ANNESS

L-ATTIVITAJIET TA' PROĠETT IMSEMMIJA FL-ARTIKOLU 1(2)

1.   Sfond u raġuni għall-appoġġ tal-PESK

Din id-Deċiżjoni tibni fuq Deċiżjonijiet preċedenti tal-Kunsill biex tappoġġa l-proċess tan-NU li jwassal għat-Trattat dwar il-Kummerċ tal-Armi u biex tippromwovi l-iżvilupp ta' sistemi ta' kontroll tal-esportazzjoni tal-armi aktar responsabbli u trasparenti minn pajjiżi terzi (1). It-Trattat ġie adottat fit-2 ta' April 2013 mill-Assemblea Ġenerali tan-NU u nfetaħ għall-iffirmar fit-3 ta' Ġunju 2013.

L-objettiv iddikjarat tat-Trattat huwa li “jistabbilixxi l-ogħla standards komuni possibbli fuq bażi internazzjonali biex jirregolaw jew itejbu r-regolamentazzjoni tal-kummerċ internazzjonali fl-armi konvenzjonali u biex jipprevjenu u jeradikaw il-kummerċ illeċitu tal-armi konvenzjonali u jipprevjenu milli jmorru band’oħra.”. L-iskop iddikjarat tiegħu huwa li “jikkontribwixxi għal paċi, sigurtà u stabbiltà internazzjonali u reġjonali; inaqqas it-tbatija tal-bnedmin u jippromwovi kooperazzjoni, trasparenza u azzjoni responsabbli mill-Istati Partijiet fil-kummerċ internazzjonali tal-armi konvenzjonali, biex b'hekk tinbena fiduċja fost l-Istati Partijiet”. Għalhekk, l-objettiv u l-iskop tat-Trattat jikkonformaw mal-ambizzjoni ġenerali tal-Unjoni fir-rigward tal-politika estera u ta' sigurtà kif imnaqqxa fl-Artikolu 21 Trattat dwar l-Unjoni Ewropea u kif speċifikata aktar fl-Istrateġija Ewropea ta' Sigurtà.

Minbarra l-adozzjoni tat-Trattat dwar il-Kummerċ tal-Armi mill-Assemblea Ġenerali tan-NU, l-Unjoni identifikat tliet sfidi ewlenin relatati mat-Trattat: l-iżgurar ta' dħul fis-seħħ bikri tagħha, l-iżgurar ta' implimentazzjoni effettiva tagħha, u fl-aħħar nett, il-ħidma lejn l-universalizzazzjoni tagħha. L-assistenza għall-kontroll tal-esportazzjoni u l-komunikazzjoni huma kruċjali biex jiġu indirizzati dawk l-isfidi u għalhekk jiffurmaw l-elementi ċentrali ta' din id-Deċiżjoni.

Fir-rigward tal-assistenza għall-kontroll tal-esportazzjoni, din id-Deċiżjoni tipprevedi l-iżvilupp ta' numru ta' programmi ddedikati għall-assistenza li permezz tagħhom il-pajjiżi benefiċjarji ser jiġu megħjuna b'mod ippersonalizzat u estensiv biex jilħqu r-rekwiżiti tal-ATT. L-assistenza ser tiżviluppa skont pjan direzzjonali tal-assistenza li għandu jintlaħaq qbil dwaru mal-pajjiżi benefiċjarji li għandhom jispeċifikaw il-prijoritajiet għall-azzjoni, jiżguraw sjieda lokali u jindikaw l-impenn lejn ratifika tat-Trattat.

Minbarra l-programmi ddedikati għall-assistenza, din id-Deċiżjoni tipprovdi attivitajiet ta' assistenza ad hoc li ser jissupplimentaw il-programmi ddedikati għall-assistenza fl-indirizzar ta' pajjiżi benefiċjarji oħra bi ħtiġijiet limitati u speċifikati tajjeb. Dawk l-attivitajiet ta' assistenza ad hoc għandhom jippermettu lill-Unjoni tindirizza b'mod flessibbli u reattiv it-talbiet għall-assistenza.

Sabiex tikkontribwixxi għal sostenibbiltà fit-tul tal-isforzi ta' kontroll tat-trasferiment tal-armi mill-pajjiżi benefiċjarji, din id-Deċiżjoni għandha l-għan li tinvolvi l-partijiet interessati bħall-parlamenti nazzjonali, l-organizzazzjonijiet reġjonali kompetenti u r-rappreżentanti tas-soċjetà ċivili li għandhom interess fuq perijodu twil fil-monitoraġġ tal-implimentazzjoni effettiva tal-ATT.

Finalment, rigward l-isfida tal-universalizzazzjoni tal-ATT, din id-Deċiżjoni tinkludi komponent ta' komunikazzjoni li għandu l-għan jinvolvi l-pajjiżi kollha rilevanti. L-għażla magħmula hija li tilħaq lil dawk il-pajjiżi permezz tal-vantaġġ ta' organizzazzjonijiet reġjonali kompetenti li jappartjenu għalihom u li jwettqu attivitajiet relatati mal-kontrolli tat-trasferiment tal-armi.

Għalhekk, din id-Deċiżjoni tipprovdi ġabra komprensiva ta' attivitajiet ta' assistenza u ta' komunikazzjoni sabiex jiġu indirizzati b'mod adatt it-tliet sfidi identifikati. L-indirizzar attiv ta' dawk l-isfidi huwa konformi mal-appoġġ dejjiemi u mwiegħed għat-Trattat dwar il-Kummerċ tal-Armi mill-Unjoni u l-Istati Membri tagħha.

2.   Objettivi ġenerali

L-objettiv ċentrali ta' din id-Deċiżjoni huwa li jiġu appoġġati numru ta' Stati fuq talba tagħhom biex jissaħħu s-sistemi tagħhom ta' kontroll tat-trasferiment tal-armi bil-għan li jkunu jistgħu jimplimentaw b'mod effettiv l-ATT. L-isforzi ta' assistenza żviluppati f'dan il-qafas jistgħu sussegwentement jiġu indirizzati fil-kuntest usa' tal-involviment tal-partijiet interessati rilevanti u l-komunikazzjoni ma' pajjiżi oħra. B'mod speċifiku, l-azzjoni tal-Unjoni ser tipprovdi:

a)	infurzar tal-kapaċitajiet ta' kontroll tat-trasferiment tal-armi ta' pajjiżi benefiċjarji;

b)	aktar sensibilizzazzjoni u sjieda tal-partijiet interessati rilevanti bħall-organizzazzjonijiet reġjonali kompetenti, il-parlamenti nazzjonali u r-rappreżentanti tas-soċjetà ċivili li huma interessati fuq perijodu twil mill-effettività tal-implimentazzjoni tat-Trattat;

c)	komunikazzjoni ma' pajjiżi oħra bil-għan li tiġi appoġġata l-universalizzazzjoni tat-Trattat.

3.   Deskrizzjoni tal-attivitajiet ta' proġett

3.1.   It-twaqqif ta' grupp ta' esperti

3.1.1.   Objettiv tal-proġett

L-objettiv li jitwaqqaf grupp ta' esperti huwa li l-aġenzija ta' implimentazzjoni tiġi pprovduta b'riżorsa identifikata tajjeb, kompetenti u kredibbli biex tirrispondi b'mod adatt għat-talbiet għall-assistenza u tappoġġa l-attivitajiet ta' assistenza konsegwenti. It-twaqqif ta' grupp bħal dan huwa maħsub ukoll biex jinkoraġġixxi lill-aġenziji ta' kontroll tal-esportazzjoni tal-Istati Membri biex jaħtru esperti rilevanti billi d-disponibbiltà u l-involviment tagħhom fl-attivitajiet ta' assistenza ser ikunu kruċjali għall-fattibbiltà tal-attivitajiet inkwistjoni.

3.1.2.   Deskrizzjoni tal-proġett

L-aġenzija ta' implimentazzjoni ser twaqqaf grupp ta' esperti. Dawk l-esperti ser iwettqu attivitajiet ta' assistenza mmirati għall-pajjiżi benefiċjarji skont il-qasam ta' ħila esperta tagħhom u l-ħtiġijiet identifikati mill-pajjiżi benefiċjarji kif ukoll magħhom.

L-aġenzija ta' implimentazzjoni għandha tiżgura l-akbar rappreżentanza ġeografika possibbli meta tagħżel l-esperti. Hija għandha tibbenefika mill-esperti adatti u disponibbli minn aġenziji ta' kontroll tal-esportazzjoni oħra fl-Unjoni. Hija għandha tinkoraġġixxi wkoll il-parteċipazzjoni ta' esperti minn pajjiżi li reċentement żviluppaw b'suċċess sistemi nazzjonali ta' kontroll tat-trasferiment tal-armi, inklużi dawk żviluppati b'rabta mal-assistenza internazzjonali li jkunu rċevew.

Il-ħila esperta globali miġbura mill-grupp ta' esperti għandha tkopri l-ambitu sħiħ tas-sistema ta' kontroll tat-trasferiment tal-armi; b'mod partikolari kwistjonijiet legali, l-għoti ta' liċenzji, dwana/infurzar, sensibilizzazzjoni, prosekuzzjoni/sanzjonijiet, rappurtar/trasparenza.

3.2.   Programmi nazzjonali ta' assistenza ppersonalizzati mwettqa skont pjan direzzjonali tal-assistenza

3.2.1.   Objettiv tal-proġett

L-objettiv tal-programmi ddedikati għall-assistenza u l-pjanijiet direzzjonali relatati magħhom huwa li jissaħħu l-kapaċitajiet tal-pajjiżi benefiċjarji biex jilħqu r-rekwiżiti tal-ATT b'mod globali u sostnut. Il-pjan direzzjonali ser jipprovdi prevedibbiltà lill-pajjiż benefiċjarju dwar dak li huwa ppjanat fir-rigward ta' assistenza u ser jippjana t-titjib li jista' jkun mistenni fil-kapaċitajiet tiegħu ta' kontroll ta' trasferiment.

