(1)

Fl-2009, il-Kummissjoni rċeviet ilment dwar Għajnuna mill-Istat minn operatur ta' linja tal-ajru (minn issa 'l quddiem "l-ilmentatur") dwar diversi aspetti tat-taxxa fuq l-ivvjaġġar bl-ajru implimentati mill-Irlanda inklużi r-rati tat-taxxa differenzjati applikabbli għal titjiriet b’destinazzjonijiet mhux aktar minn 300 km mill-ajruport ta’ Dublin, li allegatament kienu qed jiffavorixxu lil Aer Arann.

(2)

Permezz tal-ittra bid-data tat-13 ta’ Lulju 2011, il-Kummissjoni għarrfet lill-Irlanda li kienet iddeċidiet li tibda l-proċedura stabbilita fl-Artikolu 108 (2) tat-Trattat fir-rigward ta’ rati tat-taxxa differenzjati applikati skont it-taxxa fuq l-ivvjaġġar bl-ajru Irlandiża. Il-Kummissjoni talbet lill-awtoritajiet Irlandiżi biex jibagħtu kopja tad-deċiżjoni lill-benefiċjarji.

(3)

Fid-9 ta’ Awwissu 2011 u fil-5 ta' Settembru 2011, l-operatur tal-linja tal-ajru Ryanair Ltd. (minn issa 'l quddiem "Ryanair") ippreżenta ittri rigward id-deċiżjoni tal-Kummissjoni biex tiftaħ il-proċedimenti. Il-Kummissjoni wieġbet għal dawk l-ittri fil-5 ta’ Ottubru 2011. Fis-17 ta’ Ottubru 2011, Ryanair ippreżentat ittra oħra.

(4)

Wara estensjoni tad-data tal-għeluq għat-tweġiba, l-awtoritajiet Irlandiżi ppreżentaw l-osservazzjonijiet tagħhom dwar id-deċiżjoni tal-Kummissjoni fil-15 ta’ Settembru 2011.

(5)

Fit-18 ta’ Ottubru 2011, id-deċiżjoni tal-Kummissjoni biex tniedi l-proċedura ġiet ippubblikata f’Il-Ġurnal Uffiċjali tal-Unjoni Ewropea (2). Il-Kummissjoni stiednet lill-partijiet interessati biex jibagħtu l-osservazzjonijiet tagħhom dwar din il-miżura.

(6)

Fis-17 ta’ Novembru 2011, Ryanair bagħtet it-tweġiba tagħha għal din l-istedina. B’ittra tat-28 ta’ Novembru 2011, il-Kummissjoni staqsiet lil Ryanair jekk kienx hemm xi informazzjoni fis-sottomissjoni ta’ Ryanair li kienet kunfidenzjali u li ma setgħetx tiġi żvelata lill-awtoritajiet Irlandiżi. B’ittra tat-30 ta’ Novembru 2011, Ryanair ikkonfermat li s-sottomissjoni tas-17 ta' Novembru 2011 setgħet tintbagħat lill-awtoritajiet Irlandiżi.

(7)

B’ittra tat-12 ta’ Diċembru 2011, il-Kummissjoni bagħtet il-kummenti ta’ Ryanair lill-awtoritajiet Irlandiżi, li pprovdew il-kummenti tagħhom dwar dan fit-13 ta’ Jannar 2012.

(8)

Mit-30 ta’ Marzu 2009, l-awtoritajiet Irlandiżi introduċew dazju tas-sisa fuq it-trasport tal-passiġġieri bl-ajru. Il-bażi ġuridika nazzjonali tat-taxxa hija t-Taqsima 55 tal-Att Finanzjarju (Nru. 2) 2008, li tintroduċi dazju tas-sisa rreferut bħala t-"taxxa fuq l-ivvjaġġar bl-ajru" li l-operaturi tal-linji tal-ajru huma responsabbli li jħallsu fir-rigward ta’ “kull tluq ta’ passiġġier fuq inġenju tal-ajru minn ajruport" li jinsab fl-Irlanda (3). It-taxxa hija dovuta fil-waqt li passiġġier jitlaq minn ajruport fuq inġenju tal-ajru kapaċi jġorr aktar minn 20 passiġġier u li mhuwiex użat għall-finijiet tal-Istat jew militari. Filwaqt li t-taxxa in fine hija maħsuba biex tingħadda lill-passiġġieri permezz tal-prezz tal-biljett, huma l-operaturi tal-linji tal-ajru li huma responsabbli għaliha u responsabbli biex iħallsuha (4).

(9)

Meta ġiet introdotta, it-taxxa kienet imposta abbażi tad-distanza bejn l-ajruport minn fejn jibda l-vjaġġ u l-ajruport fejn jintemm il-vjaġġ, bir-rata ta (i) EUR 2 fil-każ ta' vjaġġ minn ajruport lejn destinazzjoni li tinsab mhux iktar minn 300 km mill-ajruport ta' Dublin u (ii) EUR 10 fi kwalunkwe każ ieħor.

(10)

Wara investigazzjoni mill-Kummissjoni rigward ksur possibbli tar-Regolament (KE) Nru 1008/2008 tal-Parlament Ewropew u tal-Kunsill tal-24 ta’ Settembru 2008 dwar regoli komuni għall-operat ta' servizzi tal-ajru fil-Komunità (5) u l-Artikolu 56 tat-Trattat dwar il-libertà li jiġu pprovduti s-servizzi, ir-rati nbidlu mill-1 ta' Marzu 2011 biex b’hekk rata tat-taxxa unika ta’ EUR 3 tkun applikabbli għal kull tluq, tkun xi tkun id-distanza koperta (6).

(11)

Il-Kummissjoni bdiet il-proċedura formali rigward ir-rata tat-taxxa aktar baxxa, li kienet applikabbli għal ċerti rotot matul il-perjodu li jibda mit-30 ta’ Marzu 2009 sal-1 ta' Marzu 2011, billi qieset li din dehret li tikkostitwixxi għajnuna mill-Istat u kellha d-dubji rigward il-kompatibbiltà tagħha mas-suq intern.

(12)

Fil-valutazzjoni tagħha dwar jekk il-miżura kinitx selettiva, skont il-ġurisprudenza stabbilita (7), il-Kummissjoni l-ewwel identifikat is-sistema fiskali ta’ referenza rilevanti, u mbagħad analizzat jekk il-miżura kinitx tikkostitwixxi deroga minn dik is-sistema u, jekk dan kien il-każ, jekk l-Irlanda kinitx uriet li d-deroga kienet fin-natura u l-loġika tas-sistema tat-taxxa.

(13)

Hija kkonkludiet li, fil-każ li qed jissemma, is-sistema ta’ referenza hija t-tassazzjoni tal-passiġġieri tal-ajru li jitilqu minn ajruport li jinsab fl-Irlanda.

