2.12.2011 |
MT |
Il-Ġurnal Uffiċjali tal-Unjoni Ewropea |
L 319/117 |
DEĊIŻJONI TAL-BANK ĊENTRALI EWROPEW
tas-16 ta’ Novembru 2011
li tistabbilixxi regoli u proċeduri dettaljati għall-implimentazzjoni tal-kriterji ta’ eliġibbiltà biex id-depożitorji ċentrali tat-titoli jaċċessaw servizzi tat-TARGET2-Securities
(BĊE/2011/20)
(2011/789/UE)
IL-KUNSILL GOVERNATTIV TAL-BANK ĊENTRALI EWROPEW,
Wara li kkunsidra l-Istatut tas-Sistema Ewropea tal-Banek Ċentrali u tal-Bank Ċentrali Ewropew u b’mod partikolari l-Artikoli 3.1 u 12.1 u l-Artikoli 17, 18 u 22 tiegħu,
Wara li kkunsidra d-Direttiva 98/26/KE tal-Parlament Ewropew u tal-Kunsill tad-19 ta’ Mejju 1998 dwar finalità ta’ settlement fis-sistemi ta’ settlement ta’ pagamenti u titoli (1), u b’mod partikolari l-Artikolu 10 tiegħu,.
Wara li kkunsidra l-Linja Gwida BĊE/2010/2 tal-21 ta’ April 2010 dwar TARGET2-Securities (2), u b’mod partikolari l-Artikolu 4(2)(d) u l-Artikolu 15 tiegħu,
Wara li kkunsidra d-Deċiżjoni BĊE/2009/6 tad-19 ta’ Marzu 2009 fuq it-twaqqif tal-Bord għall-Programm TARGET2-Securities (3),
Billi:
(1) |
L-Artikolu 15 tal-Linja Gwida BĊE/2010/2 tistabbilixxi l-kriterji ta’ eliġibbilità biex Depożitorju Ċentrali tat-Titoli (CSD) jaċċessa servizzi tat-TARGET2-Securities (T2S). |
(2) |
Huwa meħtieġ li tiġi stabbilita l-proċedura għall-applikazzjoni biex CSD jaċċessa s-servizzi T2S u l-proċedura biex CSD jitlob għal deroga mill-kriterju numru 5 għall-aċċess ta’ CSD, |
ADOTTA DIN ID-DEĊIŻJONI:
Artikolu 1
Definizzjonijiet
Għall-finijiet ta’ din id-Deċiżjoni:
(1) |
“rapport ta’ valutazzjoni” tfisser dokumentazzjoni bil-miktub li fiha: (a) rapport imħejji mill-awtoritajiet kompetenti rilevanti li jivvaluta l-konformita’ ta’ CSD mal-kriterju numru 2 għall-aċċess ta’ CSD; u (b) valutazzjoni mis-CSD nnifsu tal-konformità tiegħu mal-kriterji CSD numri 1, 3, 4 u 5 għall-aċċess ta’ CSD; |
(2) |
“bank ċentrali (BĊ)” tfisser il-Bank Ċentrali Ewropew, il-banek ċentrali nazzjonali (BĊNi) tal-Istati Membri li l-munita tagħhom hija l-euro, il-BĊNi tal-Istati Membri li l-munita tagħhom mhijiex l-euro (minn hawn ’il quddiem “BĊNi li mhux fiż-żona euro”), kwalsiasi bank ċentrali jew awtorità kompetenti rilevanti taż-Żona Ekonomika Ewropea (ŻEE) (minn hawn ’il quddiem “bank ċentrali taż-ŻEE”) u kwalsiasi bank ċentrali jew awtorità kompetenti rilevanti ta’ pajjiż barra ż-ŻEE (minn hawn ’il quddiem “bank ċentrali ieħor”), fejn il-munita ta’ dan il-BĊN li mhux fiż-żona euro, fiż-ŻEE jew ta’ bank ċentrali ieħor hija meqjusa eliġibbli skont l-Artikolu 18 tal-Linja Gwida BĊE/2010/2; |
(3) |
“kriterju numru 1 għall-aċċess ta’ CSD” tfisser il-kriterju stabbilit fl-Artikolu 15(1)(a) tal-Linja Gwida BĊE/2010/2, jiġifieri li CSDs huma eliġibbli għall-aċċess għas-servizzi T2S sakemm ikunu ġew notifikati lill-Awtorità Ewropea tat-Titoli u s-Swieq taħt l-Artikolu 10 tad-Direttiva 98/26/KE jew, fil-każ ta’ CSD minn pajjiż barra ż-ŻEE, joperaw taħt qafas legali u regolatorju li huwa ekwivalenti għal dak fis-seħħ fl-Unjoni; |
(4) |