3.2.2.   Deskrizzjoni tal-proġett

Programmi ta' assistenza nazzjonali ser jiġu stabbiliti għal tnax-il pajjiż benefiċjarju. Fl-ewwel sentejn ta' implimentazzjoni tad-Deċiżjoni, mhux aktar minn għaxar programmi ta' assistenza tal-implimentazzjoni għandhom ikunu attwati sabiex l-Unjoni tkun tista' tirrispondi għal talbiet addizzjonali għal assistenza li jiġu ppreżentati aktar tard.

Il-programmi ddedikati għall-assistenza għandhom jiġu żviluppati skont il-passi li ġejjin:

a)

talba għal assistenza biex jiġi implimentat l-ATT (magħmula lill-aġenzija ta' implimentazzjoni mill-pajjiż terz). Din it-talba għandha tiġi sostanzjata kemm jista' jkun, idealment billi jiġu identifikati mill-ewwel liema oqsma speċifiċi huma mmirati li jirċievu assistenza. Fejn rilevanti, il-pajjiż li jagħmel it-talba għandu jirreferi wkoll għal assistenza tal-passat u li tkun għaddejja minn fornituri oħra tal-assistenza u jagħti informazzjoni dwar l-istrateġija nazzjonali ta' implimentazzjoni tiegħu dwar l-ATT.

b)

abbażi tal-grad ta' sostanzjament tat-talba u l-kriterji stabbiliti fit-taqsima 5.1, ir-Rappreżentant Għoli, flimkien mal-Grupp ta' Ħidma tal-Kunsill dwar l-Esportazzjoni ta' Armi Konvenzjonali (COARM) u l-aġenzija ta' implimentazzjoni, għandu jiddeċiedi dwar l-eliġibbiltà tal-pajjiż li jagħmel it-talba.

c)

fejn t-talba għall-assistenza tiġi riċevuta b'mod pożittiv, tiġi organizzata żjara ta' valutazzjoni esperta mill-aġenzija ta' implimentazzjoni. Din għandha tirriżulta minn kuntatti mill-qrib bejn l-aġenzija ta' implimentazzjoni u l-pajjiż terz li jkun qed ifittex l-assistenza u tinkludi wħud mill-aktar esperti rilevanti meħuda mill-grupp ta' esperti msemmi fit-taqsima 3.1. Iż-żjara ta' valutazzjoni esperta tista', fejn possibbli, titħejja bl-użu ta' kwestjonarji u bil-ġbir ta' informazzjoni eżistenti; hija ser tikkonsisti f'valutazzjoni inizjali tal-ħtiġijiet u l-prijoritajiet tal-pajjiż li jkun qed jitlob l-assistenza. B'mod partikolari hija għandha tippermetti l-kjarifika mal-pajjiż li jkun qed jitlob l-assistenza dwar x'inhuwa tassew meħtieġ biex jiġi implimentat l-ATT u l-paragun ta' dawk ir-rekwiżiti mar-riżorsi eżistenti ta' kontroll tat-trasferiment tal-armi tal-pajjiż. Din iż-żjara ta' valutazzjoni esperta inizjali għandha tiġbor flimkien l-aġenziji domestiċi u l-partijiet interessati rilevanti kollha u tidentifika sħab lokali motivati u affidabbli.

d)

abbażi tar-riżultati taż-żjara ta' valutazzjoni esperta, l-aġenzija ta' implimentazzjoni għandha tfassal pjan direzzjonali tal-assistenza. Meta tfassal pjan direzzjonali tal-assistenza bħal dan, l-aġenzija ta' implimentazzjoni għandha tqis kwalunkwe assistenza relatata mal-ATT possibbilment mogħtija minn organizzazzjonijiet oħra. Meta l-pajjiż li jkun qed ifittex l-assistenza jkun diġà żviluppa strateġija nazzjonali ta' implimentazzjoni għall-ATT, l-aġenzija ta' implimentazzjoni għandha tiżgura wkoll li l-pjan direzzjonali tal-assistenza tal-Unjoni jkun konsistenti ma' dik l-istrateġija nazzjonali ta' implimentazzjoni.

e)	ir-riżultati taż-żjara ta' valutazzjoni esperta u l-abbozz ta' pjan direzzjonali konsegwenti tal-assistenza għandu jiġi rrappurtat b'mod speċifiku lill-Kummissjoni fil-qafas tar-rappurtar tas-soltu finanzjajru u narattiv previst fl-Artikolu 3 ta' din id-Deċiżjoni.

f)	l-abbozz ta' pjan direzzjonali tal-assistenza għandu jiġi kondivi mal-pajjiż benefiċjarju bil-għan li jiġi approvat. Il-pjan direzzjonali ser ikun ippersonalizzat għall-pajjiż benefiċjarju u ser jidentifika l-prijoritajiet għall-assistenza.

g)	il-pjan direzzjonali ser jiġi implimentat bl-involviment tal-esperti rilevanti meħuda mill-grupp ta' esperti, u bl-involviment ta' partijiet interessati oħra skont kif ikun il-każ.

