ANNESS I

L-emendi li ġejjin għall-ispeċifikazzjoni tad-denominazzjoni protetta tal-oriġini “Queso Manchego” ġew approvati:

Materja prima

B’rabta mal-karatteristiċi analitiċi tal-ħalib, ġew aġġornati l-parametri ta’ referenza b’konsegwenza tat-testijiet sistematiċi applikati mil-laboratorju uffiċjali, fejn jintbagħtu l-kampjuni miġbura mill-azjendi tat-trobbija. Il-kontenut u d-densità tal-lattożju mhux se jibqgħu jiġu ddeterminati għaliex dawn m’għandhomx x’jaqsmu mal-kwalità tal-prodott aħħari, u l-analiżi tagħhom kienet tissejjes fuq metodu ta’ produzzjoni li m’għadux jirrifletti l-iżviluppi li saru fl-azjendi tat-trobbija.

Min-naħa l-oħra, il-kejl tal-aċidità tal-ħalib isir bid-determinazzjoni tal-livell tal-pH u mhux fi gradi Dornic, u għaldaqstant sar tibdil xieraq fl-ispeċifikazzjonijiet.

Barra minn hekk, b’konsegwenza tal-progress teknoloġiku li sar fl-industriji tal-produzzjoni, il-proċess isir b’livell ogħla ta’ kontroll f’dak li jirrigwarda l-parametri deċiżivi għall-kwalità aħħarija, u b’hekk għal ċerti stadji tal-produzzjoni l-verżjoni l-qadima tal-ispeċifikazzjoni m’għadhiex tgħodd.

Skont dan kollu, qed tiġi emendata t-taqsima li ġejja:

Taqsima E –   Il-metodu ta’ produzzjoni

Fl-istadju ta’ “qtugħ il-baqta”, tneħħa l-kriterju tad-daqs tal-granuli tal-baqta li jinkisbu mal-qtugħ tagħha, għax jitqies li dan il-kriterju għandu jiġi stabbilit minn kull industrija skont il-proċess li ssegwi. Il-baqta għandu jkollha l-konsistenza xierqa biex isir tqattir sewwa, skont it-tip tal-ġobon prodott. Dan ma għandux jiġi ddeterminat mill-indikazzjoni tad-daqs preċiż tal-granuli, iżda permezz ta’ kontrolli waqt il-produzzjoni, kif ukoll bl-esperjenza tal-produttur.

Fl-istadju tal-“ippressar”, ġie inkluż il-ħin stabbilit għall-ippressar; li fl-ispeċifikazzjoni attwali dan jissemma fl-istadju tat-tneħħija minn ġol-forom, u dan huwa żball. Qed jiġi ddefinit ħin ta’ ppressar ta’ bejn siegħa u sitt sigħat. Din il-firxa ta’ ħin għall-ippressar inbidlet minn dik stabbilita inizjalment, minħabba l-avvanzi teknoloġiċi li saru fis-sistema tal-ippressar, li m’għadhiex teħtieġ perjodi daqstant twal li jistgħu jolqtu ħażin il-prodott meta jkun ta’ daqs żgħir. Dan il-perjodu qed jiġi ddefinit bħala xieraq għal kull daqs differenti tal-prodott u għal kull mudell ta’ ppressar, u b’hekk l-operatur jista’ jiddefinixxi l-aqwa mument għat-tneħħija tal-prodott minn ġol-forom u għat-tmelliħ tiegħu. Dan il-mument għandu jiġi ddeterminat mhux skont l-għadd ta’ sigħat meħudin, iżda billi jitkejjel il-pH, li huwa l-valur li jindika l-qagħda tal-prodott.

L-istadji tal-“maturazzjoni” u l-“preżervazzjoni” tgħaqqdu fi stadju għalih - il-“maturazzjoni”. L-istadju tal-preżervazzjoni tneħħa għax il-maturazzjoni ma tiqafx meta l-prodott jiddaħħal fil-kmamar tal-preżervazzjoni; jiġifieri, il-maturazzjoni tkompli tul il-ħajja tal-prodott, u jkompli jimmatura dejjem jekk jinżamm f’kundizzjonijiet ta’ temperatura u umdità relattiva kkontrollati. Għaldaqstant, iż-żewġ stadji tgħaqqdu f’wieħed, u ġiet stabbilita temperatura ta’ bejn 3 °C u 16 °C u umdità ta’ bejn 75 % u 90 %.