“kriterju numru 2 għall-aċċess ta’ CSD” tfisser il-kriterju stabbilit fl-Artikolu 15(1)(b) tal-Linja Gwida BĊE/2010/2, jiġifieri li CSDs huma eliġibbli għall-aċċess għas-servizzi T2S sakemm ikunu ġew ivvalutati pożittivament mill-awtoritajiet kompetenti fil-konfront tar-Rakkomandazzjonijiet tas-Sistema Ewropea ta’ Banek Ċentrali/tal-Kumitat tar-Regolaturi Ewropej tat-Titoli dwar is-Sistemi ta’ Saldu tat-Titoli (minn hawn ‘il quddiem “ir-rakkomandazzjonijiet SEBĊ/CESR”) (4); |
(5) |
“kriterju numru 3 għall-aċċess ta’ CSD” tfisser il-kriterju stabbilit fl-Artikolu 15(1)(c) tal-Linja Gwida BĊE/2010/2, jiġifieri li CSDs huma eliġibbli għall-aċċess għas-servizzi T2S sakemm, fuq talba, jagħmlu kull titolu/Numru Internazzjonali għall-Identifikazzjoni tat-Titoli li għalih huma CSD emittent jew CSD emittent tekniku, disponibbli lil CSDs oħra fit-T2S; |
(6) |
“kriterju numru 4 għall-aċċess ta’ CSD” tfisser il-kriterju stabbilit fl-Artikolu 15(1)(d) tal-Linja Gwida BĊE/2010/2, jiġifieri li CSDs huma eliġibbli għall-aċċess għas-servizzi T2S sakemm jintrabtu li joffru lil CSDs oħra fit-T2S servizz ta’ kustodja bażiku fuq bażi non-diskriminatorja; |
(7) |
“kriterju numru 5 għall-aċċess ta’ CSD” tfisser il-kriterju stabbilit fl-Artikolu 15(1)(e) tal-Linja Gwida BĊE/2010/2, jiġifieri li CSDs huma eliġibbli għall-aċċess għas-servizzi T2S sakemm jintrabtu ma’ CSDs oħra fit-T2S li jwettqu s-saldu tal-flus tal-bank ċentrali fit-T2S jekk il-munita tkun disponibbli fit-T2S; |
(8) |
“awtoritajiet kompetenti rilevanti” tfisser il-BĊi u r-regolaturi b’kompetenza ta’ sorveljanza u jew/superviżorja fuq CSD speċifiku u responsabbli għall-valutazzjoni ta’ CSDs fil-konfront ta’ standards rikonoxxuti applikabbli; |
(9) |
“parti konnessa direttament” tfisser Parti tat-T2S b’faċilità teknika li tippermettilha taċċessa t-T2S u tuża s-servizzi ta’ saldu tat-titoli tagħha mingħajr il-ħtieġa li CSD jaġixxi bħala interfaċċja teknika; |
(10) |
“Parti tat-T2S” tfisser entità legali jew, f’ċerti swieq, individwu, li għandhom relazzjoni kuntrattwali ma’ CSD fit-T2S għall-ipproċessar tal-attivitajiet tagħhom marbutin mas-saldu fit-T2S, u li mhux neċessarjament għandhom kont tat-titoli mas-CSD; |
(11) |
“Bord għall-Programm T2S” tfisser il-korp ta’ ġestjoni tal-Eurosistema stabbilit skont Deċiżjoni BĊE/2009/6, kif definit fl-Artikolu 2 tal-Linja Gwida BĊE/2010/2, jew is-suċċessut tiegħu; |
(12) |
“Grupp Konsultattiv tat-T2S (GK)” tfisser il-forum definit fl-Artikolu 7 tal-Linja Gwida BĊE/2010/2; |
(13) |
“Ftehim dwar il-Parteċipazzjoni tal-Munita (FPM)” tfisser ftehim li għandhom jidħlu għalih l-Eurosistema u BĊN li mhux fiż-żona euro, jew awtorità responsabbli għal munita li mhijiex l-euro, sabiex issir it-tranżazzjoni ta’ saldu ta’ titoli fi flus tal-bank ċentrali f’muniti li mhumiex l-euro. |
Artikolu 2
Suġġett u ambitu
1. Il-ħames kriterji li jiddeterminaw l-eliġibbiltà ta’ CSDs biex jaċċessaw is-servizzi T2S stabbiliti fl-Artikolu 15 tal-Linja Gwida BĊE/2010/2 (minn hawn ‘il quddiem il-“ħames kriterji għall-aċċess ta’ CSD”) għandhom ikunu implimentati skont il-proċeduri stabbiliti fl-Artikoli 3 sa 5 ta’ din id-Deċiżjoni u r-regoli fl-Anness.
