(1)

Fi lment ippreżentat minn Saria Bio-Industries AG & Co KG (“il-kwerelant”) fit-23 ta’ Frar 2008, il-Kummissjoni kienet infurmata li l-Ġermanja tagħti kontributi annwali lil Zweckverband Tierkörperbeseitigung (assoċjazzjoni b'għan speċjali għar-rimi tal-karkassi tal-annimali) f'Rhineland-Palatinate, Saarland, Rheingau-Taunus-Kreis u Landkreis Limburg-Weilburg (“ZT”).

(2)

Il-Kummissjoni infurmat lill-Ġermanja permezz ta’ ittra tal-20 ta’ Lulju 2010 li kienet iddeċidiet li tibda l-proċedura skont l-Artikolu 108(2) tat-TFUE fir-rigward tal-miżura (“deċiżjoni tal-ftuħ”) Mal-pubblikazzjoni tad-deċiżjoni tal-ftuħ f'Il-Ġurnal Uffiċjali tal-Unjoni Ewropea fis-26 ta’ Ottubru 2010, il-Kummissjoni stiednet lill-partijiet interessati biex jippreżentaw il-kummenti tagħhom dwar il-miżura (3).

(3)

Il-Kummissjoni rċeviet kummenti mill-kwerelant fil-25 ta’ Novembru 2010. Skont it-talbiet approvati għall-estensjoni tad-data tal-iskadenza tal-20 ta’ Awwissu 2010 u t-18 ta’ Novembru 2011, il-Ġermanja ppreżentat il-kummenti tagħha dwar id-deċizjoni tal-ftuħ u dwar il-kummenti tal-kwerelant f'bosta partijiet fit-3 ta’ Marzu 2011, l-1 ta’ April 2011, l-4 ta’ April 2011, is-16 ta’ Mejju 2011, il-15 ta’ Lulju 2011, u t-18 ta’ Novembru 2011.

(4)

ZT bagħtet kummenti bil-miktub lill-Kummissjoni fl-4 ta’ April 2011. Skont l-Artikolu 20(1) flimkien mal-Artikolu 6 tar-Regolament (KE) Nru 659/1999 tat-22 ta’ Marzu 1999 li jistabbilixxi regoli dettaljati għall-applikazzjoni tal-Artikolu 93 tat-Trattat tal-KE (4), il-partijiet konċernati huma meħtieġa li jippreżentaw il-kummenti tagħhom sa mhux iktar tard minn xahar wara l-pubblikazzjoni fil-Ġurnal Uffiċjali, iżda ZT ippreżentat il-kummenti tagħha biss wara erba' xhur. Il-Kummissjoni tista' tikkunsidra kummenti li huma ppreżentati tard minn partijiet għal proċeduri iss f'każijiet individwali ġustifikati (5). Il-Kummissjoni ma tarax ġustifikazzjoni ta’ dan it-tip fl-ittra ta’ ZT jew fi kwalunkwe ċirkostanza oħra. Il-Kummissjoni għalhekk infurmat lil ZT f'ittra tat-18 ta’ April 2011 li kieku tikkunsidra l-kummenti tagħha fil-proċedura formali ta’ eżaminazzjoni, dan ikun kontra r-regoli ta’ proċedura u jwassal għal trattament inugwali mhux ġustifikabbli tal-partijiet fil-proċeduri. Madankollu hija ħadet l-informazzjoni kollha li kien hemm fil-kummenti bħala bażi għal din id-deċiżjoni.

(5)

B'mod parallel mal-proċedura formali ta’ eżaminazzjoni, il-kwerelant kien segwa proċeduri legali nazzjonali fil-Ġermanja u kien beda azzjoni kontra ZT quddiem il-Verwaltungsgericht Trier (il-Qorti Amministrattiva ta’ Trier). Fit-2 ta’ Diċembru 2008 il-Qorti sostniet li l-kontribuzzjonijiet annwali kienu jikkostitwixxu għajnuna mill-Istat fit-tifsira tal-Artikolu 107(1) tat-TFUE. Fir-rigward tal-ħlas lura tal-għajnuna illegali, il-Qorti ddeċidiet li ZT ma kellhiex tħallas lura l-ammont li rċeviet bejn l-2005 u l-2008 peress illi kien hemm ċirkostanzi speċjali li ġiegħlu l-ħlas lura jidher sproporzjonat.

(6)

Kemm il-kwerelant kif ukoll ZT appellaw kontra s-sentenza tal-Verwaltungsgericht Trier lill-Oberverwaltungsgericht Koblenz (Il-Qorti Amministrattiva Għolja ta’ Koblenz). Fl-24 ta’ Novembru 2009 l-Oberverwaltungsgericht ikkonfermat is-sentenza tal-Verwaltungsgericht Trier.

(7)

Il-kwerelant u ZT appellaw lill-Bundesverwaltungsgericht (“il-BverwG” — il-Qorti Amministrattiva Federali) kontra d-deċiżjoni tal-Oberverwaltungsgericht Koblenz. F'sentenza tas-16 ta’ Diċembru 2010 (6) il-Bundesverwaltungsgericht irrifjutat l-appell tal-kwerelant, emendat id-deċiżjoni tal-Oberverwaltungsgericht Koblenz, u rrifjutat l-applikazzjoni kollha, billi kkunsidrat li l-ilment kien inammissibbli fir-rigward tas-snin 2005 sa 2009 u li l-kontribut annwali għall-2010 ma rrapreżentax għajnuna fit-tifsira tal-Artikolu 107(1) tat-TFUE.

(8)

Ir-Regolament (KE) Nru 1069/2009 tal-Parlament Ewropew u tal-Kunsill tal-21 ta’ Ottubru 2009 li jistabbilixxi regoli tas-saħħa li jirrigwardaw prodotti sekondarji tal-annimali jew derivati minnhom mhux maħsuba għall-konsum mill-bniedem u li jħassar ir-Regolament (KE) Nru 1774/2002 (Regolament dwar prodotti sekondarji tal-annimali) (7) jirregola l-ġbir, it-trasport, il-ħażna, it-trattament, l-ipproċessar u l-użu jew ir-rimi tal-prodotti sekondarji tal-annimali sabiex dawn il-prodotti ma jkunux ta’ riskju għas-saħħa tal-bniedem jew tal-annimali. Il-leġiżlazzjoni hi maħsuba biex fost l-oħrajn tipprevjeni tifqigħat tal-enċefalopatiji sponġiformi trasmissibbli (TSE) u mard tal-annimali trasmissibbli ieħor bħad-deni tal-ħnieżer klassiku (CSF) jew il-marda tal-ilsien u d-dwiefer (FMD).

(9)

Is-sezzjoni 4 tar-Regolament (KE) Nru 1069/2009 tagħmel distinzjoni bejn tliet kategoriji differentI ta’ prodotti sekondarji tal-annimali skont ir-riskji speċifiċi għas-saħħa tal-annimali u tal-bniedem:

(10)

Ir-Regolament (KE) Nru 1069/2009 hu essenzjalment ekwivalenti għall-predeċessur tiegħu, ir-Regolament (KE) Nru 1774/2002 tal-Parlament Ewropew u tal-Kunsill (8), u jinkludi dispożizzjonijiet li jipprojbixxu l-importazzjoni u l-esportazzjoni ta’ materjali tal-kategoriji 1 u 2 u li jeħtieġu li l-impjanti għar-rimi tagħhom ikunu approvati mill-awtoritajiet kompetenti li għandhom japplikaw id-dispożizzjonijiet ta’ dan ir-Regolament. Ir-Regolament (KE) Nru 1069/2009, imbagħad, jistabbilixxi dispożizzjonijiet speċifiċi għar-rimi ta’ materjali tal-kategoriji 1 u 2. Madankollu, minbarra dan ma hemm l-ebda rekwiżiti taħt ir-Regolament fir-rigward tal-mod kif ir-rimi ta’ materjal tal-kategoriji 1 u 2 għandu jkun organizzat f'termini ekonomiċi. Għaldaqstant ir-Regolament (KE) Nru 1069/2009 ma jirrikjedix li rimi f'żona partikolari jsir minn impriża unika waħedha, kif inhu l-każ fil-Ġermanja.

(11)

Taħt § 3 tal-leġiżlazzjoni Ġermaniża li timplimenta d-dispożizzjonijiet Komunitarji dwar l-ipproċessar u r-rimi ta’ prodotti sekondarji tal-annimali mhux maħsuba għall-konsum mill-bniedem (9) (“TierNebG”), distretti rurali (Landkreise) u distretti urbani (kreisfreie Städte) huma obbligati jieħdu ħsieb ir-rimi u l-ipproċessar ta’ materjal tal-kategoriji 1 u 2 — imsejħa “prodotti kkontrollati”. Dan ix-xogħol jista' jitwettaq minnhom stess jew inkella jistgħu jikkuntrattaw partijiet terzi biex jagħmluh.

(12)

Ir-rimi ta’ materjal tal-kategoriji 3 — imsejħa “prodotti mhux ikkontrollati” — jista' jsir minn kwalunkwe impriża ta’ pproċessar sakemm ikun hemm konformità mad-dispożizzjonijiet tar-Regolament (KE) Nru 1069/2009.

(13)

ZT hija entità tad-dritt pubbliku mwaqqfa fl-1979 taħt §§ 1 u 2 tar-Rhineland-Palatinate Landesgesetz zur Ausführung des TierNebG (10) (“TierNebGAG RP” — il-Liġi tal-Istat Rhineland-Palatinate li timplimenta l-Att dwar il-Prodotti Sekondarji tal-Annimali). Sadanittant id-distretti rurali kollha u distretti urbani akbar f'Rhineland-Palatinate u Saarland u żewġ distretti rurali f'Hessen — Rheingau-Taunus-Kreis u Landkreis Limburg-Weilburg — saru membri ta’ ZT (ara § 1 Verbandsordnung ta’ ZT (artikoli ta’ assoċjazzjoni)).

(14)

Taħt § 2 tal-Verbandsordnung tagħha, ZT hija awtorizzata mill-membri tagħha biex tassumi d-drittijiet u l-obbligi kollha tad-distretti rurali u d-distretti urbani fil-kapaċità tagħhom bħala entitajiet responsabbli għar-rimi taħt § 3 tat-TierNebG flimkien mal-liġijiet tal-istati Ġermaniżi individwali.

(15)

Taħt il-liġi Ġermaniża, assoċjazzjoni b'għan speċjali ma tistax tkun is-suggett ta’ proċeduri ta’ falliment minħabba n-natura legali tagħha bħala entità tad-dritt pubbliku. Madankollu, il-membri tagħha jistgħu jiddeċiedu li jxoljuha.

(16)

ZT mhux biss twettaq il-kompiti assenjati lilha skont l-artikoli ta’ assoċjazzjoni tagħha, jiġifieri li tarmi materjal tal-kategoriji 1 u 2 miż-żona li tkopri (“materjal intern”), iżda wkoll tarmi materjal tal-kategoriji 1 u 2 mill-istati Ġermaniżi viċini ta’ Baden-Württemberg u Hessen (ara d-deskrizzjoni dettaljata f'paragrafi 20 u wara) kif ukoll materjal mhux ikkontrollat tal-kategorija 3 (flimkien imsejħa “materjal estern”).

(17)

Kif jidher mit-tabella hawn taħt, ZT ipproċessat kwantitajiet kbar ta’ materjal estern fil-passat. Bħala medja kważi nofs il-kwantità pproċessata fis-snin reċenti kienet tikkonsisti f'materjal estern.

Tabella 1

Kwantitajiet proċessati minn ZT fis-snin 1998–2009

(18)

Materjal intern jikkonsisti f'bhejjem mejta u skart mill-biċċeriji. ZT tagħmel kemm il-ġbir kif ukoll l-ipproċessar (minn hawn 'il quddiem imsemmija flimkien bħala “rimi”) Sabiex tkopri l-kostijiet involuti, ZT tapplika imposti. Skali differenti ta’ imposti huma applikati għal bhejjem mejta u skart mill-biċċeriji.

(19)

Peress illi materjal tal-kategorija 3 jinbiegħ fuq is-suq ħieles, ZT tistabbilixxi l-imposti għar-rimi taħt id-dritt privat. Waqt li l-parti l-kbira mill-impjanti privati għar-rimi jarmu materjal tal-kategorija 3 separatament sabiex jiksbu dħul ogħla mill-bejgħ billi jipproċessawh — pereżempju f'ikel għall-annimali — ZT tipproċessa materjal tal-kategorija 3 flimkien ma’ prodotti kkontrollati, għax din m'għandhiex impjant separat. Bħala riżultat ta’ dan jistgħu jinkisbu biss prodotti finali ta’ valur baxx — bħal żejt u xaħam — minn prodotti kkontrollati pproċessati.

(20)

Sa mill-2000, ZT ipproċessat ukoll skart mill-biċċeriji tal-kategoriji 1 u 2 minn Baden-Württemberg. Għal dan il-għan ġie konkluż ftehim bi skop speċjali taħt id-dritt pubbliku bejn ZT u Zweckverband Neckar-Franken. Skont il-ftehim, il-ġbir sar lokalment minn Zweckverband Neckar-Franken u l-materjal imbagħad intbagħat lil ZT għall-ipproċessar.

(21)

Fl-2007 ZT għamlet ukoll offerta biex tarmi l-prodotti kkontrollati fid-distretti rurali ta’ Hessen tat-Tramuntana u Ċentrali taħt sejħa għall-offerti u ngħatat il-kuntratt. Qabel ma ZT ħadet f'idejha l-kompitu tar-rimi fl-1 ta’ April 2009, ir-rimi kien isir minn waħda mill-kumpaniji fil-grupp tal-kwerelant.

(22)

Għaldaqstant ZT fittxet li timmasimizza l-użu tal-kapaċità tal-impjant tagħha mhux biss billi tipproċessa materjal estern, iżda wkoll billi involviet ruħha b'mod pjuttost qawwi, barra mill-kompitu formali tagħha, kemm fl-iipproċessar ta’ materjal tal-kategorija 3, li jinbiegħ liberament, u kemm materjal tal-kategoriji 1 u 2 minn barra ż-żona koperta mill-assoċjazzjoni. Bejn l-2002 u l-2008 minn 54 % sa 58 % biss tal-kwantitajiet ipproċessati minn ZT kienu materjal intern. Fl-2009 - parzjalment minħabba l-inklużjoni ta’ materjal minn Hessen tat-Tramuntana u Ċentrali — dan il-proporzjon waqa' b'mod konsiderevoli għal 39 % biss, li jammonta għal inqas minn nofs l-ammont totali pproċessat minn ZT.

(23)

ZT għandha żewġ impjanti tar-rimi, f'Rivenich u Sandersmühle. Waqt operazzjoni normali iż-żewġ impjant jagħmlu medja ta’ żewġ xiftijiet f'ħamest ijiem ta’ matul il-ġimgħa (operazzjoni ta’ ħamest ijiem b'żewġ xiftijiet). F'dan iż-żmien jista' jkun ipproċessat massimu ta’ 2 160 tunnellata kull ġimgħa. Din il-kapaċità ta’ operazzjoni normali kienet, fuq livell medju, biżżejjed biex jiġu pproċessati t-88 000 tunnellata li jirriżultaw kull sena f'dawn l-aħħar snin, li jammontaw għal 1 700 tunnellata fil-ġimgħa.

(24)

Bħal kumpaniji tar-rimi oħra, ZT għandha kapaċità operazzjonali żejda fil-forma ta’ xiftijiet mhux użati li jseħħu waqt operazzjoni normali fost il-ġimgħa u fi tmiem il-ġimgħa. Din il-kapaċità operazzjonali żejda tista' tintuża għall-ipproċessar ta’ karkassi addizzjonali fil-każ ta’ epidemija.

(25)

Skont l-informazzjoni provduta minn ZT, l-impjanti jistgħu jkunu operati fuq tliet xiftijiet kull jum tal-ġimgħa (operazzjoni ta’ sebat ijiem bi tliet xiftijiet) għal perjodu qasir ta’ bejn 6 ġimgħat u 12-il ġimgħa. Dan ifisser li għal perjodi qosra tkun possibbli kapaċità ta’ kull ġimgħa sa 4 536 tunnellata. Madankollu, ma tistax tinżamm operazzjoni kontinwa ta’ tliet xiftijiet fuq sebat ijiem minħabba l-użu u l-għejja tal-persunal.

(26)

Għaldaqstant għal żmien qasir - għal perjodu ta’ mhux iktar minn 12-il ġimgħa - ZT għadha kapaċità operazzjonali, aktar miċ-ċifra normali, ta’ 2 376 tunnellata fil-ġimgħa disponibbli għall-ipproċessar fil-każ ta’ epidemija (ara wkoll it-Tabella 3 fis-sezzjoni 9.3.1).

(27)

Fuq perjodu ta’ żmien itwal l-impjanti jistgħu, madakollu, jintużaw għal massimu ta’ tliet xiftijiet għal ħamest ijiem matul il-ġimgħa (operazzjoni ta’ ħamest ijiem bi tliet xiftijiet) biex jipproċessaw materjal addizzjonali dovut għal epidemija, peress illi jkun hemm bżonn li matul tmiem il-ġimgħa jsir xogħol ta’ manutenzjoni fil-każ ta’ użu ogħla għal perjodu kemmxejn twil. F'dan il-każ jistgħu jkunu pproċessati sa 3 240 tunnellata fil-ġimgħa.

(28)

Għalhekk fuq perjodu itwal — fuq perjodu ta’ iktar minn 12-il ġimgħa - ZT għandha l-kapaċità operazzjonali ta’ 1 080 tunnellata fil-ġimgħa, apparti l-figura normali, għall-ipproċessar fil-każ ta’ epidemija (ara wkoll it-Tabella 3 fit-Sezzjoni 9.3.1).

(29)

Il-kontributi annwali li tirċievi ZT mill-membri tagħha (distretti rurali u urbani) għandhom il-bażi legali tagħhom fil-Verbandsordnung ta’ ZT. L-għan tal-kontribut annwali hu li jkun hemm kumpens għall-kostijiet li mhumiex koperti minn dħul (ara § 9(1) tal-Verbandsordnung).

(30)

L-ammont tal-kontribut annwali hu stabbilit skont l-istatut tal-baġit annwali, li l-ewwel għandu jkun approvat matul il-laqgħa ġenerali tal-membri. Malli l-istatut tal-baġit jiġi adottat, ZT tkun intitolata li titlob il-ħlas tal-kontribut annwali permezz ta’ att amministrattiv.

(31)

Fi Frar 2010 il-Verbandsordnung ta’ ZT kien emendat b'effett retroattiv mill-1 ta’ Jannar 2009. Sa dan iż-żmien il-Verbandsordnung ma kellux regoli rigward l-użu u l-kalkolazzjoni tal-kontributi annwali barra mid-dispożizzjonijiet ta’ § 9(1), imma fi Frar 2010 d-dispożizzjonijiet ġodda segwenti kienu introdotti.

(32)

Skont § 9(2) tal-Verbandsordnung il-kontribut annwali issa għandu jkun iffissat minn qabel. Ir-regoli jispeċifikaw ukoll li l-kontribut annwali jista' jkun impost biss bħala kumpens għall-kostijiet li jkun hemm bħala riżultat tal-obbligu trasferit lilha għar-rimi tal-materjal tal-kategoriji 1 u 2 u biex iżżomm riżerva fil-kapaċita tagħha biex tkun tista' tlaħħaq ma’ epidemiji.

(33)

Skont § 10(2) tal-Verbandsordnung il-kapaċità ta’ riżerva għall-epidemiji li kellha tkun ipprovduta għal kull sena għas-snin 2009 u 2010 kienet stabbilita għal 7 110 tunnellata, li kellhom ikunu pproċessati fi żmien sitt ġimgħat (ekwivalenti għal sitt darbiet 1 185 tunnellata fil-ġimgħa). Meta kien qed ikun iffissat id-daqs tar-riżerva għall-empidemiji, kien ikkunsidrat il-fatt li, apparti l-kapaċità ta’ ZT stess, kienu disponibbli 5 000 tunnellata oħra ta’ kapaċità ta’ rimi alternattiva kull sena fil-każ ta’ epidemija. IL-Kostijiet tar-riżerva tal-epidemiji għandhom ikunu stabbiliti minn qabel fil-pjan tan-negozju relevanti, u l-uniċi kostijiet li jistgħu jkunu kkunsidrati huma l-proporzjon adegwat tal-kostijeit fissi (deprezzament, taxxi, assigurazzjoni, imgħax fuq is-self), il-kostijiet tal-kuntratti ta’ manutenzjoni barranin, u l-proporzjon ta’ kostijiet għall-persunal meħtieġ biex ikun hemm preparazzjoni operazzjonali kostanti. Il-kostijiet tar-riżerva għall-epidemiji għandhom jitniżżlu f'kontijiet speċifiċi, separatament minn kostijiet oħra tal-impriża u huma allokati skont is-sehem relevant tal-kapaċità.

(34)

Mit-twaqqif tagħha fl-1979 sal-2011, ZT irċeviet kontributi annwali li laħqu EUR 66 493 680. Iċ-ċifri annwali mill-1998 kienu s-segwenti:

(35)

Il-kontributi annwali mill-1998 sal-2011 jammontaw għal total ta’ EUR 30 932 198,

(36)

Skont ir-rapporti tal-introjtu ippreżentati, ZT għamlet telf aggregat ta’ EUR 4 562 795 bejn l-1998 u l-2009 wara l-inklużjoni tal-kontributi annwali. Jekk jitħallew barra l-kontributi, li ammontaw għal EUR 26 757 292, it-telf aggregat bejn l-1998 u l-2009 hu ta’ EUR 31 320 678. Għaldaqstant il-kontributi annwali ma kinux biżżejjed biex jagħmlu tajjeb għat-telf kollu.

(37)

Il-prinċipju “min iniġġes iħallas” skont l-Artikolu 191(2) tat-TFUE japplika b'mod ġenerali għar-rimi tal-prodotti sekondarji tal-annimali. Għaldaqstant hi primarjament ir-responsabbiltà tal-produtturi li jieħdu ħsieb ir-rimi tal-bhejjem maqtula u l-iskart mill-biċċeriji u li jħallsu l-kostijiet involuti (11).

