(1)

Permezz ta' ittra tas-27 ta' Marzu 2008, l-awtoritajiet Pollakki nnotifikaw pjan ta' ristrutturar għal PZL Hydral S.A. (“PZL Hydral ”). Il-Kummissjoni talbet tagħrif addizzjonali permezz ta' ittra tas-6 ta' Mejju 2008. Permezz ta' ittra tal-4 ta' Ġunju 2008, l-awtoritajiet Pollakki talbu li d-data ta' għeluq għat-tweġiba tiġi estiża sas-27 ta' Ġunju 2008; il-Kummissjoni qablet permezz ta' ittra tal-10 ta' Ġunju 2008. L-awtoritajiet Pollakki pprovdew tagħrif addizzjonali dwar il-pjan ta' ristrutturar permezz ta' ittra tas-7 ta' Lulju 2008.

(2)

Il-proċeduri fl-Artikolu 108(2) tat-Trattat dwar il-Funzjonament tal-Unjoni Ewropea (il-proċedura ta' investigazzjoni formali) nfetħu fl-10 ta' Settembru 2008. Il-proċedura ta' investigazzjoni formali ġiet sussegwentement estiża b’deċiżjoni adottata fit-12 ta' Novembru 2008.

(3)

Il-Polonja ssottomettiet l-osservazzjonijiet tagħha fl-14 ta' Ottubru u fit-22 ta' Diċembru 2008 u tagħrif addizzjonali fis-7 ta' April 2009. Il-Kummissjoni ma rċeviet l-ebda kumment mingħand partijiet terzi.

(4)

Il-laqgħat mal-awtoritajiet Pollakki saru fis-27 ta' April u fl-14 ta' Ottubru 2009 u fit-12 ta' Frar 2010. Fit-18 ta' Diċembru 2009 il-Kummissjoni talbet għal aktar tagħrif. Saru bosta skambji ta' e-mails bejn il-Kummissjoni u l-awtoritajiet Pollakki u ġie sottomess tagħrif addizzjonali mill-awtoritajiet Pollakki permezz tal-e-mail fid-dati li ġejjin: 20 ta' Ottubru 2009, 23 ta' Novembru 2009, 15 ta' Diċembru 2009, 13 ta' Jannar 2010, 16 ta' Jannar 2010, 9 ta' Frar 2010, 10 ta' Frar 2010, 26 ta' Frar 2010, 1 ta' Marzu 2010, 3 ta' Marzu 2010, 4 ta' Marzu 2010, 19 ta' Marzu 2010, 5 ta' Mejju 2010, 12 ta' Mejju 2010, 20 ta' Mejju 2010, 28 ta' Mejju 2010, 3 ta' Ġunju 2010, 4 ta' Ġunju 2010, 7 ta' Ġunju 2010, 8 ta' Ġunju 2010, 9 ta' Ġunju 2010, 17 ta' Ġunju 2010, 23 ta' Ġunju 2010, 24 ta' Ġunju 2010, 28 ta' Ġunju 2010, 7 ta' Lulju 2010, 8 ta' Lulju 2010, 9 ta' Lulju 2010, 12 ta' Lulju 2010 u 13 ta' Lulju 2010.

(5)

PZL Hydral ġiet stabbilita fl-1946 bħala intrapriża tal-Istat. Issa hija kumpanija kbira li sal-2008 kienet tispeċjalizza fil-produzzjoni ta' prodotti idrawliċi industrijali ċivili u militari, id-disinn, il-manifattura u s-servizz ta' sistemi idromekkaniċi elettroniċi li jirregolaw il-karburant għall-magni tal-avjazzjoni ta' kull tip, sistemi ta' kontroll idrawliċi għall-inġenju tal-ajru u provvisti tal-enerġija idrawlika għall-ħelikopters. Sa mill-2008 PZL Hydral operat bħala l-kumpanija prinċipali ta' grupp u m’għadx għandha attivitajiet industrijali tagħha stess.

