17.2.2011   

MT

Il-Ġurnal Uffiċjali tal-Unjoni Ewropea

L 43/9

(1)

Fl-20 ta’ Mejju 2010, il-Kummissjoni Ewropea (il-“Kummissjoni”) ħabbret permezz ta’ avviż ippubblikat f’Il-Ġurnal Uffiċjali tal-Unjoni Ewropea  (2) (“Avviż ta’ inizjazzjoni”), il-bidu ta’ proċediment antidumping li jikkonċerna l-importazzjonijiet fl-Unjoni ta’ ċerti drappijiet b'malja miftuħa tal-fibra tal-ħġieġ li joriġinaw mir-Repubblika Popolari taċ-Ċina (“RPĊ” jew il-“pajjiż ikkonċernat”).

(2)

Il-proċediment antidumping inbeda wara li kien varat ilment fis-6 ta' April 2010 minn Saint-Gobain Vertex s.r.o., Tolnatex Fonalfeldolgozo es Muszakiszovetgyarto, Valmieras “Stikla Skiedra” AS u Vitrulan Technical Textiles GmbH (“il-kwerelanti”), li jirrapreżentaw proporzjon ewlieni, f'dan il-każ aktar minn 25 %, tal-produzzjoni tal-Unjoni ta' ċerti drappijiet tal-malja miftuħa. L-ilment kien fih evidenza prima facie ta’ dumping ta’ dan il-prodott u ta’ dannu materjali li jirriżulta minnu, li kien ikkunsidrat suffiċjenti sabiex jiġi ġġustifikat il-bidu ta’ proċedimnet.

(3)

Il-Kummissjoni għarrfet uffiċjalment lill-kwerelanti, lil produtturi oħra magħrufa fl-Unjoni, lill-produtturi esportaturi magħrufa fil-RPĊ, u r-rappreżentanti tal-RPĊ, lil importaturi u utenti magħrufa, bit-tnedija tal-proċediment. Il-Kummissjoni għarrfet ukoll lill-produtturi fl-Istati Uniti tal-Amerika (USA), il-Kanada, il-Kroazja, it-Turkija u t-Tajlandja, peress li dawn il-pajjiżi kienu previsti bħala pajjiżi possibilment analogi. Il-partijiet interessati ngħataw l-opportunità li jressqu l-opinjonijiet tagħhom bil-miktub u li jitolbu seduta fil-limitu taż-żmien stipulat fl-avviż ta' inizjazzjoni. Il-partijiet interessati kollha li talbu dan u li ppreżentaw raġunijiet partikolari għaliex għandhom jinstemgħu, ngħataw seduta ta’ smigħ.

(4)

Fid-dawl tan-numru apparentement kbir ta’ produtturi esportaturi fir-RPĊ, ta’ importaturi, u ta’ produtturi tal-Unjoni mhux relatati, fl-avviż tal-inizjazzjoni ġie previst it-teħid ta’ kampjuni għad-determinazzjoni tad-dumping u tad-dannu, skont l-Artikolu 17 tar-Regolament bażiku. Sabiex il-Kummissjoni tkun tista’ tiddeċiedi jekk it-teħid ta’ kampjuni huwiex meħtieġ u, jekk iva, tagħżel kampjun, il-produtturi esportaturi magħrufa kollha fir-RPĊ u l-importaturi u l-produtturi tal-Unjoni ntalbu jippreżentaw irwieħhom lill-Kummissjoni u jipprovdu, kif ġie speċifikat fl-avviż tal-inizjazzjoni, informazzjoni bażika dwar l-attivitajiet tagħhom relatati mal-prodott ikkonċernat matul il-perjodu (bejn l-1 ta’ April 2009 u l-31 ta’ Marzu 2010). L-awtoritajiet tar-RPĊ ukoll ikkonsultati.

(5)

Waslu 16-il risposta fl-eżerċizzju tat-teħid tal-kampjun minn produtturi esportaturi fir-RPĊ li jkopru 86 % tal-importazzjonijiet matul il-perjodu tal-investigazzjoni kif definiti fil-premessa hawn taħt. Għalhekk, il-kooperazzjoni hija kkunsidrata bħala għolja.

(6)

Skont l-Artikolu 17(1) tar-Regolament bażiku, il-Kummissjoni għażlet kampjun ta' produtturi esportaturi bbażat fuq l-ikbar volum rappreżentattiv ta’ esportazzjonijiet tal-prodott ikkonċernat lill-Unjoni li jista’ jkun investigat b’mod raġonevoli fil-ħin disponibbli. Il-kampjun magħżul jikkonsisti minn żewġ produtturi esportaturi individwali u grupp wieħed ta' produtturi esportaturi magħmul minn erba' kumpaniji relatati li jirrapreżentaw 42 % tal-importazzjonijiet fl-Unjoni matul il-Perjodu ta' Investigazzjoni (PI) kif definit fil-premessa 13 hawn taħt. Skont l-Artikolu 17(2) tar-Regolament bażiku, il-partijiet ikkonċernati u l-RPĊ kienu kkonsultati dwar il-kampjun magħżul u ma qajmu l-ebda oġġezzjoni dwaru.

(7)

Fir-rigward tal-industrija tal-Unjoni, tnax-il produttur pprovdew l-informazzjoni mitluba u qablu li jiġu inklużi fil-kampjun. Abbażi ta' dan, il-Kummissjoni għażlet kampjun magħmul mill-erba' l-akbar produtturi tal-Unjoni f'termini ta' bejgħ u produzzjoni li jirrapreżentaw 70 % tal-bejgħ totali mill-industrija tal-Unjoni kif definit fil-premessa (59) hawn taħt.

(8)

Erba' importaturi mhux relatati biss taw l-informazzjoni mitluba sad-dati tal-iskadenza ffissati fl-Avviż ta' inizzjazzjoni. Għalhekk ġie deċiż li t-teħid ta' kampjuni ma kienx neċessarju għall-importaturi mhux relatati.

(9)

Sabiex il-produtturi esportaturi fir-RPĊ li ffurmaw parti mill-kampjun jingħataw opportunità jitolbu trattament ta’ ekonomija tas-suq (“TES”) jew trattament individwali (“TI”), jekk xtaqu jagħmlu dan, il-Kummissjoni bagħtet formoli ta’ applikazzjoni lill-produtturi esportaturi inklużi fil-kampjun. Il-produtturi esportaturi inklużi kollha fil-kampjun talbu TES skont l-Artikolu 2(7) tar-Regolament bażiku jew TI jekk l-investigazzjoni tistabbilixxi li ma jissodisfawx il-kondizzonijiet għat-TES. Barra minn hekk, produttur esportatur magħmul minn grupp ta' kumpaniji relatati li ma kienx inkluż fil-kampjun, talab eżami individwali skont l-Artikolu 17(3) tar-Regolament bażiku.

(10)

Il-Kummissjoni bagħtet kwestjonarji lill-produtturi esportaturi inklużi fil-kampjun, kif ukoll lill-produttur esportatur mhux inkluż fil-kampjun li kien talab l-eżamin individwali, lill-erba' produtturi tal-Unjoni inklużi fil-kampjun, lill-erba' importaturi mhux relatati li ma kkooperawx u lill-utenti magħrufin fl-Unjoni. Il-kwestjonarji intbagħtu wkoll lill-produtturi fl-Istati Uniti tal-Amerika li kien il-pajjiż analogu propost kif issemma' fl-Avviż ta' inizzjazzjoni, u lill-produtturi f'pajjiżi analogi oħra possibbli. Ir-risposti tal-kwestjonarju waslu mingħand il-produtturi esportaturi inklużi fil-kampjun fir-RPĊ u mill-produttur li kkoopera li talab l-eżami individwali, mill-produttur fl-Istati Uniti tal-Amerika u mill-produttur fil-Kanada, il-pajjiż analogu previst kif kien spjegat fil-premessa 43 hawn taħt, mill-produtturi tal-Unjoni inklużi fil-kampjun u mill-erba' importaturi mhux relatati. L-ebda utent ieħor ma bagħat lill-Kummissjoni xi tagħrif jew għamel lilu nnifsu magħruf fl-andament tal-investigazzjoni.

