(1)

Id-Direttiva 2005/94/KE tistipula ċerti miżuri preventivi marbuta mas-sorveljanza u s-sejba bikrija tal-influwenza avjarja u li jżidu l-livell ta’ għarfien min-naħa tal-awtoritajiet kompetenti u tal-komunità agrikola u ta’ preparazzjoni għar-riskji ta’ din il-marda.

(2)

Wara li kien hemm tifqigħat tal-influwenza avjarja b’patoġeniċità baxxa fl-2007 u fl-2008 f’xi rziezet fejn jitrabbew it-tjur fil-Portugall ċentrali u tal-Punent, u b’mod partikolari fi rziezet fejn jitrabbew it-tjur maħsubin għall-istokkjar mill-ġdid ta’ tjur tal-kaċċa, twettaq pjan ta’ emerġenza għat-tilqim skont id-Deċiżjoni tal-Kummissjoni 2008/285/KE tad-19 ta’ Marzu 2008 dwar it-tilqim ta’ emerġenza kontra l-influwenza avjarja b’patoġeniċità baxxa fil-papri kuluverti fil-Portugall u ċerti miżuri li jirrestrinġu l-movimenti ta’ dawn it-tjur u l-prodotti tagħhom (2) u din il-marda kienet inqerdet għalkollox.

(3)

Madankollu, abbażi ta’ valutazzjoni tar-riskju, ġie deċiż li xi papri kuluverti ta’ valur għoli, miżmuma għat-trobbija f’razzett partikulari fir-reġjun ta’ Lisboa e Vale do Tejo, Ribatejo Norte, Vila Nova da Barquinha, baqgħu esposti għar-riskju potenzjali li jiġu infettati bl-influwenza avjarja, speċjalment permezz tal-possibbiltà ta’ kuntatt indirett ma’ għasafar slavaġ (“l-azjenda”).

(4)

Il-Portugall għalhekk ressaq pjan preventiv ta’ tilqim kontra l-influwenza avjarja bħala miżura għat-tul, sal-31 ta’ Lulju 2009, li ġie approvat bid-Deċiżjoni tal-Kummissjoni 2008/838/KE tat-3 ta’ Novembru 2008 dwar it-tilqim preventiv kontra l-influwenza avjarja b’patoġeniċità baxxa fil-papri mallard fil-Portugall u ċerti miżuri li jirrestrinġu l-movimenti ta’ dawn it-tjur u tal-prodotti tagħhom (3). Pjan preventiv ulterjuri ta’ tilqim kien approvat bid-Deċiżjoni tal-Kummissjoni 2010/189/UE tad-29 ta’ Marzu 2010 dwar it-tilqim preventiv kontra l-influwenza avjarja b’patoġeniċità baxxa fil-papri mallard fil-Portugall, u ċerti miżuri li jirrestrinġu l-movimenti ta’ dawn it-tjur u tal-prodotti tagħhom (4) ġie implimentat mill-Portugall sal-31 ta’ Lulju 2011.

(5)

Skont l-Artikolu 8 tad-Deċiżjoni 2010/189/UE, il-Portugall ressaq rapport dwar l-implimentazzjoni tal-pjan preventiv ta’ tilqim lill-Kumitat Permanenti dwar il-Katina Alimentari u s-Saħħa tal-Annimali.

(6)

Fit-28 ta’ Novembru 2011, il-Portugall ressaq quddiem il-Kummissjoni, għall-approvazzjoni, pjan preventiv ġdid ta’ tilqim li għandu jiġi applikat sal-31 ta’ Lulju 2013 (“il-pjan ta’ tilqim preventiv”).

(7)

Fl-opinjonijiet xjentifiċi tiegħu dwar l-użu tat-tilqim għall-kontroll tal-influwenzja avjarja maħruġa mill-Awtorità Ewropea għas-Sigurtà Alimentari fl-2005 (5), l-2007 (6) u l-2008 (7), il-Bord tas-Saħħa u l-Benessri tal-Annimali stqarr li t-tilqim ta’ emerġenza u prevenzjoni kontra l-influwenza avjarja huwa għodda siewja biex jikkomplementa l-miżuri ta’ kontroll għal din il-marda.

