12.12.2012

Il-Ġurnal Uffiċjali tal-Unjoni Ewropea

C 382/9

DEĊIŻJONI TAL-KUMMISSJONI

tal-5 ta’ Diċembru 2012

li temenda d-Deċiżjoni tal-Kummissjoni 2007/623/KE dwar il-ħolqien ta’ Grupp ta’ Livell Għoli ta’ Partijiet Interessati Indipendenti għall-Piżijiet Amministrattivi

2012/C 382/08

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Billi:

(1)	Permezz tad-Deċiżjoni tal-Kummissjoni 2007/623/KE (1), il-Kummissjoni ħolqot Grupp ta’ Livell Għoli ta’ Partijiet Interessati Indipendenti għall-Piżijiet Amministrattivi, minn hawn ’il quddiem imsejjaħ “il-grupp”, għal perjodu fiss ta’ tliet snin.

(2)

Il-mandat tal-grupp ġie estiż sal-31 ta’ Diċembru 2012 permezz tad-Deċiżjoni tal-Kummissjoni tas-17 ta’ Awwissu 2010 (2010/C 223/03) (2) biex jisfrutta b’mod sħiħ il-potenzjal tal-iffrankar tal-Programm ta’ Azzjoni għat-Tnaqqis tal-Piżijiet Amministrattivi fl-Unjoni Ewropea li se jitlesta sa tmiem l-2012.

(3)	Ir-rapport tal-grupp ta’ Novembru 2011 dwar l-aħjar prattika fl-Istati Membri biex jimplimentaw il-leġiżlazzjoni tal-UE bl-eħfef mod wera li hemm ambitu wiesa’ biex l-amministrazzjonijiet pubbliċi tal-Istati Membri jkunu mgħejjuna biex jimplimentaw il-leġiżlazzjoni tal-UE b’mod aktar effiċjenti.

(4)	It-tnaqqis tal-piż amministrattiv u s-simplifikazzjoni tal-leġiżlazzjoni, speċjalment għan-negozji żgħar u ta’ daqs medju (SMEs), huma prijoritajiet għall-Kummissjoni (3).

(5)	Il-mandat tal-grupp u tal-membri tiegħu għandu għalhekk jiġi estiż skont dan.

(6)	Il-grupp għandu jkompli jaħdem mill-qrib mal-partijiet interessati u s-servizzi tal-Kummissjoni, u jkompli jagħmel skambji ta’ opinjonijiet u esperjenzi regolari u strutturati mad-Deputat Segretarju Ġenerali u l-President tal-Bord tal-Valutazzjoni tal-Impatt,

IDDEĊIDIET KIF ĠEJ:

Artikolu 1

Id-Deċiżjoni 2007/623/KE hi emendata kif ġej:

(1)

L-Artikolu 1 jinbidel b’dan li ġej:

“Artikolu 1

Il-Grupp ta’ Livell Għoli dwar il-Piżijiet Amministrattivi

Il-Grupp ta’ Livell Għoli ta’ Partijiet Interessati Indipendenti għall-Piżijiet Amministrattivi huwa b’dan imwaqqaf b’effett mill-31 ta’ Awwissu 2007. Mill-1 ta’ Jannar 2013 l-isem uffiċjali jkun il-‘Grupp ta’ Livell Għoli dwar il-Piżijiet Amministrattivi’, minn hawn ’il quddiem imsejjaħ bħala ‘il-grupp’.”

(2)

L-Artikolu 2 jinbidel b’dan li ġej:

“Artikolu 2

Il-Kompitu

Il-kompitu tal-grupp ikun li jagħti parir lill-Kummissjoni dwar il-piż amministrattiv imqiegħed fuq in-negozju, b’mod partikolari fuq l-SMEs u l-kumpaniji mikro, ikkawżat mil-leġiżlazzjoni tal-UE, u dwar is-simplifikazzjoni tal-atti leġiżlattivi eżistenti tal-UE xierqa għal reviżjoni u dwar kif l-amministrazzjonijiet pubbliċi fl-Istati Membri jistgħu jsiru iktar effiċjenti u li jirreaġixxu għall-ħtiġijiet tal-partijiet interessati, b’mod partikolari l-SMEs, meta jimplimentaw il-leġiżlazzjoni tal-UE.