(38)

Madankollu, minħabba l-kriżi tat-TSE, kien hemm bżonn li jkun żgurat trattament tajjeb tal-bhejjem mejta u tal-iskart mill-biċċeriji li huma materjali tal-kategoriji 1 u 2 u li jiġu appoġġjati l-bdiewa permezz ta’ għajnuna mill-Istat. Il-Kummissjoni Ewropea għamlet arranġamenti korrispondenti fil-linji gwida tal-Komunità dwar l-għajnuna mill-Istat fir-rigward tat-testijiet għat-TSE, bhejjem mejta u skart mill-biċċeriji tal-24 ta’ Diċembru 2002 (12) (“il-linji gwida tal-Komunità dwar it-TSE”). Dawn l-arranġamenti kienu inkorporati u nfurzati fis-Sezzjoni V.B.4 tal-linji gwida tal-Komunità dwar l-għajnuna mill-Istat fis-settur tal-agrikoltura u l-forestrija mill-2007 sal-2013 (13) (“il-linji gwida dwar l-għajnuna agrikola 2007-2013”).

(39)

Skont il-linji gwida tal-Komunità dwar it-TSE u l-linji gwida tal-Komunità dwar l-għajnuna agrikola 2007-2013, min iniġġes għandu jħallas għar-rimi tal-prodotti sekondarji tal-annimali (14). F'ċerti ċirkostanzi limitati ħafna, però, l-għajnuna hi permessa għal testijiet tat-TSE u għar-rimi ta’ bhejjem maqtula (15). L-ebda għajnuna ma tista' tingħata għar-rimi ta’ skart mill-biċċeriji (16). Barra minn hekk l-għajnuna hi kompatibbli mas-suq intern biss jekk jista' jintwera li l-għajnuna tingħata biss lil bdiewa u mhux lill-impriżi tal-produzzjoni iktar 'l isfel fil-katina ta’ attivitajiet (bħal biċċeriji jew impjanti għar-rimi tal-annimali) (17).

(40)

Fl-2004 il-Kummissjoni approvat skema tal-għajnuna mill-Istat biex tiġġieled kontra t-TSE fir-Rhineland-Palatinate li kienet notifikata mill-Ġermanja taħt l-Artikolu 107(3)(c) tat-TFUE, il-linji gwida Komunitarji dwar it-TSE, u l-linji gwida Komunitarji dwar l-għajnuna mill-Istat għas-settur agrikolu tat-12 ta’ Awwissu 2000 (18). L-għan tal-iskema kien il-prevenzjoni tat-tifrix tal-BSE, billi, fost affarijiet oħra, jingħata rimbors lill-bdiewa għall-kostijiet addizzjonali li jkunu ġarrbu għar-rimi xieraq ta’ materjal riskjuż wara l-introduzzjoni tal-projbizzjoni li l-baqar jingħataw għalf li jkun fih laħam u għadam.

(41)

Flimkien ma’ miżuri oħra, il-Kummissjoni approvat għajnuna ta’ darba ta’ 100 % tal-kostijiet għar-rimi ta’ skart mill-biċċeriji riskjuż speċifikat li kien akkumula bejn Ottubru 2000 u Settembru 2001 bħala riżultat tal-projbizzjoni fuq l-għalf magħmul minn laħam u għadam. Madankollu, il-benefiċjarji ta’ din l-għajnuna kienu kkunsidrati bħala biċċeriji u mhux ZT.

(42)

Skont it-tieni skema tal-għajnuna li kienet awtorizzata wkoll fl-2004, il-bdiewa f'Rhineland-Palatinate kellhom jirċievu kumpens għall-kostijiet tal-ġbir u l-ipproċessar ta’ bhejjem mejta li għalihom kienu ħallsu kontributi lit-Tierseuchenkasse (19) (fond għall-annimali morda). Il-ħlasijiet applikati minn ZT għall-ġbir u l-ipproċessar tal-bhejjem mejta interni huma mħallsa f'partijiet ugwali mill-istati Ġermaniżi (Rhineland-Palatinate, Hessen, Saarland), il-membri tal-assoċjazzjoni, u t-Tierseuchenkasse tal-istati rispettivi. Madankollu, fil-każ tal-kostijiet tal-ipproċessar, is-sidien tal-annimali tat-trobbija jridu jagħmlu kontribut ta’ 25 fil-mija.

(43)

L-għajnuna, imħallsa direttament lil ZT, kienet approvata għall-perjodu mill-1 ta’ Jannar 1999 sal-31 ta’ Diċembru 2013. Din kienet soġġetta għall-kundizzjoni li tingħata esklussivament lill-bdiewa u li magħha ma tingħatax għajnuna oħra.

(44)

Peress illi l-għajnuna ikkumpensat għal proporzjon mill-ħlasijiet stabbiliti minn qabel (100 % għall-ġbir u 75 % għall-ipproċessar), il-Kummissjoni kkonkludiet li din ingħatat esklussivament lill-bdiewa u li ma ħolqitx vantaġġ ekonomiku għal ZT.

(45)

Iż-żewġ skemi ta’ għajnuna (“l-għajnuna agrikola”) huma mniżżla bħala introjtu fil-kotba ta’ ZT. Bħala riżultat ta’ dan it-telf li jidher fil-premessa 36 diġà jikkonsidra l-fatt li ZT irċeviet għajnuna agrikola bħala introjtu.

(46)

Fi kliem ieħor, ZT irċeviet il-kontributi annwali kif ukoll l-għajnuna agrikola biex tiffinanzja t-telf li kien fadal.

(47)

Il-kwerelant isostni li ZT ma setgħetx tkompli topera ekonomikament kieku l-membri tagħha ma koprewx it-telf annwali li sar minħabba r-rimi ta’ materjal intern u estern bil-ħlas ta’ kontributi annwali. ZT, b'monopolju għar-rimi ta’ materjal intern u għaldaqstant mingħajr ebda kompetizzjoni, toffri prezzijiet iktar baxxi minn dawk tas-suq għal materjal estern. Il-politika tal-prezzijiet ta’ ZT hi mmirata lejn il-massimizzazzjoni tal-użu tal-impjanti tagħha, li għandhom kapaċità żejda għolja.

(48)

Il-kwerelant jara ħafna tipi ta’ distorsjoni tal-kompetizzjoni li jirriżultaw mill-ħlasijiet tal-kontributi annwali. B'mod partikolari, ikkritika l-ipprezzar ta’ ZT fil-każ ta’ materjal ħieles tal-kategorija 3 u fil-każ tal-istedina għall-offerti għall-kuntratt tar-rimi f'Hessen tat-Tramuntana u Ċentrali:

(49)

Il-Ġermanja ssostni, min-naħa l-oħra, li l-kontribut annwali kien neċessarju biex ikunu koperti l-kostijiet ta’ ZT li jirriżultaw mill-obbligazzjoni tagħha li tipprovdi kapaċità ta’ riżerva biex tlaħħaq mal-epidemiji. Bħala prova, il-Ġermanja pprovdiet studju espert mill-Istitut Fraunhofer li sar f'Marzu 2007 (20) (“l-istudju Fraunhofer”) biex turi li l-kost għal riżerva għall-epidemiji jammonta għal 50 % tal-kostijiet totali tal-kapaċità. Barra minn hekk, ġie ppreżentat l-argument li l-kontribut annwali kien ukoll neċessarju biex ikopri l-kostijiet għat-tindif tas-siti kontaminati.

(50)

Fl-eżaminazzjoni proviżorja tagħha, il-Kummissjoni inizjalment stabbiliet illi l-kontributi annwali jipprovdu vantaġġ ekonomiku għal ZT, peress illi jnaqqsu n-nefqa kurrenti tagħha, u li l-kriterji l-oħra għall-eżistenza tal-għajnuna kienu sodisfatti.

(51)

Il-Kummissjoni sostniet li din it-tip ta’ għajnuna hi ġeneralment projbita. Hi esprimiet ukoll id-dubji tagħha fir-rigward ta’ jekk il-kontribut annwali setax ikun ġustifikat bħala kumpens għaż-żamma ta’ riżerva għall-epidemiji. Il-Kummissjoni bbażat il-konklużjoni tagħha fuq eżaminazzjoni ta’ erba' kriterji mniżżla fis-sentenza Altmark (21):

(52)

Fir-rigward tal-kwistjoni tal-eżistenza ta’ servizz ta’ interess ekonomiku ġenerali, il-Kummissjoni esprimiet dubji dwar jekk hemmx interess pubbliku fil-provvista ta’ riżerva għall-epidemiji peress li, skont il-prinċipju ta’ “min iniġġes iħallas”, il-bdiewa huma obbligati li jarmu bhejjem mejta u skart mill-biċċeriji u huma appoġġjati mill-għajnuna msemmija hawn fuq li hi approvata mill-Kummissjoni taħt il-linji gwida Komunitarji dwar it-TSE. Wieħed għandu jistaqsi wkoll jekk il-kontribut annwali huwiex neċessarju peress illi l-prattika ta’ stati Ġermaniżi oħra turi li l-impjanti ta’ operaturi privati għandhom biżżejjed kapaċità żejda biex ilaħħqu ma’ epidemiji tal-annimali mingħajr ma jirċievu pagament ta’ kumpens addizzjonali talli jipprovduha.

(53)

Il-Kummissjoni wkoll iddubitat jekk il-Verbandsordnung li jirregola ZT iwettaqx ir-rekwiżiti għal att ta’ affidament trasparenti peress illi, qabel l-2010, il-provvista ta’ riżerva għall-epidemiji ma kinitx imfissra bħala obbligu ta’ interess pubbliku li għandu jkun provudt minn ZT u għaliex ma dan ma stabbiliex il-parametri neċessarji biex ikun kkalkolat il-kost.

(54)

Fir-rigward tal-bżonn għal pagament ta’ kumpens, il-Kummissjoni staqsiet jekk il-kontributi annwali, fil-fatt, jiffinanzjawx it-telf li jirriżulta minn kapaċità żejda li ma tagħmilx profitt. Wieħed għandu jistaqsi jekk hux meħtieġ kontribut annwali addizzjonali meta fi stati Ġermaniżi oħra l-kostijiet huma koperti minn imposti mħallsa minn min iniġġes.

(55)

Peress illi ZT ma ntagħżlitx permezz ta’ sejħa pubblika għall-offeri, hemm dubju kemm ZT hija impriża tipika mmexxija tajjeb.

(56)

Għaldaqstant il-Kummissjoni waslet għall-konklużjoni proviżorja li hemm bżonn ta’ eżaminazzjoni dettaljata biex ikun hemm konferma dwar jekk il-kontribut annwali lil ZT huwiex neċessarju biex tkun żgurata riżerva għall-epidemiji jew jekk is-suq innifshu jistax jipprovdi kapaċità ta’ impjant b'xejn suffiċjenti fil-każ ta’ epidemija.

(57)

Fl-aħħar kien hemm dubji dwar l-argument tal-Ġermanja li l-kontributi annwali setgħu jkunu ġustifikati bħala kumpens għall-kostijiet għat-tindif tas-siti kontaminati. Skont il-paragrafu 132 tal-linji gwida Komunitarji dwar l-għajnuna mill-Istat għall-ħarsien ambjentali tal-1 ta’ April 2008 (22) (“il-linji gwida dwar l-għajnuna ambjentali”), din l-għajnuna tista' tkun ikkunsidrata kompatibbli mas-suq intern biss jekk il-benefiċjarju ma jistax ikun responsabbli taħt il-liġi nazzjonali, li mid-dehra mhuwiex il-każ f'din iċ-ċirkostanza.

(58)

Fid-deċiżjoni tagħha tas-16 ta’ Diċembru 2010 l-ogħla qorti amministrattiva Ġermaniża, il-BVerwG sostniet lil l-kontributi tal-2010 ma kinux għajnuna mill-istat skont l-Artikolu 107(1) tat-TFUE, peress illi l-kriterji tal-Altmark kienu sodisfatti. Il-BVerwG m'għamlet l-ebda pronunzja dwar kontributi ta’ qabel għax qieset illi l-appell ma kienx ammissibbli fir-rigward tal-kontributi magħmula qabel l-2010.

(59)

Il-BVerwG sostniet li r-rimi ta’ prodotti sekondarji tal-annimali skont ir-Regolament tal-prodotti sekondarji tal-annimali u § 3(1) tat-TierNebG jikkostitwixxi servizz ta’ interess ekonomiku ġenerali u jinkludi l-provvista ta’ kapaċità ta’ riżerva fil-każ ta’ epidemiji.

(60)

Il-BVerwG iddistingwiet bejn il-kapaċità li hi wżata f'operazzjonijiet normali, inkluża kapaċità operazzjonali żejda, u kapaċità wieqfa li normalment mhux użata. Kieku l-kontributi annwali koprew il-kost tal-kapaċità normali, inkluża ir-riżerva essenzjali għall-epidemiji, il-BVerwG kienet taqbel li l-kontributi annwali kienu għajnuna mill-Istat minħabba l-prinċipju ta’ “min iniġġes iħallas”.

(61)

Madankollu jekk il-kontributi annwali koprew biss il-kostijiet tal-kapaċità żejda li hi miżmuma biss fil-każ ta’ tifqigħa ta’ epidemiji, dawn ma jikkostitwixxux għajnuna mill-Istat. Mhuwiex rilevanti li l-kapaċità żejda tista' tkun ogħla minn dik dettata mir-rekwiżiti operazzjonali peress illi, skont in-natura tagħha stess, mhix qed tintuża normalment. Biss jekk kien hemm indikazzjonijiet li l-kapaċità żejda kienet intużat għal operazzjonijiet normali (eż. għar-rimi ta’ materjal tal-kategorija 3) kien ikun hemm konklużjoni differenti. Madankollu, peress illi dan ma kienx jidher li hu l-każ, il-kontributi annwali kienu qed jikkumpensaw biss għall-kostijiet li jirriżultaw mill-obbligu tas-servizz pubbliku biex tiġi pprovduta riżerva għall-epidemiji.

(62)

Fir-rigward tar-rekwiżit ta’ trasparenza, il-BVerwG innotat li l- Verbandsordnung kien modifikat fit-2 ta’ Frar 2010, immedjatament wara li kienu ġew stabbiliti l-kontributi tal-2010. Il-BVerwG sostniet li § 9 tal-Verbandsordnung tal-2010 kien għamilha ċara li l-kontributi annwali kkumpensaw biss għall-kost tal-provvista ta’ kapaċità riżerva fil-każ ta’ epidemiji.

(63)

Fil-Verbandsordnung kif emendat § 9 żgura li l-kontributi annwali kkumpensaw biss għall-kost tal-provvista ta’ riżerva għall-epidemiji.

(64)

Barra minn dan, il-BVerwG innotat li d-deċiżjoni dwar id-daqs tar-riżerva ma kinitx deċiżjoni tan-negozju li kellha tittieħed abbażi tal-kost-effettività ekonomika tagħha. Permezz tan-natura tagħha stess, iż-żamma ta’ kapaċità ta’ riżerva għat-tifqigħa ta’ epidemija mhix ekonomika minħabba li l-kost ta’ din ir-riżerva huwa sproporzjonat mal-probabbiltà ta’ tifqigħat fuq skala kbira ta’ mard tal-annimali.

(65)

Il-BVerwG sostniet li ma kienx possibbli li jkun applikat ir-raba' kriterju ta’ Altmark f'dan il-każ peress illi r-rimi ta’ materjal tal-kategoriji 1 u 2 isir separatament mir-rimi ta’ materjal tal-kategorija 3. Ma hemmx koinċidenza bejn is-servizzi pubbliċi u kummerċjali li tipprovdi ZT waqt li, fil-każ Altmark, kumpanija privata tax-xarabanks kienet soġġetta għal numru kbir ta’ rekwiżiti tas-servizz pubbliku (eż. dwar in-numru ta’ waqfiet u l-iskeda) li biddlet sostanzjalment il-mod kif kien isir is-servizz tat-trasport eżistenti. Il-kontributi annwali lil ZT għaldaqstant servew biex jikkumpensaw għall-kost tal-provvista ta’ servizz pubbliku lil hinn mis-suq.

(66)

Il-BVerwG sostniet ukoll li entità pubblika tista' twettaq kompiti ta’ interess pubbliku waħedha mingħajr ma tkun obbligata li tirrikorri għall-fornituri ta’ servizz privat. Fir-rigward tal-każistika tal-Qorti tal-Ġustizzja dwar l-akkwist pubbliku, il-BVerwG sostniet li entità pubblika kienet libera li tagħżel jekk ikollhiex servizz intern jew jekk takkwistahx mis-suq (23).

(67)

Il-kwerelant jargumenta li l-proviżjoni ta’ riżerva għall-epidemiji mhix servizz ta’ interess ekonomiku ġenerali (SGEI) skont id-definizzjoni tal-Artikolu 106(2) tat-TFUE minħabba fil-prinċipju ta’ “min iniġġes iħallas”.

(68)

Bdiewa u biċċeriji jistgħu faċilment ikunu identifikati bħala min iniġġes. Il-bdiewa jibbenefikaw mill-immaniġġjar effettiv ta’ epidemiji tal-annimali, peress illi dawn jistgħu jkunu ta’ riskju fuq il-qatgħat tagħhom u għaldaqstant fuq l-assi tagħhom. U l-immaniġġar rapidu u effettiv tal-epidemiji jippermetti lill-biċċeriji li jkomplu n-negozju tagħhom fuq il-livell normali.

(69)

Il-prinċipju ta’ “min iniġġes iħallas” hu rikonoxxut ukoll fil-leġiżlazzjoni Ġermaniża, fejn il-bdiewa u l-biċċeriji huma msemmija regolarment bħala niġġiesa li għandhom ikopru l-kostijiet tar-rimi (24).

(70)

Il-kwerelant isostni li ZT bdiet tiddikjara li minn dejjem kienet fdata bil-kompitu li tipprovdi kapaċità ta’ riżerva biss wara li bdew l-investigazzjonijiet nazzjonali u tal-Kummissjoni. Sakemm ma kien emendat il-Verbandsordnung fl-2010 ma kien hemm l-ebda att ta’ affidament espliċitu li jikkonċerna l-provvista ta’ kapaċità ta’ riżerva u lanqas ma kienu definiti minn qabel il-parametri għall-kalkolazzjoni tal-kumpens.

(71)

Il-kwerelant isostni li r-rekwiżit li tinżamm riżerva għall-epidemiji ma jirrikjedix kostijiet netti għall-impjanti tar-rimi tal-annimali.

(72)

Impjanti Ġermaniżi għar-rimi tal-annimali ġeneralment jaħdmu żewġ xiftijiet fuq ħames jew sitt ijiem ta’ matul il-ġimgħa b'varjazzjonijiet ta’ +/– 5 % fis-sigħat ta’ operazzjoni. Varjazzjonijiet staġjonali fid-domanda huma ttrattati permezz ta’ tlett xiftijiet fi żmien ta’ domanda qawwija jew tnaqqis għal operazzjonijiet ta’ ħamest ijiem u żewġ xiftijiet meta d-domanda tkun baxxa. L-istudju Böckenhoff (25) ikkonferma li t-tielet xift fost il-ġimgħa u xiftijiet oħra fi tmiem il-ġimgħa jipprovdu biżżejjed riżerva għall-epidemiji biex ilaħħqu maż-żieda fl-ammont ta’ materjal fil-każ ta’ epidemiji.

(73)

Għaldaqstant ir-riżerva għall-epidemiji neċessarja tista' tkun koperta mill-kapaċità żejda disponibbli fl-operazzjoni normali tal-impjanti tar-rimi. Il-kwerelant jenfasizza li qatt ma kellu bżonn jagħmel investimenti addizzjonali sabiex jipprovdi livell suffiċjenti ta’ riżerva għall-epidemiji.

(74)

Il-kwerelant isostni wkoll li l-kapaċitajiet tal-Länder ġirien għandhom ikunu kkunsidrati waqt l-ippjanar tal-kapaċità ta’ impjant tar-rimi. Fil-każ ta’ tifqigħa kbira ta’ mard, il-kapaċitajiet ta’ Länder oħra jistgħu jintużaw biex ilaħħqu maż-żieda fil-kapaċità fuq żmien qasir. M'hemmx dispożizzjonijiet legali li jipprojbixxu t-trasport ta’ materjali tal-kategoriji 1 u 2. Għall-kuntrarju, il-leġiżlazzjoni Ġermaniża relevanti (26) tqis ir-rikors għall-kapaċitajiet ta’ regjuni viċini bħala mod ovvju għat-trattament ta’ ostakoli fil-kapaċità tal-ipproċessar fil-każ ta’ epidemija.

(75)

Skont il-kwerelant, il-kostijiet kollha tal-kapaċità huma normalment iffinanzjati mid-dħul li tkun għamlet il-kumpanija li għandha l-kompitu li tarmi materjal tal-kategoriji 1 u 2 meta din titħallas għall-operazzjonijiet normali tagħha. Peress illi l-kostijiet tal-kapaċità żejda operazzajonali huma parti integrali mill-kostijiet fissi tal-impjant, dawn jistgħu jkunu inklużi fil-kalkolazzjoni tal-miżata mitluba lill-utenti. Fost affarijiet oħrajn, il-kwerelant iċċita sentenza tal-BVerwG (27) li ċċarat li l-kost għal riżervi ta’ kapaċità li huma ġustifikati oġġettivament setgħu jiġu inklużi matul il-kalkolazzjoni tal-imposti.

(76)

F'10 mis-16-il Länder, impriżi privati biss huma fdati bir-rimi ta’ materjal tal-kategoriji 1 u 2 (Berlin, Brandenburg, Bremen, Hamburg, Mecklenburg-Vorpommern, Niedersachsen, it-Tramuntana ta’ Rhine-Westphalia, Sachsen-Anhalt, Schleswig-Holstein, u Thüringen). Fi wħud minn dawn il-Länder hemm reġjuni b'numri partikolarment kbar ta’ bhejjem, bħal fin-Niedersachsen, it-Tramuntana ta’ Rhine-Westphalia u Schleswig-Holstein. Fil-Bavaria u Hessen, ir-rimi tal-annimali hu provdut parzjalment minn impriżi privati.