2. Din id-Deċiżjoni m’għandhiex tapplika lil partijiet direttament konnessi li għandhom relazzjoni legali mas-CSDs.
Artikolu 3
Proċedura tal-applikazzjoni
1. Biex tapplika għal servizzi T2S, CSD għandu jissottometti: (a) applikazzjoni lill- Kunsill Governattiv, u (b) fil-ħin tal-migrazzjoni tiegħu għat-T2S, rapport ta’ valutazzjoni.
2. Ir-rapport ta’ valutazzjoni għandu jipprovdi evidenza illi s-CSD jikkonforma mal-ħames kriterji għall-aċċess ta’ CSD fil-ħin tal-migrazzjoni tiegħu għat-T2S, u jiddikjara l-grad ta’ implimentazzjoni ta’ kull kriterju għall-aċċess ta’ CSD skont il-kategoriji li ġejjin: konformi, parzjalment konformi u mhux applikabbli, u għandu jistabbilixxi r-raġunijiet, l-ispjegazzjonijiet u l-evidenza relevanti tas-CSD.
3. Il-Bord għall-Programm T2S għandu jissottometti proposta lill-Kunsill Governattiv, ibbażata fuq id-dokumentazzjoni fuq imsemmija, fuq applikazzjoni ta’ CSD biex jaċċessa servizzi T2S. Biex iħejji l-proposta tiegħu, il-Bord tal-Programm T2S jista’ jitlob kjarifi mingħand jew jissottometti domandi lis-CSD applikanti.
4. Wara s-sottomissjoni tal-proposta mill-Bord tal-Programm T2S, il-Kunsill Governattiv għandu jieħu deċiżjoni dwar applikazzjoni ta’ CSD u jikkomunikaha bil-miktub lil dik is-CSD sa mhux aktar tard minn xahrejn wara: (a) id-data tal-irċevuta tal-applikazzjoni; jew (b) id-data tal-irċevuta tat-tweġiba għal kull talba għal kjarifiki jew sottomissjoni ta’ mistoqsijiet mill-Bord tal-Programm T2S taħt il-paragrafu 3. Fejn il-Kunsill Governattiv jiċħad applikazzjoni, huwa għandu jagħti r-raġunijiet għal dan.
Artikolu 4
Proċedura biex tinkiseb deroga mill-kriterju ta’ aċċess għal CSD numru 5
1. CSD jista “jissottometti talba għal deroga mill-kriterju numru 5 għall-aċċess ta” CSD abbażi tas-sitwazzjoni operattiva jew teknika speċifika tiegħu.