Fejn tidħol it-temperatura, il-valur minimu nbidel minn 1 °C għal 3 °C, temperatura li hija iktar xierqa biex jinżamm il-prodott u li tiggarantixxi r-rispett tar-rekwiżiti tas-saħħa (billi bit-temperatura ta’ 1 °C il-prodott jista’ jitħassar). Għall-valur massimu, ġiet stabbilita t-temperatura ta’ 16 °C bħala l-valur ta’ referenza sabiex tiggarantixxi l-maturazzjoni tal-prodott u l-iżvilupp tiegħu fl-aqwa kundizzjonijiet għall-karatteristiċi organolettiċi tiegħu.

Il-firxa stabbilita għall-umdità hija valur globali li jgħodd għaż-żewġ stadji li huma.

ANNESS II

DOKUMENT UNIKU

IR-REGOLAMENT TAL-KUNSILL (KE) Nru 510/2006

“QUESO MANCHEGO”

Nru tal-KE: ES-PDO-0217-0087-6.12.2010

IĠP ( ) DPO ( X )

1.   L-isem

“Queso Manchego”

2.   Stat Membru

Spanja

3.   Deskrizzjoni tal-prodott agrikolu jew tal-oġġett tal-ikel

3.1.   Tip ta’ prodott

Klassi 1.3.

Ġobon.

3.2.   Deskrizzjoni tal-prodott li għalih japplika l-isem f’(1)

Ġobon ippressat magħmul mill-ħalib tan-nagħġa tar-razza “Manchega”, immaturat għal tal-anqas 30 jum fil-każ ta’ ġobniet li jiżnu sa 1,5 kg, u għal bejn 60 jum u massimu ta’ sentejn fil-każ ta’ ġobniet akbar.

Il-“Queso Manchego” jista’ jiġi magħmul kemm b’ħalib pasturizzat kif ukoll b’ħalib mhux ipproċessat. Fit-tieni każ, it-tikketta tista’ ġġorr it-terminu “Artesano” (artiġjanali).

Il-“Queso Manchego” huwa ġobon xaħmi, li wara l-maturazzjoni jikseb dawn il-karatteristiċi fiżiċi:

—	għamla: ċilindrika b’wiċċ ċatt,

—	għoli massimu: 12 cm,

—	dijametru massimu: 22 cm,

—	proporzjon tad-dijametru/tal-għoli: bejn 1,5 u 2,2,

—	piż minimu: 0,4 kg,

—	piż massimu: 4,0 kg,

Il-karatteristiċi fiżikokimiċi tal-ġobon huma kif ġej:

—	pH 4,8 sa 5,8,

—	materja niexfa: minimu ta’ 55 %,

—	xaħam: minimu ta’ 50 % tal-materja niexfa,

—	total ta’ proteina fil-materja niexfa: minimu ta’ 30 %,

—	klorur tas-sodju: massimu ta’ 2,3 %.

Karatteristiċi tat-taħlita:

—	konsistenza: soda u kompatta,

—	kulur: ivarja mill-abjad sa lewn l-avorju jagħti fl-isfar,

—	riħa: tal-ħalib, intensament qarsa u persistenti, bi sfumaturi pikkanti li jibqgħu jiżdiedu fil-ġobniet immaturati għal żmien twil,

—	togħma: kemxejn qarsa, qawwija u mimlija, li ssir pikkanti f’ġobniet immaturati għal żmien twil. il-ħalib tan-nagħaġ tar-razza “Manchega” jħalli togħma residwali pjaċevoli u partikulari,

—	dehra: ħoloq żgħar imqassmin b’mod mhux uniformi, għalkemm jista’ jagħti l-każ li ma jkunux preżenti.

—	konsistenza: elastiċità baxxa li għandha mill-butir u mid-dqiq; f’ġobniet immaturati ħafna taf issir imrammla.

Il-limiti mikrobijoloġiċi huma kif ġej:

—	Escherichia coli: massimu ta’ 1 000 kolonja f’kull gramma,

—	Staphylococcus aureus: massimu ta’ 100 kolonja f’kull gramma,

—	Salmonella: assenza f’25 gramma,

—	Listeria: assenza f’25 gramma.

Il-ġobon itiegħem kemxejn qares, qawwi u mimli, u jsir pikkanti meta mmaturat għal żmien twil. Il-ħalib tan-nagħaġ tar-razza “Manchega” jħalli togħma residwali pjaċevoli u partikulari.

3.3.   Materja prima (għall-prodotti pproċessati biss)

Il-“Queso Manchego” jsir bil-ħalib tan-nagħaġ tar-razza “Manchega”, bit-tames naturali jew enżimi koagulanti oħrajn awtorizzati, u bil-klorur tas-sodju.

