REGOLAMENT TA’ IMPLIMENTAZZJONI TAL-KUMMISSJONI (UE) Nru 52/2013

tat-22 ta’ Jannar 2013

li jimmodifika l-Anness XI tar-Regolament tal-Kunsill (KE) Nru 1234/2007 f’dak li jikkonċerna l-inbid semifrizzanti, l-inbid semifrizzanti bil-gass u most tal-għeneb konċentrat rettifikat

IL-KUMMISSJONI EWROPEA,

wara li kkunsidrat it-Trattat dwar il-Funzjonament tal-Unjoni Ewropea,

wara li kkunsidrat ir-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni ta’ swieq agrikoli u dwar dispożizzjonijiet speċifiċi għal ċerti prodotti agrikoli (Ir-Regolament Waħdieni dwar l-OKS) (1) u partikolarment it-tieni paragrafu, tal-Artikolu 113(2) tiegħu,

Billi:

(1)

B’konformità b’mod partikolari mal-Artikolu 113 tar-Regolament (KE) Nru 1234/2007, l-Anness XI tar-Regolament imsemmi jelenka l-kategoriji ta’ prodotti tad-dwieli li jistgħu jiġu użati fl-Unjoni għal skopijiet ta’ kummerċjalizzazzjoni ta’ prodott li jikkonforma mal-kundizzjonijiet elenkati f’dak l-Anness.

(2)

Fir-rigward tal-inbid semifrizzanti u l-inbid semifrizzanti bil-gass, il-punti 8 u 9 tal-Anness XI tar-Regolament (KE) Nru 1234/2007 jistipulaw li dawn l-inbejjed għandhom jinkisbu mill-inbid. Madankollu, ir-Regolament tal-Kunsill (KE) Nru 1493/1999 tas-17 ta’ Mejju 1999 dwar l-organizzazzjoni komuni tas-suq tal-inbid (2) fil-punti 17 u 18 tal-Anness I, jipprevedi wkoll li dawn il-prodotti jinkisbu minn prodotti oħra adattati għall-produzzjoni tal-inbid. Ir-riforma tas-settur tal-inbid li ġiet introdotta permezz tar-Regolament (KE) Nru 479/2008 tal-Kunsill (3) ma kellhiex il-ħsieb li temenda l-lista tal-prodotti biex tikseb inbid semifrizzanti u nbid semifrizzanti bil-gass. Hemm għalhekk lok li jiġi previst mill-ġdid li l-inbid semifrizzanti u l-inbid semifrizzanti bil-gass ikunu jistgħu jinkisbu wkoll minn inbid ġdid li għadu fl-istadju tal-fermentazzjoni, minn most tal-għeneb jew minn most tal-għeneb parzjalment iffermentat.

(3)

Il-proċessi ġodda tal-produzzjoni tal-most tal-għeneb ikkonċentrat u rettifikat jippermettu li jinkiseb most ikkonċentrat, rettifikat u kristallizzat. Id-definizzjoni tal-most tal-għeneb ikkonċentrat u rettifikat imsemmija fil-punt 14 tal-Anness XI tar-Regolament (KE) Nru 1234/2007 tipprevdi biss forma likwida. Jeħtieġ li d-definizzjoni tal-most tal-għeneb ikkonċentrat u rettfikat tiġi emendata sabiex tinkludi l-forma kristallizzata tiegħu.

(4)	Għaldaqstant, jeħtieġ li l-Anness XI tar-Regolament (KE) Nru 1234/2007 jiġi emendat.

(5)	Il-miżuri previsti f’dan ir-Regolament huma skont l-opinjoni tal-Kumitat ta’ Regolamentazzjoni stabbilit bit-tielet paragrafu tal-Artikolu 195 tar-Regolament (KE) Nru 1234/2007,

ADOTTAT DAN IR-REGOLAMENT:

Artikolu 1

L-Anness XI tar-Regolament (KE) Nru 1234/2007 qed jiġi emendat kif ġej:

Il-punt 8a) huwa sostitwit b’dan li ġej:

“a)	miksub minn inbid, minn inbid ġdid li għadu fl-istadju tal-fermentazzjoni, minn most tal-għeneb jew minn most tal-għeneb parzjalment iffermentat kemm-il darba dawn il-prodotti jkollhom qawwa alkoħolika totali ta’ mhux inqas minn 9 % vol;”.

Il-punt 9a) huwa sostitwit b’dan li ġej:

“a)	miksub minn inbid, minn inbid ġdid li għadu fl-istadju tal-fermentazzjoni, minn most tal-għeneb jew minn most tal-għeneb parzjalment iffermentat;”.

