26.2.2011   

MT

Il-Ġurnal Uffiċjali tal-Unjoni Ewropea

L 53/73

(1)

Ir-Regolament (KE) Nru 854/2004 jistipula regoli speċifiċi għall-organizzazzjoni ta’ kontrolli uffiċjali fuq il-prodotti li joriġinaw mill-annimali. B’mod partikolari, jistipula li prodotti li joriġinaw mill-annimali jistgħu jiġu importati biss minn pajjiż terz jew parti ta’ pajjiż terz li jidher fuq il-lista li tfasslet skont dak ir-Regolament.

(2)

Ir-Regolament (KE) Nru 854/2004 jipprovdi li, fit-tfassil u l-aġġornamenti ta’ listi bħal dawn, għandhom jitqiesu l-verifiki min-naħa tal-Unjoni f’pajjiżi terzi u l-garanziji min-naħa tal-awtoritajiet kompetenti ta’ pajjiżi terzi fir-rigward tal-konformità jew l-ekwivalenza mal-liġi tal-Unjoni dwar l-għalf u l-ikel u regoli dwar saħħet l-annimali kif speċifikat fir-Regolament (KE) Nru 882/2004 tal-Parlament Ewropew u tal-Kunsill tad-29 ta’ April 2004 dwar il-kontrolli uffiċjali mwettqa biex tiġi żgurata l-verifikazzjoni tal-konformità mal-liġi tal-għalf u l-ikel, mas-saħħa tal-annimali u mar-regoli dwar il-welfare tal-annimali (2).

(3)

Id-Deċiżjoni tal-Kummissjoni 2006/766/KE tas-6 ta’ Novembru 2006 li tistabbilixxi l-listi ta’ pajjiżi terzi u territorji li minnhom l-importazzjonijiet ta’ molluski bivalvi, ekinodermi, tunikati, gastropodi tal-ibħra u prodotti tas-sajd huma permessi (3) telenka dawk il-pajjiżi terzi li jissodisfaw il-kriterji msemmija fir-Regolament (KE) Nru 854/2004 u għaldaqstant huma f’pożizzjoni li jiggarantixxu li l-esportazzjoni ta’ dawk il-prodotti lejn l-Unjoni jissodisfaw il-kundizzjonijiet sanitarji stipulati fil-leġiżlazzjoni tal-Unjoni biex titħares saħħet il-konsumaturi. B’mod partikolari, l-Anness II ta’ din id-Deċiżjoni jistabbilixxi lista ta’ pajjiżi terzi li minnhom l-importazzjonijiet ta’ prodotti tas-sajd għall-konsum mill-bniedem huma permessi.

(4)

Il-Fiġi mhijiex attwalment inkluża fil-lista tal-Anness II mad-Deċiżjoni 2006/766/KE bħala pajjiż terz li l-importazzjonijiet minnu ta’ prodotti tas-sajd maħsuba għall-konsum mill-bniedem huma permessi.

(5)

Il-kontrolli tal-Unjoni għall-evalwazzjoni tas-sistema ta’ kontroll fis-seħħ fil-Fiġi li tirregola l-produzzjoni tal-prodotti tas-sajd maħsuba għall-esportazzjoni lejn l-Unjoni, li l-aħħar waħda saret f’Settembru 2010, flimkien mal-garanziji pprovduti mill-awtorità kompetenti tal-Fiġi, jindikaw li l-kundizzjonijiet applikabbli f’dan il-pajjiż terz għall-prodotti tas-sajd għall-konsum mill-bniedem iddestinati għall-esportazzjoni lejn l-Unjoni huma ekwivalenti għal dawk stabbiliti fil-leġiżlazzjoni rilevanti tal-Unjoni. Għaldaqstant, l-Anness II mad-Deċiżjoni 2006/766/KE għandu jiġi emendat biex jippermetti l-importazzjonijiet mill-Fiġi ta’ prodotti tas-sajd għall-konsum mill-bniedem.

(6)

Id-Deċiżjoni 2006/766/KE għandha għalhekk tiġi emendata skont dan.

(7)

Il-miżuri stipulati f’din id-Deċiżjoni huma konformi mal-opinjoni tal-Kumitat Permanenti dwar il-Katina Alimentari u s-Saħħa tal-Annimali,