4.4.2012   

MT

Il-Ġurnal Uffiċjali tal-Unjoni Ewropea

L 98/1


REGOLAMENT TA’ IMPLIMENTAZZJONI TAL-KUMMISSJONI (UE) Nru 293/2012

tat-3 ta’ April 2012

dwar il-monitoraġġ u r-rapportar ta’ dejta fuq ir-reġistrazzjoni ta’ vetturi kummerċjali ħfief ġodda skont ir-Regolament (UE) Nru 510/2011 tal-Parlament Ewropew u tal-Kunsill

(Test b’relevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) Nru 510/2011 tal-Parlament Ewropew u tal-Kunsill tal-11 ta' Mejju 2011 li jistabbilixxi standards ta’ rendiment [prestazzjoni] fir-rigward tal-emissjonijiet tal-vetturi kummerċjali ħfief ġodda bħala parti mill-approċċ integrat tal-Unjoni biex jitnaqqsu l-emissjonijiet ta’ CO2 minn vetturi ħfief (1), u b'mod partikolari l-ewwel sottoparagrafu tal-Artikolu 8(9) tiegħu,

Billi:

(1)

B’konformità mal-Artikolu 8 tar-Regolament (UE) Nru 510/2011, kull sena, l-Istati Membri jridu jirreġistraw u jittrasmettu ċerta dejta lill-Kummissjoni dwar vetturi kummerċjali ħfief ġodda rreġistrati fit-territorju tagħhom fis-sena preċedenti. Billi dik id-dejta għandha sservi ta’ bażi għad-determinazzjoni tal-mira speċifika tal-emissjonijiet ta’ CO2 għall-manifatturi ta’ vetturi kummerċjali ħfief ġodda, u sabiex jiġi vvalutat jekk il-manifatturi jikkonformawx jew le ma’ dawk il-miri, huwa meħtieġ li r-regoli dwar il-ġbir u r-rapportar ta’ dik id-dejta jiġu armonizzati.

(2)

Biex, fil-futur, il-vetturi tal-kategoriji M2 u N2 ikunu jistgħu jiġu inklużi fir-Regolament (UE) Nru 510/2011 skont l-Artikolu 13(2) tal-istess Regolament, id-dejta għal dawk il-kategoriji għandha tiġi rreġistrata u trasmessa lill-Kummissjoni.

(3)

Sabiex issir valutazzjoni sħiħa dwar jekk kull manifattur jikkonformax jew le mal-mira speċifika tal-emissjonijiet ta’ CO2, stabbilita skont ir-Regolament (UE) Nru 510/2011, u sabiex tinkiseb l-esperjenza meħtieġa għall-applikazzjoni ta’ dak ir-Regolament, il-Kummissjoni teħtieġ dejta dettaljata f’livell ta’ manifattur għal kull serje ta’ vettura definita skont it-tip, varjant u verżjoni. L-Istati Membri għandhom għalhekk jiżguraw li dejta bħal din tiġi rreġistrata u trasmessa lill-Kummissjoni flimkien mad-dejta aggregata skont l-Artikolu 8(2) ta’ dak ir-Regolament.

(4)

Skont l-Artikoli 18 u 26 tad-Direttiva 2007/46/KE tal-Parlament Ewropew u tal-Kunsill tal-5 ta’ Settembru 2007 li tistabbilixxi kwadru [qafas] għall-approvazzjoni ta’ vetturi bil-mutur u l-karrijiet tagħhom, u ta’ sistemi, komponenti u unitajiet tekniċi separati maħsuba għal tali vetturi (2), manifattur għandu jiżgura li kull vettura kummerċjali ħafifa ġdida li tinħareġ fis-suq fl-UE tkun akkumpanjata minn ċertifikat validu ta' konformità u Stat Membru ma jistax jirreġistra t-tali vettura jekk din ma jkollhiex dan iċ-ċertifikat ta' konformità. Għalhekk, iċ-ċertifikat ta’ konformità għandu jkun is-sors ewlieni tal-informazzjoni li l-Istati Membri jeħtieġilhom jirreġistraw, li jqiegħeduha wkoll għad-dispożizzjoni tal-manifatturi skont l-Artikolu 8(1) tar-Regolament (UE) Nru 510/2011 u li tiġi rrapportata lill-Kumissjoni. F’ċerti każijiet ġustifikati, l-Istati Membri jistgħu jużaw ukoll informazzjoni minn sorsi oħra, differenti miċ-ċertifikat ta’ konformità, sakemm il-preċiżjoni ta’ dawk is-sorsi tkun ekwivalenti għaċ-ċertifikat tal-konformità u, fejn meħtieġ, sakemm l-Istati Membri kkonċernati jdaħħlu fis-seħħ miżuri li jiżguraw il-preċiżjoni.

