(1)

Skont l-Artikolu 23 tad-Direttiva 2004/109/KE, l-emittenti ta’ pajjiżi terzi jistgħu jiġu eżentati mill-ħtieġa li jippreparaw kontijiet konsolidati skont l-Istandards Internazzjonali għall-Irrappurtar Finanzjarju (IFRS) adottati fl-Unjoni, jekk il-Prinċipji ta’ Kontabbiltà Ġeneralment Aċċettati (GAAP) tal-pajjiż terz inkwistjoni jistipulaw ħtiġiet ekwivalenti. Sabiex tiġi vvalutata l-ekwivalenza tal-GAAP ta’ dak il-pajjiż terz mal-IFRS adottat, ir-Regolament tal-Kummissjoni (KE) Nru 1569/2007 (2) jipprovdi għal definizzjoni tal-ekwivalenza u jistabbilixxi mekkaniżmu għad-determinazzjoni tal-ekwivalenza tal-GAAP ta’ pajjiż terz.

(2)

Huwa importanti li jiġu vvalutati l-isforzi ta’ dawk il-pajjiżi li ħadu l-passi biex l-istandards tal-kontabbiltà tagħhom jikkonverġu mal-IFRS jew jadottawhom. Għaldaqstant, ir-Regolament (KE) Nru 1569/2007 ġie emendat biex il-perjodu ta’ ekwivalenza temporanja jiġi estiż sal-31 ta’ Diċembru 2014.

(3)

Id-Deċiżjoni tal-Kummissjoni 2008/961/KE (3) tipprovdi li l-emittenti ta’ pajjiżi terzi jistgħu jippreparaw wkoll il-kontijiet konsolidati tagħhom mill-1 ta’ Jannar 2009 skont l-IFRS. Skont dik id-Deċiżjoni qabel is-snin finanzjarji li jibdew fl-1 ta’ Jannar 2012 jew wara, l-emittenti ta’ pajjiż terz għandhom jitħallew jippreparaw ir-rapporti finanzjarji konsolidati annwali u ta’ kull sitt xhur tagħhom skont il-GAAP tar-Repubblika tal-Poplu taċ-Ċina, il-Kanada, ir-Repubblika tal-Korea jew ir-Repubblika tal-Indja.

(4)

F’Ġunju 2010, il-Kummissjoni talbet lil dak li kien il-Kumitat tar-Regolaturi Ewropej tat-Titoli (KRET), li ġie mibdul mal-Awtorità Ewropea tat-Titoli u s-Swieq (AETS) bir-Regolament (UE) Nru 1095/2010 tal-Parlament Ewropew u tal-Kunsill tal-24 ta’ Novembru 2010 li jistabbilixxi Awtorità Superviżorja Ewropea (Awtorità Ewropea tat-Titoli u s-Swieq) u li jemenda d-Deċiżjoni Nru 716/2009/KE u jħassar id-Deċiżjoni tal-Kummissjoni 2009/77/KE (4), biex jipprovdi valutazzjoni teknika u aġġornament għall-iżviluppi tal-IFSR fiċ-Ċina, il-Kanada, il-Korea t’Isfel u l-Indja. Il-Kummissjoni kkunsidrat bis-sħiħ ir-rapport ipprovdut mill-KRET f’Novembru 2010 u l-aġġornamenti dwar iċ-Ċina u l-Indja, li rċeviet mill-AETS f’Mejju 2011 wara investigazzjoni fuq il-post li għamlet f’Jannar 2011.

(5)

F’April 2010 il-Ministeru tal-Finanzi taċ-Ċina ħareġ “Roadmap for Continuing Convergence of the Accounting Standards for Business Enterprises (ASBE) with IFRS” li tenna l-impenn taċ-Ċina li tkompli bil-proċess tal-konverġenza lejn l-IFRS. Minn Ottubru 2010 l-istandards u l-interpretazzjonijiet attwali maħruġa mill-Bord dwar l-Istandards Internazzjonali tal-Kontabbiltà (IASB) ġew implimentati fl-ASBE. Il-livell ta’ konverġenza li kien irrappurtat mill-ESMA kien wieħed sodifaċenti u ma kienet meħtieġa l-ebda rikonċiljazzjoni għall-emittenti tal-Unjoni li jippreparaw ir-rapporti finanzjarji skont l-IFRS. Għaldaqstant huwa xieraq li l-ASBE taċ-Ċina jitqies ekwivalenti għall-IFRS adottati mill-1 ta’ Jannar 2012.