(6)

Fl-2003, l-Aġenzija għall-Iżvilupp Industrijali tal-Istat (“l-IDA”) kisbet 80,94 % tal-ishma f'PZL Hydarl (1 284 686 sehem) mit-Teżor. Fl-2005 saru aktar trasferimenti ta' ishma mit-Teżor għall-IDA (499 103 sehem), li żiedu l-pussess tal-ishma tal-IDA għal 87,39 %, fl-2007 (64 374 sehem), li żiedu l-pussess tal-ishma għal 90,54 %, u fit-12 ta' Jannar 2010 (38 399 sehem), li żiedu l-pussess tal-ishma għal 92,42 %. Kull waħda minn dawn it-tranżazzjonijiet saret bil-prezz simboliku ta' PLN 1. Mit-12 ta' Jannar 2010 l-IDA żammet 18 886 562 sehem b’valur nominali ta' PLN 18 865 620. Il-kumplament tal-ishma (7,58 %) b’valur nominali ta' 1 547 210, bħalissa huma miżmuma mill-impjegati.

(7)

Fl-2007 PZL Hydral kienet tikkontrolla s-sussidjarji li ġejjin: Zaklad Odlewniczy “Hydral” Sp. z o.o., li l-attività prinċipali tagħha hija l-ikkastjar, il-funderija, l-ipproċessar u t-trattament ta' partijiet tal-azzar; Zaklad Cieplowniczy Term “Hydral” Sp. z o.o., li tipproduċi u tbiegħ l-enerġija termali; Przedsiębiorstwo Usługowo Handlowe Zakład Produkcji Hydrauliki “Hydral” Sp. z o.o., li tipproduċi valvijiet u distributuri idrawliċi, tipproċessa tagħmir tal-metall u tipprovdi servizzi ta' tiswija għal makkinarju u tagħmir idrawliku, u PZL Wrocław Sp. z o.o. (“PZL Wrocław”). Barra minn hekk, PZL Hydral kienet tikkontrolla żewġ kumpaniji oħra, li issa jinsabu fi proċess ta' likwidazzjoni. Fl-aħar tal-2006, il-grupp kollu kemm hu kellu 795 impjegat.

(8)

PZL Wroclaw twaqqfet bħala sussidjarja kollha kemm hi ta' PZL Hydral fl-2004 sabiex tinħoloq kumpanija operattiva li tieħu f’idejha l-fergħa operattiva ta' PZL Hydral, sabiex din tal-aħħar tkun tista’ taħdem bħala kumpanija prinċipali u tmexxi l-proċess ta' ristrutturar tal-grupp PZL Hydral.

(9)

Parti mill-assi ta' PZL Wroclaw ġew trasferiti minn PZL Hydral għal PZL Wroclaw jew permezz ta' kontribuzzjoni mhux finanzjarja għall-kapital ta' PZL Wroclaw jew bejgħ skont il-valur tal-kotba fil-kotba ta' PZL Hydral sa mill-2004, kif jidher fit-Tabella 1.

Tabella 1

It-trasferiment ta' assi permezz ta' kontribuzzjoni mhux finanzjarja jew bejgħ (f’PLN)

(10)

L-assi fissi tanġibbli li PZL Wroclaw kisbet minn PZL Hydral ġew trasferiti jew bħala kontribuzzjoni mhux finanzjarja lill-kapital ta' PZL Wroclaw jew permezz ta' bejgħ, kif deskritt fit-Tabella 2. Fiż-żewġ każijiet il-valur tat-tranżazzjoni kien ibbażat fuq il-valutazzjoni ta' espert indipendenti. Meta dawn l-assi fissi ġew trasferiti diġà kienu soġġetti għal ipoteki fuq il-proprjetà immobbli favur il-kredituri pubbliċi li ġejjin: l-Uffiċċju tas-Sigurtà Soċjali, l-Uffiċċju tat-Taxxa tar-Reġjun ta' Lower Silesia u l-Kunsill tal-Belt ta' Wroclaw f’ammont ta' PLN 142,558 miljun.

Tabella 2

Trasferiment ta' proprjetà immobbli (f'PLN)

(11)

Fil-31 ta' Diċembru 2007, PZL Hydral trasferiet lil PZL Wroclaw fondi b'valur nominali ta' PLN 918 900 permezz ta' kontribuzzjoni għall-kapital ta' PZL Wroclaw.

(12)

Il-bqija tal-assi trasferiti minn PZL Hydral għal PZL Wroclaw bejn is-17 ta' Jannar 2006 u s-27 ta' April 2010 ġew mibjugħa bil-valur skont il-kotba tagħhom u kienu jikkonsistu f’diversi trasferimenti ta' assi taħt kostruzzjoni li kienu ħielsa minn kwalunkwe pleġġ jew ipoteka.

(13)

Il-valur globali tal-assi trasferiti minn PZL Hydral għal PZL Wroclaw bejn l-2004 u l-2010 kien jammonta għal PLN 44 708 791,02.

(14)

559 impjegat ġew trasferiti minn PZL Hydral għal PZL Wroclaw fl-2008 u 37 ġew trasferiti fl-2009.

(15)

PZL Wroclaw tipproduċi komponenti għall-inġenji tal-ajru li jintużaw mill-forzi armati Pollakki (sal-aħħar tal-2007 din il-produzzjoni kienet issir minn PZL Hydral) u tipprovdi servizzi li jinkludu l-manutenzjoni u t-tiswija ta' tagħmir użat mill-armata Pollakka. Il-prodotti militari jiksbu ċertifikazzjoni speċifika għat-tip ta' prodott skont ir-rekwiżiti tekniċi tal-forzi armati Pollakki. F’kull stadju tiġi pprovduta dokumentazzjoni individwali u dawn il-prodotti (u s-servizzi ta' manutenzjoni relatati magħhom) jiġu sorveljati minn rappreżentant militari residenti.

(16)

PZL Wroclaw bħalissa topera abbażi tal-Permess Nru B-007/2007 li nħareġ mill-Ministru għall-Affarijiet Interni u l-Amministrazzjoni fis-17 ta' Jannar 2007 għall-prestazzjoni tal-attivitajiet kummerċjali fil-qasam tal-:

(17)

PZL Wroclaw għandha ċ-ċertifikati li ġejjin:

(18)

L-awtoritajiet Pollakki infurmaw lill-Kummissjoni li l-linja ta' produzzjoni ta' PZL Hydral (u issa PZL Wroclaw) hija parti importanti mill-pjan ta' żvilupp ekonomiku introdott mill-Gvern Pollak fl-1995 għall-1996-2000 u fl-2000 għall-2001-2006.

(19)

Barra minn hekk, qed issir referenza espliċita għal PZL Hydral jew għall-attivitajiet kummerċjali tagħha f’numru ta' miżuri ta' implimentazzjoni u linji gwida governattivi għall-pjan ta' żvilupp ekonomiku, bħal per eżempju:

(20)

Il-Kumpaniji li jinsabu f’listi ta' dan it-tip huma meħtieġa jipprovdu rapporti annwali ddettaljati dwar il-kapaċità tal-produzzjoni għad-difiża tagħhom (kwantitajiet, profil, ċifri) sabiex jippermettu lill-Ministeru li jiżgura li l-kompiti militari qed jitwettqu.

(21)

L-awtoritajiet Pollakki infurmaw lill-Kummissjoni li l-permessi u ċ-ċertifikati rilevanti (punti 16 u 17) jippermettu l-prodotti u s-servizzi ta' kwalità speċifika li jiġu pprovduti lil konsumaturi speċjali (intrapriżi ta' sinifikat partikolari għad-difiża tal-Istat u l-Ministeru tad-Difiża). PZL Wroclaw (PZL Hyrdal fil-passat) mhux biss tipprovdi komponenti ta' sistemi idrawliċi, sistemi li jaħdmu bil-karburant u sistemi ta' kontroll; it-tiswijiet għas-sub-immuntar installat huma kruċjali għall-funzjonament tal-inġenju tal-ajru operat mill-forzi armati Pollakki (W-3, Mi-2, M28 Bryza u PZL 130 Orlik); l-awtoritajiet Pollakki enfasizzaw ukoll li l-W-3 u l-Mi-2 huma l-ħelikopters prinċipali użati mill-armata Pollakka.

(22)

L-oġġetti prodotti minn PZL Hydral għall-użu tal-forzi armati għandhom il-kodiċi NATO korrispondenti skont il-Ftehim ta' Standardizzazzjoni tan-NATO u l-kumpanija stess għandha kodiċi tan-NATO.

(23)

Kif spjegat hawn fuq fil-punt 9 et seq., minn Diċembru tal-2004 PZL Hydral ittrasferiet assi lil PZL Wroclaw. L-assi trasferiti fit-30 ta' Diċembru tal-2007 biss (proprjetà immobbli) kienu soġġetti għal ipoteki favur kredituri pubbliċi.