(14)

Il-Kummissjoni nnutat li s-sistema fiskali tal-ivvjaġġar bl-ajru kienet tipprovdi rata waħda ġenerali jew normali applikabbli għal kważi t-titjiriet kollha u rata mnaqqsa għal titjiriet lejn destinazzjoni li jinsabu mhux aktar minn 300 km mill-ajruport ta’ Dublin. Hija skopriet li r-rata normali kienet tikkostitwixxi s-sistema ta’ referenza, filwaqt li r-rata mnaqqsa, li kienet applikabbli għal kategorija ta’ titjiriet delimitata sew, dehret li kienet eċċezzjoni mis-sistema tar-referenza.

(15)

Il-Kummissjoni kellha dubji dwar jekk ir-rata mnaqqsa kinitx ġustifikata fuq il-bażi tad-distanza bejn il-punt tat-tluq u d-destinazzjoni finali tal-vjaġġ.

(16)

L-ewwel nett, ma kinitx applikabbli fuq il-bażi tat-tul attwali tal-vjaġġ, iżda fuq il-bażi tad-distanza bejn l-ajruport ta’ Dublin u d-destinazzjoni.

(17)

It-tieni, l-istruttura u n-natura oġġettiva tat-taxxa ma jidhrux li kienu jirrigwardaw id-distanza tat-titjira, iżda l-fatt tat-tluq minn ajruport Irlandiż. Il-konnessjoni mal-awtorità fiskali, l-avveniment taxxabbli (it-tluq minn ajruport Irlandiż) u l-esternalitajiet negattivi għas-soċjetà Irlandiża (tniġġis ta' ħsejjes u tal-arja) kienu preċiżament l-istess għall-passiġġieri kollha li jitilqu minn ajruport Irlandiż kienet x'kienet id-destinazzjoni tat-titjira u d-distanza koperta. L-operaturi tal-linja tal-ajru kkonċernati kienu fl-istess sitwazzjoni legali u fattwali identika rigward dak l-għan.

(18)

It-tielet, is-sistema fiskali ma kinitx karatterizzata minn differenzjar artikolat fil-livell tat-taxxa f’relazzjoni mad-distanza tat-titjiriet, iżda ffissat żewġ rati biss: waħda għal titjiriet fuq distanzi qosra ħafna u l-oħra għat-titjiriet l-oħrajn kollha. Dan il-kriterju kienu donnu jiffavorixxi lit-titjiriet ġewwa l-Irlanda u lit-titjiriet lejn ċerti partijiet tal-punent tar-Renju Unit u, konsegwentement, kien qed jiddiskrimina bejn titjiriet nazzjonali u titjiriet ġewwa l-Unjoni. Fil-każ preżenti, l-awtoritajiet Irlandiżi argumentaw li imposta ogħla fuq id-destinazzjonijiet li għalihom kienet tapplika r-rata aktar baxxa tkun sproporzjonata meta mqabbla mal-prezz. Il-Kummissjoni sabet li l-prezz ta’ biljetti għal destinazzjonijiet domestiċi mhux neċessarjament ikunu orħos minn dak ta' titjiriet lejn destinazzjonijiet oħra fl-Unjoni. Ir-rata tat-taxxa aktar baxxa għalhekk ma kinitx tidher li hija ġġustifikata min-natura u l-loġika tas-sistema fiskali tal-ivvjaġġar bl-ajru u għalhekk dehret bħala miżura selettiva.

(19)

Billi l-kriterji l-oħrajn kollha fl-Artikolu 107(1) tat-Trattat ukoll dehru li ġew sodisfatti, il-miżura dehret li kienet qed tikkostitwixxi għajnuna mill-Istat lill-operaturi tal-linji tal-ajru li kienu ħadmu r-rotot li bbenefikaw mir-rata mnaqqsa.

(20)

L-għajnuna ma kinitx tidher li taqa’ taħt il-kamp ta’ applikazzjoni ta’ xi linji gwida għall-kompatibbiltà tal-għajnuna mill-Istat maħruġa mill-Kummissjoni. Billi dehret li tikkostitwixxi għajnuna operattiva li kienet tiddiskrimina bejn it-titjiriet fl-Unjoni, ma setgħetx titqies bħala kompatibbli b'mod dirett skont l-Artikolu 107(3)(c) tat-Trattat. Barra minn hekk, l-għajnuna ma kienet taqa’ taħt l-ebda eżenzjoni oħra speċifikata fl-Artikolu 107(2) jew (3) tat-Trattat.

(21)

Konsegwentement, il-Kummissjoni kellha dubji dwar il-kompatibbiltà tal-miżura ta’ għajnuna mas-suq intern u, skont l-Artikolu 4(4) tar-Regolament (KE) Nru 659/1999 tat-22 ta’ Marzu 1999 li jistabbilixxi regoli dettaljati għall-applikazzjoni tal-Artikolu 93 tat-Trattat tal-KE (8), iddeċidiet li tiftaħ il-proċedura ta’ investigazzjoni formali, u b'hekk tistieden lill-Irlanda u lill-partijiet interessati oħra biex jippreżentaw il-kummenti tagħhom.

(22)

B 'risposta għall-avviż f’Il-Ġurnal Uffiċjali (9), il-Kummissjoni rċeviet kummenti mingħand l-awtoritajiet Irlandiżi u minn Ryanair.

(23)

L-awtoritajiet Irlandiżi jiddikjaraw li n-natura tat-taxxa fuq l-ivvjaġġar bl-ajru hija essenzjalment taxxa fuq il-klijenti. Għall-faċilità tal-applikazzjoni, l-awtoritajiet Irlandiżi obbligaw lil kull linja tal-ajru li tħallas lis-Servizz tad-dħul l-ammont rilevanti għal kull passiġġier li jitlaq minn ajruport Irlandiż u li jinġarr minn dik il-linja tal-ajru. L-operaturi tal-linji tal-ajru jistgħu, madankollu, jitħallew jgħaddu din it-taxxa u jiġbruha mill-passiġġieri tagħhom.

(24)

Barra minn hekk, it-taxxa fuq l-ivvjaġġar bl-ajru hija normalment elenkata fil-prezz tal-biljett u/jew fit-termini u l-kundizzjonijiet ġenerali tal-operaturi bħala taxxa jew bħala imposta, flimkien ma’ tariffi u taxxi oħrajn. Għaldaqstant, it-taxxa ma tagħti benefiċċju lill-ebda operatur tal-linji tal-ajru minħabba li hija sempliċiment tariffa, taxxa jew imposta oħra effettivament iddebitata lill-konsumatur.

(25)

L-awtoritajiet Irlandiżi jiddikjaraw li l-konferiment ta’ benefiċċju fuq operaturi partikolari huwa prerekwiżit għat-taxxa fuq l-ivvjaġġar bl-ajru li għandu jaqa’ fid-definizzjoni tal-Artikolu 107(1) tat-Trattat. Skont l-awtoritajiet Irlandiżi f'sitwazzjoni fejn it-taxxa fuq l-ivvjaġġar bl-ajru hija essenzjalment taxxa fuq il-konsumatur, kemm jekk hija ta’ EUR 10 kif ukoll ta' EUR 2, jista’ jkun diffiċli li wieħed jara kif it-taxxa tagħti benefiċċju lil xi operaturi partikolari.