(5)

Id-dejta dwar ir-reġistrazzjoni ta’ vetturi kummerċjali ħfief ġodda għandha tkun preċiża u għandha tiġi pproċessata b’mod effettiv sabiex tiġi stabbilita l-mira speċifika tal-emissjonijiet skont l-Artikolu 4 tar-Regolament (UE) Nru 510/2011. Għalhekk, il-manifatturi għandhom jipprovdu lill-Kummissjoni b’informazzjoni aġġornata dwar l-ismijiet tal-manifatturi li jintużaw fuq iċ-ċertifikati ta’ konformità fid-diversi Stati Membri li fihom issir ir-reġistrazzjoni. Permezz ta' dik l-informazzjoni l-Kummissjoni tkun tista' tipprovdi lill-Istati Membri l-lista aġġornata tal-ismijiet tal-manifatturi magħżula li għandha tintuża għall-għan ta' rapportar tad-dejta.

(6)

L-Istati Membri għandhom jirreġistraw u jirrapportaw informazzjoni dwar vetturi li jkun għadhom kif ġew irreġistrati u li jkunu ddisinjati li jużaw fjuwils alternattivi. L-Istati Membri għandhom jipprovdu lill-Kummissjoni bl-informazzjoni meħtieġa li tinkludi l-proporzjon tal-pompi tal-fjuwil fit-territorju tagħhom u, fejn applikabbli, l-għadd totali ta' dawk li jipprovdu l-fjuwil etanol (E85) li jissodisfaw l-kriterji ta' sostenibbiltà stabbiliti bid-Direttiva tal-Parlament Ewropew u tal-Kunsill Nru 2009/28/KE tat-23 ta' April 2009 dwar il-promozzjoni tal-użu tal-enerġija minn sorsi rinnovabbli u li temenda u sussegwentement tħassar id-Direttivi 2001/77/KE u 2003/30/KE (3), u fl-Artikolu 7b tad-Direttiva tal-Parlament Ewropew u tal-Kunsill Nru 98/70/KE tat-13 ta' Ottubru 1998 dwar il-kwalità tal-karburanti tal-petrol u tad-diżil u li temenda d-Direttiva tal-Kunsill Nru 93/12/KEE (4), sabiex il-Kummissjoni tkun tista' tqis it-tnaqqis għall-mira speċifika tal-emissjonijiet minħabba l-użu tal-fjuwil tal-etanol (E85) skont l-Artikolu 6 tar-Regolament (UE) Nru 510/2011.

(7)

Sabiex tiġi evitata r-ripetizzjoni bla bżonn tad-dejta, l-informazzjoni dwar l-għadd tal-pompi tal-fjuwil fit-territorju rispettiv tal-Istati Membri li jipprovdu l-fjuwil etanol (E85) li tingħata skont l-Artikolu 6 tar-Regolament tal-Kummissjoni (UE) Nru 1014/2010 tal-10 ta’ Novembru 2010 dwar il-monitoraġġ u r-rapportar ta’ dejta fuq ir-reġistrazzjoni ta’ karozzi ġodda tal-passiġġieri skont ir-Regolament (KE) Nru 443/2009 tal-Parlament Ewropew u tal-Kunsill (5) għandha tintuża għall-fini tal-Artikolu 6 tar-Regolament (UE) Nru 510/2011.

(8)

L-Artikoli 23 u 24 tad-Direttiva 2007/46/KE jipprovdu għal proċedura tal-approvazzjoni simplifikata li għaliha mhux meħtieġ li jinħareġ ċertifikat ta' konformità Ewropew. L-Istati Membri għandhom jimmonitorjaw l-għadd ta' vetturi reġistrati skont dawk il-proċeduri sabiex ikunu jistgħu jivvalutaw l-impatt tagħhom fuq il-proċess ta' monitoraġġ u fuq l-ilħiq tal-mira medja tal-emissjonijiet ta’ CO2 tal-UE għall-flotta ta’ vetturi kummerċjali ħfief ġodda.