Skont il-ħtiġijiet eżatti tal-pajjiż benefiċjarju inkwistjoni, it-twaqqif ta' pjan direzzjonali ser ikun immexxi mill-approċċ tas-soltu b'ħames pilastri li tradizzjonalment jintuża f'assistenza strateġika ta' kontroll tal-kummerċ (kwistjonijiet legali, għoti ta' liċenzji, dwana/infurzar, sensibilizzazzjoni u sanzjonijiet/prosekuzzjoni). Minbarra dawk il-ħames oqsma standard, ir-rappurtar u t-trasparenza ser jingħataw l-akbar attenzjoni.

Il-firxa ta' strumenti ta' assistenza ser ikopru, b'mod partikolari, rieżamijiet legali, seminars ta' taħriġ, workshops, żjarat ta' studju, u l-użu ta' għodod u ta' sorsi ta' informazzjoni bbażati fuq l-internet. Dawk l-istrumenti ta' assistenza ser jintgħażlu mill-aġenzija ta' implimentazzjoni skont il-ħtiġijiet u l-prijoritajiet eżatti identifikati miż-żjara ta' valutazzjoni esperta u skont il-pjan direzzjonali li ntlaħaq qbil dwaru. L-istrumenti ta' assistenza magħżula biex jindirizzaw b'mod adatt it-talba għall-assistenza għandhom ikunu indikati b'mod ċar u ssostanzjati fil-pjan direzzjonali tal-assistenza.

3.3.   Workshops individwali ad hoc ta' assistenza

3.3.1.   Objettiv tal-proġett

L-objettiv tal-workshops individwali ad hoc ta' assistenza huwa li jissaħħu l-kapaċitajiet ta' kontroll tat-trasferiment tal-armi tal-pajjiżi benefiċjarji biex jintlaħqu r-rekwiżiti tal-ATT b'mod immirat u rilevanti. Dawk l-attivitajiet ad hoc tal-assistenza ser jippermettu lill-Unjoni biex twieġeb b'mod flessibbli u reattiv għal talbiet għall-assistenza li jidentifikaw ħtieġa speċifika rilevanti għall-implimentazzjoni effettiva tal-ATT.

3.3.2.   Deskrizzjoni tal-proġett

Ser isiru sa għaxar workshops ta' jumejn għall-pajjiżi benefiċjarji individwali biex iwieġbu għat-talbiet għall-assistenza mmirati u l-espressjoni ta' interess għal qasam speċifiku wieħed jew aktar ta' sistema ta' kontroll tat-trasferiment tal-armi.

Dawn il-workshops ser jipprovdu assistenza individwali u ppersonalizzata limitata u ser jindirizzaw il-kwistjoni(jiet) speċifika(ċi) mqajma mill-pajjiż li jkun qed jitlob l-assistenza, bħal, per eżempju, rieżami tal-leġislazzjoni dwar il-kontroll tat-trasferiment; prattiki tajbin dwar ir-rappurtar; sorsi ta' informazzjoni rilevanti għall-applikazzjoni tal-kriterji tal-valutazzjoni tar-riskju tal-ATT, kontrolli u dokumentazzjoni għall-użu finali. Huma ser isiru fil-pajjiżi benefiċjarji u l-ħila esperta ser tiġi kkomunikata mill-esperti tal-grupp ta' esperti msemmi fit-taqsima 3.1.

L-aġenzija ta' implimentazzjoni ser tkun responsabbli biex tirċievi t-talbiet għall-assistenza u tirrapportahom lir-RGħ li, f'konsultazzjoni mal-COARM, għandu jiddeċiedi dwar kif iweġibhom. Il-valutazzjoni tar-RGħ ser tkun iggwidata b'mod partikolari mill-kriterji stabbiliti fit-taqsima 5.1., il-preċiżjoni tat-talba u dwar kif hija tidentifika kwistjoni(jiet) (i)kkonċernata(i) u billi jqis il-bilanċ ġeografiku.

3.4.   Il-possibbiltà li jiġu ttrasferiti riżorsi mill-programmi ddedikati għall-assistenza għall-workshops ad hoc tal-assistenza

Fil-każ li ma jitlestiex in-numru massimu ta' programmi sħaħ iddedikati għall-assistenza previst fit-taqsima 3.2, in-numru ta' workshops previst fit-taqsima 3.3 jista' jiżdied sa għoxrin.