(24)

L-awtoritajiet Pollakki kkonfermaw li minn meta bdiet topera, PZL Wroclaw issaldat l-obbligazzjonijiet kollha tagħha fil-konfront ta' kredituri pubbliċi fil-ħin, inklużi l-kontribuzzjonijiet tas-sigurtà soċjali u t-taxxi għall-impjegati tagħha.

(25)

Fl-1998, PZL Hydral beda jkollha diffikultajiet fil-ħlas lura ta' obbligazzjonijiet kemm lill-kredituri privati kif ukoll dawk pubbliċi tagħha.

(26)

Fl-aħħar tal-1998, l-obbligazzjonijiet privati ta' PZL Hydral fil-konfront ta' banek u fornituri ammontaw għal PLN 90,4 miljun. Il-biċċa l-kbira ta' dawn id-djun kienu dovuti lil żewġ banek: Il-Bank […] (*1) u l-Bank […].

(27)

PZL Hydral kellha dovut lill-Bank […] PLN 54 miljun fl-aħħar tal-1998 u PLN 86,4 miljun sa Novembru tal-2006, meta ġie ffirmat ftehim ta' saldu, u t-talba tiegħu fl-aħħar ġiet imħallsa fl-2007. PZL Hydral kellha dovut lill-Bank […] PLN 23 miljun fl-aħħar tal-1998 u PLN 55,6 miljun sa Ottubru tal-2003, u t-talba tiegħu fl-aħħar ġiet imħallsa fl-2004.

Tabella 3

Bidliet fl-ammont totali dovut minn PZL Hydral lil […] (f'eluf ta' PLN)

Tabella 4

Bidliet fl-ammont totali dovut minn PZL Hydral lil […] (f’eluf ta' PLN)

(28)

Dawn il-banek privati kellhom titoli ta' sigurtà bħala garanzija ta' ħlas ta' self tal-ewwel grad (ara d-deskrizzjoni dettaljata fil-punti 32 u 34 t’hawn taħt) u setgħu faċilment jinfurzaw it-talbiet tagħhom abbażi ta' ordnijiet ta' infurzar tal-bank. Skont l-Att Bankarju tal-1997 (8), il-banek jistgħu joħorġu ordnijiet ta' infurzar abbażi tal-kontijiet tagħhom jew dokumenti oħra marbuta mat-tranżazzjonijiet bankarji. Ordni ta' infurzar ta' bank tista’ sservi bħala bażi għall-infurzar wara li l-qorti tkun żiedet klawżola ta' infurzar miegħu. Dan huwa mezz aktar malajr mill-każ għal kredituri oħra, li għandhom jagħmlu talba lill-qorti kompetenti qabel l-infurzar sabiex tingħata deċiżjoni. Minkejja dan, il-kredituri privati ma ħadu l-ebda azzjoni ta' infurzar furzata; fi kliem ieħor, ma talbux għal proċeduri ta' falliment biex jiġu istitwiti kontra PZL Hydral u lanqas ma ħadu azzjoni oħra sabiex jinfurzaw it-talbiet tagħhom kontra l-assi.

(29)

Meta PZL Hydral esperjenzat diffikultajiet fil-ħlas lura tad-djun tagħha fl-1998-2006, il-banek setgħu, skont il-Kodiċi Ċivili, talbuha imgħax legali b’rata stabbilita mill-Kabinett, kif jidher fit-Tabella 7. Iżda minflok imponew dan l-imgħax sistematikament, kultant imponew biss imgħax bir-rati murija fit-Tabella 5 u fit-Tabella 6.

Tabella 5

Rati tal-imgħax imposti mill-Bank […] (self USD skont il-LIBOR)

Tabella 6

Rati tal-imgħax imposti minn […] (self USD skont il-LIBOR)

Tabella 7

Rati tal-imgħax statutorji

(30)

L-awtoritajiet Pollakki jsostnu li dawn il-banek ħasbu li kienu se jirċievu qligħ ogħla kieku taw kontribut għall-proċess ta' ristrutturar ta' PZL Hydral. Huma segwew mill-qrib in-negozjati mal-ewwel kumpanija li wriet interess fix-xiri ta' PZL Wroclaw, jiġifieri […] (ara l-punt 57 et seq.). Il-banek wettqu monitoraġġ regolari tas-sitwazzjoni ekonomika ta' PZL Hydral abbażi tar-rapporti finanzjarji tagħha, żjarat fejn tinsab u analiżi tas-suq.