(11)

Il-Kummissjoni fittxet u vverifikat it-tagħrif kollu li qieset li kien meħtieġ għall-iskop tal-analiżi tat-TES/TI u gћad-determinazzjoni provviżorja tad-dumping, tal-ħsara li rriżultat u tal-interess tal-Unjoni u għamlet żjarat ta’ verifika fil-post fil-kumpaniji li ġejjin:

(12)

Fid-dawl tal-ħtieġa li jiġi stabbilit valur normali għall-produtturi esportaturi fir-RPĊ li jistgħu ma jingħatawx TES, seħħet verifika biex jiġi stabbilit il-valur normali fuq il-bażi ta’ dejta mill-Kanada bħala pajjiż analogu fil-bini tal-kumpanija li ġejja:

(13)

L-investigazzjoni tad-dumping u l-ħsara kopriet il-perjodu mill-1 ta' April 2009 sal-31 ta' Marzu 2010 (“perjodu ta' investigazzjoni” jew “PI”). L-analiżi tax-xejriet rilevanti għall-evalwazzjoni tal-ħsara kopriet il-perjodu mill-1 ta’ Jannar 2006 sal-aħħar tal-perjodu tal-investigazzjoni (“il-perjodu meqjus”).

(14)

Il-prodott ikkonċernat huwa drappijiet b'malja miftuħa tal-fibra tal-ħġieġ, ta' daqs ta' ċellola ta' aktar minn 1,8 mm kemm fit-tul kif ukoll fil-wisgħa u li tiżen aktar minn 35 g/m2 li jorġina fir-RPĊ (“il-prodott ikkonċernat”) li bħalissa jaqa' fil-kodiċi NM ex 7019 40 00, ex 7019 51 00, ex 7019 59 00, ex 7019 90 91 u ex 7019 90 99.

(15)

Id-drappijiet b'malja miftuħa huma magħmulin minn ħjut tal-fibra tal-ħġieġ u jistgħu jinstabu f'qisien ta' ċelloli u piżijiet differenti għal kull metru kwadru. L-aktar li jintużaw hu fil-materjali tat-tisħiħ fis-settur tal-bini (insulazzjoni termali esterna, tisħiħ tal-irħam/tal-art, tiswija tal-ħitan).

(16)

Wara l-inizzazzjoni, il-produttur esportatur fir-RPĊ li jimmanifattura id-diski tal-fibreglass talab kjarifikazzjoni jekk dak it-tip ta' prodott hux inkluż fid-definizzjoni tal-prodott. L-industrija tal-Unjoni kienet ikkonsultata u kienet tal-fehma li dawn id-diski jistgħu jitqiesu bħala prodotti downstream u għalhekk mhux neċessarjament koperti mid-definizzjoni tal-prodott. Peress li f'dan l-istadju tal-proċediment l-informazzoni li għandha l-Kummissjoni għadha ma tippermettix konklużjoni definittiva li tikkonċerna l-karatteristiċi bażiċi, kien deċiż li l-diski tal-fibreglass jiġu ttrattati bħala li jagħmlu parti mill-prodott ikkonċernat sakemm tinġabar aktar informazzjoni u konsiderazzonijiet mill-partijiet interessati fil-bqija tal-investigazzoni.

(17)

L-investigazzjoni wriet li d-drappijiet b'malja miftuħa tal-fibra tal-ħġieġ immanifatturati u mibjugħa fis-suq domestiku tar-RPĊ u fis-suq domestiku tal-Kanada, li b’mod provviżorju serviet bħala pajjiż analogu, kif ukoll mmanifatturati u mibjugħa fl-Unjoni mill-industrija tal-Unjoni essenzjalment għandhom l-istess karatteristiċi bażiċi fiżiċi, kimiċi u tekniċi u l-istess użi. Għalhekk huma provviżorjament meqjusa l-istess skont it-tifsira tal-Artikolu 1(4) tar-Regolament bażiku.

(18)

Il-metodoloġija ġenerali stabbilita min hawn 'il quddiem ġiet applikata lill-produtturi esportaturi li jikkooperaw fir-RPĊ biex ikun stabbilit jew le jekk kinux qed jipprattikaw id-dumping.

(19)

Skont l-Artikolu 2(7)(b) tar-Regolament bażiku, fl-investigazzjonijiet anti-dumping li jikkonċernaw importazzjonijiet li joriġinaw fir-RPĊ, il-valur normali għandu jiġi ddeterminat skont il-paragrafi minn 1 sa 6 tal-Artikolu msemmi għal dawk il-produtturi li nstabu li jissodisfaw il-kriterji stabbiliti fl-Artikolu 2(7)(c) tar-Regolament bażiku. Fil-qosor, u gћall-finijiet ta’ referenza biss, dawn il-kriterji huma stipulati hawn taћt f’forma mqassra:

(20)

Fl-investigazzjoni attwali, il-produtturi esportaturi kollha inklużi fil-kampjun talbu TES skont l-Artikolu 2(7)(b) tar-Regolament bażiku u wieġbu l-formola ta’ talba tat-TES fil-limitu ta’ żmien stabbilit:

(21)

Fir-rigward tal-produtturi esportaturi kollha inklużi fil-kampjun li ssemmew hawn fuq, il-Kummissjoni talbet l-informazzjoni kollha li tqieset meħtieġa u vverifikat l-informazzjoni mressqa fil-formoli ta’ talba tat-TES u kull informazzjoni oħra meqjusa meħtieġa fl-istabbilimenti tal-kumpaniji inkwistjoni.

(22)

Bil-bidu, l-investigazzjoni stabbiliet li żewġ produtturi esportaturi inklużi fil-kampjun fir-RPĊ ssodisfaw il-kriterji kollha ffissati fl-Artikolu 2(7)(c) tar-Regolament bażiku li jridu jingħataw it-TES filwaqt li t-tielet produttur esportatur inkluż fil-kampjun hu magħmul minn grupp ta' kumpaniji relatati li naqsu li jissodisfaw l-kriterju 2 fir-rigward tal-istandards tal-accounting internazzjonali. B'mod partikolari, instab li ċerti spejjeż, dħul u accounts ma rriflettewx b'mod preċiż is-sitwazzjoni finanzajarja vera tal-kumpaniji fil-grupp. Barra minn hekk, in-nuqqas ta' kompletezza tal-accounts ma kinitx imsemmija fir-rapport tal-awditur.

(23)

Il-Kummissjoni żvelat uffiċjalment ir-riżultati tas-sejbiet tat-TES lill-produtturi esportaturi fir-RPĊ ikkonċernati, u lill-kwerelanti. Huma kienu mogħtija opportunità wkoll biex iressqu l-opinjonijiet tagħhom bil-miktub u biex jitolbu seduta jekk kien hemm raġunijiet partikolari sabiex jinstemgħu.

(24)

Wara r-rivelazzjonijiet tas-sejbiet tat-TES, il-kummenti ntlaqgħu biss mill-produttur esportatur/grupp mhux inkluż fil-kampjun li ma ngħatax it-TES. Madankollu, dawn il-kummenti ma kienux tali li jbiddlu s-sejbiet f'dan ir-rigward peress li ma jiċħdux id-defiċjenzi iżda jipprovdu spjegazzjonijiet ġenerali dwar il-fatt li persuna privata waħda kkontrollat l-grupp kollu u li l-kumpaniji fil-grupp kienu għaddejjin minn fażi tranżitorja fil-proċess tal-integrazzjoni tan-negozju tagħhom.

(25)

Ftit qabel iż-żjarat ta' verifika dwar id-dumping, il-Kummissjoni rċeviet xi allegazzjonijiet appoġġati fl-istess okkażjoni b'dokumentazzjoni li tikkonċerna ż-żewġ produtturi esportaturi fir-RPĊ li għall-ewwel kien propost lilhom li jingħataw it-TES. Dawn l-allegazzjonijiet kienu eżaminati matul iż-żjarat tal-verifika dwar id-dumping.

(26)

Għall-produttur esportatur, l-allegazzjoni li waslet, speċifikament allegat li kien ta Artikoli ta' Assoċazzjoni foloz fil-formula tat-talba għat-TES u matul iż-żjara tal-verifika tat-TES. Il-Kummissjoni ngħatat kopji tal-Artikoli ta' Assoċjazzjoni allegatament genwini u l-Kuntratt tal-Proġett Konġunt korrispondenti bejn l-attivisti tal-kumpanija. Matul iż-żjara tal-verifika dwar id-dumping, il-produttur esportatur ipprovda kopja ċċertifikata tal-Artikoli ta' Assoċazzjoni tiegħu reġistrati mal-awtorità lokali li kienet l-istess dokument bla data bħal dak provdut mill-kumpanija fil-formula tat-talba tagħha għat-TES u matul iż-żjara fuq il-post konnessa mat-TES.

