15.5.2012 |
MT |
Il-Ġurnal Uffiċjali tal-Unjoni Ewropea |
L 126/13 |
DEĊIŻJONI TAL-BANK ĊENTRALI EWROPEW
tas-26 ta’ April 2012
li temenda d-Deċiżjoni BĊE/2010/22 dwar il-proċedura għall-akkreditazzjoni tal-kwalità għall-manifatturi ta’ karti tal-flus tal-euro
(BĊE/2012/7)
(2012/258/UE)
IL-KUNSILL GOVERNATTIV TAL-BANK ĊENTRALI EWROPEW,
Wara li kkunsidra t-Trattat dwar il-Funzjonament tal-Unjoni Ewropea, u b’mod partikolari l-Artikolu 128(1) tiegħu,
Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew, u b’mod partikolari l-Artikolu 16 tiegħu,
Wara li kkunsidra d-Deċiżjoni BĊE/2010/22 tal-25 ta’ Novembru 2010 dwar il-proċedura għall-akkreditazjoni tal-kwalità għall-manifatturi ta’ karti tal-flus tal-euro (1), u b’mod partikolari l-Artikoli 2(4), 7 u 10 tiegħu,
Billi:
(1) |
Il-kompetenza tal-Bord Eżekuttiv biex jiddeċìedi dwar akkreditazzjonijiet taħt Artikolu 2(4) ta’ Deċiżjoni BĊE/2010/22 hija ddelegata lilu mill-Kunsill Governattiv skont l-Artikolu 12.1, paragrafu 2 tal-Istatut tas-Sistema Ewropea tal-Banek Ċentrali u tal-Bank Ċentrali Ewropew. |
(2) |
Il-proċedura għall-għoti, it-tiġdid u l-estensjoni tal-akkreditazzjoni tal-kwalità stipulata fid-Deċiżjoni BĊE/2010/22 għandha tiġi emendata sabiex tippermetti l-ipproċessar aktar ta’ malajr ta’ talbiet għall-akkreditazzjoni tal-kwalità, u b’hekk tiżgura l-għoti, it-tiġdid jew l-estensjoni f’waqtha tal-akkreditazzjoni, u biex ittaffi l-piż amministrattiv fuq il-Bord Eżekuttiv tal-Bank Ċentrali Ewropew (BĊE). |
(3) |
Għal dan il-għan, għandu jkun possibbli għall-Bord Eżekuttiv li jissubdelega l-kompetenza biex jittieħdu deċiżjonijiet fir-rigward tal-akkreditazzjoni ta’ rutina lil wieħed jew aktar mill-membri tiegħu. Is-subdelega m’għandhiex, madankollu, tkopri l-kompetenza biex jingħataw eżenzjonijiet, jiġu miċħuda talbiet għall-akkreditazzjoni, u biex jiġu sospiżi jew revokati l-akkreditazzjonijiet. |
(4) |
Id-Deċiżjoni BĊE/2010/22 għandha għalhekk tiġi emendata f’dan is-sens, |
ADOTTA DIN ID-DEĊIŻJONI:
Artikolu 1
Emenda
L-Artikolu 2(4) tad-Deċiżjoni BĊE/2010/22 huwa mibdul b’dan li ġej:
“4. Il-Bord Eżekuttiv għandu jkun kompetenti biex jieħu d-deċiżjonijiet kollha fir-rigward tal-akkreditazzjoni tal-kwalità ta’ manifattur, waqt li jqis il-fehmiet tal-Kumitat tal-Karti tal-Flus, u għandu jinforma lill-Kunsill Governattiv b'dan. Il-Bord Eżekuttiv jista’ jiddeċiedi li jissubdelega l-poteri biex jagħti, jġedded jew jestendi din l-akkreditazzjoni skont l-Artikolu 3(4), l-Artikolu 4(3) u l-Artikoli 7 u 10 lil wieħed jew aktar mill-membri tiegħu.”
Artikolu 2
Dħul fis-seħħ
Din id-Deċiżjoni għandha tidħol fis-seħħ fil-jum wara l-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Frankfurt am Main, is-26 ta’ April 2012.
Il-President tal-BĊE
Mario DRAGHI
(1) GU L 330, 15.12.2010, p. 14.