2. Sabiex tiġi vvalutata talba għal deroga, is-CSD għandu jissottometti talba lill-Bord tal-Programm T2S u jipprovdi evidenza ta’ dan li ġej:
(a) |
id-deroga hija għal volum ta’ saldu limitat ħafna bħala proporzjon tal-medja totali ta’ kuljum tal-istruzzjonijietykunsinna kontra l-istruzzjonijiet tal-ħlas irċevuti f’xahar fis-CSD, u l-kost tas-saldu ta’ dawn l-operazzjonijiet fit-T2S ikun eċċessiv għas-CSD; |
(b) |
is-CSD tkun waqqfet salvagwardji tekniċi u operattivi li jiżguraw illi d-deroga tibqa fil-limitu stabbilit fil-punt (a); |
(c) |
is-CSD ikun għamel kull sforz sabiex jissodisfa l-kriterju numru 5 għall-aċċess ta’ CSD. |
3. Wara l-irċevuta ta’ talba bħal din għal deroga:
(a) |
il-Bord tal-Programm T2S għandu jissottometti t-talba tas-CSD u l-prevalutazzjoni tiegħu lill-Grupp Konsultattiv tat-T2S; |
(b) |
il-Grupp Konsultattiv tat-T2S għandu jipprovdi lill-Bord tal-Programm T2S b’parir dwar it-talba mingħajkr dewmien u fi żmien xieraq biex dan jiġi kkunsidrat; |
(c) |
wara li jkun irċieva l-parir mingħand il-Grupp Konsultattiv tat-T2S, il-Bord tal-Programm T2S għandu jħejji valutazzjoni finali u jissottomettiha, flimkien mas-sett kollu tad-dokumenti, lill-Kunsill Governattiv; |
(d) |
il-Kunsill Governattiv għandu joħroġ deċiżjoni raġunata fuq talba għal deroga; |
(e) |
il-Bord tal-Programm T2S għandu jinforma lis-CSD u lill-Grupp Konsultattiv T2S bil-miktub dwar id-deċiżjoni raġunata tal-Kunsill Governattiv. |
4. CSD indikat minn BĊ li ffirma CPA U jkun għażel saldu tat-tranżazzjonijiet tiegħu tal-politika monetarja fi flus tal-bank ċentrali barra t-T2S, għandu jissottometti talba għal deroga sabiex ikun jista’ jagħmel saldu ta’ dawn it-tranżazzjonijet tiegħu tal-politika monetarja fi flus tal-bank ċentrali barra t-T2S. F’każ bħal dan, għandha tingħata deroga bil-patt illi: (a) l-Eurosistema tkun irċeviet l-informazzjoni relevanti kollha dwar il-funzjonament tekniku ta’ dan is-saldu; u (b) dan is-saldu ma jkunx jeħtieġ bidliet lill-funzjonalità tat-T2S jew jeffettwaha b’mod negattiv. Il-BĊ li jagħmel l-indikazzjoni għandu jiġi mistieden jagħti l-opinjoni tiegħu dwar din it-talba għal deroga.
5. CSD b’deroga għandu jagħti rapport ta’ kull xahar lill-Bord tal-Programm T2S li jipprova illi huwa jkompli jikkonforma mad-deroga, inkluż il-limitu miftiehem stabbilit fil-paragrafu 2(a). CSD b’deroga skont il-paragrafu 4 għandu jagħti rapport ta’ kull xahar lill-Bord tal-Programm T2S dwar is-sitwazzjoni.
6. Fejn CSD b’deroga jeċċedi konsistentemente il-limitu miftiehem fil-paragrafu 2(a) fuq perijodu ta’ sitt xhur, il-Kunsill Governattiv għandu jirtira d-deroga minħabba n-nonkonformità mal-kriterju numru 5 għall-aċċess ta’ CSD u l-Bord tal-Programm T2S għandu jinnotifika lis-CSD skont il-każ.
7. Wara l-irtirar ta’ deroga, CSD jista’ jissottometti talba ġdida għal deroga skont il-proċedura stabbilita f’dan l-Artikolu.
8. Fejn hemm sitwazzjoni ta’ kriżi li jista’ jkollha impatt fuq l-istabbiltà finanzjarja ta’ pajjiż jew fuq il-kompitu tal-BĊ rilevanti li jissalvagwardja l-integrità tal-munita tiegħu u lit kun wasslet lill-BĊ tal-pajjiż ikkonċernat biex jimxi għal saldu ta’ kontinġenza bħala parti mill-pjan tiegħu għall-ġestjoni ta’ kriżi, CSD indikat minn dak il-BĊ għandu jissottometti talba lill-Bord tal-Programm T2S għal deroga temporanja mill-kriterju numru 5 għall-aċċess ta’ CSD, u jista’ jagħmel saldu b’mezz ieħor b’mod temporanju. Il-Kunsill Governattiv għandu joħroġ deċiżjoni rraġjunata fuq talba bħal din billi titqies l-opinjoni tal-BĊ rilevanti dwar is-sitwazzjoni li jistħoqqilha d-deroga temporanja mill-kriterju numru 5 għall-aċċess ta’ CSD. Il-BĊ rilevanti għandu jipprovdi lill-Bord tal-Programm T2S b’rapport, tal-anqas fuq bażi ta’ kull xahar, dwar l-evalwazzjoni tiegħu tas-sitwazzjoni.