(77)

F'dawk il-Länder fejn il-kwerelant jew impriżi affiljati huma fdati bir-rimi ta’ prodotti sekondarji tal-annimali, jiġifieri Mecklenburg-Vorpommern, Sachsen-Anhalt u Thüringen, l-awtorità pubblika u l-impriża fdata jaqblu fuq il-kapaċita annwali massima li għandu jipprovdi l-impjant tar-rimi. Dawk il-kapaċitajiet huma kkunsidrati suffiċjenti biex ilaħħqu mad-domanda iktar għolja fil-każ ta’ epidemija. Il-kwerelant jaf li f'ċerti proċeduri ta’ akkwisti pubbliku fit-Tramuntana ta’ Rhine-Westphalia il-livell tal-kapaċità ta’ riżerva hi diġà ffissata. L-eżempju ċitat hu Kreis-Steinfurt, fejn ir-riżerva hi ffissata bħala 5 % tal-għadd tal-irjus tal-bhejjem tas-sena preċedenti. L-imposti tar-rimi huma kkalkolati sabiex il-ikostijiet fissi kollha tal-impjanti tar-rimi jkunu kompletament iffinanzjati mill-ġdid mill-miżati tar-rimi li jitħallsu mill-bdiewa u l-biċċeriji.

(78)

Konsegwentement, il-prattika f'Länder oħra turi li l-kostijiet totali tal-impjant tar-rimi — inklużi kwalunkwe kostijiet għal riżerva għall-epidemiji — jistgħu jkunu finanzjati kompletament mid-dħul mill-miżati u li mhux meħtieġ kumpens addizzjonali mill-baġit pubbliku.

(79)

Il-kwerelant jargumenta li ZT tuża l-kontributi annwali biex tiffinanzja t-telf mhux biss mill-operazzjonijiet normali iżda wkoll minħabba ż-żamma ta’ kapaċità żejda li iktar tard tista' tintuża għal skopijiet esterni.

(80)

Paragun bejn l-ammont ta’ kapaċità żejda li ZT indikat fl-offerta tagħha fil-proċedura ta’ akkwist pubbliku fit-Tramuntana ta’ Hessen fl-2009 u l-ammont ta’ kapaċità żejda deskritta fl-istudju Fraunhofer (28) juru tnaqqis sostanzjali fil-kapaċità żejda ta’ ZT fuq medda ta’ żmien. Waqt li l-kapaċità żejda, u għalhekk ir-riżerva għall-epidemiji allegatament neċessarja, xorta waħda ammontaw għal madwar 50 % tal-kapaċità totali fl-2005 skont l-istudju Fraunhofer, sal-2009 dinn kienet naqset għal biss 35 %, kif jidher mill-offerta ta’ ZT fil-proċedura ta’ akkwist pubbliku f'Hessen tat-Tramuntana.

(81)

Jekk wieħed jassumi li ZT kienet fil-fatt fdata bil-kompitu li żżomm riżerva għall-epidemiji u li 50 % tal-kapaċità medja ta’ ZT kienet riżerva adegwata (kif ikkonkluda l-istudju Fraunhofer), ZT ma kinitx tkun kapaċi tipparteċipa fil-proċedura ta’ akkwist pubbliku fit-Tramuntana ta’ Hessen jew li tassumi obbligi oħra ta’ rimi f'Baden-Württemberg.

(82)

Madankollu, peress illi ZT fil-fatt rebħet il-kuntratt taħt il-proċedura ta’ akkwist pubbliku fit-Tramuntana ta’ Hessen u ħadet fuqha nnifisha l-provvista ta’ servizzi addizzjonali ta’ rimi, allura din bil-fors li użat parti mir-riżerva għall-epidemiji li allegatament hemm bżonnha għall-operazzjonijiet normali. Għaldaqstant hu evidenti li l-kontributi annwali ffinanzjaw il-kostijeit tal-kapaċità żejda li ma kinitx meħtieġa bħala riżerva għall-epidemiji.

(83)

Il-kwerelant qabbel il-livell tar-riżerva għall-epidemiji ta’ ZT mal-kapaċità żejda disponibbli f'Länder oħra u wasal għall-konklużjoni li r-riżerva għall-epidemiji ta’ ZT kienet erba' jew ħames darbiet ogħla mill-kapaċità żejda disponibbli bħala riżerva għall-epidemiji f'Länder oħra, b'kunsiderazzjoni għad-differenzi fin-numri tal-bhejjem. Il-kontributi annwali kienu għalhekk qed jiffinanzjaw il-kapaċità żejda b'eċċess sostanzjali tar-riżerva għall-epidemiji neċessarja meta wieħed jagħmel paragun mal-prattiki f'Länder oħra. Din il-kapaċità żejda kienet imbagħad disponibbli biex tintuża iktar tard għal għanijiet kummerċjali — bħal biex tieħu sehem fil-proċedura ta’ offerti f'Hessen tat-Tramuntana u Ċentrali.

(84)

Il-kwerelant jinnota li ZT ma ngħatatx il-kuntratt permezz ta’ proċedura ta’ akkwist pubbliku, mentri fil-maġġoranza ta’ Länder oħra tintuża proċedura ta’ sejħa għall-offerti pubblika biex jintagħżel il-fornitur l-iktar effiċjenti. Barra minn dan, ma saritx analiżi tal-kostijiet biex jitqabblu l-kostijiet ta’ ZT ma’ dawk ta’ intrapriża tipika mmexxija tajjeb.

(85)

Fil-fehma tal-kwerelant, ma kienx hemm ostakoli legali li jipprevjenu proċedura pubblika ta’ offerti fir-Rhineland-Palatinate.

(86)

Il-kwerelant isostni li l-effett ta’ distorsjoni tal-pagamenti ta’ kontributi annwali jistgħu jintwerew bil-mod kif is-sejħa għall-offerti pubblika mxiet fit-Tramuntana ta’ Hessen.

(87)

Qabel il-proċedura ta’ sejħa għall-offerti Tierbeseitigungsanlage Schäfer GmbH (“TBA Schäfer”), affiljat tal-kwerelant, kien fdat bir-rimi tal-materjali tal-kategoriji 1 u 2. Madankollu, TBA Schäfer ma kienx kapaċi jikkompeti b'suċċess ma’ ZT fil-proċedura għall-offerti tal-2009. Waqt li l-offerta ta’ TBA Schäfer kellha tkun ibbażata fuq l-kostijiet totali, ZT setgħet toffri miżati irħas mill-kostijiet minħabba li parti mill-kostijiet fissi kienu diġà ffinanzjati mill-kontributi annwali.

(88)

Evidenza ulterjuri li ZT għamlet offerta bi prezz iktar baxx mill-kost fl-offerta għal Hessen tat-Tramuntana tirriżulta minn tqabbil mal-imposti li ZT tapplika fit-territorju tagħha. Hemmhekk l-imposta hi ta’ EUR 328 għal kull tunnellata, waqt li l-offerta ta’ ZT fl-offerta għat-tramuntana ta’ Hessen kienet biss EUR 208 għal kull tunnellata. Peress li m'hemmx differenzi sinifikanti fil-kostijiet ta’ ġbir bejn iż-żewġ reġjuni, huwa diffiċli li wieħed jifhem kif ZT setgħet tagħmel offerta fejn tiċċarġja madwar terz inqas fit-Tramuntana ta’ Hessen milli fit-territorju tagħha għal eżattament l-istess servizz.

(89)

Peress li l-bażi tal-kost ta’ TBA Schäfer kienet magħrufa pubblikament minħabba offerti preċedenti, kien faċli għal ZT li tagħmel offerta ta’ EUR 208 għal kull tunnellata, EUR 4 biss inqas mill-offerta ta’ TBA ta’ EUR 212 għal kull tunnellata, u għaldaqstant li tirbaħ il-kuntratt.

(90)

Il-kwerelant jenfasizza li l-inċentiv għall-biċċeriji biex jisseparaw materjal tal-kategorija 3 minn materjal tal-kategoriji 1 u 2 hu mgħawweġ fir-Rhineland-Palatinate minħabba l-politika ta’ ZT ta’ pprezzar ta’ somma waħda. Konsegwentement, kwantità sostanzjali ta’ materjal tal-kategorija 3 li kieku setgħet tkun ipproċessata f'ikel għall-annimali domestiċi tintrema flimkien ma’ materjal inferjuri tal-kategoriji 1 u 2 (29).

(91)

barra minn hekk, l-ammont ta’ materjal tal-kategorija 3 imneħħi mis-suq minħabba l-politika tal-ipprezzar ta’ ZT kien ogħla minn dak assunt mill-Kummissjoni fil-valutazzjoni preliminari tagħha tas-suq. Il-paragrafu 33 tad-deċiżjoni għall-ftuħ tal-proċedura jgħid li materjali tal-kategorija 3 kienu separati f'72 % tal-qatliet kollha fir-Rhineland-Palatinate. Madankollu din il-figura hi bbażata biss fuq in-numru ta’ qatliet. Kieku wieħed kellu jikkunsidra l-fatt li l-qtil ta’ baqra jipproduċi ammont ferm ogħla ta’ materjal tal-kategorija 3 milli l-qtil ta’ majjal, ir-riżultat ikun li 45 % biss tal-materjal tal-kategorija 3 ikun isseparat. Konsegwentement, id-dsitorsjoni tas-suq dovut għall-politika tal-ipprezzar ta’ ZT ikun ferm aktar ikbar minn dak li kien mistenni preċedentement.

(92)

Il-kummenti ta’ ZT jikkoinċidu fil-punti relevanti ma’ dawk magħmula mill-Ġermanja, li huma deskritti fis-Sezzjoni segwenti. Għaldaqstant il-kummenti ta’ ZT mhumiex imniżżla separatament sabiex tiġi evitata repetizzjoni mhux meħtieġa.

(93)

Il-Ġermanja ċaħdet li l-kontribut annwali impost taħt il-Verbandsordnung taż-ZT jikkostitwixxi għajnuna illegali peress illi l-kriterji ta’ Altmark huma sodisfatti. Il-Ġermanja targumenta wkoll li l-għajnuna hi kompatibbli mas-suq intern peress li l-kontribut annwali ma jaqbiżx il-kost biex tinżamm riżerva għall-epidemiji u l-kostijiet tat-tindif ta’ siti li kienu jintużaw qabel.

(94)

L-ewwelnett il-Ġermanja ssostni li l-proviżjoni ta’ riżerva għall-epidemiji hi servizz ta’ interess ekonomiku ġenerali, billi targumenta li r-rimi ta’ materjal tal-kategoriji 1 u 2 hu obbligu statutorju fuq l-awtoritajiet lokali.

(95)

L-awtoritajiet lokali kienu fdaw it-twettiq ta’ dan l-obbligu statutorju liż-ZT, entità taħt il-liġi pubblika b'kapaċità legali. L-interess ekonomiku ġenerali jikkonsisti fil-fatt li r-rimi xieraq ta’ materjal tal-kategoriji 1 u 2 iservi biex jipproteġi s-saħħa tal-bniedem. Dan japplika l-iktar fil-każ ta’ epidemija.

(96)

Kellu jkun ikkunsidrat il-fatt li l-finanzjament hu anke possibbli taħt il-linji gwida Komunitarji dwar it-TSE u l-linji gwida dwar l-għajnuna agrikola 2007-2013 ma setgħux jinżammu kontra ż-ZT. Il-linji gwida jirregolaw biss il-finanzjament tal-kostijiet tar-rimi ta’ karkassi tal-annimali (bhejjem mejta), iżda mhux speċifikament il-kostijiet għaż-żamma ta’ riżerva għall-epidemiji. Għaldaqstant il-kontribut annwali ma jingħaddx flimkien mal-għajnuna approvata għat-TSE.

(97)

Addizzjonalment, meta wieħed jiġi għar-rimi ta’ bhejjem mejta, il-bdiewa jistgħu jkunu identifikati bħala niġġiesa, mentri fil-każ tal-kostijiet tar-riżerva għall-epidemiji, in-niġġiesa ma jistgħux ikunu identifikati faċilment.

(98)

Iż-ZT kienet fdata bil-kompitu tar-rimi ta’ prodotti sekondarji ta’ annimali mit-TierNebGAG RP mill-1979.

(99)

Id-daqs tar-riżerva neċessarja għall-epidemiji u l-parametri għall-kalkolazzjoni tal-kostijeit netti kienu mniżżla fil-Verbandsordnung emendat taż-ZT tal-1 ta’ Frar 2010. Dawn kienu bbażati fuq l-istudju Fraunhofer.

(100)

Il-Ġermanja tenfasizza li anke qabel ma kien emendat il-Verbandsordnung fl-2010, il-kontributi annwali imposti miż-ZT fuq il-membri tiegħu kienu ffissati b'mod oġġettiv u trasparenti. B'mod partikolari, il-pjan tan-negozju għal kull sena kien adottat mill-assemblea ġenerali taż-ZT f'proċedura pubblika, approvata mill-awtorità ta’ sorveljanza, u ppublikat fil-gazzetti uffiċjali ta’ Rhineland-Palatinate, Hessen, u Saarland.

(101)

Fl-opinjoni tal-Ġermanja, ir-riżerva miżmuma biex tlaħħaq mal-epidemiji hi neċessarja għall-protezzjoni tas-saħħa tal-bniedem fil-każ ta’ epidemija.

(102)

Skont il-Ġermanja d-daqs tar-riżerva għall-epidemiji mniżżla fil-Verbandsordnung emendat tat-2 ta’ Frar 2010 kienet ibbażata fuq l-istudju Fraunhofer. Wara l-bidu tal-proċedura, il-Ġermanja kellha studju ieħor (30) magħmul mill-Institut für Strukturforschung und Planung in agrarischen Intensivgebieten (“l-istudju ISPA-RP”).

(103)

L-istudju Fraunhofer stima l-ammont antiċipat tal-materjal f'diversi sitwazzjonijiet, b'konsiderazzjoni tal-probabbiltà tagħhom. L-istudju ISPA-RP isegwi approċċ iddettaljat metodiku biex jagħmel mudell tas-sitwazzjonijiet diversi tal-epidemiji fil-każ ta’ tifqigħa ta’ marda tal-ilsien u d-dwiefer (FMD) u d-deni tal-ħnieżer klassiku (CSF).

(104)

Iż-żewġ studji waslu għall-konklużjoni li l-kapaċita totali disponibbli taż-ZT kienet biżżejjed għall-ipproċessar tal-kwantitajiet li jirriżultaw minn epidemiji kemm ta’ terminu qasir kif ukoll dawk li jdumu iktar flimkien ma’ kwantitajiet normali ta’ materjal intern u estern, li jammontaw għal madwar 1 700 tunnellata fil-ġimgħa.

(105)

L-istudju ISPA juri li fil-każ ta’ epidemiji fuq medda qasira ta’ żmien, u jekk wieħed jassumi li jinvolvu materjal addizzjonali ta’ madwar 200 tunnellata kull fi żmien jumejn sa ħamest ijiem, il-materjal żejjed jista' jkun ipproċessat faċilment flimkien mal-kwantità normali fl-użu tal-kapaċità żejda ta’ kull ġimgħa sa 1 523 tunnellata f'operazzjoni ta’ tliet xiftijiet fuq ħamest ijiem, mingħajr il-bżonn li jirrikorru għax-xiftijiet addizzjonali fi tmiem il-ġimgħa.

(106)

Anke fil-każ ta’ epidemiji li jaffettwaw partijiet relattivament kbar taż-żona koperta mill-assoċjazzjoni, il-kwantitajiet addizzjonali ta’ bejn 1 300 u 1 800 tunnellata li jirriżultaw fuq medda ta’ tmien ġimgħat jistgħu jkunu pproċessati kieku x-xiftijiet ta’ tmiem il-ġimgħa kienu maħduma sabiex il-kapaċità żejda tal-medda qasira taż-żmien sa 2 819-il tunnellata fil-ġimgħa kienet disponibbli (ara Tabella 3 fis-sezzjoni 9.3.1).

(107)

Dan ix-xenarju assuma tifqigħa ta’ FMD madwar iż-żona koperta mill-assoċjazzjoni b'rata ta’ qatliet tal-għaxra fil-mija, kif ġara fil-Brittanja fl-2001. F'dak il-każ it-throughput ikun ta’ madwar 1 300 tunnellat fil-ġimgħa fuq perjodu ta’ 18-il ġimgħa. L-istudju ISPA-RP wera li b'operazzjoni ta’ tliet xiftijiet fuq ħamest ijiem, l-impjanti ta’ ZT setgħu wkoll jipproċessaw dawk il-kwantitajiet minbarra l-kwantità normali (ara Tabella 3 fis-sezzjoni 9.3.1).

(108)

L-istudji ppreżentati wrew li l-kapaċità totali disponibbli b'operazzjoni ta’ ħamest ijiem fuq tliet xiftijiet hi biżżejjed biex tipproċessa kwantitajiet addizzjonali li jirriżultaw minn epidemiji fuq żmien qasir u anke epidemiji li jdumu iktar flimkien mal-kwantitajiet normali. F'ħafna mix-xenarji ma jkunx hemm bżonn għar-rikors għax-xiftijiet addizzjonali disponibbli fil-weekends taħt operazzjoni ta’ kapaċità totalli għal sitt ġimgħat sa 12-il ġimgħa.

(109)

L-istudji juru li l-konklużjoni li ZT għandha biżżejjed kapaċità totali b'operazzjoni ta’ tliet xiftijiet fuq ħamest ijiem għall-ipproċessar tal-kwantitajiet normali li jirriżultaw u l-materjal antiċipat minn epidemiji li jdumu iktar. Għaldaqstant il-kapaċità totali li hi disponibbli attwalment hi kkunsidrata xierqa għall-bżonnijiet iktar milli eċċessiva.

(110)

Il-kalkolazzjonijiet ippreżentati mill-Ġermanja għall-kost tar-riżerva għall-epidemiji jsegwu l-approċċ tal-istudju Fraunhofer. It-tqassim tal-kostijiet tal-kapaċità bejn operazzjonijiet normali u r-riżerva għall-epidemiji kien determinat skont l-utilizzazzjoni medja tal-kapaċità totali disponibbli f'operazzjoni ta’ ħamest ijiem bi tliet xiftijiet. Bħala medja ħarġet li ZT tuża madwar 50 % tal-kapaċità totali disponibbli f'operazzjoni ta’ tliet xiftijiet fuq ħamest ijiem.

(111)

Abbażi ta’ dan il-livell ta’ utilizzazzjoni, madwar 50 % tal-kostijet tal-kapaċità kienu allokati lill kull operazzjoni normali u r-riżerva għall-epidemiji kemm għall-ġbir kif ukoll għall-ipproċessar (31). Il-kost li jirriżulta tar-riżerva għall-epidemiji hu kif ġej:

Tabella 2

Il-kost għar-riżerva għall-epidemiji skont il-Ġermanja għall-perjodu 2000-2009

(112)

Għandu jkun notat li madwar 45 % biss tal-kostijeit tal-kapaċità kienu allokati għar-riżerva għall-epidemiji fl-2000 u l-2001, u fl-2009 inklużjoni tal-kuntratt mit-Tramuntana u ċ-Ċentru ta’ Hessen naqqas ir-riżerva għall-epidemiji b'madwar wieħed minn kull ħamsa. L-ebda kalkolu tal-kost tar-riżerva ghall-epidemiji mhu disponibbli għall-1998 u l-1999.

(113)

Fis-snin murija, apparti fl-2009, il-kontributi annwali mħallsa lil ZT mill-membri tagħha kienu iktar baxxi mill-kostijeit tar-riżerva għall-epidemiji murija fit-Tabella 2. Fl-2009 il-kontribut annwali finali kien għoli daqs il-kostijiet tar-riżerva.

(114)

Il-Ġermanja tinnota li l-kost għal forniment ta’ riżerva għall-epidemiji ma kinux inklużi fil-kalkolu tal-imposta għall-użu għax dan ma kienx legalment possibbli. Għalkemm l-awtoritajiet lokali jistgħu jimponu imposti għal-użu ta’ faċilitajiet u impjanti pubbliċi sabiex ikopru l-kostijiet tagħhom taħt § 7 tal-Kommunalabgabengesetz Rhineland-Palatinate (KAG RP: L-Att dwar l-Imposti tal-Awtorità Lokali tar-Rhineland-Palatinate), ma jridx ikun hemm disparità ovvja bejn il-produzzjoni tal-faċilità jew l-impjant u l-imposta. Skont § 8 tal-KAG RP il-kostijiet li fuqhom huma bbażati l-imposti għall-użu għandhom ikunu determinati skont il-prinċipji tan-negozju tal–kontabbiltà abbażi tal-kost. Madankollu, skont il-Ġermanja, ir-rimi tal-materjal tal-kategoriji 1 u 2 biss jifforma l-bażi għall-imposti, mhux il-provvediment tal-kapaċità għall-epidemiji. Dan tal-aħħar mhux provdut bħala servizz għall-persuni taxxabbli individwali, iżda biex imur kontra l-perikli futuri għall-pubbliku ġenerali.

(115)

Fuq talba mill-Kummissjoni l-Ġermanja għamlet stħarriġ nazzjonali dwar il-prattiki segwiti biex tiġi determinata u ffinanzjata r-riżerva għall-epidemiji.

