(1)

Skont l-Artikolu 370 tad-Direttiva tal-Kunsill 2006/112/KE tat-28 ta’ Novembru 2006 dwar is-sistema komuni ta’ taxxa fuq il-valur miżjud (2), l-Istati Membri li, fl-1 ta’ Jannar 1978, intaxxaw it-tranżazzjonijiet elenkati fl-Anness X, Parti A, jistgħu jibqgħu jintaxxaw dawk it-tranżazzjonijiet; għandu jittieħed kont ta’ dawn it-tranżazzjonijiet biex tkun determinata l-bażi tar-riżorsi tal-VAT.

(2)

Skont l-Artikolu 371 tad-Direttiva 2006/112/KE, l-Istati Membri li, fl-1 ta’ Jannar 1978, eżentaw it-tranżazzjonijiet elenkati fl-Anness X, Parti B, jistgħu jibqgħu jeżentaw dawk it-tranżazzjonijiet, skont il-kundizzjonijiet li japplikaw fl-Istat Membru kkonċernat f’dik id-data; għandu jittieħed kont ta’ dawn it-tranżazzjonijiet biex tkun determinata l-bażi tar-riżorsi tal-VAT.

(3)

B’effett mill-1 ta’ Jannar 1991 il-possibbiltà li kienet tagħti lok lil Stati Membri biex ikomplu jeżentaw tranżazzjonijiet elenkati fil-punt 13 tal-Anness F għas-Sitt Direttiva tal-Kunsill 77/388/KEE (3), kienet imwaqqfa permezz tal-Artikolu 1 punt 2(a) tat-Tmintax-il Direttiva tal-Kunsill 89/465/KEE (4); b’konsegwenza, l-awtorizzazzjoni mogħtija b’konnessjoni ma’ din mill-Kummissjoni għar-raġunijiet biex tkun determinata l-bażi tar-riżorsi proprji tal-VAT għandha titwaqqaf.

(4)

Fil-każ tal-Ġermanja, il-Kummissjoni, fuq il-bażi tar-Regolament (KEE, Euratom) Nru 1553/89, adottat id-Deċiżjoni 90/179/Euratom, KEE (5) li tawtorizza lill-Ġermanja, b’effett mill-1 ta’ Jannar 1989, biex tuża statistika għas-snin ta’ qabel is-sena ta’ qabel u biex ma tikkunsidrax ċerti kategoriji ta’ tranżazzjonijiet jew biex tuża ċerti stimi approssimattivi għall-kalkolu tal-bażi tar-riżorsi proprji tal-VAT.

(5)

Il-Kummissjoni tistieden lill-Ġermanja biex tivverifika jekk dawk l-awtorizzazzjonijiet mogħtija lill-Ġermanja bl-ebda limitu espliċitu ta’ żmien, kinux għadhom meħtieġa u biex tikkonferma dan lill-Kummissjoni; Il-Ġermanja kkonfermat li awtorizzazzjoni biex ma tikkunsidrax it-tranżazzjonijiet imsemmija fil-punt 13 tal-Anness F tas-Sitt Direttiva u li awtorizzazzjoni għall-użu ta’ stimi approssimattivi għat-tranżazzjonijiet imsemmija fil-punt 3 tal-Anness X, il-Parti B tad-Direttiva 2006/112/KE ma kellhiex tintuża; b’konsegwenza, l-awtorizzazzjonijiet mogħtija b’konnessjoni ma’ din mill-Kummissjoni għar-raġunijiet biex tkun determinata l-bażi tar-riżorsi proprji tal-VAT għandha titwaqqaf.

(6)

Għall-finijiet ta’ kjarifika u trasparenza tar-regoli tal-Unjoni, dispożizzjonijiet li skadew jew ma baqgħux fis-seħħ għandhom jitneħħew.

(7)

Il-miżuri previsti f’din id-Deċiżjoni huma konformi mal-opinjoni tal-Kumitat Konsultattiv dwar ir-Riżorsi Proprji,