(31)

Il-bank […] fl-aħħar issalda l-obbligazzjonijiet tiegħu permezz ta' ftehim ta' saldu konkluż f’April tal-2003. Huwa ħassar PLN 51,6 miljun u aċċetta l-ħlas lura ta' PLN 4 miljun biss (7 %). It-tħassir li rriżulta mill-ftehim ta' saldu ddaħħal fil-kotba ta' PZL Hydral għas-sena finanzjarja tal-2004.

(32)

Il-Bank […] qabel li jsir il-ħlas abbażi tal-valutazzjoni ekonomika tiegħu stess minkejja li kellu ipoteki bi prijorità tal-ewwel grad. B’mod partikolari, il-bank iggarantixxa l-kreditu tiegħu billi stabbilixxa titoli ta' sigurtà bħala garanzija ta' ħlas ta' self ta' PLN 13,7 miljun fuq il-proprjetà immobbli, filwaqt li assenja d-drittijiet tal-liċenzja u dawk kummerċjali kollha taħt ftehim ta' liċenzja konkluż ma' […] dwar il-produzzjoni ta' tagħmir tal-arja kkundizzjonata għal valur ta' USD 1,2 miljun (madwar PLN 3 968 000) (9) , filwaqt li ttrasferixxa magni u tagħmir ipprovduti minn […] fil-ftehim tal-liċenzja għal valur ta' USD 2,4 miljun (madwar PLN 7 938 000) u assenja ammonti riċevibbli mill-bejgħ ta' tagħmir tal-arja kkundizzjonata għal valur ta' mill-inqas USD miljun kull sena (madwar PLN 26,5 miljun) (10).

(33)

F’Novembru tal-2006 il-Bank […] qabel fi ftehim ta' saldu sabiex iħassar PLN 86,4 miljun u aċċetta ħlas lura ta' PLN 11,5 miljun biss. B'kollox, 13 % tal-obbligazzjoni biss ġie eventwalment imħallas minn PZL Hydral. Il-bqija, jiġifieri PLN 74,9 miljun, ġie mħassar.

(34)

Il-Bank […] aċċetta dan l-ammont baxx minkejja l-fatt li kellu titoli ta' sigurtà bħala garanzija ta' ħlas ta' self tal-ewwel grad fuq l-aktar proprjetà immobbli sinifikanti li fuqha kienet tiddependi l-produzzjoni u li fiha kienu jinsabu l-istrutturi amministrattivi. Dawn it-titoli ta' sigurtà bħala garanzija ta' ħlas ta' self b’mod partikolari kienu jikkonsistu f’ipoteki tal-ewwel grad fuq żewġ proprjetajiet għal ammont totali ta' PLN 19,75 miljun, pleġġ tal-ewwel grad fuq linja teknoloġika għall-produzzjoni ta' kompressuri f’ammont ta' PLN 20 miljun, assenjazzjoni ta' riċevibbli tal-ewwel grad skont ftehim tal-bejgħ konklużi għall-kompressuri b'valur ta' PLN 20 miljun, pleġġ irreġistrata tal-ewwel grad fuq makkinarju u tagħmir b'valur totali ta' PLN 2,65 miljun, PLN 2,4 miljun, PLN 0,56 miljun u PLN 1,1 miljun rispettivament. Barra minn hekk, in-natura tat-titoli ta' sigurtà bħala garanzija ta' ħlas ta' self tippermetti lil kwalunkwe xerrej potenzjali sabiex ikompli l-produzzjoni wara x-xiri; ikun ukoll possibbli li l-magni jiġu trasportati jew sħaħ jew bħala sub-immuntar mingħajr ma jiżżarmaw, jekk xi xerrej potenzjali jiddeċiedi li jċaqlaqhom.

