26.11.2011   

MT

Il-Ġurnal Uffiċjali tal-Unjoni Ewropea

L 313/41

(1)

Fit-23 ta’ Settembru 2009, il-kumpanija Biothera Incorporated għamlet talba lill-awtorità kompetenti Irlandiża, sabiex tkun tista’ tqiegħed fis-suq il-beta-glukani tal-ħmira bħala ingredjent ġdid tal-ikel għall-użu f’varjetà ta’ ikel, inklużi xarbiet, għall-popolazzjoni ġenerali kif ukoll f’supplimenti tal-ikel u f’ikel għal użi nutrizzjonali partikolari bl-eċċezzjoni tal-formuli tat-trabi jew il-formuli ta’ prosegwiment.

(2)

Fit-23 ta’ Diċembru 2009, il-korp kompetenti Irlandiż għall-analiżi tal-ikel ħareġ ir-rapport preliminari ta’ analiżi tiegħu. F’dan ir-rapport, il-korp wasal għall-konklużjoni li l-beta-glukani tal-ħmira huma aċċettabbli bħala ingredjent ġdid tal-ikel dejjem jekk jiġu rispettati l-ispeċifikazzjonijiet tal-prodott u l-livelli maħsuba tal-użu u jekk il-firxa ta’ prodotti tal-ikel tkun limitata għal dik ippreżentata fid-dokument tal-applikazzjoni.

(3)

Il-Kummissjoni għaddiet ir-rapport preliminari ta’ analiżi lill-Istati Membri kollha fit-18 ta’ Jannar 2010.

(4)

Fi żmien il-perjodu ta’ 60 jum stipulat fl-Artikolu 6(4) tar-Regolament (KE) Nru 258/97, tressqu oġġezzjonijiet motivati għat-tqegħid fis-suq tal-prodott skont dik id-dispożizzjoni.

(5)

Għaldaqstant, fit-2 ta’ Lulju 2010, ġiet ikkonsultata l-Awtorità Ewropea dwar is-Sigurtà fl-Ikel (EFSA).

(6)

Fit-8 ta’ April 2011, fis-“Scientific Opinion on the safety of ‘Yeast beta-glucans’ as a Novel Food ingredient” (2), l-EFSA waslet għall-konklużjoni li skont il-kundizzjonijiet tal-użu proposti l-beta-glukani tal-ħmira huma sikuri. Fl-opinjoni tagħha l-EFSA ma indirizzatx is-sigurtà tat-tfal taħt l-età ta’ sena u nofs.

(7)

Abbażi tal-valutazzjoni xjentifika tal-EFSA u wara kunsiderazzjoni tad-Direttiva 2002/46/KE tal-Parlament Ewropew u tal-Kunsill tal-10 ta’ Ġunju 2002 dwar l-approssimazzjoni tal-liġijiet tal-Istati Membri dwar is-supplimenti tal-ikel (3), ir-Regolament (KE) Nru 1925/2006 tal-Parlament Ewropew u tal-Kunsill tal-20 ta’ Diċembru 2006 dwar iż-żieda ta’ vitamini u minerali u ta’ ċerti sustanzi oħra mal-ikel (4), id-Direttiva 2009/39/KE tal-Parlament Ewropew u tal-Kunsill tas-6 ta’ Mejju 2009 dwar l-oġġetti tal-ikel għal użu ta’ nutriment partikolari (5), id-Direttiva tal-Kummissjoni 1999/21/KE tal-25 ta’ Marzu 1999 dwar l-ikel dietetiku għal skopijiet mediċi speċjali (6), id-Direttiva tal-Kummissjoni 2006/125/KE tal-5 ta’ Diċembru 2006 dwar ikel ipproċessat ibbażat fuq iċ-ċereali u ikel tat-trabi għat-trabi u għat-tfal żgħar (7), ġie stabbilit li l-beta-glukani tal-ħmira huma konformi mal-kriterji stipulati fl-Artikolu 3(1) tar-Regolament (KE) Nru 258/97.

(8)

Il-miżuri stipulati f’din id-Deċiżjoni huma konformi mal-opinjoni tal-Kumitat Permanenti dwar il-Katina Alimentari u s-Saħħa tal-Annimali,