Il-ħalib għandu jkun għalkollox nieqes minn prodotti mediċinali, li jistgħu jolqtu ħażin il-produzzjoni, il-maturazzjoni u l-preżervazzjoni tal-ġobon.

Il-“Queso Manchego” jista’ jiġi magħmul kemm b’ħalib pasturizzat kif ukoll b’ħalib mhux ipproċessat. Fit-tieni każ, it-tikketta jaf iġġorr l-isem “Artesano”.

Il-karatteristiċi analitiċi tal-ħalib huma kif ġej:

—	xaħam: minimu ta’ 6.5 %,

—	proteini: minimu ta’ 4.5 %,

—	materja niexfa li tista’ tintuża: minimu ta’ 11 %,

—

pH 6,5-7,

—	temperatura tal-iffriżar: ≤ -0,550 °C

3.4.   Għalf (għall-prodotti li ġejjin mill-annimali biss)

In-nagħaġ tar-razza “Manchega” jirgħa u jgawdi mir-riżorsi naturali tar-reġjun matul is-sena kollha. Meta jkun fil-maqjel, id-dieta tiegħu tiġi supplimentata b’għalf ikkonċentrat, bil-ħuxlief u bi prodotti sekondarji.

Fejn tidħol it-trobbija tan-nagħaġ, ta’ min jissemmew it-tipi ta’ mergħa li jinsabu fil-wesgħat tal-isteppa tal-blat (matorrales), li jinkludu: Mendicago mínima, Scorpirus subillosa, Astrafalus stella, Astrafalus sesamus, eċċ.

L-hekk imsejħa “madajales” huma l-aktar mergħat ta’ siwi għan-nagħaġ. Dawn huma magħmulin minn mergħat bil-basla u kwantitajiet sinifikanti ta’ legumi, bħal Mendicago rigidula, Medicago lupulina, Mendicago trunculata, Trigonella polyderata, Coronilla scorpoides, eċċ.

Fil-wiċċ tal-ħamrija profonda u aktar friska jistgħu jidhru l-“fenelares”, li huma mergħat sfieq bi prevalenza ta’ pjanti perenni u bijennali, fosthom partikularment il-ħaxixa Brachypodium phoenicoides.

3.5.   Stadji speċifiċi fil-produzzjoni li għandhom isiru fiż-żona ġeografika ddefinita

—

3.6.   Regoli speċifiċi dwar it-tqattigħ, it-tħakkik, l-ippakkjar, eċċ.

Il-ġobniet protetti mid-Denominazzjoni tal-Oriġini “Queso Manchego” jistgħu jiġu ttrasportati u jitqiegħdu fis-suq mill-azjendi li jipproduċu l-ġobon u mill-impriżi rreġistrati biss f’kontenituri li ma jaffettwawx il-kwalità tagħhom.

Il-“Queso Manchego” għandu jiġi kkummerċjalizzat dejjem bil-qoxra, li tista’ tkun ġiet maħsula minn qabel.

Barra minn hekk, il-“Queso Manchego” jista’ jinkesa bil-paraffin jew b’sustanzi oħra trasparenti u inattivi awtorizzati legalment, jew inkella jintbell fiż-żejt taż-żebbuġa, dejjem jekk il-qoxra żżomm il-lewn u d-dehra naturali tagħha u t-tikketta tal-kaseina tibqa’ tinqara.

Fl-ebda każ ma għandhom jintużaw sustanzi li jsewdu l-qoxra.

Il-“Queso Manchego” jista’ jiġi kkummerċjalizzat imqatta’ f’biċċiet, imfettet jew maħkuk, dejjem jekk ikun ippakkjat u l-oriġini tiegħu tista’ tiġi identifikata. Din l-operazzjoni tista’ ssir barra miż-żona tal-oriġini minn impriżi li jkunu aċċettaw u huma konformi mal-protokoll stabbilit, bil-għan li l-proċeduri li jgħaddi minnhom il-“Queso Manchego” jkunu garantiti u traċċabbli.

Il-kontenituri użati għandhom ikunu konformi mal-leġiżlazzjoni fis-seħħ.

3.7.   Regoli speċifiċi dwar it-tikkettar

Huwa obbligatorju li fuq it-tikketta jidher il-kliem li ġej: Denominación de Origen “Queso Manchego” (Denominazzjoni tal-Oriġini “Queso Manchego”). Jekk il-ġobon ikun sar mill-ħalib nej, dan jista’ jiġi indikat fuq it-tikketta permezz tal-kelma “Artesano” (artiġjanali).

