produzzjoni sinifikanti tal-prodott ikkonċernat ta' tipi differenti ta' materjal taċ-ċeramika, pereżempju l-porċellana u oġġetti tal-ġebel kif ukoll produzzjoni ta' varjetà wiesgħa ta' tipi ta' prodotti. B'hekk, din l-allegazzjoni ma tistax tiġi milqugħa.

(11)

Produttur esportatur wieħed talab li l-użu ta' metodoloġiji differenti għall-għażla tal-kampjun għall-industrija u l-importaturi tal-Unjoni kif imqabbla mal-ikkampjunar ta' produtturi esportaturi jwassal għal diskriminazzjoni u li għandhom jintużaw l-istess kriterji L-użu ta' metodoloġiji differenti huwa diskriminatorju fil-konfront ta' produtturi esportaturi u jmur kontra t-trattament ugwali.

(12)

L-għażla ta' kampjun ta' produtturi esportaturi sservi biss biex tkun investigata l-eżistenza ta' dumping tal-prodott ikkonċernat mir-RPĊ. F'dan ir-rigward, huwa essenzjali li jkun kopert il-volum massimu ta' importazzjonijiet tal-prodott ikkonċernat fil-perjodu ta' investigazzjoni. Min-naħa l-oħra, il-kampjun ta' produtturi tal-Unjoni ntgħażel sabiex ikun determinat jekk l-industrija tal-Unjoni kinetx qed tbati minn dannu materjali abbażi ta' diversi indikaturi differenti. Rigward l-importaturi, l-informazzjoni miġbura fil-biċċa l-kbira hija użata fil-valutazzjoni tal-interess tal-Unjoni. Jirriżulta li għall-importaturi u l-produtturi tal-Unjoni, huwa importanti li tinġabar informazzjoni minn firxa ta' kumpaniji attivi pereżempju, f'segmenti differenti tal-prodott. Peress li l-motivazzjoni sottostanti għall-għażla tal-kumpaniji li għandhom ikunu inklużi fil-kampjuni hija differenti, il-produtturi u l-importaturi tal-Unjoni u min-naħa l-oħra, il-produtturi esportaturi, mhumiex f'sitwazzjoni simili. Għaldaqstant, la l-prinċipju ta' nondiskriminazzjoni u lanqas it-trattament ugwali ma jirrikjedu l-użu ta' metodoloġija identika għall-għażla ta' kampjuni rispettivi. Jirriżulta li din it-talba hija għal kollox mhux iġġustifikata u għaldaqstant hija miċħuda.

(13)

Barra minn hekk, produttur/esportatur żamm it-talba tiegħu kif imsemmi fil-premessa (8) tar-Regolament provviżorju, li kellu jkun inkluż fil-kampjun. Madankollu, l-kumpanija ma ppreżentat ebda argument ġdid li jiġġustifika l-inklużjoni tagħha fil-kampjun. Għaldaqstant, u b'kunsiderazzjoni għas-sejbiet fil-premessa (10) hawn fuq, il-konklużjonijiet fil-premessa (9) tar-Regolament provviżorju huma permezz ta' dan ikkonfermati.

(14)

L-istess produttur esportatur li ma ġiex inkluż fil-kampjun ilmenta li ma ngħatax biżżejjed żmien biex jissottometti l-kummenti tiegħu dwar id-divulgazzjoni finali u li, barra minn hekk, id-divulgazzjoni kienet insuffiċjenti peress li ma ddivulgatx, pereżempju, iċ-ċifri tal-allowances, tal-prezzijiet tal-bejgħ, l-aġġustamenti eċċ. Għaldaqstant id-drittijiet tad-difiża tiegħu ma ġewx irrispettati.

(15)

Skont l-Artikolu 20(5) tar-Regolament bażiku, parti interessata għandha tingħata perjodu ta' żmien ta' mill-inqas għaxart (10) ijiem biex tissottometti l-kummenti dwar id-divulgazzjoni finali. Il-produttur/esportatur inkwistjoni rċieva d-divulgazzjoni finali permezz ta' posta elettronika fil-25 ta' Frar 2013 u ngħata sat-8 ta' Marzu 2013, jiġifieri 11-il ġurnata biex jissottometti kummenti. Barra minn hekk, id-dokument ta' divulgazzjoni intbagħat ukoll l-għada permezz ta' posta rreġistrata. Jirriżulta li l-parti kkonċernata ngħatat żmien biżżejjed biex tissottometti l-kummenti u għaldaqstant, it-talba tagħha għandha tiġi miċħuda. F'dan ir-rigward, ta' min wieħed jinnota wkoll li l-kummenti tal-parti kienu pprovduti sal-iskadenza u ma saret ebda talba għal estensjoni tad-data tal-iskadenza. Barra minn hekk, b'kunsiderazzjoni għall-obbligu tagħha li tħares il-kunfidenzjalità tal-informazzjoni, il-Kummissjoni ddivulgat il-fatti u l-kunsiderazzjonijiet essenzjali kollha li abbażi tagħhom hija kellha l-intenzjoni li tipproponi l-impożizzjoni ta' miżuri definittivi. B'mod aktar partikolari, ir-rispett għad-drittijiet tad-difiża ma jirrikjedix li ċifri tal-bejgħ speċifiċi għal kumpanija jew allowances li jingħataw lil kumpaniji inklużi fil-kampjun, użati biex ikunu stabbiliti marġni individwali ta' dumping, għandhom ikunu kkomunikati lil parti li għaliha ma ġie kkalkulat ebda marġni individwali.

(16)

Minn dak li għidna sa issa jirriżulta li l-ilment li d-drittijiet tad-difiża ma kinux irrispettati huwa mingħajr bażi u għaldaqstant huwa miċħud.

(17)

Kif stipulat fil-premessa 24 u l-premessi 56 u 57 tar-Regolament provviżorju, il-prodott ikkonċernat kif definit provviżorjament huwa oġġett taċ-ċeramika li jintuża fuq il-mejda u fil-kċina minbarra skieken taċ-ċeramika (“il-prodott ikkonċernat”), li bħalissa jaqa' taħt il-kodiċijiet tan-NM ex 6911 10 00, ex 6912 00 10, ex 6912 00 30, ex 6912 00 50 u ex 6912 00 90 u joriġina mir-Repubblika Popolari tar-RPĊ.

(18)

Wara d-divulgazzjoni provviżorja, ebda parti ma kkontestat li skieken taċ-ċeramika (tal-kċina) kienu fundamentalment differenti minn tipi oħra ta' oġġetti taċ-ċeramika li jintużaw fuq il-mejda jew fil-kċina minħabba differenzi fil-karatteristiċi fiżiċi, proċessi ta' produzzjoni u użi aħħarija. Wara li kienu analizzati l-kummenti kollha mill-partijiet, it-talba li s-skieken taċ-ċeramika jkunu esklużi mill-ambitu tal-prodott ta' din l-investigazzjoni hija aċċettata b'mod definittiv.

(19)

Wara pubblikazzjoni ta' miżuri provviżorji, diversi partijiet talbu li ċerti oġġetti taċ-ċeramika li jaħżnu kondiment jew imtieħen żgħar tal-ħwawar u l-partijiet taċ-ċeramika tagħhom li jitħnu, għandhom jiġu esklużi mill-ambitu tal-prodott.

(20)

Din it-talba hija bbażata fuq l-allegazzjoni li, minħabba l-karatteristiċi speċifiċi tagħhom, tali mtieħen u tipi oħra ta’ oġġetti taċ-ċeramika li jintużaw fuq il-mejda u fil-kċina ma jistgħux jitqiesu bħala li jifformaw prodott wieħed. Tali mtieħen għandhom materjal taċ-ċeramika magħmul minn alumina għall-platt tat-tħin li ma jintużax għall-oġġetti taċ-ċeramika “standard” li jintużaw fuq il-mejda bħall-kikkri u platti u li t-tisjir tagħhom isir f'temperaturi ogħla. Il-grad ta’ interkambjabilità tagħhom mal-kateogiriji ewlenin tal-prodott taħt investigazzjoni sejjer ikun limitat. Dan japplika wkoll għal mekkaniżmi taċ-ċeramika tat-tħin mingħajr ebda qafas li normalment huma ddikjarati taħt il-kodiċijiet imsemmija hawn fuq.

(21)

L-investigazzjoni wriet li l-element taċ-ċeramika f'dawn l-imtieħen normalment jirrappreżenta parti żgħira mill-mitħna. Barra minn hekk, l-investigazzjoni wriet li l-imtieħen li għandhom platt tat-tħin taċ-ċeramika, inklużi l-partijiet tat-tħin tagħhom taċ-ċeramika, ma kellhomx l-istess karatteristiċi fiżiċi bażiċi u użi bażiċi bħall-oġġetti taċ-ċeramika li jintużaw fuq il-mejda u fil-kċina. Il-forma, is-saħħa u d-disinn tal-partijiet taċ-ċeramika li jitħnu huma differenti mill-oġġetti taċ-ċeramika li jintużaw fuq il-mejda u fil-kċina.

(22)

Xi partijiet issottomettew li l-imtieħen inkwistjoni għandhom ikunu esklużi mill-ambitu tal-prodott fuq il-bażi li għandhom l-istess karatteristiċi fiżiċi, disinn industrijali u użu aħħari bħala mtieħen b'mekkaniżmi ta' tħin tal-metall u li meta jkunu inklużi f'ċertu settijiet ta' mtieħen, normalment jiġu kklassifikati taħt l-intestatura tariffarja 8210. Huma sostnew ukoll li f'dawn iċ-ċirkustanzi, l-elementi taċ-ċeramika ġeneralment jirrappreżentaw sa 2 % tal-valur tal-prodott. Madankollu, minħabba d-diversi possibbiltajiet ta' klassifikazzjoni ta' mtieħen u settijiet ta' mtieħen, l-investigazzjoni ma setgħetx iżżomm dawn l-argumenti biex tiddetermina jekk l-imtieħen taċ-ċeramika għandhomx jiġu esklużi mill-ambitu tal-prodott tal-investigazzjoni.

(23)

Diversi partijiet sostnew it-talba tagħhom li l-imtieħen inkwistjoni għandhom jiġu esklużi mill-ambitu tal-prodott fuq il-bażi li għal ċertu mtieħen, bħall imtieħen tal-melħ, ikun meħtieġ li jintużaw platti tat-tħin taċ-ċeramika iktar milli tal-metall, peress li l-melħ jikkorrodi l-imtieħen tal-metall. Madankollu, l-investigazzjoni wriet li l-imtieħen tal-melħ mhux neċessarjament jużaw mekkaniżmi li jitħnu taċ-ċeramika.

(24)

Abbażi tal-kunsiderazzjonijiet fil-premessi ta' hawn fuq, l-investigazzjoni kkonkludiet li l-imtieħen tal-kondimenti u tal-ħwawar b'elementi li jitħnu taċ-ċeramika huma fundamentalment differenti minn tipi oħra ta' ċeramika użata għal oġġetti li jintużaw fuq il-mejda u fil-kċina minħabba d-differenzi fil-karatteristiċi fiżiċi bażiċi u minħabba l-użi tal-materjal taċ-ċeramika użat għall-partijiet tal-mekkaniżmu. Għaldaqstant, it-talba sabiex jiġu esklużi, inklużi mekkaniżmi indipendenti li jitħnu taċ-ċeramika u l-partijiet tagħhom, mill-ambitu tal-prodott ta' din l-investigazzjoni, hija aċċettata.

(25)

Wara l-pubblikazzjoni ta' miżuri provviżorji, xi partijiet talbu li senniena tas-skieken taċ-ċeramika għandhom jiġu esklużi mill-ambitu tal-prodott minħabba differenzi fil-proċessi ta' produzzjoni, użu aħħari u l-fatt li dawn l-oġġetti mhumiex immirati biex iżommu prodott tal-ikel minħabba d-disinn speċifiku u l-karatteristiċi fiżiċi tagħhom. L-investigazzjoni kkonfermat dawn il-punti. Għaldaqstant, it-talba sabiex dawn l-oġġetti jiġu esklużi mill-ambitu tal-prodott ta’ din l-investigazzjoni ġiet aċċettata.

(26)

Fl-istess waqt, kien investigat ukoll jekk għodod li jqaxxru l-frott u l-ħaxix magħmula miċ-ċeramika għandhomx jiġu esklużi mill-ambitu tal-prodott. Tabilħaqq, l-investigazzjoni kkonfermat li għodod li jqaxxru l-frott u l-ħaxix magħmula miċ-ċeramika, huma fundamentalment differenti minn tipi oħra ta' oġġetti taċ-ċeramika li jintużaw fuq il-mejda u fil-kċina minħabba d-differenzi fid-disinn u l-karatteristiċi fiżiċi (forma u saħħa) tal-materjal taċ-ċeramika użat għall-partijiet tal-mekkaniżmu, fil-proċessi tal-produzzjoni tagħhom u l-użu aħħari. Għodod li jqaxxru l-frott u l-ħaxix magħmula miċ-ċeramika, għaldaqstant għandhom ikunu esklużi mill-ambitu tal-prodott ta' din l-investigazzjoni

(27)

Wara l-pubblikazzjoni ta' miżuri provviżorji, parti talbet ukoll li ġebel tal-pizza magħmul minn ċeramika cordierite għandu jiġi eskluż mill-ambitu tal-prodott minħabba l-karatteristiċi fiżiċi speċifiċi tiegħu (forma u ebusija), disinn industrijali u użu. Ċeramika cordierite hija tip ta' alumina magnesia silicate b'karatteristiċi speċifiċi, jiġifieri reżistenza eċċellenti għal xokkijiet termali. L-investigazzjoni kkonfermat li ġebel tal-pizza magħmul minn ċeramika cordierite għandu l-istess karatteristiċi (forma u ebusija), disinn industrijali u użu bħall-briks għall-fuklari ta' bajla jew il-fran. Konsegwentement, huma differenti minn oġġetti taċ-ċeramika oħra li jintużaw fuq il-mejda jew fil-kċina. Waqt id-divulgazzjoni finali, il-kwerelanti nnutaw is-similarità tal-ġebel tal-pizza magħmul minn ċeramika cordierite kif imqabbel ma' prodotti oħra koperti mill-proċediment. Madankollu ma setgħux juru li l-ġebel tal-pizza magħmul miċ-ċeramika cordierite għandu l-istess karatteristiċi fiżiċi u użi aħħarija. Għaldaqstant, it-talba sabiex dawn l-oġġetti jiġu esklużi mill-ambitu tal-prodott ta’ din l-investigazzjoni ġiet aċċettata.

(28)

Wara l-pubblikazzjoni ta' miżuri provviżorji, assoċjazzjoni Olandiża talbet li oġġetti taċ-ċeramika li jintużaw fuq il-mejda jew fil-kċina, li għandhom jintużaw bħala prodotti promozzjonali għandhom jiġu esklużi mill-ambitu tal-prodott fuq il-bażi li mhumiex mibjugħa biex jintużaw fuq il-mejda jew fil-kċina, li huma katalizzatur ekonomiku importanti għas-settur tal-bejgħ bl-imnut, li huma apprezzati ħafna mill-konsumaturi u li produtturi mir-RPĊ biss jistgħu joffru l-kwantitajiet meħtieġa f'perjodu qasir. It-talba sabiex oġġetti taċ-ċeramika li jintużaw fuq il-mejda u fil-kċina, li se jintużaw bħala prodotti promozzjonali jiġu esklużi mill-ambitu tal-prodott ta' din l-investigazzjoni, ma tistax madanakollu tiġi aċċettata minħabba li l-karatteristiċi fiżiċi, il-proċessi ta' produzzjoni u l-użu aħħari huma l-istess bħal dawk ta' tipi oħra ta' ċeramika li tintuża fuq il-mejda u fil-kċina.

(29)

Wara li kienu ppubblikati miżuri provviżorji u għal darb'oħra wara d-divulgazzjoni finali, importatur u bejjiegħ bl-imnut Ġermaniż u produttur esportatur Ċiniż li kkoopera talbu li prodotti tal-ġebel miksija b'taħlita speċjali tat-tip tal-proċess tal-istampar bis-sublimazzjoni u li għalihom il-kisi ta' sublimazzjoni jista' jitneħħa billi jinbarax b'mod mekkaniku, għandhom jiġu esklużi mill-ambitu tal-prodott peress li huma prodotti mhux kompluti għal kollox (semi-finished) u li l-photofinishing tagħhom fl-Unjoni jsir permezz ta' kanali speċifiċi, minħabba l-perspettiva differenti tal-konsumaturi, il-fatt li l-kisja ta' sublimazzjoni taqbeż il-valur tal-oġġetti taċ-ċeramika mhux miksija u l-ineżistenza ta' produtturi tal-Unjoni ta' dan it-tip ta' prodott. L-investigazzjoni żvelat li l-prodott huwa viżibbilment identiku għal prodotti oħra li jintużaw fuq il-mejda mingħajr sublimazzjoni, u li għaldaqstant, diffiċli li ssir distinzjoni bejniethom, jekk hemm. L-investigazzjoni wriet ukoll li dawn il-prodotti normalment għandhom l-istess użu aħħari bħat-tipi l-oħra ta' prodotti taċ-ċeramika li jintużaw fuq il-mejda. L-investigazzjoni sabet ukoll li bosta produtturi tal-Unjoni jimmanifatturaw dawn il-prodotti u li l-prodotti importati u dawk magħmula fl-Unjoni huma f’kompetizzjoni diretta. Fl-isfond ta' dak li ntqal, it-talba biex jiġu esklużi prodotti tal-ġebel miksija tat-tip għall-proċess tal-istampar bis-sublimazzjoni, hija miċħuda.

(30)

Wara l-pubblikazzjoni ta' miżuri provviżorji u għal darb'oħra wara d-divulgazzjoni finali, l-importatur li kien talab l-esklużjoni ta' prodotti li jintużaw fuq il-mejda figurattivi u mpittra bl-idejn qabel ma jingħata l-verniċ mill-ambitu tal-prodott, allega li l-analiżi provviżorja tal-Kummissjoni f'dan ir-rigward kienet żbaljata minħabba li injorat l-eżistenza ta' segmenti tas-suq, id-differenzi fil-kwalità bejn it-tipi differenti ta' prodotti li jintużaw fuq il-mejda, in-natura lussuża u iktar fraġli ta' prodotti li jintużaw fuq il-mejda figurattivi u mpittra bl-idejn qabel ma jingħata l-verniċ u l-interkambjalità limitata bħala konsegwenza tal-perċezzjoni relatata tal-konsumatur. Huwa allega wkoll li prodotti li jintużaw fuq il-mejda figurattivi u mpittra bl-idejn qabel ma jingħata l-verniċ, jistgħu jintużaw ukoll bħala dekorazzjoni.

(31)

Fir-rigward tat-talbiet dwar id-differenzi fil-kwalità bejn it-tipi differenti ta' prodotti li jintużaw fuq il-mejda u prodotti li jintużaw fuq il-mejda figurattivi u mpittra bl-idejn qabel ma jingħata l-verniċ, dawn il-karatteristiċi mhumiex speċifiċi għal prodotti li jintużaw fuq il-mejda figurattivi u mpittra bl-idejn qabel ma jingħata l-verniċ. Barra minn hekk, fir-rigward ta' interkambjalità limitata bħala konsegwenza ta' perċezzjoni relatata tal-konsumatur, ma tqajjem ebda argument ġdid li jbiddel il-konklużjoni tal-premessa 45 tar-Regolament provviżorju li l-konsumatur medju ma jagħmilx differenza bejn prodotti li jintużaw fuq il-mejda figurattivi u mpittra bl-idejn qabel ma jingħata l-verniċ u tipi oħra ta' prodotti taċ-ċeramika li jintużaw fuq il-mejda. Fl-aħħar nett, il-Kummissjoni kienet analizzat l-eżistenza ta' segmenti tas-suq fil-premessi 157 sa 158 tar-Regolament provviżorju. Għaldaqstant dawn l-argumenti ma jistgħux ireġġgħu lura l-konklużjonijiet tal-premessa 45 tar-Regolament provviżorju.

(32)

It-talba mressqa fil-premessa 50 tar-Regolament provviżorju kienet elaborata iktar wara l-impożizzjoni ta' miżuri provviżorji. Dawn it-talbiet kienu mtennija wara d-divulgazzjoni definittiva. L-importatur bi produzzjoni fir-RPĊ talab li prodotti li jintużaw fuq il-mejda/fil-kċina li l-wiċċ tagħhom huwa 100 % miksi għal kollox bil-verniċ jew bl-enemel minbarra l-qiegħ jew parti minnu, u fejn 100 % mill-wiċċ huwa miksi bil-verniċ jew l-enemel huwa kkulurit b'kulur li mhux abjad, għandhom jiġu esklużi mill-ambitu tal-prodott. It-talba kienet analizzata kif dovut u l-investigazzjoni wriet li l-karatteristiċi fiżiċi, il-proċessi tal-produzzjoni u l-użi aħħarija ta' dawn il-prodotti huma l-istess bħal dawk ta' oġġetti taċ-ċeramika li jintużaw fuq il-mejda u fil-kċina li huma miksija bil-verniċ jew bl-enemel. Għalhekk, it-talba ġiet definittivament miċħuda.

(33)

Ic-CCCLA insistiet li l-porċellana fina għandha tiġi eskluża mill-ambitu tal-prodott tal-investigazzjoni abbażi tal-lussu u l-fraġilità tal-prodott li għandu saħħa mekkanika baxxa u kkontestat ukoll jekk hijiex reżistenti milli tixxellef. Madankollu huwa nnutat li s-CCCLA stess preċedentement issottomettiet li l-porċellana fina kellha saħħa mekkanika għolja u kienet reżistenti milli tixxellef. Dawn id-dikjarazzjonijiet kontradittorji ċertament dgħajfu t-talbiet tas-CCCLA. Fi kwalunkwe każ, l-argumenti mqajma ma jibdlux il-konklużjonijiet imqassra fil-premessa 28 tar-Regolament provviżorju. Għaldaqstant, it-talba għall-esklużjoni tal-porċellana fina mill-ambitu tal-prodott hija għaldaqstant ċertament miċħuda.

(34)

L-istess parti tenniet li l-porċellana li ddum isservi għandha tiġi eskluża mill-ambitu tal-prodott tal-investigazzjoni. Hija lmentat li d-dikjarazzjoni li ma fihiex karatteristiċi mhux ikkontestati mhix vera, u li kienet b'saħħitha ħafna minħabba kontenut ta' iktar minn 24 % ta' tafal u aluminju u mbagħad ikkontestat il-kapaċità ta' manifattura tal-Unjoni għal dan il-prodott. Madankollu, is-sottomissjonijiet differenti dwar porċellana li sservi ħafna huma kontradittorji fir-rigward pereżempju tal-proporzjonijiet tal-materja prima u l-kontenut tat-trab tal-alumina. Madanakollu, ma kienx ikkontestat li l-porċellana li sservi kienet manifatturata wkoll fl-Unjoni u li l-produtturi fir-RPĊ pproduċew porċellana sostenibbli li kienet f'kompetizzjoni diretta mal-porċellana li sservi manifatturata fl-Unjoni kif ukoll ma' prodotti oħra koperti mill-investigazzjoni. Għaldaqstant it-talba biex il-porċellana li sservi tiġi eskluża hija definittivament miċħuda.

(35)

It-tipi kollha ta' prodotti taċ-ċeramika li jintużaw fuq il-mejda jew fil-kċina jistgħu jkunu meqjusa bħala tipi differenti tal-istess prodott. Għaldaqstant, it-talba li saret wara d-divulgazzjoni provviżorja u għal darb'oħra wara d-divulgazzjoni finali li l-investigazzjoni tkopri firxa kbira ta' prodotti simili u li konsegwentement ikun meħtieġ li jsiru analiżi separati dwar il-pożizzjoni, id-dumping, id-dannu, il-kawżalità u l-interess tal-Unjoni għal kull segment tal-prodott, instab li hija bla bażi. Parti li lmentat li l-ambitu tal-prodott huwa wiesa' wisq, ressqet paragun ta' prodotti b'livelli differenti ta' dekorazzjoni, iżda d-dikjarazzjonijiet tagħha rigward l-użu aħħari (f'każ minnhom għall-ġnien u għat-tfal, u f'każ ieħor għal dekorazzjoni) huma diskutibbli minħabba li ma hemmx distinzjoni ċara u dawk id-dikjarazzjonijiet jistgħu jidhru iktar bħala konferma tal-punt li sar fil-premessa 55 tar-Regolament provviżorju. Għandu jkun innutat ukoll li importatur bi produzzjoni fir-Repubblika Popolari taċ-Ċina issottometta li iktar minn 99 % tal-prodotti taċ-ċeramika li jintużaw fuq il-mejda u fil-kċina li jinbiegħu fl-Unjoni kienu b'mod predominanti jew esklussiv bojod. Xi partijiet ikkontestaw il-premessa 58 tar-Regolament provviżorju fuq il-bażi li fil-kuntest tal-investigazzjoni, l-istituzzjonijiet ma wettqu ebda test dwar jekk ċertu merkanzija kinetx adattata għall-kummerċ ħieles fl-Unjoni. Madankollu, dan il-fatt ma' jtellifx il-konklużjoni tal-premessa 63 tar-Regolament provviżorju.

(36)

Fl-isfond ta' dak li ntqal sa issa, l-ambitu tal-prodott huwa definit b'mod definittiv bħala oġġett taċ-ċeramika li jintuża fuq il-mejda u fil-kċina minbarra skieken taċ-ċeramika, oġġetti taċ-ċeramika li jaħżnu kondiment jew imtieħen żgħar tal-ħwawar u l-partijiet taċ-ċeramika tagħhom li jitħnu, għodod li jqaxxru l-frott u l-ħaxix magħmula miċ-ċeramika, senniena tas-skieken taċ-ċeramika, ġebel tal-pizza taċ-ċeramika cordierite tat-tip użat għall-ħami tal-pizza jew il-ħobż, li joriġina mir-RPĊ, li bħalissa jaqa' taħt il-kodiċijiet tan-NM ex 6911 10 00, ex 6912 00 10, ex 6912 00 30, ex 6912 00 50 u ex 6912 00 90

(37)

Fin-nuqqas ta' kummenti oħra dwar il-prodott ikkonċernat u l-prodott simili, id-determinazzjonijiet kollha fil-premessi 24 sa 63 tar-Regolament provviżorju huma b'dan ikkonfermati.

(38)

Wara d-divulgazzjoni provviżorja, esportatur produttur, produttur mill-Unjoni u importatur wieħed ilmentaw li d-determinazzjoni tal-MET saret barra miż-żmien jiġifieri, wara l-perjodu ta' tliet xhur stabbilit fl-Artikolu 2(7)(c) tar-Regolament bażiku u li għaldaqstant l-investigazzjoni għandha tkun itterminata mingħajr impożizzjoni ta' kwalunkwe miżuri antidumping. Dan l-ilment b'relazzjoni għad-determinazzjoni tal-MET diġà kien sar fl-istadju provviżorju u kien miċħud mill-Kummissjoni fil-premessi 72 u 73 tar-Regolament provviżorju. Wara d-divulgazzjoni finali, ħames produtturi esportaturi oħra ressqu lment simili. Bħala sostenn għal dak l-ilment huma bbażaw fuq is-sentenzi tal-Qorti tal-Ġustizzja fil-każijiet Brosmann and Aokang Shoes (4).

(39)

L-ewwelnett huwa mfakkar li l-kawżi Brosmann u Aokang Shoes mhumiex rilevanti għall-valutazzjoni tal-legalità tal-analiżi tal-MET fl-investigazzjoni kurrenti peress li dawk il-każijiet, għall-kuntrarju ta' din l-investigazzjoni, jirrelataw ma' sitwazzjonijiet fejn il-valutazzjonijiet MET totalment ma sarux.

(40)

Barra minn hekk, il-kawżi Brosmann u Aokang Shoes mhumiex rilevanti għall-valutazzjoni tal-legalità tal-investigazzjoni inkwistjoni, fid-dawl tal-fatt li r-Regolament bażiku sadanittant ġie emendat (5). Fi kwalunkwe eventwalità, l-Artikolu 2(7) tar-Regolament bażiku, kif emendat, jipprevedi li l-Kummissjoni għandha tagħmel determinazzjonijiet tal-MET biss fir-rigward ta' kumpaniji inklużi fil-kampjun skont l-Artikolu 17 tar-Regolament bażiku u li għandha tagħmel tali determinazzjoni fi żmien seba' xhur minn, imma fi kwalunkwe każ mhux iktar tard minn tmien xhur wara l-bidu tal-investigazzjoni, huwa applikabbli għall-investigazzjonijiet ġodda u pendenti kollha mill-15 ta' Diċembru 2012, inkluż għaldaqstant dik attwali.

(41)

Fi kwalunkwe każ, l-interpretazzjoni tal-ġurisprudenza li ma jkunx hemm ksur per se tad-dritt għal determinazzjoni tal-MET minkejja l-fatt li l-limitu ta’ żmien ta’ tliet xhur ma kienx rispettat, għandha tinżamm. Għalhekk, il-konklużjoni fil-premessa (73) tar-Regolament provviżorju għandha tinżamm.

(42)

Minħabba n-numru kbir ta' lmenti tal-MET li waslu u l-bżonn ta' dak iż-żmien li jitwettqu diversi żjarat ta' verifika biex dawk l-ilmenti jiġu eżaminati, id-determinazzjoni tal-MET ma saritx fi żmien seba' xhur. Madankollu, id-determinazzjonijiet saru fi żmien tmien xhur mid-data tal-bidu kif rikjest mir-Regolament bażiku, kif emendat bir-Regolament 1168/2012. L-allegazzjoni li kwalunkwe dritt f'dan ir-rigward tneħħa b'effett retroattiv mhux iġġustifikat kif spjegat hawn fuq.

(43)

Fl-isfond ta' dak li ntqal, it-talba li l-investigazzjoni antidumping għandha tiġi tterminata mingħajr impożizzjoni ta' kwalunkwe miżura antidumping, minħabba li ma saritx determinazzjoni tal-MET fi żmien tliet xhur, hija miċħuda.

(44)

Barra minn hekk, produttur esportatur wieħed li mhux parti mill-kampjun li ma weriex li għandu sett ċar ta' rekords tal-kontabbiltà li kienu awditjati b'mod indipendenti f'konformità mal-istandards internazzjonali tal-kontabbiltà u li għaldaqstant li kellu t-talba MET tiegħu miċħuda, sostna l-ilment li l-allegati żbalji ta' kontabbiltà, jekk kien hemm, li abbażi tagħhom it-talba tiegħu ġiet miċħuda, ma kinux materjali u li għaldastant, id-deċiżjoni li MET tiġi miċħuda kienet sproporzjonata u tikser il-prinċipju tal-proporzjonalità. Wara d-divulgazzjoni finali dan il-produttur esportatur tenna l-ilment tiegħu iżda ma ressaq ebda argument ġdid.

(45)

L-argumenti dwar is-severità tar-rekords tal-kontabbiltà huma essenzjalment identiċi għal dawk li saru matul l-investigazzjoni MET u li ġew miċħuda mill-Kummissjoni qabel id-determinazzjoni tal-MET. Minkejja dan, fir-rigward tal-argument li ċ-ċaħda tal-konċessjoni tal-MET tikser il-prinċipju tal-proporzjonalità, għandu jiġi mfakkar li l-kriterji MET stipulati fl-Artiolu 2(7)(c) tar-Regolament bażiku huma kumulattivi u sakemm ma jkunux kollha ssodisfati, il-MET legalment ma tistax tingħata. Barra minn hekk, minħabba li l-piż tal-prova qiegħed fuq il-kumpanija li titlob MET u l-kumpanija naqset milli turi li kellha sett ċar ta' kontijiet, l-unika għażla disponibbli għall-Kummissjoni kienet li tiċħad il-MET. Għaldaqstant, id-deċiżjoni li tiġi miċħuda MET ma tistax tkun ikkunsidrata li qed tikser il-prinċipju tal-proporzjonalità. Fi kwalunkwe każ, skont l-Artikolu 2(7)(d) tar-Regolament bażiku, kif emendat bir-Regolament 1168/2012 (6) meta l-Kummissjoni tkun illimitat l-analiżi tagħha bl-użu ta' kampjuni, determinazzjoni dwar MET għandha tkun limitata għall-partijiet inklużi fil-kampjun.

(46)

Wieħed għandu jiftakar li għalkemm 16-il produttur/esportatur talbu TI, l-ilmenti li waslu mill-kumpaniji fil-kampjun kienu eżaminati skont l-Artikolu 9(6) tar-Regolament bażiku u kienu sussegwentement aċċettati. Mill-11-il importatur esportatur li fadal, seba' talbu analiżi individwali.

(47)

Skont l-Artikoli 9(5) u 9(6) tar-Regolament bażiku, id-dazji individwali għandhom jiġu applikati għall-importazzjonijiet mingħand kull esportatur jew produttur li se jingħata eżami individwali, kif previsti fl-Artikolu 17(3) tar-Regolament bażiku. Għaldaqstant, l-erba' kumpaniji li talbu Trattament Individwali iżda mhux analiżi individwali ma setgħux jingħataw dazji individwali.

(48)

Produttur esportatur wieħed ilmenta li kien issottometta l-informazzjoni kollha meħtieġa sal-iskadenzi u għaldaqstant għandu jkollu t-talba għal TI tiegħu eżaminata u marġni individwali stabbilit skont id-deċiżjoni tal-Qorti tal-Ġustizzja fil-kawża Brosmann  (7).

(49)

Dan l-argument ma jistax jiġi aċċettat. Minħabba li l-kumpanija inkwistjoni ma kinetx inkluża fil-kampjun, it-talba tagħha għal Trattament Individwali tista' tkun valutata biss fil-kuntest ta' analiżi individwali, jekk issir waħda skont l-Artikolu 17(3) tar-Regolament bażiku.

(50)

Billi ma kien hemm l-ebda kumment ieħor dwar l-IT, il-premessi minn 79 sa 81 tar-Regolament provviżorju huma b’dan ikkonfermati.

(51)

Ġew sottomessi talbiet għal analiżi individwali skont l-Artiklu 17(3) tar-Regolament bażiku minn seba' importaturi esportaturi, li jkopru għaxar entitajiet legali. Kif spjegat fil-premessi 82 u 83 tar-Regolament provviżorju, ma ttieħdet ebda deċiżjoni fir-rigward ta' dawn it-talbiet fl-istadju tal-miżuri provviżorji.

(52)

Fil-21 ta' Diċembru 2012 il-produtturi esportaturi kienu infurmati li t-talbiet tagħhom għal analiżi individwali ma setgħux jiġu aċċettati peress li jkunu ta' piż żejjed u jevitaw it-tlestija tal-investigazzjoni fil-ħin dovut.

(53)

Produttur esportatur wieħed talab li, skont l-Artiklu 17(3) tar-Regolament bażiku, analiżi individwali hija dritt statutorju u li ċ-ċaħda tal-Kummissjoni li tanalizza individwalment mhix iġġustifikata peress li la n-numru ta' kumpaniji u lanqas l-analiżi meħtieġa ma jkunu, skont ir-riżorsi tal-Kummissjoni, ta' piż żejjed jew jipprevjenu t-tlestija tal-investigazzjoni fiż-żmien dovut. Wara d-divulgazzjoni dan l-ilment reġa' ġie mtenni, iżda ma tressaq ebda argument ulterjuri.

(54)

Id-deċiżjoni dwar jekk jiġux aċċettati jew le analiżijiet individwali jittieħdu fuq bażi ta' każ b'każ, filwaqt li jitqies l-għadd ta’ pretensjonijiet imressqa u ż-żmien disponibbli biex jiġu vvalutati dawn il-pretensjonijiet. F'dan il-każ, wieħed għandu jiftakar li l-Kummissjoni kienet legalment obbligata li twettaq analiżijiet MET f'16-il entità legali fir-RPĊ, inklużi kumpaniji mhux magħżula fil-kampjun. Meta wieħed iqis il-limitazzjonijiet taż-żmien imposti mill-iskadenzi proċedurali ġuridiċi, ebda analiżi individwali ma tista' titwettaq qabel is-sejbiet provviżorji. Fid-dawl taż-żmien limitat disponibbli minn dakinhar 'il quddiem, u b'kunsiderazzjoni għall-għadd ta' pretensjonijiet imressqa u r-riżorsi limitati disponibbli għas-servizzi responsabbli għall-investigazzjonijiet antidumping tal-Kummissjoni, ġie konkluż li f'dan il-każ, analiżi individwali tkun ta' piż żejjed.

(55)

Wara l-impożizzjoni ta' miżuri provviżorji, kienet eżaminata iktar l-għażla ta' pajjiż analogu xieraq. F'dan il-kuntest, twettqet żjara ta' verifika fil-bini tal-produttur/esportatur mit-Tajlandja li kien issottometta kwestjonarju mwieġeb, kif imsemmi fil-premessa 87 tar-Regolament provviżorju. Wara li l-informazzjoni li waslet kienet analizzata u vverifikata mill-produttur li kkoopera fit-Tajlandja, ġie madanakollu konkluż li l-produttur mit-Tajlandja ma setax jipprovdi dejta b'livell ta' dettall suffiċjenti rigward it-tipi ta' prodotti mibjugħa fis-suq domestiku. Għalhekk ġie kkunsidrat li l-Brażil għandu jinżamm bħala l-iktar pajjiż analogu xieraq.

(56)

Minkejja dan, l-informazzjoni miksuba mit-Tajlandja serviet biex ikunu appoġġjati s-sejbiet li saru fil-Brażil, speċjalment il-livell ta' differenza fil-prezz bejn prodotti tad-ditta u prodotti mingħajr ditta (ara l-premessa 91 iktar 'l isfel).

(57)

Wara d-divulgazzjoni finali, assoċjazzjoni industrijali waħda ressqet u kkontestat l-għażla tal-Brażil bħala pajjiż analogu xieraq. Essenzjalment hija argumentat li l-unika raġuni għalfejn intgħażel il-Brażil jidher li hija bbażata fuq il-fatt li ebda pajjiż ieħor ma kien xieraq. Dan l-argument ma jistax jiġi aċċettat. Jirriżulta b'mod ċar mill-premessi 84 sa 88 tar-Regolament provviżorju li l-Brażil kien meqjus bħala pajjiż analogu xieraq abbażi tas-sitwazzjoni fattwali tas-suq domestiku. Il-fatt li l-Kummissjoni wara miżuri provviżorji kompliet tanalizza wkoll pajjiżi analogi potenzjali, ma jwassalx għall-konklużjoni li l-Brażil mhux għażla xierqa.

(58)

Fl-isfond ta' dan ta' hawn fuq u fin-nuqqas ta' kwalunkwe kumment ieħor dwar is-sustanza fl-għażla tal-Brażil bħala l-pajjiż analogu xieraq, il-premessi 84 sa 88 tar-Regolament provviżorju huma kkonfermati.

