REGOLAMENT TA’ IMPLIMENTAZZJONI TAL-KUMMISSJONI (UE) Nru 763/2011

tad-29 ta’ Lulju 2011

dwar il-klassifikazzjoni ta' ċerti prodotti fin-Nomenklatura Magħquda

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament tal-Kunsill (KEE) Nru 2658/87 tat-23 ta' Lulju 1987 dwar in-nomenklatura tat-tariffa u l-istatistika u dwar it-Tariffa Doganali Komuni ta' Dwana (1), u b’mod partikolari l-Artikolu 9(1)(a) tiegħu,

Billi:

(1)	Sabiex tiġi żgurata applikazzjoni uniformi tan-Nomenklatura Magħquda mehmuża mar-Regolament (KEE) Nru 2658/87, huwa neċessarju li jiġu adottati miżuri li jikkonċernaw il-klassifikazzjoni tal-prodotti msemmija fl-Anness ta' dan ir-Regolament.

(2)

Ir-Regolament (KEE) Nru 2658/87 stabilixxa r-regoli ġenerali għall-interpretazzjoni tan-Nomenklatura Magħquda. Dawk ir-regoli japplikaw ukoll għal kwalunkwe nomenklatura oħra li hija bbażata, parzjalment jew kollha kemm hi fuqha, jew li żżid kwalunkwe subdiviżjoni magħha u li hija stabbilita minn dispożizzjonijiet tal-Unjoni speċifiċi, bil-għan tal-applikazzjoni ta’ tariffi u miżuri oħra relatati mal-kummerċ tal-oġġetti.

(3)	Skont dawk ir-regoli ġenerali, il-prodotti msemmija fil-kolonna (1) tat-tabella mniżżla fl-Anness għandhom jiġu kklassifikati taħt il-kodiċi tan-NM indikata fil-kolonna nru (2), minħabba r-raġunijiet stabbiliti fil-kolonna nru (3) ta' dik it-tabella.

(4)

Huwa xieraq li jkun stipulat li informazzjoni tariffarja li torbot u li nħarġet mill-awtoritajiet tad-dwana tal-Istati Membri rigward il-klassifikazzjoni ta' oġġetti fin-Nomenklatura Magħquda, iżda li mhijiex skont dan ir-Regolament, tkun tista', għal perjodu ta' tliet xhur, tibqa’ tkun invokata mid-detentur, skont l-Artikolu 12(6) tar-Regolament tal-Kunsill (KEE) Nru 2913/92 tat- 12 ta' Ottubru 1992 li jwaqqaf il-Kodiċi Doganali tal-Komunità (2).

(5)	Il-miżuri previsti f'dan ir-Regolament tfasslu b’konformità mal-opinjoni tal-Kumitat tal-Kodiċi Doganali,

ADOTTAT DAN IR-REGOLAMENT:

Artikolu 1

Il-prodotti deskritti fil-kolonna (1) tat-tabella kif tidher fl-Anness għandhom ikunu klassifikati fi ħdan in-Nomenklatura Magħquda taħt il-kodiċi tan-NM indikat fil-kolonna (2) ta' dik it-tabella.

Artikolu 2

Informazzjoni tariffarja li torbot maħruġa mill-awtoritajiet doganali tal-Istati Membri, li ma tikkonformax ma' dan ir-Regolament, tista' tibqa’ tkun invokata għal perjodu ta' tliet xhur taħt l-Artikolu 12(6) tar-Regolament (KEE) Nru 2913/92.

Artikolu 3

Dan ir-Regolament għandu jidħol fis-seħħ fl-għoxrin ġurnata wara dik tal-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jkun vinkolanti fit-totalitá tiegħu, u direttament applikabbli fl-Istati Membri kollha.

Magħmul fi Brussell, id-29 ta’ Lulju 2011.

Għall-Kummissjoni, f'isem il-President,

Algirdas ŠEMETA

Membru tal-Kummissjoni

(1) ĠU L 256, 7.9.1987, p. 1.

(2) ĠU L 302, 19.10.1992, p. 1.

ANNESS

Deskrizzjoni tal-prodotti

Klassifikazzjoni (Kodiċi NM)

Raġunijiet

(1)

(2)

(3)

Apparat portabbli li jaħdem bil-batterija (l-hekk imsejjaħ “E-book”) sabiex jirreġistra u jipproduċi mill-ġdid tipi varji ta’ fajls li jkollhom test (pereżempju, PDF, WOL u HTML), faljs li jkollhom immaġini wieqfa (pereżempju, JPEG) jew faljs li jkollhom awdjo (pereżempju, MP3), b’dimensjonijiet ta’ madwar 18 x 12 x 1 cm u piż ta’ madwar 220 g.

L-apparat huwa mgħammar:

—	bi skrin monokromu (li juża teknoloġija ta’ inka elettronika b’4-livelli ta’ skala griża) b’dimensjonijiet ta’ madwar 12 x 9 cm, u kejl dijagonali tal-iskrin ta’ madwar 15 cm (6 pulzieri) u riżoluzzjoni ta’ 600 x 800 tikka (pixels),

—	b’USB interface,

—	b’konnekter għall-earphones,

—	bi spazju għall-karta tal-memorja,

—	buttuni ta’ kontoll/navigazzjoni,

—	bi proċessur ta’ 200 MHz, u

—	b’memorja interna ta’ 512 MB.

L-apparat jista’ jiġi kkonnetjat ma’ magna awtomatika tal-ipproċessar ta’ dejta għall-iskop sabiex jiġu trasferiti fajls.

Dan l-apparat jista’ jipproduċi mill-ġdid test, immaġini wieqfa u awdjo billi jipproċessa dejta maħżuna fil-memorja interna jew fuq karta tal-memorja.

Dan l-apparat m’għandux funzjonijiet ta’ traduzzjoni jew ta’ dizzjunarju.

8543 70 90

Il-klassifikazzjoni hija ddeterminata mir-Regoli Ġenerali 1 u 6 għall-interpretazzjoni tan-Nomenklatura Magħquda u tal-kitba fil-kodiċi tan-NM 8543 , 8543 70 u 8543 70 90 .

Il-klassifikazzjoni ta’ magna awtomatika tal-ipproċessar ta’ dejta taħt l-intestatura 8471 hija eskluża hekk kif l-apparat ma jissodisfax il-kundizzjonijiet tan-Nota 5(A) mal-Kapitolu 84.

Barra minn hekk, hekk kif l-apparat mhux tat-tip li jintuża biss jew prinċipalment fis-sistema awtomatika tal-ipproċessar tad-dejta, il-klassifikazzjoni ta’ unità ta’ tali sistema skont l-intestatura 8471 hija eskluża wkoll.

Il-klassifikazzjoni skont l-intestatura 8528 bħala moniter hija eskluża peress li l-prodott ma jistax juri immaġini vidjow minħabba t-teknoloġija speċifika li tintuża għall-iskrin u għaldaqstant il-kwalità baxxa tal-immaġini tippermetti biss li jidhru formati ta’ dokumenti u immaġini wieqfa biss.

L-apparat għandu jitqies bħala apparat elettroniku, li għandu funzjoni individwali, li mhux speċifikata jew inkluża fil-Kapitolu 85.

Għaldaqstant għandu jiġi kklassifikat taħt il-kodiċi NM 8543 70 90 .