19.7.2011   

MT

Il-Ġurnal Uffiċjali tal-Unjoni Ewropea

L 188/6

(1)

L-Artikolu 3(1)(c) tar-Regolament (KE) Nru 3/2008 jipprovdi li s-setturi jew prodotti li jistgħu jiġu koperti bl-azzjonijiet ta’ informazzjoni u ta’ promozzjoni, iffinanzjati kompletament jew parzjalment mill-baġit tal-Unjoni, huma determinati billi tiġi kkunsidrata, b’mod partikolari, il-ħtieġa li jiġu affrontati problemi speċifiċi jew ekonomiċi f’settur partikulari.

(2)

L-Artikolu 3(2)(a) tar-Regolament (KE) Nru 3/2008 jipprovdi li l-prodotti li jistgħu jiġu koperti bl-azzjonijiet ta’ informazzjoni u ta’ promozzjoni, iffinanzjati kompletament jew parzjalment mill-baġit tal-Unjoni u li għandhom jitwettqu fil-pajjiżi terzi huma l-aktar dawk li għalihom jeżistu l-possibbiltajiet ta’ esportazzjoni jew ta’ bejgħ ġodda, b’mod partikolari mingħajr l-għoti ta’ rifużjonijiet.

(3)

Is-settur tal-frott u l-ħxejjex friski huwa milqut minn kriżi mingħajr preċedent minħabba epidemija kkawżata mill-batterju Escherichia coli. Din l-epidemija ħolqot kriżi fil-fiduċja tal-konsumaturi li sarrfet fi tnaqqis sostanzjali tal-konsum. Għaldaqstant huwa xieraq li tissaħħaħ il-fiduċja tal-konsumaturi fil-frott u l-ħxejjex friski kkultivati fl-Unjoni.

(4)

Din il-kriżi fil-fiduċja kkawżat ukoll diffikultajiet ekonomiċi kbar ħafna, li jistgħu jipperikolaw is-soppravivenza ekonomika ta’ għadd kbir ta’ azjendi fil-qasam tal-frott u l-ħxejjex friski tal-Unjoni. Għaldaqstant huwa xieraq li jissaħħu l-possibbiltajiet ta’ esportazzjoni ta’ frott u ħxejjex friski prodotti fl-Unjoni lejn pajjiżi terzi.

(5)

F’dan il-kuntest, jidher li huwa utli li tkun offruta l-possibbiltà lil dawk l-organizzazzjonijiet professjonali fil-qasam tal-frott u l-ħxejjex friski li dawn jibbenefikaw minn kofinanzjament tal-Unjoni fil-qafas tar-Regolament (KE) Nru 3/2008, u li għal dan il-għan fil-ġimgħat li ġejjin ikunu jistgħu jiġu introdotti, programmi ta’ informazzjoni u promozzjoni mill-awtoritajiet nazzjonali kompetenti, fid-dawl tal-għażla tagħhom, u jekk ikun il-każ, tal-adozzjoni tagħhom mill-Kummissjoni qabel tmiem din is-sena. Dawn il-programmi jistgħu jiġu ppreżentati lil hinn mill-andament annwali ta’ adozzjoni tal-programmi u mill-kalendarju ordinarju stabbilit mir-Regolament tal-Kummissjoni (KE) Nru 501/2008 tal-5 ta’ Ġunju 2008 dwar termini u kundizzjonijiet ta’ applikazzjoni tar-Regolament tal-Kunsill (KE) Nru 3/2008 rigward azzjonijiet ta’ informazzjoni u promozzjoni għall-prodotti agrikoli fis-suq intern u fil-pajjiżi terzi (2) fl-Artikoli 8 u 11 tiegħu.

(6)

Għaldaqstant għas-sena 2011, għandha ssir deroga, fir-rigward tal-programmi ta’ informazzjoni u ta’ promozzjoni tal-frott u l-ħxejjex friski maħsuba għas-suq intern u l-pajjiżi terzi, mir-Regolament (KE) Nru 501/2008.

(7)

Il-Kumitat ta’ Ġestjoni għall-Organizzazzjoni Komuni tas-Swieq Agrikoli ma ta l-ebda opinjoni fil-limitu ta’ żmien stabbilit mill-President tiegħu,

(a)

l-organizzazzjonijiet professjonali u interprofessjonali li jirrappreżentaw il-qasam tal-frott u l-ħxejjex friski jistgħu jippreżentaw il-programmi tagħhom lill-Istati Membri sas-16 ta’ Awwissu 2011;

(b)

l-Istati Membri għandhom jinnotifikaw lill-Kummissjoni bil-lista provviżorja tal-programmi magħżula, sa mhux aktar tard mill-15 ta’ Settembru 2011;

(c)

il-Kummissjoni għandha tiddeċiedi, sa mhux aktar tard mill-15 ta’ Novembru 2011, liema programmi tista’ tikkofinanzja.