(26)

Ma hemm l-ebda dubju li l-operaturi kollha, kemm jekk huma obbligati jiċċarġjaw ir-rata tat-taxxa ta’ EUR 10 jew ta’ EUR 2, ikunu fuq l-istess livell. Il-mistoqsija hawnhekk hija jekk jingħatax vantaġġ lill-operaturi tal-linji tal-ajru li jkollhom jiċċarġjaw ir-rata ta’ taxxa ta’ EUR 2 kollettivament biss. Skont l-awtoritajiet Irlandiżi, l-uniku xenarju realistiku li fih it-taxxa fuq l-ivvjaġġar bl-ajru tista’ tikkostitwixxi għajnuna huwa dak li fih il-linji tal-ajru li joperaw rotot lejn destinazzjonijiet mhux aktar minn 300 km mill-ajruport ta’ Dublin kienu obbligati jiġbru t-taxxa ta' EUR 10 fuq l-ivvjaġġar bl-ajru, iżda setgħu jżommu d-differenza bejn ir-rata ta' EUR 10 u r-rata ta’ EUR 2. Dan, madankollu, ma kienx il-każ. F’dan ir-rigward, huwa importanti li tinġibed l-attenzjoni lejn il-fatt li l-awtoritajiet Irlandiżi, fit-tfassil tat-taxxa inkwistjoni, ma kellhom f'moħħhom l-ebda operatur jew mudell tan-negozju partikolari.

(27)

L-ewwel nett, wieħed għandu jinnota li l-Irlanda ma għadx għandha trasportaturi tal-ajru nazzjonali per se, peress li l-Istat iddivesta l-interess tiegħu f'Aer Lingus, li oriġinarjament kienet l-operatur tal-ajru nazzjonali tal-Istat, f’sehem minoritarju.

(28)

Jekk it-taxxa kellha xi effett fuq l-operaturi tal-ajru Irlandiżi, dak l-effett kien ikun ferm differenti għal kull wieħed minn dawk l-operaturi tal-ajru. L-awtoritajiet Irlandiżi jindikaw li r-rotot ġewwa l-Unjoni li kienu suġġetti għar-rata ogħla ta' EUR 10 kienu mħaddma fil-biċċa l-kbira mill-istess linji tal-ajru Irlandiżi. Fil-perjodu rilevanti, it-tliet operaturi tal-ajru kellhom madwar [93-97] (*1) % tas-suq għal titjiriet li għalihom kienet tapplika r-rata aktar baxxa, iżda huma ppredominaw ukoll fis-suq tal-ivvjaġġar bl-ajru ġewwa l-Unjoni, billi kellhom fil-pussess tagħhom [82-87] (*1) % tat-total tat-titjiriet bħal dawn ġewwa l-Unjoni.

(29)

B'mod partikolari, l-awtoritajiet Irlandiżi jargumentaw li kwalunkwe żvantaġġ iddikjarat minn Ryanair huwa insostenibbli b’mod ċar, minħabba li Ryanair tirrappreżenta madwar [56-63] (*1) % tal-passiġġieri li jinġarru fuq ir-rotot li għalihom kienet tapplika r-rata aktar baxxa (ara t-Tabella 1).

Tabella 1

L-ishma tas-suq tal-operaturi tal-linji tal-ajru Irlandiżi fuq rotot li jitilqu minn ajruporti Irlandiżi.

(30)

It-Tabella 1 turi li l-uniku operatur li jista’ konċettwalment jiġi kklassifikat bħala operatur nazzjonali bis-saħħa tal-interess minoritarju tal-Istat (Aer Lingus) kellu sehem ħafna ikbar ta' titjiriet li għalihom kienet tapplika r-rata ogħla ([35-40] (*1) %) milli ta' titjiriet li għalihom kienet tapplika r-rata aktar baxxa ([16-23] (*1) %). Għalhekk, jekk ir-rata ta’ taxxa aktar baxxa kienet ħalliet xi effett fuq il-linji tal-ajru, Aer Lingus kienet tkun konsiderevolment żvantaġġata.

(31)

Fir-rigward ta' Aer Arann, li l-ilmentatur isostni li wkoll tibbenefika mill-għajnuna allegata, l-awtoritajiet Irlandiżi jindikaw li, bejn l-2007 u l-2010, hija esperjenzat tnaqqis sinifikanti kemm fil-fatturat kif ukoll fl-għadd ta' passiġġieri. Wara l-introduzzjoni tat-taxxa, Aer Arann irrappurtat telf ta' EUR 18-il miljun. Jidher għalhekk li l-linja tal-ajru għamlet l-aktar profitt qabel l-introduzzjoni tat-taxxa. L-awtoritajiet Irlandiżi jindikaw ukoll li kien hemm biss rotta waħda domestika li kienet kompetittiva għall-ilmentatur u għal Aer Arann u li, fuq dik ir-rotta, madwar [37-42] (*1) % tat-titjiriet ġew operati mill-ilmentatur. Għal titjiriet lejn destinazzjonijiet barra mill-pajjiż li jibbenefikaw mir-rata aktar baxxa (il-Punent tar-Renju Unit), l-ilmentatur ħaddem aktar minn [37-42] (*1) % tat-titjiriet skedati, filwaqt li Aer Arann u Aer Lingus kellhom ishma iżgħar.

(32)

Barra minn hekk, l-operaturi tal-linji tal-ajru mhux Irlandiżi dejjem kienu liberi li joperaw titjiriet li għalihom kienet tapplika r-rata ta’ taxxa aktar baxxa. Ma kien hemm l-ebda diskrezzjoni għall-Istat f'dan il-kuntest. L-awtoritajiet Irlandiżi jargumentaw li, jekk kien hemm vantaġġ fl-operazzjoni ta’ titjiriet li għalihom tapplika r-rata ta' taxxa aktar baxxa, l-operaturi barranin (mhux Irlandiżi) kienu jagħżlu li joperaw titjiriet bħal dawn. In-nuqqas ta’ linji tal-ajru barranin li joperaw titjiriet bħal dawn jissuġġerixxi li ma kien hemm l-ebda vantaġġ ġej mir-rata aktar baxxa.

(33)

L-awtoritajiet Irlandiżi jenfasizzaw li l-iskop tad-differenzjar fir-rati kien li jiġi introdott element ta’ proporzjonalità fil-livell tat-taxxa relatata mad-distanza, minħabba li l-prezzijiet huma ġeneralment irħas għal destinazzjonijiet eqreb. Filwaqt li huwa aċċettat li m'hemmx korrelazzjoni perfetta bejn id-distanzi u l-prezz, inħass li l-korrelazzjoni kienet biżżejjed biex tiġġustifika d-diviżjoni tat-taxxa f'żewġ livelli. L-awtoritajiet Irlandiżi jqisu li mekkaniżmu li jipprovdi differenzjar iktar preċiż fuq il-bażi tad-distanza kien irendi s-sistema estremament kumplikata u mgħobbija bi problemi amministrattivi.