Artikolu 5
Konformità kontinwa mal-ħames kriterji għall-aċċess ta’ CSD
1. CSD b’aċċess għas-servizzi T2S għandu jikkonforma, wara l-migrazzjoni għat-T2S, mal-ħames kriterji għall-aċċess ta’ CSD fuq bażi kontinwa u għandu:
(a) |
jiżgura, b’mod partikolari, permezz ta’ valutazzjoni ta’ min joqgħod fuqha li ssir mis-CSD innifsu ta’ kull sena u appoġġata minn dokumentazzjoni rilevanti li ser ikompli jikkonforma mal-kriterji numru 1, 3, 4 u 5 għall-aċċess ta’ CSD. Il-valutazzjoni li ssir minnu stess ghandha tkun akkumpanjata mill-aktar valutazzjoni riċenti tal-konformità tas-CSD numru 2 għall-aċċess ta’ CSD li ssir mill-awtoritajiet kompetenti rilevanti; |
(b) |
jagħti minnufih lill-Bord tal-Programm T2S l-aktar valutazzjoni regolari jew ad hoc riċenti li tkun saret mill-awtoritajiet kompetenti rilevanti dwar il-konformità tiegħu mal-kriterju numru 2 għall-aċċess ta’ CSD; |
(c) |
jitlob valutazzjoni ġdida mill-awtoritajiet kompetenti rilevanti tal-konformità tiegħu mal-kriterju numru 2 għall-aċċess ta’ CSD f’każ ta’ bidliet materjali fis-sistema tas-CSD; |
(d) |
jinnotifika lill-Bord tal-Programm T2S fejn valutazzjoni ta’ awtorità kompetenti rilevanti jew valutazzjoni li ssir minnu stess tkun sabet non-konformità ma xi wieħed mill-ħames kriterji ta’ aċċess għal CSD; |
(e) |
wara talba mill-Bord tal-Programm T2S, jagħti rapport ta’ valutazzjoni li juri illi s-CSD għadu jikkonforma mal-ħames kriterji għall-aċċess ta’ CSD. |
2. Bl-eċċezzjoni tal-kriterju numru 2 għall-aċċess ta’ CSD, il-Bord al-Programm T2S jista’ jwettaq il-valutazzjoni tiegħu stess u jimmonitorja l-konformità mal-ħames kriterji tal-aċċess għal CSD jew jitlob l-informazzjoni mingħand CSD. Fejn il-Bord tal-Programm T2S jiddeċiedi illi CSD ma jikkonformax ma’ wieħed mill-ħames ta’ kriterji għall-aċċess ta’ CSD, huwa għandu jniedi l-proċedura stabbilita fil-kuntratti mas-CSDs skont l-Artikolu 16 tal-Linja Gwida BĊE/2010/2.
Artikolu 6
Dħul fis-seħħ
Din id-Deċiżjoni għandha tidħol fis-seħħ fil-jum wara l-pubblikazzjoni tagħha f’Il-Ġurnal Uffiċjali tal-Unjoni Ewropea.
Magħmul fi Frankfurt am Main, is-16 ta’ Novembru 2011.
Il-President tal-BĊE
Mario DRAGHI
(1) ĠU L 166, 11.6.1998, p. 45.
(2) ĠU L 118, 12.5.2010, p. 65.
(3) ĠU L 102, 22.4.2009, p. 12.
(4) Disponibbli fuq is-sit elettroniku tal-Awtorità Ewropea tat-Titoli u s-Swieq fuq www.esma.europa.eu.