(59)

Wara d-divulgazzjoni provviżorja, diversi partijiet interessati lmentaw li d-determinazzjoni tal-valur normali kienet żbaljata peress li allegatament ma ġietx stabbilita għall-bejgħ ta' prodotti simili fil-Brażil u għaldaqstant wasslet għal riżultati mgħawġa u inġusti b'mod partikolari fir-rigward ta' prodotti tal-ġebel u tipi oħra ta' prodotti li ma kinux manifatturati u mibjugħa fil-pajjiż analogu. Xi produtturi esportaturi argumentaw ukoll li l-metodoloġija għall-istabbiliment tal-valur normali kostruwit, imsemmi fil-premessa 94 tar-Regolament provviżorju, ma kenitx divulgata kif xieraq.

(60)

Il-kummenti li waslu wara d-divulgazzjoni provviżorja juru li l-metodoloġija użata għad-determinazzjoni tal-valur normali ma kenitx ċara għalkollox għal xi partijiet interessati. Sabiex ikunu indirizzati dawn il-kummenti, qed jiġi spjegat b'mod ulterjuri li l-metodoloġija għad-determinazzjoni tal-valur normali hija din li ġejja.

(61)

Fid-dawl tal-fatt li t-talbiet kollha għal MET ġew miċħuda, il-valur normali għall-produtturi esportaturi kollha inklużi fil-kampjun li joriġinaw mill-RPĊ, ġie stabbilit fuq il-bażi tal-informazzjoni li waslet mingħand il-produttur fil-pajjiż analogu, skont l-Artikolu 2(7)(a) tar-Regolament bażiku.

(62)

Skont l-Artikolu 2(2) tar-Regolament bażiku, il-Kummissjoni l-ewwel eżaminat jekk il-bejgħ tal-prodott simili fil-Brażil lil klijenti indipendenti kienx rappreżentattiv. Il-bejgħ tal-prodott simili mill-produttur Brażiljan li kkoopera nstab li kien sar fi kwantitajiet rappreżentattivi fis-suq domestiku Brażiljan meta mqabbel mal-prodott ikkonċernat esportat lejn l-Unjoni mill-produtturi esportaturi inklużi fil-kampjun. F'dan ir-rigward, wieħed għandu jiftakar li skont l-Artikolu 1(4) tar-Regolament bażiku, it-terminu “prodott simili” jfisser prodott li jkun identiku, jiġifieri, l-istess f'kull aspett, bħall-prodott taħt kunsiderazzjoni, jew fin-nuqqas ta' prodott bħal dan, prodott ieħor li għalkemm ma jkunx l-istess f'kull aspett, ikollu karatteristiċi li jixbhu mill-qrib dawk tal-prodott ikkunsidrat.

(63)

Sussegwentement, il-Kummissjoni eżaminat jekk dan il-bejgħ jistax jitqies bħala li sar fl-andament normali tal-kummerċ skont l-Artikolu 2(4) tar-Regolament bażiku. Dan sar billi ġie stabbilit il-proporzjon tal-bejgħ profittabbli lil klijenti indipendenti. It-tranżazzjonijiet tal-bejgħ tqiesu bħala profittabbli fejn il-prezz tal-unità kien ekwivalenti għall-ispiża tal-produzzjoni, jew ogħla minnha. B’hekk ġiet stabbilita l-ispiża tal-produzzjoni tal-produttur Brażiljan li kkoopera.

(64)

Din l-analiżi wriet li għat-tipi kollha ta' prodotti, iktar minn 80 % tal-volum tal-bejgħ fis-suq domestiku, kien ogħla mill-ispejjeż u li l-prezz medju ppiżat tal-bejgħ għat-tipi kollha kien ekwivalenti għal jew ogħla mill-ispejjeż tal-unità tal-produzzjoni.

(65)

Għaldaqstant, il-valur normali, skont it-tip tal-prodott kien ikkalkulat bħala l-medja ppiżata tal-prezzijiet domestiċi attwali tal-bejgħ kollu, irrispettivament minn jekk dak il-bejgħ kienx profittabbli jew le. Jirriżulta li għall-kuntrarju ta' dak li kien indikat fil-premessa 94 tar-Regolament provviżorju, ma ġie stabbilit ebda valur normali kostruwit għall-bejgħ mhux profittabbli.

(66)

Fin-nuqqas ta’ kwalunkwe kumment rigward il-prezzijiet tal-esportazzjoni, il-premessa (95) tar-Regolament provviżorju qiegħda b’dan tiġi kkonfermata.

(67)

Wara d-divulgazzjonijiet provviżorji, diversi partijiet interessati talbu li, b'mod ġenerali, il-metodoloġija użata għall-paragun tal-valur normali u l-prezz tal-esportazzjoni kienet żbaljata peress li ma qabblitx prodotti simili u li l-bażi li fuqha saru l-aġġustamenti ma kinetx spjegata biżżejjed. B'mod partikolari, produttur esportatur wieħed talab li għall-prodotti tal-ġebel, li ma kinux manifatturati u mibjugħa mill-produttur analogu, il-Kummissjoni kellha tqabbel il-prezz tal-esportazzjoni mal-prezz domestiku għall-prodotti tal-fuħħar, aġġustat kif xieraq iktar milli toħloq valur normali. Barra minn hekk, diversi produtturi esportaturi argumentaw li għal diversi tipi ta' prodotti oħra, li kienu manifatturati u mibjugħa minn produtturi esportaturi, paragun bejn il-prezz tal-esportazzjoni u l-prezz medju għal kull kilo għal tip ta' prodott ġeneriku mibjugħ fil-Brażil ibbażat biss fuq it-tip tal-materjal taċ-ċeramika użat, b'mod inevitabbli wassal għal paragun bejn prodotti li mhumiex l-istess u għaldaqstant għal riżultat żbaljat. Barra minn hekk, produttur esportatur ilmenta li l-aġġustament tal-marka kummerċjali skont l-Artikolu 2(10)(k) tar-Regolament Bażiku kien sottovalutat filwaqt li produttur esportatur ieħor ilmenta li l-livell ta' dak l-aġġustament ma kien ibbażat fuq ebda dejta affidabbli jew sostanzjata u għaldaqstant mhux iġġustifikat. L-istess produttur esportatur argumenta wkoll li l-prezzijiet tal-esportazzjoni tiegħu għandhom jiġu aġġustati għal differenza fil-kwantitajiet mibjugħa f'livelli differenti ta' kummerċ. Fl-aħħar nett, diversi partijiet interessati lmentaw li l-metodoloġija użata għall-aġġustamenti għal differenzi fil-karatteristiċi fiżiċi ma għandhiex bażi soda u mhux ċar abbażi ta' liema dejta saru dawn l-aġġustamenti.

(68)

Fl-isfond tal-kummenti li waslu, il-metodoloġija użata għall-ipparagunar tal-prezzijiet u l-aġġustamenti għall-finijiet tal-komparabbiltà tal-prezzijiet skont l-Artikolu 2(10) tar-Regolament bażiku ġew riveduti. B'mod partikolari, għall-prodotti li fl-istadju provviżorju kienu mqabbla abbażi tal-prezz medju kull kilo għall prodott ġeneriku bbażat biss fuq il-materjal taċ-ċeramika użat, il-paragun sar mal-iktar prodott li jixxiebah (ara l-premessa 77 iktar 'l isfel), li ppermettiet paragun tal-prezzijiet iktar preċiż u ġust.

(69)

Il-valur normali u l-prezzijiet tal-esportazzjoni tqabblu fuq bażi ta’ kif joħorġu mill-fabbrika. Il-marġini tad-dumping ġew stabbiliti permezz ta’ tqabbil tal-prezzijiet individwali kif joħorġu mill-fabbrika tal-esportaturi inklużi fil-kampjun mal-prezzijiet tal-bejgħ domestiċi tal-produttur analogu tal-istess prodott. Xi tranżazzjonijiet tal-esportazzjoni madanakollu kkonċernaw tipi ta' prodotti atipiċi, bħal ċrieki tas-srievet, “rests” għall-iskieken u “teapot stands”, li għalihom ma kienx possibbli li jkun żgurat tqabbil ġust. Għaldaqstant, anke jekk wieħed jikkunsidra li dawn it-tranżazzjonijiet kienu negliġibbli peress li kumplessivament ammontaw biss għal inqas minn 0,5 % tal-volumi esportati, ġew esklużi.

(70)

Għall-fini li jsir tqabbil ġust bejn il-valur normali u l-prezz ta’ esportazzjoni, saru l-konċessjonijiet dovuti f’forma ta’ aġġustamenti għal differenzi li jaffettwaw il-prezz u l-possibbiltà tat-tqabbil tal-prezz skont l-Artikolu 2(10) tar-Regolament bażiku. L-aġġustamenti saru, fejn xieraq, fir-rigward tad-differenzi fil-karatteristiċi fiżiċi tal-livell ta’ kummerċ, u għal fatturi oħrajn li jaffettwaw il-komparabbiltà tal-prezzijiet, b’mod partikolari l-marki kummerċjali.

(71)

L-ewwel, ġie eżaminat jekk kienx ġustifikat aġġustament skont l-Artikolu 2(10)(a) tar-Regolament bażiku għad-differenzi fil-karatteristiċi fiżiċi.

(72)

F'każijiet fejn il-valur normali ġie determinat abbażi tal-iktar prodott li jixxiebah (ara l-premessa 68 iktar 'il fuq), sar aġġustament għal differenzi fil-karatteristiċi fiżiċi sabiex tkun żgurata komparabbiltà ġusta tal-prezzijiet bejn l-istess prodotti.

(73)

Fir-rigward ta' prodotti tal-ġebel, il-prezz tal-esportazzjoni kien imqabbel mal-prezz tal-bejgħ domestiku tal-iktar prodott li jixxiebah manifatturat u mibjugħ fil-pajjiż analogu, jiġifieri l-prezz tal-bejgħ ta' prodotti tal-fuħħar minflok tal-ġebel iżda li huma identiċi fl-aspetti oħrajn kollha, kif aġġustati 'l fuq b'5 % biex jirriflettu d-differenza fil-prezz bejn il-prodotti tal-ġebel u l-prodotti tal-fuħħar.

(74)

Produttur esportatur jgħid li kemm l-ispejjeż tal-produzzjoni kif ukoll il-prezz tal-bejgħ lill-konsumatur għall-prodotti tal-fuħħar huma ogħla milli għall-prodotti tal-ġebel. Għaldaqstant, il-prezz tal-esportazzjoni għall-prodotti tal-ġebel tiegħu kellu jiġi aġġustat 'l isfel mhux 'il fuq. B'sostenn għal din id-dikjarazzjoni, il-produttur esportatur essenzjalment jiddependi fuq l-istimi tiegħu stess tal-ispejjeż tal-produzzjoni ta' prodotti tal-fuħħar u tal-ġebel rispettivament, u fuq estratt minn lista ta' prezzijiet li tindika l-prezzijiet għall-konsumatur ta' prodotti tal-fuħħar u tal-ġebel.

(75)

Din l-informazzjoni li kienet ipprovduta tard ħafna fil-proċedimenti, u biss wara d-divulgazzjoni finali, tikkuntrasta ħafna mal-informazzjoni li ngħatat lill-Kummissjoni matul l-investigazzjoni minn partijiet interessati oħra, jiġifieri l-kwerelanti, l-industrija tal-Unjoni u l-produttur fil-pajjiż analogu. Dawk il-partijiet kollha indikaw li prodotti tal-ġebel huma ta' kwalità ogħla jiġifieri jservu iktar, mill-prodotti tal-fuħħar u huma iktar għaljin biex jiġu mmanifatturati peress li l-ġebel bażikament huwa tafal li jinħema f'temperatura għolja ħafna u l-fuħħar huwa tafal li jinħema f'temperatura baxxa. Għaldaqstant, il-prodotti tal-ġebel ġeneralment jistgħu jinbiegħu bi prezz ogħla. Din l-informazzjoni hija kkorroborata iktar minn informazzjoni tas-suq disponibbli pubblikament.

(76)

Għaldaqstant għandu jkun innutat li l-produttur esportatur inkwistjoni ma jipproduċix prodotti tal-fuħħar innifishom u għaldaqstant ipprovda biss stima tal-ispejjeż tal-produzzjoni tagħhom. Barra minn hekk, il-lista tal-prezzijiet sottomessa ma turix b'mod konklussiv li l-prodotti tal-fuħħar huma ġeneralment iktar għaljin mill-prodotti tal-ġebel. Għalhekk, l-evidenza pprovduta mhijiex tali li turi li l-aġġustament li sar sabiex ikun hemm tqabbil ġust tal-prezzijiet bejn il-valur normali u l-prezz tal-esportazzjoni tal-prodotti tal-ġebel huwa żbaljat u l-ilment għaldaqstant ġie miċħud.

(77)

Fir-rigward ta' tipi oħra ta' prodotti li għalihom it-tqabbil fl-istadju provviżorju kien ibbażat fuq il-prezz medju għal kull kilo u l-materjal taċ-ċeramika biss, il-Kummissjoni analizzat iktar it-tipi ta' prodotti kkonċernati u qabblet il-prezz tal-esportazzjoni mal-iktar prodott li jixxiebah manifatturat u mibjugħ fil-pajjiż analogu. Fejn kien hemm differenza ta' karatteristika fiżika waħda biss, pereżempju it-tip ta' verniċ jew id-dekorazzjoni, filwaqt li l-karatteristiċi bażiċi l-oħra kollha tat-tip ta' prodott kienu identiċi, il-prezz tal-bejgħ tal-iktar tip li jixxiebah kien aġġustat bid-differenza tal-prezz reali misjuba għad-differenza fil-karatteristika fiżika. Għal tipi oħra ta' prodotti, meta kien hemm iktar minn differenza fiżika waħda, il-prezz tal-esportazzjoni kien imqabbel mal-prezz medju tal-bejgħ tal-iktar prodott li jixxiebah. Għal dawn it-tipi ta' prodotti, l-iktar prodott li jixxiebah kellu diversi minn dawn il-karatteristiċi fiżiċi bażiċi jew il-karatteristiċi kollha; materjal taċ-ċeramika, tip ta' prodott, forma bażika, dekorazzjoni u verniċ.

(78)

Żewġ produtturi esportaturi inklużi fil-kampjun ilmentaw li,bħal ma saru aġġustamenti fil-każijiet meta karatteristika fiżika minuri waħda biss kienet differenti, għandu jsir aġġustament ukoll meta aktar minn karatteristika fiżika waħda biss tal-iktar prodott li jixxiebah tkun differenti

(79)

Għandna niftakru li fil-każijiet meta karatteristika fiżika minuri waħda kienet differenti, il-prezz tal-bejgħ tal-iktar prodott li jixxiebah, kien aġġustat biex iqis id-differenza reali tal-prezz misjuba għad-differenza inkwistjoni filwaqt li min-naħa l-oħra, fejn iktar minn karatteristika fiżika waħda kienet differenti, il-paragun sar abbażi tal-prezz medju tal-bejgħ tal-prodott b'karatteristiċi fiżiċi identiċi. Għaldaqstant, fil-każ tal-aħħar, ma kien hemm bżonn ta' ebda aġġustament fil-prezz għall-ebda differenza fiżika bejn il-prodotti li jixxiebhu peress li kellhom l-istess karatteristiċi fiżiċi bażiċi. B'hekk, din l-allegazzjoni ma tistax tiġi milqugħa.

(80)

Wieħed mill-produtturi esportaturi msemmija hawn fuq talab ukoll aġġustamenti addizzjonali għal differenzi fil-karatteristiċi fiżiċi fir-rigward tal-piż u l-bjuda tal-prodott ikkonċernat. Huwa allega li juża materja prima ta' kwalità inferjuri u li għaldaqstant, l-ispejjeż u l-prezz tal-prodotti tiegħu huma iktar baxxi milli għal prodott simili mmanifatturat fil-pajjiż analogu. Għalhekk, il-prezz tal-esportazzjoni tiegħu għandu jkun aġġustat b'ammont raġonevoli. F'dan ir-rigward, l-ewwel wieħed għandu jiftakar li l-kumpanija ma ngħatatx status ta' ekonomija tas-suq u li l-ispejjeż tal-produzzjoni tagħha għaldaqstant ma kinux ivverifikati. Barra minn hekk, l-allegazzjoni li l-prodotti tiegħu huma madwar 5 % itqal minn prodotti standard ma kinetx akkumpanjata minn ebda dokument verifikabbli jew ta' sostenn u għaldaqstant l-allegazzjoni ma kinetx sostanzjata. Rigward il-bjuda, peress li dan il-produttur esportatur ammetta fis-sottomissjoni tiegħu li l-prodotti tiegħu għandhom bjuda normali, naqas milli jispjega għalfejn għandu jintalab xi aġġustament f'dan ir-rigward. Għalhekk, it-talba ġiet irrifjutata.

(81)

Produttur esportatur ieħor allega li l-Kummissjoni naqset milli tqabbel xi bejgħ esportat mal-valur normali tal-iktar prodott li jixxiebah xieraq. Dawn l-esportazzjonijiet ikkonċernaw il-prodotti ddekorati permezz ta' kummerċjant mhux relatat, li allegatament kien ipprovda d-dekorazzjoni (decal) mingħajr ħlas. Konsegwentement, il-prezz tal-esportazzjoni ma kienx jinkludi l-ispejjeż għad-dekorazzjoni u għalhekk kellu jkun imqabbel mal-valur normali determinat għal prodotti mingħajr dekorazzjoni, jew inkella, valur normali medju ta' oġġetti dekorati u mhux dekorati.

(82)

Wieħed għandu jiftakar li l-ispejjeż tal-produzzjoni mhumiex fattur rilevanti għall-komparabbiltà tal-prezz, li hija bbażata biss fuq paragun bejn il-valur normali u l-prezz tal-esportazzjoni ta' prodotti li jixxiebhu. Huwa ċar ukoll mill-informazzjoni pprovduta li l-prodotti esportati inkwistjoni kienu tabilħaqq dekorati għalkemm il-produttur esportatur allegatament ma ġarrabx l-ispejjez kollha assoċjati mal-valur miżjud li jistgħu jkunu assenjati għad-dekorazzjoni. Madankollu dan mhux fattur li jista' jiġġustifika prezz aġġustat għal differenzi fil-karatteristiċi fiżiċi mill-prodott li jixxiebah fil-pajjiż analogu. Fi kwalunkwe każ, jekk wieħed jikkunsidra l-aħħar stadju tal-proċediment li fih saret din l-allegazzjoni, id-dejta sottomessa bħala sostenn ta' din l-allegazzjoni ma tistax tkun ivverifikata. Għalhekk, l-allegazzjoni permezz ta' dan ġiet miċħuda.

(83)

Fl-isfond tal-varjetà wiesgħa ta' kombinazzjonijiet possibbli ta' settijiet taċ-ċeramika li jintużaw fuq il-mejda manifatturati u mibjugħa fir-RPĊ u fil-Brażil rispettivament, l-iggruppar flimkien ta' settijiet differenti abbażi tan-numru u t-tip ta' oġġetti kkombinati f'sett, kien meqjus neċessarju sabiex ikun hemm komparabbiltà ġusta tal-prezz Il-prezz medju domestiku tal-bejgħ fil-pajjiż analogu għall-kombinazzjonijiet differenti ta’ settijiet miġbura flimkien kien imqabbel mal-prezz tal-esportazzjoni għal kombinazzjonijiet ta’ settijiet li jaqgħu f’dawk il-gruppi.

(84)

Il-produttur esportatur allega li minħabba l-varjetà wiesgħa ta’ kombinazzjonijiet ta’ prodott possibbli li jiffurmaw is-sett, il-metodoloġija tal-iggruppar ma tippermettix għal tqabbil ġust tal-prezzijiet peress li ma tikkunsidrax il-karatteristiċi tal-kull biċċa li tifforma parti mis-sett. Għaldaqstant, dan il-produttur esportatur allega li s-settijiet għandhom jiġu esklużi mill-marġni tal-kalkolu tad-dumping.