(35)

Wara l-ftehim mal-banek, inħareġ it-titoli ta' sigurtà bħala garanzija ta' ħlas ta' self fuq l-assi fissi. B’riżultat ta' dan, il-pożizzjoni tal-kredituri pubbliċi fir-rigward ta' dawn it-titoli ta' sigurtà bħala garanzija ta' ħlas ta' self tjiebet, jiġifieri rċevew klassifikazzjoni ipotekarja ogħla (11).

(36)

Fl-1998, l-obbligazzjonijiet tal-kumpanija fil-konfront ta' kredituri pubbliċi bbażati fuq talbiet li jirriżultaw mil-liġi pubblika (jiġifieri talbiet mill-Uffiċċju tal-Assigurazzjoni Soċjali, l-Uffiċċju Reġjonali tat-Taxxa ta' Lower Silesia, l-Uffiċċju tat-Taxxa ta' Wroclaw Psie Pole, l-Uffiċċju Reġjonali ta' Lower Silesia, il-Kunsill tal-Belt ta' Wroclow, il-Fond tal-Istat għar-Rijabilitazzjoni tal-Persuni b’Diżabilità) ammontaw għal PLN 29 miljun. Barra minn hekk, il-Ministeru tal-Finanzi kellu talbiet taħt id-dritt ċivili ta' PLN 9,4 miljun. Dawn l-obbligazzjonijiet għal kredituri pubbliċi individwali żviluppaw kif jidher fit-Tabelli 8, 9, 10, 11, 12, 13 u 14.

Tabella 8

Obbligazzjonijiet ta' PZL Hydral fil-konfront tal-Uffiċċju tal-Assigurazzjoni Soċjali (f’eluf ta' PLN)

Tabella 9

Obbligazzjonijiet ta' PZL Hydral fil-konfront tal-Uffiċċju tat-Taxxa Reġjonali ta' Lower Silesia (f’eluf ta' PLN)

Tabella 10

Obbligazzjonijiet ta' PZL Hydral fil-konfront tal-Uffiċċju tat-Taxxa ta' Wroclaw Psie Pole (f’eluf ta' PLN)

Tabella 11

Obbligazzjonijiet ta' PZL Hydral fil-konfront tal-Kunsill tal-Belt ta' Wroclaw (f’eluf ta' PLN)

Tabella 12

Obbligazzjonijiet ta' PZL Hydral fil-konfront tal-Uffiċċju Reġjonali ta' Lower Silesia (f’eluf ta' PLN)

Tabella 13

Obbligazzjonijiet ta' PZL Hydral fil-konfront tal-Fond tal-Istat għar-Rijabilitazzjoni tal-Persuni b'Diżabilità (f'eluf ta' PLN)

Tabella 14

Obbligazzjonijiet ta' PZL Hydral fil-konfront tal-Ministeru tal-Finanzi (f’eluf ta' PLN)

(37)

Il-kredituri pubbliċi talbu r-rati tal-imgħax skont l-arretrati li jidhru fit-Tabella 15. Huwa importanti li wieħed josserva li t-Tabelli 8 sa 14 iqisu l-ħlasijiet lura parzjali ta' somom u juru l-livell fi tmiem is-sena; b'hekk, l-imgħax dovut fi kwalunkwe sena mhuwiex marbut direttament mal-kapital, li jista’ jiċċaqlaq.

Tabella 15

Imgħax fuq l-arretrati tat-taxxa  (12)

(38)

Minbarra li talbu l-imgħax approrprjat fuq l-arretrati tat-taxxa, l-Uffiċċju tas-Sigurtà Soċjali, l-Uffiċċju tat-Taxxa tar-Reġjun ta' Lower Silesia, l-Uffiċċju tat-Taxxa ta' Wroclaw Psie Pole, il-Kunsill tal-Belt ta' Wroclaw u l-Uffiċċju Reġjonali ta' Lower Silesia ipprovdew garanzija tat-talbiet tagħhom fil-konfront ta' PZL Hydral billi rreġistraw ipoteki fuq l-assi immobbli tagħha. It-Tabelli 16, 17, 18, 19 u 20 juru bidliet fl-ipoteki fuq l-assi ta' PZL Hyral li huma miżmuma minn dawn il-kredituri pubbliċi.