Il-prodott maħsub għall-konsum għandu jkollu tikketta oħra b’numru maħruġa mill-Bord Regolatorju, li titwaħħal mill-impriżi reġistrati b’mod li ma tistax tintuża mill-ġdid. Barra minn hekk, kull ġobna tal-“Queso Manchego” għandu jkollha fuq naħa waħda tikketta tal-kaseina b’numru tas-serje, li titwaħħal fl-istadju tal-għoti tal-għamla u l-ippressar tal-ġobna.

4.   Definizzjoni fil-qosor taż-żona ġeografika

L-entitajiet lokali koperti mid-Denominazzjoni tal-Oriġini “Queso Manchego” huma: 45 mill-provinċja ta’ Albacete, 84 mill-provinċja ta’ Ciudad Real, 156 mill-provinċja ta’ Cuenca u 122 mill-provinċja ta’ Toledo.

Iż-żoni li ġejjin ġew inklużi wkoll: Alcoba de los Montes u El Robledo, fil-provinċja ta’ Ciudad Real; Albadalejo del Cuende, Villarejo de la Peñuela, Villarejo-Sobrehuerta u Villar del Horno, fil-provinċja ta’ Cuenca.

5.   Rabta maż-żona ġeografika

5.1.   Speċifiċità taż-żona ġeografika

Ir-reġjun naturali ta’ La Mancha jinsab fin-naħa tan-Nofsinhar tal-plateau ċentrali tal-peniżola, u huwa kkaratterizzat minn riliev baxx li jinżel sal-Atlantiku.

La Mancha hija altipjan b’ħamrija taflija u b’ħafna ġir, u l-mergħat tagħha huma magħmula minn substrati għanja fil-ġir u fil-lom.

Iż-żona għandha klima estrema u tesperjenza varjazzjonijiet wesgħin karatteristiċi ta’ klima kontinentali, bi xtiewi kesħin ħafna u sjuf sħan. It-temperatura xi kultant tilħaq 40 °C, xi drabi tvarja b’20 °C matul il-ġurnata u b’50 °C matul is-sena. Fiż-żona hemm nuqqas ta’ xita, u dan jagħmel ir-reġjun wieħed mill-iktar żoni nexfin fi Spanja. L-ambjent estremament xott taż-żona għandu umdità relattiva ta’ madwar 65 %.

Ir-razza “Manchega” hija l-aktar waħda adattata għall-kundizzjonijiet tat-temp u tal-ħamrija ta’ La Mancha.

5.2.   Speċifiċità tal-prodott

Ġobon ippressat, bil-qoxra iebsa u b’kompożizzjoni wtiqa u kompatta, ta’ lewn li jvarja bejn l-abjad u kulur l-avorju jagħti fl-isfar, b’riħa intensa u persistenti, b’togħma kemxejn qarsa, qawwija u mimlija, u b’elastiċità baxxa li għandha mill-butir u mid-dqiq.

5.3.   Rabta kawżali bejn iż-żona ġeografika u l-kwalità jew il-karatteristiċi tal-prodott (għad-DPO) jew il-kwalità speċifika, ir-reputazzjoni jew karatteristiċi oħra speċifiċi tal-prodott (għall-IĠP)

Il-kundizzjonijiet tat-temp u tal-ħamrija tar-reġjun kellhom influwenza kbira fuq il-proċessi tas-selezzjoni naturali, li wasslu biex ir-razza “Manchega” tkun l-aktar razza tan-nagħaġ adattata għar-reġjun. B’hekk, dan in-nagħaġ jipproduċi ħalib li jagħti lill-“Queso Manchego” l-lewn, ir-riħa, it-togħma u l-konsistenza partikulari tiegħu.

Il-ġobon ilu jsir mill-ħalib tan-nagħaġ tar-razza “Manchega” mill-qedem, u mal-milja tas-sekli l-metodi ta’ produzzjoni dejjem immiraw li jsaħħu kemm jistgħu l-kwalitajiet ta’ dan il-ġobon tradizzjonali ta’ La Mancha.

Referenza għall-pubblikazzjoni tal-ispeċifikazzjoni

(L-Artikolu 5(7) tar-Regolament (KE) Nru 510/2006)

http://docm.jccm.es/portaldocm/descargarArchivo.do?ruta=2009/10/20/pdf/2010_17415.pdf&tipo=rutaDocm”.