(1)

Skont l-Artikolu 16(1) tar-Regolament (KE) Nru 391/2009, il-Kummissjoni trid tivverifika li d-detentur tar-rikonoxximent mogħti f’konformità mal-Artikolu 2(c) u l-Artikolu 4(3) ta’ dak ir-Regolament huwa l-entità legali rilevanti fl-organizzazzjoni li għaliha għandhom japplikaw id-dispożizzjonijiet ta’ dak ir-Regolament. Jekk dak ma jkunx il-każ, il-Kummissjoni trid tieħu deċiżjoni li temenda dak ir-rikonoxximent.

(2)

Ir-rikonoxximenti taż-żewġ organizzazzjonijiet Det Norske Veritas u Germanischer Lloyd (“il-Partijiet”) ingħataw fl-1995 skont id-Direttiva tal-Kunsill 94/57/KE (2).

(3)

Skont l-Artikolu 15(1) tar-Regolament (KE) Nru 391/2009, il-Partijiet żammew ir-rikonoxximenti rispettivi tagħhom mad-dħul fis-seħħ ta’ dak ir-Regolament.

(4)

Ir-rikonoxximent inizjali ta’ Det Norske Veritas ingħata lill-entità legali DNV Classification AS, li wara ġiet imsemmija mill-ġdid bħala DNV AS. Din kienet taħdem skont l-entità mhux operattiva DNV Group AS u kkontrollata finanzjarjament mill-fundazzjoni mingħajr skop ta’ qligħ Stiftelsen Det Norske Veritas (“SDNV”), li ġiet stabbilita fin-Norveġja.

(5)

Ir-rikonoxximent inizjali ta’ Germanischer Lloyd ingħata lill-entità legali Germanischer Lloyd AG, li wara ġiet stabbilita bħala Germanischer Lloyd SE (“GL SE”). Din kienet taħdem skont l-entità mhux operattiva GL Group u kkontrollata finanzjarjament mill-azjenda Mayfair, li ġiet stabbilita fil-Ġermanja.

(6)

Fl-10 ta’ Ġunju 2013, il-Kummissjoni rċeviet notifika ta’ konċentrazzjoni proposta skont l-Artikolu 4 tar-Regolament tal-Kunsill (KE) Nru 139/2004 (3) li permezz tagħha SDNV takkwista, skont it-tifsira tal-Artikolu 3(1)(b) ta’ dak ir-Regolament, kontroll uniku ta’ GL SE u tingħaqad mas-sussidjarju tagħha DNV Group AS, li wara ġiet imsemmija mill-ġdid bħala DNV GL Group AS.

(7)

Fil-15 ta’ Lulju 2013, il-Kummissjoni adottat Deċiżjoni skont l-Artikolu 6(1)(b) tar-Regolament dwar l-Għaqdiet biex ma jkunx hemm oppożizzjoni għall-konċentrazzjoni, imsemmija bħala l-“Każ COMP/M.6885 — SDNV/Germanischer Lloyd”, u biex tiddikjaraha kompatibbli mas-suq intern.

(8)

L-entità mhux operattiva DNV GL Group AS, stabbilita fin-Norveġja, daħlet fis-seħħ fit-12 ta’ Settembru 2013. Il-Partijiet infurmaw lill-Kummissjoni li, sakemm jibda l-operat konġunt, l-organizzazzjonijiet legati DNV AS u GL SE komplew jeżistu u jaħdmu b’mod indipendenti taħt il-kappa ta’ DNV GL Group AS f’konformità mar-regoli, il-proċeduri u s-sistemi legati rispettivi tagħhom.

(9)

Is-sjieda ta’ GL SE ġiet ittrasferita għal DNV AS, li wara ġiet imsemmija mill-ġdid DNV GL AS. Minn dan il-mument, li jimmarka l-bidu tal-ħidma konġunta, DNV GL AS, flimkien mas-sussidjarji tagħha, hija responsabbli mill-attivitajiet kollha ta’ klassifikazzjoni u ċertifikazzjoni li jaqgħu taħt il-kamp ta’ applikazzjoni tar-Regolament (KE) Nru 391/2009. Għalhekk, DNV GL AS hija l-entità prinċipali rilevanti tal-entitajiet legali kollha li jiffurmaw l-organizzazzjoni rikonoxxuta, u li għandu jingħata rikonoxximent għaliha.

(10)

Min-naħa l-oħra, GL SE ma għadhiex l-entità prinċipali rilevanti tal-organizzazzjoni, li għaliha japplikaw id-dispożizzjonijiet tar-Regolament (KE) Nru 391/2009. Għalhekk, ir-rikonoxximent tagħha skont l-Artikolu 4 ta’ dak ir-Regolament għandu jieqaf japplika.

(11)

L-informazzjoni kkomunikata mill-Partijiet lill-Kummissjoni tindika li, mill-bidu tal-ħidma konġunta u sakemm tidħol fis-seħħ sistema komuni ta’ produzzjoni, il-vapuri eżistenti u l-proġetti li għadhom għaddejjin għandhom jiġu trattati b’mod separat, skont ir-regoli, il-proċeduri u s-sistemi legati ta’ DNV AS u GL SE rispettivament. Il-funzjonijiet u s-sistemi għandhom jiġu integrati b’mod gradwali biex jiżguraw il-konformità kontinwa mal-obbligi u l-kriterji tar-Regolament (KE) Nru 391/2009.

(12)

Il-miżuri previsti f’din id-Deċiżjoni huma f’konformità mal-opinjoni tal-Kumitat dwar Ibħra Sikuri u l-Prevenzjoni tat-Tniġġis minn Vapuri stabbilit bir-Regolament (KE) Nru 2099/2002 tal-Parlament Ewropew u tal-Kunsill (4),