(8)

Flimkien ma’ dan, il-Kummissjoni eżaminat il-pjan preventiv ta’ tilqim imressaq mill-Portugall li jikkonċerna l-azjenda msemmija hawn fuq, u hija sodisfatta li l-pjan jikkonforma mal-leġiżlazzjoni rilevanti tal-Unjoni. Fid-dawl tal-qagħda epidemjoloġika fir-rigward tal-influwenza avjarja b’patoġeniċità baxxa fil-Portugall, tat-tip ta’ razzett fejn għandha tingħata t-tilqima u tal-kamp tal-applikazzjoni limitat tal-pjan preventiv ta’ tilqim, dan għandu jiġi approvat.

(9)

Għall-għanijiet tat-tilqim preventiv li se jitwettaq mill-Portugall, għandhom jintużaw biss dawk il-vaċċini awtorizzati skont id-Direttiva 2001/82/KE tal-Parlament Ewropew u tal-Kunsill tas-6 ta’ Novembru 2001 dwar il-kodiċi tal-Komunità rigward il-prodotti mediċinali veterinarji (8) jew ir-Regolament (KE) Nru 726/2004 tal-Parlament Ewropew u tal-Kunsill tal-31 ta’ Marzu 2004 li jistabbilixxi proċeduri Komunitarji għall-awtorizzazzjoni u s-sorveljanza ta’ prodotti mediċinali għall-użu mill-bniedem u veterinarju u li jistabbilixxi l-Aġenzija Ewropea għall-Mediċini (9).

(10)

Barra minn hekk, għandu jkun hemm sorveljanza u ttestjar tal-laboratorju fir-razzett fejn hemm il-papri kuluverti mlaqqma u l-għasafar sentinelli mhux imlaqqma, kif stabbilit fil-pjan ta’ tilqim preventiv.

(11)

Huwa xieraq ukoll li jiġu introdotti ċerti restrizzjonijiet fuq il-moviment tal-papri kuluverti mlaqqma, il-bajd għat-tifqis tagħhom u l-papri kuluverti li jitnisslu minn dawn it-tjur skont il-pjan preventiv ta’ tilqim. Minħabba n-numru żgħir ta’ papri kuluverti li hemm fir-razzett fejn se jitwettaq it-tilqim preventiv, kif ukoll għal raġunijiet ta’ loġistika u traċċabbiltà, il-papri kuluverti li jkunu ngħataw it-tilqima ma għandhomx jinħarġu mir-razzett, iżda jridu jinqatlu meta jispiċċa ċ-ċiklu riproduttiv tagħhom b’konformità mar-rekwiżiti tal-Artikolu 10(1) tad-Direttiva tal-Kunsill 93/119/KEE tat-22 ta’ Diċembru 1993 dwar il-protezzjoni ta’ annimali fil-ħin tat-tbiċċir jew qtil (10).

(12)

Fir-rigward tal-kummerċ fit-tjur maħsuba għall-istokkjar mill-ġdid ta’ tjur tal-kaċċa, il-Portugall ħa miżuri addizzjonali skont id-Deċiżjoni tal-Kummissjoni 2006/605/KE tas-6 ta’ Settembru 2006 dwar ċerti miżuri ta’ protezzjoni fir-rigward ta’ kummerċ intrakomunitarju tat-tjur maħsuba għall-popolament mill-ġdid tal-provvista ta’ annimali tal-kaċċa (11).

(13)

Biex jitnaqqas l-impatt ekonomiku fuq ir-razzett ikkonċernat għandhom jiġu stipulati ċerti derogi mir-restrizzjonijiet ta’ moviment għall-papri kuluverti li jitnisslu minn papri kuluverti imlaqqma, minħabba li dawn il-movimenti ma huma ta’ ebda riskju speċifiku għat-tixrid tal-marda sakemm titwettaq sorveljanza uffiċjali u jkun hemm konformità mar-rekwiżiti speċifiċi għas-saħħa tal-annimali għall-kummerċ fl-Unjoni.

(14)

Il-pjan ta’ tilqim preventiv għandu jiġi approvat biex ikun jista’ jiġi implimentat sal-31 ta’ Lulju 2013. Għaldaqstant, din id-Deċiżjoni għandha tapplika sa dik id-data.

(15)

Il-miżuri stipulati f’din id-Deċiżjoni huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali,

(a)

ikunu mmarkati individwalment;

(b)

ma jittiħdux fi rziezet oħra tat-tjur fil-Portugall, u lanqas

(c)

jinħarġu mill-Portugall.