|
28.10.2011 |
MT |
Il-Ġurnal Uffiċjali tal-Unjoni Ewropea |
L 281/12 |
REGOLAMENT TA’ IMPLIMENTAZZJONI TAL-KUMMISSJONI (UE) Nru 1087/2011
tas-27 ta’ Ottubru 2011
li jemenda r-Regolament (UE) Nru 185/2010 li jistipula miżuri dettaljati għall-implimentazzjoni tal-istandards bażiċi komuni dwar is-sigurtà tal-avjazzjoni fir-rigward tas-sistemi għall-individwazzjoni tal-esplożivi
(Test b’relevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (KE) Nru 300/2008 tal-Parlament Ewropew u tal-Kunsill tal-11 ta’ Marzu 2008 dwar regoli komuni fil-qasam tas-sigurtà tal-avjazzjoni ċivili u li jħassar ir-Regolament (KE) Nru 2320/2002 (1), u b’mod partikolari l-Artikolu 4(3) tiegħu,
Billi:
|
(1) |
Ir-Regolament tal-Kummissjoni (UE) Nru 185/2010 tal-4 ta’ Marzu 2010 li jistipula miżuri dettaljati għall-implimentazzjoni tal-istandards bażiċi komuni dwar is-sigurtà tal-avjazzjoni (2) jistabbilixxi dispożizzjoni dwar is-sistemi għall-individwazzjoni tal-esplożivi [explosive detection systems - EDS]. |
|
(2) |
Il-metodi u t-teknoloġiji għall-individwazzjoni tal-esplożivi jiġu żviluppati biż-żmien. F’konformità mal-evoluzzjoni tat-theddida għall-avjazzjoni ċivili, mal-iżviluppi teknoġiċi u mal-esperjenzi kemm fil-livell tal-Unjoni kif ukoll fil-livell globali, il-Kummissjoni għandha tirrevedi d-dispożizzjonijiet tekniċi u operattivi relatati mas-sistemi għall-individwazzjoni tal-esplożivi. |
|
(3) |
Għaldaqstant, ir-Regolament (UE) Nru 185/2010 għandu jiġi emendat skont dan. |
|
(4) |
Il-miżuri stipulati f’dan ir-Regolament huma konformi mal-opinjoni tal-Kumitat għas-Sigurtà tal-Avjazzjoni Ċivili mwaqqaf permezz tal-Artikolu 19(1) tar-Regolament (KE) Nru 300/2008, |
ADOTTAT DAN IR-REGOLAMENT,
Artikolu 1
L-Anness għar-Regolament (UE) Nru 185/2010 huwa emendat skont l-Anness għal dan ir-Regolament.
Artikolu 2
Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-27 ta’ Ottubru 2011.
Għall-Kummissjoni
Il-President
José Manuel BARROSO
ANNESS
Fil-Kapitolu 12 tal-Anness II għar-Regolament (KE) Nru 185/2010, il-punt 12.4.2 jinbidel b’dan li ġej:
“12.4.2. Standards għall-EDS
|
12.4.2.1. |
Għandu jkun hemm tliet standards għas-sistemi EDS. Ir-rekwiżiti dettaljati dwar dawn l-istandards huma stipulati f’Deċiżjoni separata li ħadet il-Kummissjoni. |
|
12.4.2.2. |
L-EDS kollha għandhom jissodisfaw l-istandard 1. |
|
12.4.2.3. |
L-istandard 1 għandu jiskadi fl-1 ta’ Settembru 2012. |
|
12.4.2.4. |
L-awtorità xierqa tista’ tippermetti li EDS tal-istandard 1 installati bejn l-1 ta’ Jannar 2003 u l-1 ta’ Settembru 2006 jibqgħu jintużaw sa mhux aktar tard mill-1 ta’ Jannar 2014. |
|
12.4.2.5. |
L-istandard 2 għandu japplika għall-EDS kollha installati mill-1 ta’ Jannar 2007, sakemm, ma jkunx sar, qabel id-19 ta’ Ottubru 2006, kuntratt għall-installazzjoni ta’ EDS li jilħaq l-istandard 1. |
|
12.4.2.6. |
L-EDS kollha għandhom jilħqu l-istandard 2 sa mhux aktar tard mill-1 ta’ Settembru 2012, sakemm ma jkunx japplika l-punt 12.4.2.4. |
|
12.4.2.7. |
L-istandard 2 għandu jiskadi fl-1 ta’ Settembru 2020. |
|
12.4.2.8. |
L-awtorità xierqa tista’ tippermetti li l-EDS tal-istandard 2 installati bejn l-1 ta’ Jannar 2011 u l-1 ta’ Settembru 2014 jibqgħu jintużaw sa mhux aktar tard mill-1 ta’ Settembru 2022. |
|
12.4.2.9. |
Meta l-awtorità xierqa tagħti l-awtorizzazzjoni tagħha li tippermetti li l-EDS tal-istandard 2 jibqgħu jintużaw b’seħħ mill-1 ta’ Settembru 2020, din għandha tgħarraf lill-Kummissjoni. |
|
12.4.2.10. |
L-istandard 3 għandu japplika għall-EDS kollha installati b’seħħ mill-1 ta’ Settembru 2014. |
|
12.4.2.11. |
L-EDS kollha għandhom jilħqu l-istandard 3 sa mhux aktar tard mill-1 ta’ Settembru 2020, sakemm ma jkunx japplika l-punt 12.4.2.8.” |