(85)

Wieħed għandu jiftakar li l-kalkolu tad-dumping għas-settijiet huwa bbażat fuq paragun tal-prezz medju għal kull kilo u mhux abbażi ta’ kull biċċa. Għaldaqstant huwa meħtieġ li tkun stabbilita l-kombinazzjoni eżatta tal-biċċiet differenti f’kull sett għal tqabbil ġust tal-prezzijiet fir-rigward tas-settijiet. Il-metodoloġija tal-iggruppar użata tikkunsidra l-karatteristiċi bażiċi ta’ kombinazzjonijiet differenti ta’ settijiet safejn is-settijiet huma identifikati bħal pereżempju settijiet tat-te u/jew kafe, settijiet tal-platti u settijiet oħra kif ukoll in-numru ta’ biċċiet ikkombinati. F’dawn iċ-ċirkustanzi huwa meqjus li sar tqabbil ġust fir-rigward tas-settijiet skont it-tifsira tal-Artikolu 2(10) tar-Regolament bażiku. Jirriżulta li dik l-allegazzjoni ma tistax tiġi milqugħa.

(86)

Barra minn hekk, kif deskritt fil-premessa (99) tar-Regolament provviżorju, l-investigazzjoni sabet li l-produtturi esportaturi Ċiniżi ġeneralment jikkwalifikaw il-prodotti tagħhom f’sa ħames gradi differenti li jvarjaw minn A sa E b’differenzi sinjifikanti fil-prezzijiet. Madankollu, il-maġġoranza vasta tal-esportazzjonijiet lejn l-Unjoni tikkonsisti minn grad A, grad B jew grad Ċ jew inkella taħlita tagħhom. Madankollu, din il-klassifikazzjoni mhijiex universali jew ibbażata fuq standards ġenerali tal-industrija kollha, iżda hija pjuttost speċifika għal kumpaniji partikolari u tippermetti li jsir divrenzjar tal-prezzijiet. Min-naħa l-oħra, il-produttur tal-pajjiż analogu jbigħ biss l-ekwivalenti tal-grad A fis-suq domestiku Brażiljan u għalhekk instab li l-komparabbiltà tal-prezzijiet ġiet affettwata. Għaldaqstant, il-prezz tal-esportazzjoni ġie aġġustat ’il fuq għal-livell Ċiniż ta’ grad A sabiex ikun komparabbli mal-prodott mibjugħ mill-produttur analogu fis-suq Brażiljan. Dan il-livell ta’ aġġustament kien stabbilit individwalment għal kull kumpanija inkluża fil-kampjun, fejn xieraq u fuq il-bażi tad-differenza fil-prezz attwali u vverifikata bejn il-gradi differenti.

(87)

Wara d-divulgazzjoni finali, produttur esportatur inkluż fil-kampjun allega li partijiet mill-bejgħ esportat tiegħu li kien mibjugħ permezz ta’ kummerċjant mhux relatat, ikkonsista f’kombinazzjoni ta’ grad A u grad B u għaldaqstant għandu jkun aġġustat għal-livell tal-prezz tal-grad A. Huwa allega li d-differenza fil-prezz ammontat għal 25 % u pprovda kopji tal-fatturi u l-kwotazzjoni tal-prezz bħala evidenza ta’ ġustifikazzjoni.

(88)

Madanakollu, din l-informazzjoni ma kinetx ipprovduta la matul l-investigazzjoni, inkluża ż-żjara ta’ verifika u lanqas wara d-divulgazzjoni tas-sejbiet provviżorji tal-Kummissjoni. Għall-kuntrarju, dan il-produttur matul l-investigazzjoni indika li kien jesporta biss prodotti tal-grad A. Ma kienet ipprovduta ebda lista tal-prezzijiet, minkejja li kien hemm talba biex isir dan fil-kwestjonarju, biex tkun ikkwantifikata d-differenza fil-prezz bejn il-gradi differenti, ġie pprovdut biss numru limitat ta’ stimi tal-prezzijiet. F’tali ċirkustanzi u b’kunsiderazzjoni għall-istadju tard ħafna fil-proċedimenti li matulu kienet sottomessa l-informazzjoni, l-affidabbiltà tagħha hija dubbjuża u lanqas ma tista' tiġi vverifikata. Għaldaqstant it-talba hi miċħuda.

(89)

It-tieni nett, kif deskritt fil-premessa 98 tar-Regolament provviżorju, ġie eżaminat jekk kienx mistħoqq livell ta’ aġġustament kummerċjali skont l-Artikolu 2(10)(d) tar-Regolament bażiku. Instab li l-prezz tal-esportazzjoni huwa f’livell differenti ta’ kummerċ mill-valur normali peress li l-esportazzjonijiet Ċiniżi essenzjalment saru fil-livell tal-operatur filwaqt li l-bejgħ domestiku fil-pajjiż analogu sar ukoll fil-livell tal-konsumatur. L-investigazzjoni sabet ukoll li fiż-żewġ swieq, il-kanali differenti ta’ distribuzzjoni affettwaw il-livell tal-prezzijiet, biex b’hekk ġiet affettwata l-komparabbiltà tal-prezzijiet ġusti bejn il-prezz tal-esportazzjoni u l-valur normali. Għaldaqstant, sabiex isir tqabbil ġust bejn il-prezz tal-esportazzjoni u l-valur normali, dan tal-aħħar ġie stabbilit abbażi ta’ kull tip ta’ prodott u aġġustat għal kull livell ta’ kummerċ billi jintużaw id-differenzi fil-prezzijiet li nstabu bejn il-livelli differenti ta’ kummerċ fil-pajjiż analogu. Għandna niftakru li, fejn xieraq, sar livell ulterjuri ta’ aġġustament kummerċjali fir-Regolament provviżorju abbażi tad-differenza fil-prezz misjuba fir-rigward tal-kwantitajiet mibjugħa f’kull livell ta’ kummerċ (premessa 98 tar-Regolament provviżorju). Dan l-aġġustament ulterjuri kien meqjus iġġustifikat peress li l-investigazzjoni, fl-istadju provviżorju, kienet indikat li filwaqt li l-maġġoranza tal-bejgħ Ċiniż esportat sar fi kwantitajiet kbar, il-biċċa l-kbira tal-bejgħ domestiku sar fi kwantitajiet iżgħar li jirriżulta f’differenzi fil-prezzijiet fl-istess livell ta’ kummerċ. Madankollu, investigazzjoni ulterjuri u analiżi iktar iddettaljata tat-tranżazzjonijiet tal-bejgħ domestiku fil-pajjiż analogu wrew, għall-kuntrarju tas-sejbiet provviżorji, li l-proporzjon ta’ kwantitajiet żgħar u kbar mibjugħa mill-produttur analogu huwa simili għal dak tal-produtturi esportaturi Ċiniżi. Għaldaqstant, dan l-aġġustament ma għadux meqjus xieraq jew iġġustifikat.

(90)

It-tielet, kif deskritt fil-premessa 100 tar-Regolament provviżorju, l-investigazzjoni sabet li l-produttur Brażiljan ibigħ biss prodotti tad-ditta fis-suq Brażiljan, filwaqt li l-produtturi esportaturi Ċiniżi ma jbigħux prodotti tad-ditta, iżda minflok ibigħu prodotti b’“tikketta privata” jew oġġetti taċ-ċeramika ġeneriċi li jintużaw fuq il-mejda u fil-kċina. Il-prodotti tad-ditta normalment ikunu perċepiti mill-klijenti bħala prodotti li juru ċertu prestiġju, kif ukoll kwalità u disinn garantiti, u b’hekk iġibu prezzijiet ogħla fis-suq, filwaqt li l-prodotti ġeneriċi u/jew b’tikketta privata, minkejja li jkollhom l-istess karatteristiċi tekniċi u fiżiċi, ġeneralment jinbiegħu f’livelli ta’ prezzijiet konsiderevolment aktar baxxi. Filwaqt li l-valur addizzjonali ta’ prodott tad-ditta ġeneralment ma jkunx jista’ jiġi kkwantifikat b’mod preċiż fl-astratt minħabba li dan jiddependi fuq ħafna fatturi differenti, bħall-perċezzjoni tal-klijenti, ir-rikonoxximent tad-ditta u fatturi mhux kwantifikabbli oħrajn, f’dan il-każ partikolari, il-produttur Brażiljan ikkonferma li l-prodotti tad-ditta tiegħu jistgħu jinbiegħu bi prezzijiet ogħla b’mod sinjifikanti fis-suq Brażiljan minn prodotti oħrajn mhux tad-ditta. Barra minn hekk, rapport dwar is-suq Brażiljan għall-prodotti li jintużaw fuq il-mejda u fil-kċina jikkonferma li l-klijenti Brażiljani huma estremament orjentati lejn id-ditti u li l-produttur Brażiljan tal-pajjiż analogu huwa wieħed li ilu stabbilit u magħruf sew. Fl-isfond ta’ dawn l-elementi, sar aġġustament ‘l isfel ta' 40 % tal-prezz tal-bejgħ domestiku għall-valur normali skont l-Artikolu 2(10)(k) tar-Regolament bażiku.

(91)

Fir-rigward tal-aġġustament imsemmi hawn fuq, għandna niftakru li żewġ produtturi esportaturi ddubitaw kemm il-bażi li fuqu sar l-aġġustament kif ukoll il-livell ta’ aġġustament (ara l-premessa 67 hawn fuq). Madankollu mhuwiex ikkontestat il-fatt li prodott tad-ditta għandu prezz tal-bejgħ ogħla minn prodott identiku mhux tad-ditta u li l-komparabbiltà tal-prezzijiet għaldaqstant hija affettwata. Barra minn hekk, minbarra l-informazzjoni provduta mill-produttur fil-pajjiż analogu, id-dejta dwar il-prezzijiet attwali u vverifikata minn produttur li koopera fit-Tajlandja, kif ukoll informazzjoni li waslet minn produttur wieħed tal-Unjoni wara d-divulgazzjoni provviżorja kkonfermaw li l-livell ta’ aġġustament huwa xieraq. B’mod partikolari, is-sitwazzjoni tas-suq fit-Tajlandja nstabet li hija komparabbli ma dik tal-Brażil peress li jeżistu biss ftit ditti li huma magħrufa u li ilhom stabbiliti. B'hekk, dik l-allegazzjoni ma tistax tiġi milqugħa.

(92)

Wara d-divulgazzjoni finali ebda produttur esportatur ma żamm l-oġġezzjoni tiegħu għal dan l-aġġustament filwaqt li l-assoċjazzjoni tal-kwerelanti allegat li l-aġġustament tad-ditti kien għoli ħafna, b’mod partikolari fir-rigward ta’ prodotti mhux tal-porċellana. Bħala sostenn għal din l-allegazzjoni, il-kwerelant irrefera għal-lista tal-prezzijiet u l-informazzjoni pprovduta minn xi produtturi tal-Unjoni.

(93)

Filwaqt li l-informazzjoni sottomessa tikkonferma s-sejbiet tal-Kummissjoni li l-valur miżjud ta’ ditta fuq kwalunkwe suq partikolari huwa speċifiku għall-kumpanija/ditta, l-informazzjoni pprovduta mhix tali li ddaħħal dubju dwar il-livell ta' aġġustament li kien determinat għall-prodotti tad-ditta mibjugħa mill-produttur analogu fis-suq domestiku Brażiljan peress li l-informazzjoni pprovduta kienet tikkonċerna biss is-suq tal-Unjoni. Fl-isfond tan-numru kbir ta’ produtturi tal-Unjoni, id-diversità tas-suq tal-Unjoni bid-differenzi reġjonali tiegħu, anke fir-rigward tal-orjentazzjoni tad-ditti, u s-sehem ogħli tas-suq tal-importazzjonijiet Ċiniċi, is-sitwazzjoni tas-suq tal-Unjoni hija pjuttost differenti minn dik Brażiljana. Għalhekk, u fid-dawl tal-kunsiderazzjonijiet fil-premessi 90 u 91 hawn fuq, dik l-allegazzjoni ma tistax tiġi aċċettata.

(94)

Kif deskritt fil-premessa 101 tar-Regolament provviżorju, saru aġġustamenti ulterjuri, fejn xieraq fir-rigward tat-trasport, l-assigurazzjoni, il-handling u l-ispejjeż anċillari, l-ippakkjar, il-kreditu, it-tariffi bankarji u s-sensariji fil-każijiet kollha fejn kien jidher li dawn jaffettwaw il-komparibbiltà tal-prezz.

(95)

Fl-assenza ta’ kummenti, il-metodoloġija ġenerali użata għall-kalkolu tal-marġni tad-dumping, kif stabbilit fil-premessi 102 sa 105 tar-Regolament proviżorju, huma kkonfermati.

(96)

Wara d-divulgazzjoni provviżorja, il-Kummissjoni kienet infurmata li xi kumpaniji kummerċjali, li ma jimmanifatturawx il-prodott ikkonċernat, kienu bi żball imsemmija fl-Anness I tar-Regolament provviżorju u għaldaqstant kienu suġġetti għad-dazju tad-dumping stabbilit għall-produtturi esportaturi li jikkooperaw. Il-Kummissjoni infurmat lil dawn il-kumpaniji bl-intenzjoni tagħha li tneħħihom mill-Anness I u li tagħtihom l-opportunità li jipprovdu kummenti. Wara analiżi tal-kummenti li waslu, diversi kumpaniji kummerċjali tneħħew mill-Anness 1. Fejn xieraq, kienu sostitwiti mill-produttur esportatur li jikkoopera relatat.

(97)

Filwaqt li jitqiesu l-aġġustamenti tal-valur normali tal-prezz tal-esportazzjoni, kif stabbilit fil-premessi 67 sa 94 hawn fuq, u fin-nuqqas ta’ kwalunkwe kumment ieħor, il-marġni ta’ dumping definittivi, espressi bħala perċentwal tal-prezz CIF fil-fruntiera tal-Unjoni, bid-dazju mhux imħallas, huma kif ġej:

(98)

Wara d-divulgazzjoni finali, diversi partijiet interessati tennew li l-perjodu kkunsidrat missu beda fl-2009 minflok fl-2008 minħabba li l-kriżi ekonomika kienet tkun bdiet fl-2008 u t-tendenza bejn l-2009 u l-2011 kienet tkun ċara. Fir-rigward ta’ din l-allegazzjoni, għandu jkun innutat li l-2009 ma tirrappreżentax sena iktar xierqa bħala l-bidu tal-perjodu kkunsidrat minħabba l-fatt li l-effetti tal-kriżi ekonomika inħassu għalkollox matul dik is-sena, fattur li rriżulta fi tnaqqis sinifikanti tal-konsum meta mqabbel mal-2008. Għalhekk, it-talba ġiet definittivament miċħuda.

(99)

F’sottomissjoni konġunta diversi importaturi ddubitaw il-metodu ta’ kalkolu taċ-ċifra tal-produzzjoni tal-Unjoni previst fil-premessa 108 tar-Regolament provviżorju. Diversi partijiet interessati rrepetew dawn il-kummenti wara d-divulgazzjoni finali. B’mod partikolari, huma kkunsidraw li r-rekwiżit permanenti ma jkunx intlaħaq mill-kwerelanti peress li l-istatistiki PRODCOM disponibbli jissuġġerixxu livell ħafna ogħla ta’ produzzjoni tal-Unjoni tal-prodott simili milli ċ-ċifra ta’ 240 200 tunnellata msemmija fil-premessa msemmija, li bħala riżultat tagħha l-kwerelanti jirrappreżentaw inqas minn 25 % tal-produzzjoni tal-UE tal-prodott simili. Dawn il-partijiet ikkalkulaw ċifra ta’ produzzjoni tal-UE ta 313 187 tunnellata matul il-PI u waslu għal din iċ-ċifra billi użaw għalkollox id-dejta PRODCOM għall-prodotti taċ-ċeramika tal-porċellana li jintużaw fuq il-mejda u fil-kċina u għamlu aġġustament ’l isfel ta’ 20 % għall-prodotti mhux taċ-ċeramika tal-porċellana li jintużaw fuq il-mejda u fil-kċina, b’analoġija għall-metodoloġija applikata mill-kwerelant u fl-investigazzjoni sabiex jiġu stabbiliti volumi ta’ importazzjoni.

(100)

F’dan ir-rigward għandu l-ewwel nett jiġi nnutat li, fil-kuntest tal-analiżi statutorja ta’ lment antidumping u skont l-Artikolu 5(4) tar-Regolament bażiku, is-servizzi tal-Kummissjoni wettqu eżami awtonomu qabel l-inizjazzjoni. Il-Kummissjoni analizzat id-dejta fl-ilment u kkuntattjat lill-produtturi magħrufa kollha tal-Unjoni u talbithom biex jipprovdu wkoll dejta dwar il-produzzjoni kif ukoll dwar il-pożizzjoni tagħhom fir-rigward tal-ilment u biex jassistu lll-Kummissjoni fl-identifikazzjoni ta’ produtturi potenzjali oħra jekk ikun hemm. Assoċjazzjonijiet ta’ produtturi pprovdew ukoll informazzjoni dwar produzzjoni.

(101)

F’dan ir-rigward, għandu jiġi nnutat li, l-ewwel nett, is-sors u l-metodoloġija tad-dejta għaċ-ċifra tal-produzzjoni tal-Unjoni użata għal kull waħda mis-snin tal-perjodu kkunsidrat kienu spjegati wkoll fil-premessa 107 tar-Regolament provviżorju, jiġifieri f’konformità ma dak li kien sar fl-istadju tal-ilment, huma bbażati fuq id-dejta pprovduta mill-assoċjazzjonijiet Ewropej u nazzjonali, kontrovverifikati mid-dejta pprovduta minn produtturi individwali kif ukoll minn sorsi oħra tal-istatistika (b’mod partikolari PRODCOM).

(102)

Kif spjegat mill-kwerelanti matul l-investigazzjoni, id-dejta pprovduta mill-assoċjazzjoni Ewropea kienet, fir-rigward ta’ prodotti tal-porċellana, ibbażata fuq dejta PRODCOM għal prodotti tal-porċellana li jintużaw fuq il-mejda u fil-kċina bħall-kodiċi PRODCOM għal dan il-prodott imqabbel ma’ prodotti tal-porċellana koperti minn din l-investigazzjoni. Fir-rigward ta’ prodotti mhux tal-porċellana, PRODCOM ma setax jintuża peress li jkopri ħafna iktar prodotti mmanifatturati mill-prodotti mhux tal-porċellana koperti minn din l-investigazzjoni. Għalhekk, għal dawn il-prodotti, l-assoċjazzjonijiet nazzjonali kienu ġabru d-dejta rilevanti bbażata fuq l-għarfien fil-fond tagħhom tas-swieq rispettivi tagħhom u din l-informazzjoni kienet kontro vverifikata mill-assoċjazzjoni Ewropea qabel ipprovdiet iċ-ċifri totali lill-Kummissjoni. Dawk iċ-ċifri kienu aġġornati matul l-investigazzjoni. Barra minn hekk, kienet miżmuma lista tal-produtturi kollha magħrufa fil-fajl mhux kunfidenzjali u nġibdet l-attenzjoni tal-Kummissjoni biss għall-eżistenza ta’ tliet produtturi addizzjonali fir-Rumanija. Id-disparità bejn l-istatistiċi PRODCOM u ċ-ċifra 240 200 hija derivata mill-fatt li l-ambitu tal-prodott ta’ din l-investigazzjoni ma jaqbilx mal-kodiċijiet tad-dejta statistika PRODCOM peress li jikkonċerna prodotti mhux tal-porċellana, jiġifieri huwa ferm iżgħar. Fil-każ tal-istatistiċi tal-importazzjoni EUROSTAT, din id-differenza tista’ tabilħaqq tinstab billi jsir aġġustament 'l isfel ta’ 20 %, Iżda dan ma kienx xieraq fil-każ ta’ ċifri ta’ produzzjoni tal-UE rrappurtati fil-bażi tad-dejta PRODCOM. B’mod partikolari, iċ-ċifri PRODCOM ta’ żewġ Stati Membri jkunu jidhru li huma ħafna ikbar milli huma fil-verità, jekk wieħed japplika l-istess metodoloġija.