(9)

Il-miżuri stipulati f’dan ir-Regolament ta’ Implimentazzjoni huma skont l-opinjoni tal-Kumitat dwar it-Tibdil fil-Klima,

ADOTTAT DAN IR-REGOLAMENT:

Artikolu 1

Suġġett

Dan ir-Regolament jistabbilixxi r-regoli għall-ġbir u r-rapportar ta’ dejta dwar ir-reġistrazzjoni ta’ dawn il-vetturi:

(a)

vetturi kummerċjali ħfief kif imsemmija fl-Artikolu 2(1) tar-Regolament (UE) Nru 510/2011;

(b)

vetturi tal-kategoriji M2 u N2 kif imsemmija fl-Artikolu 8(10) ta’ dak ir-Regolament.

Artikolu 2

Definizzjonijiet

Għall-fini ta’ dan ir-Regolament, għandhom japplikaw id-definizzjonijiet stabbiliti fl-Artikoli 2 u 3 tar-Regolament (UE) Nru 510/2011 kif ukoll id-definizzjonijiet ta’ “vettura li tieħu żewġ gassijiet tal-fjuwil” u ta’ “vettura flex fuel li tieħu l-etanol” stabbiliti fl-Artikolu 2 tar-Regolament tal-Kummissjoni (KE) Nru 692/2008 (6). Għandhom japplikaw ukoll id-definizzjonijiet li ġejjin:

(1)

“dokumentazzjoni tal-approvazzjoni tat-tip” tfisser id-dokumenti li jinkludu dejta speċifikata fit-tielet kolonna tat-tabella stabbilita fl-Anness I għal dan ir-Regolament;

(2)

“dejta ta’ monitoraġġ aggregata” tfisser id-dejta aggregata speċifikata fit-Taqsima 1 tal-Parti C tal-Anness II għar-Regolament (UE) Nru 510/2011;

(3)

“dejta ta’ monitoraġġ dettaljata” tfisser id-dejta dettaljata speċifikata fit-Taqsima 2 tal-Parti C tal-Anness II għar-Regolament (UE) Nru 510/2011 li hija disaggregata skont il-manifattur u s-serje tal-vettura kif definit mit-tip, varjant u verżjoni.

Artikolu 3

It-trasmissjoni tad-dejta

Id-dejta ta’ monitoraġġ aggregata flimkien mad-dejta ta’ monitoraġġ dettaljata għandhom jiġu trasmessi mill-Istat Membru permezz ta’ trasferiment elettroniku tad-dejta għar-Repożitorju Ċentrali tad-Dejta ġestit mill-Aġenzija Ewropea għall-Ambjent. L-Istati Membri għandhom jgħarrfu lill-Kummissjoni meta d-dejta tiġi trasmessa.

Artikolu 4

Sorsi ta' dejta

1.   L-Istati Membri għandhom iħejju d-dejta ta’ monitoraġġ aggregata u d-dejta ta’ monitoraġġ dettaljata skont l-informazzjoni li tidher fiċ-ċertifikat ta’ konformità jew fid-dokumentazzjoni tal-approvazzjoni tat-tip tal-vettura kummerċjali ħafifa rilevanti kif speċifikat fit-tabella fl-Anness I għal dan ir-Regolament.

2.   Il-parametru “għadd totali ta’ reġistrazzjonijiet ġodda” fid-dejta ta' monitoraġġ dettaljata għandu jiġi determinat mill-għadd totali ta’ rekords tar-reġistrazzjoni li jinħolqu kull sena u li jkunu rilevanti għal kull vettura waħda.

3.   Il-parametru “kategorija tal-vettura reġistrata” fid-dejta ta' monitoraġġ dettaljata għandu jkun ibbażat fuq il-karatteristiċi tekniċi tal-vettura fil-ħin tar-reġistrazzjoni.

4.   Meta jkun hemm iktar minn isem ta’ manifattur wieħed fuq iċ-ċertifikat ta’ konformità jew fid-dokumentazzjoni tal-approvazzjoni tat-tip, l-Istat Membru għandu jirrapporta lill-manifattur dwar il-vettura bażi.

