REGOLAMENT TAL-KUMMISSJONI (UE) Nru 263/2011

tas-17 ta' Marzu 2011

li jimplimenta r-Regolament (KE) Nru 458/2007 tal-Parlament Ewropew u tal-Kunsill dwar is-sistema Ewropea tal-istatistika integrata tal-ħarsien soċjali (ESSPROS) fir-rigward tat-tnedija ta' ġabra kompluta ta' dejta għall-modulu tal-ESSPROS dwar il-benefiċċji ta' ħarsien soċjali netti

(Test b’relevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 458/2007 tal-Parlament Ewropew u tal-Kunsill tal-25 ta' April 2007 dwar is-sistema Ewropea tal-istatistika integrata tal-ħarsien soċjali (ESSPROS) (1), u partikolarment l-Artikoli 5(2) u 7(3) tiegħu,

Billi:

(1)

Ir-Regolament (KE) Nru 458/2007 waqqaf qafas metodoloġiku biex jintuża għall-ġbir tal-istatistika fuq bażi komparabbli għall-benefiċċji tal-Unjoni Ewropea u limiti ta' żmien għat-trażmissjoni u t-tixrid tal-istatistika miġbura skont is-sistema Ewropea tal-istatistika integrata tal-ħarsien soċjali (minn issa 'l quddiem tissejjaħ “ESSPROS”).

(2)	Skont l-Artikolu 5(1) tar-Regolament (EC) Nru 458/2007, saret ġabra pilota ta' dejta għas-sena 2005 fl-Istati Membri kollha bil-ħsieb li jiġi introdott modulu dwar il-benefiċċji ta' ħarsien soċjali netti.

(3)	Taqsira tal-ġabra nazzjonali ta' dejta pilota wriet li maġġoranza kbira ħafna tal-istudji pilota taw riżultat pożittiv, u għalhekk għandhom jiġu adottati l-miżuri meħtieġa biex titnieda l-ġabra ta' dejta kompluta għall-modulu dwar il-benefiċċji ta' ħarsien soċjali netti.

(4)	Il-modulu dwar il-benefiċċji ta' ħarsien soċjali netti għandu jinkiseb bl-użu tal-approċċ ristrett, biex l-istess popolazzjoni ta' benefiċjarji tal-benefiċċji ta' ħarsien soċjali grossi jkunu miġbura fis-sistema ċentrali tal-ESSPROS.

(5)

Skont l-Artikolu 7(3) tar-Regolament (KE) Nru 458/2007, għandhom jiġu adottati miżuri ta' implimentazzjoni marbuta mal-ewwel sena li għaliha għandha tinġabar dejta kompluta, u miżuri marbuta mal-klassifikazzjoni fid-dettall tad-dejta koperta, id-definizzjonijiet li jridu jintużaw u r-regoli dwar it-tixrid għall-modulu dwar il-benefiċċji ta' ħarsien soċjali netti.

(6)	Il-miżuri stipulati f'dan ir-Regolament huma skont l-opinjoni tal-Kumitat Ewropew tas-Sistema tal-Istatistika,

ADOTTAT DAN IR-REGOLAMENT:

Artikolu 1

1. L-Istati Membri għandhom jibagħtu dejta marbuta mal-modulu ESSPROS dwar il-benefiċċji ta' ħarsien soċjali netti lill-Kummissjoni (Eurostat) kull sena. Il-perjodu ta' referenza gћandu jkun is-sena kalendarja.

2. L-iskadenza għat-trażmissjoni tad-dejta għas-sena N, flimkien ma kwalunkwe reviżjoni ta' dejta tas-snin ta' qabel, għandha tkun il-31 ta' Diċembru tas-sena N + 2.

3. L-ewwel sena ta' referenza li għaliha għandha tinġabar dejta kompluta dwar il-benefiċċju tal-ħarsien soċjali nett għandha tkun l-2010.

Artikolu 2

1. Id-definizzjonijiet li jridu jiġu applikati lill-modulu dwar il-benefiċċji tal-ħarsien soċjali netti għandhom ikunu kif stabbilit fl-Anness I.

2. Il-klassifikazzjonijiet fid-dettall li jridu jintużaw fil-modulu dwar il-benefiċċji tal-ħarsien soċjali netti għandhom ikunu kif stabbilit fl-Anness II.

3. Il-kriterji għat-tixrid tad-dejta marbura mal-modulu dwar il-benefiċċji soċjali netti għandhom ikunu kif stabbilit fl-Anness III.

Artikolu 3

Dan ir-Regolament għandu jidħol fis-seħħ fl-għoxrin jum wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, is-17 ta’ Marzu 2011.

Għall-Kummissjoni

Il-President

José Manuel BARROSO

(1) ĠU L 113, 30.4.2007, p. 3.

ANNESS I

Definizzjonijiet għall-modulu dwar il-benefiċċji tal-ħarsien soċjali netti

Id-definizzjonijiet stabbiliti fl-Artikolu 2 tar-Regolament (KE) Nru 458/2007 għandhom japplikaw.

Id-definizzjonijiet stabbiliti fil-punt “1.3. Infiq ta' skemi ta' ħarsien soċjali” tal-Anness I tar-Regolament tal-Kummissjoni (KE) Nru 10/2008 (1) għandhom japplikaw.

Barra minn hekk, għall-fini speċifiku ta' dan ir-Regolament għandhom japplikaw id-definizzjonijiet li ġejjin:

3.1.