Ir-RGħ u l-Kummissjoni, flimkien mal-COARM, ser jirrieżaminaw kull sitt xhur l-istat attwali rigward il-programmi ddedikati għall-assistenza bil-għan li jivvalutaw il-possibbiltajiet li jiżdied in-numru ta' workshops individwali ta' assistenza b'mod proporzjonat mal-livell ta' programmi ddedikati għall-assistenza mhux lesti.

3.5.   Konferenza tal-pajjiżi li jibbenefikaw minn attivitajiet ta' assistenza tal-ATT

3.5.1.   Objettiv tal-proġett

L-objettiv tal-konferenza huwa biex ikun hemm aktar sensibilizzazzjoni u sjieda tal-partijiet interessati rilevanti bħal organizzazzjonijiet reġjonali kompetenti, il-parlamenti nazzjonali u r-rappreżentanti tas-soċjetà ċivili li huma interessati fuq perijodu twil mill-effettività tal-implimentazzjoni tat-Trattat.

3.5.2.   Deskrizzjoni tal-proġett

Il-proġett ser jieħu s-sura ta' konferenza ta' jumejn li għandha tiġi organizzata qrib it-tmiem tal-implimentazzjoni ta' din id-Deċiżjoni. Din il-konferenza ser tiġbor rappreżentanti rilevanti tal-pajjiżi li bbenefikaw mill-programmi ddedikati għall-assistenza msemmija fit-taqsima 3.2 u minn attivitajiet ad hoc tal-assistenza msemmija fit-taqsima 3.3.

Il-konferenza ser tiffaċilita skambji ta' esperjenzi mill-pajjiżi benefiċjarji, tinformahom dwar il-pożizzjonijiet tagħhom fir-rigward tal-ATT u l-istatus ta' ratifika u ta' implimentazzjoni tal-ATT u ser tippermetti l-kondiviżjoni ta' informazzjoni rilevanti ma' rappreżentanti tal-parlamenti nazzjonali u s-soċjetà ċivili.

Il-parteċipanti f'din il-konferenza għandhom għalhekk jinkludu:

—	persunal diplomatiku u militari/tad-difiża mill-pajjiżi benefiċjarji, b'mod partikolari awtoritajiet responsabbli mill-politiki nazzjonali rigward l-ATT;

—	persunal tekniku u tal-infurzar tal-liġijiet mill-pajjiżi benefiċjarji, b'mod partikolari awtoritajiet tal-għoti ta' liċenzji, doganali, u uffiċjali tal-infurzar tal-liġi;

—	rappreżentanti ta' organizzazzjonijiet nazzjonali, reġjonali u internazzjonali involuti fl-għoti ta' assistenza kif ukoll rappreżentanti ta' pajjiżi interessati li jipprovdu jew jirċievu assistenza strateġika ta' kontroll tal-kummerċ;

—	rappreżentanti ta' organizzazzjonijiet mhux governattivi (NGOs) rilevanti, ta' gruppi ta' riflessjoni, ta' parlamenti nazzjonali u tal-industrija;

Huwa mistenni li fil-konferenza jipparteċipaw sa 80 parteċipant. Il-post u l-lista finali ta' pajjiżi u organizzazzjonijiet mistiedna ser jiġu ddeterminati mir-Rappreżentant Għoli f'konsultazzjoni mal- COARM, abbażi ta' proposta magħmula mill-aġenzija ta' implimentazzjoni.

3.6.   Seminars reġjonali

3.6.1.   Objettiv tal-proġett

Is-seminars reġjonali ser jippermettu li jintlaħqu aktar pajjiżi bil-għan li tiġi appoġġata l-universalizzazzjoni tat-Trattat. Huma ser jappoġġaw ukoll l-involviment ulterjuri tal-organizzazzjonijiet reġjonali mmirati fl-ATT u l-interess tagħhom fil-promozzjoni tal-ATT lill-istati membri rispettivi kollha tagħhom.

3.6.2.   Deskrizzjoni tal-proġett

Il-proġett ser jieħu s-sura ta' ħames seminars ta' jumejn li ser jiffukaw fuq l-istat attwali tal-proċess tad-dħul fis-seħħ tal-ATT u l-kwistjonijiet ta' implimentazzjoni relatati.

Is-seminars ser jippermettu lill-pajjiżi li jibbenefikaw minn attivitajiet tal-assistenza għall-kontroll tat-trasferiment tal-armi biex jikkondividu fehmiet u esperjenzi u biex jivvalutaw kif assistenza bħal din hija relatata mal-attivitajiet imwettqa mill-organizzazzjoni reġjonali rilevanti tagħhom. Huma ser jagħtu wkoll attenzjoni speċjali lil:

—	esperjenzi u possibbiltajiet ta' kooperazzjoni Nofsinhar-Nofsinhar fit-twaqqif u l-istabbiliment ta' sistemi ta' kontroll tat-trasferiment tal-armi;

—	kumplimentarjetà tal-ATT ma' strumenti rilevanti oħra tan-NU, b'mod partikolari l-Programm ta' Azzjoni tan-NU li jimpedixxi, jikkumbatti, u jeqred in-negozju illeċitu f’armi żgħar u armamenti ħfief fl-aspetti kollha tiegħu.