5.   Il-valuri tal-emissjonijiet ta’ CO2 li għandhom jiġu rrapportati skont il-parametru “emissjonijiet speċifiċi ta’ CO2” fid-dejta ta’ monitoraġġ dettaljata għandhom jittieħdu mill-entrata “ikkombinat” fiċ-ċertifikat ta’ konformità jew fid-dokumentazzjoni tal-approvazzjoni tat-tip, ħlief fil-każ fejn tapplika l-entrata għal “ippeżat (bil-komponenti ta’ medja ta’ fatturi) u kkombinat”.

6.   Fir-rapportar dwar vetturi bi fjuwil alternattiv fid-dejta ta’ monitoraġġ dettaljata, l-awtorità kompetenti għandha tipprovdi t-tip u l-modalità tal-fjuwil kif speċifikat fl-Anness I għal dan ir-Regolament.

7.   Fil-każ ta’ vetturi li jieħdu żewġ fjuwils jew vettura flex fuel li tieħu l-etanol l-awtorità kompetenti għandha tirrapporta l-valuri tal-emmissjonijiet ta’ CO2 li ġejjin taħt il-parametru “emissjonijiet speċifiċi ta’ CO2 (g/km)” fid-dejta ta’ monitoraġġ dettaljata:

(a)

għal vetturi li jieħdu żewġ gassijiet ta’ fjuwil li jużaw il-petrol u fjuwils gassużi, il-valur tal-emissjonijiet ta’ CO2 għall-gass tal-petroleum likwifikat (LPG) jew għall-gass naturali (NG) skont il-punt 2 fil-Parti A tal-Anness II għar-Regolament (UE) Nru 510/2011;

(b)

għal vetturi flex fuel li jieħdu l-etanol li jużaw petrol u fjuwil tal-etanol (E85) imsemmi fl-Artikolu 6 tar-Regolament (KE) Nru 510/2011, il-valur tal-emissjoni ta’ CO2 għall-petrol.

Fil-każ tal-punt (b), l-Istati Membri għandhom jirrapportaw il-valur tal-petrol, anke meta l-kundizzjonijiet għat-tnaqqis stabbiliti fl-Artikolu 6 tar-Regolament (UE) Nru 510/2011 ma jiġux issodisfati. Madankollu, l-Istati Membri jistgħu jirrapportaw ukoll il-valur E85.

8.   Fejn il-vettura jkollha aktar minn fus direzzjonali wieħed jew aktar minn fus mhux direzzjonali wieħed bil-wisa’ ta’ bejn il-fusien differenti, l-Istati Membri għandhom jirrapportaw il-wisa’ massimu tal-fus taħt il-parametru “Il-wisa’ ta’ bejn ir-roti ta’ fusien ta’ tip differenti (mm)” fid-dejta ta’ monitoraġġ dettaljata. Id-distanza ta’ bejn il-fusien għal dawn il-vetturi għandha tkun id-distanza bejn il-fus estern ta’ quddiem u l-fus estern ta’ wara.

9.   Meta d-dejta ta’ monitoraġġ aggregata u d-dejta ta’ monitoraġġ dettaljata jittieħdu mid-dokumentazzjini tal-approvazzjoni tat-tip, u meta dik id-dejta tinkludi firxiet ta’ valuri, l-Istati Membri għandhom jiżguraw li d-dejta rrapportata tipprovdi l-preċiżjoni adegwata, u li tkun konformi mad-dejta li tinsab fiċ-ċertifikat ta’ konformità.

Artikolu 5

Żamma u kontroll tad-dejta

L-Istati Membri għandhom jiżguraw iż-żamma, il-ġbir, il-kontroll, il-verifika u t-trasmissjoni tad-dejta ta’ monitoraġġ aggregata u tad-dejta ta’ monitoraġġ dettaljata.

Artikolu 6

Preparazzjoni tad-dejta mill-Istati Membri

Id-dejta ta’ monitoraġġ dettaljata għandha tiġi rrapportata bil-preċiżjoni stabbilita fl-Anness II.

Artikolu 7

Rapportar tal-pompi tal-fjuwil li jfornu l-fjuwil tal-etanol (E85)

Għall-fini tal-Artikolu 6 tar-Regolament (UE) Nru 510/2011, għandha tintuża l-informazzjoni rrapportata skont l-Artikolu 6 tar-Regolament (UE) Nru 1014/2010.