(34)

L-awtoritajiet Irlandiżi jargumentaw li r-rata ta’ taxxa iktar baxxa ma kinitx tirriżulta f'xi distorsjoni ta’ kompetizzjoni u ma kellha l-ebda effett fuq il-kummerċ. L-ewwel nett, billi t-taxxa kienet taxxa fuq il-konsumatur fin-natura tagħha, ma kellha l-ebda effett perċettibbli fuq l-operaturi tal-linji tal-ajru. It-tieni, ir-rati tat-taxxa differenzjati ma kinux jiddistingwu s-suq Irlandiż mis-suq tal-Istati Membri l-oħra. Mit-titjiriet li għalihom kienet tapplika r-rata aktar baxxa, il-maġġoranza l-kbira ma kinitx domestika (68 % meta mqabbla ma’ 32 % għal titjiriet purament domestiċi). It-tielet, l-operaturi tal-linji tal-ajru huma attivi f'suq li huwa miftuħ għall-kompetizzjoni, li jfisser li s-suq kien miftuħ għal parteċipanti ġodda li għalihom ir-rata tat-taxxa aktar baxxa kienet tapplika fuq l-istess kundizzjonijiet bħal dawk ta’ operaturi ta' linji oħra tal-ajru. Jekk ir-rata tat-taxxa aktar baxxa kienet tat benefiċċju lil ċerti operaturi, il-linji tal-ajru mhux Irlandiżi kienu preżumibbilment għażlu li joperaw rotot li għalihom kienet tapplika r-rata aktar baxxa. In-nuqqas ta’ introduzzjonijiet ġodda jindika li r-rata aktar baxxa ma tatx vantaġġ lil ċerti operaturi tal-ajru.

(35)

L-awtoritajiet Irlandiżi stqarrew li, anki jekk ir-rata tat-taxxa aktar baxxa kellha titqies bħala għajnuna mill-Istat skont it-tifsira tal-Artikolu 107(1) tat-Trattat, għandha tiġi ddikjarata kompatibbli mas-suq intern, peress li kienet jew għajnuna de minimis jew xorta waħda kellha effett negliġibbli fuq l-operaturi tal-linji tal-ajru involuti.

(36)

Rigward in-natura tal-għajnuna mill-Istat tar-rata tat-taxxa aktar baxxa, Ryanair taqbel mal-opinjoni preliminari li l-Kummissjoni esprimiet fid-deċiżjoni tagħha tat-13 ta’ Mejju 2011 li r-rata ta’ taxxa aktar baxxa tat vantaġġ lil ċerti operaturi tal-linji tal-ajru u tikkostitwixxi għajnuna mill-Istat skont it-tifsira tal-Artikolu 107(1) tat-Trattat. Madankollu, Ryanair ma taqbilx mal-fehma tal-Kummissjoni li (i) r-rata ogħla ta’ EUR 10 għandha titqies bħala r-rata "normali", u li (ii) Ryanair kisbet vantaġġ permezz tal-miżura.

(37)

Fir-rigward tal-istabbiliment tar-rata "normali" jew "standard" skont is-sistema fiskali, Ryanair tiddikjara li l-fehma tal-Kummissjoni li r-rata ogħla ta' EUR 10 hija r-rata normali u li l-operaturi kollha li għalihom kienet tapplika r-rata aktar baxxa ta’ EUR 2 kisbu vantaġġ, hija arbitrarja. Skont Ryanair, m’hemm l-ebda raġuni għalfejn ir-rata ogħla, u mhux dik aktar baxxa, għandha titqies bħala r-rata normali. Barra minn hekk, ladarba r-rata ta’ żewġ livelli ġiet sostitwita b’rata waħda, ir-rata l-ġdida x'aktarx li tkun taħlita bejn ir-rati inizjali. Għalhekk, ir-rata l-ġdida tkun ir-referenza raġonevoli biex tevalwa kwalunkwe ħsara potenzjali jew benefiċċji li jirriżultaw mis-sistema b'żewġ livelli.

(38)

Ryanair tkompli ssostni li t-taxxa b’żewġ livelli fuq l-ivvjaġġar bl-ajru ma tatx vantaġġ lil Ryanair. Meta teżamina miżura li għandha mnejn tikkostitwixxi għajnuna mill-Istat, il-Kummissjoni għandha tqis l-effetti ġenerali tagħha fuq il-benefiċjarju potenzjali u, b'mod partikolari, tnaqqas kwalunkwe ħlasijiet speċifiċi li jkunu ta’ piż fuq il-vantaġġ mogħti mill-għajnuna allegata. Matul il-perjodu li fih kienet tapplika s-sistema fiskali fuq żewġ livelli, Ryanair ħallset it-taxxi speċifikati fit-Tabella 2.

Tabella 2

Il-passiġġieri li nġarru u t-taxxa mħallsa matul il-perjodu mit-30 ta’ Marzu 2009 sal-1 ta' Marzu 2011.

(39)

Minħabba li Ryanair tqis li r-rata unika l-ġdida ta’ EUR 3 għandha tgħodd bħala r-rata normali, Ryanair kellha tkun responsabbli, matul il-perjodu mit-30 ta’ Marzu 2009 sal-1 ta’ Marzu 2011, li tħallas ammont ta' EUR […] (*1) (11) bħala taxxa fuq l-ivvjaġġar bl-ajru. Dan huwa EUR […] (*1) inqas mill-ammont effettivament imħallas (ara t-Tabella 2). Ryanair għaldaqstant targumenta li hija ma gawdiet l-ebda benefiċċju mit-taxxa aktar baxxa, iżda li pjuttost ġarrbet żvantaġġ.

(40)

Fit-13 ta’ Jannar 2012, l-awtoritajiet Irlandiżi taw il-fehmiet tagħhom dwar il-kummenti ta’ Ryanair: L-ewwel nett, huma ma jaqblux mad-deskrizzjoni tat-taxxa ta’ Ryanair, peress li fil-fehma tagħhom it-taxxa hija essenzjalment taxxa fuq il-konsumatur u r-rata ta’ taxxa aktar baxxa ma kienet tat l-ebda vantaġġ lil-linji tal-ajru. It-tieni, huma ma jistgħux jaraw kif Ryanair tista’ tkun il-parti l-aktar affettwata direttament u negattivament mir-rata aktar baxxa, b'mod partikolari billi din tirrappreżenta [56-63] (*1) % tal-passiġġieri li jinġarru fuq titjiriet suġġetti għar-rata aktar baxxa. It-tielet, ma hemmx bażi għall-affermazzjoni li r-rata tat-taxxa aktar baxxa tfasslet biex tappoġġja lil Aer Arann. L-awtoritajiet Irlandiżi ma kellhom l-ebda operatur partikolari f’moħħhom huma u jfasslu t-taxxa fuq l-ivvjaġġar bl-ajru. Ir-raba', ma hemm l-ebda loġika fl-argument ta’ Ryanair li r-rata ogħla ta’ EUR 10 ma għandhiex titqies bħala r-rata normali ta' taxxa fuq l-ivvjaġġar bl-ajru. Taħt is-sistema fiskali fuq żewġ livelli, ir-rata ogħla kienet tapplika għal bejn 85 % u 90 % tat-tluq kollu. L-awtoritajiet Irlandiżi reġgħu tennew li huma kienu taw permess għal deroga mir-rata standard ta’ EUR 10 biex jintroduċu element ta' proporzjonalità fil-livell tat-taxxa relatata mad-distanza.