(27)

It-tqabbil ta' dan id-dokument ma' dak riċevut mill-Kummissjoni kif deskritt fil-premessi 25 u 26 hawn fuq juri differenzi fid-dati, fil-partijiet involuti u f'ċerti dispożizzjonijiet li jirrigwardaw ir-restrizzjonijiet fuq l-impjieg ta' ħaddiema. Instabu aktar differenzi fir-rigward tar-restrizzjonijiet fuq il-bejgħ meta jitqabblu l-kuntratt tal-Proġett Konġunt sottomess mal-formula għat-talba tat-TES tal-kumpanija u dak riċevut mill-Kummissjoni.

(28)

Intbagħtet ittra lill-produttur esportatur li tinformah li din l-informazzjoni tista' tipprovdi raġunijiet biex ikun applikat l-Artikolu 18 tar-Regolament bażiku u talbitu jipprovdi aktar kummneti. Ir-risposta tal-produttur esportatur ma tatx spjegazzjonijiet suffiċjenti dwar id-differenzi li jneħħu d-dubji dwar l-awtentiċità tad-dokumenti inizjali u l-informazzjoni provduta mill-produttur esportatur fis-sottomissjoni tal-formula tat-talba tat-TES.

(29)

Dwar it-tieni produttur esportatur, l-allegazzjoni riċevuta speċifikament irreferiet għall-accounts verifikati falsifikati. Din l-allegazzjoni kienet eżaminata fuq il-post u kienu identifikati diskrepanzi fil-bilanċi imressqin mill-accounts mhux verifikati tal-2006 għall-ewwel dikjarazzjonijiet finanzjarji verifikati tal-2007. Barra minn hekk l-ebda ħlasijiet ta' miżati u pagamenti għas-snin 2007 u 2008 ma kienu reġistrati fir-records tal-kumpanija.

(30)

Intbagħtet ukoll ittra lill-produttur esportatur li tinformah dwar id-diskrepanzi misjuba fuq il-post u talbitu jipprovdi dokumenti. Kien infurmat ukoll li dawn is-sejbiet il-ġodda jistgħu jagħtu raġunijiet biex ikun applikat l-Artikolu 18 tar-Regolament bażiku. Ir-risposta tal-produttur esportatur ma tat ebdainformazzjoni addizzjonali li tneħħi d-dubji dwar il-preċiżjoni u l-kompletezza taċ-ċifri ppreżentati fid-dikjarazzjonijiet finanzjarji tiegħu. Għall-kuntrarju, fir-risposta tiegħu, il-produttur esportatur ammetta l-eżistenza ta' żewġ settijiet differenti ta' accounts b'ċifri differenti għall-2006 u li l-accounts tiegħu għall-2007 u l-2008 kien fihom żbalji li ma kinux irrappurtati lill-awditur.

(31)

Abbażi ta' dawn is-sejbiet hawn fuq kien ikkunsidrat li l-ewwel produttur esportatur ipprovda informazzjoni skorretta matul l-investigazzjoni. Abbażi ta' dan, kien deċiż li jkun applikat l-Artikolu 18 tar-Regolament bażiku u tinbidel l-proposta oriġinali li tingħatalhom it-TES.

(32)

Dwar it-tieni produttur esportatur kien deċiż li tkun rifjutata it-TES peress li ma ssosidisfax il-kriterju 2 tal-valutazzjoni tat-TES.

(33)

F’konformità mal-Artikolu 2(7)(a) tar-Regolament bażiku, dazju applikabbli għall-pajjiż kollu, jekk ikun hemm, jiġi stabbilit għall-pajjiżi li jaqgħu taħt dan l-Artikolu, bl-eċċezzjoni ta’ dawk il-każijiet fejn il-kumpaniji jkunu f’pożizzjoni juru li huma jissodisfaw il-kriterji stipulati fl-Artikolu 9(5) tar-Regolament bażiku. Fil-qosor, u għall-faċilitazzjoni ta' referenza biss, dawn il-kriterji huma stabbiliti hawn taħt:

(34)

It-tliet produtturi esportaturi inklużi fil-kampjun li talbu it-TES talbu wkoll it-TI jekk ma jingġatawx it-TES. Abbażi tas-sejbiet hawn fuq, l-Artikolu 18 tar-regolament bażiku kien applikat għall-ewwel produttur esportatur u għalhekk it-TI kien irrifjutat. It-tieni produttur esportatur instab li jissodisfa l-kondizzjonijiet tal-Artikolu 9(5) tar-Regolament bażiku u għalhekk seta' jingħata it-TI.

(35)

Dwar it-tielet produttur esportatur (grupp ta' kumpaniji) li nstab li ma jissodisfax il-kriterji tat-TES, kien deċiż li jingħata t-TI peress li nstab li l-kumpanija tissodisfa l-kondizzjonijiet tal-Artikolu 9(5) tar-regolament bażiku.

(36)

Fuq il-bażi tal-informazzjoni disponibbli, kien stabbilit proviżjorjament li ż-żewġ produtturi esportaturi fir-RPĊ li ġejjin li kienu inklużi fil-kampjun jissodisfaw il-ħtiġijiet kollha għal TI kif stabbilit fl-Artikolu 9(5) tar-Regolament bażiku:

(37)

Il-grupp ta' kumpaniji relatati mhux inklużi fil-kampjun li talbu eżami individwali talbu wkoll it-TES jew it-TI, jekk l-investigazzjoni tistabbilixxi li ma ssodisfawx il-kondizzjonijiet għat-TES, u wieġbu l-formula tat-talba tat-TES fi żmien id-data tal-iskadenza miftiehma.

(38)

L-informazzjoni sottomessa fil-formula tat-talba tat-TES mill-kumpanija li talbu l-eżami individwali ma kinitx verifikata. Din se tiġi ezaminata wara.

(39)

Skont l-Artikolu 2(7)(a) tar-Regolament bażiku, il-valur normali gћall-produtturi esportaturi li ma ngħatawx TES, gћandu jiġi stabbilit abbażi tal-prezzijiet domestiċi jew tal-valur normali kompost f'pajjiż analogu.

(40)

Fl-Avviż tal-inizjazzjoni l-Kummissjoni indikat l-intenzjoni tagħha li tuża l-Istati Uniti tal-Amerika bħala pajjiż analogu xieraq bl-għan li jiġi stabbilit il-valur normali għar-RPĊ u stiednet lill-partijiet interessati sabiex jikkumentaw dwar dan.

(41)

Erba' produtturi esportaturi li kkoooperaw stqarrew li l-Istati Uniti tal-Amerika ma jkunx pajjiż analogu xieraq għaliex il-ħjut tal-fibra tal-ħġieġ li jużaw u li huma il-materja prima ewlenija għall-produzzjoni tal-prodott ikkonċernat, huwa ta' tip differenti ta' ħġieġ minn dak użat mill-produtturi esportaturi Ċiniżi, u allura huwa ogħla. Huma pproponew ukoll li t-Turkija u t-Tajlandja jintużaw minflok peress li l-produtturi tal-prodott ikkonċernat f'dawn iż-żewġ pajjiżi jużaw l-istess tip ta' ħjut tad-drappijiet tal-ħġieġ bħall-produtturi esportaturi Ċiniżi.

(42)

Il-Kummissjoni eżaminat jekk pajjiżi oħrajn ikunux għażla raġonevoli għall-pajjiż analogu u ntbagħtu kwestjonarji lill-produtturi tal-prodott ikkonċernat fil-Kanada, il-Kroazja, it-Turkija u t-Tajlandja. Produttur wieħed biss tal-porodott ikkonċernat fl-Istati Uniti tal-Amerika u l-produttur uniku fil-Kanada wieġbu l-kwestjonarji.

