ANNESS I

Prodotti agrikoli maħsuba għall-konsum uman elenkati fl-Anness I tat-Trattat:

Klassi 1.8:   prodotti oħra fl-Anness I tat-Trattat (ħwawar eċċ.)

IĊ-ĊINA

(Zhenjiang Xiang Cu) (IĠP)

ANNESS II

DOKUMENT UNIKU

IR-REGOLAMENT TAL-KUNSILL (KE) Nru 510/2006

‘

’ (ZHENJIANG XIANG CU)

Nru tal-KE: CN-PGI-0005-0630-16.07.2007

IĠP ( X ) DPO ( )

1.   Isem

‘

’ (Zhenjiang Xiang Cu)

2.   L-Istat Membru jew il-pajjiż terz

Ir-Repubblika Popolari taċ-Ċina

3.   Deskrizzjoni tal-prodott agrikolu jew tal-ikel

3.1.   It-tip tal-prodott

Klassi 1.8:

prodotti oħra tal-Anness I tat-Trattat (ħwawar eċċ.)

3.2.   Id-deskrizzjoni tal-prodott li għalih japplika l-isem f’(1)

Zhenjijang Xiang Cu huwa tip ta’ ħall tar-ross imsajjar magħmul minn; ross li jwaħħal bħala l-materja prima prinċipali. Għandu riħa distinta u togħma delikata. Il-kulur huwa kannella ħamrani qawwi, ileqq u skur. Għandu fwieħa qawwija ta’ ross moqli u ta’ prodotti tal-birrerija. It-togħma hija densa u mhux qawwija, qarsa imma mhux strinġenti, delizzjuża u kemxejn ħelwa. Skont l-ispeċifikazzjonijiet, l-aċidità totali (abbażi tal-aċidu aċetiku) tkun fil-medda ta’ bejn 5,00 gm — 6,00 gm għal kull 100 ml (mhux iktar minn 15,50 g), l-aċidu fiss (abbażi tal-aċidu lattiku) 1,20 gm — 1,60 gm kull 100 ml, aċidu amminiku nitroġenu (abbażi tan-nitroġenu) 0,12 gm u 0,18 gm kull 100 ml, u zokkor ta’ riduzzjoni (abbażi tad-destrożju) ’il fuq minn 2,20 gm kull 100 ml.

Skont it-tul taż-żmien ta’ ħżin, iz-Zhenjiang Xiang Cu huwa maqsum f’żewġ kategoriji, jiġifieri fi ‘Fragrant Vinegar’ (Ħall Ifuħ), li huwa l-forma regolari b’perjodu ta’ ħżin ta’ aktar minn 180 ġurnata, u ‘Mature Vinegar’ (Ħall Matur), li jirreferi għaz-‘Zhenjiang Fragrant Vinegar b’perjodu’ ta’ ħżin ta’ aktar minn 365 ġurnata.

3.3.   Il-materja prima

1.   Ross li jwaħħal: mir-reġjun ta’ Zhenjiang. Għandu kwalità tajba b’mod konsistenti bi glutinużità qawwija u proteina mhux maħduma xierqa. Il-kontenut ta’ amylopectin jista’ jkun għoli daqs 100°.

2.   Nuħħala tal-qamħ: minn qamħ lokali pproċessat tal-aqwa kwalità, rikk fl-elementi nutrittivi meħtieġa għall-fermentazzjoni tal-batterji tal-aċidu aċetiku.

3.   Ħliefa tar-ross: mill-ipproċessar tar-ross lokali; isservi bħala t-trasportatur u tifforma l-ambjent li fih il-gass u li huwa speċjali għat-tkabbir tal-batterji tal-acidu acetiku fil-fermentazzjoni.

4.   Daqu: trasportatur tat-tkabbir tal-partijiet fit-taħlita li jsiru zokkor permezz tal-fermentazzjoni bl-użu ta’ tekniki tradizzjonali minn materjali tal-aqwa kwalità lokali bħall-qamħ, ix-xgħir u l-piżelli ħodor.

5.   Ross tal-qali: pejst tar-ross li jwaħħal u huwa artab u mbaskat magħmul minn ross lokali tal-aqwa kwalità; dan huwa l-ingredjent ewlieni fil-fwieħa u l-kulur karatteristiċi taz-Zhenjiang Fragrant Vinegar.

6.   Ilma: ilma pur akkumulat fil-fattizzi naturali ta’ wiċċ l-art u fil-ġeoloġija li hija partikolari għar-reġjun taz-Zhenjiang, rikk f’diversi sustanzi minerali. Għandu togħma kemxejn ħelwa, għebusija u valur tal-pH xierqa, tajjeb għas-sajran tal-ħall.

3.4.   L-għalf (għall-prodotti li ġejjin mill-annimali biss)

—

3.5.   Il-passi speċifiċi fil-produzzjoni li jridu jittieħdu fiż-żona ġeografika identifikata

Il-produzzjoni taz-Zhenjiang Xiang Cu, inkluża l-preparazzjoni tad-Daqu u tal-brodu tal-inbid tar-ross, il-fermentazzjoni tal-massa msajra, l-estrazzjoni tal-ħall, it-tifwir u l-ħżin/il-maturazzjoni tal-ħall mhux ipproċesat, ilkoll iridu jseħħu fiż-żona ġeografika definita.

3.6.   Ir-regoli speċifiċi dwar it-tqattigħ, it-taħkik, l-ippakkjar, eċċ.

Fliexken tal-ħġieġ skont ir-rekwiżiti tal-iġjene tal-ikel; l-imballaġġ ta’ fuq barra jista’ jkun magħmul minn kaxxi tal-kartun.