Is-seminars ser isiru fl-ewwel tmintax-il xahar tal-implimentazzjoni tad-Deċiżjoni u ser jindirizzaw l-organizzazzjonijiet reġjonali u l-istati membri rilevanti tagħhom li ġejjin:

—	iċ-Ċentru Reġjonali tan-Nazzjonijiet Uniti għall-Paċi u Diżarm tal-Asja u l-Paċifiku (UNRCPD);

—	iċ-Ċentru Reġjonali tan-Nazzjonijiet Uniti għall-Paċi u Diżarm fl-Afrika (UNREC);

—	iċ-Ċentru Reġjonali tan-Nazzjonijiet Uniti għall-Paċi, id-Diżarm u l-Iżvilupp fl-Amerika Latina u l-Karibew (UNLIREC),

—	Komunità Ekonomika tal-Istati tal-Afrika tal-Punent (ECOWAS),

—	L-Organizzazzjoni għas-Sigurtà u l-Kooperazzjoni fl-Ewropa (OSKE).

Fejn possibbli, is-seminars għandhom isiru preferibbilment f'pajjiż li jibbenefika minn programm iddedikat għall-assistenza. Jekk dan ikun impossibbli, il-post għandu jiġi ddeterminat mir-Rappreżentant Għoli f'konsultazzjoni mal-COARM.

Il-parteċipanti fis-seminars reġjonali għandhom jinkludu:

(a)	persunal diplomatiku u militari/tad-difiża minn pajjiżi fir-reġjun, b'mod partikolari awtoritajiet responsabbli mill-politiki nazzjonali rigward l-ATT;

(b)	persunal tekniku u tal-infurzar tal-liġi minn pajjiżi fir-reġjun, b'mod partikolari awtoritajiet tal-għoti ta' liċenzji, doganali, u uffiċjali tal-infurzar tal-liġi;

(c)	rappreżentanti minn organizzazzjonijiet internazzjonali u reġjonali, NGOs ibbażati reġjonalment, gruppi ta' riflessjoni u l-industrija lokali/reġjonali;

(d)	esperti tekniċi nazzjonali u internazzjonali dwar kwistjonijiet ta' kontroll tat-trasferiment tal-armi, inklużi esperti tal-Unjoni u rappreżentanti tal-industrija.

Huwa mistenni li jipparteċipa sa 70 parteċipant f'kull seminar.

4.   Relazzjoni ma' attivitajiet tal-assistenza oħra rilevanti għall-kontrolli tal-esportazzjoni

4.1.   Koordinazzjoni ma' attivitajiet oħra tal-Unjoni tal-assistenza għall-kontroll tal-esportazzjoni

Abbażi tal-esperjenza ta' attivitajiet preċedenti u abbażi ta' attivitajiet li attwalment jinsabu għaddejjin fil-qasam tal-assistenza tal-kontroll tal-esportazzjoni li jkopru kemm oġġetti b’użu doppju kif ukoll armi konvenzjonali, is-sinerġija massima u l-komplementarjetà għandhom jiġu mfittxija fl-għoti ta’ assistenza lill-pajjiżi terzi relatata mal-ATT, biex jiġi żgurat li l-attivitajiet tal-Unjoni jkunu effettivi u koerenti kemm jista’ jkun mingħajr duplikazzjoni mhux meħtieġa.

4.2.   Koordinazzjoni ma' attivitajiet ta'ssistenza rilevanti oħra

Għandha tingħata wkoll l-akbar attenzjoni mill-aġenzija ta' implimentazzjoni għall-attivitajiet relatati mal-ATT imwettqa skont il-programm ta' azzjoni tan-NU li jimpedixxi, jikkumbatti, u jeqred in-negozju illeċitu f’armi żgħar u armamenti ħfief fl-aspetti kollha tiegħu u s-Sistema ta' Appoġġ tal-Implimentazzjoni tiegħu (PoA-ISS), il-UNSCR 1540 (2004) u l-Faċilità ta' Fondi tan-NU li tappoġġa r-Regolament tal-Kooperazzjoni għall-Armi (UNSCAR). L-aġenzija ta' implimentazzjoni għandha żżomm kuntatt kif meħtieġ ma' dawn il-fornituri tal-assistenza sabiex tiġi evitata d-duplikazzjoni tal-isforzi u jiġu żgurati konsistenza u kumplimentarjetà massimi.