(43)

Iż-żewġ swieq, dak Kanadiż u dak Statunitens, kienu eżaminati biex tkun determinata jekk jistgħux jitqiesu bħala pajjiż analogu. Fir-rigward tal-Kanada, minkejja li hemm produttur wieħed biss tal-prodott ikkonċernat, instab li dan il-pajjiż għandu suq miftuħ mingħajr dazju ta' importazzjoni u li l-kompetizzjoni fis-suq kienet żgurata minn importazzjonijiet sinifikanti tal-prodott ikkonċernat minn pajjiżi terzi diversi. Barra minn hekk, instab li l-produttur Kanadiż jimmanifattura kull tip tal-prodott ikkonċernat mhux bħal dak Statunitens li jimmanifattura biss tip wieħed tal-prodott simili, fatt li jippermetti kalkoli ta' valur normali għal kull tip tal-prodott ikkonċernat. L-investigazzjoni wriet li l-Kanada tista' proviżorjament titqies bħala pajjiż analogu xieraq għall-iskop biex jiġi stabbilit il-valur normali.

(44)

Id-dejta ppreżentata fit-tweġiba tal-produttur Kanadiż li kkoopera kienet ivverifikata fuq il-post u nstabet li hija tagħrif affidabbli li fuqu seta' jiġi bbażat il-valur normali.

(45)

Għalhekk huwa provviżorjament konkluż li l-Kanada hija pajjiż analogu xieraq u raġonevoli skont l-Artikolu 2(7) tar-Regolament bażiku.

(46)

Skont l-Artikolu 2(7)(a) tar-Regolament bażiku, il-valur normali ġie stabbilit fuq il-bażi tat-tagħrif ivverifikat riċevut mingħand il-produttur fil-pajjiż analogu kif stabbilit hawn taħt:

(47)

Il-bejgħ domestiku tal-produttur Kanadiż tal-prodott simili nstab li kien rappreżentattiv f’termini ta’ volum meta mqabbel mal-prodott ikkonċernat esportat lejn l-Unjoni mill-produttur esportatur li kkoopera.

(48)

Matul il-perjodu tal-investigazzjoni, il-bejgħ fis-suq domestiku lil konsumaturi mhux relatati nstab li jsir fil-kors ordinarju tal-kummerċ għat-tipi kollha tal-prodott simili mmanifatturati mill-produttur Kanadiż. Madankollu, minħabba differenzi fil-kwalità bejn il-prodott simili mmanifatturat u mibjugħ fil-Kanada u l-prodott ikkonċernat mir-RPĊ, kien meqjus aktar xieraq li jinbena valur normali sabiex jkunu jistgħu jitqiesu d-differenzi u jkun żgurat tqabbil kif deskritt fil-premessa 52.

(49)

F'konformità mal-Artikolu 2(6)(c) tar-Regolament bażiku, l-ammonti għall-SG&A u l-profitti kienu stabbiliti abbażi tad-dejta tal-produttur Kanadiż.

(50)

Billi l-produtturi esportaturi inklużi fil-kampjun li kkooperaw u li ngħataw it-TI għamlu bejgħ għall-esportazzjoni lill-Unjoni direttament lil klijenti indipendenti fl-Unjoni, il-prezzijiet ġew ibbażati fuq il-prezzijiet li effettivament tħallsu jew li għandhom jitħallsu għall-prodott ikkonċernat, skont l-Artikolu 2(8) tar-Regolament bażiku.

(51)

Il-valur normali u l-prezzijiet tal-esportazzjoni tqabblu fuq bażi ex-works.

(52)

Biex jiġi żgurat tqabbil ġust bejn il-valur normali u l-prezz tal-esportazzjoni, saret konċessjoni xierqa fil-forma ta’ aġġustamenti għad-differenzi li jaffettwaw il-prezzijiet u l-komparabbiltà tal-prezzijiet skont l-Artikolu 2(10) tar-Regolament bażiku. Il-valur normali kien aġġustat għad-differenzi fil-kwalità tal-komponenti bħalma huma l-kimiċi u l-materji primi (tip ta' ħġieġ tal-ħjut). Saru aġġustamenti oħra, fejn kien xieraq, għat-taxxi indiretti, għall-ġarr tal-merkanzija fl-oċean, l-assigurazzjoni, l-ispejjeż tat-tqandil u l-ispejjeż anċillari, l-ippakkjar, il-kreditu, u l-ispejjeż bankarji fil-każijiet kollha fejn instab li kienu raġonevoli, eżatti u appoġġati b’evidenza vverifikata.

(53)

Skont l-Artikolu 2(11) u (12) tar-Regolament bażiku, il-marġnijiet tad-dumping għaż-żewġ produtturi esportaturi li kkooperaw inklużi fil-kampjun u li ngħataw it-TI ġew stabbiliti fuq il-bażi ta’ tqabbil ta’ valur normali medju differenzjat stabbilit għall-pajjiż analogu mal-prezz tal-esportazzjoni medju differenzjat tal-prodott ikkonċernat ta' kull kumpanija lill-Unjoni kif ġie stabbilit hawn fuq.

(54)

Fuq din il-bażi, il-marġnijiet tad-dumping provviżorji, espressi bћala perċentwali tal-prezz CIF fuq il-fruntiera tal-Unjoni, bid-dazju mhux imħallas, huma:

(55)

Il-marġini tad-dumping għall-produtturi esportaturi li kkooperaw fir-RPĊ, mhux inklużi fil-kampjun, kien ikkalkulat bħala medju taż-żewġ produtturi esportaturi inklużi fil-kampjun li ngħataw it-TI skont l-Artikolu 9(6) tar-Regolament bażiku.

(56)

Sabiex ikun ikkalkulat il-marġini tad-dumping applikabbli fil-pajjiż kollu fuq il-produtturi esportaturi li ma kkooperawx l-oħra kollha fir-RPĊ kif ukoll fuq il-produtturi esportatur inkluż fil-kampjun li kien suġġett għall-Artikolu 18 tar-Regolament bażiku, il-livell ta' koooperazzjoni kien l-ewwel stabbilit bit-tqabbil tal-volum tal-esportazzjonijiet lejn l-Unjoni rrappurtati mill-produtturi esportaturi li kkooperaw ma' dak tal-istatistika tal-Eurostat.

(57)

Minħabba l-livell għoli ta’ koperazzjoni fl-investigazzjoni, billi l-kumpaniji li kienu qed jikkooperaw kienu jirrappreżentaw madwar 86 % tal-importazzjoni kollha mir-RPĊ tul il-PI, il-marġini tad-dumping għall-pajjiż kollu kien stabbilit bl-użu tal-ogħla wieħed mill-marġnijiet ta' dumping li nstab fil-każijiet taż-żewġ produtturi esportaturi li ngħataw it-TI.

(58)

Fuq din il-bażi, il-marġnijiet tad-dumping proviżorji medji u mgħobbija u l-livell ta' dumping għall-pajjiż kollu espressi bħala perċentwali tal-prezz CIF fuq il-fruntiera tal-Unjoni, bid-dazju mhux imħallas, huma:

(59)

Matul il-PI, il-prodott simili kien immanifatturat minn 19-il produttur fl-Unjoni. Il-produzzjoni ta' dawn il-produtturi tikkostitwixxi l-produzzjoni totali tal-Unjoni fit-tifsira tal-Artikolu 4(1) tar-Regolament bażiku. Wara li l-informazzjoni nġabret jew kienet disponibbli mid-19-il produttur kollha li appoġġaw l-ilment, dawn il-produtturi minn hawn 'il quddiem se jissemmew bħala “l-industrija tal-Unjoni”.

(60)

Kif indikat fil-premessa 7 hawn fuq, tnax-il produttur tal-Unjoni pprovdew l-informazzjoni mitluba u qablu li jkunu inklużi fil-kampjun. Intgħażel kampjun ta' erba' produtturi li jirrappreżentaw madwar 70 % tal-produzzjoni totali stmata tal-Unjoni.

(61)

Il-kalkolu tal-konsum tal-Unjoni kien bbażat fuq ċifri li hemm fl-ilment u supplimentati biċ-ċifri vverifikati miksubin mill-produtturi u l-importaturi li kkooperaw fl-investigazzjoni. Il-konsum tal-Unjoni kien għalhekk stabbilit fuq il-bażi tal-volum tal-bejgħ fl-Unjoni tal-prodott simili mmanifatturat mill-industrija tal-Unjoni u l-volum tal-importazzjonijiet tal-prodott ikkonċernat minn pajjiżi terzi.