3.7.   Ir-regoli speċifiċi dwar it-tikkettar

It-tikketta taz-Zhenjiang Xiang Cu hija stampata u mħawla b’mod permanenti fuq il-flixkun. Id-dettalji prinċipali fuq it-tikketta inkluż l-isem tal-prodott (Zhenjiang Xiang Cu), it-tekniki tal-produzzjoni (il-fermentazzjoni solida), il-kategorija tal-ħall (ħall misjur), l-ingredjenti prinċipali, il-piż nett, l-isem u l-indirizz tal-manifattur, id-data tal-produzzjoni u l-kodiċi standard tal-prodott.

4.   Definizzjoni konċiża taż-żona ġeografika

Ir-reġjun ta’ Zhenjiang jinsab fix-Xlokk taċ-Ċina u fuq ix-xatt tan-Nofsinhar tax-Xmara Yangtze. Jinsab bejn 31°37′-32°19′ north latitude (latitudni tat-Tramuntana) u 118°58′-119°58′ east longitude (lonġitudni tal-Lvant). Ir-reġjun jinkludi il-Belt ta’ Jurong, il-Belt ta’ Danyang, il-Belt ta’ Yangzhong, id-Distrett ta’ Dantu, id-Distrett ta’ Jingkou, id-Distrett ta’ Runzhou u ż-Żona ta’ Żvilupp ta’ Zhenjiang.

5.   Ir-rabta maż-żona ġeografika

5.1.   L-ispeċifiċità taż-żona ġeografika

Zhenjiang jinsab fix-Xlokk taċ-Ċina, fejn jingħaqdu x-Xmara Yangtze u l-Grand Canal. Għandu klima tipikament umda tal-monsun bi tranżizzjoni minn żona moderatament sħuna għal żona subtropikali. Il-medja annwali ta’ xemx hija ta’ 2 050,7 sigħat, ir-rata ta’ dawl tax-xemx hija ta’ 46,8 %, it-temperatura medja annwali hija 15,4 °C, il-medja tal-umdità hija 77 % u l-inżul tax-xita medju annwali huwa ta’ aktar minn 1 000 mm. Ir-reġjun ta’ Zhenjiang huwa magħmul minn għoljiet baxxi mifruxin, art agrikola fertili, netwerk kumpless tax-xmara, u għadd kbir ta’ gżejjer u portijiet żgħar matul ix-xmara; iż-żona hija ħadra bi klima li tagħti pjaċir, imdawla u umda.

5.2.   L-ispeċifiċità tal-prodott

Il-kulur taz-Zhenjiang Xiang Cu huwa kannella ħamrani qawwi, ileqq u skur. Il-ħall għandu fwieħa qawwija ta’ ross moqli u ta’ prodotti tal-birrerija. It-togħma hija densa u mhux qawwija, għalkemm ftit qarsa li tinkludi l-aċidu aċetiku, l-aċidu lattiku, l-aċidu tat-tuffieħ, l-aċidu suċċiniku, l-aċidu ċitriku u l-aċidu glukoniku, li però mhux partikolarment strinġenti. Huwa fin u frisk, delizzjuż u kemxejn ħelu.

5.3.   Rabta kawżali bejn iż-żona ġeografika u l-kwalità speċifika, ir-reputazzjoni jew karatteristiċi oħra tal-prodott

Iz-Zhenjiang jinsab fix-Xlokk taċ-Ċina u għandu klima tipikament umda tal-monsun bi tranżizzjoni minn żona moderatament sħuna għal żona subtropikali. Jinsab fejn jiltaqgħu ix-Xmara Yangtze u l-Grand Canal, f’kampanja b’għoljiet baxxi u ħodor, art agrikola fertili, netwerk kumpless tax-xmara, u għadd kbir ta’ gżejjer u portijiet żgħar matul ix-xmara. Hu mimli uċuħ tar-raba’ bħar-ross, il-qamħ, ix-xgħir u l-piżelli ħodor, bi prodotti sekondarji rikki bħan-nuħħala tal-qamħ u l-ħliefa tar-ross. Il-fatt li Zhenjiang huwa umdu u aħdar jista’ jwassal għar-rendiment u r-riproduzzjoni ta’ batterji tal-aċidu aċetiku. L-ilma mill-għoljiet u l-fawwarijiet jinġabar fix-xmajjar, fil-lagi u fl-artijiet mistgħadra wara li jgħaddi mill-ġebel u l-blat, u b’hekk ikollu kontenut rikk ta’ materjali minerali u jipproduċi togħma qawwija u kemxejn ħelma, li hija l-aktar adattata għall-ħall imsajjar.

Il-Belt ta’ Zhenjiang ilha ħafna magħrufa bħala ‘il-Belt fil-foresta tal-muntanja u d-Dar tal-Ħall’. In-nies fi Zhenjiang bdiet tagħmel il-ħall 1 400 sena ilu. L-użu ta’ Zhenjiang Xiang Cu ġie stabbilit fid-Dinastija Liang; kien meqjus bħala l-aqwa ħall tar-ross fil-Klassiċi tal-Mediċina taċ-Ċina bikrija u rebaħ premju internazzjonali tad-deheb fid-Dinastija Qing. Iz-Zhenjiang Xiang Cu sar l-aktar ħaġa li biha hija rikonoxxuta l-belt. Hemm kważi 100 impjant tal-manifattura li jipproduċu l-ħall fil-belt, fejn il-fwieħa tal-ħall qiegħdha fl-arja u l-abitudnijiet u l-kultura tal-ikel relatati mal-ħall jidrhu kullimkien.

Referenza għall-pubblikazzjoni tal-ispeċifikazzjoni

(L-Artikolu 5(7) tar-Regolament (KE) Nru 510/2006)