(6)

F’Jannar 2006, l-Accounting Standards Board of Canada għamel impenn pubbliku biex jadotta l-IFRS sal-31 ta’ Diċembru 2011. Il-Bord approva l-inkorporazzjoni tal-IFRS fil-Canadian Institute of Chartered Accountants Handbook bħala GAAP Kanadiżi għall-intrapriżi orjentati lejn il-profitt li huma kontabbli pubblikament li jibda fl-2011. Għaldaqstant huwa xieraq li l-GAAP tal-Kanada jitqiesu bħala ekwivalenti għall-IFRS adottati mill-1 ta’ Jannar 2012.

(7)

Il-Korean Financial Supervisory Commission u l-Korean Accounting Institute għamlu impenn pubbliku f’Marzu 2007 li jadottaw l-IFRS sal-31 ta’ Diċembru 2011. Il-Korean Accounting Standards Board adotta l-IFRS bħala l-IFRS Korean (K-IFRS). Il-K-IFRS huma identiċi għall-IFRS kif maħruġa mill-IASB u huma meħtieġa għall-kumpaniji kollha reġistrati fil-Korea t’Isfel mill-2011. L-istituzzjonijiet finanzjarji mhux ikkwotati u l-kumpaniji tal-Istat huma wkoll rikjesti biex japplikaw il-K-IFRS. Kumpaniji mhux ikkwotati oħrajn jistgħu jagħżlu li jagħmlu hekk. Għaldaqstant, huwa xieraq li l-GAAP Koreani jkunu kkunsidrati bħala ekwivalenti għall-IFRS adottati mill-1 ta’ Jannar 2012.

(8)

Il-Gvern Indjan u l-Indian Institute of Chartered Accountants f’Lulju 2007 għamlu impenn pubbliku li sal-31 ta’ Diċembru 2011 jadottaw l-IFRS, bil-għan li l-GAAP Indjani jkunu konformi għal kollox mal-IFRS sa tmiem il-programm. Wara investigazzjoni fuq il-post f’Jannar 2011, l-ESMA osservat li l-Istandards ta’ Kontabbiltà Indjani jidher li għandhom għadd ta’ differenzi mill-IFRS. Għadha teżisti inċertezza dwar l-iskeda għall-implimentazzjoni tas-sistema ta’ rappurtar konformi mal-IFRS.

(9)

Għalhekk, huwa xieraq li l-perjodu tranżitorju jiġi estiż għal mhux aktar minn tliet snin, sal-31 ta’ Diċembru 2014, sabiex l-emittenti ta’ pajjiż terzi jitħallew jippreparaw ir-rapporti finanzjarji annwali u ta’ kull sitt xhur tagħhom skont il-GAAPs tal-Indja fl-Unjoni.

(10)

Peress li l-perjodu tranżitorju li għalih id-Deċiżjoni 2008/961/KE tat l-ekwivalenza għall-GAAPs Ċiniżi, Kanadiżi, tal-Korea t’Isfel u dawk Indjani ntemmu fil-31 ta’ Diċembru 2011, għal raġuni ta’ ċertezza legali, din id-Deċiżjoni għandha tapplika mill-1 ta’ Jannar 2012.

(11)

Id-Deċiżjoni 2008/961/KE għandha għalhekk tiġi emendata skont dan.

(12)

Il-miżuri provduti f’din id-Deċiżjoni huma bi qbil mal-opinjoni tal-Kumitat Ewropew tat-Titoli,

1.

It-tieni paragrafu huwa ssostitwit b’dan li ġej:

“Mill-1 ta’ Jannar 2012, fir-rigward tar-rapporti finanzjarji konsolidati annwali u r-rapporti finanzjarji konsolidati ta’ kull sitt xhur, l-istandards li ġejjin għandhom jiġu kkunsidrati bħala ekwivalenti għall-IFRS adottati skont ir-Regolament (KE) Nru 1606/2002:

2.

Jiżdied it-tielet paragrafu li ġej:

“L-emittenti ta’ pajjiż terzi għandhom jitħallew jippreparaw ir-rapporti finanzjarji konsolidati annwali tagħhom u r-rapporti finanzjarji konsolidati tagħhom ta’ kull sitt xhur skont il-Prinċipji tal-Kontabbiltà Ġeneralment Aċċettati tar-Repubblika tal-Indja għas-snin finanzjarji li jibdew qabel l-1 ta’ Jannar 2015.”