(62)

Fuq din il-bażi, il-konsum tal-Unjoni żviluppa kif ġej:

(63)

Il-konsum tal-prodott ikkonċernat u tal-prodott simili fl-Unjoni żdied bi 12 % matul il-perjodu kkunsidrat. Huwa żdied bi 26 % bejn l-2006 u l-2008, u mbagħad naqas b’17 % bejn l-2008 u l-2009. Matul il-PI il-konsum reġa żdied ftit. It-tnaqqis temporanju fl-2009 jista' jkun attribwit għal tnaqqis fis-suq tal-kostruzzjoni.

(64)

Il-volum tal-importazzjonijiet tal-prodott ikkonċernat mir-RPĊ żdied bi 48 % matul il-perjodu taħt kunsiderazzjoni. Wara ix-xejra ta' konsum u t-tnaqqis fis-settur tal-kostruzzjoni, naqas bi ftit fl-2009. Mandakollu, xejra 'l fuq fit-tul ta' dawn l-importazzjonijiet hija ċara u ż-żieda fil-volumi tal-importazzjonijiet kienet aktar b'saħħitha miż-żieda tal-konsum fl-Unjoni.

(65)

Żieda fil-volumi tal-importazzjonijiet tal-prodott ikkonċernat mir-RPĊ kienet akkumpanjata minn tnaqqis fil-prezz medju tal-importazzjoni li naqas bi 12 % bejn l-2006 u l-PI.

(66)

Is-sehem tas-suq tal-importazzjonijiet mill-pajjiż ikkonċernat żdied bi 32 % fil-perjodu kkunsidrat li f'dan il-każ ifisser żieda ta' kważi 13-il punt perċentwali. Fil-PI l-importazzjonijiet mill-pajjiż ikkonċernat jirrappreżenta sehem fis-suq kbir daqs 51 %

(67)

Għall-finijiet tal-analiżi tal-bejgħ taħt il-prezz, il-prezzijiet tal-importazzjoni tal-produttur esportatur Ċiniż tqabblu mal-prezzijiet tal-produtturi tal-Unjoni inklużi fil-kampjun matul il-PI, fuq il-bażi ta’ medja għal medja. Il-prezzijiet tal-produtturi tal-Unjoni inklużi fil-kampjun ġew aġġustati għal-livell nett ex-works, u mqabbla mal-prezzijiet tal-importazzjoni CIF. Dawn l-aħħar prezzijiet kienu aġġustati għad-dazju tal-importazzjonijiet u l-ispejjeż ta' wara l-importazzjoni. Barra minn hekk, minħabba id-differenzi fil-kwalità bejn il-prodott ikkonċernat impurtat mir-RPĊ u l-prodott simili manifatturat mill-indistrija tal-Unjoni, sar aġġustament ieħor ta' kwalità mal-prezzijiet tal-importazzjonijiet Ċiniżi. Dan l-aġġustament jirrifletti d-differenzi fil-parametri bħalma huma d-direzzjoni bejn il-makna u l-kontromakna, is-saħħa tad-drapp u l-elongazzjoni li ma kinux koperti kompletament bħala parametri fin-numru tal-kontroll tal-prodott.

(68)

Meta jitqies l-aġġustament tal-kwalità, il-marġini tal-medja mgħobbija tal-bejgħ minn taħt il-prezz misjub, espress bħala persentaġġ tal-prezzijiet tal-industrija tal-Unjoni kien bejn 29,5 % u 30,2 % matul il-PI.

(69)

F’konformità mal-Artikolu 3(5) tar-Regolament bażiku, il-Kummissjoni eżaminat il-fatturi u l-indikaturi ekonomiċi rilevanti kollha li għandhom effett fuq il-qagħda tal-industrija tal-Unjoni.

(70)

Ta' min ifakkar li kif issemma fil-premessa 7 hawn fuq, il-Kummissjoni għażlet kampjun magħmul mill-erba' l-akbar produtturi tal-Unjoni f'termini ta' bejgħ u produzzjoni.

(71)

L-indikaturi li jirreferu għad-dejta makroekonomika, bħalma huma l-produzzjoni, il-kapaċità, il-volum tal-bejgħ eċċ, jirrelataw mal-industrija tal-Unjoni kollha (it-tabelli hawn taħt jirreferu għad-dejta makro bħala sors). L-indikaturi li jibqa' huma bbażati fuq dejta vverifikata mill-produtturi tal-kampjun. Dawn l-indikaturi jissejħu mikrodejta.

(72)

Matul l-investigazzjoni, instab li parti mill-bejgħ tal-industrija tal-Unjoni kienet diretta permezz tal-kumpaniji relatati. Il-kumpaniji stqarrew li dawn it-tranżazzjonijiet għandhom ikunu ttrattati bħala bejgħ mhux relatat peress li stqarrew li r-relazzjonijiet bejn il-kumpaniji ma kinux diretti u l-bejgħ sar b'distinzjoni bejniethom. Madankolu, kien provviżorjament deċiż li jkunu esklużi dwan it-tranżazzjonijiet mill-kalkoli tal-marġini ta' ħsara u mill-indikatrui tal-ħsara peress li l-Kummissjoni se tagħmel aktar analiżi ta' dan il-bejgħ speċifiku. Saret eċċezzjoni għall-bejgħ relatat bejn żewġ kumpaniji inklużi fil-kampjun li għalihom il-mekkaniżmu ta' bejgħ mill-ġdid kien spjegat u seta' kien ivverifikat.

(73)

Matul il-perjodu kkunsidrat, il-volum tal-produzzjoni tal-industrija tal-Unjoni naqas b’4 %. B'mod ġenerali, ir-riżultat tal-produzzjoni segwa x-xejra fil-konsum jiġifieri żieda fis-snin 2006-2008 segwita bi tnaqqis qawwi fl-2009 u jerġa' tnaqqis żgħir matul il-PI. Għalhekk, kuntrarju għall-konsum, il-produzzjoni tal-industrija tal-Unjoni ma rkupratx fil-PI iżda saħansitra baqgħet tnaqqas.

(74)

L-utilizzazzoni tal-kapaċità tal-industrija tal-Unjoni fil-perjodu kkunsidrat naqset b'10 punti perċentwali minn 77 % fl-2006 għal 67 % fil-PI. Madankollu, ta' min jinnota li dan jista' jkun attribwit lill-fatt li l-kapaċità fiha nnifisha żdiedet xi ftit bħala riżultat tal-investiment tal-produtturi tal-Unjoni.

Stokkijiet

(75)

Il-livell tal-ħażna tal-industrija tal-Unjoni kważi ttrippla matul il-perjodu kkunsidrat. Din ix-xejra tikkkoinċidi mat-tnaqqis fil-volumi tal-bejgħ u l-produzzjoni. Espress f'relazzjoni mal-volum ta' produzzjoni, il-livell tal-istokkijiet żdied minn ftit anqas minn 4 % fl-2006 għal fuq il-11 % fil-PI.

Volum ta’ bejgħ u sehem mis-suq

(76)

Il-volum tal-bejgħ tal-industrija tal-Unjoni naqas matul il-perjodu ikkunsidrat bi 11 % li rriżulta fit-telf tas-sehem tas-suq ta' 12-il punt perċentwali minn 58 % għal 46 % tal-konsum totali tal-Unjoni.

(77)

Prezzijiet tal-bejgħ

(78)

Il-prezz medju tal-bejgħ tal-industrija tal-Unjoni lill-partijiet mhux relatati fl-UE naqas bi 3 % matul il-perjodu kkunsidrat. L-industrija tal-Unjoni ma naqsitx il-prezzijiet tal-bejgħ tagħha b'mod sinifikanti biex tikkompeti mal-importazzjonijiet dumped. Madankollu, din ikkontriwixxit għal telf sinifikanti fis-sehem tas-suq matul il-perjodu kkunsidrat.

