|
9.4.2011 |
MT |
Il-Ġurnal Uffiċjali tal-Unjoni Ewropea |
L 96/15 |
REGOLAMENT TA' IMPLIMENTAZZJONI TAL-KUMMISSJONI (UE) Nru 344/2011
tat-8 ta’ April 2011
li jemenda r-Regolament (KE) Nru 889/2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta’ prodotti organiċi fir-rigward tal-produzzjoni, it-tikkettar u l-kontroll organiku
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament tal-Kunsill (KE) Nru 834/2007 tat-28 ta’ Ġunju 2007 dwar il-produzzjoni organika u t-tikkettar ta’ prodotti organiċi u li jemenda r-Regolament (KEE) Nru 2092/91 (1), u b'mod partikolari l-Artikolu 25(3), l-Artikolu 38(b), u l-Artikolu 40 tiegħu,
Billi:
|
(1) |
L-Artikolu 24 tar-Regolament (KE) Nru 834/2007 jistabbilixxi li l-logo tal-produzzjoni organika tal-Unjoni Ewropea (“logo organiku tal-UE”) huwa wieħed mill-indikazzjonijiet obbligatorji li għandu jintuża fir-rigward tal-ikel ippakkjat minn qabel li juri termini li jirreferu għall-metodu tal-produzzjoni organika kif imsemmi fl-Artikolu 23(1), filwaqt li l-użu tal-logo huwa fakultattiv għal dawk il-prodotti importati minn pajjiżi terzi. L-Artikolu 25(1) tar-Regolament (KE) Nru 834/2007 jippermetti l-użu tal-logo organiku tal-UE fit-tikkettar, il-preżentazzjoni u r-reklamar ta’ prodotti oħra li jissodisfaw ir-rekwiżiti stabbiliti skont dak ir-Regolament. |
|
(2) |
Il-konsumaturi għandhom jiġu assigurati li l-prodotti organiċi ġew prodotti b'konformità mar-rekwiżiti stabbiliti fir-Regolament (KE) Nru 834/2007 u fir-Regolament tal-Kummissjoni (KE) Nru 889/2008 (2). Għal dik il-fini, it-traċċabbiltà ta’ kull prodott li jkollu l-logo organiku tal-UE fl-istadji kollha tal-produzzjoni, il-preparazzjoni u d-distribuzzjoni hija fattur importanti. Għalhekk, jidher li huwa utli li għandu jingħad b'mod iktar ċar li l-operaturi li ressqu lill-intrapriżi tagħhom għas-sistema ta’ kontroll tal-biedja organika biss jistgħu jużaw il-logo organiku tal-UE għall-finijiet ta’ tikkettar. |
|
(3) |
Ir-reġistrazzjoni tal-logo organiku tal-UE bħala trejdmark fl-Unjoni u f'reġistri internazzjonali hija indipendenti mir-regoli tar-Regolamenti (KE) Nru 834/2007 u (KE) Nru 889/2008 li japplikaw l-użu tal-logo nnifsu. Sabiex l-indipendenza ta’ dawk ir-regoli tkun ċara, għandha titneħħa r-rabta bejn dawk ir-regoli u kwalunkwe reġistrazzjoni. |
|
(4) |
Wara t-tibdil tas-sistema tat-tikkettar organiku u fl-istennija tal-inklużjoni tar-regoli speċifiċi tal-Unjoni dwar it-tagħsir tal-inbid organiku, għad hemm inċertezza kbira fis-settur rigward il-possibbiltà li jiġi prodott l-inbid b'referenza għall-produzzjoni organika. Sabiex ikun permess li l-inbid prodott fis-snin tal-inbid 2010/2011 u 2011/2012 mill-għeneb organiku jinbiegħ mingħajr indikazzjonijiet obbligatorji mitluba bl-Artikolu 24 tar-Regolament (KE) Nru 834/2007, sakemm il-prodotti inkwistjoni jikkonformaw mar-Regolament tal-Kunsill (KEE) Nru 2092/91 tal-24 ta’ Ġunju 1991 dwar il-produzzjoni organika ta’ prodotti agrikoli