Il-punt 14 huwa sostitwit b’dan li ġej:

“14. Most tal-għeneb ikkonċentrat u rettifikat

B’“most tal-għeneb ikkonċentrat u rettifikat” nifhmu:

(a)

il-prodott likwidu mhux karamellizzat li:

(i)	jinkiseb permezz ta’ deidratazzjoni parzjali ta’ most tal-għeneb imwettqa bi kwalunkwe metodu awtorizzat għajr bis-sħana diretta, b’tali mod li ċ-ċifra indikata fir-refrattometru użat skont metodu li għandu jiġi stabbilit skont l-Artikolu 120 g, f’temperatura ta’ 20 °C, ma tkunx anqas minn 61,7 %;

(ii)	ikun għadda minn trattament ta’ deaċidifikazzjoni u eliminazzjoni ta’ kostitwenti minbarra zokkor;

(iii)

ikollu l-karatteristiċi li ġejjin:

—	pH ta’ mhux aktar minn 5 f’valur ta’ 25 °Brix,

—	densità ottika ta’ 425 nm għal ħxuna ta’ 1 cm ta’ mhux aktar minn 0,100 f’most ikkonċentrat f’valur ta’ 25° Brix,

—	kontenut ta’ sukrożju li ma jinqabadx b’metodu ta’ analiżi li għandu jkun iddefinit,

—	indiċi Folin-Ciocalteu ta’ mhux aktar minn 6,00 f’valur ta’ 25 Brix,

—	aċidità titrattabbli ta’ mhux aktar minn 15 milliekwivalenti għal kull kilogramma ta’ zokkor totali,

—	kontenut ta’ dijossidu tal-kubrit ta’ mhux aktar minn 25 milligramma għal kull kilogramma ta’ zokkor totali,

—	kontenut totali ta’ katjoni ta’ mhux aktar minn 8 milliekwivalenti għal kull kilogramma ta’ zokkor totali,

—	konduttività f’valur ta’ 25 °Brix u 20 °C ta’ mhux aktar minn 120 mikro-Siemens/cm,

—	kontenut ta’ idrossimetilfurfural ta’ mhux aktar minn 25 milligramma għal kull kilogramma ta’ zokkor totali,

—	preżenza ta’ meżoinositol;

(b)

il-prodott likwidu mhux karamellizzat li:

(i)	jinkiseb permezz tal-kristallizzazzjoni tal-most tal-għeneb ikkonċentrat u rettifikat f’forma likwida mingħajr l-użu ta’ solvent;

(ii)	ikun għadda minn trattament għal deaċidifikazzjoni u eliminazzjoni ta’ kostitwenti minbarra zokkor;

(iii)

ikollu l-karatteristiċi li ġejjin wara d-dilwizzjoni f’soluzzjoni ta’ 25 Brix:

—	pH ta’ mhux aktar minn 7,5,

—	densità ottika ta’ 425 nm għal ħxuna ta’ 1 cm ta’ mhux aktar minn 0,100,

—	kontenut ta’ sukrożju li ma jinqabadx b’metodu ta’ analiżi li għandu jkun iddefinit,

—	indiċi Folin-Ciocalteu ta’ mhux aktar minn 6,00,

—	aċidità titrattabbli ta’ mhux aktar minn 15 milliekwivalenti għal kull kilogramma ta’ zokkor totali,

—	kontenut ta’ dijossidu tal-kubrit ta’ mhux aktar minn 10 milligrammi għal kull kilogramma ta’ zokkor totali,

—	kontenut totali ta’ katjoni ta’ mhux aktar minn 8 milliekwivalenti għal kull kilogramma ta’ zokkor totali,

—	konduttività f’valur ta’ 20 °C ta’ mhux aktar minn 120 mikro-Siemens/cm,

—	kontenut ta’ idrossimetilfurfural ta’ mhux aktar minn 25 milligramma għal kull kilogramma ta’ zokkor totali,

—	preżenza ta’ meżoinositol.

Qawwa alkoħolika reali tal-most tal-għeneb ikkonċentrat u rettifikat ta’ mhux aktar minn 1 % vol. hija permessa.”.

Artikolu 2

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-22 ta’ Jannar 2013.

Għall-Kummissjoni

Il-President

José Manuel BARROSO

(1) ĠU L 299, 16.11.2007, p. 1.

(2) ĠU L 179, 14.7.1999, p. 1.

(3) ĠU L 148, 6.6.2008, p. 1.