4.3.   Promozzjoni ta' kooperazzjoni Nofsinhar-Nofsinhar f'kontrolli tal-esportazzjoni minn strumenti rilevanti tal-Unjoni

Il-proġett għandu jimmira wkoll li, fost il-pajjiżi benefiċjarji tal-assistenza mogħtija skont din id-Deċiżjoni, tiżdied is-sensibilizzazzjoni dwar strumenti tal-Unjoni li jistgħu jappoġġaw kooperazzjoni Nofsinhar-Nofsinhar f'kontrolli tal-esportazzjoni. F'dan ir-rigward, l-attivitajiet tal-assistenza previsti fit-taqsimiet 3.2 u 3.3 għandhom jagħtu informazzjoni dwar l-istrumenti disponibbli u jippromwovuhom bħall-Inizjattiva tas-CBRN tal-UE dwar iċ-Ċentri ta' Eċċellenza.

5.   Benefiċjarji

5.1.   Benefiċjarji tal-programmi ddedikati għall-assistenza tal-ATT u workshops ad hoc tal-assistenza

Il-benefiċjarji ta' attivitajiet ta' proġett imsemmija fit-taqsimiet 3.2 u 3.3 jistgħu jkunu Stati li jitolbu l-assistenza bil-għan li jimplimentaw l-ATT u li ser jintgħażlu, fost l-oħrajn, abbażi tal-kriterji li ġejjin:

—	l-iffirmar tal-ATT u l-istatus ta' implimentazzjoni ta' strumenti nazzjonali rilevanti għall-kummerċ tal-armi u l-kontroll tat-traferiment tal-armi li huma applikabbli għall-pajjiż;

—	il-probabbiltà li jkun hemm eżitu ta' suċċess mill-attivitajiet tal-assistenza bil-ħsieb li jiġi rratifikat l-ATT;

—	il-valutazzjoni ta' kwalunkwe assistenza possibbli li tkun diġa' waslet jew ġiet ippjanata fil-qasam tal-użu doppju u l-kontroll tat-trasferiment tal-armi;

—	ir-rilevanza tal-pajjiż għall-kummerċ globali tal-armi;

—	ir-rilevanza tal-pajjiż għall-interessi tas-sigurtà tal-Unjoni;

—	l-eliġibbiltà għall-Għajnuna Uffiċjali għall-Iżvilupp (ODA).

5.2.   Benefiċjarji tas-seminars reġjonali

Il-benefiċjarji tas-seminars reġjonali jistgħu jkunu Stati li jappartjeni għall-organizzazzjonijiet reġjonali jew li huma koperti minnhom imsemmija fit-taqsima 3.6.2.

L-għażla finali tal-pajjiżi li għandhom jiġu mistiedna għal kull seminar, u tal-parteċipanti, ser issir mir-Rappreżentant Għoli, f'konsultazzjoni mal-COARM, abbażi ta' proposta magħmula mill-aġenzija ta' implimentazzjoni.

6.   Entità ta' implimentazzjoni

L-implimentazzjoni ta' din id-Deċiżjoni ser tkun fdata lill-BAFA. Fejn adatt, il-BAFA ser jissieħeb mal-aġenziji ta' kontroll tal-esportazzjoni tal-Istati Membri, l-organizzazzjonijiet reġjonali u internazzjonali rilevanti, il-gruppi ta' riflessjoni, l-istituti tar-riċerka u l-NGOs.

Il-BAFA għandu esperjenza kbira fl-għoti ta' assistenza għall-kontroll tat-trasferiment u f'attivitajiet ta' komunikazzjoni. Huwa żviluppa din l-esperjenza fl-oqsma rilevanti kollha ta' kontroll strateġiku tat-trasferiment, filwaqt li jindirizza oqsma relatati ma' CBRN, oġġetti b'użu doppju u l-armi.

Fir-rigward tal-assistenza għall-kontroll tat-trasferiment tal-armi u l-komunikazzjoni, il-BAFA kkompleta b'suċċess l-implimentazzjoni tad-Deċiżjoni 2009/1012/PESK. Issa, il-BAFA huwa responsabbli mill-implimentazzjoni tad-Deċiżjoni 2012/711/PESK li tibni fuq id-Deċiżjoni 2009/1012/PESK u għandu l-għan li jsaħħaħ is-sistemi ta' kontroll tal-esportazzjoni tal-armi tal-pajjiżi benefiċjarji biex ikunu aktar trasparenti u responsabbli f'konformità mal-qafas tal-Unjoni stabbilit skont il-Pożizzjoni Komuni 2008/944/PESK.

Fir-rigward tal-oġġetti b'użu doppju u dawk relatati ma' CBRN, il-BAFA hija l-aġenzija ta' implimentazzjoni tal-programm attwali tal-assistenza għall-kontroll tal-esportazzjoni ta' oġġetti b'użu doppju u l-komunikazzjoni ffinanzjat millIstrumenti għall-Istabbiltà u, f'dan ir-rigward kisbet għarfien profond tas-sistemi għall-kontroll tat-trasferiment tal-pajjiżi koperti mill-programm inkwistjoni. Għarfien bħal dan qed jittejjeb permezz tal-implimentazzjoni progressiva tal-proġetti relatati mal-kontroll tat-trasferiment skont l-Istrument għall-Istabbilità li jinvolvu l-BAFA, bħall-Inizjattiva tas-CBRN dwar iċ-Ċentri ta' Eċċellenza.

