DEĊIŻJONI TAL-KUNSILL

tal-24 ta’ April 2012

dwar il-pożizzjoni li għandha tittieħed mill-Unjoni Ewropea fil-Kumitat Konġunt taż-ŻEE dwar emenda għall-Anness II (Regolamenti tekniċi, standards, ittestjar u ċertifikazzjoni) għal-Ftehim taż-ŻEE

(2012/227/UE)

IL-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikoli 114 u 218(9) tiegħu,

Wara li kkunsidra r-Regolament tal-Kunsill (KE) Nru 2894/94 tat-28 ta’ Novembru 1994 dwar arranġamenti għall-implimentazzjoni tal-Ftehim dwar iż-Żona Ekonomika Ewropea (1), u b’mod partikolari l-Artikolu 1(3) tiegħu,

Wara li kkunsidra l-proposta li saret mill-Kummissjoni Ewropea,

Billi:

(1)	L-Anness II għall-Ftehim dwar iż-Żona Ekonomika Ewropea (2) (“il-Ftehim taż-ŻEE”), fih dispożizzjonijiet u arranġamenti speċifiċi fir-rigward ta’ regolamenti tekniċi, standards, ittestjar u ċertifikazzjoni.

(2)	Ir-Regolament (KE) Nru 110/2008 tal-Parlament Ewropew u tal-Kunsill tal-15 ta’ Jannar 2008 dwar id-definizzjoni, id-deskrizzjoni, il-preżentazzjoni, l-ittikkettar, u l-protezzjoni ta’ indikazzjonijiet ġeografiċi ta’ xorb spirituż (3) għandu jiġi inkorporat fil-Ftehim taż-ŻEE.

(3)

Ir-Rakkomandazzjoni tal-Kummissjoni 2010/133/UE tat-2 ta’ Marzu 2010 dwar il-prevenzjoni u t-tnaqqis tal-kontaminazzjoni bl-ethyl carbamate fl-ispirti tal-frott tal-għadma u l-ispirti tal-karfa tal-frott tal-għadma magħsur u l-monitoraġġ tal-livelli ta’ ethyl carbamate f’dawn ix-xarbiet (4) għandha tiġi inkorporata fil-Ftehim taż-ŻEE.

(4)

Ir-Regolament (KE) Nru 110/2008 ħassar ir-Regolament tal-Kunsill (KEE) Nru 1576/89 tad-29 ta’ Mejju 1989 dwar id-definizzjoni, id-deskrizzjoni, il-preżentazzjoni, l-ittikkettar, u l-protezzjoni ta’ indikazzjonijiet ġeografiċi, ta’ xorb spirituż (5), li hu inkorporat fil-Ftehim taż-ŻEE u li konsegwentement għandu jitħassar skont il-Ftehim taż-ŻEE.

(5)

Ir-Regolament tal-Kummissjoni (KEE) Nru 1014/90 tal-24 ta’ April 1990 li jistabbilixxi regoli dettaljati sabiex jiġu implimentati r-regoli dwar id-definizzjoni, id-deskrizzjoni u l-preżentazzjoni tax-xorb spirituż (6) li hu inkorporat fil-Ftehim taż-ŻEE ma għadux applikabbli (7) u konsegwentement għandu jitħassar mill-Ftehim taż-ŻEE.

(6)	Sabiex jitnaqqsu l-problemi li jistgħu jkunu kkawżati mill-konsum tal-alkoħol, l-Istati tal-EFTA jistgħu jipprojbixxu, fuq bażi mhux diskriminatorja, it-tqegħid fis-suq nazzjonali ta’ spirti għal konsum dirett mill-bniedem b’kontenut ta’ alkoħol ta’ iktar minn 60 %.