u l-indikazzjonijiet li jirreferu għalihom fil-prodotti agrikoli u fl-oġġetti tal-ikel (3) jew ir-Regolament (KE) Nru 834/2007, jidher li huwa meħtieġ li jiġi estiż il-perjodu ta’ tranżizzjoni stabbilit fl-Artikoli 95(8) u (9) tar-Regolament (KE) Nru 889/2008 rigward ċerti dispożizzjonijiet tat-tikkettar għal dawn il-prodotti sal-31 ta’ Lulju 2012. L-estensjoni tal-perjodu ta’ tranżizzjoni għandha tkun applikabbli mill-1 ta’ Lulju 2010. |
|
(5) |
Wara l-valutazzjoni tal-Awtorità Ewropea dwar is-Sigurtà fl-Ikel (l-EFSA) dwar l-użu tal-estratt tal-klin bħala addittiv tal-ikel (4), is-sustanza tal-“estratt tal-klin” ġiet awtorizzata għall-użu bħala antiossidant u maħtura bin-numru E fil-Parti D tal-Anness III għad-Direttiva 95/2/KE tal-Parlament Ewropew u tal-Kunsill tal-20 ta Frar 1995 dwar l-addittivi tal-ikel għajr kuluri u sostanzi li jagħtu ħlewwa (5). Bħala konsegwenza, huwa meħtieġ li jkun permess l-użu tal-estratt tal-klin fl-ipproċessar tal-ikel organiku bħala addittiv tal-ikel, jekk jintuża bħala tali, bl-inklużjoni ta’ dak il-prodott fl-Anness VIII għar-Regolament (KE) Nru 889/2008. |
|
(6) |
Ir-Regolament (KE) Nru 889/2008 għalhekk għandu jiġi emendat skont dan. |
|
(7) |
Il-miżuri pprovduti f'dan ir-Regolament huma skont l-opinjoni tal-Kumitat regolatorju dwar il-produzzjoni organika, |
ADOTTAT DAN IR-REGOLAMENT:
Artikolu 1
Ir-Regolament (KE) Nru 889/2008 huwa emendat kif ġej:
|
(1) |
Fl-Artikolu 57, it-tieni paragrafu huwa sostitwit b'dan li ġej: “Għall-finijiet tat-tikkettar, il-logo organiku tal-UE għandu jintuża biss jekk il-prodott ikkonċernat isir skont ir-rekwiżiti tar-Regolament (KE) Nru 834/2007, tar-Regolament tal-Kummissjoni (KE) Nru 1235/2008 (*1) u ta’ dan ir-Regolament, mill-operaturi li jikkonformaw mar-rekwiżiti tas-sistema ta’ kontroll imsemmija fl-Artikoli 27, 28, 29, 32 u 33 tar-Regolament (KE) Nru 834/2007. |
|
(2) |
Fl-Artikolu 95 għandu jiddaħħal il-paragrafu 10a li ġej: “10a Fir-rigward tal-inbid, il-perjodu ta’ tranżizzjoni msemmi fil-paragrafu 8 għandu jiskadi fil-31 ta’ Lulju 2012. Il-ħażniet ta’ nbejjed prodotti, ippakkjati u ttikkettati qabel il-31 ta’ Lulju 2012 skont ir-Regolament (KEE) Nru 2092/91 jew ir-Regolament (KE) Nru 834/2007 jistgħu jibqgħu jitqiegħdu fis-suq sakemm jinħlew il-ħażniet.” |
|
(3) |
Fit-Taqsima A tal-Anness VIII, wara l-addittiv tal-ikel E 341(i) (il-fosfat monokalċiku), għandha tiddaħħal ir-ringiela li ġejja:
|
|
(4) |
Il-punt 9 tal-parti A tal-Anness XI jitħassar. |
Artikolu 2
Dan ir-Regolament għandu jidħol fis-seħħ l-għada tal-pubblikazzjoni tiegħu f'Il-Ġurnal Uffiċjali tal-Unjoni Ewropea.
Madankollu, il-punt (2) tal-Artikolu 1 għandu japplika mill-1 ta’ Lulju 2010.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, it-8 ta’ April 2011.
Għall-Kummissjoni
Il-President
José Manuel BARROSO
(1) ĠU L 189, 20.7.2007, p. 1.
(2) ĠU L 250, 18.9.2008, p. 1.
(3) ĠU L 198, 22.7.1991, p. 1.
(4) The EFSA Journal (2008) 721, p. 1.