(103)

Għalhekk, il-metodoloġija użata mill-partijiet ikkonċernati u msemmija fil-premessa (99) hawn fuq hija żbaljata. Barra minn hekk, ma kienet ipprovduta ebda evidenza li l-produzzjoni kif irrappurtata minn kwalunkwe wieħed mill-Istati Membri, inklużi ż-żewġ Stati Membri msemmija hawn fuq, u inkluża fil-fajl mhux kunfidenzjali, tkun iżgħar milli hi. Għandu jkun innutat ukoll li għal xi Stati Membri, id-dejta pprovduta mill-assoċjazzjoni Ewropea u użata f’din l-investigazzjoni kienet b’mod sinifikanti ogħla milli kieku ntużat id-dejta PRODCOM aġġustata. Fl-isfond ta’ dak li intqal hawn fuq, ma hemm ebda raġuni sabiex wieħed jiddubita ċ-ċifri ta’ produzzjoni rrappurtati f’din l-investigazzjoni u r-riżultat tal-eżami awtonomu.

(104)

Fin-nuqqas ta' kummenti ulterjuri oħra, il-premessi (107) u (108) tar-Regolament provviżorju huma b'dan ikkonfermati.

(105)

Fi preżentazzjoni konġunta, diversi importaturi kkontestaw iċ-ċifri tal-Unjoni dwar il-konsum ipprovduti fil-premessa (110) tar-Regolament provviżorju. Din l-allegazzjoni kienet ibbażata fuq l-użu żbaljat tad-dejta statistika PRODCOM għall-produzzjoni u l-bejgħ tal-Unjoni, kif spjegat fil-punt 4.2 hawn fuq u għaldaqstant hija miċħuda.

(106)

Madankollu, meta reġgħu ġew vverifikati l-istatistiċi tal-importazzjoni tal-Eurostat, instab li kienu ġew aġġornati minn wara l-impożizzjoni ta’ miżuri provviżorji li kienu rriżultaw f’tibdiliet minuri. Għaldaqstant, sabiex ikun hemm stampa kompluta, abbażi ta’ dawn l-istatistiki aġġornati tal-Eurostat dwar l-importazzjonijiet u s-sottomissjonijiet rigward il-bejgħ tal-industrija Ewropea fis-suq tal-Unjoni, il-konsum tal-Unjoni żviluppa kif ġej:

Tabella 1

(107)

Fin-nuqqas ta’ xi kummenti oħra, il-premessi minn (109) u (111) sa (112) tar-Regolament provviżorju huma b’dan ikkonfermati.

(108)

Fi preżentazzjoni konġunta, diversi importaturi kkontestaw iċ-ċifri pprovduti fil-premessa (113) tar-Regolament provviżorju. Din l-allegazzjoni kienet ibbażata fuq użu żbaljat tad-dejta statistika PRODCOM u għaldaqstant hija miċħuda.

(109)

Fuq il-bażi tal-istatistiki tal-importazzjoni aġġornat tal-Eurostat (ara l-premessa (106) hawn fuq), il-volum, is-sehem tas-suq u l-prezzijiet medji tal-importazzjonijiet tal-prodott ikkonċernat żviluppaw kif stabbilit fit-Tabella ta’ hawn taħt:

Tabella 2

(110)

Il-volumi, il-valuri u x-xejriet aġġornati huma kważi identiċi għal dawk analizzati fir-Regolament provviżorju. Is-sehem tas-suq tal-importazzjonijiet Ċiniżi żdied minn 64,8 % fl-2008 għal 66,8 % fil-PI. Il-prezz tal-importazzjoni żdied bi kważi 18 % matul il-perjodu kkunsidrat minn EUR 1 274 għal kull tunnellata għal EUR 1 498 għal kull tunnellata.

(111)

Parti waħda allegat nuqqas totali ta’ korrelazzjoni bejn il-prezzijiet u l-volumi tal-importazzjonijiet Ċiniżi. F’dan ir-rigward, skont l-Artikolu 3(3) tar-Regolament bażiku għandu jingħata kas ta' jekk kienx hemm żieda sinifikanti fl-importazzjonijiet li huma l-oġġett ta' dumping, jew f'termini assoluti jew imqabbla mal-produzzjoni u l-konsum fl-Unjoni. Fejn għandu x'jaqsam l-effett tal-importazzjonijiet li huma l-oġġett ta' dumping fuq prezzijiet, għandu jingħata kas ta' jekk kienx hemm waqgħat sinifikanti fil-prezzijiet tal-importazzjonijiet oġġett ta' dumping meta mqabbla mal-prezz ta' prodott simili tal-industrija tal-Unjoni, jew jekk l-effett ta' importazzjonijiet bħal dawn huwiex li b'mod ieħor iwaqqgħu l-prezzijiet għal grad sinifikanti jew li jimpedixxu żidiet fil-prezz, li setgħu jseħħu, sa grad sinifikanti. L-ebda wieħed minn dawn il-fatturi fihom infushom jagħti gwida definittiva suffiċjenti.

(112)

Fil-kuntest ta’ dak imsemmi hawn fuq, għandu jkun innutat dan li ġej. L-ewwel nett, fiż–żmien meta l-konsum tal-Unjoni rkupra (2009-2010), kien hemm żieda sinifikanti fil-prezzijiet tal-importazzjonijiet Ċiniżi – li jissuġġerixxi li hemm korrelazzjoni. Iżda aktar importanti, l-iżvilupp ta’ prezzijiet Ċiniżi matul il-perjodu kkunsidrat għandu jkun ivvalutat fil-kuntest tad-differenza fil-prezz sinifikanti ħafna li diġà eżistiet fl-2008 u li hija illustrata mill-prezzijiet medji tal-importazzjonijiet Ċiniżi (tabella 2) u l-prezzijiet medji tal-bejgħ tal-Unjoni (tabella 9) rrappurtati fir-Regolament provviżorju. Dawn id-differenzi kbar fil-prezzijiet huma kkonfermati mil-livelli għoljin ta’ tqaċċit tal-prezzijiet matul il-PI. Iż-żieda fil-prezz konsegwentement ma żammitx lura lill-importazzjonijiet Ċiniżi milli jiksbu sehem tas-suq matul il-perjodu kkunsidrat. Tabilħaqq, dawn l-importazzjonijiet komplew jagħmlu pressjoni fuq il-prezzijiet fl-industrija tal-Unjoni li naqsu bi 12 % matul il-perjodu kkunsidrat. Għalhekk, dan il-kumment ma jistax jiġi aċċettat.

(113)

Rigward l-iżvilupp tal-prezz tal-importazzjoni (li qed jiżdied) u l-volum tal-importazzjoni (li qed jonqos) mill-2008 sal-2011 li fl-2012 ġie ppreżentat minn grupp inkluż fil-kampjun ta’ produtturi esportaturi Ċiniżi, ix-xejra osservata ta’ żieda fil-prezz medju tal-importazzjoni ma tistax ittellef is-sejba ta’ dumping li jagħmel ħsara matul il-PI. Fir-rigward tal-iżvilupp ta’ volumi ta’ importazzjoni Ċiniżi, u kif diġà ġie enfasizzat fil-premessa (114) tar-Regolament provviżorju u għal darb’oħra fil-premessa (109) hawn fuq, l-indikatur tas-sehem tas-suq juri żieda fis-sehem tas-suq ta’ importazzjonijiet Ċiniżi b’żewġ (2) punti perċentwali. Barra minn hekk, u kif spjegat f’iktar dettall fil-premessi (116) u (117) tar-Regolament provviżorju u fil-premessa (111) hawn fuq, kien hemm tqaċċit importanti tal-prezzijiet mill-importazzjonijiet Ċiniżi.

(114)

Wara d-divulgazzjoni provviżorja, diversi partijiet interessati talbu iktar dettalji dwar il-kalkoli tat-tqaċċit tal-prezzijiet minn dawk diġà pprovduti fil-premessa (116) tar-Regolament provviżorju. Safejn kienu jippermettu n-natura sensittiva ta’ din l-informazzjoni u l-fatt li l-produtturi tal-Unjoni kienu ngħataw l-anonimità, kienet ipprovduta informazzjoni addizzjonali.

(115)

B’analoġija għad-deċiżjoni li saret wara l-impożizzjoni ta’ miżuri provviżorji sabiex jiġu esklużi mil-listi tal-esportazzjoni xi prodotti “atipiċi” sabiex jiġi kkalkulat id-dumping (ara l-premessa 69 hawn fuq), dawn il-prodotti kienu esklużi wkoll mil-listi tal-esportazzjoni użati għall-kalkolu tal-ħsara. Din il-bidla kelllha impatt minuri biss fuq il-marġni tat-tqaċċit, li għaldaqstant baqgħu fl-istess pożizzjoni msemmija fil-premessa (117) tar-Regolament provviżorju.

(116)

Fin-nuqqas ta’ xi kummenti oħra, il-premessi minn (113) sa (117) tar-Regolament proviżorju huma b’dan ikkonfermati.

(117)

Diversi partijiet iddikjaraw li fl-fatt li diversi fatturi ta’ ħsara tjiebu bejn l-2009 jew l-2010 u li l-PI juri li l-industrija tal-Unjoni kienet qed tiżviluppa b’mod pożittiv. Madankollu għandu jkun innutat li din l-analiżi mhix kompluta u li ma tqisx l-iżvilupp ta’ dawk il-fatturi matul il-perjodu kkunsidrat kollu. F’dan ir-rigward, għandhom jiġu meqjusa wkoll l-ispjegazzjonijiet mogħtija fil-premessa 23 tar-Regolament provviżorju.

(118)

Fuq talba tal-parti interessata, huwa kkonfermat li l-indikaturi makroekonomiċi kienu vvalutati fil-livell tal-industrija kollha tal-Unjoni, filwaqt li dawk mikroekonomiċi kienu analizzati fil-livell tal-produtturi tal-Unjoni inklużi fil-kampjun, li inkludew lill-kumpaniji li ma ressqux ilment.

(119)

Is-CCCLA issottometta li l-indikaturi makroekonomiċi u mikroekonomiċi ppreżentati fir-Regolament provviżorju ma kinux rappreżentattivi minħabba li l-produzzjoni totali fl-Unjoni tkun ħafna ogħla miċ-ċifri użati f’din l-investigazzjoni. Madankollu, fl-isfond tal-analiżi u l-konklużjonijiet milħuqa taħt il-punt 4.2 hawn fuq, dan l-argument huwa miċħud.

(120)

Fin-nuqqas ta’ xi kummenti oħra, il-premessi minn (118) sa (121) tar-Regolament proviżorju huma b’dan ikkonfermati.

(121)

Kif imsemmi fit-taqsima 4.1 hawn fuq, diversi importaturi kkontestaw iċ-ċifri tal-produzzjoni pprovduti fil-premessa (122) tar-Regolament provviżorju. Madankollu, dawn iċ-ċifri ġew kontrverifikati u huma kkonfermati.

(122)

Fin-nuqqas ta’ xi kummenti oħra, il-premessi minn (122) sa (124) tar-Regolament proviżorju huma b’dan ikkonfermati.

(123)

L-aġġornament tat-Tabella 2 ma għandu ebda impatt fuq it-Tabelli 4 u 5 tar-Regolament provviżorju.

(124)

Minħabba li ma hemm l-ebda kumment ieħor rigward il-volumi tal-bejgħ u s-sehem tas-suq, il-premessi (125) u (126) tar-Regolament provviżorju huma b'dan ikkonfermati.

(125)

F’sottomissjoni konġunta diversi importaturi kkontestaw iċ-ċifri tal-impjieg u l-produttività pprovduti fil-premessi (127) u (128) tar-Regolament provviżorju, u allegaw li dawn ma kinux f’konformità mal-istampa mogħtija minn ċerti statistiċi tal-Eurostat (8).

(126)

Madanakollu, iċ-ċifri għaż-żewġ indikaturi kienu kontrovverifikati u meqjusa preċiżi. Iċ-ċifri riportati mill-partijiet kienu wisq wiesgħa u mhux relatati mal-produzzjoni tal-prodott simili. Minħabba li ma hemm l-ebda kumment ieħor rigward l-impjieg u l-produttività, il-premessi (127) sa (128) tar-Regolament provviżorju huma b'dan ikkonfermati.

(127)

Fin-nuqqas ta' kummenti oħra dwar id-daqs tal-marġini tad-dumping, il-premessa (129) tar-Regolament provviżorju hija b'dan ikkonfermata.

(128)

F’sottomissjoni konġunta, diversi importaturi kkontestaw iċ-ċifri tal-ħażniet ipprovduti fil-premessa 130 tar-Regolament provviżorju u r-rilevanza tagħhom meta mqabbla ma’ dejta disponibbli għall-pubbliku dwar ċertu produtturi tal-Unjoni Huma ma qablux ukoll mad-dikjarazzjoni li l-industrija tal-Unjoni essenzjalment taħdem abbażi ta' ordnijiet.

(129)

Rigward ħidma abbażi ta’ ordnijiet, l-investigazzjoni tikkonferma li kien tabilħaqq il-każ għall-produtturi tal-Unjoni inklużi fil-kampjun u li din hija prattika normali fis-settur. Barra minn hekk, iċ-ċifri tal-ħażniet ipprovduti fir-Regolament provviżorju kkonċernaw iċ-ċifri tal-ħażniet ivverifikati mill-produtturi tal-Unjoni inklużi fil-kampjun u din hija meqjusa bħala l-aktar ċifra affidabbli.

(130)

Wara d-divulgazzjoni finali, il-kummenti ta’ hawn ġew imtennija, madanakollu ma tressqu ebda argumenti ġodda. Fin-nuqqas ta' kummenti ulterjuri dwar il-ħażniet, il-premessa 130 tar-Regolament provviżorju hija b'dan ikkonfermata.

(131)

Fin-nuqqas ta' kummenti ulterjuri rigward iċ-ċifri tal-prezzijiet tal-bejgħ kif stabbiliti fir-Regolament provviżorju, il-premessa 131 tar-Regolament provviżorju hija permezz ta’ dan ikkonfermata.

(132)

Wara d-divulgazzjoni, instab żball klerikali fil-kalkolu tal-profitt nett tal-industrija tal-Unjoni u r-redditu fuq l-investiment (Retun on investment (ROI)). Dan l-iżball kien ikkoreġut u ċ-ċifri riveduti huma kif ġej:

Tabella 3

(133)

Il-korrezzjoni ta’ hawn fuq ma taffettwax materjalment is-sejbiet provviżorji fir-rigward ta’ dawk iż-żewġ indikaturi. Madankollu, il-livell medju ppeżat tal-profitt tal-produtturi inklużi fil-kampjun, kien matul il-perjodu kkunsidrat, ftit iktar baxx milli kien stabbilit provviżorjament minħabba li niżel minn 3,8 % għal 3,2 % (minflok minn 4,2 % għal 3,5 %). Ir-redditu fuq l-investiment fil-biċċa l-kbira tiegħu segwa x-xejra osservata għall-profitt iżda, kif indikat ukoll minn diversi partijiet interessati wara d-divulgazzjoni finali, matul il-perjodu kkunsidrat b’mod ġenerali żviluppa b’mod pożittiv minflok b’mod negattiv.

(134)

Parti interessata ddubitat l-istat fraġli tal-industrija tal-Unjoni fil-bidu tal-perjodu kkunsidrat, kif imsemmi fil-premessa 134 tar-Regolament provviżorju. Din il-parti allegat li tista' titqies biss il-ħsara kkważata mid-dumping u li ma ġie stabbilit ebda dumping għall-ebda perjodu minbarra l-2011. Madankollu, ir-referenza għall-istat tal-industrija tal-Unjoni f’dik il-premessa sar biss sabiex ikun analizzat jekk il-profitt li sar fil-bidu tal-perjodu kkunsidrat jistax ikun ikkunsidrat bħal li jirrappreżenta l-profitt li l-industrija normalment tagħmel. Instab li dan ma setgħax isir.

(135)

Diversi partijiet iddubitaw il-livell ta’ profitt ta’ referenza msemmi fil-premessa 135 tar-Regolament provviżorju u/jew proponew parametri referenzjarji iktar baxxi.

(136)

Grupp ta’ produtturi esportaturi Ċiniżi ddikjaraw li l-livell ta’ profitt matul il-PI kien rata tajba ta’ profittabbiltà. Madankollu, din l-allegazzjoni ma kinitx sostanzjata. Parti oħra ddikjarat ukoll li l-livelli ta’ profitt imsemmija fir-Regolament provviżorju jistgħu jitqiesu bħala livelli normali u din il-parti bbażat lilha nnifisha fuq id-dejta disponibbli pubblikament dwar il-profitt ta’ produttur Ġermaniż bejn l-1999 u l-2007. Parti oħra interessata ddikjarat li l-livell ta’ profitt matul il-PI msemmi fir-Regolament provviżorju jista’ jitqies bħala normali abbażi tal-konklużjonijiet ta’ studju mill-Kummissjoni (9) li inkluda d-dejta dwar il-profitt ta’ produttur Ġermaniż bejn l-2004 u l-2007. Wara d-divulgazzjoni finali waslu allegazzjonijiet simili.

(137)

F’dan ir-rigward, wieħed għandu jiftakar li r-Regolament provviżorju kkonkluda li l-profitt li sar wara l-bidu tal-perjodu kkunsidrat ma jistax ikun meqjus bħala profitt normali minħabba li l-industrija tal-Unjoni kienet diġà tinsab fi stat fraġli kif spjegat fil-premessa 134 tar-Regolament provviżorju. Barra minn hekk, instab li d-dejta tal-profitt 1999-2007 disponibbli pubblikament ta’ produttur Ġermaniż taċ-ċeramika msemmi aktar 'il fuq kienet tikkonċerna mhux biss l-attivitajiet tal-manifattura taċ-ċeramika li tintuża fuq il-mejda u fil-kċina, iżda wkoll segmenti importanti oħra. Fir-rigward tal-istudju tal-Kummissjoni msemmi fil-premessa 136 hawn fuq, fid-dawl tal-kuntest, l-għan u ż-żmien ta' dak l-istudju, dan instab li ma kienx bażi pertinenti għad-determinazzjoni tal-profitabbliltà. Pereżempju, relatat mal-prodott ikkonċernat, l-istudju rrefera biss għas-sitwazzjoni tal-profitt ta’ kumpanija waħda. Fl-aħħar nett, it-tliet sottomissjonijiet kollha msemmija fil-premessa 136, li fil-premessa 141 hawn taħt hemm kontradizzjonijiet għalihom, ma kinux sostanzjati biżżejjed. Għaldaqstant kien ikkonfermat li r-rata tal-profitt ta’ 3,2 % osservata matul il-PI ma setgħetx titqies bħala aċċettabbli għal dan il-prodott.

(138)

Parti interessata allegat li l-livelli ta’ profitt tad-disinn intern tad-djar, l-għamara u/jew l-ikel tas-setturi Svediżi fil-livell tal-konsumatur, għandhom jintużaw bħala parametru ta’ referenza. Madankollu, minħabba, fost l-oħrajn id-disparità fil-livelli tal-investiment għas-setturi tal-manifattura u fil-livell tal-konsumatur ikkonċernati, din l-allegazzjoni għandha tkun miċħuda.