(41)

Skont l-Artikolu 107(1) tat-Trattat, “kull għajnuna, ta' kwalunkwe forma, mogħtija minn Stat Membru jew permezz ta’ riżorsi tal-Istat, li twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew ċerti produtturi għandha, safejn tolqot il-kummerċ bejn l-Istati Membri, tkun inkompatibbli mas-suq intern.”

(42)

Biex taqa’ taħt l-Artikolu 107(1) tat-Trattat, miżura trid għalhekk tkun selettiva (12). Filwaqt li tistabbilixxi jekk miżura hijiex selettiva, jeħtieġ li l-Kummissjoni tevalwa jekk il-miżura tiffavorixxix “ċerti impriżi jew il-produzzjoni ta’ ċerti produtturi” meta mqabbla ma’ oħrajn li, fid-dawl tal-għan segwit minn dak ir-reġim, huma f’sitwazzjoni fattwali u legali komparabbli (13). Skont il-ġurisprudenza stabbilita (14), miżura fiskali hija prima facie selettiva jekk din tikkostitwixxi devjazzjoni mill-applikazzjoni normali tal-qafas fiskali ġenerali.

(43)

L-ewwel nett, il-Kummissjoni għalhekk għandha tidentifika s-sistema fiskali ta’ referenza rilevanti. Fir-rigward tat-tassazzjoni, il-Kummissjoni tinnota li, fil-prinċipju, id-definizzjoni tas-sistema tat-tassazzjoni taqa’ taħt il-kompetenza esklużiva tal-Istati Membri. Fit-tfassil tas-sistema tat-tassazzjoni tagħhom, l-awtoritajiet Irlandiżi għażlu li jiddefinixxu l-avveniment tat-taxxa fuq l-ivvjaġġar bl-ajru bħala t-tluq ta’ passiġġier fuq inġenju tal-ajru minn ajruport li jinsab fl-Irlanda. Is-sistema ta’ referenza hija għalhekk it-tassazzjoni ta' passiġġieri tal-ajru li jitilqu fuq inġenju minn ajruport fl-Irlanda. L-għan ta’ din is-sistema huwa li jinġabar id-dħul għall-baġit tal-Istat. Il-konklużjoni li s-sistema ta’ referenza hija t-tassazzjoni ta’ passiġġieri tal-ajru li jitilqu minn ajruport li jinsab fl-Irlanda kienet ikkonfermata mill-awtoritajiet Irlandiżi fir-risposta tagħhom għall-kummenti tal-parti terza.

(44)

It-tieni nett, skont il-ġurisprudenza stabbilita (15), il-Kummissjoni trid tiddetermina jekk il-miżura fiskali kkonċernata tikkostitwixxix deroga mis-sistema ta’ referenza identifikata.

(45)

Ryanair targumenta li r-rata aktar baxxa ta’ EUR 2, jew alternattivament ir-rata unika ta' EUR 3 li kienet introdotta fl-1 ta' Marzu 2011, għandha titqies bħala r-rata normali fis-sistema fiskali tal-ivvjaġġar bl-ajru. Madankollu, minbarra ċerti destinazzjonijiet lejn il-Punent tar-Renju Unit, ir-rata aktar baxxa applikat biss għal destinazzjonijiet domestiċi u, skont l-awtoritajiet Irlandiżi, applikat biss għal madwar 10-15 % tat-titjiriet kollha li kienu soġġetti għat-taxxa. Għaldaqstant ma tistax titqies bħala r-rata normali tat-taxxa. Rigward ir-rata ta’ EUR 3, ma kinitx fis-seħħ fiż-żmien li għalih din id-Deċiżjoni tirrelata u għalhekk ma tistax titqies bħala r-rata normali tas-sistema fiskali tal-ivvjaġġar bl-ajru ta’ dak iż-żmien. Għalhekk, il-Kummissjoni tqis li r-rata ogħla ta’ EUR 10 kienet ir-rata normali tas-sistema ta' referenza, filwaqt li r-rata mnaqqsa ta’ EUR 2, li kienet applikabbli għal kategorija delimitata sew ta’ titjiriet, kienet eċċezzjoni mis-sistema ta’ referenza.

(46)

It-tielet, il-Kummissjoni trid teżamina jekk dawn l-eċċezzjonijiet humiex iġġustifikati bin-“natura jew bl-iskema ġenerali tas-sistema (16)" fl-Istat Membru. Jekk dak ikun il-każ, il-miżura ma titqiesx li tagħti vantaġġ selettiv u għalhekk ma tikkostitwixxix għajnuna mill-Istat skont it-tifsira tal-Artikolu 107(1) tat-Trattat.F'dak il-kuntest, ta' min jinnota li, skont il-ġurisprudenza (17), huma l-prinċipji bażiċi u ta’ gwida tas-sistema ta' referenza li huma rilevanti, u mhux dawk tal-miżura inkwistjoni.

(47)

Skont l-awtoritajiet Irlandiżi r-rata aktar baxxa ġiet introdotta biex iżżid element ta’ proporzjonalità fil-livell tat-taxxa relatata mad-distanza tat-titjira. Il-Kummissjoni tqis li r-raġunament mhuwiex relatat mal-prinċipji bażiċi u ta’ gwida tas-sistema fiskali nnifisha, iżda pjuttost ma’ dawk tad-deroga nnifisha. L-istruttura u n-natura oġġettiva tat-taxxa ma kinux relatati mad-distanza tat-titjira, iżda mal-fatt tat-tluq minn ajruport Irlandiż. Il-konnessjoni mal-awtorità fiskali, l-avveniment taxxabbli (tluq minn ajruport Irlandiż) u l-esternalitajiet negattivi għas-soċjetà Irlandiża ta' passiġġieri li jitilqu minn ajruport Irlandiż (pereżempju, l-istorbju u t-tniġġis) kienu preċiżament l-istess kienet x’kienet id-destinazzjoni tat-titjira u d-distanza koperta. L-operaturi tal-ajru kkonċernati kienu għalhekk fl-istess sitwazzjoni legali u fattwali identika rigward dak l-għan.

(48)

Barra minn hekk, is-sistema fiskali mhijiex karatterizzata minn differenzjar artikolat fil-livell tat-taxxa fir-rigward tat-tul attwali tat-titjiriet. L-ewwel nett, ir-rata tat-taxxa ma kinitx applikabbli fuq il-bażi tat-tul attwali tat-titjira, iżda fuq il-bażi tad-distanza bejn l-ajruport ta’ Dublin u d-destinazzjoni, kien x’kien il-post minn fejn sar it-tluq attwali. It-tieni nett, is-sistema fiskali tiffissa biss żewġ rati: waħda għal titjiriet b’distanza qasira ħafna mill-ajruport ta’ Dublin u l-oħra għat-titjiriet l-oħrajn kollha.