B’mod partikolari, il-grupp jagħti parir lill-Kummissjoni

—	dwar il-miżuri li għandhom l-għan li jnaqqsu l-piż amministrattiv u jissimplifikaw il-leġiżlazzjoni eżistenti, b’enfasi partikolari fuq il-ħtiġijiet tan-negozji żgħar;

—	dwar il-programm kontinwu ta’ simplifikazzjoni tagħha, b’enfasi fuq l-atti b’potenzjal għoli għal tnaqqis tal-piżijiet amministrattivi;

—	fuq il-bażi tal-pjanijiet direzzjonali, dwar il-piż amministrattiv potenzjali imqiegħed fuq in-negozju, b’mod partikolari fuq l-SMEs u l-kumpaniji mikro meta japplikaw il-leġiżlazzjoni tal-UE;

—	dwar miżuri li jistgħu jittieħdu fuq livell nazzjonali biex jgħinu lill-Istati Membri japplikaw il-leġiżlazzjoni tal-UE adottata skont il-Programm tat-Tnaqqis tal-Piż Amministrattiv bl-eħfef mod;

—	dwar miżuri li jistgħu jittieħdu fuq livell nazzjonali biex jagħmlu l-amministrazzjonijiet aktar reattivi għat-tħassib tal-SMEs u aktar risponsivi għall-ħtiġijiet u l-bżonn qawwi fuq it-tkabbir meta japplikaw il-leġiżlazzjoni tal-UE.

u jassisti lill-Kummissjoni biex tiżgura li jsir progress mill-Kunsill u l-Parlament biex ikunu adottati proposti dwar is-simplifikazzjoni u t-tnaqqis tal-piż amministrattiv.

Il-mandat tal-grupp huwa mogħti sal-31 ta’ Ottubru 2014.”

(3)

L-Artikolu 3 (1) hu mibdul b’dan li ġej:

“1. Il-Kummissjoni tista’ tikkonsulta lill-grupp dwar kwalunkwe kwistjoni relatata mat-tnaqqis tal-piżijiet mhux meħtieġa fuq l-SMEs, speċjalment il-kumpaniji mikro, meta tapplika l-leġiżlazzjoni tal-UE, u dwar il-programm kontinwu ta’ simplifikazzjoni tagħha.”

(4)

L-Artikolu 4 hu emendat kif ġej:

(a)	Fil-paragrafu 2, it-tieni sentenza hi mibdula b’dan li ġej: “Il-membri tal-grupp imbagħad jinħatru mis-Segretarju Ġenerali b’konsultazzjoni mal-President.”

(b)	Il-paragrafu 3 hu mibdul b’dan li ġej: “3. Il-membri jkunu individwi maħtura f’kapaċità personali jew individwi maħtura biex jirrappreżentaw interess komuni maqsum bejn il-partijiet interessati li għandhom għarfien espert fit-tnaqqis tal-piż amministrattiv.”

(c)	Fil-paragrafu 4, l-ewwel sentenza hi mibdula b’dan li ġej: “Il-mandati tal-membri tal-grupp huma estiżi sal-31 ta’ Ottubru 2014.”

(d)

Il-paragrafu 5 hu mibdul b’dan li ġej:

“5. Il-membri li ma jibqgħux f’pożizzjoni li jikkontribwixxu b’mod effettiv fid-deliberazzjonijiet tal-grupp, li jippreżentaw ir-riżenja tagħhom jew li ma jikkonformawx mal-kundizzjonijiet stabbiliti fil-paragrafu 3 ta’ dan l-Artikolu, jew l-Artikolu 339 tat-Trattat dwar il-Funzjonament tal-Unjoni Ewropea, jistgħu jiġu sostitwiti għall-kumplament tal-mandat tagħhom.”