(7)

Minħabba l-karatteristiċi speċjali tas-sistema ta’ reġistrazzjoni ta’ indikazzjonijiet ġeografiċi għal xorb spirituż u l-fatt li numru żgħir ħafna ta’ reġistrazzjonijiet huwa mistenni mill-Istati tal-EFTA, il-paragrafu 4d) tal-Protokoll 1 għall-Ftehim taż-ŻEE m’għandux jiġi applikat għal dawn il-kwistjonijiet. Bħala konsegwenza, il-proċeduri għall-applikazzjoni u r-reġistrazzjoni ta’ indikazzjonijiet ġeografiċi se jitwettqu mill-Kummissjoni ukoll b’relazzjoni ma’ applikazzjonijiet mill-Istati tal-EFTA li huma partijiet għall-Ftehim taż-ŻEE.

(8)	Il-pożizzjoni tal-Unjoni fil-Kumitat Konġunt taż-ŻEE għandha għalhekk tkun ibbażata fuq l-abbozz ta’ Deċiżjoni mehmuż,

ADOTTA DIN ID-DEĊIŻJONI:

Artikolu 1

Il-pożizzjoni li għandha tittieħed mill-Unjoni Ewropea fi ħdan il-Kumitat Konġunt taż-ŻEE dwar l-emenda proposta għall-Anness II (Regolamenti tekniċi, standards, ittestjar u ċertifikazzjoni) għall-Ftehim taż-ŻEE għandha tkun ibbażata fuq l-abbozz tad-Deċiżjoni tal-Kumitat Konġunt taż-ŻEE mehmuż ma’ din id-Deċiżjoni.

Artikolu 2

Din id-Deċiżjoni għandha tidħol fis-seħħ fil-jum tal-adozzjoni tagħha.

Magħmul fil-Lussemburgu, l-24 ta’ April 2012.

Għall-Kunsill

Il-President

N. WAMMEN

(1) ĠU L 305, 30.11.1994, p. 6.

(2) ĠU L 1, 3.1.1994, p. 3.

(3) ĠU L 39, 13.2.2008, p. 16.

(4) ĠU L 52, 3.3.2010, p. 53.

(5) ĠU L 160, 12.6.1989, p. 1.

(6) ĠU L 105, 25.4.1990, p. 9.

(7) ĠU C 30, 6.2.2009, p. 18.

ABBOZZ

DEĊIŻJONI Nru …/2012 TAL-KUMITAT KONĠUNT TAŻ-ŻEE

ta’

temenda l-Anness II (Regolamenti tekniċi, standards, ittestjar u ċertifikazzjoni) tal-Ftehim taż-ŻEE

IL-KUMITAT KONĠUNT TAŻ-ŻEE,

Wara li kkunsidra l-Ftehim dwar iż-Żona Ekonomika Ewropea (1), kif emendat mill-Protokoll li jaġġusta l-Ftehim dwar iż-Żona Ekonomika Ewropea, minn issa ‘l quddiem imsejjaħ “il-Ftehim taż-ŻEE”, u b’mod partikolari l-Artikolu 98 tiegħu,

Billi:

(1)	Ir-Regolament (KE) Nru 110/2008 tal-Parlament Ewropew u tal-Kunsill tal-15 ta’ Jannar 2008 dwar id-definizzjoni, id-deskrizzjoni, il-preżentazzjoni, l-ittikkettar, u l-protezzjoni ta’ indikazzjonijiet ġeografiċi ta’ xorb spirituż (2) għandu jiġi inkorporat fil-Ftehim taż-ŻEE.

(2)

Ir-Rakkomandazzjoni tal-Kummissjoni 2010/133/UE tat-2 ta’ Marzu 2010 dwar il-prevenzjoni u t-tnaqqis tal-kontaminazzjoni bl-ethyl carbamate fl-ispirti tal-frott tal-għadma u l-ispirti tal-karfa tal-frott tal-għadma magħsur u l-monitoraġġ tal-livelli ta’ ethyl carbamate f’dawn ix-xarbiet (3) għandha tiġi inkorporata fil-Ftehim taż-ŻEE.

(3)

Ir-Regolament (KE) Nru 110/2008 jħassar ir-Regolament tal-Kunsill (KEE) Nru 1576/89 tad-29 ta’ Mejju 1989 dwar id-definizzjoni, id-deskrizzjoni, il-preżentazzjoni, l-ittikkettar, u l-protezzjoni ta’ indikazzjonijiet ġeografiċi, ta’ xorb spirituż (4), li hu inkorporat fil-Ftehim taż-ŻEE u konsegwentement għandu jitħassar skont il-Ftehim taż-ŻEE.