(116)

Fl-istati kollha tal-Ġermanja — ħlief fiż-żona koperta minn ZT — ir-riżerva għall-epidemiji hi koperta mill-kapaċità żejda operazzjonali disponibbli matul il-ġimgħa u fi tmiem il-ġimgħa. Abbażi tal-istudju Böckenhoff dwar il-ġlieda kontra l-epidemiji, normalment m'hemmx investiment addizzjonali fil-kapaċità. Il-kapaċità żejda disponibbli bħala t-tielet xift fost il-ġimgħa u fix-xiftijiet ta’ tmiem il-ġimgħa hija biżżejjed għar-riżerva għall-epidemiji. Fil-frattempt metodi ta’ kalkolu alternattivi qed ikunu applikati wara studji esperti, bħall-istudju ISPA għan-Niedersachsen (32) (“l-istudju ISPA-NS”), jew permezz ta’ ftehim mal-gruppi interessati kkonċernati. Madankollu, il-konklużjoni fundamentali tal-istudju Böckenhoff għadha treġi, jiġifieri li l-investiment żejjed fil-kapaċità żejda mhux neċessarja.

(117)

Il-kost tal-kapaċità żejda operatzzjonali hi ffinanzjata permezz ta’ drittijiet jew imposti (skont il-forma legali tal-operatur). Hemm arranġamenti differenti, skont taħt liema mudell jinqasam il-kost tal-kapaċità żejda operazzjonali bejn ir-rimi tal-bhejjem mejta u l-iskart tal-biċċeriji.

(118)

Fir-rigward tal-għajnuna lill-bdiewa għar-rimi tal-bhejjem mejta skont il-linji gwida tal-għajnuna agrikola 2007–2013, l-assistenza mogħtija mill-Istat f'ħafna mill-Länder l-oħra hi bejn 67 % u 75 % tal-ispiża għar-rimi tal-bhejjem mejta.

(119)

Skont il-Ġermanja, din il-ħarsa ġenerali turi li relattivament mhux importanti jekk il-kostijiet ta’ riżerva għall-epidemiji hux inkluż fil-kalkolu tad-drittijiet u l-imposti u jekk humiex iffinanzjati permezz ta’ kontribut annwali bħal fir-Rhineland-Palatinate. Li jimporta hu min attwalment iġarrab il-kostijiet. Fl-aħħar nett, proporzjoni kbir tal-kapaċità żejda hi ffinanzjata pubblikament ukoll permezz ta’ għajnuna skont il-linji gwida Komunitarji dwar it-TSE jew il-linji gwida dwar l-għajnuna agrikola tal-2007-2013.

(120)

Il-Ġermanja temmen li ma hemm l-ebda rekwiżit taħt il-liġi Ewropea biex jinfetaħ suq għar-rimi ta’ materjal tal-kategoriji 1 u 2 permezz ta’ proċeduri ta’ akkwist pubbliku. Dan kien ikkonfermat ukoll mill-Qorti tal-Ġustizzja (33).

(121)

Il-Ġermanja ssostni li ma hemm l-ebda distorsjoni tal-kompetizzjoni fis-swieq esterni f'dan il-każ.

(122)

Il-Ġermanja ssostni li ma kien hemm l-ebda distorsjoni ta’ kompetizzjoni fil-każ ta’ materjal tal-kategorika 3 bħala riżultat tal-kontribut annwali impost minn ZT, peress li ma kienx hemm sussidju inkroċat.

(123)

M'hemm l-ebda bażi għal dak li qiegħed jgħid il-kwerelant, i.e. li minħabba l-politika tal-ipprezzar ta ZT, 45 % biss tal-materjal tal-kategorija 3 hu separat. Tali kwantitajiet għolja ta’ materjal tal-kategorija 3 qatt ma kienu pproċessati minn ZT, kif jidher minn ħarsa lejn l-istatistika relevanti. Ir-rata ta’ separazzjoni ta’ 72 % għall-2009 ċitata mill-Kummissjoni fid-deċiżjoni biex tinbeda l-proċedura tista' tkun ikkonfermata.

(124)

Għandu jkun innotat ukoll li fiż-żona koperta mill-assoċjazzjoni 85 % tal-qatliet isiru f'sitt impjanti fejn issir is-separazzjoni fis-sens l-iktar ampju. Il-kwerelant hu attiv f'dawn l-impjanti u jikseb materjal tal-kategorija 3 separat minnhom. Għaldaqstant il-kwerelant għandu aċċess għas-swieq tal-kategorija 3 u għandu sehem konsiderevoli ta’ dawn is-swieq.

(125)

Il-fatt li ZT tapplika imposti differenti fit-Tramuntana u ċ-Ċentru ta’ Hessen minn dawk fiż-żona koperta mill-assoċjazzjoni ma jippruvax l-eżistenza ta’ kwalunkwe distorsjoni tal-kompetizzjoni Id-differenzi fil-finanzjament huma dovuti għal rekwiżiti legali differenti fir-rigward tal-kalkoli tagħhom. Skont is-Sezzjoni 3(1) tat-TierNebG, ir-rimi ta’ prodotti sekondarji tal-annimali tal-kategoriji 1 u 2 fil-Ġermanji hu r-responsabbiltà tal-awtoritajiet reġjonali u lokali kompetenti taħt il-liġi tal-istat. Konsegwentement il-finanzjament jista' jkun irregolat b'mod differenti skont id-dispożizzjonijiet relevanti fuq livell ta’ Land u lokali.

(126)

Jekk ir-rimi ta’ prodotti sekondarji tal-annimali ma jsirx minn dawk responsabbli għar-rimi u l-kompitu hu fdat lill-partijiet terzi - bħat-Tramuntana u ċ-Ċentru ta’ Hessen — ir-regoli ta’ kalkolazzjoni huma ggvernati mhux mill-Att dwar l-Imposti tal-Awtoritajiet Lokali in kwistjoni, iżda mill-Leitsätze für die Preisermittlung aufgrund von Selbstkosten [LSP — Linji gwida biex ikunu determinati l-prezzijiet ta’ kemm jiswa l-oġett/servizz (cost price)] (34).

(127)

Hemm differenzi kbar bejn il-KAG RP u l-LSP, speċjalment fir-rigward tal-ammont tal-kostijiet tal-imgħax li jistgħu jkunu inklużi fl-imposti/fil-miżati, u dawn id-differenzi huma sinifikanti għal ZT, peress li ffinanzjat l-investimenti tagħha konsiderevolment permezz ta’ self u ħallset ammont sostanzjali ta’ imgħax fuqhom kull sena.

(128)

Waqt li ZT setgħet tinkludi dawn l-interessi fil-kalkolu tal-imposti taħt § 8 KAG RP, l-LSP ippermetta biss l-imposti f'Hessen tat-Tramuntana u Ċentrali biex ikunu bbażati fuq imgħax ikkalkolat relattiv għall-medja tal-kapital operatorju neċessarju. Għaldaqstant kien impossibbli li titrasferixxi l-kost totali tal-pagamenti attwali tal-imgħax.

(129)

Dak li l-kwerelant sostna, i.e. li t-TBA Schäfer ma rebaħx il-proċedura ta’ selezzjoni f'Hessen tat-Tramuntana u Ċentrali minħabba sussidju inkroċat permezz tal-kontributi annwali hu wkoll mingħajr ebda bażi. L-offerta iktar għolja magħmula mit-TBA Schäfer kienet dovuta għall-fatt li l-istima tat-TBA Schäfer tal-introjtu mill-produzzjoni kienet baxxa wisq u hu kellu wkoll iħallas kostijiet amministrattivi u kontributi tal-grupp ogħla. Min-naħa l-oħra ZT kienet stmat id-dħul mill-produzzjoni kif support u, peress li ma kinitx parti minn grupp, ma kellhiex bżonn tagħmel kontributi tal-grupp.

(130)

Il-Ġermanja ssostni li parti mill-kontribut annwali impost minn ZT iservi biex jiffinanzja l-kostijiet għat-tindif ta’ żewġ siti kontaminati, Sohrschied u Sprendlingen-Gensingen.

(131)

Kontaminazzjoni tal-ħamrija u l-ilma ta’ taħt l-art kienet inġemgħet fiż-żewġ siti kontaminati permezz tal-użu ta’ idrokarburi mis-sidien jew operaturi preċedenti. Iż-żewġ proprjetajiet saru ta’ ZT meta twaqqfet fl-1979.

(132)

Taħt id-deċiżjonijiet dwar it-tindif meħuda mill-gvern tad-distrett ta’ Koblenz tal-21 ta’ April 1997 u l-31 ta’ Marzu 1998, ZT kienet obbligata tneħħi l-kontaminazzjoni. Kundizzjonijiet ulterjuri kienu mposti fir-rigward tat-tindif tas-sit ta’ Sprendlingen-Gensingen f'deċiżjoni supplimentari tat-13 ta’ Lulju 2001. Il-kostijiet tat-tindif għall-perjodu relevanti mill-1998 sal-2010 ammontaw għal total ta’ EUR 2 413 049,36 għaż-żewġ siti.

(133)

Il-Ġermanja tirrikonoxxi li ZT hi responsabbli għall-kostijiet tat-tindif fis-sit ta’ Sprendlingen-Gensingen skont id-deċiżjoni dwar it-tindif tal-31 ta’ Marzu 1998. Madankollu, tikkonsidra li mill-perspettiva tal-liġi dwar l-għajnuna mhux ġust għal ZT li tkun kompletament responsabbli għall-kostijiet tat-tindif peress li responsabbiltà bla limitu twassal għal trattament inugwali mqabbel ma’ impriżi privati skont każistika Ġermaniża iktar reċenti.

(134)

Wara d-deċiżjoni tal-Bundesverfassungsgericht [Qorti Kostituzzjonali Federali] tas-16 ta’ Diċembru 2000 (35), impriża privata tkun responsabbli taħt il-liġi nazzjonali biss sal-limitu ta’ dak li hu raġonevoli. Skont il-Bundesverfassungsgericht dan il-limitu jista' jintlaħaq biss jekk ir-responsabbiltà taqbeż il-valur tal-proprjetà. Lil hinn minn dan il-limitu, ir-responsabbiltà ma tistax iktar titqies bħala dispożizzjoni proporzjonata sostantiva u li tillimita għall-għanijiet ta’ protezzjoni tal-proprjetà garantita fit-tieni sentenza tal-Artikolu 14(2) tal- Grundgesetz [Liġi Bażika] Ġermaniża. Madankollu, peress li ZT, bħala persuna ġuridika taħt il-liġi pubblika, ma tistax tinvoka d-drittjijet mogħtija lill-persuni privati taħt il-Ligi Bażika Ġermaniża, din il-limitazzjoni tar-responsabbilità ma tapplikax għal ZT.

(135)

Skont il-Ġermanja, is-sit ta’ Sprendlingen-Gensingen għandu valur tas-suq negattiv peress li l-valur stmat fuq il-kotba fuq il-karta tal-bilanċ fil-31 ta’ Diċembru 2009 kien EUR 128 500,00, waqt li l-kostijiet għat-tindif fil-frattempt għolew sa total ta’ EUR 1 542 315,85. Dan imur lil hinn mil-limitu ta’ responsabbilità deskritt hawn fuq.

(136)

Il-finanzjament ta’ kostijiet tat-tindif lil hinn mil-limitu ta’ responsabbilità permezz tal-kontribut annwali għandu jitqies bħala għajnuna kompatibbli taħt il-paragrafu 132 tal-linji gwida dwar l-għajnuna ambjentali, peress illi individwi privati jkollhom iħallsu biss il-kostijiet tat-tindif sal-valur fuq is-suq tal-proprjetà.

(137)

Għalkemm ZT kienet miżmuma responsabbli bħala n-niġġies taħt id-deċiżjoni dwar it-tindif tal-21 ta’ April 1997, il-Ġermanja tiddubita jekk ZT kinitx verament obbligata skont il-liġi Ġermaniża li tħallas għat-tindif minħabba l-ħsara magħmula mis-sid jew operatur preċedenti. Madankollu peress li l-fatti seħħew iktar minn 30 sena ilu, il-mistoqsija dwar ir-responsabbiltà ma tistax iktar tkun iċċarata.

(138)

Il-Ġermanja tikkunsidra li l-kontribut annwali, sakemm jikkontribwixxi lejn il-kostijiet tat-tindif għas-sit Sohrschied, jirrapreżentaw għajnuna kompatibblu taħt il-linji gwida tal-għajnuna ambjentali peress li ZT ma kellhiex tkun obbligata li tagħmel it-tindif.

(139)

Il-Ġermanja targumenta ulterjorment li l-valur tas-suq tas-sit Sohrschied hu wkoll negattiv u li l-limitu tar-responsabbiltà kien miksur anke f'dan il-każ.

(140)

Skont l-Artikolu 107(1) tat-TFUE kwalunkwe għajnuna mogħtija minn Stat Membru jew permezz ta’ riżorsi tal-Istat fi kwalunkwe forma li ttoħloq distorsjoni jew thedded li toħloq distorsjoni tal-kompetizzjoni billi tiffavorixxi ċerti impriżi jew il-produzzjoni ta’ ċerti prodotti mhix kompatibbli mas-suq intern minħabba li taffettwa jew thedded li taffettwa l-kummerċ bejn l-Istati Membri.

(141)

Il-Ġermanja ma tikkontestax li l-kontributi annwali mill-membri taż-Zweckverband huma riżorsi tal-Istat. Il-membri ta’ ZT huma distretti rurali u urbani fir-Rhineland-Palatina, is-Saarland, u Hessen. Peress li ZT qiegħda timponi kontribut annwali mill-membri tagħha permezz ta’ att amministrattiv, din il-miżura tinvolvi trasferiment dirett ta’ riżorsi tal-Istat. U peress li huma involuti atti amministrattivi, kontributi annwali jistgħu jkunu attribwiti lill-Istat.

(142)

L-ewwelnett il-benefiċjarju għandu jkun impriża. L-idea ta’ impriża tinkludi kwalunkwe entità li tagħmel attività ekonomika irrispettivament mill-istat ġuridiku tagħha u l-mod kif inhi ffinanzjata. Dan japplika mhux biss għall-impriżi privati iżda wkoll dawk pubbliċi (36). Kwalunkwe attività li tinvolvi offerta ta’ prodotti jew servizzi fuq suq speċifiku hi attività ekonomika (37). Peress li ZT toffri servizzi għar-rimi ta’ ċertu prodotti sekondarji tal-annimali bi tpattija għal konsiderazzjoni, ZT hi impriża.

(143)

Essenzjalment il-kontributi annwali jagħtu lil ZT vantaġġ ekonomiku peress li jnaqqsu n-nefqa kurrenti u mhumiex imqabbla ma’ twettiq xieraq. Madankollu, il-Ġermanja ssostni li l-kontributi kkompensaw lil ZT biss għall-kostijiet li kellha tagħmel minħabba l-obbligu li żżomm riżerva għall-epidemiji u li għalhekk ma kisbet l-ebda vantaġġ ekonomiku.

(144)

Fis-sentenza tagħha fil-każ ta’ Altmark, il-Qorti tal-Ġustizzja sostniet li l-kumpens għat-twettiq ta’ obbligu ta’ servizz pubbliku mhux għajnuna mill-Istat, i.e. ma jipprovdix il-benefiċjarju b'vantaġġ, sakemm ċerti kriterji huma sodisfatti b'mod kumulattiv (38).

(145)

Minħabba l-importanza tas-sentenza ta’ Altmark fil-każ preżenti, l-allegazzjoni tal-Ġermanja li l-kriterji ta’ Altmark huma sodisfatti ser tkun eżaminata fid-dettal separatament fis-sezzjoni 9.

(146)

Il-Ġermanja tħoss li s-suq għar-rimi ta’ materjal tal-kategoriji 1 u 2 miż-żona koperta mill-assoċjazzjoni mhux miftuħ għall-kompetizzjoni u li għaldaqstant kemm id-distorsjoni tal-kompetizzjoni kif ukoll l-effett fuq in-negozju bejn l-Istati Membri jistgħu jiġu esklużi.

(147)

Bħala bidu, il-Kummissjoni tinnota li hemm monopolji reġjonali għar-rimi ta’ materjal tal-kategoriji 1 u 2. Madankolli, ħafna mill-awtoritajiet kompetenti reġjonali u lokali jagħtu dawn il-monopolji permezz ta’ proċeduri ta’ akkwist pubbliku. Għaldaqstant hemm kompetizzjoni fuq is-suq. F'dan il-każ dan hu kkonfermat permezz tal-proċedura għall-akkwist pubbliku fit-Tramuntana u ċ-Ċentru ta’ Hessen.

(148)

Skont id-deċiżjoni tat-23 ta’ Frar 2011 dwar l-għajnuna mill-Istat tal-Ġermanja C58/06 (ex NN 98/05) għal Bahnen der Stadt Monheim (BSM) u Rheinische Bahngesellschaft (RBM) im Verkehrsverband Rhein-Ruhr (39), il-Kummissjoni għaldaqstant tikkunsidra li s-suq għar-rimi ta’ materjal tal-kategoriji 1 u 2 hu miftuħ għall-kompetizzjoni. Kemm il-liġi tal-Unjoni kif ukoll dik nazzjonali jħallu lill-awtoritajiet reġjonali u lokali fdati bir-rimi ta’ materjal tal-kategoriji 1 u 2 liberi biex jagħżlu jew li jsibu fornitur mis-suq u jafdawh b'kompitu permezz ta’ proċedura ta’ akkwist pubbliku jew li jagħmlu r-rimi huma nnifishom permezz ta’ soluzzjoni interna (40). Minkejja dak li tgħid il-Ġermanja li ZT tikkonforma mal-kriterji għal għotja interna (41), il-kontributi annwali jsaħħu l-pożizzjoni finanzjarja ta’ ZT vis-à-vis fornituri potenzjali oħra. Peress li fornituri mill-Istati Membri kollha jistgħu jieħdu sehem fil-proċeduri ta’ akkwist pubbliku, il-kontribuzzjoni tista' wkoll taffettwa n-negozju bejn l-Istati Membri.

(149)

Il-vantaġġi ekonomiċi mill-kontributi annwali huma wkoll mistennija jsaħħu l-pożizzjoni ta’ ZT fuq is-swieq fejn hemm kompetizzjoni diretta ma’ fornituri oħra (rimi ta’ materjal tal-kategorija 3, proċedura għall-akkwist pubbliku għar-rimi ta’ materjal tal-kategoriji 1 u 2 fit-Tramuntana u ċ-Ċentru ta’ Hessen).

(150)

Il-kontributi annwali jissodisfaw il-kundizzjonijiet għall-eżistenza tal-għajnuna skont id-definizzjoni fl-Artikolu 107(1) tat-TFUE. Is-sezzjoni li jmiss ser teżamina fid-dettal il-pretensjoni tal-Ġermanja li l-erba' kundizzjonijiet tas-sentenza ta’ Altmark huma sodisfatti.

(151)

L-ewwel kriterju ta’ Altmark jgħid li l-impriża benefiċjarja għandha jkollha obbligi ta’ servizz pubbliku biex twettaq, u li l-obbligi għandom ikunu definiti b'mod ċar.

(152)

L-ewwelnett għandu jkun notat li għandha ssir distinzjoni bejn il-perjodu mill-1979 sal-2008 u l-perjodu mill-2009 sal-2011.

(153)

Qabel ma kien emendat il-Verbandsordnung fit-2 ta’ Frar 2010 b'effett retroattiv mill-1 ta’ Jannar 2009 ZT kien fdat ġeneralment biss bir-rimi ta’ materjal tal-kategoriji 1 u 2. Il-Verbandsordnung qadim ma speċifikax l-ebda obbligu li jżomm riżerva għall-epidemiji. Għaldaqstant ma kien hemm l-ebda obbligu definit b'mod ċar li tinżamm riżerva għall-epidemiji fid-definizzjoni tal-ewwel kriterju ta’ Altmark.

(154)

Bil-Verbandsordnung emendat apparti l-obbligu li jintrema materjal tal-kategoriji 1 u 2 hemm issa ukoll obbligu espliċitu biex ZT iżżomm riżerva għall-epidemiji.

(155)

Fdan li ġej il-Kummissjoni turi li la l-obbligu ta’ ZT li jarmi materjal tal-kategoriji 1 u 2 u lanqas l-obbligu tiegħu li jżomm riżerva għall-epidemiji ma’ jistgħu jiġġustifikaw il-kontributi annwali bħala pagamenti ta’ kumpens mill-Istat skont id-definizzjoni tal-ewwel kriterju ta’ Altmark.

(156)

Il-BVerwG sostna li skont ir-Regolament (KE) Nru 1069/2009 u § 3(1) TierNebG ir-rimi ta’ materjal tal-kategorija 1 u 2 hu obbligu tas-servizz pubbliku u għaldaqstant servizz ta’ interess ekonomiku ġenerali. Il-BVerwG ta importanza partikolari għall-fatt li skont il-liġi Ġermaniża r-rimi ta’ materjali hu kompitu pubbliku obbligatorju, u pproċeda mis-suppożizzjoni li sa dak il-punt ZT qed jeżerċiza poteri pubbliċi. Il-BVerwG sostna li l-obbligu tas-servizz pubbliku inkluda wkoll l-proviżjoni ta’ riżerva għall-epidemiji (42).

(157)

Il-Ġermanja tikkondividi din l-opinjoni u targumenta wkoll li r-rimi ta’ materjal tal-kategoriji 1 u 2 u l-proviżjoni ta’ riżerva għall-epidemiji jservu biex jipproteġu s-saħħa tal-bniedem.

(158)

Peress li r-rimi ta’ materjal tal-kategoriji 1 u 2 huwa obbligu tas-servizz pubbliku, il-BVerwG u l-Ġermanja kkunsidraw il-kontributi annwali ġustifikati peress li rrapreżentaw kumpens mill-Istat għall-kostijiet imġarrba minn ZT bħala riżultat ta’ dan l-obbligu.

(159)

Kif spjegat fil-paragrafu 13 tal-linji gwida tal-Unjoni dwar l-għajnuna mill-Istat li hi mogħtija bħala kumpens għat-twettiq ta’ servizzi pubbliċi (43) (“linji gwida tal-Unjoni dwar is-SIEĠ”), il-Qorti tal-Ġustizzja sostniet b'mod konsistentii li l-Istati Membri għandhom marġini wiesgħa ta’ diskrezzjoni fir-rigward tan-natura ta’ servizzi li jistgħu jkunu klassifikati bħala ta’ interess ekonomiku ġenerali, ħlief fis-setturi fejn hemm regoli tal-Unjoni speċifiċi li jirregolaw dan.