(139)

Wara d-divulgazzjoni finali, parti ssottomettiet li sabiex il-perċentwal ta' 6 % kif instab ikun meqjus bħala raġonevoli fl-investigazzjoni taż-żraben, il-livell normali ta' profitt f'dan il-każ ma kienx xieraq peress li kien stabbilit fl-2006, meta ċ-ċirkustanzi ekonomiċi kienu ħafna iktar favorevoli milli fl-2013. Dan l-argument ma jistax jiġi aċċettat. L-ewwel nett il-parti tirreferi għaċ-ċirkustanzi ekonomiċi b’mod ġenerali u mhux għas-sitwazzjoni speċifika tas-suq tal-prodotti li jintużaw fuq il-mejda. Hija verità li l-konsum naqas b’mod sinifikanti fl-2009 iżda minn dakinhar irkupra b'mod konsiderevoli. Iktar importanti, l-iżvilupp tal-konsum ma għandux ikun ikkunsidrat f’iżolament. Minħabba l-volum għoli ta’ importazzjonijiet dumped (sehem tas-suq ta’ 66,8 %), il-livell ta’ dumping (il-marġni ta’ dumping ivarjaw minn 13,1 % għal 36,1 %) u l-livell tat-tqaċċit (ivarja minn 26,5 % għal 47,6 %), is-sitwazzjoni kompetittiva fuq is-suq tal-Unjoni kienet tkun differenti ħafna f’każ li importazzjonijiet kienu saru bi prezzijiet mhux dumped. Dan l-argument għandu għaldaqstant jiġi miċħud.

(140)

Xi partijiet oħra ssuġġerew il-parametru referenzjarju użat f’investigazzjoni antidumping oħra, jiġifieri l-investigazzjoni li tikkonċerna l-madum taċ-ċeramika (10). Wara d-divulgazzjoni finali, waslu kummenti simili. Madankollu għandu jiġi nnutat li l-madum taċ-ċeramika, għall-kuntrarju għaż-żraben tal-ġilda u l-prodotti taċ-ċeramika li jintużaw fuq il-mejda, ma jistgħux ikunu kkunsidrati bħala prodott tal-konsumatur bl-istess mod. Pereżempju, ir-rata li biha l-unitajiet domestiċi jixtru jew jissostitwixxu prodotti taċ-ċeramika li jintużaw fuq il-mejda u l-mod li bih dawn huma kkummerċjalizzati u eventwalment mibjugħa lill-konsumaturi huma eqreb għall-prodotti tal-ġilda milli għall-madum taċ-ċeramika. Il-pretensjoni sabiex jintuza l-profitt fil-mira applikat ukoll fl-investigazzjoni tal-madum taċ-ċeramika hija għaldaqstant miċħuda.

(141)

Il-kwerelanti ddikjaraw li l-livell ta’ profitt referenzjarju għandu pjuttost jaqbeż l-10 % minħabba li l-manifattura ta’ prodotti li jintużaw fuq il-mejda jew fil-kċina hija attività intensa ħafna fil-kapital li barra minn hekk tirrikjedi livell għoli ta’ investiment u innovazzjoni ġodda. Għalkemm huwa kkonfermat li l-industrija kkonċernata tabilħaqq hija intensiva fil-kapital u tirrikjedi bżonn kontinwu għal investiment, l-informazzjoni sottomessa biex tissostanzja din l-allegazzjoni ma setgħetx tibdel il-parametru referenzjarju użat. L-investigazzjoni ma setgħetx tikkonkludi li l-parametru referenzjarju jkun l-iktar wieħed xieraq għall-produtturi kollha tal-Unjoni.

(142)

Grupp ta’ importaturi kkontestaw iċ-ċifri tal-profittabbiltà fir-Regolament provviżorju u kkalkulaw il-profittabbiltà, abbażi tal-kost taċ-ċifri tal-produzzjoni, il-prezz tal-bejgħ tal-Unjoni u ċ-ċifri tal-volum u ċ-ċifri tal-prezzijiet tal-bejgħ esportat fir-Regolament provviżorju, u waslu għall-konklużjoni li l-industrija tal-Unjoni attwalment għamlet profitt ta’ 6 % matul il-PI. Madankollu, din il-kompjutazzjoni kienet żbaljata peress li kkombinat dejta minn sorsi differenti (il-produtturi tal-Unjoni inklużi fil-kampjun, l-industrija tal-Unjoni kollha u l-Eurostat).

(143)

Fin-nuqqas ta’ kummenti rilevanti ulterjuri, il-premessi (132) sa (137) tar-Regolament proviżorju huma permezz ta’ dan ikkonfermati.

(144)

F’sottomissjoni konġunta, diversi importaturi qiesu li l-ispejjeż taċ-ċifri tal-produzzjoni fil-premessa 138 tar-Regolament provviżorju ma segwewx l-evoluzzjoni tal-ispejjeż tal-ħaddiema u l-enerġija murija mill-Eurostat. Il-partijiet enfasizzaw li l-ispejjeż tax-xogħol żdiedu fl-Istati Membri. B’mod ugwali, l-iżvilupp tal-ispejjeż tal-enerġija fl-Unjoni ma jappoġġjax tnaqqis fl-ispejjeż tal-produzzjoni.

(145)

F’dan ir-rigward, wieħed għandu jinnota li l-ispejjeż tax-xogħol u tal-enerġija pprovduti mill-partijiet kienu ġenerali wisq. Barra minn hekk, il-fatt li l-industrija tal-Unjoni rnexxielha tnaqqas l-ispejjeż tal-produzjoni matul perjodu fejn ix-xejra ġenerali kienet il-kuntrarju turi l-isforz straordinarju li għamlet l-industrija tal-Unjoni biex tnaqqas l-ispejjeż u tibqa’ kompetittiva.

(146)

L-ispejjeż taċ-ċifri tal-produzzjoni pprovduti fir-Regolament provviżorju jirrappreżentaw l-ispejjeż tal-produzzjoni vverifikati għall-produtturi tal-Unjoni inklużi fil-kampjun. Fin-nuqqas ta' kummenti ulterjuri oħra, il-premessa 138 tar-Regolament proviżorju hija b'dan ikkonfermata.

(147)

Diversi partijiet ikkontestaw il-konklużjoni dwar il-ħsara mressqa fir-Regolament provviżorju abbażi ta’ diversi indikaturi tal-ħsara imtejba fl-aħħar parti tal-perjodu kkunsidrat. Madankollu, din il-kwistjoni ma tistax ittellef il-fatt li l-biċċa l-kbira tal-indikaturi tal-ħsara ddeterjoraw matul il-perjodu kkunsidrat. Din id-deterjorazzjoni tal-indikaturi tal-ħsara tista’ tiġi osservata għall-biċċa l-kbira tal-indikaturi makroekonomiċi, bħall-volum tal-produzzjoni, il-kapaċità, il-bejgħ lill-konsumaturi mhux relatati, l-impjieg kif ukoll għall-indikaturi relatati mal-prestazzjoni finanzjarja tal-industrija tal-Unjoni bħall-profittabbiltà u l-investimenti.

(148)

Fin-nuqqas ta’ kummenti oħra, il-premessi 139 sa 143 tar-Regolament provviżorju huma b'dan ikkonfermati.

(149)

Fin-nuqqas ta’ kwalunkwe kummenti għall-premessa 144 tar-Regolament proviżorju, dik il-premessa hija b’dan ikkonfermata.

(150)

Diversi partijiet ikkontestaw il-konklużjoni stabbilita fil-premessa 148 tar-Regolament provviżorju. Madankollu, għalkemm xi wħud mill-perċentwali li kienu enfasizzati fil-premessi 145 sa 147 tar-Regolament provviżorju kienu ftit riveduti kif spjegat hawn fuq, Dan ma jibdilx il-fatti u l-konklużjonijiet tal-premessi 145 sa 148 tar-Regolament provviżorju.

(151)

Tabilħaqq, minħabba l-iżvilupp tas-sehem tas-suq tal-importazzjonijiet Ċiniżi oġġetti ta' dumping, huwa ċar li ma hemm ebda kontradizzjoni bejn il-premessa 147 tar-Regolament provviżorju, b’mod partikolari fir-rigward tad-dikjarazzjoni li t-tnaqqis fil-prezzijiet tal-bejgħ tal-industrija tal-Unjoni fuq is-suq tal-Unjoni u l-profittabbiltà tiegħu, jistgħu jkunu attribwiti għad-depressjoni tal-prezzijiet li għadda minnha s-suq tal-Unjoni minħabba l-importazzjonijiet oġġetti għal dumping mir-RPĊ u l-movimenti tas-sehem tas-suq tal-industrija tal-Unjoni, kif allegat minn parti waħda.

(152)

Barra minn hekk, il-fatt li l-prezzijiet tal-importazzjonijiet mir-RPĊ għolew matul il-perjodu kkonċernat, kif innutat minn diversi partijiet, ma jtellifx is-sejbien ta' tqaċċit u dumping ta' ħsara matul il-PI.

(153)

Fin-nuqqas ta' kwalunkwe kumment ieħor rigward l-effetti tal-importazzjonijiet li huma l-oġġett ta' dumping, il-premessi minn 145 sa 148 tar-Regolament provviżorju huma b’dan ikkonfermati.

(154)

Kif imsemmi fil-premessa 106 hawn fuq, wara l-impożizzjoni ta’ miżuri provviżorji, id-dejta tal-Eurostat dwar l-importazzjonijiet kienet ġiet aġġornata. Filwaqt li din id-dejta l-ġdida kienet qed tiġi kontrovverifikata mad-dejta preċedenti inkluża fir-Regolament provviżorju, ġie identifikat żball klerikali fil-kompjutazzjoni taċ-ċifri tal-importazzjoni mit-Tajlandja u t-Turkija. Dan l-iżball ġie kkoreġut u konsegwentement, iċ-ċifri definittivi li jikkonċernaw l-importazzjonijiet tal-prodotti simili minn pajjiżi terzi, ibbażati fuq dejta tal-Eurostat, huma kif ġej:

Tabella 4

(155)

L-importazzjonijiet minn pajjiżi terzi naqsu bi 12 % matul il-perjodu kkunsidrat, filwaqt li s-sehem mis-suq ta’ dawn l-importazzjonijiet baqa’ pjuttost stabbli.

(156)

Għandu jiġi nnotat li l-prezzijiet medji tal-importazzjoni minn pajjiżi terzi oħrajn żdiedu b’6 % matul il-perjodu kkunsidrat, biex b’hekk baqgħu ogħla b’mod konsistenti mill-prezzijiet medji tal-bejgħ ta’ esportazzjonijiet Ċiniżi (bi 68 % matul il-PI).

(157)

Qabel il-pubblikazzjoni tar-Regolament provviżorju, is-CCCLA osservat li l-importazzjonijiet mit-Turkija setgħu żdiedu bi 8 % bejn l-2010 u l-2011, u l-prezzijiet tal-importazzjoni mit-Turkija kienu allegatament madwar 20 % biss ogħla mill-prezzijiet tal-importazzjoni mir-RPĊ. Diversi partijiet ikkontestaw il-konklużjoni tar-Regolament provviżorju fir-rigward tal-importazzjonijiet mit-Turkija.

(158)

B’kunsiderazzjoni li kien hemm żball manifest materjali fir-rappurtar tal-importazzjonijiet Torok fir-Regolament provviżorju u d-dejta aġġornata kif tidher hawn fuq, xejn ma jissuġġerixxi li l-importazzjonijiet Torok, minħabba l-prezzijiet u s-sehem tas-suq tagħhom, jistgħu jiksru r-rabta kawżali bejn l-esportazzjonijiet Ċiniżi tal-prodott ikkonċernat u l-ħsara mġarrba mill-industrija tal-Unjoni. Wieħed għandu jinnota wkoll li n-noninklużjoni ta’ importazzjonijiet li joriġinaw mit-Turkija fl-ilment ma tistax tkun deskritta bħala diskriminatorja minħabba li, fl-istadju tal-bidu, ma kienx hemm evidenza suffiċjenti ta’ dumping, ħsara u rabta kawżali f’dak li jirrigwarda l-importazzjonijiet mit-Turkija.

(159)

Is-sehem tas-suq tal-importazzjonijiet mit-Tajlandja qatt ma kien iktar minn 3,5 % matul il-perjodu ta’ investigazzjoni.

(160)

Għar-raġunijiet imsemmija hawn fuq, qed jiġi konkluż li importazzjonijiet minn pajjiżi terzi ma affetwawx materjalment is-sitwazzjoni tal-industrija tal-Unjoni sal-punt li jiksru r-rabta kawżali bejn l-importazzjoni tal-oġġetti tad-dumping mir-RPĊ u l-ħsara mġarrba mill-industrija tal-Unjoni.

(161)

Fin-nuqqas ta' kummenti oħra ġodda fir-rigward tas-segmenti tas-suq, il-premessi 156 sa 158 tar-Regolament provviżorju huma kkonfermati b'dan.

(162)

Parti ssuġġeriet li l-ħsara tista’ tkun attribwita għal tnaqqis fid-domanda għal perjodu ta' żmien twil għall-prodotti mmanifatturati fl-Unjoni. Madankollu, l-investigazzjoni ma kkonfermatx din ix-xejra, kif diġà ġie spjegat fil-premessa 112 tar-Regolament provviżorju.

(163)

Fin-nuqqas ta' kummenti ulterjuri oħra fir-rigward tal-konsum u d-domanda, il-premessi 159 sa 166 tar-Regolament provviżorju huma kkonfermati.

(164)

Parti nnutat li l-prezzijiet medji tal-esportazzjoni tal-Unjoni kienu iktar baxxi mill-prezzijiet medji tal-bejgħ matul il-perjodu kkonċernat. Dan seta' affettwa l-kapaċità tal-industrija tal-unjoni biex tagħmel investimenti ġodda jew biex tirrekluta staff ġdid. Argument simili kien imtenni wara d-divulgazzjoni definittiva. Madankollu, kif diġà kien imsemmi fil-premessa 169 tar-Regolament provviżorju, il-biċċa l-kbira tal-indikaturi tal-ħsara ma jistgħux jiġu affettwati mill-prestazzjoni fuq il-bejgħ għall-esportazzjoni. Barra minn hekk, jista’ jkun argumentat ukoll li dan il-bejgħ kien mod ta’ kumpens parzjali għall-ħsara mġarrba nis-suq tal-Unjoni. Barra minn hekk, minħabba li l-prezzijiet medji kienu kkalkulati billi l-valur totali tal-bejgħ tal-prodott simili kien diviż bil-volum totali tat-tali bejgħ, taħlita differenti tal-prodott tal-bejgħ fuq is-suq tal-Unjoni meta mqabbel mal-bejgħ għall-esportazzjoni, tista’ tirriżulta wkoll f’differenzi sinifikanti fil-valuri ġenerali tal-bejgħ medju. Fl-aħħar nett, dan il-bejgħ għall-esportazzjoni rrappreżenta inqas minn 37 % tal-volumi tal-bejgħ ġenerali tal-industrija tal-Unjoni, jiġifieri s-suq dominanti għall-industrija tal-Unjoni kien għadu fil-biċċa l-kbira s-suq intern tal-Unjoni. L-argument li dan il-bejgħ għall-esportazzjoni kien ta’ ħsara għall-industrija tal-Unjoni, sal-punt li jikser ir-rabta kawżali bejn l-importazzjonijiet mir-RPĊ u l-ħsara mġarrba mill-industrija tal-Unjoni, huwa għaldaqstant miċħud.

(165)

Billi ma kien hemm l-ebda kumment gdid fir-rigward tal-esportazzjonijiet mill-industrija tal-Unjoni, il-premessi 167 sa 170 tar-Regolament provviżorju huma b’dan ikkonfermati.

(166)

Wara l-miżuri provviżorji, parti oħra ssuġġeriet li l-eliminazzjoni tal-kwoti tal-importazzjoni kien ikollha impatt fuq il-produtturi tal-Unjoni matul il-perjodu kkunsidrat. Madankollu, ma tressaq ebda fatt ġdid li jista’ jbiddel il-konklużjoni fil-premessa 173 tar-Regolament provviżorju.

(167)

Fin-nuqqas ta' kwalunkwe kumment ġdid ieħor rigward l-eliminazzjoni tal-kwoti tal-importazzjonijiet, il-premessi minn 171 sa 173 tar-Regolament provviżorju huma b’dan ikkonfermati.

(168)

Wara l-impożizzjoni ta’ miżuri provviżorji, diversi partijiet insistew li l-investigazzjoni tal-kartell imnedija mill-awtoritajiet Ġermaniżi msemmija fil-premessa 175 tar-Regolament provviżorju jew il-multa tal-kartell imsemmija fl-istess premessa, ma kinux ikkunsidrati biżżejjed. Fir-rigward ta’ dawn l-allegazzjonijiet, jista’ jintqal dan li ġej minbarra dak li diġà ntqal fil-premessi 174 u 175 tar-Regolament provviżorju.

(169)

L-investigazzjoni Ġermaniża tal-kartell, li tinvestiga allegat iffissar tal-prezzijiet minn Lulju 2005 sa Frar 2008, għadha għaddejja. Peress li l-produtturi tal-Unjoni ngħataw kunfidenzjalità u fl-isfond tal-fatt li r-riżultati finali tal-investigazzjoni Ġermaniża li għaddejja, għadhom ma ġewx irrilaxxati pubblikament, mhux possibbli li jsiru kummenti fuq id-dettalji tal-analiżi mwettqa. Madankollu, jista’ jkun ikkonfermat li ebda mill-produtturi tal-unjoni inklużi fil-kampjun ma hu suġġett għal din l-investigazzjoni li għaddejja. L-investigazzjoni kkonkludiet ukoll li l-indikaturi mikroekonomiċi ma kinux affettwati mill-prattiki investigati u l-indikaturi makroekonomiċi, kienu affettwati, jekk kienu, b’mod limitat ħafna.

(170)

Fir-rigward tar-riżultati tal-kartell dwar l-armar u l-aċċessorji tal-kmamar tal-banju, wieħed għandu jiftakar li dak il-kartell tal-iffissar tal-prezzijiet instab li kien attiv bejn l-1992 u l-2004 u li biss wieħed mill-produtturi mmultati huwa attiv ukoll fis-settur tal-prodotti li jintużaw fuq il-mejda u fil-kċina. Id-dejta pprovduta minn dan il-produttur fil-kuntest tal-awtonomija u l-ħsara mhix influwenzata mill-prattiki tal-kartell minħabba li d-dejta dwar it-taqsima tal-prodotti li jintużaw fuq il-mejda u fil-kċina biss ta’ dak il-produttur intużat u mhux id-dejta kkonsolidata. Għalhekk, il-multa relatata ma’ dak il-kartell ma afftettwatx id-dejta pprovduta minn dak il-produttur. Għandu jiġi mfakkar ukoll li l-perjodu tal-iffissar tal-prezzijiet kien ferm qabel il-perjodu kkunsidrat. Minħabba li l-identitajiet tal-produtturi tal-Unjoni huma kunfidenzjali, ma jistax jiġi divulgat jekk din il-kumpanija hijiex inkluża fil-kampjun jew le. Madankollu, jekk produttur tal-Unjoni inkluż fil-kampjun ikun irreġistra fil-kontijiet tiegħu kwalunkwe oġġett (pereżempju multa tal-kartell) li jgħawweġ l-istampa tiegħu tal-ħsara għall-finijiet ta’ din l-investigazzjoni, l-awtorità tal-investigazzjoni kienet tiżolahom sabiex fatturi rilevanti għall-ħsara ma jitgħawġux.

(171)

Konsegwentement, l-allegazzjonijiet dwar l-impatt tal-investigazzjonijiet tal-kartell imsemmija hawn fuq dwar l-analiżi tal-ħsara u l-kawżalità, huma permezz ta’ dan miċħuda.

(172)

Parti interessata waħda semmiet li kien hemm arranġamenti illegali tal-prezzijiet u allokazzjonijiet tas-suq bejn il-produtturi tal-Unjoni, iżda madankollu ma pprovdiet ebda evidenza għal din l-allegazzjoni u għaldaqstant din qed tiġi miċħuda.