ANNESS
REGOLI DETTALJATI DWAR L-IMPLIMENTAZZJONI TAL-ĦAMES KRITERJI GĦALL-AĊĊESS TA’ DEPOŻITORJU ĊENTRALI TAT-TITOLI
Għall-finijiet ta’ dan l-Anness:
— |
“servizzi ta’ kustodja bażiċi” tfisser iż-żamma u l-amministrazzjoni ta’ titoli u strumenti finanzjarji oħra li huma ta’ proprjetà ta’ terza persuna minn entità inkarigata b’dawn il-kompiti. Dawn is-servizzi jinkludu l-konservazzjoni ta’ titoli, it-tqassim ta’ imgħax u dividends fuq it-titoli fiż-żamma u l-ipproċessar ta’ azzjonijiet korporattivi fuq dawn it-titoli; |
— |
“CSD investitur” tfisser, fil-kuntest ta’ links tad-depożitorju ċentrali tat-titoli (CSD), CSD li jiftaħ kont f’CSD ieħor (is-CSD emittent) sabiex ikunu jista’ jsir is-saldu ta’ tranżazzjonijiet tat-titoli trans-CSD; |
— |
“CSD emittent” tfisser is-CSD li fih it-titoli nħarġu u tqassmu f’isem l-emittent. Is-CSD emittent huwa resposnabbli għall-ipproċessar ta’ azzjonijiet korporattivi f’isem l-emittent. Is-CSD emittent izomm il-kontijiet fil-kotba tiegħu f’isem is-CSDs investituri għat-trasferiment ta’ titoli lis-CSDs emittenti; |
— |
“CSD emittent tekniku” tfisser CSD investitur li jżomm titoli ma’ CSD emittent li ma jipparteċipax fit-T2S u li huwa meqjus bħala CSD emittent għall-funzjonament tat-T2S fir-rigward ta’ dawn it-titoli; |
— |
“ishma ta’ fond ta’ investiment” tfisser porzjonijiet ta’ proprjetà fl-assi netti ta’ fond ta’ investiment li jirċevuhom l-investituri għall-investimenti tal-kapital li jagħmlu. |
I. Dettalji dwar l-implimentazzjoni għall-kriterju numru 1 għall-aċċess ta’ CSD
Sabiex jirċievi valutazzjoni pożittiva fil-konfront ta’ dan il-kriterju:
(a) |
għal CSD li jinsab f’pajjiż taż-Żona Ekonomika Ewropea (ŻEE), is-CSD iridikun inkluż fil-lista ta’ sistemi indikati miżmuma skont l-Artikolu 10 tad-Direttiva 98/26/KE; u |
(b) |
għal CSD li tinsab f’pajiż li mhuwiex fiż-ŻEE, għandha tiġi ppreżentata opinjoni legali, kif aġġornata minn żmien għal żmien meta jkun hemm bidliet materjali li jistgħu jkollhom impatt fuq l-opinjoni legali jew fejn mitlub mill-Bord tal-Programm T2S, minn impriża approvata mill-Bord tal-Programm T2S, li tikkonferma illi s-CSD jopera taħt qafas legali u regolatorju ekwivalenti għal dak rilevanti fis-seħħ fl-Unjoni. |
II. Dettalji dwar l-implimentazzjoni tal-kriterju numru 2 għall-aċċess ta’ CSD
Fejn CSD ma jikkonformax fis-sħiħ mar-rakkomandazzjonijiet tas-SEBĊ/CESR, is-CSD rispettiv għandu jinforma lill-Bord tal-Programm T2S dwar id-dettalji relevanti u jagħti spjegazzjoni u evidenza fir-rigward fir-rigward ta’ dawk ir-rakkomandazzjonijiet tas-SEBĊ/CESR li ma jikkonformax magħhom. Is-CSD għandu jagħti wkoll lil-Bord tal-Programm T2S il-konklużjonijiet tal-awtoritajiet kompetenti rilevanti fir-rapport ta’ valutazzjoni. Il-konklużjonijiet tal-valutazzjoni għandhom jiġu pproċessati skont il-proċeduri tal-applikazzjoni għall-aċċess relevanti għas-servizzi T2S u konformità kontinwa mal-ħames kriterji għall-aċċess ta’ CSD. Fejn CSD b’aċċess għal servizzi T2S ma jibqax jikkonforma ma’ wieħed mill-ħames kriterji għall-aċċess ta’ CSD, il-Bord tal-Programm T2S għandu jniedi l-proċedura stipulata fil-kuntratti mas-CSDs.