(160)

Il-Qorti tal-Ġustizzja enfasizzat li attività hi ta’ interess ekonomiku ġenerali biss jekk għandha karatteristiċi speċjali meta mqabbla ma’ interess ekonomiku ġenerali ta’ attivitajiet ekonomiċi oħra (44).

(161)

Fil-GEMO il-Qorti tal-Ġustizzja imbagħad kellha tittratta l-mistoqsija ta’ jekk il-bdiewa u l-biċċeriji għandhomx iħallsu kompletament il-kostijiet tar-rimi ta’ bhejjem mejta u skart tal-biċċeriji jew hekk l-Istat għandux iħallas il-kost abbażi li dan kien servizz ta’ interess ekonomiku ġenerali. Fid-deċiżjoni tagħha il-Qorti sostniet li l-bdiewa u l-biżżeriji għandhom ikopru l-kostijiet kollha (45).

(162)

Il-Qorti tal-Ġustizzja sabet li l-piż finanzjarju li jkun hemm minħabba r-rimi ta’ bhejjem mejta u skart tal-biċċeriji hu element ta’ kost li hu inevitabbilment marbut mal-attività ekonomika tal-bdiewa u l-biċċeriji. L-attivitajiet tagħhom jiġġeneraw prodotti u residwi li ma jistgħux jintużaw u fuq kollox huma ħżiena għall-ambjent, u r-rimi hu dmir tan-niġġiesa.

(163)

Intervent mill-korpi tal-Istat bil-għan li jirrilaxxaw il-bdiewa u biċċeriji minn dan il-piż joħloq vantaġġ ekonomiku li jista' jgħawweġ il-kompetizzjoni. Anke jekk l-Istat kien qed isegwi oġġettiv ta’ politika dwar is-saħħa billi jieħu r-responsabbiltà għall-kostijiet tar-rimi, dan ma jbiddilx il-fatt li kien jikkostitwixxi vantaġġ ekonomiku għall-bdiewa u l-biċċeriji, minħabba li hi każistika stabbilita li l-Artikolu 107(1) tat-TFUE ma jagħmilx distinzjonijiet skont ir-raġunijiet u l-għanijiet tal-miżuri ta’ intervent mill-Istat iżda jiddefinixxihom skont l-effetti tagħhom (46).

(164)

Il-linji gwida Komunitarji dwar l-għajnuna mill-Istat fir-rigward tat-testijiet tat-TSE, bhejjem mejta u skart tal-biċċeriji (2002/C324/02) (sal-2006), paragrafi 27 u 37, u l-linji gwida Komunitarji dwar l-għajnuna mill-Istat fis-settur agrikolu u forestali 2007-2013 (2006/C319/01), sezzjoni V.B.4, ukoll jikkonfermaw li s-sidien jew produtturi tal-prodotti sekondarji tal-annimali huma responsabbli għar-rimi xieraq u għaldaqstant għandhom iħallsu l-kostijiet skont il-prinċipju ta’ “min iniġġes iħallas”. Skont dawn il-linji gwida għajnuna mill-Istat hi eċċezzjoni għar-regola li hi permissibbli biss f'sitwazzjonijiet speċjali (speċjalment għal bhejjem mejta).

(165)

Il-fatt li l-prinċipju ta’ “min iniġġes iħallas” japplika ġeneralment hu kkonfermat ukoll mill-liġi tar-Rhineland-Palatinate, fejn § 4(1) tat-TierNebGAG jgħid li l-kostijiet tar-rimi u proċessi relatati jistgħu jkunu imposti fuq is-sidien.

(166)

F'dan il-każ il-konklużjonijiet segwenti joħorġu mill-każistika tal-Qorti, ir-Regolament (KE) Nru 1069/2009, il-linji gwida TSE u l-linji gwida dwar l-għajnuna agrikola 2007–2013.

(167)

L-ewwel nett sabiex ikun hemm servizz ta’ interess ekonomiku ġenerali mhux deċiżiv jekk l-Istati Membri jiddefinixxux is-servizz inkwistjoni bħala obbligu komunali. Id-definizzjoni ta’ servizz bħala obbligu komunali hija ekwivalenti għall-għotja ta’ dritt esklussiv. Kieku l-BVerwG kellu jkun korrett fl-opinjoni tiegħu, Stat Membri seta' jiddikjara kwalunkwe servizz bħala obbligu komunali, u b'hekk jagħmlu servizz ta’ interess ekonomiku ġenerali. Madankollu, din l-interpretazzjoni kienet iċċaħħad l-Artikolu 106 tat-TFUE minn kwalunkwe effikaċja: l-għan tiegħu hu preċiżament biex jiżgura li l-pagamenti ta’ kumpens jingħataw biss fejn servizz ta’ interess ekonomiku ġenerali jirrikjedih.

(168)

Il-Kummissjoni hi tal-opinjoni li għandha ssir distinzjoni bejn l-għotja ta’ dritt esklussiv u l-ikklassifikar ta’ servizz bħala servizz ta’ interess ekonomiku ġenerali.

(169)

Għotja ta’ dritt esklussiv għar-rimi ta’ materjal tal-kategoriji 1 u 2 jista' jikkostitwixxi restrizzjoni tal-libertà għall-provvediment ta’ servizzi taħt l-Artikolu 56 tat-TFUE. Skont l-Artikolu 52 flimkien mal-Artikolu 62 tat-TFUE jista' jkun ġustifikat abbażi tal-protezzjoni tas-saħħa pubblika. Meta l-Ġermanja u r-Rhineland-Palatinate jsostnu li impriża waħda biss hi responsabbli għar-rimi ta’ materjal tal-kategoriji 1 u 2 f'ċertu reġjun, qed ifittxu li jiżguraw li l-impriża hi soġġetta għal superviżjoni intensivq ħafna, b'hekk jiggarantixxu l-protezzjoni tas-saħħa pubblika.

(170)

Madankollu, miżura mmirata biex tipproteġi s-saħħa pubblika ma tikkostitwixxix awtomatikament servizz ta’ interess pubbliku ġenerali — kuntrarjament għall-opinjoni tal-Ġermanja u l-BVerwG.

(171)

Għaldaqstant il-Kummissjoni ma tikkontestax li r-rimi tal-materjal tal-kategoriji 1 u 2 jinvolvi r-rimi tal-iskart li, minn natura tiegħu, hu ta’ theddida partikolari għas-saħħa. Hu għalhekk li r-Regolament (KE) Nru 1069/2009 jipprovdi għal sistema stretta ta’ kontrolli għall-istabbilimenti li jarmu dan l-iskart. Dawn id-dispożizzjonijiet ċertament jinvolvu kostijiet żejda għall-impriżi tar-rimi, iżda dawn il-kostijiet għandhom ikunu inklużi fit-tariffi u l-imposti.

(172)

F'dan ir-rispett ir-rimi ta’ materjal tal-kategoriji 1 u 2 mhux differenti mir-rimi ta’ skart ieħor li, minn natura tiegħu, hu theddida partikolari għas-saħħa. Il-kost għar-rimi ta’ tali skart normalment għandu jitħallas minn min ikkaġunah u mhux mill-pubbliku.

(173)

F'dan il-każ is-servizz jinkludi r-rimi ta’ materjal tal-kategoriji 1 u 2. Għaldaqstant il-Kummissjoni għandha teżamina jekk dan is-servizz hux speċjalment differenti fl-essenza tiegħu mill-attivitajiet ekonomiċi oħra sabiex ikun fl-interess ġenerali, u mhux biss fl-interess tal-operaturi ekonomiċi li jipprofittaw minnu.

(174)

Fl-opinjoni tal-Kummissjoni ir-rimi ta’ materjal tal-kategoriji 1 u 2 mhux differenti fundamentalment fir-rigward ta’ kontenut minn attivitajiet ekonomiċi oħra. Għal din ir-raġuni ma jistax ikun klassifikat bħala servizz ta’ interess ekonomiku ġenerali.

(175)

Kontrarju għall-opinjoni tal-BVerwG, il-kontroll riġidu preskritt mir-Regolament (KE) Nru 1069/2009 ma jfissirx li r-rimi ta’ materjal tal-kateogriji 1 u 2 għandu jitqies bħala servizz ta’ interess ekonomiku ġenerali.

(176)

Barra minn hekk, is-settur inkwistjoni hu regolat minn dispożizzjonijiet tal-liġi tal-Unjoni. B'mod partikolari, dawk id-dispożizzjonijiet jirrikjedu li n-niġġies iħallas għar-rimi ta’ materjal tal-kategoriji 1 u 2. Għaldaqstant ma hemm l-ebda skop biex il-karus pubbliku jħallas parti mill-kost, kif sabet il-Qorti tal-Ġustizzja fil-GEMO (47). Minħabba dawn id-dispożizzjonijiet speċifiċi tal-liġi tal-Unjoni m'hemmx iktar spazju għad-dispożizzjonijiet nazzjonali li jfittxu li jikklassifikaw r-rimi ta’ materjal tal-kategoriji 1 u 2 bħala servizz ta’ interess ekonomiku ġenerali, li jitbiegħdu mil-liġi tal-Unjoni. Għaldaqstant il-klassifikazzjoni tiegħu bħala servizz ta’ interess ekonomiku ġenerali hi eskluża.

(177)

L-aħħar nett fir-rigward tal-pretensjoni li r-rimi ta’ materjal tal-kategoriji 1 u 2 iservi biex jipproteġi s-saħħa tal-bniedem, il-Kummissjoni tirreferi għas-sentenza tal-GEMO, fejn il-Qorti tal-Ġustizzja sostniet li l-Artikolu 107(1) tat-TFUE ma jagħmilx distinzjoni bejn miżuri ta’ intervent mill-Istat b'referenza għall-kawżi jew l-għanijiet tagħhom iżda jiddefinixxihom skont l-effetti tagħhom.

(178)

Għalhekk isegwi li fil-prinċipju, operator ekonomiku għandu jħallas il-kostijiet dovuti għad-dispożizzjonijiet regolatorji li jirregolaw it-twettiq tal-attività tiegħu bħar-regoli stretti dwar ir-rimi ta’ materjal tal-kategoriji 1 u 2 f'dan il-każ. L-għan tal-protezzjoni tas-saħħa tal-bniedem hu kkunsidrat fil-ġustifikazzjoni tal-għotja ta’ dritt esklussiv fir-rigward tal-libertà tal-provvediment ta’ servizzi u fuq il-livell ta’ kompatibbiltà tal-għajnuna għall-bdiewa fuq is-suq intern.

(179)

Għal dawn ir-raġunijiet il-Kummissjoni tikkunsidra li r-rimi ta’ materjal tal-kategoriji 1 u 2 ma jistax ikun klassifikat mill-Ġermanja bħala servizz ta’ interess ekonomiku ġenerali.

(180)

Alternattivament il-Kummissjoni tinnota li l-ewwel kriterju ta’ Altmark jimplika wkoll il-valutazzjoni ta’ jekk il-pagamenti tal-kumpens humiex neċessarji għal servizz ta’ interess ekonomiku ġenerali. Għaldaqstant anke jekk ir-rimi ta’ materjal tal-kategoriji 1 u 2 kellu jikkostitwixxi servizz ta’ interess ekonomiku ġenerali, il-bżonn ta’ pagament ta’ kumpens għandu jkun eżaminat.

(181)

L-argumenti tal-Ġermanja u l-BVerwG ma jikkunsidrawx il-fatt li fis-sentenza tal-GEMO il-Qorti tal-Ġustizzja sostniet li l-obbligi li l-impriżi fdati bir-rimi ta’ materjal tal-kategoriji 1 u 2 aċċettaw ma jiġġustifikawx il-kumpens mill-Istat għall-kostijiet involuti minħabba dawn l-obbligi. Il-Kostijiet kollha tar-rimi tal-materjal tal-kategoriji 1 u 2 għandhom jitħallsu minn dawk responsabbli għall-produzzjoni tagħhom, għax huma kost inerenti tal-attivitajiet ekonomiċi tal-bdiewa u l-biċċeriji.

(182)

Il-Qorti tal-Ġustizzja sostniet li l-kumpens tal-Istat għall-kostijiet li jirriżultaw minn dan l-obbligu mhumiex ġustifikati, peress li l-ispejjeż għandhom jitħallsu minn dawk responsabbli.

(183)

Kontrarju għall-opinjoni tal-BVerwG, il-kontroll riġidu preskritt mir-Regolament (KE) Nru 1069/2009 ma jimplikax li l-kost tar-rimi ta’ materjal tal-kategoriji 1 u 2 jista' jsir minn pagamenti ta’ kumpens mill-Istat.

(184)

Fi kliem ieħor is-sempliċi eżistenza ta’ obbligu ta’ servizz pubbliku ma jimplikax neċessarjament li kumpens mill-Istat għall-kostijiet li jirriżultaw minn dan l-obbligu huma ġustifikati.

(185)

Fl-opinjoni tal-Kummissjoni il-Ġermanja ma tistax tiġġustifika l-kontributi annwali bħala kumpens mill-Istat għall-kost lil ZT li jirriżulta mill-obbligu tar-rimi ta’ materjal tal-kategoriji 1 u 2, peress li skont il-prinċipju ta’ “min iniġġes iħallas” il-kost kollu għandu jkun kopert mit-tariffi li ZT jimponi fuq dawk responsabbli għall-produzzjoni ta’ dak il-materjal.

(186)

Fir-rigward tal-kwistjoni jekk il-kapaċità ta’ riżerva, ikkunsidrata separatament, tistax tkun ikklassifikata bħala servizz ta’ interess ekonomiku ġenerali, il-punti segwenti għandhom ikunu nnotati: Skont il-liġi Ġermaniża, impriża li għandha monopolju reġjonali għar-rimi ta’ materjal tal-kategoriji 1 u 2 għandha tiżgura li tista' tlaħħaq ma’ kwantità ogħla ta’ materjal fil-każ ta’ tifqigħa ta’ mard. Kif jidher mill-paragun bejn is-16-il Länder ippreżentat lill-gvern Ġermaniż, kullimkien ħlief fiż-żona ta’ ZT l-impriżi li jħaddmu l-impjanti tagħhom fi tlett xiftijiet iwettqu dan billi jħaddmuhom fil-weekend ukoll u, jekk neċessarju, billi jitrasferixxu materjal lil-Länder oħra. Fi kliem ieħor, l-obbligu li tinżamm riżerva għall-epidemiji ma toħloqx kostijiet żejda, għax ir-riżerva għall-epidemiji tista' tkun koperta bil-kapaċità żejda li hi disponibbli operazzjonalment.

(187)

Anke kieku kellu jkun hemm kostijiet żejda, kien ikollhom ikunu trasferiti lill-bdiewa u biċċeriji. Li jlaħħqu mal-użu ogħla ta’ materjal f'epidemija hu parti mill-kost inerenti fl-operazzjoni ta’ impjant għar-rimi ta’ materjal tal-kategoriji 1 u 2.

(188)

Il-fatt li s-sidien, i.e. l-awtoritajiet reġjonali u lokali, iġiegħlu l-impriżi tagħhom li jżommu riżerva għall-epidemiji b'att uffiċjali hu irrilevanti. Iż-żamma ta’ riżerva għall-epidemiji ma tistax tkun ikkunsidrata bħala servizz ta’ interess ekonomiku ġenerali għal żewġ raġunijiet.

(189)

Jekk il-kapaċità żejda li hi disponibbli operazzjonalment — mingħajr kost żejjed — mhix biżżejjed biex tkopri r-riżerva għall-epidemiji preskritta biex b'hekk l-obbligu li tinżamm riżerva għall-epidemiji toħloq kostijiet addizzjonali ta’ investiment, il-prinċipju ta’ “min iniġġes iħallas” jirrikjedi li dawn il-kostijiet ikunu koperti mit-tariffi imposti. Dan mhux differenti mill-argumenti preċedenti fir-rigward tar-rimi ta’ skart ieħor (ara paragrafi (156) sa (185) fuq għad-dettal).

(190)

Jekk il-kapaċità żejda miżmuma hi ogħla minn dik attwalment rikjesta fil-każ ta’ epidemiji, m'hemmx interess pubbliku fiż-żamma ta’ dik il-kapaċità żejda.

(191)

F'din il-konnessjoni il-BVerwG sostna li għar-raġunijiet ta’ ikklassifikar tal-provvediment ta’ kapaċità ta’ riżerva huwa irrilevanti jekk ZT żammx kapaċità żejda li kienet pjuttost mhux bżonnjuża. L-awtoritajiet reġjonali u lokali waħedhom għandhom jiddeċiedu għandhomx jiffinanzjaw il-kapaċità żejda jew jinsistux li titnaqqas. Din kienet kwistjoni tar-responsabbiltà politika tal-awtoritajiet reġjonali u lokali, u mhux kwistjoni ta’ liġi dwar l-għajnuna (48). Dan l-argument ma jistax ikun aċċettat, peress li kapaċità pjuttost mhux neċessarja mhix probabbli li sservi l-interess pubbliku.

(192)

Kif eżaminat f'iktar dettal fis-sezzjoni 9.3, fil-każ ta’ ZT ir-riżerva preskritta għall-epidemiji tista' tkun koperta mill-kapaċità żejda li hi disponibbli operazzjonalment u pagamenti ta’ kumpents ma jistgħux ikunu ġustifikati bl-ebda mod.

(193)

Għal dawn ir-raġunijiet il-Kummissjoni tikkunsidra li l-obbligu li tinżamm riżerva għall-epidemiji ma jistax ikun ikkunsidrat servizz ta’ interess ekonomiku ġenerali. Alternattivament, il-Kummissjoni tikkunsidra li ma tipprovdix ġustifikazzjoni għall-kontributi annwali bħala kumpens mill-Istat.

(194)

Peress li ZT mhix fdata bir-rimi ta’ materjal tal-kategorija 3, ma tistax tkun ikklassifikata bħala servizz ta’ interess ekonomiku ġenerali għal din ir-raġuni biss. Fi kwalunkwe każ ma tistax tkun ikklassifikata hekk għar-raġunijiet imniżżla fis-sezzjoni 9.1.1.

(195)

Għaldaqstant l-ewwel kriterju ta’ Altmark mhux sodisfatt f'dan il-każ.

(196)

Għaldaqstant il-konsiderazzjonijiet segwenti fir-rigward tat-tieni sar-raba' kriterji ta’ Altmark huma sempliċiment imniżżla b'mod sussidjarju.

(197)

It-tieni kriterju ta’ Altmark jirrikjedi li l-parametri abbażi ta’ liema hu kkalkolat il-kumpens għandhom ikunu mniżżla oġġettivament u b'mod trasparenti minn qabel. Għaldaqstant jekk Stat Membru jikkompensa impriża għat-telf mingħajr ma jniżżel il-parametri minn qabel, dan jikkostitwixxi vantaġġ skont it-tifsira fl-Artikolu 107(1) tat-TFUE,

(198)

F'dan il-każ trid issir distinzjoni bejn il-perjodu mill-1979 sa 2008 u l-perjodu mill-2009 sal-2012.

(199)

Il-Verbandsordnung adottat fit-28 ta’ Ottubru 1994 ippermetta lil ZT li jkopri t-telf kollu magħmul fis-sena finanzjarja bil-kontribut annwali. Madankollu, kif qalet il-Ġermanja, il-kontributi annwali kienu maħsuba biex jiffinanzjaw il-kostijiet li għamlet ZT biex iżżomm ir-riżerva għall-epidemiji.

(200)

Madankollu, fil-Verbandsordnung tal-1994 m'hemmx indikazzjonijiet fir-rigward tad-daqs tar-riżerva għall-epidemiji li ZT kellu jżomm jew fir-rigward tal-parametri għall-kalkolazzjoni tar-riżerva. It-telf magħmul mhux indikatur oġġettiv tal-kost tar-riżerva għall-epidemiji, peress li d-daqs tat-telf jiddependi fuq għadd kbir ta’ fatturi li m'ghandhomx x'jaqsmu mal-kost tar-riżerva għall-epidemiji.

(201)

Għaldaqstant l-ebda metodu oġġettiv u trasparenti ma kien imniżżel minn qabel li seta' jagħmel possibbli l-kalkolu tal-kost għar-riżerva għall-epidemiji. Għaldaqstant it-tieni kriterju ta’ Altmark mhux sodisfatt għall-perjodu mill-1979 sal-2008.

(202)

Il-Verbandsordnung kien emendat fit-2 ta’ Frar 2010 b'effett retroattiv mill-1 ta’ Jannar 2009. F'§ 10(2) id-daqs tar-riżerva għall-epidemiji li għandha tinżamm hu mniżżel espliċitament. Skont § 9(2) u § 10(4) il-kostijiet għar-riżerva għall-epidemiji u għaldaqstant id-daqs tal-kontribut annwali għandu jitniżżel qabel il-bidu tas-sena finanzjarja permezz tal-istatut dwar il-baġit.

(203)

F'§ 10(5) tal-Verbandsordnung ġdid kienu introdotti regoli għall-kalkolu tal-kost tar-riżerva għall-epidemiji. Skont l-istudju Fraunhofer, proporzjon tal-kostijiet totali tal-kapaċità huma allokati lir-riżerva preskritta għall-epidemiji. Il-Verbandsordnung u l-istatuti tal-baġit annwali jniżżlu l-parametri bżonnjużi għall-kalkolu tal-kostijiet. Il-Kummissjoni ivverifikat li l-parametri huma oġġettivi u raġonevoli u li l-metodu ta’ kalkolu hu mniżżel b'mod mhux ekwivoku u trasparenti. Għaldaqstant għas-snin mill-2010 il-kontributi annwali huma ddeterminati minn qabel abbażi ta’ parametri oġġettivi u trasparenti.

(204)

Għalhekk ir-rekwiżit ta’ trasparenza tat-tieni kriterju ta’ Altmark huma sodisfatti għas-snin 2010 sal-2012. Madanakollu, fl-istess ħin, għandu jkun notat li għalkemm il-Kummissjoni taċċetta li l-kalkoli għandhom isiru minn qabel u b'mod trasparenti, tikkonsidra li l-formola tal-kalkolu użata mhix kapaċi tipprevjeni kumpens żejjed skont it-tifsira tat-tielet kriterju ta’ Altmark.

(205)

Għas-sena 2009, min-naħa l-oħra, ir-regoli għall-kalkolu tal-kost, tal-istatut tal-baġit u tad-daqs tal-kontribut annwali huma ffissati retroattivament u mhux minn qabel. Għaldaqstant it-tieni kriterju ta’ Altmark mhux sodisfatt għas-sena 2009.

(206)

It-tielet kriterju ta’ Altmark jirrikjedi li l-kumpens m'għandux jeċċedi dak li hu neċessarju għall-kopertura, totali jew parzjali, tal-kostijiet għas-sodisfazzjoni tal-obbligi tas-servizz pubbliku li jikkunsidraw l-introjtu miksub u profitt adegwat meta jkunu sodisfatti dawn l-obbligi.

(207)

Fil-kalkolu tal-kost biex ikunu sodisfatt l-obbligu tas-servizz pubbliku, il-Kummissjoni tapplika l-metodu ta’ kostijiet-netti-evitati(net-avoided-cost) (49). Il-kostijiet netti li huma neċessarji jew għandhom ikunu neċessarji għat-twettiq tal-obbligu tal-proviżjoni ta’ servizzi pubbliċi huma kkalkolati bħala d-differenza bejn il-kostijiet netti tal-fornitur tas-servizz li jirriżultaw milli jkun issodisfatt l-obbligu tas-servizz pubbliku u l-kostijiet netti tal-fornitur tas-servizz mingħajr dak l-obbligu. Attenzjoni partikolari għandha tingħata biex tiżgura li kostijiet jew dħul li l-fornitur tas-servizz ma kienx iħallas jew jagħmel kieku ma kienx hemm obbligu ta’ servizz pubbliku huma evalwati b'mod korrett. Fil-kalkolu tal-kostijiet netti, il-vantaġġ lill-fornitur tas-servizz ta’ interess ekonomiku ġenerali għandu jkun eżaminat, jekk possibbli inklużi l-vantaġġi immaterjali (50).

(208)

Skont § 10(2) tal-Verbandsordnung tat-2 ta’ Frar 2010 id-daqs tar-riżerva għall-epidemiji li għandha tinżamm mill-2009 għandha tkun 7 110 tunnellata, li huma pproċessati f'perjodu ta’ sitt ġimgħat. Fir-rigward tat-tunnellata fil-ġimgħa, ZT ħadet passi biex tiżgura li fil-każ ta’ epidemija 1 185 tunnellata fil-ġimgħa iktar mill-kwantitajiet normali jistgħu jkunu pproċessati fuq perjodu ta’ sitt ġimgħat (51).

(209)

Il-Ġermanja targumenta li l-kontributi annwali jikkompensaw għall-kostijiet netti li tagħmel ZT biex iżżomm ir-riżerva għall-epidemiji. Għalkemm il-Verbandsordnung kellu biss obbligu espliċitu għaż-żamma ta’ riżerva għall-epidemiji mindu kien emendat fit-2 ta’ Frar 2010, ZT żammet riżerva għall-epidemiji qabel dan u kellha ġġarrab il-kostijiet li rriżultaw minn dan. B'mod partikolari, skont ir-regoli dwar l-imposti fir-Rhineland-Palatinate, ZT ma kinitx tista' tinkludi dawn il-kostijiet fl-imposti għar-rimi ta’ materjal tal-kategoriji 1 u 2.

(210)

Abbażi tal-istudju Fraunhofer, il-Ġermanja tikkalkola l-kostijiet tar-riżerva għall-epidemiji bħala madwar nofs l-kostijiet kollha tal-faċilitajiet, peress li r-rata tal-utilizzazjoni tal-kapaċità li hi teknikament possibbli matul il-ġimgħa - i.e. f'operazzjoni b'ħamest ijiem bi tliet xiftijiet — hi inqas minn 50 %.

(211)

Il-Kummissjoni ser turi fil-paragrafi li jmiss li kontrarju għall-kalkoli tal-Ġermanja, ZT ma ġarbitx kostijetr netti bħala rizultat taż-zamma ta’ riżerva għall-epidemiji tad-daqs preskritt. Il-kostijiet ċitati mill-Ġermanja jinkludi l-kost għall-kapaċità żejda li hi disponibbli operazzjonalment, li għandu jkun kopert minn imposti, u l-kost tal-kapaċità żejda li tirriżulta minn nuqqas ta’ utilizzazzjoni tal-impjanti.

(212)

Ir-rapport Böckenhoff tal-1991 eżamina għall-ewwel darba jekk kienx hemm il-bżonn li jinbena impjant ikbar għar-rimi sabiex tkun żgurata biżżejjed kapaċità fil-każ ta’ epidemija. Wasal għall-konklużjoni kontrarja, minħabba li fl-operazzjoni normali l-impjant tar-rimi jaħdem għal ħamest ijiem b'żewġ xiftijiet u l-kapaċità żejda operazzjonali għat-tielet xift kienet ikkunsidrat bħala riżerva għall-epidemiji adegwata.

(213)

Matul iż-żmien ħafna mill-impriżi tar-rimi mxew għall-użu parzjali tat-tielet xift, anke fl-operazzjoni normali, jew għal żewġ xiftijiet is-Sibtijiet f'ħinijiet meta hemm qċaċet fil-kwantitajiet għar-rimi. Dan ifisser li hemm utilizzazzjoni aħjar tal-kapaċità fl-operazzjoni normali u ser ikollu jsir iktar użu mill-kapaċità żejda disponibbli fi tmiem il-ġimgħa fil-każ ta’ epidemija.

(214)

Madankollu, kalkoli ddettaljati għal xenarji varji fil-letteratura teknika iktar reċenti (52) kkonfermaw is-sejbiet bażiċi tar-rapport Böckenhoff li ma kienx hemm bżonn investiment addizzjonali fil-kapaċità żejda għall-ġlieda kontra l-epidmiji, iżda minflok il-kapaċità żejda disponibbli bħala t-tielet xift fost il-ġimgħa u xiftijiet fi tmiem il-ġimgħa huma biżżejjed għar-rimi ta’ karkassi żejda tal-annimal li jirriżultaw minn epidemija. Hawn issir kunsiderazzjoni għall-utilizzazzjoni ogħla tal-kapaċità f'operazzjoni normali. Il-każijiet ta’ epidemija kkunsidrati huma l-iktar limitati lokalment u tifqigħat fil-qosor tal-marda tad-deni tal-ħnieżer klassika (CSF) jew il-marda tal-ilsien u d-dwiefer (FMD).

(215)

Ir-riżerva għall-epidemiji mniżżla fil-Verbandsordnung tat-2 ta’ Frar 2010, li tammonta għal 1 185 tunnellata fil-ġimgħa li ZT għandha tagħmel disponibbli matul perjodu ta’ sitt ġimgħat fil-każ ta’ epidemija hi mmirata lejn tifqigħat limitati lokalment ta’ CSF u FMD. Id-daqs tar-riżerva għall-epidemiji hu bbażat fuq l-istudju tal-ISPA-RP, li juri li l-kwantitajiet żejda tal-karkassi tal-annimali li għandhom ikunu mistennija fil-każ ta’ epidemiji ta’ żmien qasir f'żona koperta mill-assoċjazzjoni jaqgħu f'din l-ordni ta’ kobor.

(216)

Ir-riżerva għall-epidemiji speċifikata ta’ 1 185 t/ġimgħa toqgħod flimkien mal-kapaċità mhux użata ta’ 2 819 t/ġimgħa disponibbli għall-perjodu rekwiżit ta’ sitt ġimgħat. Il-kapaċità mhux użata li hi verament disponibbli hi konsiderevolment iktar minn darbtejn id-daqs li hemm bżonn. Kif jidher mit-tabella segwenti, ZT tista' tkopri r-riżerva preskritta għall-epidemiji b'kapaċità żejda operazzjoanli disponibbli fuq żmien qasir bil-lejl u fi tmiem il-ġimgħa — bħal f'Länder oħra. Il-kapaċità żejda operazzjonali ta’ 2 376 tunnellata fil-ġimgħa disponibbli f'operazzjoni ta’ tliet xiftijiet fuq sebat ijiem għal tul ta’ sitt ġimgħat hi madwar id-doppju tar-riżerva preskritta għall-epidemiji ta’ 1 185 tunnellata fil-ġimgħa.

(217)

Anke jekk wieħed jassumi li l-kapaċità tal-impjant mhix utilizzata kompletament fl-operazzjoni ta’ tliet xiftijiet fuq sebat ijiem jew mhux użata kontinwament għal sebat ijiem, kapaċità żejda operazzjonali suffiċjenti hi disponibbli biex tiżgura r-riżerva għall-epidemiji li hemm bżonn. Ladarba skont il-paragun tar-riżerva preskritta għall-epidemiji ta’ 1 185 tunnellata fil-ġimgħa mal-kapaċità żejda disponibbli fl-impjanti ta’ ZT skont l-istudju ISPA-RP (53), ZT għandu kapaċità żejda operazzjonali suffiċjenti bil-lejl u fi tmiem il-ġimgħa:

Tabella 3

Il-kapaċità żejda operazzjonali mqabbla mar-riżerva preskritta għall-epidemiji (ibbażata fuq utilizzazzjoni ta’ kapaċità medja mill-1998 sal-2009)

(218)

Dan, għalhekk, jikkonferma li ZT — bħal impriżi fil-Länder l-oħra — għandha kapaċità żejda operazzjonali suffiċjenti għar-riżerva għall-epidemiji. Għalhekk ZT qatt ma kellha bżonn tibni kapaċità addizzjonali biex tipprovdi riżerva għall-epidemiji. Għaldaqstant ZT ma ġarbitx xi kostijiet netti mill-obbligu.

(219)

Madankollu, ZT targumenta li skont il-liġi, ZT ma tistax tinkludi taħt il-kostijiet għar-rimi, il-kostijiet għall-kapaċità żejda li hi wżata biss fil-każ ta’ epidemiji, peress li din ir-riżerva tal-epidemiji tkun ta’ benefiċċju pubbliku.

(220)

Madanakollu, ir-riżultati tal-istħarriġ tal-Länder u l-kuntratti tal-kwerelanti li kienu ppreżentati juru, li irrispettivament mill-forma legali tal-impriża tar-rimi jew tar-regola tal-kalkolu li għandha tkun applikata, il-kostijiet kollha tal-kapaċità huma ffinanzjati minn dħul operatorju mingħajr eċċezzjoni. Dan jidher ukoll b'mod ċar mill-§ 8 KAG RP, li jgħid li “il-kostijiet sottostanti l-imposti għall-użu u kontributi rikorrenti għandhom ikunu determinati skont il-prinċipji tan-negozju tal–kontabbiltà abbażi tal-kost”. Fi kliem ieħor il-kost tal-kapaċità żejda operazzjonali għandu jkun inkluż fl-imposti b'mod proporzjonali, peress li hemm konnessjoni kawżali mar-rimi ta’ materjal intern u estern f'operazzjoni normali.

(221)

Il-BVerwG ukoll sab b'mod korrett fis-sentenza tiegħu li l-kost għall-kapaċità żejda operazzjonali għandu jkun iffinanzjat mir-rimi ta’ materjal intern u estern (54). Għalhekk jekk - bħal fil-każ ta’ ZT — ir-riżerva preskritta għall-epidemiji tista' tkun ipprovduta mill-kapaċità żejda operazzjoanli, ma hemmx bżonn ta’ kontribut annwali.

(222)

Finalment il-Ġermanja targumenta b'ġustifikazzjoni għall-kontribut annwali li l-kostijiet tal-kapaċità żejda operazzjonali fit-tielet xift matul il-ġimgħa huma riżultat tal-obbligu taż-żamma ta’ riżerva għall-epidemiji. Mingħajr dan l-obbligu, ZT tkun tista' tagħmel użu totali tal-kapaċità massima teknika tagħha f'operazzjoni ta’ ħamest ijiem bi tliet xiftijiet.

(223)

Madankollu, il-Ġermanja ma ġabet l-ebda evidenza li turi li ma jkunx hemm iktar kapaċità żejda operazzjonali fost il-ġimgħa kieku ma kienx hemm obbligu li tinżamm riżerva għall-epidemiji. Minflok jidher — per eżempju mill-istudju ISPA-NS — li anke impriżi li jarmu biss materjal tal-kategorija 3 u li għalhekk m'għandhom l-ebda obbligu li jżommu riżerva għall-epidemiji, għandhom kapaċità żejda konsiderevoli u jiffinanzjaw il-kostijiet kollha tagħhom tal-kapaċità permezz tal-imposti tagħhom.

(224)

Kif tindika t-Tabella 3, ZT għandha ferm iktar kapaċità żejda milli hemm bżonn biex tipprovdi r-riżerva preskritta għall-epidemiji. Il-kapaċità żejda disponibbli f'terminu qasir hi iktar mid-doppju li hemm bżonn fil-każ ta’ tifqigħa ta’ marda. Il-Figura 2 turi li f'xi snin sa 25 % tal-kapaċità normali biss baqgħet ma ntużatx f'operazzjoni ta’ ħamest ijiem b'żewġ xiftijiet. Il-kost tal kapaċità żejda li ma hemmx bżonn għar-riżerva preskritta għall-epidemiji ma jistax ikun inkluż fil-kostijiet netti. Għalhekk il-kalkolu tal-kostijiet netti ppreżentati mill-Ġermanja għandu jiġi miċħud, għaliex jattribwixxu b'mod żbaljat il-kost tal-kapaċità żejda kollha lir-riżerva għall-epidemiji.

(225)

L-istudji ISPA-RP u Fraunhofer juru li l-kapaċità żejda disponibbli ta’ ZT kienet biżżejjed biex tlaħħaq ma’ tifqigħa tal-FMD madwar il-Land għal tliet xhur. Madankollu ZT qatt ma kellha bżonn iżomm riżerva għall-epidemiji għal perjodu itwal minn sitt ġimgħat. Fi kliem ieħor il-membri tal-assoċjazzjoni qatt ma obbligaw lil ZT li jkollha riżerva fit-tul għall-epidemiji disponibbli għal iktar minn sitt ġimgħat sabiex ZT tkun tista' tlaħħaq ma’ tifqigħa fit-tul tal-marda madwar il-Land. Il-paragun mal-kapaċità li hemm bżonn biex tlaħħaq ma’ tifqigħa tal-FMD madwar il-Land kollu huwa irrilevanti (55).

(226)

Il-fatt li l-kapaċità tal-impjant ta’ ZT hi sostanzjalment ogħla minn dik rikjesta mill-Verbandsordnung hi korroborata mis-segwenti: ZT hi obbligata mill-Verbandsordnung li tipproċessa materjal intern tal-Kategoriji 1 u 2 li jammonta għal madwar 900 tunnellata fil-ġimgħa (56). Jekk ir-riżerva preskritta għall-epidemiji ta’ 1 185 tunnellata fil-ġimgħa tkun miżjuda wkoll, ZT jkollu bżonn impjant b'kapaċità ta’ 2 085 tunnellata fil-ġimgħa b'operazzjoni ta’ tliet xiftijiet fuq sebat ijiem sabiex jissodisfa l-obbligi tiegħu skont il-Verbandsordnung.

(227)

Fil-fatt però, l-impjanti ta’ ZT għandhom kapaċità possibbli massima ta’ 4 536 tunnellata fil-ġimgħa. ZT imbagħad, jopera impjant bid-doppju tal-kapaċità li hemm bżonn għall-kompiti mniżżla fil-Verbandsordnung. Peress li ZT għandha kapaċità ferm ikbar milli hemm bżonn biex twettaq il-kompiti pubbliċi tagħha, ma tistax tkun ġarbet kostijiet netti minħabba l-obbligu li żżom riżerva għall-epidemiji.

(228)

Bħala konklużjoni jista' jingħad li l-Ġermanja ma kinitx kapaċi turi li ZT ġarbet kostijiet netti mill-obbligu li jżżomm riżerva għall-epidemiji. Eżami wera li l-kontributi annwali jiffinanzjaw il-kost għall-kapaċità żejda li hi disponibbli operazzjonalment f'operazzjoni normali (u li għalhekk għandha tkun iffinanzjata minn miżati u imposti għal dawn is-servizzi) jew li hi disponibbli għax sar użu insuffiċjenti fl-impjanti ta’ ZT.

(229)

Ir-raba' kriterju ta’ Altmark jgħid li, fejn impriża li għandha tissodisfa obbligu ta’ servizz pubbliku mhix magħżula fi proċedura ta’ akkwist pubbliku li jippermetti selezzjoni ta’ min qed jagħmel l-offerta li hu kapaċi li jipprovdi dawk is-servizzi bl-inqas kost għall-komunità, il-livell ta’ kumpens li hemm bżonn għandu jkun determinat abbażi tal-analiżi tal-kostijiet li impriża tipika u mmexxija tajjeb kienet iġġarrab biex twettaq dak l-obbligu, waqt li jitqiesu l-irċevuti rilevanti u profit raġonevoli għat-twettiq tal-obbligi.

(230)

L-erba' kriterji ta’ Altmark huma eċċezzjoni għall-prinċipju li l-pagamenti ta’ kumpens jikkostitwixxu vantaġġ. Għaldaqstant huma l-Istati Membri li jridu jippruvaw li dawn intlaħqu.

(231)

ZT ma kinitx magħżula permezz ta’ proċedura ta’ akkwist pubbliku, u l-Ġermanja lanqas ma pproduċiet evidenza li ZT kienet impriża tipika u mmexxija tajjeb. Għaldaqstant il-Ġermanja naqset milli turi li r-raba' kriterju ta’ Altmark intlaħaq. L-imposti għoljin għar-rimi ta’ karkassi tal-annimali fir-Rhineland-Palatinate u l-bżonn għall-iffinanzjar permezz ta’ kontribut annwali li ma jeżistix fl-ebda Land ieħor, ukoll jissuġġerixxu li ZT mhix impriża tipika u mmexxija sew.

(232)

Għaldaqstant ir-raba' kriterju ta’ Altmark mhux sodisfatt.

(233)

Il-BVerwG sostna li r-raba' kriterju ta’ Altmark ma applikax għal ZT peress li l-kontribut annwali ma kienx bħala kumpens għalih għall-kostijiet żejda mġarba minħabba l-obbligu ta’ servizz pubbliku f'kuntest ta’ attività li hi fi kwalunkwe sens ieħor kummerċjali, iżda biex jiffinanzjaw twettiq uffiċjali ta’ kompitu pubbliku lil hinn mis-suq. In-natura uffiċjali tat-twettiq ta’ dan il-kompitu tirriżulta, fl-opinjoni tal-BVerwG, minn deċiżjoni politika tal-awtoritajiet reġjonali u lokali li huma membri tal-assoċjazzjoni biex jagħtu internament ir-rimi ta’ materjal tal-kategoriji 1 u 2. Il-BVerwG ibbaża l-interpretazzjoni tiegħu fuq is-senstenza tal-Qorti tal-Ġustizzja fis-Stadtreinigung Hamburg (57).

(234)

Fl-opinjoni tal-BVerwG ir-raba' kriterju ta’ Altmark jippresupponi li l-obbligu tas-servizz pubbliku għandu jitwettaq minn impriża privata. Peress li dan ma kienx il-każ għax l-għotja hija interna, ir-raba' kriterju ta’ Altmark ma japplikax għal impriża fdata permezz tal-għotja interna (58).

(235)

Il-Kummissjoni ma taqbilx mal-opinjoni tal-BVerwG. L-ewwel nett ma hemm l-ebda indikazzjoni li r-raba' kriterju ta’ Altmark kif kien formulat mill-Qorti tal-Ġustizzja mhux applikabbli fil-każ ta’ għotja interna. Kontrarjament: billi tat żewġ alternattivi (jew proċedura ta’ akkwist pubbliku jew analiża tal-kostijiet li jkollha impriża tipika mmexxija tajjeb) il-Qorti tal-Ġustizzja wriet li r-raba' kriterju ta’ Altmark japplika anke jekk ma saritx l-ebda proċedura ta’ akkwist pubbliku, u għaldaqstant speċjalment fil-każ ta’ għotja interna.

(236)

Is-sentenza f'Stadtreinigung Hamburg ikkonċernat biss fejn jeżisti obbligu għall-għotja u fejn le. Assolutament l-ebda konklużjoni ma tista' ssir fir-rigward tal-liġi dwar l-għajnuna. Kontrarjament: it-tieni alternattiva tar-raba' kriterju ta’ Altmark tikkonċerna preċiżament il-każ fejn ma hemm l-ebda obbligu biex issir proċedura ta’ akkwist pubbliku.

(237)

Barra minn hekk, il-BVerwG jitlaq mill-assunzjoni li l-monopolju reġjonali ta’ ZT fisser li ma kienx hemm kompetizzjoni ma’ impriżi oħra u li jista' ma jkun hemm l-ebda distorsjoni tal-kompetizzjoni. Madankollu, id-distorsjoni tal-kompetizzjoni, hi element kostitwenti separat tal-kunċett ta’ għajnuna li hu distint mill-element ta’ vantaġġ ekonomiku (il-kuntest li fih l-erba' kriterji ta’ Altmark kienu żviluppati). L-element kostitwenti tad-distorsjoni ta’ kompetizzjoni jintlaħaq f'dan il-każ (ara s-Sezzjoni 8.3). Il-Kummissjoni ukoll ikkonfermat espliċitament fil-paragrafu 37 tal-komunikazzjoni tagħha dwar l-applikazzjoni tar-regoli ta’ għajnuna tal-Unjoni Ewropea dwar il-kumpens għat-twettiq ta’ servizzi ta’ interess ekonomiku ġenerali (il-komunikazzjoni dwar is-SGEI) (59) li għotja interna ma teskludix id-distorsjoni tal-kompetizzjoni.