(173)

Fin-nuqqas ta’ kummenti oħra ġodda dwar prattiki kompetittivi fis-suq tal-Unjoni, il-premessi minn 174 sa 176 tar-Regolament provviżorju huma b’dan ikkonfermati.

(174)

Fin-nuqqas ta’ kummenti oħra ġodda dwar il-metodi ta’ produzzjoni tal-Unjoni, il-premessi minn 177 sa 178 tar-Regolament provviżorju huma b’dan ikkonfermati.

(175)

Importatur irrepeta allegazzjonijiet simili wara d-divulgazzjoni definittiva u argumenta dwar id-differenza fil-metodi tal-produzzjoni użati mill-produtturi tal-Unjoni meta mqabbla ma’ metodi iktar artiġjanali tal-fabbriki Ċiniżi. Madankollu, ma tressaq ebda argument sostantiv li jista’ jbiddel il-konklużjoni li ntlaħqet fil-premessa 178 tar-Regolament provviżorju u l-allegazzjoni għaldaqstant hija definittivament miċħuda.

(176)

Fin-nuqqas ta' kummenti oħra ġodda fir-rigward tas-swieq ta’ prodotti użati, il-premessi 179 sa 180 tar-Regolament provviżorju huma b'dan ikkonfermati.

(177)

Parti ddikjarat li l-premessa 183 tar-Regolament provviżorju tagħti analiżi żbaljata tas-sitwazzjoni matul il-perjodu tal-irkupru ekonomiku bejn l-2010 u l-2011 u li l-impatt tal-kriżi ekonomika ma kienx ikkunsidrat biżżejjed. Dawn il-kummenti kienu ripetuti wara d-divulgazzjoni finali. Madankollu, l-allegazzjonijiet ma kinux sostanzjati. Għandu jkun enfasizzat li l-premessa ċċitata tiddikjara li importazzjonijiet ta’ oġġetti ta’ dumping mir-RPĊ intensifikaw l-effett tat-tnaqqis ekonomiku. Fir-rigward tal-impatt tal-kriżi ekonomika, il-premessa 184 tar-Regolament provviżorju hija ċara dwar il-fatt li l-kriżi ekonomika setgħet ikkontribwixxiet għall-prestazzjoni ħażina tal-industrija tal-Unjoni, għalkemm ma setgħetx tikser ir-rabta kawżali bejn l-importazzjonijiet ta’ oġġetti tad-dumping u s-sitwazzjoni ta’ ħsara li ġarrbet dik l-industrija matul il-PI.

(178)

Fin-nuqqas ta’ kummenti ġodda oħra dwar il-kriżi ekonomika, il-premessi minn 181 sa 184 tar-Regolament provviżorju huma b’dan ikkonfermati.

(179)

F’sottomissjoni konġunta,diversi importaturi allegaw li t-tnaqqis drastiku fl-impjieg kien żvilupp normali fl-industrija tal-oġġetti għall-konsumaturi. Madankollu, din l-allegazzjoni ma kinitx sostanzjata. Barra minn hekk, anke jekk din ix-xejra tkun normali għal dan is-settur, ma setgħetx tikser ir-rabta kawżali bejn l-importazzjonijiet ta' oġġetti ta' dumping mir-RPĊ u t-telf sinifikanti ta' impjiegi f'dan is-settur. Għalhekk, din l-allegazzjoni hija miċħuda.

(180)

Parti waħda allegat li d-defiċits strutturali li baqa’ tal-industrija tal-Unjoni b’rabta mal-kapaċità żejda eżistenti kif jidher fit-Tabella 3 tar-Regolament provviżorju jistgħu jiksru r-rabta kawżali bejn l-importazzjonijiet tal-oġġetti ta’ dumping mill-RPĊ u l-ħsara mġarrba mill-manifatturi tal-Unjoni. Rigward dan l-argument, għalkemm l-industrija tal-Unjoni kienet diġà fi stat fraġli fil-bidu tal-perjodu kunsidrat u kienet għada ma għaddietx minn ristrutturazzjoni, l-investigazzjoni kkonfermat li kienet kompetittiva u li kienet qed tlaħħaq tajjeb mad-domanda mis-swieq kollha. Rigward it-Tabella 3 tar-Regolament provviżorju, it-tnaqqis fil-produzzjoni għandu jkun ikkunsidrat b'rabta mal-pressjoni li tirriżulta mill-volum għoli ta' importazzjonijiet bi prezz baxx mir-RPĊ, filwaqt li l-esportazzjonijiet mill-industrija tal-Unjoni baqgħu stabbli. Għalhekk, din l-allegazzjoni ma tistax tiġi milqugħa.

(181)

Parti waħda kkunsidrat li l-Kummissjoni naqqset milli tikkunsidra l-effett kumulattiv ta’ kull wieħed mill-fatturi l-oħra ta’ ħsara. Din l-allegazzjoni tqajmet ukoll minn diversi partijiet wara d-divulgazzjoni definittiva. Madankollu, minħabba r-riżultati tal-investigazzjoni f’relazzjoni ma’ diversi fatturi invokati oħra, mhux possibbli li l-effett kumulattiv tagħhom seta’ kiser ir-rabta kawżali. Tabilħaqq, għall-biċċa l-kbira tal-fatturi mqajma, l-impatt tagħhom kien żgħir, jekk kien hemm.

(182)

Parti kkunsidrat li l-awtorità ta’ investigazzjoni kienet naqset milli tiddistingwi bejn il-kookkorrenza u l-kawżalità. Madankollu, l-informazzjoni ta’ sostenn ipprovduta assolutament ma kinetx konklussiva f’dan ir-rigward u l-allegazzjoni għaldaqstant hija miċħuda.

(183)

Fin-nuqqas ta' kummenti ġodda oħra fir-rigward ta’ fatturi oħra, il-premessi 185 sa 190 tar-Regolament provviżorju huma kkonfermati b'dan.

(184)

Minħabba li ma kien hemm ebda kummenti ġodda, il-premessa 191 tar-Regolament provviżorju hi b’dan ikkonfermata.

(185)

Fin-nuqqas ta’ kwalunkwe kummenti għall-premessa 192 tar-Regolament proviżorju, dik il-premessa hija b’dan ikkonfermata.

(186)

Produttur Pollakk mhux kwerelant laqa’ b’sodisfazzjon il-miżuri, filwaqt li manifattur mir-Renju Unit mhux kwerelant li għandu interessi fl-importazzjoni tal-prodott ikkonċernat opponiehom. It-tieni parti tqis li d-dazji kien ikollhom effett negattiv fuq dawk il-produtturi li jikkumplimentaw l-għażla ta' prodotti tagħhom b'importazzjonijiet mir-RPĊ u adattaw għall-globalizzazzjoni permezz ta' mudell tan-negozju fejn isir xogħol ta’ valur miżjud għoli fl-Unjoni. Barra minn hekk, il-konsumaturi jkunu inqas inklinati li jixtru l-prodotti tagħhom minħabba li ma jibqgħux joffru għażla sħiħa ta' prodotti.

(187)

Fir-rigward tal-allegazzjoni tat-tieni parti, ġiet eżaminata s-sitwazzjoni ta’ dik il-kumpanija. Jirriżulta li l-importazzjonijiet Ċiniżi ta’ prodotti li jintużaw fiq il-mejda jikkostitwixxu parti żgħira ħafna mill-importazzjonijiet totali tagħhom. Madankollu, il-kumpanija allegat mingħajr ma speċifikat iktar, li dawn l-importazzjonijiet kienu importanti għaliha. Il-kumpanija ma tat ebda ċifra dwar il-produzzjoni tagħha. Skont id-dikjarazzjonijiet finanzjarji, fl-2011, il-kumpanija għamlet profitt qabel it-taxxa fuq il-fatturat totali ta' iktar minn 10 %, li l-biċċa l-kbira minnu nkiseb mis-swieq mhux tal-UE (ebda ċifra ma kienet ipprovduta għall-prodott ikkonċernat). Abbażi ta’ dan, mhux mistenni li l-impożizzjoni ta’ miżuri tipperikola l-vijabbiltà tal-kumpanija. Ma ġiet ipprovduta ebda evidenza speċifika għall-allegazzjoni li ħafna kumpaniji oħra se jaffaċċjaw ukoll diffikultajiet bħala riżultatat tal-miżuri. Barra minn hekk, skont ir-risposti li waslu matul l-istadju qabel il-bidu tal-fażi tal-analizi tal-istat u s-sottomissjonijiet li waslu sussegwentement, ma hemm ebda indikazzjoni li hemm għadd sinifikanti ta’ kumpaniji f’tali sitwazzjoni.

(188)

L-impatt tad-dazji fuq l-attivitajiet tal-manifattura tal-industrija tal-Unjoni ikun pożittiv. Fil-fatt, mill-impożizzjoni riċenti ta’ dazji antidumping provviżorji, ġew irrappurtati diversi żviluppi pożittivi f’dan ir-rigward.

(189)

L-iżviluppi pożittivi msemmija hawn fuq jikkonfermaw id-dikjarazzjoni tal-kwerelanti li l-produzzjoni tal-Unjoni tista’ tiżdied sostanzjalment fi żmien qasir billi jintużaw impjanti, makkinarju u l-ħaddiema disponibbli, filwaqt li żidiet ikbar ikunu fattibbli fuq perjodu ta’ żmien itwal. Għaldaqstant, l-irtirar ta’ prattiki inġusti tal-prezzijiet huwa ta’ benefiċċju għalihom peress li livell ġdid ta’ prezzar jagħmilha iktar attraenti li jiġu mmanifatturati iktar prodotti fl-Unjoni, kemm f’ordnijiet kbar kif ukoll f’ordnijiet żgħar, disinji speċjali jew prodotti komuni mhux tad-ditta. Dan jirriżulta fil-ħolqien ta’ impjiegi ġodda li jinvolvu tipi differenti ta’ kapaċitajiet u għalhekk għandu jonqos il-qgħad.

(190)

Dwar l-impossibbiltà li tkun offruta għażla wiesgħa ta’ prodotti, din id-dikjarazzjoni ma tistax tinżamm minħabba li l-konsumaturi jirrikjedu firxiet li jinbidlu ta' prodotti u l-eżistenza ta' diversi sorsi ta' provvista.

(191)

Fin-nuqqas ta’ kummenti ġodda oħra fir-rigward tal-interess tal-industrija tal-Unjoni, il-premessi 193 sa 198 tar-Regolament provviżorju huma b’dan ikkonfermati.

(192)

L-ikbar żewġ importaturi fil-kampjun ikkontestaw il-livell ta’ kooperazzjoni tagħhom rigward dejta sħiħa dwar il-profittabbiltà u l-marġni bejn il-prezzijiet tax-xiri u l-bejgħ mill-ġdid għal klijenti mhux relatati, filwaqt li wieħed minnhom ikkontesta li kien ċaħad l-aċċess għall-kontijiet tiegħu u argumenta li xejn ma kien jinbidel kieku ta l-aċċess. Il-partijiet allegaw li d-daqs u l-mudell tan-negozju tagħhom ma ppermettilhomx jipprovdu dejta ddettaljata kif mitlub. Fi stadju definittiv, kien ikkonfermat li wieħed minnhom għal darb'oħra ċaħad l-aċċess għall-kontijiet tal-importazzjoni tiegħu u li t-tnejn, minkejja li ppruvaw, ma rnexxilhomx jipprovdu dejta sħiħa u li tista’ tintuża dwar il-profittabblità u informazzjoni dwar il-marġni bejn il-prezzijiet tax-xiri u tal-bejgħ mill-ġdid għall-klijenti mhux relatati b’tali mod li tista’ tintuża mill-istituzzjonijiet fl-analiżi tas-sitwazzjoni ta’ importaturi mhux relatati. L-informazzjoni limitata pprovduta miż-żewġ kumpaniji dwar il-prezzijiet tax-xiri u tal-bejgħ mill-ġdid, anki jekk kienet inkonklussiva, kienet madankollu għal kollox konformi mal-informazzjoni ġenerali żejda miksuba u miġbura f’sommarju fil-premessa 202 tar-Regolament provviżorju.

(193)

Fil-premessa 203 tar-Regolament provviżorju, il-partijiet interessati kienu mistiedna jippreżentaw dejta addizzjonali, komprensibbli u verifikabbli li tanalizza iktar l-impatt tal-miżuri fuq il-katina tal-provvista.

(194)

Wara l-miżuri provviżorji, intbagħtu risposti ġodda għall-kwestjonarju tal-importaturi minn żewġ importaturi mhux relatati. Waslu wkoll sottomissjonijiet oħra ta’ interess għall-Unjoni minn importaturi mhux inklużi fil-kampjun, assoċjazzjoni tal-Kummerċ Ewropew u Internazzjonali (Assoċjazzjoni dwar il-Kummerċ Barrani), assoċjazzjoni Svediża tal-importaturi, bejjiegħa bil-grossa u bejjiegħa bl-imnut (Svensk Handel), is-CCCLA u produttur tal-Unjoni b’interessi tal-importazzjoni. L-ebda minn dawn is-sottomissjonijiet ma kienet tinkludi dejta konklussiva dwar l-impatt tal-miżuri fuq il-katina tal-provvista.

(195)

Parti allegat li ċ-ċifra tal-impjiegi downstream affettwata mid-dazji ma ġietx riflessa b'mod sħiħ fl-isfond tal-fatt li l-istatistiċi tal-Eurostat juru li b'mod ġenerali, impriżi kummerċjali ta' distribuzzjoni jħaddmu iktar nies (33 miljun) minn kumpaniji tal-manifattura (31 miljun) Madankollu, iċ-ċifri pprovduti kienu dwar in-negozji tal-importazzjoni u tal-manifattura u ma setgħux jintużaw għall-finijiet ta’ din l-investigazzjoni.

(196)

F’sottomissjoni konġunta, diversi importaturi allegaw li ħames importaturi inklużi fil-kampjun ipprovdew iktar minn 10 000 persuna b’relazzjoni mal-prodott ikkonċernat u mhux 350 kif imsemmi fil-premessa 200 tar-Regolament provviżorju Iċ-ċifri kienu għal darb’oħra vverifikati. Għandu jkun enfasizzat li fl-analiżi tal-interessi tal-importaturi, l-għadd ta’ impjiegi relatati mal-importazzjoni u l-bejgħ mill-ġdid tal-prodott ikkonċernat, inklużi l-funzjonijiet ta’ appoġġ, għandu jkun ikkunsidrat. L-impjieg relatat ma’ prodotti jew oriġini oħra, jew relatat ma' attivitajiet bħall-bejgħ bil-grossa u l-bejgħ bl-imnut, naturalment ma għandux ikun inkluż f’dan l-għadd. Wieħed għandu jiftakar li, iktar qabel fil-proċediment, grupp ta’ 14-il importatur kienu stmaw li l-għadd ta’ impjiegi involuti fil-livell tal-importaturi huwa ta’ 7 000 impjieg. Iċ-ċifra tidher li hija stima raġonevoli abbażi tal-estrapolazzjoni tas-sitwazzjoni tal-importaturi inklużi fil-kampjun sal-punt li ċ-ċifri tagħhom jistgħu jintużaw.

(197)

Diversi partijiet ilmentaw dwar iċ-ċifra għolja tal-marġini gross inkluża fil-premessa 202 tar-Regolament provviżorju, u allegaw li din tista' tiżvijja. Madankollu, l-investigazzjoni wriet li l-maġġoranza vasta tal-importaturi li wieġbu għall-mistoqsijiet tat-teħid tal-kampjuni dwar l-importaturi rrapportaw marġini gross bejn il-prezz tax-xiri u l-prezz tal-bejgħ mill-ġdid li jvarja bejn 50 % u 200 % u l-importaturi inklużi fil-kampjun kienu f’sitwazzjoni simili. Barra minn hekk, wara d-divulgazzjoni provviżorja, il-kwerelanti ssottomettew diversi eżempji li jappoġġjaw l-informazzjoni mogħtija mill-pubblikazzjoni msemmija fil-premessa 202 tar-Regolament provviżorju, jiġifieri li tikkonferma l-proporzjon tal-prezz tal-importazzjoni – il-prezz tal-bejgħ bl-imnut tal-prodott ikkonċernat.

(198)

Manifattur mir-Renju Unit b’interessi tal-importazzjoni spjega li dawk il-marġni huma meħtieġa biex jiġu koperti ċerti spejjeż imġarrba fl-Unjoni. Ma ġiet ipprovduta ebda dejta kienet tippermetti kalkolu ta’ dawk il-marġni abbażi tal-fatturat.

(199)

Billi setgħat tinkiseb u tkun ivverifikata dejta li tista’ tintuża dwar il-profitt fuq l-attivitajiet ta’ importazzjoni relatati mal-prodott ikkonċernat ta’ tliet importaturi biss inklużi fil-kampjun u dawn it-tliet importaturi jirrappreżentaw madwar 3 % biss tal-importazzjonijiet tal-prodott ikkonċernat, iċ-ċifra medja ppiżata tal-profitt ikkonċernat ma kinetx meqjusa konklussiva u għaldaqstant ma ssemmietx fir-Regolament provviżorju. Madankollu, għandu jkun innutat li dan il-profitt medju ppiżat kien b’saħħtu (bejn 6 % u 10 % - firxa mogħtija għal raġunijiet ta’ kunfidenzjalità).

(200)

Importatur allega li ma hemmx produzzjoni biżżejjed ta’ oġġetti tal-ġebel ikkuluriti fl-Unjoni u li ma kellu ebda alternattiva oħra ħlief li jimporta mir-RPĊ. Wara d-divulgazzjoni saret l-istess allegazzjoni. Madankollu, l-investigazzjoni stabbilixxiet li oġġetti tal-ġebel ikkuluriti jistgħu jkunu akkwistati minn diversi sorsi, inklużi produtturi tal-Unjoni. Barra minn hekk, il-produtturi tal-Unjoni għandhom kapaċità ta’ produzzjoni biex ibigħu iktar fis-suq tal-Unjoni.

(201)

L-informazzjoni miġbura matul l-investigazzjoni ma ppermettietx kwantifikazzjoni xierqa dwar sa fejn l-importaturi jkunu jistgħu jgħaddu ż-żidiet tal-prezz tax-xiri bħala riżultat tal-livelli proposti tad-dazju. Madankollu, jekk l-importazzjonijiet mir-RPĊ jkunu suġġetti għal dazju definittiv antidumping u fl-isfond tal-informazzjoni dwar il-marġni gross u nett, ma hemm xejn li jisuġġerixxi li l-vijabbiltà tan-negozju tal-importaturi tinsab fil-periklu. Importatur issuġġerixxa wkoll li operaturi u importaturi kbar tas-suq li n-negozju ewlieni tagħhom mhuwiex l-oġġetti taċ-ċeramika li jintużaw fuq il-mejda u fil-kċina, mhux se jkunu affettwati b'mod negattiv.

(202)

Għalhekk, huwa konkluż li b’mod ġenerali, l-impożizzjoni tal-miżuri fil-livelli proposti ma ħalliet ebda impatt negattiv sinifikanti fuq is-sitwazzjoni tal-importaturi mhux relatati tal-prodott ikkonċernat.

(203)

Fin-nuqqas ta’ kummenti ġodda oħra fir-rigward tal-interess tal-importaturi mhux relatati, il-premessi 199 sa 211 tar-Regolament provviżorju huma b’dan ikkonfermati.

