(1)

Skont l-Artikolu 5(1) tar-Regolament tal-Kummissjoni (KE) Nru 1121/2009 tad-29 ta’ Ottubru 2009 li jistabbilixxi regoli dettaljati għall-applikazzjoni tar-Regolament tal-Kunsill (KE) Nru 73/2009 fir-rigward tal-iskemi ta’ appoġġ għal bdiewa previsti fit-Titoli IV u V tiegħu (2), il-pagamenti tranżizzjonali tal-frott u l-ħxejjex msemmija fl-Artikolu 1(1)(g) ta’ dak ir-Regolament jistgħu jingħataw biss fl-erjas li kienu suġġetti għal applikazzjoni tal-għajnuna għal mill-inqas 0,3 ettaru. Permezz tal-ittri tat-18 ta’ Frar 2010 u l-1 ta’ Marzu 2010, Ċipru għarraf lill-Kummissjoni dwar id-daqs speċifiku tal-impriżi agrikoli u l-istruttura tal-applikazzjonijiet għall-għajnuna għall-pagamenti tranżizzjonali tal-frott u l-ħxejjex mogħtija għall-frott taċ-ċitru. B’riżultat ta’ dawn, l-erja minima li għaliha se jingħata dan il-pagament trid tonqos għal 0,1 ettaru.

(2)

L-Artikolu 124(1) tar-Regolament (KE) Nru 73/2009 jistipula ir-regoli li jiffissaw l-erja agrikola tal-Istati Membri l-ġodda taħt l-iskema ta’ pagament uniku pprovduta fl-Artikolu 122 ta’ dak ir-Regolament.

(3)

F’konformità mal-Artikolu 89 tar-Regolament (KE) Nru 1121/2009, l-erja agrikola għall-Polonja u l-erja agrikola għas-Slovakkja qegħdin stipulati fl-Anness VIII għal dak ir-Regolament.

(4)

Permezz tal-ittra tal-1 ta’ Diċembru 2009, il-Polonja għarrfet lill-Kummissjoni li għamlet reviżjoni tal-erja agrikola utilizzata li hija eliġibbli għall-iskema ta’ pagament uniku skont l-erja, kif jissemma fl-Artikolu 124(1) tar-Regolament (KE) Nru 73/2009. Ir-reviżjoni saret wara l-aġġornament tas-sistema ta’ identifikazzjoni tal-ħbula agrikoli msemmija fl-Artikolu 17 tar-Regolament (KE) Nru 73/2009, li wriet li l-parti tal-erja agrikola utilizzata li hija miżmuma f’kundizzjoni agrikola tajba fit-30 ta’ Ġunju 2003 kienet iżgħar minn kemm kienet stmata qabel. L-erja agrikola għall-iskema ta’ pagament uniku skont l-erja għalhekk għandha tonqos għal 14 137 000 ettaru.

(5)

Permezz tal-ittra tal-4 ta’ Jannar 2010, is-Slovakkja għarrfet lill-Kummissjoni li għamlet reviżjoni tal-erja agrikola utilizzata li hija eliġibbli għall-iskema ta’ pagament uniku skont l-erja, kif jissemma fl-Artikolu 124(1) tar-Regolament (KE) Nru 73/2009. Ir-reviżjoni hija konsegwenza tal-esperjenza miksuba fis-snin riċenti mill-verifikazzjoni tal-kundizzjonijiet ta’ eliġibbiltà għall-pagament uniku skont l-erja taħt l-iskema ta’ pagament uniku skont l-erja, li wriet li l-parti tal-erja agrikola utilizzata li hija miżmuma f’kundizzjoni agrikola tajba fit-30 ta’ Ġunju 2003 kienet iżgħar minn kemm kienet stmata qabel. L-erja agrikola għall-iskema ta’ pagament uniku skont l-erja għalhekk għandha tonqos għal 1 865 000 ettaru.

(6)

Ir-Regolament (KE) Nru 1121/2009 għandu għalhekk jiġi emendat skont dan.

(7)

L-emenda proposta permezz ta’ dan ir-Regolament għandha tapplika għall-perjodi tal-primjum li jibdew mill-1 ta’ Jannar 2010.

(8)

Il-miżuri pprovduti f’dan ir-Regolament huma skont l-opinjoni tal-Kumitat ta’ Ġestjoni għall-Pagamenti Diretti,

(1)

Fl-Artikolu 5(1), it-tielet subparagrafu għandu jinbidel b’dan li ġej:

“Fil-każ tal-Greċja u Ċipru, il-pagamenti tranżizzjonali għall-frott u l-ħxejjex imsemmijin fl-Artikolu 1(1)(g) għandhom jingħataw biss għall-erjas, għal kull tip ta’ għalla, li kienu s-suġġett ta’ applikazzjoni għal talanqas 0.1 ettaru, fejn kull raba’ agrikolu kkoltivat jaqbeż id-daqs minimu stabbilit mill-Istat Membru fi ħdan il-limitu provdut bl-Artikolu 13(9) tar-Regolament (KE) Nru 1122/2009.”

(2)

L-Anness VIII huwa emendat kif ġej: