(1)

L-Unjoni qed taħdem għall-istabbiliment ta’ żona ġudizzjarja komuni bbażata fuq il-prinċipju tar-rikonoxximent reċiproku tad-deċiżjonijiet.

(2)

Il-Konvenzjoni tal-Aja tat-23 ta’ Novembru 2007 dwar l-Irkupru Internazzjonali ta’ Manteniment għat-Tfal u Forom Oħrajn ta’ Manteniment tal-Familja (“il-Konvenzjoni”) tikkostitwixxi bażi tajba għal sistema dinjija ta’ kooperazzjoni amministrattiva u għar-rikonoxximent u l-infurzar ta’ deċiżjonijiet dwar manteniment u arranġamenti ta’ manteniment, filwaqt li tipprevedi assistenza legali bla ħlas fi kważi l-kawżi kollha ta’ manteniment tat-tfal u proċedura integrata għar-rikonoxximent u l-infurzar.

(3)

L-Artikolu 59 tal-Konvenzjoni jippermetti li Organizzazzjonijiet Reġjonali għall-Integrazzjoni Ekonomika bħall-Unjoni jiffirmaw, jaċċettaw, japprovaw u jaċċedu għall-Konvenzjoni.

(4)

Materji rregolati mill-Konvenzjoni huma ttratti wkoll fir-Regolament tal-Kunsill (KE) Nru 4/2009 tat-18 ta’ Diċembru 2008 dwar il-ġurisdizzjoni, il-liġi applikabbli, ir-rikonoxximent u l-infurzar tad-deċiżjonijiet u l-kooperazzjoni f’materji relatati ma’ obbligi ta’ manteniment (1). L-Unjoni għandha tiddeċiedi, f’dan il-każ partikolari, li tiffirma l-Konvenzjoni waħedha u li teżerċita kompetenza fil-materji kollha rregolati minnha.

(5)

Id-dikjarazzjonijiet u r-riżervi adatti kollha għandhom isiru mill-Unjoni fil-mument tal-approvazzjoni tal-Konvenzjoni.

(6)

F’konformità mal-Artikolu 3 tal-Protokoll (Nru 21) dwar il-pożizzjoni tar-Renju Unit u l-Irlanda, fir-rigward tal-Ispazju ta’ Libertà, Sigurtà u Ġustizzja, anness għat-Trattat dwar l-Unjoni Ewropea u għat-Trattat dwar il-Funzjonament tal-Unjoni Ewropea, ir-Renju Unit u l-Irlanda qed jieħdu sehem fl-adozzjoni u l-applikazzjoni ta’ din id-Deċiżjoni.

(7)

F’konformità mal-Artikoli 1 u 2 tal-Protokoll (Nru 22) dwar il-pożizzjoni tad-Danimarka, annessa għat-Trattat dwar l-Unjoni Ewropea u għat-Trattat dwar il-Funzjonament tal-Unjoni Ewropea, id-Danimarka mhix qed tieħu sehem fl-adozzjoni ta’ din id-Deċiżjoni u mhix marbuta biha jew soġġetta għall-applikazzjoni tagħha,