(49)

Barra minn hekk, anki jekk ir-raġuni għad-deroga kienet fin-natura u fil-loġika tal-prinċipji tas-sistema fiskali tal-ivvjaġġar bl-ajru, il-Qorti stqarret li benefiċċju jrid ikun konsistenti mhux biss mal-karatteristiċi inerenti tas-sistema fiskali inkwistjoni iżda wkoll mal-mod ta’ kif il-benefiċċju jiġi implimentat (18). Kif imsemmi fil-premessa 47, is-sistema fiskali ma kinitx de facto tiżgura rati proporzjonati fir-rigward tat-tul attwali tat-titjiriet, billi r-rata applikabbli kienet iffissata fuq il-bażi tad-distanza bejn l-ajruport ta’ Dublin u d-destinazzjoni, kien x’kien il-post minn fejn sar it-tluq attwali u billi żewġ rati biss kienu applikabbli: waħda għal titjiriet b’distanza qasira ħafna mill-ajruport ta’ Dublin u l-oħra għat-titjiriet l-oħrajn kollha. Il-prezz tal-biljetti għad-destinazzjonijiet domestiċi mhux neċessarjament orħos minn dak ta’ titjiriet lejn destinazzjonijiet oħra fl-Unjoni. Il-miżura għalhekk ma setgħetx tikseb l-għan tagħha li tiżgura l-proporzjonalità ta’ tassazzjoni fir-rigward tad-distanza tat-titjira. F'dan il-każ, la l-awtoritajiet Irlandiżi u lanqas il-partijiet terzi ma argumentaw li l-effett tad-deroga kien li l-livell tat-taxxa de facto kien proporzjonali mad-distanza. Għall-kuntrarju, l-awtoritajiet Irlandiżi jirrikonoxxu li ma kien hemm l-ebda korrelazzjoni perfetta bejn id-distanza u r-rata tat-taxxa.

(50)

Għalhekk, il-Kummissjoni ma tara l-ebda raġuni għalfejn għandha tbiddel l-opinjoni preliminari tagħha li r-rata aktar baxxa ma kinitx fil-loġika u fl-iskema ġenerali tas-sistema fiskali tal-ivvjaġġar bl-ajru. Għalhekk il-Kummissjoni tqis li l-miżura hija selettiva u mhux ġustifikata min-natura u l-loġika tas-sistema.

(51)

In-nefqa għat-taxxi tikkostitwixxi spejjeż li normalment jitħallsu minn impriża.

(52)

L-applikazzjoni tat-taxxa fuq l-ivvjaġġar bl-ajru tista’ taffettwa d-dħul tal-linji tal-ajru li jkollhom iħallsu dik it-taxxa, billi jżidu l-prezzijiet tal-biljetti li huma kapaċi joffru lill-klijenti tagħhom jew billi jnaqqsu l-marġni fuq kull biljett li jbiegħu, meta l-linji tal-ajru jiddeċiedu li ma jgħaddux it-taxxa lill-klijenti. F’dan ir-rigward, il-Qorti stqarret li “ġaladarba t-taxxi tal-ajruport direttament u awtomatikament jinfluwenzaw il-prezz tal-vjaġġ, id-differenzi fit-taxxi li għandhom jitħallsu mill-passiġġieri se jkunu awtomatikament riflessi fl-ispejjeż tat-trasport, u għalhekk, […], l-aċċess għat-titjiriet domestiċi se jiġi ppreferut fuq l-aċċess għat-titjiriet intra-Komunitarji" (19).

(53)

Rata mnaqqsa għal ċertu tip ta’ titjiriet għalhekk ikollha inqas effett mir-rata normali fuq l-operaturi tal-linji tal-ajru li joffru dak it-tip ta' titjiriet. Dawk l-operaturi tal-linji tal-ajru jinħelsu minn spiża li normalment ikollhom iġorru, u għaldaqstant ikollhom spiża iżgħar biex jgħaddu lill-klijenti tagħhom jew biex jassumu huma stess.

(54)

Għalhekk, il-Kummissjoni tqis li r-rata ta’ taxxa iktar baxxa tat vantaġġ lill-operaturi tal-linji tal-ajru li jaqdu r-rotot li għalihom kienet tapplika dik ir-rata. L-ispiża iżgħar li kellhom jgħaddu lill-klijenti tagħhom jew li kellhom jassumu kienet tirrappreżenta direttament ir-riżorsi finanzjarji li dawk l-operaturi setgħu jekonomizzaw u għalhekk is-sitwazzjoni ekonomika tagħhom tjiebet meta mqabbla ma’ dik ta’ operaturi tal-linji tal-ajru oħra li jikkompetu fis-suq tat-trasport bl-ajru. Il-vantaġġ jikkorrispondi mad-differenza bejn ir-rata aktar baxxa ta’ EUR 2 u r-rata normali ta' taxxa ta' EUR 10 matul il-perjodu bejn it-30 ta’ Marzu 2009 u l-1 ta’ Marzu 2011. Il-Kummissjoni tinnota li t-titjiriet li għalihom kienet tapplika r-rata mnaqqsa kienu prinċipalment imħaddma minn operaturi tal-ajru b’rabta qawwija mal-Irlanda (Aer Lingus, Aer Arann u Ryanair twaqqfu fl-Irlanda u għad għandhom il-kwartieri ġenerali tagħhom hemmhekk). Għalhekk, ir-rata mnaqqsa de facto kienet tagħti vantaġġ lill-operaturi tal-linji tal-ajru Irlandiżi meta mqabbla ma’ operaturi oħra fl-Unjoni.

(55)

Il-Kummissjoni ma tistax taċċetta l-argument ta’ Ryanair li l-vantaġġ kien limitat għad-differenza bejn ir-rata aktar baxxa u r-rata ta’ EUR 3 li ġiet introdotta fl-1 ta’ Marzu 2011. Tali rata ma kinitx tapplika fl-istess ħin bħar-rata aktar baxxa u jekk vantaġġ huwa definit f’sistema b'rata waħda ta’ taxxa iktar baxxa u rata waħda għolja, l-applikazzjoni ta' punt ta’ riferiment li huwa stabbilit x’imkien bejn dawk ir-rati ma taqbadx il-vantaġġ kollu li kien hemm.

(56)

Ryanair targumenta wkoll li hija bbenefikat inqas mir-rata ta’ taxxa aktar baxxa minn, pereżempju, Aer Arann, billi l-biċċa l-kbira tat-titjiriet tagħha huma għal destinazzjonijiet li għalihom kienet tapplika r-rata ogħla. Madankollu, il-vantaġġ li jinbet mill-applikazzjoni tar-rata tat-taxxa aktar baxxa ta' EUR 2 huwa d-differenza bejn dik ir-rata u r-rata standard ta’ EUR 10. Fl-applikazzjoni tar-rata aktar baxxa għal ċerti titjiriet, Ryanair, bħal kull linja tal-ajru oħra li topera titjiriet li għalihom applikat dik ir-rata, kellha vantaġġ li jikkorrispondi għad-differenza bejn iż-żewġ rati.