(4)	Ir-Regolament tal-Kummissjoni (KEE) Nru 1014/90 (5) li hu inkorporat fil-Ftehim taż-ŻEE ma għadux applikabbli (6) u konsegwentement għandu jitħassar mill-Ftehim taż-ŻEE.

(5)

Minħabba l-karatteristiċi speċjali tas-sistema ta’ reġistrazzjoni ta’ indikazzjonijiet ġeografiċi għal xorb spirituż u l-fatt li numru żgħir ħafna ta’ reġistrazzjonijiet huwa mistenni mill-Istati tal-EFTA, jidher raġonevoli li l-paragrafu 4(d) tal-Protokoll 1 għall-Ftehim taż-ŻEE ma jibqax japplika għal dawn il-kwistjonijiet. Dan se jsir mingħajr preġudizzju għal Deċiżjonijiet oħrajn tal-Kumitat Konġunt.

(6)

Din id-Deċiżjoni tikkonċerna l-leġiżlazzjoni dwar xorb spirituż. Il-leġiżlazzjoni li tikkonċerna x-xorb spirituż ma tapplikax għal-Liechtenstein sakemm l-applikazzjoni tal-Ftehim bejn il-Komunità Ewropea u l-Konfederazzjoni Svizzera dwar il-kummerċ fi prodotti agrikoli (7) hija estiża għal-Liechtenstein, kif inhu ddikjarat fl-introduzzjoni għall-Kapitolu XXVII tal-Anness II tal-Ftehim taż-ŻEE. Għalhekk din id-Deċiżjoni m’għandhiex tapplika għal-Liechtenstein.

(7)	L-Anness II għall-Ftehim taż-ŻEE għandu jiġi emendat skont dan,

ADOTTA DIN ID-DEĊIŻJONI:

Artikolu 1

Il-Kapitolu XXVII tal-Anness II (Regolamenti tekniċi, standards, ittestjar u ċertifikazzjoni) għall-Ftehim taż-ŻEE huwa b’dan emendat kif ġej:

1.	It-test tal-punt 1 (ir-Regolament tal-Kunsill (KEE) Nru 1576/89) u l-punt 2 (ir-Regolament tal-Kummissjonil (KEE) Nru 1014/90) jitħassar.

Jiddaħħal il-punt:

“9.

32008 R 0110: Ir-Regolament (KE) Nru 110/2008 tal-Parlament Ewropew u tal-Kunsill tal-15 ta’ Jannar 2008 dwar id-definizzjoni, id-deskrizzjoni, il-preżentazzjoni, l-ittikkettar, u l-protezzjoni ta’ indikazzjonijiet ġeografiċi, ta’ xorb spirituż (ĠU L 39, 13.2.2008, p. 16), kif emendat minn:

—	32008 R 1334: Ir-Regolament (KE) Nru 1334/2008 tal-Parlament Ewropew u tal-Kunsill tas-16 ta’ Diċembru 2008 dwar aromatizzanti u ċerti ingredjenti ta’ l-ikel bi proprjetajiet aromatizzanti għall-użu fl-ikel u fuq l-ikel (ĠU L 354, 31.12.2008, p. 34).

Id-dispożizzjonijiet tar-Regolament (KE) Nru 110/2008 għandhom, għall-finijiet ta’ dan il-Ftehim, jinqraw bl-adattamenti li ġejjin:

(a)	Id-dispożizzjonijiet tar-Regolament (KE) Nru 110/2008 mhux se jippreġudikaw id-dritt għall-Istati tal-EFTA li jipprojbixxu, fuq bażi mhux diskriminatorja, it-tqegħid fis-suq nazzjonali ta’ xorb spirituż għal konsum dirett mill-bniedem b’kontenut ta’ alkoħol ta’ iktar minn 60%.