Artikolu 8

Vetturi li mhumiex koperti mill-approvazzjoni tat-tip KE

1.   Meta l-vetturi kummerċjali ħfief ikunu soġġetti għall-approvazzjoni tat-tip nazzjonali ta’ serje żgħira skont l-Artikolu 23 tad-Direttiva Nru 2007/46/KE jew għal approvazzjonijiet individwali skont l-Artikolu 24 ta’ dik id-Direttiva, l-Istati Membri għandhom jinformaw lill-Kummissjoni dwar l-għadd rispettiv ta’ dawn il-karozzi rreġistrat fit-territorju tagħhom.

2.   Fil-proċess tal-ġbir tad-dejta ta’ monitoraġġ aggregata l-awtorità kompetenti għandha tindika wieħed minn dawn, minflok l-isem tal-manifattur:

(a)

"AA-IVA" għar-rapportar ta' tipi ta' vetturi approvati individwalment;

(b)

“AA-NSS” għar-rapportar ta’ tipi ta’ vetturi approvati f’serje żgħira b’mod nazzjonali.

L-Istati Membri jistgħu jiġbru wkoll id-dejta ta’ monitoraġġ dettaljata minn dawn il-vetturi, u f’dak il-każ għandhom jużaw id-denominazzjonijiet imsemmija fil-punti (a) u (b).

Artikolu 9

Lista tal-manifatturi

1.   Il-manifatturi għandhom jinnotifikaw lill-Kummissjoni bla dewmien u mhux aktar tard mill-1 ta’ Ġunju 2012 bl-ismijiet li huma jindikaw jew li jkollhom l-intenzjoni jindikaw fuq iċ-ċertifikati ta’ konformità. Huma għandhom jinnotifikaw lill-Kummissjoni bla dewmien dwar kwalunkwe tibdil f’dik l-informazzjoni. Il-manifatturi ġodda li jidħlu fis-suq għandhom jinnotifikaw lill-Kummissjoni bla dewmien dwar l-ismijiet li jindikaw jew li jkollhom l-intenzjoni jindikaw fuq iċ-ċertifikati ta’ konformità.

2.   Fil-ġbir tad-dejta ta’ monitoraġġ aggregata u tad-dejta ta’ monitoraġġ dettaljata, l-awtorità kompetenti għandha tuża l-ismijiet tal-manifatturi meħudin mil-lista li għandha tiġi mfassla mill-Kummissjoni abbażi tal-ismijiet notifikati skont il-paragrafu 1. Din il-lista għanda tiġi ppubblikata fuq l-Internet għall-ewwel darba fl-1 ta’ Settembru 2012 u għandha tiġi aġġornata regolarment.

3.   Fil-każ li l-isem tal-manifattur ma jkunx inkluż f'dik il-lista, l-awtorità kompetenti għandha tuża l-isem ta' fuq iċ-ċertifikat ta' konformità jew tad-dokumentazzjoni tal-approvazzjoni tat-tip sabiex id-dejta ta' monitoraġġ aggregata u d-dejta ta' monitoraġġ dettaljata jkunu jistgħu jinġabru.

Artikolu 10

Informazzjoni addizzjonali li trid tingħata mill-manifatturi

1.   Għall-fini tan-notifika msemmija fit-tieni subparagrafu tal-Artikolu 8(4) tar-Regolament (UE) Nru 510/2011, sa mhux aktar tard mill-1 ta’ Ġunju 2012, il-manifatturi għandhom jinfurmaw lill-Kummissjoni dwar l-isem u l-indirizz rilevanti tal-persuna ta’ kuntatt li lilha trid tiġi indirizzata n-notifika.

Il-manifattur għandu jinforma lill-Kummissjoni bla dewmien dwar kwalunkwe tibdil fid-dejta pprovduta. Manifatturi ġodda li jidħlu fis-suq għandhom jinformaw lill-Kummissjoni bla dewmien dwar id-dettalji tal-kuntatt tagħhom.

2.   Fil-każ li grupp ta' intrapriżi relatati bejniethom jifformaw għaqda, din l-għaqda għandha tipprovdi evidenza tar-rabta ta' bejn il-membri tal-grupp sabiex tkun tista' tiġi ddeterminata l-applikabbiltà tal-Artikolu 7(6) tar-Regolament (UE) Nru 510/2011, skont il-kriterji stabbiliti mill-Artikolu 3(2) ta' dak ir-Regolament.