(57)

L-awtoritajiet Irlandiżi jargumentaw li t-taxxa kienet maħsuba biex tingħadda lill-passiġġieri u, għalhekk, l-ebda vantaġġ ma kien jeżisti fil-livell tal-operaturi tal-linji tal-ajru. F'dak il-kuntest, il-Kummissjoni tinnota li tnaqqis mir-rata normali ta' taxxa speċifikata jista’ jagħti vantaġġ selettiv lill-operatur tal-linja tal-ajru li huwa responsabbli li jħallas ir-rata mnaqqsa anki f'sitwazzjonijiet fejn ikun hemm rekwiżit legali biex it-taxxa inkwistjoni tingħadda lill-klijenti (20). Il-Kummissjoni tinnota wkoll li, f’dan il-każ, ma kien hemm l-ebda mekkaniżmu li jiżgura li t-taxxa ġiet mgħoddija fil-verità, iżda li kien l-operatur tal-linja tal-ajru li kellu jiddeċiedi dwar kif u jekk it-taxxa kellhiex tingħadda lill-passiġġieri. Fl-ilment tiegħu, l-ilmentatur attwalment argumenta bil-kuntrarju, jiġifieri li ma setax jgħaddi l-ispiża tat-taxxa lill-klijenti tiegħu billi jekk jagħmel hekk kien jinħoloq effett sproporzjonat fuq il-prezzijiet tal-biljetti tiegħu. Għalhekk, il-Kummissjoni ma taqbilx mal-awtoritajiet Irlandiżi li ma kien hemm l-ebda vantaġġ fil-livell tal-operaturi tal-linji tal-ajru: dawk li setgħu jużaw ir-rata tat-taxxa aktar baxxa għal ċerti titjiriet kellhom spiża aktar baxxa minn ta’ oħrajn biex jgħaddu lill-klijenti tagħhom. Dan huwa wkoll konformi mal-prattika tal-Kummissjoni fir-rigward ta’ miżuri ta' għajnuna li ġejjin minn dazju tas-sisa (21), li skonthom eżenzjonijiet minn dazji bħal dawn instabu li jipprovdu vantaġġ lill-operatur tal-linja tal-ajru li huwa obbligat li jħallas it-taxxa, minkejja l-fatt li dik l-entità tista' tagħżel li tgħaddi l-ispejjeż lill-klijenti.

(58)

Għalhekk, il-Kummissjoni tikkonkludi li r-rata ta’ taxxa iktar baxxa tat vantaġġ lil ċerti operaturi tal-linji tal-ajru. Il-vantaġġ jikkorrispondi mad-differenza bejn ir-rata aktar baxxa ta’ EUR 2 u r-rata normali ta' taxxa ta' EUR 10 matul il-perjodu bejn it-30 ta’ Marzu 2009 u l-1 ta’ Marzu 2011. It-titjiriet li għalihom kienet tapplilka r-rata aktar baxxa kienu prinċipalment imħaddma mil-linji tal-ajru b'rabta qawwija mal-Irlanda (Aer Lingus, Aer Arann u Ryanair). Għalhekk, ir-rata mnaqqsa tat vantaġġ lill-operaturi tal-linji tal-ajru Irlandiżi meta mqabbla ma’ operaturi oħra fl-Unjoni.

(59)

Il-fatt li l-awtoritajiet Irlandiżi ppermettew l-applikazzjoni ta’ rata ta’ taxxa iktar baxxa minn dik normali jirriżulta f'telf ta' dħul mit-taxxa għall-Istat li kien għalhekk iffinanzjat mir-riżorsi tal-Istat. Billi r-rata aktar baxxa kienet ġiet deċiża mill-awtoritajiet nazzjonali, il-miżura hija imputabbli lill-Istat.

(60)

B'paragun mal-kompetituri tagħhom, l-operaturi tal-linji tal-ajru li bbenefikaw mir-rata aktar baxxa nħelsu mill-ispejjeż li altrimenti kien ikollhom iħallsu huma stess jew li kien ikollhom jgħaddu lill-klijenti tagħhom. Għalhekk, ir-rata aktar baxxa ta' taxxa fuq l-ivvjaġġar bl-ajru tejbet is-sitwazzjoni ekonomika tagħhom meta mqabbla ma’ impriżi oħra li jikkompetu fis-suq tat-trasport bl-ajru u b'hekk inħolqot distorsjoni jew riskju ta' distorsjoni għall-kompetizzjoni.

(61)

Meta għajnuna mogħtija minn Stat Membru ssaħħaħ il-pożizzjoni ta’ impriża meta mqabbla ma’ impriżi oħra li jikkompetu fil-kummerċ ġewwa l-Unjoni, dawn tal-aħħar iridu jitqiesu bħala affettwati minn dik l-għajnuna (22). Huwa biżżejjed li r-riċevitur tal-għajnuna jikkompeti ma’ intrapriżi oħra fi swieq miftuħa għall-kompetizzjoni (23). Is-settur tat-trasport bl-ajru huwa kkaratterizzat minn kompetizzjoni intensiva bejn l-operaturi minn Stati Membri differenti, b’mod partikolari mid-dħul fis-seħħ tat-tielet stadju tal-liberalizzazzjoni tat-trasport bl-ajru (“it-tielet pakkett”) fl-1 ta’ Jannar 1993, jiġifieri bir-Regolament tal-Kunsill (KEE) Nru 2407/92 tat-23 ta’ Lulju 1992 dwar liċenzjar ta' air carriers (24), ir-Regolament tal-Kunsill (KEE) Nru 2408/92 tat-23 ta’ Lulju 1992 dwar aċċess għat-trasportaturi tal-ajru tal-Komunità għal rotot tal-ajru intra-Komunitarji (25) u r-Regolament tal-Kunsill (KEE) Nru 2409/92 tat-23 ta' Lulju 1992 dwar nollijiet u rati għal servizzi tal-ajru (26). Ir-rata mnaqqsa kienet għalhekk kapaċi taffettwa l-kummerċ bejn l-Istati Membri billi saħħet il-pożizzjoni ta’xi operaturi tal-linji tal-ajru li jikkompetu f'suq li huwa liberalizzat għal kollox fil-livell tal-Unjoni.

(62)

Billi l-kriterji kollha fl-Artikolu 107(1) tat-Trattat huma sodisfatti, il-miżura tikkostitwixxi għajnuna mill-Istat lill-operaturi tal-linji tal-ajru kollha li joperaw titjiriet li jibbenefikaw mir-rata mnaqqsa.

(63)

Billi naqsu milli jinnotifikaw il-miżura qabel l-implimentazzjoni tagħha, l-awtoritajiet Irlandiżi ma ssodisfawx l-obbligi tagħhom skont l-Artikolu 108(3) tat-Trattat. Il-miżura ta’ għajnuna għalhekk tikkostitwixxi għajnuna mill-Istat illegali.

