(1)

Skont l-Artikolu 370 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (2), l-Istati Membri li, fl-1 ta’ Jannar 1978, intaxxaw it-tranżazzjonijiet elenkati fl-Anness X, Parti A, jistgħu jibqgħu jintaxxaw dawk it-tranżazzjonijiet; għandu jittieħed kont ta’ dawn it-tranżazzjonijiet biex tkun determinata l-bażi tar-riżorsi tal-VAT;

(2)

Skont l-Artikolu 371 tad-Direttiva 2006/112/KE, l-Istati Membri li, fl-1 ta’ Jannar 1978, eżentaw it-tranżazzjonijiet elenkati fl-Anness X, Parti B, jistgħu jibqgħu jeżentaw dawk it-tranżazzjonijiet, skont il-kundizzjonijiet li japplikaw fl-Istat Membru kkonċernat f’dik id-data; għandu jittieħed kont ta’ dawn it-tranżazzjonijiet biex tkun determinata l-bażi tar-riżorsi tal-VAT;

(3)

B’effett mill-1 ta’ Jannar 1990 il-possibbiltà mogħtija lill-Istati Membri li jibqgħu jeżentaw it-tranżazzjonijiet elenkati f’punt 20 ta’ Anness F fis-Sitt Direttiva tal-Kunsill 77/388/KEE (3) intemmet permezz tal-Artikou 1(2)(a) tat-Tmintax-il Direttiva tal-Kunsill 89/465/KEE (4). bħala konsegwenza, l-awtorizzazzjoni li ngħatat f’dan ir-rigward mill-Kummissjoni għall-finijiet tad-determinazzjoni tal-bażi tar-riżorsi proprji tal-VAT m’għandhiex titkompla.

(4)

B’effett mis-17 ta’ Ottubru 1998 punt 26 ta’ Anness F tas-Sitt Direttiva kien imħassar permezz tal-Artikolu 2 tad-Direttiva tal-Kunsill 98/80/KE (5) u ġiet introdotta skema speċjali għall-investiment fid-deheb għall-Istati Membri kollha. bħala konsegwenza, l-awtorizzazzjoni li ngħatat f’dan ir-rigward mill-Kummissjoni għall-finijiet tad-determinazzjoni tal-bażi tar-riżorsi proprji tal-VAT m’għandhiex titkompla.

(5)

Fil-każ ta’ Franza, il-Kummissjoni, fuq il-bażi tar-Regolament (KEE, Euratom) Nru 1553/89, adottat id-Deċiżjoni 90/176/Euratom, KEE (6) li tawtorizza lil Franza, b’effett mill-1 ta’ Jannar 1989, biex ma tikkunsidrax ċerti kategoriji ta’ tranżazzjonijiet u biex tuża ċerti estimi approssimattivi għall-kalkolu tal-bażi tar-riżorsi proprji tal-VAT.

(6)

Il-Kummissjoni stiednet lil Franza biex tivverifika jekk dawk l-awtorizzazzjonijiet li ngħataw lil Franza bla ebda limitazzjoni fiż-żmien, kienx għad hemm bżonnhom u biex dan jikkonfermawh lill-Kummissjoni; barra miż-żewġ awtorizzazzjonijiet skaduti msemmija hawn fuq, Franza kkonfermat li żewġ awtorizzazzjonijiet biex ma jiġux ikkunsidrati t-tranżazzjonijiet imsemmija f’punti 5 u 6 tal-Anness X, Parti B tad-Direttiva 2006/112/KE effettivament ma kinux qed jintużaw aktar. bħala konsegwenza, l-awtorizzazzjonijiet li ngħataw f’dan ir-rigward mill-Kummissjoni għall-finijiet tad-determinazzjoni tal-bażi tar-riżorsi proprji tal-VAT m’għandhomx jitkomplew.

(7)

Għall-finijiet ta’ kjarifika u trasparenza tar-regoli, dispożizzjonijiet tal-Unjoni li skadew jew ma baqgħux fis-seħħ għandhom jitneħħew.

(8)

Il-miżuri previsti f’din id-Deċiżjoni huma konformi mal-opinjoni tal-Kumitat Konsultattiv dwar ir-Riżorsi Proprji,