Profitt

Investimenti, ir-redditu fuq l-investiment, il-likwidità tal-flus u l-ħila għall-akkwist tal-kapital

(79)

Kif kien spjegat fil-premessa 68 hawn fuq, matul il-perjodu kkunsidrat kien hemm pressjoni sinifikanti fuq il-prezz eżerċitat mill-importazzjonijiet Ċiniż fis-suq tal-Unjoni. Madankollu, l-industrija tal-Unjoni rnexxielha żżomm kondizzjoni finanzjarja tajba bejn l-2006 u l-2007 meta l-profittabbilità żdiedet minn 6 % għal 18 %. Minn hemm bdiet tnaqqas u stabbiliet għal 12 % fil-PI. Indikaturi finanzjarji oħrajn, bħalma huma r-redditu fuq l-assi u l-likwidità tal-flus baqgħu pożittivi wkoll. Fi kliem ieħor, l-industrija tal-Unjoni ma daħlitx f'kompetizzjoni agressiva tal-prezzijiet mal-importazzjonijiet Ċiniżi. Minflok huma għażlu li jimpenjaw irwieħhom fi proċess ta' ristrutturar u investew f'teknoloġiji ġodda tal-produzzjoni biex ikabbru l-kwalità tal-prodott tagħhom u jnaqqsu l-ispejjeż tal-produzzjoni fit-tul. Madankollu, dan sar a spejjeż tat-tnaqqis fil-volum tal-bejgħ u telf mis-sehem tas-suq bi profitt għall-kompetituri Ċiniżin tagħhom. Ta' min isemmi li l-kalkolu tal-profitt hawn fuq ma jikkunsidrax l-ispejjez straordinarji tal-istrutturar irrappurtati minn xi produtturi inklużi fil-kampjun. Li kieku kellhom jitqiesu dawn l-ispejjeż, il-profittabilità tal-industrija tal-Unjoni tkun sostanzjalment aktar baxxa. Konsegwentement din taffettwa b'mod negattiv l-indikaturi finanzjarji l-oħra elenkati hawn fuq.

(80)

Matul il-perjodu kkunsidrat l-industrija tal-Unjoni xorta baqgħet iżżomm livell għoli ta' investiment bl-għan li tnaqqas l-ispejjeż tal-manifattura u tiżviluppa metodu ajtar effiċjenti ta' produzzjoni. Matul il-PI l-investimenti aktar milli ttripplaw meta mqabbla maċ-ċifra tas-sena 2006.

(81)

Il-ħila għall-akkwist tal-kapital ma tqajmitx bħala kwistjoni mill-industrija tal-Unjoni matul il-perjodu kkunsidrat.

(82)

L-impjiegi, il-produttività u l-pagi

(83)

L-għadd ta' impjegati fl-industrija tal-Unjoni involuti fil-prodott simili naqas b'mod sinifikanti matul il-perjodu meqjus bi 21 %. Minkejja il-livell għoli ta' ħlasijiet, sa mill-2008 l-industrija tal-Unjoni addizzjonalment naqqset l-ispejjeż medji tax-xogħol għal kull ħaddiem. Bħala riżultat, il-produttività espressa f’termini ta’ produzzjoni għal kull ħaddiem, żdiedet tul il-perjodu meqjus.

(84)

Meta wieħed iqis il-volum u l-prezzijiet tal-importazzjonijiet li huma l-oġġett ta’ dumping mill-pajjiż ikkonċernat, l-impatt fuq is-suq tal-Unjoni tal-marġni attwali tad-dumping ma jistax jiġi kkunsidrat bħala negliġibbli matul il-PI.

(85)

Mela kif jidher ċar mill-analiżi tal-ħsara, matul il-perjodu meqjus l-industrija tal-Unjoni sofriet telf sostanzjali fil-volum tal-bejgħ u l-produzzjoni, fl-utilizzazzjoni tal-kapaċità, is-sehem tas-suq u n-numru ta' impjegati, li naqsu b'mod sinifikanti bi 21 % wara l-isforzi tar-ristrutturar mill-industrija. Għalhekk, l-industrija tal-Unjoni ma kinitx kapaċi tieħu vantaġġ mit-tkabbir tas-suq li kien kompletament meħud mill-importazzjonijiet Ċiniżi. Tabilħaqq, iż-żieda ta' 48 % fil-volum tal-importazzjonijiet matul il-perjodu meqjus kien wisq akbar miż-żieda ta' 12 % fil-konsum tal-Unjoni.

(86)

Huwa maħsub li l-bejgħ taħt il-prezz sinifikanti kontinwu mill-importazzjonijiet dumped Ċiniżi tal-prezzijiet tal-industrija tal-Unjoni se jkompli jaffettwa b'mod negattiv il-volum tal-bejgħ u għalhekk inevitabbilment is-sitwazzjoni ekonomika finanzjarja tal-industrija tal-Unjoni. Fit-tul medju, il-profittabilità u l-indikaturi finanzjarji l-oħra tal-kumpaniji Ewropew huma mistennija li jiddeterjoraw.

(87)

Fid-dawl ta’ dak li ntqal hawn fuq, qed jiġi konkluż b’mod provviżorju li l-industrija tal-Unjoni ġarrbet ħsara materjali skont it-tifsira tal-Artikolu 3(5) tar-Regolament bażiku.

(88)

Skont l-Artikoli 3(6) u (7) tar-Regolament bażiku, il-Kummissjoni eżaminat jekk l-importazzjonijiet li huma l-oġġett ta’ dumping mill-pajjiż ikkonċernat ikkawżawx ħsara lill-industrija tal-Unjoni sal-grad suffiċjenti li tkun ikkunsidrata bħala materjali. Il-fatturi magħrufa, minbarra l-importazzjonijiet li huma l-oġġett ta’ dumping, li fl-istess ħin jista’ jkun li għamlu ħsara lill-industrija tal-Unjoni, ġew eżaminati wkoll sabiex jiġi żgurat li l-ħsara possibbli kkawżata minn dawn il-fatturi l-oħra ma ġietx attribwita għall-importazzjonijiet li huma l-oġġett ta’ dumping.

(89)

Matul il-perjodu meqjus, il-volum tal-importazzjonijiet tal-prodott ikkonċernat mir-RPĊ żdied bi kważi 50 % u kiseb sehem sostanzjali tas-suq fis-suq tal-Unjoni. F’parallel kien hemm deterjorazzjoni diretta u komparabbli fil-qagħda ekonomika tal-industrija tal-Unjoni billi hija l-uniku parteċipant sinifikanti ieħor fis-suq tal-Unjoni, peress li l-importazzjonijiet minn sorsi oħra huma negliġibbli.

(90)

Iż-żieda kontinwa fil-volum tal-importazzjonijiet dumped kienet akkumpanjata minn tnaqqis sinifikanti fil-prezzijiet tal-industrija tal-Unjoni. Matul il-perjodu meqjus il-prezz medju tal-importazzjoni mir-RPĊ derivat mill-istatistika tal-importazzjonijiet tal-Eurostat kien ta' madwar 50 % aktar baxx mill-prezz medju tal-industrija tal-Unjoni. Anke wara aġġustament fid-differenzi fil-kwalità, il-marġini tal-qtugħ minn taħt ikkalkulat għall-produtturi esportaturi Ċiniżi mogħtija t-TI kienu ta' madwar 35 % matul il-PI. Għalhekk, jista' jiġi konkluż b'mod raġonevoli li l-importazzjonijiet dumped kienu responsabbli għad-dipressjoni fil-prezzijiet fl-2009 u fil-PI iżda fuq kollox, għat-telf sinifikanti fis-sehem tas-suq imħarrba mill-indutrija tal-Unjoni matul il-perjodu meqjus.

(91)

Minħabba l-koinċidenza stabbilita b’mod ċar fiż-żmien bejn, fuq naħa waħda, iż-żieda f’daqqa tal-importazzjonijiet li huma l-oġġett ta’ dumping bi prezzijiet taħt il-prezzijiet tal-industrija tal-Unjoni u, fuq in-naħa l-oħra, it-telf tal-bejgħ u l-volum tal-produzzjoni tal-industrija tal-Unjoni, it-tnaqqis fis-sehem tas-suq, qed jiġi konkluż b’mod provviżorju li l-importazzjonijiet li huma l-oġġett ta’ dumping qed jikkawzaw ħsara materjali lill-industrija tal-Unjoni.

(92)

Il-volum tal-esportazzjoni tal-industrija tal-Unjoni żdied b'25 % matul il-perjodu kkunsidrat iżda l-esportazzjonijiet jirrappreżentaw biss medja ta’ madwar 8 % tal-bejgħ totali. Għalhekk, l-impatt tat-tnaqqis fl-esportazzjonijiet fuq il-prestazzjoni ġenerali tal-industrija tal-Unjoni kienet kemmxejn limitata.

(93)

L-importazzjonijiet minn pajjiżi terzi kienu negliġibbli matul il-perjodu kkunsidrat u ma setgħux ikkontribwixxew għall-ħsara li ġarrbet l-industrija tal-Unjoni.