CSD iwettaq dan il-kriterju għall-aċċess ta’ CSD fejn:
(a) |
għal CSD li tinsab f’pajjiż taż-ŻEE, l-awtoritajiet kompetenti relevanti jkunu taw lil dik is-CSD valutazzjoni pożittiva taħt ir-rakkomandazzjonijiet tas-SEBĊ/CESR; u |
(b) |
għal CSD li jinsab f’pajjiż li mhuwiex fiż-ŻEE, l-awtoritajiet kompetenti relevanti ikunu taw lil dik is-CSD valutazzjoni pożittiva taħt ir-rakkomandazzjonijiet tas-SEBĊ/CESR jew standards ekwivalenti, bħal ma huma l-istandards proprjetarji ta’ awtorità kompetenti relevanti jew ir-Rakkomandazzjonijiet tas-CPSS/tal-IOSCO (1). Fil-każ tal-aħħar, il-Bord tal-Programm T2S jew il-Kunsill Governattiv rispettivament għandu jkun mogħti evidenza illi s-CSD ikun ġie vvalutat fil-konfront ta’ standards ta’ livell u ta’ natura simili. |
Fejn il-valutazzjoni tal-awtoritajiet kompetenti relevanti jkun fiha informazzjoni kunfidenzjali, is-CSD għandu jagħti sommarju ġenerali jew il-konklużjoni tal-valutazzjoni biex juri l-livell ta’ konformità tiegħu.
III. Dettalji dwar l-implimentazzjoni tal-kriterju numru 3 għall-aċċess ta’ CSD
CSD b’aċċess għal servizzi T2S mhuwiex meħtieġ li jżomm il-kontijiet u l-bilanċi kollha tiegħu fit-T2S għal kull titolu/ISIN li joħroġ jew li għalih huwa jaġixxi bħala CSD emittent tekniku. Madankollu huwa għandu jagħmel titolu/ISIN disponibbli mingħajr kost żejjed, mingħajr dewmien, u b’kuntratt li ma jimponix kundizjonijiet li mhumiex raġjonevoli fuq talbiet mill-utenti tas-CSD investitur fit-T2S. Xi ishma f’fond ta’ investiment jistgħu ma jkunux awtomatikament disponibbli lis-CSD investitur li jiftaħ kont mas-CSD emittent minħabba restrizzjonijiet legali fuq it-tqassim transkonfinali applikabbli lill-emittenti tal-ishma f’fond ta’ investiment.
CSD emittent huwa mitlub jikkonforma mal-qafas regolatorju nazzjonali, iżda ma jistax jgħaddi l-kosts li jirriżultaw mill-applikazzjoni ta’ dan il-qafas lil CSDs oħrajn fit-T2S. Dan ir-rekwiżit jiżgura illi l-kosts tal-konformità mal-qafas regolatorju nazzjonali jibqgħu lokali u li jkun hemm ir-reċiproċità fost is-CSDs fit-T2S. Barra minn dan, dan ir-rekwiżit jippromwovi proċessi ta’ saldu armonizzati fit-T2S sa fejn possibbli.
CSD emittent huwa mitlub jikkonforma mal-qafas regolatorju nazzjonali, iżda għandu jappoġġja lil CSD investitur li jitlob aċċess u ma jistax japplika kost ta’ saldu addizzjonali. Kull dewmien ikkawżat minn konformità mal-qafas regolatorju nazzjonali għandu japplika b’mod ugwali lill-partijiet kollha.
Is-CSD investitur jista’ jitlob titolu/ISIN illi għadu mhuwiex disponibbli fit-T2S mingħand is-CSD emittent rispettiv jew is-CSD emittent tekniku. Malli jirċievi talba bħal din, is-CSD emittent jew is-CSD emittent tekniku jdaħħal id-data ta’ referenza kollha tat-titolu fit-T2S u jagħmilha aċċessibbli fil-qafas ta’ żmien definit fil-Manwal tal-Proċeduri Operattivi li jrid jiġi mogħti mill-Eurosistema lis-CSDs u lill-BĊi.
Sakemm is-CSD investitur ikun iffirma l-kundizzjonijiet kuntrattwali, is-CSD emittent jiftaħ, mingħajr dewmien żwjjed, tal-anqas kont tat-titoli wieħed għal titolu/ISIN speċifiku għas-CSD investiture. Iċ-ċaħda minn CSD emittent li jiftaħ kont tat-titoli u li jipprovdi lis-CSD investitur bl-aċċess għat-titoli tas-CSD emittent tikkostitwixxi non-konformità mal-kriterju numru 3 għall-aċċess ta’ CSD.
Is-CSD investitur għandu jirrapporta lill-Bord tal-Programm T2S kull każ ta’ non-konformità mal-kriterju numru 3 għall-aċċess ta’ CSD minn CSD emittent. Skont in-natura u l-okkorrenza ta’ non-konformità, il-Bord tal-Programm T2S jiddetermina jekk is-CSD emittent jurix nuqqas konsistenti li jikkonforma, f’liema każ tapplika l-proċedura stipulata fil-kuntrattu mas-CSDs, skont l-Artikolu 16 tal-Linja Gwida BĊE/2010/2.
