|
4.2.2012 |
MT |
Il-Ġurnal Uffiċjali tal-Unjoni Ewropea |
L 33/8 |
DEĊIŻJONI TA’ IMPLIMENTAZZJONI TAL-KUMMISSJONI
tat-2 ta’ Frar 2012
dwar ir-rikonoxximent ta’ Polski Rejestr Statków S.A. (Ir-Reġistru Marittimu Pollakk) bħala soċjetà ta’ klassifikazzjoni għall-bastimenti tal-passaġġi fuq l-ilma interni
(notifikata bid-dokument numru C(2012) 431)
(Test b’relevanza għaż-ŻEE)
(2012/66/UE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat id-Direttiva 2006/87/KE tal-Parlament Ewropew u tal-Kunsill tat-12 ta’ Diċembru 2006 li tistabbilixxi r-rekwiżiti tekniċi għall-bastimenti tal-passaġġi fuq l-ilma interni u li tħassar id-Direttiva tal-Kunsill 82/714/KEE (1), u partikolarment l-Artikolu 10 (1) u l-Parti II tal-Anness VII tagħha,
Wara konsultazzjoni mal-Kumitat imsemmi fl-Artikolu 7 tad-Direttiva tal-Kunsill 91/672/KEE tas-16 ta’ Diċembru 1991 dwar ir-rikonoxximent reċiproku taċ-ċertifikati tal-boatmasters nazzjonali għat-trasportazzjoni ta’ merkanzija u ta’ passiġġieri permezz ta’ passaġġi interni fuq l-ilma (2),
Billi:
|
(1) |
Bl-ittra tat-3 ta’ Lulju 2008 il-Polonja ppreżentat applikazzjoni lill-Kummissjoni għar-rikonoxximent ta’ Polski Rejestr Statków S.A (minn issa ’l quddiem imsejjaħ PRS) bħala soċjetà ta’ klassifikazzjoni skont it-tifsira tad-Direttiva. Il-PRS għandha l-kwartieri ġenerali tagħha fil-Polonja. |
|
(2) |
Flimkien mal-applikazzjoni tagħha l-Polonja ppreżentat l-informazzjoni u d-dokumentazzjoni meħtieġa biex ikun aċċertat li ntlaħqu l-kriterji tar-rikonoxximent. |
|
(3) |
Ġiet organizzata seduta fil-laqgħa konġunta tal-esperti mill-Istati Membri tal-Unjoni Ewropea u mill-Kummissjoni Ċentrali għan-Navigazzjoni fuq ir-Rhine (minn issa ’l quddiem “CCNR”) dwar ir-rekwiżiti tekniċi għall-bastimenti tal-passaġġi fuq l-ilma interni f’April 2009, li matulha l-awtorità tal-Polonja u l-PRS taw preżentazzjonijiet. |
|
(4) |
Is-segretarjat tas-CCNR ġie kkonsultat kif imsemmi fil-Parti II il-paragrafu 4 tal-Anness VII għad-Direttiva 2006/87/KE. |
|
(5) |
Il-Kummissjoni vvalutat il-konformità ta’ PRS mal-kriterji fil-Parti I tal-Anness VII għad-Direttiva 2006/87/KE u kkonkludiet li PRS tilħaq dawn il-kriterji, |
ADOTTAT DIN ID-DEĊIŻJONI:
Artikolu 1
Is-soċjetà ta’ klassifikazzjoni PRS għandha tiġi rikonoxxuta skont l-Artikolu 10 tad-Direttiva 2006/87/KE.
Artikolu 2
Din id-Deċiżjoni hija indirizzata lill-Istat(i) Membru(i) li għandu/għandhom il-passaġġi interni fuq l-ilma kif imsemmi fl-Artikolu 1(1) tad-Direttiva 2006/87/KE u lill-Polski Rejestr Statków (Ir-Reġistru Marittimu Pollakk), al. gen. J. Hallera 126, 80-416 Gdańsk, il-Polonja.
Magħmul fi Brussell, it-2 ta’ Frar 2012.
Għall-Kummissjoni
Siim KALLAS
Viċi President
(1) ĠU L 389, 30.12.2006, p. 1.
(2) ĠU L 373, 31.12.1991, p. 29.