Tabella 16

Titoli ta' sigurtà bħala garanzija ta' ħlas ta' self fuq l-assi ta' PZL Hydral miżmuma mill-Uffiċċju tas-Sigurtà Soċjali

Tabella 17

Titoli ta' sigurtà bħala garanzija ta' ħlas ta' self fuq l-assi ta' PZL Hydral miżmuma mill-Uffiċċju tat-Taxxa tar-Reġjun ta' Lower Silesia

Tabella 18

Titoli ta' sigurtà bħala garanzija ta' ħlas ta' self fuq l-assi ta' PZL Hydral miżmuma mill-Uffiċċju tat-Taxxa ta' Wroclaw Psie Pole

Tabella 19

Titoli ta' sigurtà bħala garanzija ta' ħlas ta' self fuq l-assi ta' PZL Hydral miżmuma mill-Kunsill tal-Belt ta' Wroclaw

Tabella 20

Titoli ta' sigurtà bħala garanzija ta' ħlas ta' self fuq l-assi ta' PZL Hydral miżmuma mill-Uffiċċju Reġjonali ta' Lower Silesia

(39)

L-awtoritajiet Pollakki nnutaw ukoll li l-kredituri pubbliċi kienu kkunsidraw iż-żieda konsiderevoli fil-valur tal-proprjetà immobbli industrijali fi Wroclaw mill-2003 sal-2008. Il-prezzijiet tal-proprjetà immobbli żdiedu b’100 % globalment u l-valur tal-proprjetà immobbli ta' PZL Hydral żdied bi 300 %. Il-kredituri pubbliċi b’ipoteki fuq l-assi ta' PZL Hydral b’hekk esperjenzaw żieda de facto fil-valur tat-titoli ta' sigurtà tagħhom bħala garanzija ta' ħlas ta' self.

(40)

L-awtoritajiet Pollakki infurmaw lill-Kummissjoni li l-Fond tal-Istat għar-Rijabilitazzjoni tal-Persuni b’Diżabilità u l-Ministeru tal-Finanzi ma kellhom l-ebda titolu ta' sigurtà bħala garanzija ta' ħlas ta' self (ipoteki) fuq l-assi ta' PZL Hydral. Madankollu, il-Ministeru tal-Finanzi inforza parti mit-talbiet tiegħu permezz ta' ftehim ma' PZL Hydral konkluż fl-20 ta' Mejju 2002, li taħtu PZL Hydral kellha tħallas lura parti sinifikanti tal-obbligazzjonijiet tagħha sal-aħħar tal-2002, kif jidher fit-Tabella 14.

(41)

Skont l-awtoritajiet Pollakki, il-kredituri pubbliċi – kuntrarjament għall-kredituri privati – ħadu azzjoni ta' infurzar furzata permezz ta' uffiċjal tal-infurzar tal-qorti. Bejn l-1998 u l-2007, l-Uffiċċju tas-Sigurtà Soċjali ħareġ titoli tal-infurzar għal ammont ta' PLN 119,95 miljun, l-Uffiċċju tat-Taxxa tar-Reġjun ta' Lower Silesia għal ammont ta' PLN 43,8 miljun u l-Fond tal-Istat għar-Rijabilitazzjoni tal-Persuni b’Diżabilità għal ammont ta' PLN 2,1 miljun, iżda l-ammont miksub fil-verità mill-infurzar ma laħaqx il-livell tal-obbligazzjonijiet indikati fit-titoli tal-infurzar. L-awtoritajiet Pollakki enfasizzaw li għażliet alternattivi, bħat-teħid tal-pussess tal-assi, ma kinux meqjusa raġonevoli mill-uffiċjal tal-infurzar tal-qorti biex jiġu esegwiti u ma kellhom l-ebda sens ekonomiku. Kredituri pubbliċi oħrajn ma ħadu l-ebda azzjoni ta' infurzar iżda huma osservaw il-proċess ta' privatizzazzjoni u ristrutturar li, fil-fehma tagħhom, kien se jipprovdilhom qligħ ogħla mill-attwazzjoni diretta tat-talbiet tagħhom.

Tabella 21

Sommarju tal-azzjoni ta' infurzar tal-kreditur pubbliku fil-konfront ta' PZL Hydral (1997-2009)

(42)

Bejn l-1998 u l-2009, tħallsu lura obbligazzjonijiet pubbliċi ta' PLN 87,846 miljun (26 %).

(43)

Kien hemm żieda konsiderevoli fil-ħlas lura tal-obbligazzjonijiet pubbliċi ta' PZL Hydral mill-2003.