(204)

Minbarra l-istedina inkluża fil-premessa 203 tar-Regolament provviżorju, fil-ġurnata tal-pubblikazzjoni ta’ miżuri provviżorji, il-Kummissjoni kkuntattjat direttament lill-bejjiegħa bl-imnut rilevanti u lill-assoċjazzjonijiet tal-bejjiegħa bl-imnut, importaturi b’attivitajiet possibbli fil-livell tal-konsumatur u disinjaturi magħrufa mill-Kummissjoni u stednithom jimlew il-kwestjonarji rilevanti. Xi riċevituri li fil-bidu allegaw li huma bejjiegħa bl-imnut wieġbu li ma kinux ikkonċernati mill-investigazzjoni minħabba li ma kinux attivi fin-negozju. Il-Kummissjoni eventwalment irċeviet seba’ risposti ġodda għall-kwestjonarju tal-bejjiegħa bl-imnut. Dawn is-seba’ bejjiegħa bl-imnut kienu jirrappreżentaw 1 % tal-importazzjonijiet mir-RPĊ matul il-PI. Ħafna minn dawn it-tweġibiet f’ħafna rispetti kienu neqsin iżda xorta kienu analizzati safejn kien possibbli. Għall-kwestjonarju tad-disinjaturi ma waslet ebda tweġiba.

(205)

L-informazzjoni miksuba b’dan il-mod, ma pprovdiet ebda evidenza ġdida dwar l-interess tas-setturi ekonomiċi li jista jikkontesta l-konklużjoni milħuqa fil-premessa 217 tar-Regolament provviżorju.

(206)

Wara l-pubblikazzjoni ta’ miżuri provviżorji, is-sottomissjonijiet dwar l-interess tal-Unjoni fir-rigward ta’ setturi ekonomiċi oħra waslu kemm mill-importaturi inklużi fil-kampjun kif ukoll minn dawk mhux inklużi fil-kampjun (inkluż importatur Pollakk attiv fis-settur tal-oġġetti promozzjonali), assoċjazzjoni tal-Kummerċ Ewropew u Internazzjonali (Assoċjazzjoni tal-Kummerċ Barrani), assoċjazzjoni Svediża tal-importaturi, bejjiegħa bil-grossa u bejjiegħa bl-imnut (Svensk Handel), diversi bejjiegħa bl-imnut, is-CCCLA u tmien kumpaniji li jinkaljaw il-kafe) seba’ minnhom jinsabu fl-Italja u waħda għandha l-uffiċċju ewlieni tagħha fl-Awstrija).

(207)

Il-kumpaniji li jinkaljaw il-kafe allegaw li minħabba n-numru żgħir ħafna ta’ produtturi tal-Unjoni li jaqdu s-suq tagħhom (massimu 5), li l-biċċa l-kbira minnhom jimportaw mir-RPĊ jew direttament jew permezz ta’ kumpaniji aħwa, u n-numru kbir ħafna ta’ kumpaniji li jinkaljaw il-kafe (1 500-3 000), il-miżuri fil-livell propost fl-istadju provviżorju jistgħu jimpedixxuhom milli jfornu l-istess prodotti eżatt fil-futur. Dan l-argument ma jistax jiġi aċċettat. L-ewwel nett, il-miżuri definittivi huma iktar baxxi mill-miżuri provviżorji. It-tieni nett, l-investigazzjoni żvlat li l-produtturi tal-Unjoni kienu f’pożizzjoni li jimmobilzzaw il-potenzjal tal-produzzjoni tagħhom u jservu b’mod ulterjuri l-industrija li tinkalja l-kafe, jekk titneħħa l-ħsara kkawżata mill-importazzjonijiet ta’ oġġetti ta’ dumping mir-RPĊ. Minħabba l-għadd kbir ta’ produtturi tal-Unjoni, huwa ferm probabbli li l-għadd ta’ produtturi tal-Unjoni li jistgħu jieħdu ordnijiet mill-kumpaniji li jinkaljaw il-kafe jkun iktar minn ħamsa.

(208)

Il-kumpaniji li jinkaljaw il-kafe argumentaw li l-miżuri antidumping jagħmlu ħsara lill-esportazzjonijiet tagħhom minħabba t-telf tal-kompetittività u minħabba r-retaljazzjoni possibbli mill-awtoritajiet Ċiniżi. Madankollu, ma hemm ebda evidenza li tindika li l-livell ta’ miżuri impost iwassal għal tali telf tal-kompetittività, b’kunsiderazzjoni wkoll li membri oħra tad-WTO għandhom miżuri antidumping oħra li jaffettwaw dan it-tip ta’ prodott. L-allegazzjoni ta’ azzjoni ta’ retaljazzjoni ukoll ma kinetx sostanzjata.

(209)

Il-kumpaniji li jinkaljaw il-kafe ddikjaraw li l-miżuri antidumping inevitabbilment iwasslu għal tnaqqis ġenerali fin-negozju tagħhom, għal tnaqqis fil-bejgħ tagħhom, għal żieda ġenerali tal-prezz tal-kafe fis-settur HORECA (lukandi, ristoranti u settur tal-ospitalità) u għal tnaqqis fil-kwalità tal-prodotti u s-servizzi. Allegatament, dan ipoġġi f’riskju għadd konsiderevoli ta’ impjiegi diretti u indiretti. Madankollu, b’kunsiderazzjoni għal x’inhu n-negozju ewlien tal-kumpaniji li jinkaljaw il-kafe u għall-konklużjonijiet rigward l-effetti tal-miżuri tal-katina ta’ provvista, dawn l-allegazzjonijiet ma jistgħux jiġu aċċettati. Għandu jkun innutat ukoll li l-provvediment tal-għadd totali tal-impjiegi marbuta mal-attivitajiet internazzjonali tal-kumpanija li tinkalja l-kafe, ma jistax jitqies bħala bażi ta’ kalkolu xieraq għall-għadd ta’ impjiegi li jkunu f’riskju minħabba l-impożizzjoni ta’ miżuri antidumping.

(210)

Żewġ importaturi allegaw li ma hemmx produzzjoni biżżejjed ta’ oġġetti tal-porċellana ġdida u tal-porċellana fl-Unjoni u li ma kellhom ebda alternattiva oħra ħlief li jimportaw mir-RPĊ. L-istess allegazzjoni saret minn assoċjazzjoni ta’ importaturi wara d-divulgazzjoni. L-ewwel nett u b’mod ġenerali għandu jkun innutat li l-miżuri antidumping għandhom l-għan li jġibu lura l-kummerċ ġust u mhux li jibblukkaw l-importazzjonijiet. F’dan il-każ, il-livell ta’ miżuri ma jistax ikun meqjus bħala projbittiv. It-tieni nett, l-investigazzjoni stabbilixxiet li dawn il-prodotti jistgħu jkunu akkwistati minn diversi sorsi, inklużi produtturi tal-Unjoni. Fl-aħħar nett, il-produtturi tal-Unjoni għandhom il-kapaċità tal-produzzjoni biex ibigħu iktar fis-suq tal-Unjoni u jistgħu jisfruttaw iktar il-potenzjal tagħhom, jekk il-miżuri antidumping jiġu definittivament imposti.

(211)

Biejjiegħ bl-imnut wieħed allega li l-miżuri jkollhom impatt negattiv fuq ċerti oġġetti li jaqdu s-suq tat-turisti. Madankollu, ebda informazzjoni sostantiva ma tista’ ssostni dik l-allegazzjoni. Barra minn hekk, il-piż tal-oġġetti inkwistjoni fis-settur huwa limitat.

(212)

Importatur u bejjiegħ bil-grossa allega li l-impożizzjoni ta’ miżuri se twassal għal konsolidazzjoni vertikali tas-suq minn xi parteċipanti kbar ewlenin. Madankollu, minħabba l-għadd attwali ta’ parteċipanti ewlenin, dan mhux probabbli fuq perjodu ta’ żmien qasir-medju.

(213)

Minbarra l-miżuri li diġà kienu trattati fir-Regolament provviżorju, għandu jkun innutat li diversi partijiet sabu li l-interess ta’ kumpaniji iżgħar, bħall-bejjiegħa bl-imnut, distributuri u negozji li jikkummerċjalizzaw oġġetti promozzjonali, ma kienx ġie kkunsidrat biżżejjed. Din l-allegazzjoni ġiet imtennija minn diversi partijiet wara d-divulgazzjoni definittiva. Għandu jkun rikonoxxut li, b’mod ġenerali negozji mikro u żgħar jistgħu jkunu iktar vulnerabbli għal kwalunkwe żieda fil-prezz bħal riżultat tad-dazjo antidumping. Madankollu, ma hemmx evidenza li l-livell ta’ miżuri imposti se jkollu effett negattiv sinifikanti fuq l-atturi ekonomiċi l-oħra li jikkwalifikaw bħala SMEs. Għalhekk, l-allegazzjoni ġiet definittivament miċħuda.

(214)

Fin-nuqqas ta’ kummenti addizzjonali oħra fir-rigward tal-interess ta’ setturi ekonomiċi oħra, il-premessi 212 sa 217 tar-Regolament provviżorju huma b’dan ikkonfermati.

(215)

Minkejja li kienu kkuntattjati direttament mill-Kummissjoni, ebda parti li tirrappreżenta direttament l-interessi tax-xerrejja finali, bħal assoċjazzjonijiet tal-konsumaturi, ma għamlet xi rappreżentazzjoni.

(216)

Diversi partijiet ikkontestaw il-konklużjoni tal-premessa 222 tar-Regolament provviżorju rigward prezzijiet ogħla. Wara d-divulgazzjoni definittiva, saru allegazzjonijiet simili.

(217)

Fl-eventwalità mhux probabbli li d-dazju jgħaddi għalkollox fuq il-konsumaturi u, jekk wieħed jassumi li l-livelli tal-importazzjonijiet u l-prezzijiet jibqgħu l-istess, id-dazji antidumping jfissru spejjeż żejda kull sena għal kull unità domestika ta’ inqas minn EUR 1. Tali kalkolu huwa bbażat fuq il-volumi u l-valuri ta’ importazzjoni PI, il-livell propost tad-dazji u l-għadd ta’ unitajiet domestiċi tal-Unjoni.

(218)

Tali effett ma jistax ikun meqjus li huwa biżżejjed biex jagħmel tajjeb għall-impatt pożittiv fuq l-industrija tal-Unjoni derivat mil-limitazzjoni tal-ħsara kkawżata mill-importazzjonijiet ta’ oġġetti ta’ dumping mir-RPĊ.

(219)

Parti allegat li bħala konsegwenza tal-miżuri, se jkun hemm skarsezza ta' oġġetti irħas li jintużaw fuq il-mejda. Din l-allegazzjoni kienet imtennija wara d-divulgazzjoni definittiva. Madankollu din l-allegazzjoni ma tistax tkun aċċettata, kif iddikjarat fil-premessa 157 tar-Regolament provviżorju, l-industrija tal-Unjoni sservi s-swieq kollha (inklużi l-oġġetti rħas li jintużaw fuq il-mejda).

(220)

Fin-nuqqas ta’ kummenti addizzjonali oħra fir-rigward tal-interess ta’ konsumaturi (unitajiet domestiċi), il-premessi 218 sa 226 tar-Regolament provviżorju huma b’dan ikkonfermati.

(221)

Fl-isfond ta’ dak li ntqal hawn fuq, il-valutazzjoni fir-Regolament provviżorju hija b’dan ikkonfermata.

(222)

Għalhekk, il-premessi 227 sa 229 tar-Regolament provviżorju huma b’dan ikkonfermati.

(223)

Intqal li l-marġni ta’ profitt użat biex jiġi kkalkulat l-ammont ta’ dazju meħtieġ biex jitneħħew l-effetti tad-dumping ta’ ħsara kien għoli wisq. Din l-allegazzjoni ġiet miċħuda kif spjegat fit-taqsima 4.5.3.3. hawn fuq.

(224)

Diversi partijiet iddubitaw il-profitt immirat użat għall-kalkolu tal-marġni ta’ ħsara. Dawn il-kummenti qed jiġu indirizzati fil-premessi 135 sa 142 hawn taħt. Abbażi tal-analiżi ta’ dawk il-kummenti, qed jiġi konkluż li l-profitt immirat ta' 6 % għandu jinżamm.

(225)

Fin-nuqqas ta’ kummenti oħra dwar il-livell tat-tneħħija tad-dannu, il-metodoloġija deskritta fil-premessi minn 230 sa 234 tar-Regolament proviżorju hija b’dan ikkonfermata.

(226)

Fid-dawl tal-konklużjonijiet milħuqa rigward dumping, il-ħsara, il-kawżalità u interess tal-Unjoni, u f’konformità mal-Artikolu 9(4) tar-Regolament bażiku, għandhom jiġu imposti dazji definitivi antidumping fuq importazzjonijiet tal-prodott ikkonċernat fil-livell tal-marġini aktar baxxi ta’ dumping u ħsara, skont ir-regola tal-anqas dazju. Għaldaqstant, ir-rati kollha tad-dazju għandhom jiġu stabbiliti fil-livell tal-marġini ta’ dumping.

(227)

L-aġġustament żgħir imsemmi fil-premessi 115 sa 132 hawn fuq irriżulta f'marġni kemm kemm riveduti ta' bejgħ bi prezz imqaċċat kif jidher fil-marġni ta' ħsara elenkati hawn taħt. Id-dazji antidumping definittivi proposti huma dawn li ġejjin:

(228)

Ir-rati tad-dazju antidumping tal-kumpaniji individwali speċifikati f'dan ir-Regolament ġew stabbiliti abbażi tas-sejbiet tal-investigazzjoni preżenti. Għalhekk, dawn jirriflettu s-sitwazzjoni misjuba matul dik l-investigazzjoni fir-rigward ta’ dawn il-kumpaniji. Dawn ir-rati ta’ dazju (bil-maqlub tad-dazju komuni għall-pajjiż kollu applikabbli għall-“kumpanniji l-oħra kollha”) huma għalhekk esklużivament applikabbli għall-importazzjonijiet ta’ prodotti li joriġinaw mir-RPĊ u li jiġu prodotti mill-kumpaniji u għalhekk mill-entitajiet legali speċifiċi msemmija. L-importazzjoni tal-prodott ikkonċernat immanifatturat minn kwalunkwe kumpanija oħra mhux imsemmija speċifikament fil-parti operattiva ta’ dan ir-Regolament b’isimha, inklużi l-entitajiet relatati ma’ dawk imsemmija speċifikament, ma tistax tibbenefika minn dawn ir-rati u għandha tkun soġġetta għar-rata tad-dazju applikabbli għall-“kumpaniji l-oħrajn kollha”.

(229)

Sabiex jiġu mminimizzati r-riskji ta’ evażjoni minħabba d-differenza għolja fir-rati tad-dazju, huwa kkunsidrat li huma meħtieġa miżuri speċjali f’dan il-każ biex jiżguraw l-applikazzjoni xierqa tad-dazji antidumping. Dawn il-miżuri speċjali jinkludu l-preżentazzjoni lill-awtoritajiet doganali tal-Istati Membri ta’ fattura kummerċjali valida, li għandha tikkonforma mal-ħtiġiet stipulati fl-Anness II ta’ dan ir-Regolament. L-importazzjonijiet mhux akkumpanjati minn tali fattura se jkunu soġġetti għad-dazju antidumping residwali applikabbli għall-esportaturi l-oħra kollha.

(230)

Jekk l-esportazzjonijiet minn waħda mill-kumpaniji li jibbenefikaw minn rati aktar baxxi tad-dazju individwali jiżdiedu b’mod sinifikanti fil-volum wara l-impożizzjoni tal-miżuri kkonċernati, tali żieda fil-volum tista’ titqies bћala li tikkostitwixxi fiha nnifisha bidla fix-xejra tal-kummerċ dovuta għall-impożizzjoni ta’ miżuri skont it-tifsira tal-Artikolu 13(1) tar-Regolament bażiku. Fit-tali ċirkostanzi, u sakemm jiġu ssodisfati l-kundizzjonijiet, tista’ tibda investigazzjoni kontra l-evażjoni. Din l-investigazzjoni tista’, fost l-oħrajn, teżamina l-ћtieġa għat-tneћћija tar-rati tad-dazju individwali u għall-impożizzjoni konsegwenti ta' dazju għall-pajjiż kollu.

(231)

Kwalunkwe pretensjoni li titlob l-applikazzjoni ta' rata ta' dazju antidumping individwali (eż. wara bidla fl-isem tal-entità jew wara t-twaqqif ta' entitajiet ġodda tal-produzzjoni jew bejgħ) għandha tiġi indirizzata lill-Kummissjoni (11) flimkien mal-informazzjoni kollha rilevanti, b'mod partikolari kwalunkwe bidla fl-attivitajiet tal-kumpanija marbuta mal-produzzjoni, bejgħ domestiku u għall-esportazzjoni assoċjata ma', pereżempju, dik il-bidla fl-isem jew dik il-bidla fl-entitajiet tal-produzzjoni jew bejgħ. Jekk ikun xieraq, dan ir-Regolament jiġi mbagħad emendat skont dan billi tiġi aġġornata l-lista ta’ kumpaniji li jgawdu minn rati ta’ dazju antidumping individwali.

(232)

Sabiex jiġi żgurat infurzar xieraq tad-dazju antidumping, il-livell ta’ dazju għall-pajjiż kollu għandu japplika mhux biss għall-produtturi esportaturi li ma jikkooperawx iżda wkoll għal dawk il-produtturi li ma kellhomx esportazzjonijiet lejn l-Unjoni matul il-PI.

(233)

Sabiex jiġi żgurat trattament ugwali bejn kwalunkwe esportatur ġdid u l-kumpaniji li kkooperaw li ma ġewx inklużi fil-kampjun, imsemmija fl-Anness I ta’ dan ir-Regolament, għandha ssir dispożizzjoni għad-dazju medju ppiżat divrenzjat impost fuq il-kumpaniji msemmija l-aħħar li għandha tiġi applikata għal kwalunkwe esportatur ġdid li jekk mhux hekk ikun intitolat għal reviżjoni skont l-Artikolu 11(4) tar-Regolament bażiku.

(234)

Il-partijiet kollha kienu infurmati bil-fatti u l-konsiderazzjonijiet essenzjali li fuq il-bażi tagħhom huwa maħsub li tkun rakkomandata l-impożizzjoni ta’ dazju antidumping definittiv fuq importazzjonijiet ta’ oġġetti taċ-ċeramika li jintużaw fuq il-mejda u fil-kċina, li joriġinaw fir-RPĊ u l-ġbir definittiv tal-ammonti garantiti permezz tad-dazju provviżorju (divulgazzjoni finali). Il-partijiet kollha ngħataw perjodu li fih setgħu jagħmlu kummenti dwar id-divulgazzjoni finali.

(235)

Il-kummenti verbali u bil-miktub sottomessi mill-partijiet interessati ġew ikkunsidrati u tqiesu fejn kien xieraq.

(236)

Fid-dawl tal-kobor tal-marġni ta’ dumping misjub u minħabba l-livell tal-ħsara kkawżat lill-industrija tal-Unjoni, huwa meqjus neċessarju li l-ammonti garantiti permezz ta’ dazju proviżorju antidumping impost mir-Regolament provviżorju jinġabru definittivament sal-ammont tad-dazji definittivi imposti,

a)

ma jkunx esporta lejn l-Unjoni l-prodott deskritt fl-Artikolu 1(1) waqt il-perjodu tal-investigazzjoni (l-1 ta’ Jannar 2011 sal-31 ta’ Diċembru 2011);

b)

ma jkun relatat mal-ebda wieħed mill-esportaturi jew produtturi fir-RPĊ li huma soġġetti għall-miżuri imposti minn dan ir-Regolament; u

c)

ikun effettivament esporta lejn l-Unjoni l-prodott ikkonċernat wara l-perjodu tal-investigazzjoni li fuqu huma bbażati l-miżuri, jew li jkun daħal f'obbligu kuntrattwali irrevokabbli sabiex jesporta kwantità sinifikanti lejn l-Unjoni.