(b)

L-Istati tal-EFTA se jkunu mistiedna li jibagħtu l-osservaturi tagħhom għal-laqgħat tal-Kumitat għal Xorb Spirituż, kif hemm imsemmi fl-Artikolu 25, li jittratta kwistjonijiet li jaqgħu fi ħdan atti li hemm referenza għalihom fil-Ftehim taż-ŻEE. Ir-rappreżentanti tal-Istati tal-EFTA għandhom jipparteċipaw bis-sħiħ fix-xogħol tal-Kumitat, iżda mhux se jkollhom id-dritt li jivvutaw.

(c)	Il-paragrafu 4d) tal-Protokoll 1 għall-Ftehim taż-ŻEE ma japplikax għall-Kapitolu III tar-Regolament (KE) Nru 110/2008.

(d)

Dawn li ġejjin jiżdiedu fl-Anness III għar-Regolament (KE) Nru 110/2008:

Kategorija tal-prodott

Indikazzjoni ġeografika

Pajjiż tal-oriġini (l-oriġini ġeografika preċiża hija deskritta fil-fajl tekniku)

15.

Vodka

Íslenskt Vodka/Icelandic Vodka

Islanda

Norsk Vodka/Norwegian Vodka

Norveġja

24.	Akvavit/aquavit

ÍslensktBrennivín/Icelandic Aquavit

Islanda

Norsk akevitt/Norsk Aquavit/Norsk Akvavit/Norwegian Aquavit

Norveġja

Xorb spirituż ieħor

L-indikazzjonijiet ġeografiċi msemmija taħt dan il-punt jikkonċernaw prodotti li mhumiex definiti fir-Regolament (KE) Nru 110/2008. B’hekk, għandhom jiġu kkompletati bid-deskrizzjoni għall-bejgħ “xorb spirituż”.

L-Istati tal-EFTA li jipproduċu dan ix-xorb spirituż għandhom jinfurmaw il-Partijiet Kontraenti oħrajn bid-definizzjonijiet nazzjonali ta’ dawn il-prodotti.

10.

32010 H 0133: Ir-Rakkomandazzjoni tal-Kummissjoni 2010/133/UE tat-2 ta’ Marzu 2010 dwar il-prevenzjoni u t-tnaqqis tal-kontaminazzjoni bl-ethyl carbamate fl-ispirti tal-frott tal-għadma u l-ispirti tal-karfa tal-frott tal-għadma magħsur u l-monitoraġġ tal-livelli ta’ ethyl carbamate f’dawn ix-xarbiet (ĠU L 52, 3.3.2010, p. 53).”.

Artikolu 2

It-testi tar-Regolament (KE) Nru 110/2008 u tar-Rakkomandazzjoni 2010/133/UE fil-lingwa Islandiża u f’dik Norveġiża, li għandhom jiġu ppubblikati fis-Suppliment taż-ŻEE ta’ Il-Ġurnal Uffiċjali tal-Unjoni Ewropea, huma awtentiċi.

Artikolu 3

Din id-Deċiżjoni għandha tidħol fis-seħħ fil-[…], sakemm in-notifiki kollha taħt l-Artikolu 103(1) tal-Ftehim taż-ŻEE ikunu saru lill-Kumitat Konġunt taż-ŻEE (*1).

Artikolu 4

Din id-Deċiżjoni għandha tiġi ppubblikata fis-Sezzjoni taż-ŻEE u fis-Suppliment taż-ŻEE ta’ Il-Ġurnal Uffiċjali tal-Unjoni Ewropea.

Magħmul fi …, …

Għall-Kumitat Konġunt taż-ŻEE

Il-President

Is-Segretarji għall-Kumitat Konġunt taż-ŻEE

(1) ĠU L 1, 3.1.1994, p. 3.

(2) ĠU L 39, 13.2.2008, p. 16.

(3) ĠU L 52, 3.3.2010, p. 53.

(4) ĠU L 160, 12.6.1989, p. 1.

(5) ĠU L 105, 25.4.1990, p. 9.

(6) ĠU C 30, 6.2.2009, p. 18.

(7) ĠU L 114, 30.4.2002, p. 132.

(*1) [L-ebda rekwiżiti konstituzzjonali mhuma indikati.] [Huma indikati rekwiżiti konstituzzjonali huma indikati.]