(94)

L-impatt tal-kriżi ekonomika fl-industrija tal-kostruzzjoni tista' tidher biċ-ċar fid-dejta tal-konsum sa mill-2009. Madankollu, il-kriżi affettwat kemm lill-industrija tal-Unjoni kif ukoll lill-esportaturi Ċiniżi bl-istess mod. Madankollu, l-investigazzjoni tal-ħsara wriet li l-importazzjonijiet Ċiniżi komplew jiksbu sehem mis-suq a spejjeż tal-industrija tal-Unjoni anke fi żmien il-kriżi.

(95)

Barra minn hekk, l-impatt tal-kriżi kellu ċerti effetti negattivi fuq is-suq tal-Unjoni matul perjodu relattivament qasir peress li diġà kien hemm sinjali ta' rkupru fil-PI.

(96)

Għaldaqstant, l-impatt tal-kriżi ma kissirx il-konnessjoni każwali bejn l-importazzjonijiet dumped u l-ħsara mġarrba mill-industrija tal-Unjoni.

(97)

Fuq il-bażi ta’ dan t’hawn fuq, qed jiġi konkluż b’mod provviżorju li l-ħsara materjali li saret lill-industrija tal-Unjoni kienet ikkawżata mill-importazzjonijiet ikkonċernati li huma l-oġġett ta’ dumping.

(98)

Ġew eżaminati għadd ta’ fatturi minbarra l-importazzjonijiet li huma l-oġġett ta’ dumping iżda l-ebda minn dawn ma setgħu jispjegaw it-telf serju fis-sehem tas-suq, il-produzzjoni u l-volum tal-bejgħ li seħħew fil-perjodu meqjus u b'mod partikolari l-PI. Dan it-telf li jaħbat eżatt maż-żidiet fil-volumi tal-importazzjonijiet li huma l-oġġett ta’ dumping tal-prodott ikkonċernat mir-RPĊ.

(99)

Meta wieħed iqis l-analiżi t’hawn fuq li ddistingwiet kif suppost u sseparat l-effetti tal-fatturi kollha magħrufa fuq is-sitwazzjoni tal-industrija tal-Unjoni mill-effetti ta’ ħsara tal-importazzjonijiet li huma l-oġġett ta’ dumping, qed jiġi konkluż b’mod provviżorju li l-importazzjonijiet mir-RPĊ ikkawżaw ħsara materjali lill-industrija tal-Unjoni fit-tifsira tal-Artikolu 3(6) tar-Regolament bażiku.

(100)

Skont l-Artikolu 21 tar-Regolament bażiku, ġie eżaminat jekk, minkejja il-konklużjoni provviżorja fuq l-eżistenza dumping ta' ħsara, jeżistux raġunijiet konvinċenti li setgħu jwasslu għall-konklużjoni li mhuwiex fl-interess tal-Unjoni li jiġu adottati miżuri provviżorji f'dan il-każ partikolari. Għal dan il-għan, u skont l-Artikolu 21(1) tar-Regolament bażiku, l-impatt tal-miżuri possibbli fuq il-partijiet kollha involuti f’din il-proċedura u anke l-konsegwenzi li ma jittieħdux il-miżuri ġew ikkunsidrati fuq il-bażi tal-evidenza kollha ppreżentata.

(101)

L-analiżi tal-ħsara wriet b’mod ċar li l-industrija tal-Unjoni ġarrbet minħabba l-importazzjonijiet li huma l-oġġett ta’ dumping. Iż-żieda fil-preżenza tal-importazzjonijiet li huma l-oġġett ta’ dumping fis-snin riċenti kkawżat soppressjoni tal-bejgħ fis-suq tal-Unjoni u telf sinifikanti tas-sehem tas-suq lill-industrija tal-Unjoni.

(102)

L-investigazzjoni wriet li kull żieda fis-sehem tas-suq tal-importazzjonijiet li huma l-oġġett ta’ dumping mill-pajjiż ikkonċernat tinkiseb bi ħsara diretta għall-industrija tal-Unjoni. Ta' min jenfasizza li l-prodott ikkonċernat huwa prodott importanti f'termini ta' dħul tal-produtturi tal-Unjoni inklużi fil-kampjun li huwa sa 40 % tad-dħul tal-bejgħ tagħhom. Mingħajr l-impożizzjoni tal-miżuri probabbilment se jkun hemm aktar deterjorazzjoni tas s-sitwazzjoni tal-industrija tal-Unjoni fid-dawl tal-pressjoni fit-tul fuq il-prezzijiet eżerċitata mill-importazzjonijiet dumped mir-RPĊ fuċ is-suq tal-Unjoni. Barra minn hekk, l-isforzi li saru mill-industrija tal-Unjoni biex tirristrutturizza u ttejjeb l-kwalità tal-prodott tagħha se jkun imminati kompletament. L-impożizzjoni ta’ miżuri se treġġa’ l-prezz tal-importazzjoni f’livelli mhux ta’ ħsara, u tippermetti li l-industrija tal-Unjoni tikkompeti taħt ċirkostanzi tal-kummerċ ġusti.

(103)

Għalhekk qed jiġi konkluż b’mod provviżorju li l-impożizzjoni tal-miżuri b’mod ċar tkun fl-interess tal-industrija tal-Unjoni.

(104)

L-impatt li l-miżuri aktarx ikollhom fuq l-importaturi ġie kkunsidrat skont l-Artikolu 21(2) tar-Regolament bażiku. F'dan ir-rigward, ta' min jinnota li erba' importaturi mhux relatati kkooperaw fl-investigazzjoni bit-total tal-importazzjonijiet tal-prodott ikkonċernat jammontaw għal 15 % tal-importazzjonijiet mir-RPĊ fil-PI.

(105)

Abbażi tad-dejta vverifikata fuq il-post għall-akbar importaturi li kkooperaw l-impatt tal-miżuri fuq din il-kumpanija ma għandux ikun sinifikanti peress li l-prodott ikkonċernat jirrappreżenta parti żgħira biss tad-dħul tagħha.

(106)

Madankollu l-kumpanija osservat li l-kapaċità tal-produzzjoni totali tal-industrija tal-Unjoni hija aktar baxxa mid-domanda preżenti li allegatament hija mistennija li tikber. Il-kumpanija rrimarkat ukoll li hemm sorsi limitati ta' provista minn pajjiżi terzi. Għalhekk, hi tistenna tħarbit fil-provisti jekk il-livell tad-dazji jkun għoli wisq. F'dan ir-rigward, ta' min jinnota li fid-dawl tal-qtugħ minn taħt sinifikanti tal-livell propost ta' miżuri, li jikkonsidra d-differenzi fil-kwalità bejn il-prodott ikkonċernat importat mir-RPĊ u l-prodott simili mmanifatturat mill-industrija tal-Unjoni, mhux mistenni li jiġu eliminati l-importazzjonijiet tal-prodott ikkonċernat mir-RPĊ lejn l-Unjoni.

(107)

Intbagħtu kwestjonarji lil 13il-utent magħrufa. Madankollu, l-ebda minnhom ma ppreżenta risposta u lanqas ma kkopera fil-proċediment. Wara l-pubblikazzjoni tal-avviż tal-inizzjazzjoni ta’ dan il-proċediment, ma waslet l-ebda rappreżentazzjoni mingħand organizzazzjonijiet tal-konsumaturi.

(108)

Għalhekk, fid-dawl ta' nuqqas ta' informazzjoni dwar il-proporzjon tal-prodott ikkonċernat fl-ispiża tal-produzzjoni tal-prodotti downstream jew is-sehem tal-bejgħ tal-prodotti downstream f'relazzjoni mal-fatturat totali tal-utenti, mhux possibbli f'dan l-istadju tal-investigazzjoni li jkun eżaminat l-impatt tal-miżuri fuq dawn il-kumpaniji. Madankollu, in-nuqqas ta' kooperazzjoni jista' jidher bħala indikazzjoni ta' impatt kemmxejn limitat fuq l-utenti.

(109)

Fid-dawl ta' dak li ntqal hawn fuq, ġie konkluż b’mod provviżorju li globalment, fuq il-bażi tal-informazzjoni disponibbli dwar l-interess tal-Unjoni, ma hemmx raġunijiet serji kontra l-impożizzjoni ta’ miżuri provviżorji fuq l-importazzjonijiet tal-prodott ikkonċernat mir-RPĊ.

