29.6.2013 |
MT |
Il-Ġurnal Uffiċjali tal-Unjoni Ewropea |
L 179/92 |
DEĊIŻJONI TAL-KUNSILL
tal-25 ta’ Ġunju 2013
li żżid l-għadd ta' Avukati Ġenerali fil-Qorti tal-Ġustizzja tal-Unjoni Ewropea
(2013/336/UE)
IL-KUNSILL TAL-UNJONI EWROPEA,
Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-ewwel paragrafu tal-Artikolu 252 tiegħu,
Wara li kkunsidra t-Trattat li jistabbilixxi l-Komunità Ewropea tal-Enerġija Atomika, u b'mod partikolari l-Artikolu 106a(1) tiegħu,
Wara li kkunsidra t-talba tal-President tal-Qorti tal-Ġustizzja tas-16 ta' Jannar 2013,
Billi:
(1) |
L-ewwel paragrafu tal-Artikolu 252 tat-Trattat dwar il-Funzjonament tal-Unjoni Ewropea jistabbilixxi li l-Kunsill, b'mod unanimu, jista' jżid l-għadd ta' Avukati Ġenerali fuq it-talba tal-Qorti tal-Ġustizzja. |
(2) |
Fis-16 ta' Jannar 2013, il-Qorti tal-Ġustizzja talbet li l-għadd tal-Avukati Ġenerali tal-Qorti tal-Ġustizzja jiżdied bi tliet persuni. Din it-talba kienet motivata mix-xewqa li l-Qorti tkun tista' tkompli toħroġ Opinjoni fil-kawżi kollha li jkunu jeħtieġu dan mingħajr ma jiżdied id-dewmien globali fit-trattament tal-kawżi kkonċernati. |
(3) |
Skont id-Dikjarazzjoni Nru 38 dwar l-Artikolu 252 tat-Trattat dwar il-Funzjonament tal-Unjoni Ewropea li jirrigwarda l-għadd ta' Avukati Ġenerali fil-Qorti tal-Ġustizzja, annessa mal-Att Finali tal-Konferenza Intergovernattiva li adottat it-Trattat ta' Lisbona,, jekk il-Qorti tal-Ġustizzja titlob li l-għadd ta' Avukati Ġenerali jiżdied bi tliet persuni (jiġifieri ħdax minflok tmienja), il-Kunsill, b'mod unanimu, għandu jaqbel dwar din iż-żieda. |
(4) |
Sabiex twieġeb bl-aħjar mod għall-ħsieb imsemmi fit-tieni premessa u biex toħloq il-kundizzjonijiet li jiffavorixxu l-aħjar integrazzjoni possibbli tal-Avukati Ġenerali addizzjonali, il-Qorti tal-Ġustizzja pproponiet li Avukat Ġenerali wieħed jibda l-kariga tiegħu fl-1 ta' Lulju 2013, id-data prevista għall-adeżjoni tal-Kroazja, bil-kundizzjoni li l-istrumenti kollha ta' ratifika jkunu ġew depożitati qabel din id-data, u li ż-żewġ Avukati Ġenerali l-oħra jibdew il-kariga tagħhom fis-7 ta' Ottubru 2015, fl-okkażjoni tas-sostituzzjoni parzjali tal-Membri tal-Qorti, |
ADOTTA DIN ID-DEĊIŻJONI:
Artikolu 1
L-għadd ta' Avukati Ġenerali fil-Qorti tal-Ġustizzja tal-Unjoni Ewropea għandu jiżdied għal:
— |
disgħa, b'effett mill-1 ta' Lulju 2013; |
— |
ħdax, b'effett mis-7 ta' Ottubru 2015. |
Artikolu 2
Din id-Deċiżjoni għandha tidħol fis-seħħ fil-jum wara dak tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Magħmul fil-Lussemburgu, il-25 ta’ Ġunju 2013.
Għall-Kunsill
Il-President
E. GILMORE