(238)

Finalment, l-enfasi magħmul mill-BVerwG fuq in-natura uffiċjali tal-attività ta’ ZT toħloq il-kwistjoni ta’ jekk il-BVerwG ċaħadx impliċitament l-applikabilità tar-raba' kriterju ta’ Altmark peress li assuma li ZT ma kinitx qed twettaq attività ekonomika. Dan, ukoll, hu żbaljat: ZT toffri servizz għal ħlas, u għaldaqstant, qiegħda twettaq attività ekonomika (ara s-Sezzjoni 8.2). Il-Kummissjoni wkoll ikkonfermat dan espliċitament fil-paragrafu 13 tal-komunikazzjoni dwar is-SGEI.

(239)

Kuntrarjament għas-sentenza tal-BVerwG u l-argument tal-Ġermanja, il-kriterji tas-sentenza ta’ Altmark mhumiex sodisfatti. L-ewwel nett, il-kontributi annwali ma jistgħux ikunu ġustifikat fl-essenza tagħhom bħala pagamenti ta’ kumpens mill-Istat għal obbligi ta’ ZT, peress li l-kostijiet kollha assoċjati ma’ dawn l-obbligi għandhom ikunu koperti minn introjtu minn imposti. It-tieni nett, ġie muri li kontrarjament għal dak li ssostni l-Ġermanja, ZT ma soffritx kostijiet netti bħala riżultat tal-obbligu li jżżomm riżerva għall-epidemiji. Il-kostijiet ċitati mill-Ġermanja jirrelataw jew mal-kapaċità operazzjonali żejda, li għandhom ikunu koperti mid-dħul mill-imposti u mill-profitti, jew mal-kapaċità żejda li tmur lil hinn mir-riżerva preskritta għall-epidemiji. It-tilet ħaġa, sal-2010 il-parametri għall-kalkolu tal-kontributi annwali ma kinux iffissati minn qabel u bit-trasparenza neċessarja. Finalment, il-Ġermanja ma wrietx li ZT hi impriża tipika u mmexxija tajjeb.

(240)

Għaldaqstant il-kontributi annwali taw vantaġġ ekonomiku lil ZT.

(241)

Jekk il-kost tar-riżerva għall-epidemiji, ikkalkolata b'mod żbaljat mill-Ġermanja, huwa allokat korrettament skont l-għan għas-servizzi differenti pprovduti — ir-rimi tal-materjal tal-kategoriji 1 u 2, ir-rimi ta’ materjal tal-kategoriji 1 u 2 minn Baden-Württemberg u Hessen, u r-rimi ta’ materjal tal-kategorija 3 — il-vantaġġi ekonomiċi li kisbet ZT fuq is-swieq varji mill-kontributi annwali fuq is-swieq varji jsiru aħtar viżibbli.

(242)

Is-Sezzjonijiet segwenti ser juru li l-kontributi annwali fil-fatt ma kkumpensawx għat-telf dovut għall-fatturi segwenti:

(243)

Abbażi tal-kontijiet ta’ profitt u telf ta’ ZT li kienu ppreżentati għas-snin mill-2002 sal-2009, il-kostijiet allegati kollha tar-riżerva għall-epidemiji kienu allokati skont l-għan skont l-operazzjoni tal-impjant fuq bażi ta’ ħamest ijiem b'żewġ xiftijiet.

(244)

L-ewwel nett, għandu jkun notat li raġuni ewlenija għall-kostijiet għolja tal-kapaċità żejda hi l-utilizzazzjoni baxxa tal-impjant ta’ ZT. Għaldaqstant dawn il-kostijiet tal kapaċità żejda dovuti għal nuqqas ta’ utilizzazzjoni tagħha waqt operazzjoni normali għandhom jitneħħew.

(245)

Kif jidher mill-istatistika dwar l-utilizzazzjoni fit-Tabella 3 (il-kolonna “kapaċità zejda dovuta għar-rata ta’ utilizzazzjoni”) ZT qatt ma użat l-kapaċità teknika disponibbli fl-operazzjoni ta’ ħamest ijiem b'żewġ xiftijiet. Speċjalment mill-2002, ir-rata ta’ utilizzazzjoni waqgħet bil-kbir bħala riżultat ta’ tnaqqis kbir fil-materjal intern. Il-kejl użat għal-livell ta’ utilizzazzjoni baxxa hi l-kapaċità żejda fl-operazzjoni ta’ ħamest ijiem bi tliet xiftijiet. Il-punt ta’ referenza użat għall-kalkolu tal-utilizzazzjoni baxxa kien l-ogħla livell ta’ utilizzazzjoni miksub fl-operazzjoni ta’ ħamest ijiem b'żewġ xiftijiet, li kien 101 855 tunnellata fl-2002. Bħala medja din hi utilizzazzjoni baxxa ta’ 13 fil-mija.

(246)

Kif jidher mill-kolonna korrispondenti (“kapaċità żejda dovuta għar-rata ta’ utilizzazzjoni”) fit-Tabella 4, il-kost medju ta’ utilizzazzjoni baxxa f'operazzjoni normali jammonta għal EUR 434 304. ZT għandha tieħu r-responsabbiltà kummerċjali għal dan il-kost, għaliex hu r-riżultat tal-operazzjoni ta’ impjant li mhux utilizzat kompletament waqt operazzjoni normali.

(247)

Il-kostijiet tal-kapaċità żejda operazzjonali huma mqassma skont il-proporzjon tal-użu fl-operazzjoni ta’ ħamest ijiem b'żewġ xiftijiet. Għaldaqstant il-kostijiet tal-kapaċità żejda operazzjonali huma mqassma proporzjonalment bejn is-servizzi interni u dawk esterni. Fl-istess ħin issir distinzjoni fit-Tabella 4 hawn isfel bejn il-kostijiet tal-kapaċità żejda operazzjonali tal-ġbir u tal-ipproċessar.

(248)

Bħala medja matul il-perjodu mill-2002 sal-2009 ZT ma kinitx kapaċi tkopri l-kostijiet tal-kapaċità żejda operazzjonali mill-fatturat fuq is-servizzi tagħha interni jew esterni. Il-kolonna “marġini tal-kontribut II” turi telf annwali medju ta’ EUR 1 198 257 fuq servizzi esterni u ta’ EUR 1 140 898 fuq servizzi interni.

Tabella 4

Rapport tal-profitti u t-telf

(249)

Fis-swieq esterni ZT għandha kompetituri li jridu jiffinanzjaw il-kostijiet kollha tal-impjanti totalment mill-fatturat tagħhom. La negozju li jikkompeti ma’ ZT għal materjal tal-kategorija 3 u lanqas l-operatur preċedenti fit-Tramuntana u Ċentru ta’ Hessen ma jistgħu jistrieħu fuq rifinanzjament mill-Istat ta’ kapaċità zejda dovuta għal fatturi operazzjonali jew utilizzazzjoni baxxa dovuta għal-livell ta’ domanda.

(250)

Bħall kull impriża oħra li tarmi materjal tal-kategorija 3 mingħajr ma hi fdata b'kompitu pubbliku, ZT għandha tħallas il-kostijiet kollha assoċjati u tieħu r-riski kollħa assoċjati.

(251)

ZT tarmi materjal tal-kategorija 3 flimkien ma’ materjal tal-kategoriji 1 u 2 u għalhekk ma tistax tikseb l-istess introjtu mill-prodott daqs li kieku kieku tikseb jekk materjal tal-kategorija 3 kellu jintrema separatament mill materjal tal-kategoriji 1 u 2. minħabba d-domanda ikbar għal materjal tal-kategorija 3 pur, il-prezzijiet li ZT tista' tikseb minn biċċeriji waqgħu. Kif spjega l-kwerelant, l-impriżi tar-rimi anke jħallsu primjums lill-biċċeriji għal xi materjali tal-kategorija 3.

(252)

Din it-tendenza hi evidenti ħafna fir-rendiment għal kull tunnellata pproċessata ta’ materjal tal-kategorija 3. fejn ZT xorta kiseb EUR […] għal kull tunnellata fl-2002, wara tnaqqis stabbli r-rendiment fl-2009 kien biss EUR […]. Dan hu tnaqqis fir-rendiment għal kull tunnellata ta’ kważi 70 % f'seba' snin.

Figura 1

Marġini ta’ kontribut għal materjal tal-katergorija 3 mill-2000 sal-2009 (f'EUR)

(…)

(253)

Għaldaqstant f'dawn l-aħħar snin l-ipproċessar ta’ materjal tal-kategorija 3 sar dejjem mingħajr profitt għal ZT. Fejn sal-2004 ZT kienet għadha kapaċi tkopri l-kostijiet diretti, ir-rimi ta’ materjal tal-kategorija 3 fis-snin sussegwenti m'għadux jagħmel kontribut pożittiv biex ikopri l-kostijiet ta’ kapaċità żejda.

(254)

Il-kalkolu magħmul mill-Ġermanja, li juri l-introjtu li jista' jagħmel ZT mir-rimi ta’ materjal tal-kategorija 3 hu ikbar mill-kostijiet diretti, mhux korrett. Il-Ġermanja tibbaża l-kalkolu tagħha fuq kostijiet li minnhom l-introjtu kien diġà mnaqqas (ara ringiela (2) tat-Tabella 4) minflok li tuża l-kostijiet verament imġarrba, li jkun korrett (ara l-kostijiet ikkoreġuti fir-ringiela (4) tat-Tabella 4).

(255)

ZT hi apparentament ippreparata li tittolera l-kostijiet kostanti dovuti għar-rimi ta’ kwalità baxxa ta’ materjal tal-kategorija 3 biex isostni l-utilizzazzjoni tal-impjanti tiegħu.

(256)

Raġuni ewlenija oħra għat-telf ta’ ZT hu li l-impjant kien utilizzat ftit wisq għal ħafna snin. F'xi snin, l-utilizzazzjoni baxxa fl-operazzjoni ta’ ħamest ijiem b'żewġ xiftijiet telgħet għal iktar minn 25 % meta mqabbla mal-aħjar rata ta’ utilizzazzjoni fl-2001. Fl-2001 u l-2002 biss kien hemm rata aħjar ta’ utilizzazzjoni li ntlaħqet minħabba l-kriżi tat-TSE għalkemm anke f'dak iż-żmien ma kienx hemm bżonn ta’ rikors għall-kapaċità żejda operazzjonali bil-lejl jew fi tmiem il-ġimgħa.

Figura 2

Utilizzazzjoni baxxa tal-kapaċità normali ta’ ZT f'operazzjoni ta’ ħamest ijiem b'żewġ xiftijiet mill-1998 sal-2009

Ultilizzazzjoni baxxa tal-kapaċità ta' ZT

(meta mqabbla mar-rata ta' utilizzazzjoni ta' 103 000 tunnellata fl-2001)

(257)

Ir-raġuni għall-utilizzazzjoni baxxa notevoli wara l-2002 kienet it-tnaqqis tal-hażniet tal-annimali u għalhekk fil-kwantità tal-materjal intern, li waqa' b'iktar minn 35 fil-mija bejn l-2002 u l-2009. ZT ipprova jutilizza l-kapaċità li lliberat ruħha billi ħa ammonti ikbar ta’ materjal estern. Madankollu, kien wara li rebaħ il-proċedura ta’ offerti f'Hessen tat-Tramuntana u Ċentrali li seta' jġib ir-rata ta’ utilizzazjoni lura għal madwar il-livell tal-2002/2003.

(258)

Peress li ZT ilu jwettaq ir-rimi f'Hessen tat-Tramuntana u Ċentrali biss mill-2009, hemm verament ftit dejta dwar ir-riżultati miksuba minn din l-attività. Il–kontabbiltà abbażi tal-kost tal-2009 li kienu ppreżentati juru li l-affidament ġdid irriżulta f'marġini ta’ kontribut pożittiv wara li tnaqqsu l-kostijiet tal-kapaċità żejda operazzjonali ta’ madwar EUR 200 000.

(259)

Madankollu, id-dokumenti tal-offerta jissuġerixxu li ZT għamlet offerta li kienet iktar baxxa mill-kostijiet attwali tagħha. Kif qalet il-Ġermanja stess, l-imgħax li jħallas ZT fuq is-self bankarju tiegħu hu iktar għoli mill-imgħax ikkalkolat li ZT iffissa skont ir-regoli tal-kalkolu għall-proċedura ta’ offerti. Fi kliem ieħor ZT ma jippretendix li jkun kapaċi li jkopri l-kostijiet tal-imgħax kollha fuq is-self li ħa jew li jakkwista ritorn raġonevoli fuq il-kapital tiegħu stess.

(260)

L-imgħax totali ta’ ZT fuq il-kapital misluf jammonta għal EUR 1,07 miljun fis-sena. Jekk wieħed jassumi li madwar kwart tal-kost tas-self jista' jkun attribwit għall-attività tagħha fit-Tramuntana u fiċ-Ċentru ta’ Hessen, abbażi tal-proporzjon ta’ kapaċità totali li tirriżulta mill-kwantità għar-rimi li tiġi mit-Tramuntana u Ċentru ta’ Hessen, is-sehem tal-kostijiet hu EUR 0,26 miljun meta mqabbel mal-EUR 0,16 miljun li ZT niżżel fil-kalkolu tiegħu tal-imposti għat-Tramuntata u ċ-Ċentru ta’ Hessen. Apparti l-EUR 0,10 miljun f'imgħax fuq self li mhumiex koperti annwalment hemm ukoll l-imgħax fuq kapital li mhux kopert.

(261)

Negozju li jaġixxi b'mod razzjonali ma kienx jippreżenta offerta li ma tkopriex il-kostijiet kapitali antiċipati. Ir-riferenza ripetuta tal-Ġermanja għar-rekwiżiti allegati tar-regoli dwar il-kalkolu tal-imposti, li ma ppermettewx li l-kostijiet kollha jkunu trasferiti, bl-ebda mod ma tbiddel dan il-fatt. L-ebda operatur privat tan-negozju ma jista' jkun sforzat jew ser ikun lest joffri servizzi għal prezzijiet li bihom ma jkoprix il-kostijiet tiegħu u jagħmel profitt raġonevoli.

(262)

Anke jekk wieħed jibda mill-kontabbiltà abbażi tal-kost ippreżentati għall-2009, li tagħti marġini ta’ kontribut pożittiv ta’ madwar EUR 200 000, il-marġini antiċipati ta’ kontributi matul it-terminu ta’ 10 snin tal-kuntratt ma jistgħux jikkumpensaw għat-telf dovut għall-utilizzazzjoni baxxa, li bħala medja tammonta għal madwar EUR 700 000 annwalment għas-snin mill-2002 'il quddiem. Għaldaqstant, ditta li topera skont il-kundizzjonijiet tas-suq ma żżomx kapaċità b'utilizzazzjoni baxxa għal perjodu daqshekk twil.

(263)

Fil-każ ta’ materjal estern hu evidenti li grazzi għall-kontributi annwali ZT kien qed jirreklama kapaċità bi prezzijiet iktar baxxi mill-kostijiet u kien qed iżomm kapaċità b'utilizzazzjoni baxxa għal snin mingħajr ma seta' jikkumpensa permezz ta’ qligħ future it-telf dovut għall-utilizzazzjoni baxxa fis-snin preċedenti. Għalhekk hu ċar li ZT żammet kapaċità fuq is-suq li impriża razzjonali tar-rimi ma setgħetx taffordja.

(264)

Il-kostijiet tal-kapaċità żejda operazzjonali ikkawżati minħabba r-rimi ta’ materjal intern għandhom ikunu koperti minn imposti. ZT, bħall-impriżi l-oħra kollha fdati bir-rimi ta’ materjal ikkontrollat, għandhom jiżguraw ir-responsabbiltà li jwettqu dan il-kompitu b'mod ekonomiku billi jagħmlu n-negozju tagħhom b'mod xieraq. Pagament addizzjonal ta’ kumpens jirrilaxxaha minn din ir-responsabbiltà ekonomika.

(265)

Għaldaqstant il-kostijiet għall-kapaċità żejda dovuta għal fatturi operazzjonali għandhom ikunu allokati bejn ir-rimi ta’ bhejjem mejta u skart tal-biċċeriji. Hemm approċċi varji fil-Länder għall-allokazzjoni tal-kostijiet tal-kapaċità żejda operazzjonali bejn ir-rimi ta’ skart tal-biċċeriji u karkassi tal-annimali. F'ċerti Länder bhejjem mejta huma allokati proporzjon ikbar mill-kostijiet tal-kapaċità żejda mill-iskart tal-biċċeriji. Peress li la r-regoli dwar l-imposti u lanqas il-Verbandsordnung ma jindikaw skala għall-allokazzjoni, il-kostijiet tal-kapaċità żejda għandhom ikunu allokati proporzjonalment.

(266)

Bħalma qalet il-Ġermanja stess, ZT tikkompeti ma’ impriżi oħra tar-rimi għar-rimi ta’ skart tal-biċċeriji Id-daqs tal-imposti għar-rimi tal-iskart tal-biċċeriji intern jaffettwa l-kwota tas-separazzjoni tal-biċċeriji u għalhekk kemm hemm materjal pur tal-kategorija 3 għal impriżi oħra tar-rimi.

(267)

Fejn bħala medja ir-rekavat bil-kemm ikopru l-kostijiet diretti, matul iż-żmien l-istess tip ta’ stampa toħroġ bħal tal-marġini ta’ kontributi għal materjal tal-kategorija 3: Sal-2004 r-rikavat jaqbeż il-kostijiet diretti. Però bl-iskala ġdida tal-imposti mill-2005, li wasslet għal tnaqqis fil-medja tar-rikavat għal kull tunnellata minn EUR 160 sa EUR 116 — fi kliem ieħor tnaqqis ta’ 27,5 fil-mija — lanqas il-kostijiet diretti ma jistgħu jkunu koperti fis-snin ta’ wara u għalhekk l-ebda kontribut ma jista' jinkiseb biex jilħaq mal-kostijiet tal-kapaċità żejda operazzjonali. Ma kienx qabel l-2009 li kien hemm ritorn għal marġini pożittiva ta’ kontribut (ara it-Tabella 4).

(268)

Mingħar il-kontribut annwali ZT ovvjament ma setgħetx iżomm din il-politika tal-ipprezzar. Bħal fil-każ tal-iskart tal-kategorija 3 tal-biċċeriji, mill-2005 ZT aċċettat prezzijiet li lanqas biss koprew il-kostijiet diretti tagħha sabiex tkompli tutilizza il-kapaċità tal-impjant tagħha. Inġenerali għall-materjali interni hemm marġini negattiva ta’ kontribut II ċara — wara li jitnaqqsu l-kostijiet tal-kapaċità żejda operazzjonali - li jammontaw għal 13 fil-mija tal-fatturat (ara it-Tabella 4).

(269)

Il-Ġermanja ssostni li ZT ma kellha l-ebda vantaġġ ekonomiku mill-kontributi annwali, għaliex hu irrilevanti jekk l-Istat jagħtix kumpens għaż-żamma ta’ riżerva għall-epidemiji direttament lill-impriża tar-rimi jew jekk tiffinanzjahiex indirettament permezz ta’ għajnuna għat-TSE lil dawk li jipproduċu l-materjal. Fil-każ tal-aħħar il-kost għar-riżerva għall-epidemiji jkun inkluż fil-imposti, iżda fl-istess ħin dawk responsabbli biex jipproduċu l-materjal ikollhom sostenn permezz ta’ għajnuna ogħla. Fiż-żewġ każijiet il-karus pubbliku fil-fatt ikun qed iġorr patri kbira mill-piż, u dan hu dak li primarjament jikkonċerna lir-reviżjoni fid-dawl tal-liġi dwar il-kompetizzjoni.

(270)

L-ewwel nett għandu jerġa jkun notat (ara s-sezzjoni 2.5.3) li ZT tirċievi l-kontribut annwali flimkien mal-għajnuna dwar it-TSE li tmur lill-bdiewa. barar minn hekk, ZT jirċievi iktar assistenza mill-għajnuna dwar it-TSE fir-Rhineland-Palatinate milli fit-Tramuntana u ċ-Ċentru ta’ Hessen, peress li l-prezz għal kull tunnellata (EUR 212) — u għaldaqstant il-bażi għall-għajnuna tat-TSE — hi konsiderevolment iktar baxxa mill-prezz għal kull tunnellata fir-Rhineland-Palatinate (EUR 390). Dan ċarament mhux il-każ li bdiewa f'din iż-żona koperti mill-assoċjazzjoni jibbenefikaw minn ħlasijiet iktar baxxi grazzi għall-kontributi annwali.

(271)

Barra minn dan, il-linji gwida Komunitarji dwar it-TSE jirrikjedu espliċitament evidenza li l-għajnuna ma tibbenefikax lil impriżi tal-produzzjoni iktar 'l isfel (60). Iżda kif jidher mis-sezzjonijiet 9.5.2 u 9.5.3, ZT verament tuża l-kontribut annwali biex tiffinanzja t-telf dovut għall-politika tagħha tal-ipprezzar, il-kapaċità b'utilizzazzjoni baxxa jew ineffiċjenzi oħra fl-operazzjonijiet tan-negozju tagħha.

(272)

Għaldaqstant il-Ġermanja ċarament mhix kapaċi turi li l-kontribut annwali jibbenefika lill-bdiewa bħala kumpens għall-kost tar-rimi ta’ bhejjem mejta. Kuntrarjament, il-mistoqsija dwar jekk il-bdiewa ma jibbenefikawx minn prezzijiet iktar baxxi mingħajr il-kontribut annwali għadha mingħajr tweġiba, għax ZT imbagħad kienet tkun soġġetta għal pressjoni ekonomika ikbar biex taġġusta l-kapaċità u l-prattiki tan-negozju tagħha skont il-kundizzjonijiet tas-suq, fi stadju iktar bikri.

(273)

Il-Ġermanja ma kinitx kapaċi turi li l-kontributi annwali lil ZT huma ġustifikati bħala kumpens mill-Istat għall-obbligi riżultanti mill-Verbandsordnung. Il-kriterji ta’ Altmark mhumiex sodisfatti.