“benefiċċji tal-ħarsien soċjali netti – approċċ ristrett” tfisser benefiċċji soċjali wara t-tnaqqis ta' taxxi u kontribuzzjonijiet soċjali mħallsa fuq benefiċċji soċjali fi flus minn min jirċievihom u wara li jiżdid il-benefiċċju fiskali residwu, jekk ikun hemm, skont il-formola:

Benefiċċji soċjali netti (approċċ ristrett) = benefiċċji tal-ħarsien soċjali grossi* (1-AITR-AISCR) + benefiċċji residwi fiskali

Il-benefiċċji fiskali residwi għandhom jiġu introdotti fil-kalkolu tal-benefiċċji soċjali netti unikament jekk ma jittieħidx kont tagħhom dirett fl-AITR u/jew l-AISCR;

3.2.	“rata fiskali medja dettaljata (AITR) għal benefiċċju (jew grupp ta' benefiċċji)” tfisser is-somma ta' taxxi mħallsa fuq dak il-benefiċċju minn min jirċievi diviża bid-dħul totali minn dak il-benefiċċju (jiġifieri benefiċċji grossi li wieħed jirċievi);

3.3.	“rata ta' kontribuzzjoni soċjali medja dettaljata (AISCR) għal benefiċċju (jew grupp ta' benefiċċji)” tfisser is-somma ta' kontribuzzjonijiet soċjali mħallsa fuq dak il-benefiċċju minn min jirċievi, diviża bid-dħul totali minn dak il-benefiċċju (jiġifieri benefiċċju gross li wieħed jirċievi);

3.4.	“benefiċċju fiskali residwu” tfisser il-parti mill-valur totali ta' benefiċċju fiskali li hija marbuta mal-eżoneru fuq il-levis applikati lill-benefiċċji soċjali (kuntrarju għall-parti li hija marbuta mal-eżoneru fuq il-levis applikati għall-forom kollha l-oħra ta' dħul).

Id-definizzjonijiet dettaljati li jridu jintużaw għall-applikazzjoni ta' dan ir-Regolament huma stipulati fil-Manwal tal-ESSPROS prodott mill-Kummissjoni b'kooperazzjoni mal-Istati Membri.

(1) ĠU L 5, 9.1.2008, p. 3.

ANNESS II

Klassifikazzjonijiet fid-dettall marbuta mal-modulu dwar benefiċċji tal-ħarsien soċjali netti

Il-benefiċċji tal-ħarsien soċjali jitqassmu f'benefiċċji skont eżami tal-mezzi u mingħajr eżami tal-mezzi. Il-klassifikazzjoni tal-benefiċċji tal-ħarsien soċjali tagħti iktar dettalji skont jekk il-benefiċċju jingħatax fi flus bħala ħlas perjodiku jew somma f'daqqa:

—	Benefiċċji tal-ħarsien soċjali;

—	Benefiċċji tal-ħarsien soċjali, mingħajr eżami tal-mezzi;

—	Benefiċċji fi flus, mingħajr eżami tal-mezzi;

—	Benefiċċji perjodiċi fi flus, mingħajr eżami tal-mezzi;

—	Benefiċċji fi flus imħallsa f'daqqa, mingħajr eżami tal-mezzi;

—	Benefiċċji tal-ħarsien soċjali, skont eżami tal-mezzi;

—	Benefiċċji fi flus, skont eżami tal-mezzi;

—	Benefiċċji perjodiċi fi flus, skont eżami tal-mezzi;

—	Benefiċċji fi flus imħallsa f'daqqa, skont eżami tal-mezzi.

Il-benefiċċji jinqasmu skont il-funzjoni, kif stipulati fl-Artikolu 2(b) tar-Regolament (KE) Nru 458/2007. Din il-klassifikazzjoni fid-dettall tinġabar fil-klassifikazzjoni tal-ewwel livell hekk kif ġej:

—	Mard/kura tas-saħħa;

—	Diżabilità;

—

Xjuħija;

—	Superstiti;

—	Familja/tfal;

—

Qgħad;

—

Djar;

—	Esklużjoni soċjali (li mhix ikklassifikata x'imkien ieħor).

ANNESS III

Kriterji għat-tixrid tad-dejta marbuta mal-modulu dwar il-benefiċċji tal-ħarsien soċjali

L-Eurostat għandha tippubblika tagħrif skont l-Istat Membru unikament wara aggregazzjoni fil-livell tal-iskemi tal-inqas dwar:

—	Il-benefiċċji totali netti tal-ħarsien soċjali;

—	Il-proporzjon tal-benefiċċji tal-ħarsien soċjali soġġetti għat-taxxi u/jew kontribuzzjonijiet soċjali;

—	Il-benefiċċji tal-ħarsien soċjali skont il-funzjoni;

—	B'eżami tal-mezzi kontra mingħajr eżami tal-mezzi.

Fuq talba, il-Kummissjoni (Eurostat) għandha xxerred dejta dettaljata skont l-iskema u skont l-Istat Membru lill-utenti speċifiċi (istituzzjonijiet nazzjonali li jiġbru d-dejta tal-ESSPROS, id-dipartimenti tal-Kummissjoni u istituzzjonijiet internazzjonali).

Jekk l-Istat Membru kkonċernat jaqbel li jkun hemm tixrid sħiħ tad-dejta, l-utenti speċifiċi għandhom ikunu awtorizzati jippubblikaw id-dejta skont l-iskema.

Jekk l-Istat Membru kkonċernat ma jaqbilx li jkun hemm tixrid sħiħ tad-dejta, l-utenti speċifiċi għandhom ikunu awtorizzati jippubblikaw id-dejta aggregata fil-livell tal-iskemi. L-aggregazzjoni fil-livell tal-iskemi għandha tkun konformi mar-regoli ta' tixrid stipulati mill-Istat Membru kkonċernat.