(64)

Skont l-Artikolu 107(3)(c) tat-Trattat, għajnuna tista’ titqies kompatibbli mas-suq intern jekk timmira li tiffaċilita l-iżvilupp ta’ ċerti attivitajiet ekonomiċi jew ta’ ċerti reġjuni ekonomiċi, fejn għajnuna bħal din ma tfixkilx il-kondizzjonijiet tal-kummerċ sa grad li jkun kuntrarju għall-interess komuni. Peress li l-għajnuna kienet tikkostitwixxu għajnuna operattiva, filwaqt li naqqset l-infiq kurrenti ta' ċerti operaturi tal-linji tal-ajru, hija, skont il-ġurisprudenza tal-Qorti, fil-prinċipju, inkompatibbli mas-suq intern (27). L-għajnuna ma taqa' fl-ebda kamp ta’ applikazzjoni ta’ xi Linji Gwida dwar il-kompatibbiltà tal-għajnuna mill-Istat maħruġa mill-Kummissjoni f'dan il-kuntest. B’mod partikolari, mhijiex koperta mil-Linji Gwida tal-Komunità dwar il-finanzjament ta’ ajruporti u għajnuna tal-bidu lil-linji tal-ajru li jitilqu minn ajruporti reġjonali (28), billi mhijiex marbuta mal-bidu ta' ċerti rotot. L-awtoritajiet Irlandiżi ma argumentawx jew ma pprovdew l-ebda informazzjoni li turi li l-għajnuna tista’ titqies bħala kompatibbli skont il-Linji gwida Komunitarji dwar l-għajnuna mill-Istat għall-ħarsien tal-ambjent (29). Għall-kuntrarju, dawn għamluha ċara li l-għan tat-taxxa huwa li jiżdied id-dħul u mhux għall-ħarsien tal-ambjent. Il-fatt li t-taxxa inkwistjoni ma fiha l-ebda rabta ċara jew proporzjonali mat-tnaqqis tal-użu tal-enerġija, mat-tniġġis jew mal-emissjonijiet ta’ gass, jew mal-livelli tal-ħsejjes, eċċ., jappoġġja dan ir-raġunament. Għalhekk, il-Kummissjoni ma ssibx li l-għajnuna hija kompatibbli mas-suq intern skont l-Artikolu 107(3)(c) tat-Trattat.

(65)

L-għajnuna inkwistjoni ma taqax taħt xi eżenzjoni oħra speċifikata fl-Artikolu 107(2) jew (3) tat-Trattat.

(66)

Barra minn hekk, anki jekk l-għajnuna kienet kompatibbli ma xi waħda mill-eċċezzjonijiet speċifikati skont l-Artikolu 107(2) jew (3) tat-Trattat, li mhuwiex il-każ, il-Qorti stqarret li l-proċedura skont l-Artikoli 107 u 108 tat-Trattat ma għandha qatt tipproduċi riżultat li jkun kuntrarju għal dispożizzjonijiet speċifiċi tat-Trattat. Il-Qorti sostniet ukoll li dawk l-aspetti ta’ għajnuna li jmorru kontra dispożizzjonijiet speċifiċi tat-Trattat, barra mill-Artikoli 107 u 108, jistgħu jkunu tant marbutin b’mod li ma jinħallx mis-suġġett tal-għajnuna, li jkun impossibbli li jiġu evalwati b’mod separat (30). F’dan il-każ partikolari, kif deskritt fil-premessa 10, ir-rati differenzjati kienu suġġetti għal investigazzjoni mill-Kummissjoni, li sabet li huma kienu qed jiksru r-Regolament (KE) Nru 1008/2008 u l-Artikolu 56 tat-Trattat dwar il-libertà li jiġu pprovduti servizzi, minħabba li d-differenzjar impona kundizzjonijiet aktar onerużi fuq it-tħaddim ta' servizzi tal-ajru ġewwa l-Unjoni minn dawk imposti fuq is-servizzi domestiċi. Il-Qorti tal-Ġustizzja ddikjarat espliċitament f’każijiet li jikkonċernaw taxxi tal-ajruport li d-dispożizzjonijiet tat-Trattat dwar il-libertà li jiġu pprovduti servizzi huma wkoll applikabbli għas-settur tat-trasport (31). F'dan il-każ, l-għajnuna mill-Istat tirriżulta mid-differenzjar innifsu fir-rati tat-taxxa. Peress li t-taxxa u l-għajnuna jikkostitwixxu żewġ elementi tal-istess miżura fiskali unika, dawn huma inseparabbli (32) u għalhekk l-għajnuna mill-Istat ma tistax tingħata mingħajr ma tkun bi ksur tal-prinċipju tal-libertà li jiġu pprovduti s-servizzi. Konsegwentement, l-għajnuna ma tkunx tista’ tiġi ddikjarata kompatibbli mat-Trattat fl-ebda każ għaliex tkun inevitabbilment qed tikser id-dispożizzjonijiet tar-Regolament (KE) Nru 1008/2008 u l-Artikolu 56 tat-Trattat.

(67)

Konsegwentement, il-Kummissjoni tikkonkludi li l-għajnuna ma tistax titqies kompatibbli mat-Trattat.

(68)

Il-Kummissjoni tqis li r-rata aktar baxxa ta’ taxxa fuq l-ivvjaġġar bl-ajru għal titjiriet lejn destinazzjoni li tinsab mhux aktar minn 300 km mill-ajruport ta’ Dublin previsti permezz tat-Taqsima 55(2) tal-Att Finanzjarju (Nru 2), u b'mod partikolari l-Artikolu 2(b) tiegħu, għall-perjodu mit-30 ta' Marzu 2009 sal-1 ta' Marzu 2011 tikkostitwixxi għajnuna mill-Istat skont it-tifsira tal-Artikolu 107(1) tat-Trattat. L-Irlanda implimentat illegalment dik l-għajnuna mill-Istat bi ksur tal-Artikolu 108(3) tat-Trattat.

(69)

L-għajnuna mill-Istat ma hi konformi mal-ebda deroga kif previst fl-Artikolu 107(2) u (3) tat-Trattat. Billi l-ebda raġunijiet oħra għall-kompatibbiltà ma jistgħu jiġu previsti għall-miżura kkonċernata, din hija inkompatibbli mas-suq intern.

(70)

L-għajnuna mill-Istat tammonta għad-differenza bejn ir-rata aktar baxxa tat-taxxa fuq l-ivvjaġġar bl-ajru u r-rata standard ta’ EUR 10 (jiġifieri, EUR 8 għal kull passiġġier) imposta fuq kull passiġġier. Dan jikkonċerna t-titjiriet kollha operati b’inġenji tal-ajru kapaċi jġorru aktar minn 20 passiġġier u mhux użati għall-finijiet tal-Istat jew militari, li jitilqu minn ajruport b'aktar minn 10 000 passiġġier fis-sena għal destinazzjoni li tinsab mhux aktar minn 300 km mill-ajruport ta’ Dublin. Il-benefiċjarji huma Ryanair, Aer Lingus, Aer Arann u trasportaturi bl-ajru oħrajn li għandhom jiġu identifikati mill-Irlanda.

(71)

Skont l-Artikolu 14(1) tar-Regolament (KE) Nru 659/1999, meta jittieħdu Deċiżjonijiet negattivi f’każijiet ta’ għajnuna kontra l-liġi, il-Kummissjoni trid tiżgura li l-Istat Membru kkonċernat jieħu l-miżuri kollha meħtieġa biex jirkupra l-għajnuna mingħand il-benefiċjarji. L-Irlanda għandha għalhekk tintalab li tirkupra l-għajnuna inkompatibbli,