(274)

Reviżjoni dettaljata tal–kontabbiltà abbażi tal-introjtu u tal-kost ta’ ZT turi minflok li l-kontributi annwali jagħtu lil ZT vantaġġi ekonomiċi fir-rigward tar-rimi ta’ materjal intern u estern.

(275)

Għaldaqstant il-kontributi annwali jikkostitwixxu għajnuna mill-Istat skont it-tifsira fl-Artikolu 107(1) tat-TFUE.

(276)

Il-kontributi annwali li rċieva ZT mill-1979 ma kinux notifikati lill-Kummissjoni skont l-Artikolu 108(3) tat-TFUE. Għaldaqstant il-kontributi annwali jikkostitwixxu għajnuna illegali mill-Istat skont l-Artikolu 108(3) tat-TFUE.

(277)

Ma jistax ikun hemm eżenzjoni mill-obbligu li tagħti notifika skont id-Deċiżjoni tal-Kummissjoni 2005/842/KE tat-28 ta’ Novembru 2005 dwar l-applikazzjoni tal-Artikolu 86(2) tat-Trattat tal-KE dwar l-għajnuna mill-Istat fil-forma ta’ kumpens tas-servizz pubbliku mogħti lil ċerti impriżi fdati bl-operazzjoni ta’ servizzi ta’ interess ekonomiku ġenerali (61) (“Deċiżjoni SGEI 2005”) u d-Deċiżjoni tal-Kummissjoni 2012/21/UE tal-20 ta’ Diċembru 2011 dwar l-applikazzjoni tal-Artikolu 106(2) tat-Trattat dwar il-Funzjonament tal-Unjoni Ewropea għall-għajnuna mill-Istat fil-forma ta’ kumpens mis-servizz pubbliku mogħti lil ċerti impriżi fdati bl-operazzjoni ta’ servizzi ta’ interess ekonomiku ġenerali (62) (“Deċiżjoni SGEI 2011”), peress, kif jidher mis-sezzjoni 9, ZT mhux fdat b'servizz ta’ interess ekonomiku ġenerali, peress li r-rimi ta’ materjal tal-kategoriji 1 u 2, il-proviżjoni ta’ riżerva għall-epidemiji, u r-rimi ta’ materjal tal-kategorija 3 mhumiex servizzi ta’ interess ekonomiku ġenerali. Apparti dan, it-tieni kriterju ta’ Altmark mhux sodisfatt għall-perjodu mill-1979 sal-2010, u t-tielet kriterju ta’ Altmark mhux sodisfatt għall-perjodu kollu mill-1979 'l quddiem. Bħala riżultat ta’ dan, l-Artikoli 4 u 5 tad-deċiżjonijiet tas-SGEI 2005 u 2012 dwar l-eżenzjonijiet mhumiex sodisfatti.

(278)

Skont l-Artikolu 106(2) tat-TFUE, id-dispożizzjonijiet tat-TFUE japplikaw għal impriżi li huma fdati b'servizzi ta’ interess ekonomiku ġenerali jew li għandhom il-karattru ta’ monopolju li jipproduċi dħul. Madankollu l-Artikolu 106(2) tat-TFUE jipprovdi eċċezzjoni għar-regoli tat-TFUE jekk l-applikazzjoni tar-regoli tal-kompetizzjoni tostakola t-twettiq, fil-liġi jew fil-fatt, ta’ kompiti partikolari assenjati lilhom. Din id-dispożizzjoni ta’ eżenzjoni tista' tkun applikata biss jekk l-iżvilupp tan-negozju mhux affettwat sa punt kuntrarju għall-interessi tal-Unjoni.

(279)

Skont il-paragrafu 69 tal-linji gwida tas-SGEI tal-Unjoni, il-Kummissjoni tapplika l-prinċipji tal-linji gwida tal-Unjoni għal kull għajnuna illegali li tiddeċiedi fuqha wara l-31 ta’ Jannar 2012, anke jekk l-għajnuna kienet mogħtija wara din id-data. Peress li l-kontributi annwali jikkostitwixxu għajnuna illegali mill-Istat, il-linji gwida tas-SGEI tal-Unjoni għandhom ikunu applikati.

(280)

Kif hu mniżżel f'8.1, ZT mhux fdata b'servizz ta’ interess ekonomiku ġenerali, għax ir-rimi ta’ materjal tal-kategoriji 1 u 2, iż-żamma ta’ riżerva għall-epidemiji, u r-rimi ta’ materjal tal-kategorija 3 ma jikkostitwixxux servizzi ta’ interess ekonomiku ġenerali. Għal din ir-raġuni biss, il-kontributi annwali mhumiex kompatibblu mal-Artikolu 106(2) TFUR u l-linji gwida SGEI tal-Unjoni.

(281)

Skont it-tieni u t-tielet kriterji ta’ Altmark, għajnuna skont il-linji gwida SGEI tal-Unjoni tista' titqies bħala kompatibbli mal-Artikolu 106(2) tat-TFUE biss jekk hemm att ta’ affidament li jisrtabbilixxi l-metdoi għall-kalkolu tal-kumpens (sezzjoni 2.3) u jekk id-daqs tal-għajnuna ma jaqbiżx il-kostijiet netti tal-obbligu tas-servizz pubbliku (sezzjoni 2.8).

(282)

Kif muri fid-dettal fis-sezzjoni 9.2, it-tieni kriterju ta’ Altmark mhux sodisfatt għal perjodu 1979 sa 2009, u t-tielet kriterju ta’ Altmark mhux sodisfatt għall-perjodu kollu. Għaldaqstant is-sezzjoni 2.3 tal-linji gwida SGEI tal-Unjoni (għall-perjodu 1979 sa 2009) u s-sezzjoni 2.8 (għall-perjodu kollu) mhumiex sodisfatti.

(283)

Għalhekk il-kontributi annwali ma jistgħux ikunu ġustifikati skont l-Artikolu 106(2) tat-TFUE u l-linji gwida tas-SGEI tal-Unjoni bħala għajnuna għaż-żamma ta’ riżerva għall-epidemiji fiż-żona koperta mill-assoċjazzjoni.

(284)

Il-kontributi annwali jikkostitwixxu għajnuna għall-operazzjoni li hi ġeneralment ipprojbita (63). Għaldaqstant l-oneru tal-prova għall-kompatibilità ta’ tali għajnuna hu tal-Istat Membru.

(285)

Il-linji gwida Komunitarji dwar it-TSE u l-linji gwida dwar l-għajnuna agrikola 2007-2013 jipprojbixxu kull għajnuna għall-kostijiet tar-rimi ta’ skart tal-biċċeriji u jippermettu għajnuna għall-kostijiet għar-rimi ta’ bhejjem mejta jekk dawn jibbenefikaw biss lill-bdiewa. Impriżi iktar 'l isfel — bħal biċċeriji jew impriżi għar-rimi — taħt l-ebda ċirkostanzi ma jistgħu jibbenefikaw minn għajnuna (64).

(286)

Għar-raġunijiet ta’ simplifikazzjoni tal-amministrazzjoni, għajnuna agrikola għall-kostijiet tar-rimi ta’ bhejjem mejta jistgħu jitħallsu direttament lill-impriżi tar-rimi, iżda għandu jkun demostrat li l-għajnuna kollha tmur lill-bdiewa (65).

(287)

Kif muri fis-sezzjoni 9, il-kontributi annwali jagħtu lil ZT vantaġġ ekonomiku u ma jibbenefikawx lill-bdiewa fiż-żona koperta mill-assoċjazzjoni, peress li saħansitra għandhom iħallsu prezzijiet ogħla għar-rimi ta’ bhejjem mejta milli fit-Tramuntana u ċ-Ċentru ta’ Hessen, pereżempju. Il-Ġermanja ma kinitx kapaċi turi li l-kontributi annwali huma ttrasferiti kompletament lill-bdiewa.

(288)

Addizzjonalment id-deċiżjoni N 15/04 tas-6 ta’ Lulju 2004 li tapprova l-iskema tal-għajnuna li tikkumpensal-bdiewa fiż-żona koperta minn ZT għall-kostijiet tal-bhejjem mejta għall-perjodu mill-1998 sal-2013 tispeċifika li l-għajnuna agrikola approvata m'għandhiex tkun akkumulata ma għajnuna oħra.

(289)

Għal għajnuna illegali mogħtija qabel l-1 ta’ Jannar 2003, is-sezzjoni VI tal-linji gwida Komuntarji dwar it-TSE jipprovdu għall-eċċezzjonijiet.

(290)

Dawn eċċezzjonijiet mhumiex applikabbli lanqas. Il-kontributi annwali mhumiex limitati għall-kostijiet tar-rimi ta’ bhejjem mejta, li kienu fi kwalunkwe każ iffinanzjati għall-parti l-kbira skont l-arranġamenti tal-għajnuna agrikola, lanqas ma huma miżura fir-terminu l-qasir ta’ durata limitat fir-rispett ta’ skart tal-biċċeriji.

(291)

L-aħħar nett għandu jkun enfasizzat li l-Ġermanja nnifisha m'għamlitx argumenti konvinċenti dwar il-kontributi annwali skont il-linji gwida Komunitarji dwar it-TSE u l-linji gwida dwar l-għajnuna agrikola 2007-2013.

(292)

Peress li l-kontributi annwali jibbenefikaw lil ZT, ma jistgħux ikunu kkunsidrati bħala għajnuna li hi kompaibbli mas-suq intern skont it-tifsira fil-linji gwida Komunitarji dwar it-TSE u l-linji gwida dwar l-għajnuna agrikola 2007-2013 skont l-Artikolu 107(3)(c) tat-TFUE.

(293)

Il-kontributi annwali jikkostitwixxu għajnuna operatorja, li hi ġeneralment ipprojbita (66). Għalhekk l-oneru tal-prova għall-kompatibilità ta’ tali għajnuna hu tal-Istat Membru. Il-Ġermanja sostniet li l-kontributi annwali huma għajnuna ambjentali.

(294)

Skont il-paragrafu 132 tal-linji gwida dwar l-għajnuna ambjentali, għajnuna ta’ investiment lill-impriżi li qed isewwu l-ħsara billi jirrijabilitaw siti kontaminati hi meqjusa kompatibbli mas-suq intern skont it-tifsira fl-Artikolu 107(3)(c) tat-TFUE sakemm din twassal għal titjib fil-protezzjoni ambjentali. Madankollu, il-prinċipju ta’ “min iniġġes iħallas” imniżżel fl-Artikolu 191(2) TFUE u l-linji gwida dwar l-għajnuna ambjentali għandhom ikunu osservati. Skont il-paragrafu 132 tal-linji gwida dwar l-għajnuna ambjentali in-niġġies għandu jiffinanzja r-rijabilitazzjoni mingħajr għajnuna mill-Istat. Il-persuna li għandha tkun meqjusa bħala n-niġġies hi determinata skont min hu responsabbli skont il-liġi nazzjonali.

(295)

Il-mument relevanti għall-valutazzjoni tas-sitwazzjoni skont il-liġi nazzjonali dwar ir-responsabilità jiddependi fuq il-poizzjoni legali fil-ħin meta saret id-deċiżjoni uffiċjali.

(296)

Il-Ġermanja ma tiċħadx li skont l-ordnijiet tat-tindif tal-21 ta’ April 1997 għas-sit Sohrschied u tal-31 ta’ Marzu 1998 għas-sit Sprendlingen-Gensingen, ZT ingħatat l-obbligu totali bħala niġġies li jnaddaf iż-żewġ siti skont il-liġi nazzjonali applikabbli dak iż-żmien. Għaldaqstant ZT hi responsabbli skont il-liġi Ġermaniża bħala n-niġġies għall-kost biex tirruimedja għall-kontaminazzjoni tal-ħamrija fiż-żewġ siti. Il-Ġermanja targumenta li skont sentenza tal-Bundesverfassungsgericht mogħtija fis-16 ta’ Frar 2000 (67), il-finanzjament tal-kostijiet tat-tindif lil hinn mil-limitu tar-responsabbiltà jfisser li l-kontributi annwali għandhom jitqiesu bħala għajnuna kompatibbli, peress li r-responsabbiltà ta’ persuni privati kienet limitata permezz ta’ din is-sentenza għall-valuri tas-suq tal-art.

(297)

Madankollu, l-argument tal-Ġermanja mhux rilevanti. L-ewwel nett, id-deċiżjoni tal-Bundesverfassungsgericht tapplika biss inter partes, jiġifieri bejn il-partijiet fil-kawża. Madankollu, fuq kollox, bidla fil-każistika tal-ogħla qorti ma tbiddilx is-sitwazzjoni legali u għalhekk mhix raġuni għal reviżjoni skont it-tifsira tal-Artikolu 51(1)(1) tal-Att dwar il-Proċedura Amministrattiva fir-rigward tal-atti amministrattivi li kienu saru vinkolanti.

(298)

Skont il-ġurisprudenza Ġermaniża s-sentenza tal-Bundesverfassungsgericht ma tbiddilx il-fatt li f'dak iż-żmien tal-ordni tat-tindif in-niġġiesa kollha kienu responsabbli għall-kostijiet kollha tat-tindif. Wara s-sentenza tal-Bundesverfassungsgericht tas-16 ta’ Frar 2000 l-ebda niġġiesa ma setgħu jevitaw ir-responsabbiltà totali fir-rigward ta’ ordni preċedenti li kienet saret vinkolanti.

(299)

Għaldaqstant ZT hi responsabbli anke meta tkun ikkunsidrata s-sentenza tal-Bundesverfassungsgericht tas-16 ta’ Frar 2000 fil-każ tas-siti ta’ Sprendlingen-Gensingen u ta’ Sohrschied li kienet ċitata mill-Ġermanja.

(300)

Peress li ZT ma appellatx kontra l-ordinijiet tat-tindif, huma akkwistaw effett vinkolanti u huma finali. Biex il-Ġermanja issa, wara l-avveniment, tinnega l-essenza tar-responsabbiltà ta’ ZT għas-sit ta’ Sohrschied hu argument li ma jistax ikun aċċettat. ZT setgħet tappella kontra l-ordni tat-tindif tal-21 ta’ April 1997 u ma ħallithiex issir obbligatorja. Mhux ix-xogħol tal-Kummissjoni li tirrevedi deċiżjoni vinkolanti minn awtorità nazzjonali fir-rigward ta’ sitwazzjoni nazzjonali dwar ir-responsabbiltà fid-dawl tal-prinċipju ta’ “min iniġġes iħallas”.

(301)

Barra minn hekk, il-Ġermanja nnifisha tirrikonoxxi li d-deċiżjoni tal-Bundesverfassungsgericht tas-16 ta’ Frar 2000 tapplika biss għall-individwi privati, u mhux għal persuni ġuridiċi skont il-liġi pubblika. Dan hu għaliex il-bażi legali biex tillimita r-responsabbiltà hi l-liġi tal-proprjetà, li persuni ġuridiċi skont il-liġi publika ma jistgħux jinvokaw. Għaldaqstant ma jistax ikun ikkontestat li skont il-liġi nazzjonali, ZT hi responsabbli kompletament għas-siti kontaminati.

(302)

Trattament li hu potenzjalment inugwali bejn persuni ġuridiċi skont il-liġi privata u persuni ġuridiċi skont il-liġi pubblika fis-sistema legali tal-Istat Membru ma tistax tkun invokata skont il-linji gwida tal-għajnuna ambjentali. Dwar il-kwistjoni tar-responsabbiltà għal siti kontaminati, huma jiddikjaraw li l-liġi nazzjonali biss tapplika.

(303)

Peress li ZT hi responsabbli skont il-liġi Ġermaniża għall-kostijiet kollha tat-tindif taż-żewġ siti, il-kontribut annwali ma jistax ikun kunsidrat kompatibbli mas-suq intern skont it-tifsira tal-linji gwida dwar għajnuna tal-Istat fuq protezzjoni ambjentali skont l-Artikolu 107(3)(c) tat-TFUE.

(304)

Il-kontributi annwali mogħtija lil ZT mill-1979 jikkostitwixxu għajnuna mill-Istat skont it-tifsira tal-Artiolu 107(1) tat-TFUE. Il-Ġermanja tat il-kontributi annwali bi ksur tal-Artikolu 108(3) tat-TFUE.

(305)

Ma jistgħux ikunu dikjarati kompatibbli mas-suq intern skont l-Artikolu 106(2) tat-TFUE jew l-Artikolu 107(2) u (3) tat-TFUE.

(306)

Skont l-Artikolu 1(b)(iv) flimkien mal-Artikolu 15(3) tar-Regolament (KE) Nru 659/1999 għajnuna għal liema l-limitu taż-żmien ta’ rkupru spiċċa hi kunsidrata bħala għajnuna eżistenti. Skont l-Artikolu 15 il-poter tal-Kummissjoni li tirkupra għajnuna tapplika għal perjodu ta’ għaxar snin. Il-limitu taż-żmien ta’ rkupru jibda jgħodd mill-ġurnata fejn ingħatat l-għajnuna illegali lill-benefiċjarju u hu sospiż b'kull miżura li tieħu l-Kummissjoni fir-rigward tal-għajnuna illegali. Il-limitu taż-żmien ikompli wara kull interruzzjoni.

(307)

Il-Qrati tal-Unjoni sostnew li mhux biss iż-żmien għall-irkupru ma jistax ikun interrot permezz ta’ proċedura formali iżda wkoll li rikjesta għal informazzjoni tikkostitwixxi att li jista' jinterrompi l-limitu ta’ żmien (68).

(308)

Il-kwerelant sfida l-kontribut annwali lil ZT f'Jannar 2008 u fis-26 ta’ Mejju 2008 il-Ġermanja ntbagħtet talba għal informazzjoni. Din it-talba għal informazzjoni interrompiet il-limitu taż-żmien għall-irkupru. Bħala riżultat il-kontributi annwali kollha li rċeviet ZT qabel is-26 ta’ Mejju 1998 huma kkunsidrati bħala għajnuna eżistenti. Min-naħa l-oħra il-kontributi annwali kollha li rċeviet ZT wara s-26 ta’ Mejju 1998 jikkostitwixxu għajnuna ġdida.

(309)

Skont l-Artikolu 14 tar-Regolament (KE) Nru 659/1999, il-Kummissjoni m'għandhiex tirrikjedi l-irkupru tal-għajnuna jekk dan ikun kontra l-prinċipju ġenerali tal-liġi tal-Unjoni. Fil-każ preżenti, hemm il-mistoqsija dwar jekk is-sentenza tal-BverwG tas-16 ta’ Diċembru 2010 setgħetx toħloq aspettattivi leġittimi għall-benefiċjarju li l-miżura taħt valutazzjoni ma tikkostitwixxix għajnuna mill-Istat.

(310)

F'dan ir-rigward, il-Kummissjoni l-ewwel nett tosserva li s-sentenza tikkonċerna biss pagamenti magħmula għas-sena 2010. Jekk xejn, setgħet allura toħloq biss aspettattivi leġittimi għal dik is-sena (u s-snin ta’ wara, sakemm il-mekkaniżmu jibqa' l-istess).

(311)

Iżda anke għas-sena 2010 (u s-snin ta’ wara), is-sentenza mhux kapaċi toħloq aspettattivi leġittimi. Skont il-każistika stabbilita, il-prinċipju tal-protezzjoni tal-aspettattivi leġittimi japplika għal individwu f'sitwazzjoni fejn istituzzjoni tal-Unjoni Ewropea, billi tagħti lil dik il-pesuna assigurazzjonijiet preċiżi, wasslitha għal aspettattivi fondati sew (69). Tali assigurazzjonijiet, fi kwalunkwe forma li jingħataw, jikkostitwixxu informazzjoni preċiża, inkundizzjonata u konsistenti (70).

(312)

F'dan il-każ, il-Kummissjoni ma tatx lil ZT assigurazzjonijiet preċiżi ta’ dan it-tip, kuntrarjament: Fetħet il-proċedura formali ta’ investigazzjoni fl-20 ta’ Lulju 2010.

(313)

Il-BverwG mhix istituzzjoni tal-Unjoni Ewropea. Skont il-każistika stabbiliat, fir-rigward tas-superviżjoni tal-konformità tal-Istati Membri mal-obbligi tagħhom skont l-Artikoli 107 tal-KE u 108 tal-KE, il-qrati nazzjonali u l-Kummissjoni jissodisfaw rwoli kumplimentari u separati (71). Filwaqt li l-kompatibilità ta’ miżuri ta’ għajnuna mas-suq intern jaqgħu taħt il-kompetenza esklussiva tal-Kummissjoni, soġġetta għar-reviżjoni mill-Qrati tal-Unjoni, huma l-qrati nazzjonali li jridu jiżguraw li d-drittijiet tal-individwi huma mħarsa fejn l-obbligu li tagħti notifika minn qabel tal-għajnuna tal-Istat lill-Kummissjoni skont l-Artikolu 108(3) tat-Trattat hu miksur (72).

(314)

F'dan il-każ, il-BverwG ta sentenza dwar miżura li fuqha l-Kummissjoni kienet diġà fetħet proċedura formali ta’ investigazzjoni. Skont il-każistika tal-Qorti, din id-deċiżjoni għandha twassal lill-Istati Membri biex jissospendu l-pagament taħt din il-miżura (73). Barra minn hekk, il-BverwG ta is-sentenza tiegħu (billi ġġustifikaha fost l-oħrajn b'allegazzjoni ta’ nuqqas ta’ applikabbiltà tar-raba' kriterju ta’ Altmark) mingħajr ma rrefera l-każ lill-Qorti tal-Ġustizzja minkejja l-fatt li l-Kummissjoni kienet diġà fetħet proċedura formali ta’ investigazzjoni.

(315)

Taħt dawn iċ-ċirkostanzi, il-Kummissjoni tikkunsidra li s-sentenza tal-BverwG ma tistax tikkostitwixxi informazzjoni preċiża, inkundizzjonata u konsistenti.

(316)

Għaldaqstant, l-irkupru mhux kuntrarju għall-prinċipju ġenerali tal-liġi tal-Unjoni dwar il-protezzjoni tal-aspettattivi leġittimi -