Artikolu 11

Dħul fis-seħħ

Dan ir-Regolament għandu jidħol fis-seħħ fit-tielet jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, it-3 ta’ April 2012.

Għall-Kummissjoni

Il-President

José Manuel BARROSO


(1)   ĠU L 145, 31.5.2011, p. 1.

(2)   ĠU L 263, 9.10.2007, p. 1.

(3)   ĠU L 140, 5.6.2009, p. 16.

(4)   ĠU L 350, 28.12.1998, p. 58.

(5)   ĠU L 293, 11.11.2010, p. 15.

(6)   ĠU L 199, 28.7.2008, p. 1.


ANNESS I

SORSI TA' DATA

Parametru

Ċertifikat ta' konformità

(Parti 1, stabbilit fl-Anness IX għad-Direttiva 2007/46/KE)

Dokumentazzjoni tal-approvazzjoni tat-tip

(Direttiva 2007/46/KE)

Manifattur

Taqsima 0.5

Taqsima 0.5 tal-Parti 1 tal-Anness III

Numru ta' approvazzjoni tat-tip:

Taqsima 0.10(b)

Titolu tal-Anness VI

Tip

Taqsima 0.2

Taqsima 0.2 tal-Parti 1 tal-Anness III

Varjant

Taqsima 0.2

Taqsima 3 tal-Anness VIII

Verżjoni

Taqsima 0.2

Taqsima 3 tal-Anness VIII

Għamla

Taqsima 0.1

Taqsima 0.1 tal-Parti 1 tal-Anness III

Kategorija ta’ vettura tat-tip approvat

Taqsima 0.4

Taqsima 0.4 tal-Parti 1 tal-Anness III

Massa (kg)

Taqsima 13

Taqsima 2.6 tal-Parti 1 tal-Anness III (1)

Piżijiet massimi mgħobbija teknikament permissibbli (kg)

Taqsima 16.1

Taqsima 2.8 tal-Parti 1 tal-Anness III

Impronta – it-tul bejn il-fusien (Wheel base) (mm)

Taqsima 4

Taqsima 2.1 tal-Parti 1 tal-Anness III (1)

Impronta – il-wisa' bejn ir-roti (Track width) (mm)

Taqsima 30

Taqsima 2.3.1 u 2.3.2 tal-Parti 1 tal-Anness III (2)

Emissjonijiet speċifiċi ta’ CO2 (g/km) (3)

Taqsima 49.1

Taqsima 3 tal-Anness VIII

Tip ta’ fjuwil

Taqsima 26

Taqsima 3.2.2.1 tal-Parti 1 tal-Anness III

Modalità ta' fjuwil

Taqsima 26.1

Taqsima 3.2.2.4 tal-Parti 1 tal-Anness III

Kapaċità tal-magna (cm3)

Taqsima 25

Taqsima 3.2.1.3 tal-Parti 1 tal-Anness III

Konsum ta' enerġija elettrika (Wh/km)

Taqsima 49.2

 


(1)  Skont l-Artikolu 4(9) ta’ dan ir-Regolament.

(2)  Skont l-Artikoli 4(8) u (9) ta’ dan ir-Regolament.

(3)  Skont l-Artikolu 4(5) ta’ dan ir-Regolament.


ANNESS II

TABELLA DWAR IL-PREĊIŻJONI TAD-DEJTA

Il-preċiżjoni meħtieġa għad-dejta ta’ monitoraġġ dettaljata li għandha tiġi rrapportata skont l-Artikolu 6

CO2 (g/km)

numru sħiħ

Massa (kg)

numru sħiħ

Piżijiet massimi mgħobbija teknikament permissibbli (kg)

numru sħiħ

Impronta – it-tul bejn il-fusien (Wheel base) (mm)

numru sħiħ

Impronta – il-wisa' bejn ir-roti (Track width) (mm)

numru sħiħ

Kapaċità tal-magna (cm3)

numru sħiħ

Konsum ta' enerġija elettrika (Wh/km)

numru sħiħ

Tnaqqis tal-emissjonijiet permezz tat-teknoloġiji innovattivi (g/km)

jiġi aġġustat għall-eqreb punt deċimali