IV. Dettalji dwar l-implimentazzjoni tal-kriterju numru 4 għall-aċċess ta’ CSD
Dan il-kriterju għall-aċċess ta’ CSD jikkonforma mal-Linja Gwida dwar l-Aċċess u l-Interoperabbiltà (2) li jgħid illi CSDs investituri għandhom ikollhom aċċess għal servizzi tas-CSD emittent abbażi tal-istess termini u kundizzjonijiet li taħthom jingħataw lil kull parteċipant standard ieħor tas-CSD emittent.
Sabiex CSD investitur jipprovdi servizzi ta’ saldu għal titoli maħruġin minn CSD emittent, is-CSD investitur għandu jipprovdi wkoll lill-parteċipanti tiegħu bis-servizzji ta’ kustodja bażiċi fir-rigward ta’ dawk it-titoli. It-T2S joffri l-parti ewlenija ta’ saldu ta’ flus kontanti u titoli fi flus tal-bank ċentrali, fejn is-servizzi ta’ kustodja bażiċi huma pprovduti barra t-T2S.
Is-CSD emittent għandu jikkonforma mal-Istandards tas-Subgrupp dwar l-Azzjonijiet Korporattivi tat-T2S (3) u l-istandards jew prattiċi tas-suq kollha relevanti tat-T2S.
Is-CSD investitur għandu jiġi ttrattat bħal kull klijent ieħor tas-CSD emittent. CSD emittent ma jistax jimponi xkiel tekniċi jew joffri kundizzjonijiet preferenzjali lil CSDs investituri biex jaċċessaw servizzi ta’ kustodja bażiċi.
V. Dettalji dwar l-implimentazzjoni tal-kriterju numru 5 għall-aċċess ta’ CSD
Għandhom jinżammu kundizzjonijiet ugwali bejn is-swieq tal-investimenti diretti u dawk indiretti fl-implimentazzjoni tal-kriterju numru 5 għall-aċċess ta’ CSD. CSD minn suq tal-investmenti diretti jista’, fil-prinċipju, jagħmel migrazzjoni għat-T2S jew billi jintegra t-titoli kollha tiegħu fit-T2S jew billi juża l-mudell imtarraġ li jħalli l-kontijiet tal-partijiet tekniċi fit-T2S u l-kontijiet tal-investitur aħħari fil-pjattaforma tas-CSD lokali. Il-kriterju numru 5 għall-aċċess ta’ CSD huwa mwettaq bis-sħiħ fejn suq tal-investimenti diretti jagħżel li jintegra bis-sħiħ u jżomm il-kontijiet tat-titoli kollha tiegħu fit-T2S. Madankollu, fejn suq tal-investimenti diretti jagħżel li jemigra għat-T2S permezz tal-mudell imtarraġ, il-valutazzjoni tal-Bord tal-Programm T2S dwar il-proċessi assoċjati ġewwa u barra mit-T2S, li jikkunsidraw l-essenza tal-kriterju numru 5 għall-aċċess ta’ CSD, għandha tindika jekk is-suq jeħtieġx li jitlob deroga mill-kriterju numru 5 għall-aċċess ta’ CSD.
(1) Rakkomandazzjonijiet tal-Kumitat dwar is-Sistemi ta’ Pagament u Saldu (CPSS)/Kumitat Tekniku tal-Organizzazzjoni Internazzjonali tal-Kummissjonijiet tat-Titoli (IOSCO) għas-sistemi ta’ saldu tat-titoli, disponibbli fuq il-websajt tal-Bank għall-Ħlasijiet Internazzjonali fuq www.bis.org
(2) Il-Linja Gwida dwar l-Aċċess u l-Interoperabbiltà tat-28 ta’ Ġunju 2007, li tiddefinixxi l-prinċipji u l-kundizzjonijiet għall-aċċessu l-interoperabbiltà skont il-Kodiċi ta’ Kondotta, disponibbli fuq is-sit elettroniku tal-Kummissjoni Ewropea fuq http://ec.europa.eu.
(3) Disponibbli fis-sit elettroniku tal-BĊE fuq www.ecb.europa.eu.