(e)	Il-paragrafu 6 hu mibdul b’dan li ġej: “6. Il-membri maħtura f’kapaċità personali jaġixxu b’mod indipendenti u fl-interess pubbliku. Il-membri maħtura biex jirrappreżentaw interess komuni kondiviż flimkien mal-partijiet interessati ma jirrappreżentawx interess individwali.”

(f)

Il-paragrafu 7 hu mibdul b’dan li ġej:

“7. L-ismijiet tal-individwi maħtura f’kapaċità personali u l-ismijiet tal-individwi li jirrappreżentaw interess jiġu ppubblikati fir-Reġistru tal-gruppi ta’ esperti tal-Kummissjoni u ta’ entitajiet simili (‘ir-Reġistru’). Barra minn hekk, l-ismijiet tal-membri jiġu ppubblikati fuq il-websajt tas-Segretarjat Ġenerali tal-Kummissjoni Ewropea.”

(g)	Il-paragrafu 8 l-ġdid li ġej jidħol wara l-paragrafu 7: “8. Id-dejta personali tinġabar, tiġi proċessata u ppubblikata skont ir-Regolament (KE) Nru 45/2001.”

(5)

L-Artikolu 5 hu emendat kif ġej:

(a)

Il-paragrafu 3 hu mibdul b’dan li ġej:

“3. Il-membri tal-grupp u r-rappreżentanti tagħhom, kif ukoll l-esperti u l-osservaturi mistiedna, jikkonformaw mal-obbligi tas-segretezza professjonali stabbiliti fit-Trattati u fir-regoli ta’ implimentazzjoni tagħhom, kif ukoll mar-regoli tal-Kummissjoni dwar is-siġurtà li għandhom x’jaqsmu mal-protezzjoni tat-tagħrif ikklassifikat tal-UE, stabbiliti fl-Anness għad-Deċiżjoni tal-Kummissjoni 2001/844/KE, KEFA, Euratom (4). Fil-każ li dawn l-obbligi ma jiġux irrispettati, il-Kummissjoni tista’ tieħu l-miżuri xierqa kollha.

(b)

Il-paragrafu 6 hu mibdul b’dan li ġej:

“6. Il-Kummissjoni tippubblika d-dokumenti kollha rilevanti dwar l-attivitajiet imwettqa mill-grupp (bħal aġendi, minuti u s-sottomissjonijiet tal-parteċipanti) jew direttament fir-Reġistru jew permezz ta’ ħolqa mir-Reġistru għal websajt iddedikat fejn tista’ tinstab l-informazzjoni. Għandhom jiġu previsti eċċezzjonijiet għall-pubblikazzjoni ta’ dokument meta l-iżvelar tiegħu jista’ jdgħajjef il-ħarsien ta’ interess pubbliku jew privat kif iddefinit fl-Artikolu 4 tar-Regolament (KE) Nru 1049/2001.”

(6)	L-Artikolu 7 hu mibdul b’dan li ġej: “Artikolu 7 Applikabilità Din id-Deċiżjoni tapplika sal-31 ta’ Ottubru 2014.”

Artikolu 2

Din id-Deċiżjoni tidħol fis-seħħ fil-jum tal-publikazzjoni tagħha f’Il-Ġurnal Uffiċjali tal-Unjoni Ewropea.

Id-Deċiżjoni tibda tapplika mill-31 ta’ Diċembru 2012.

Magħmul fi Brussell, il-5 ta’ Diċembru 2012.

Għall-Kummissjoni

Il-President

José Manuel BARROSO

(1) ĠU L 253, 28.9.2007, p. 40.

(2) ĠU C 223, 18.8.2010, p. 6.

(3) COM(2011) 803 – L-imminimizzar tal-piż regolatorju għall-SMEs – L-adattament tar-regolamentazzjoni tal-UE għall-bżonnijiet tal-intrapriżi mikro.

(4) Id-Deċiżjoni tal-Kummissjoni tad-29 ta’ Novembru 2001 li temenda r-Regoli Interni tal-Proċedura, (ĠU Edizzjoni Speċjali bil-Malti: Kapitolu 01 Volum 03 P. 353 – 407).”