(110)

Fid-dawl tal-konklużjonijiet milħuqa hawn fuq fir-rigward ta’ dumping, il-ħsara li tirriżulta u l-interess tal-Unjoni, il-miżuri provviżorji ta' antidumping fuq l-importazzjonijiet tal-prodott ikkonċernat mir-RPĊ għandhom jiġu imposti sabiex jipprevenu milli tiġi kkawżata aktar ksara lill-industrija tal-Unjoni mill-importazzjonijiet li huma l-oġġett ta’ dumping.

(111)

Il-livell tal-miżuri anti-dumping provviżorji għandu jkun suffiċjenti sabiex tiġi eliminata l-ħsara lill-industrija tal-Unjoni kkawżata mill-importazzjonijiet li huma l-oġġett ta’ dumping, mingħajr ma jinqabżu l-marġnijiet ta’ dumping misjuba.

(112)

Meta kien qed jiġi kkalkulat l-ammont ta’ dazju neċessarju għat-tneħħija tal-effetti tad-dumping dannuż, ġie kkunsidrat li kwalunkwe miżura għandha tħalli lill-industrija tal-Unjoni tkopri l-ispejjeż tagħha u tagħmel qligħ qabel it-taxxa li jista' jinkiseb raġonevolment taħt kondizzjonijiet normali tal-kompetizzjoni, jiġifieri fl-assenza ta' importazzjonijiet oġġett ta' dumping. Il-marġni tal-qligħ ta’ qabel it-taxxa użat għal din il-kalkulazzjoni kien 12 % tad-dħul. Dan kien il-livell medju ta' profitt miksub mill-industrija tal-Unjoni fis-snin 2006-2007. Meta wieħed iżomm f’moħħu li l-profitabbiltà tal-prodott ikkonċernat kienet affettwata mill-importazzjonijiet li huma l-oġġett ta’ dumping huwa ċar li dan il-livell ta’ profitt huwa prudenti u mhux eċċessiv. Fuq il-bażi msemmija hawn fuq, ġie kkalkulat prezz li mhux ta’ ħsara għall-industrija tal-Unjoni tal-prodott simili. Peress li l-profitt immirat huwa ugwali għall-profitt attwali tal-industrija tal-Unjoni fil-PI il-prezz ex-works medju mgħobbi ttieħed bħala referenza.

(113)

Iż-żieda fil-prezz neċessarja mbagħad ġiet determinata għal kull wieħed mill-produtturi esportaturi mogħtija t-TI li kkooperaw abbażi ta’ tqabbil tal-medja peżat tal-prezz ta' importazzjoni, kif stabbilit għall-kalkulazzjoni tat-twaqqigħ tal-prezzijiet, mal-prezz medju mhux dannuż tal-prodotti mibjugħin mill-industrija tal-Unjoni fis-suq tal-Unjoni. Id-differenza li tirriżulta minn dan il-paragun imbagħad ġiet espressa bħala perċentwali tal-valur CIF medju tal-importazzjoni.

(114)

Fuq din il-bażi, il-marġnijiet tad-dumping provviżorji, espressi bћala perċentwali tal-prezz CIF fuq il-fruntiera tal-Unjoni, bid-dazju mhux imħallas, huma:

(115)

F'konformità tal-metodu użat għall-kalkolu tal-marġini ta' dumping, il-marġini ta' ħsara għall-produtturi esportaturi li kkooperaw fir-RPĊ, mhux inklużi fil-kampjun kien kkalkulat bħala medja peżata taż-żewġ produtturi esportaturi inklużi fil-kampjun li ngħataw t-TI.

(116)

Wara l-metodu tal-kalkolu tal-marġini ta' dumping, il-marġini ta' ħsara fil-pajjiż kollu applikabbli fuq il-produtturi esportaturi kollha li ma kkooperawx fir-RPĊ kif ukoll għall-produttur esportatur inkluż fil-kampjun li kien soġġett għall-Artikolu 18 kien stabbilit li jintuża l-ogħla marġini misjub għaż-żewġ produtturi esportaturi li ngħataw it-TI.

(117)

Fuq din il-bażi, il-marġnijiet tad-dumping proviżorji medji u mgħobbija u l-livell ta' dumping għall-pajjiż kollu espressi bħala perċentwali tal-prezz CIF fuq il-fruntiera tal-Unjoni, bid-dazju mhux imħallas, huma:

(118)

Skont dak li ntqal, huwa kkunsidrat li, skont l-Artikolu 7(2) tar-Regolament bażiku, miżuri anti-dumping provviżorji għandhom ikunu imposti fir-rigward ta’ importazzjonijiet li joriġinaw fir-RPĊ fil-livell tal-marġini l-iktar baxx tad-dumping u tal-ħsara, skont ir-regola tal-inqas dazji.

(119)

Ir-rati tad-dazju antidumping ta’ kumpanija individwali speċifikati f’dan ir-Regolament ġew stabbiliti abbażi tas-sejbiet ta’ din l-investigazzjoni. B’hekk, dawn jirriflettu s-sitwazzjoni li nstabet matul l-investigazzjoni fir-rigward ta’ dawn il-kumpaniji. Dawn ir-rati tad-dazju (għall-kuntrarju tad-dazju għall-pajjiż kollu applikabbli għall-“kumpaniji l-oħra kollha”) huma għalhekk applikabbli esklussivament għall-importazzjonijiet ta' prodotti li joriġinaw fir-Repubblika Popolari taċ-Ċina u prodotti mill-kumpaniji u għalhekk mill-entitajiet ġuridiċi speċifiċi msemmija. Il-prodotti impurtati magħmulin minn xi kumpanija oħra mhux speċifikament imsemmija fil-parti operattiva ta’ dan ir-Regolament, inklużi l-entitajiet relatati ma’ dawk imsemmija b’mod speċifiku, ma jistgħux jibbenefikaw minn dawn ir-rati u għandhom jiġu soġġetti għar-rata tad-dazju applikabbli għall-“kumpaniji l-oħra kollha”.

(120)

Kwalunkwe talba għall-applikazzjoni ta’ dawn ir-rati tad-dazju anti-dumping gћal kumpaniji individwali (eż. wara bdil fl-isem tal-entità jew wara li jiġu stabbiliti entitajiet ġodda tal-produzzjoni jew tal-bejgћ) gћandha tiġi minnufih indirizzata lill-Kummissjoni (3) bl-informazzjoni kollha rilevanti, b’mod partikolari fir-rigward ta’ kwalunkwe modifika fl-attivitajiet tal-kumpanija marbuta mal-produzzjoni, mal-bejgћ domestiku u tal-esportazzjoni u li jkunu assoċjati, pereżempju, ma’ dik il-bidla fl-isem jew ma’ dik il-bidla fl-entitajiet tal-produzzjoni u tal-bejgћ. Jekk ikun xieraq, ir-Regolament se jiġi emendat skont il-każ billi tiġi aġġornata l-lista ta’ kumpaniji li jgawdu mir-rati tad-dazju individwali.

(121)

Sabiex jiġi żgurat infurzar xieraq tad-dazju antidumping, il-livell ta’ dazju li jibqa’ m’għandux jiġi applikat għall-produtturi esportaturi li ma kkooperawx biss iżda wkoll għal dawk il-produtturi li ma kellhom l-ebda esportazzjonijiet lejn l-Unjoni matul il-PI.

(122)

Il-marġini ta' dumping u l-ħsara kif ukoll d-dazji provviżorji ta' antidumping huma stabbilit kif ġej:

(123)

Is-sejbiet provviżorji ta’ hawn fuq se jkunu żvelati lill-partijiet interessati kollha li se jkunu mistiedna jibgħatu fehmiethom bil-miktub u jitolbu seduta ta’ smigħ. Il-kummenti tagħhom se jiġu analizzati u se jitqiesu fejn ikun iġġustifikat qabel ma ssir kwalunke determinazzjoni definittiva. Barra minn hekk, irid jiġi ddikjarat li s-sejbiet dwar l-impożizzjoni ta’ dazji ta’ antidumping magћmula gћall-għanijiet ta’ dan ir-Regolament huma provviżorji u jistgħu jkollhom jiġu kkunsidrati mill-ġdid għall-għanijiet ta’ kwalunkwe sejba definittiva,