L-effett ġenerali huwa li l-BAFA għandu pożizzjoni unika biex jidentifika l-punti b'saħħithom u dawk dgħajfa fis-sistemi tal-kontroll tat-trasferiment ta' pajjiżi li jistgħu jibbenefikaw mill-attivitajiet ta' appoġġ tal-implimentazzjoni tal-ATT previsti minn din id-Deċiżjoni. Għalhekk huwa jista' jiffaċilita s-sinerġiji bejn il-varji programmi ta' assistenza u jevita dupplikazzjoni mhux meħtieġa.

Billi l-liġijiet, il-proċeduri amministrattivi, ir-riżorsi u l-aġenziji tal-infurzar li jiggvernaw il-kontroll tal-esportazzjoni tal-oġġetti b'użu doppju jikkoinċidu fil-biċċa l-kbira ma' dawk responsabbli mill-kontroll tal-esportazzjoni tal-armi konvenzjonali, sfida ewlenija għall-attivitajiet tal-assistenza relatati mal-ATT ser tkun li tiġi kkunsidrata l-assistenza diġa' pprovduta fl-oqsma tal-oġġetti b'użu doppju u tal-mitigazzjoni tar-riskju tas-CBRN. L-għażla tal-BAFA tikkontribwixxi biex jiġi żgurat li l-assistenza relatata mal-ATT tissupplimenta b'mod adegwat l-assistenza li tkun diġà ngħatat skont programmi ta' assistenza eżistenti ta' oġġetti b'użu doppju, ta' mitigazzjoni tar-riskju tas-CBRN u ta' kontroll tal-esportazzjoni tal-armi.

7.   Viżibbiltà u disponibbiltà tal-Unjoni tal-materjal ta' assistenza

Il-materjal prodott mill-proġett ser jiżgura l-viżibbiltà tal-Unjoni, ibbażata b'mod partikolari fuq il-logo u t-tabella grafika li ntlaħaq qbil dwarha għall-implimentazzjoni tad-Deċiżjoni 2012/711/PESK.

Il-portal fuq l-internet previst fid-Deċiżjoni 2012/711/PESK u li bħalissa qed jiġi żviluppat ser jiġi promoss minħabba l-attivitajiet ta' assistenza relatati mal-ATT previsti minn din id-Deċiżjoni.

L-aġenzija ta' implimentazzjoni għandha għalhekk tinkludi informazzjoni dwar il-portal fuq l-internet fl-attivitajiet ta' assistenza rilevanti li hija twettaq u tinkoraġġixxi l-konsultazzjoni u l-użu tar-riżorsi tekniċi tal-portal fuq l-internet. Hija għandha tiżgura l-viżibbiltà tal-Unjoni fil-promozzjoni tal-portal fuq l-internet.

8.   Valutazzjoni tal-impatt

L-impatt ta' attivitajiet previsti f'din id-Deċiżjoni għandu jiġi vvalutat teknikament hekk kif jitlestew. Abbażi ta' informazzjoni u rapporti pprovduti mill-aġenzija ta' implimentazzjoni, il-valutazzjoni tal-impatt ser titwettaq mir-Rappreżentant Għoli, f'kooperazzjoni mal-COARM u, skont kif ikun il-każ, mad-Delegazzjonijiet tal-Unjoni fil-pajjiżi benefiċjarji, kif ukoll ma' partijiet interessati rilevanti oħra.

Rigward pajjiżi li bbenefikaw minn programmi ddedikati għall-assistenza, il-valutazzjoni tal-impatt għandha tagħti attenzjoni speċjali għan-numru ta' pajjiżi li jkunu rratifikaw l-ATT u għall-iżvilupp tal-kapaċitajiet tagħhom tal-kontroll tat-trasferiment tal-armi. Valutazzjoni bħal din tal-kapaċitajiet tal-kontroll tat-trasferiment tal-armi tal-pajjiżi benefiċjarji għandha b'mod partikolari tkopri t-tħejjija u l-ħruġ ta' regolamenti nazzjonali rilevanti, il-kapaċità li jiġu rrappurtati esportazzjonijiet u importazzjonijiet ta' armi u l-għoti ta' setgħat ta' amministrazzjoni rilevanti responsabbli mill-kontroll tat-trasferiment tal-armi.

9.   Rappurtar

L-aġenzija ta' implimentazzjoni ser tħejji rapporti regolari, inkluż wara l-ikkompletar ta' kull waħda mill-attivitjiet. Ir-rapporti għandhom jiġu ppreżentati lir-Rappreżentant Għoli mhux aktar tard minn sitt ġimgħat wara l-ikkompletar tal-attivitajiet rilevanti.

---

(1)  Ara d-Deċiżjoni 2010/336/PESK; id-Deċiżjoni 2013/43/PESK; id-Deċiżjoni 20009/1012/PESK; u d-Deċiżjoni 2012/711/PESK.