5.6.2012   

MT

Il-Ġurnal Uffiċjali tal-Unjoni Ewropea

L 144/22

(1)

L-Anness II għar-Regolament (KE) Nru 1333/2008 jistipula lista tal-Unjoni ta’ addittivi tal-ikel approvati għall-użu fl-ikel u l-kundizzjonijiet tal-użu tagħhom.

(2)

Il-lista tista’ tiġi emendata skont il-proċedura msemmija fir-Regolament (KE) Nru 1331/2008 tal-Parlament Ewropew u tal-Kunsill tas-16 ta’ Diċembru 2008 li jistabbilixxi proċedura ta’ awtorizzazzjoni komuni għall-addittivi tal-ikel, l-enżimi tal-ikel u l-aromatizzanti tal-ikel (2).

(3)

F’konformità mal-Artikolu 3(1) tar-Regolament (KE) Nru 1331/2008, il-lista tal-Unjoni ta’ addittivi tal-ikel tista’ tkun aġġornata fuq l-inizjattiva tal-Kummissjoni jew wara li titressaq applikazzjoni.

(4)

Applikazzjoni għall-awtorizzazzjoni tal-użu tal-esteri tal-Gliċerol ta’ raża tal-injam (E 445) bħala emulsifikant għall-istampar fuq prodotti tal-ħelu b’kisja iebsa tressqet u hija disponibbli għall-Istati Membri.

(5)

Bħalissal-preparazzjonijiet tal-kulur tal-ikel disponibbli li jintużaw għall-istampar fuq prodotti tal-ħelu b’kisja iebsa ma jippermettux kwalità biżżejjed għall-istampar ta’ kliem, logos u stampi. Ir-riċerka u l-iżvilupp identifikaw li l-użu tal-esteri tal-Gliċerol ta’ raża tal-injam (E 445) bħala emulsifikant fil-preparazzjonijiet tal-kulur tal-ikel ibbażati fuq l-ilma itejjeb it-taħlit u l-integrità tal-ingredjenti li jwasslu għal preparazzjoni iżjed omogenika li tagħti karatteristiċi tajbin ta’ twaħħil u kisi. Dan jiffaċilita l-istampar ta’ kliem bi kwalità għolja u ta’ stampi b’reżoluzzjoni għolja fuq prodotti tal-ħelu promozzjonali u/jew personalizzati b’kisja iebsa bil-ħsieb li jintużaw f’okkażjonijiet ta’ ċelebrazzjoni.

(6)

Ir-Rapport mingħand il-Kummissjoni dwar il-Konsum fid-Dieta ta’ Addittivi fl-Ikel fi ħdan l-Unjoni Ewropea (3) kkonkluda li l-esteri tal-gliċerol ta’ raża tal-injam (E 445) ma għandhomx bżonn jiġu eżaminati iżjed, peress li l-konsum teoretiku msejjes fuq preżunzjonijiet konservattivi dwar il-konsum tal-ikel u l-użu tal-addittivi (Tier 1) ma qabiżx id-doża aċċettabbli kuljum. L-ammont ta’ doża aċċettabbli kuljum kien stabbilit nhar id-19 ta’ Ġunju 1992 mill-Kumitat Xjentifiku għall-Ikel (4). Il-konsum addizzjonali msejjes fuq l-użu l-ġdid għall-istampar fuq prodotti tal-ħelu b’kisja iebsa ma jikkontribwixxix b’mod sinifikanti għall-konsum ġenerali. Għaldaqstant huwa xieraq li jitħalla l-użu tal-esteri tal-gliċerol ta’ raża tal-injam (E 445) bħala emulsifikant għall-istampar fuq prodotti tal-ħelu b’kisja iebsa.

(7)

F’konformità mal-Artikolu 3(2) tar-Regolament (KE) Nru 1331/2008, il-Kummissjoni trid titlob l-opinjoni tal-Awtorità Ewropea dwar is-Sigurtà fl-Ikel sabiex taġġorna l-lista tal-Unjoni ta’ addittivi tal-ikel msemmija fl-Anness II tar-Regolament (KE) Nru 1333/2008, għajr meta l-aġġornament inkwistjoni ma għandhiex effett fuq is-saħħa tal-bniedem. Peress li l-awtorizzazzjoni tal-użu tal-esteri tal-Gliċerol ta’ raża tal-injam (E 445) bħala emulsifikant għall-istampar fuq prodotti tal-ħelu b’kisja iebsa tikkostitwixxi aġġornament ta’ dik il-lista li ma għandhiex effett fuq is-saħħa tal-bniedem, mhuwiex meħtieġ li tintalab l-opinjoni tal-Awtorità Ewropea dwar is-Sigurtà fl-Ikel.

(8)

F’konformità mad-dispożizzjonijiet tranżitorji tar-Regolament tal-Kummissjoni (UE) Nru 1129/2011 tal-11 ta’ Novembru 2011 li jemenda l-Anness II tar-Regolament (KE) Nru 1333/2008 tal-Parlament Ewropew u tal-Kunsill billi tiġi stabbilixxa lista ta’ addittivi tal-ikel (5), l-Anness II li jistabbilixxi l-lista tal-Unjoni ta’ addittivi tal-ikel approvata għall-użu fl-ikel u l-kundizzjonijiet tal-użu japplika mill-1 ta’ Ġunju 2013. Sabiex jitħalla l-użu tal-esteri tal-Gliċerol ta’ raża tal-injam (E 445) għall-istampar fuq prodotti tal-ħelu b’kisja iebsa qabel dik id-data, huwa jeħtieġ li tiġi speċifika data iżjed bikrija ta’ applikazzjoni fir-rigward ta’ dan l-użu ta’ dak l-addittiv tal-ikel.

(9)

Għaldaqstant, l-Anness II tar-Regolament (KE) Nru 1333/2008 għandu jiġi emendat skont dan.

(10)

Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali u la l-Parlament Ewropew u lanqas il-Kunsill ma opponewhom,