(44)

It-Tabella 22 turi d-dejta finanzjarja ta' PZL Hydral għas-snin 1998-2009.

Tabella 22

Dejta magħżula mir-rapporti finanzjarji ta' PZL Hydral (f’eluf ta' PLN)

(45)

Mill-1998 sal-2008, PZL Hydral kellha ekwità pożittiva. Sa mill-2003, kellha ekwità negattiva u rreġistrat telf nett sistematiku sal-2007. Mill-2007 sal-2009, PZL Hydral għamlet profitt. Il-valur tal-assi ta' PZL Hydral naqas minn PLN 203,936 miljun fl-1998 għal PLN 76,986 miljun fl-2006. L-obbligazzjonijiet fit-tul żdiedu b’mod konsistenti mill-1998 sal-2001 u mill-2003 sal-2006, meta laħqu PLN 327,486 miljun.

(46)

Kif spjegat hawn fuq, mill-2008 ’l quddiem PZL Hydral kisbet id-dħul tagħha l-aktar mill-bejgħ ta' servizzi u ħażniet prodotti fi snin preċedenti u, sa ċertu punt limitat, mis-sussidjarji tagħha.

(47)

Fir-rigward tas-sitwazzjoni finanzjarja ta' PZL Wroclaw, la fl-2007 u fl-2008 u lanqas fl-2009 ma tilfet aktar minn 50 % tal-kapital tagħha u lanqas ma kienet tissodisfa r-rekwiżiti tal-eliġibbiltà għall-proċeduri ta' falliment skont il-liġi Pollakka. Id-dħul ta' PZL Wroclaw ammonta għal PLN 5,3 miljun fl-2006, PLN 23 miljun fl-2007 u PLN 60 miljun fl-2008. It-telf nett fl-2006 kien ta' PLN 1 miljun, filwaqt li fl-2007 il-profitt nett kien PLN 0,04 miljun, li żdied f’salt għal PLN 8,7 miljun fl-2008.

(48)

Skont ir-rapporti finanzjarji ta' PZL Wroclaw, il-valur tal-assi mhux kurrenti tagħha żdied minn PLN 4,8 miljun fl-2006 għal PLN 25,7 miljun fl-2007, PLN 27 miljun fl-2008 u PLN 29 miljun fl-2009. Skont l-Att tal-Baġit Pollakk, ir-riżorsi finanzjarji għax-xiri militari huma allokati kull sena mill-Ministeru tad-Difiża. Fl-2008 PZL Wroclaw irċeviet kuntratti għal u biegħet prodotti militari (eż. sistemi idrawliċi, komponenti pnewmatiċi għas-sistemi li jikkontrollaw il-karburant) għal ammont ta' […] u pprovdiet lill-Ministeru tad-Difiża servizzi ta' manutenzjoni li jiswew […], jiġifieri ammont globali ta' […].

(49)

L-awtoritajiet Pollakki jsostnu wkoll li, sat-tmiem tal-2008, is-suq li fih PZL Wroclaw kienet topera, jiġifieri s-suq tal-avjazzjoni u d-difiża, ma wera l-ebda sinjal li kien qed imajna.

(50)

Fl-2009, madankollu, PZL Wroclaw esperjenzat diffikultajiet finanzjarji bħala riżultat ta' tnaqqis sostanzjali fl-ordnijiet mill-Ministeru tad-Difiża minħabba l-kriżi ekonomika. Fl-2009, il-valur ta' oġġetti militari ordnati u mibjugħa (eż. sistemi idrawliċi, komponenti pnewmatiċi għas-sistemi li jikkontrollaw il-karburant) naqsu għal […], u l-valur tas-servizzi ta' manutenzjoni pprovduti naqsu għal […]. B’riżultat ta' dan, il-bejgħ tal-oġġetti militari naqas b’[…]% meta mqabbel mal-2008. Konsegwentement, PZL Wroclaw irreġistrat telf nett ta' PLN 8,3 miljun fl-2009. Id-dħul tagħha naqas minn PLN 60 miljun fl-2008 għal PLN 41 miljun fl-2009.

(51)

L-obbligazzjonijiet tal-kumpanija żdiedu minn PLN 31 miljun fl-2008 għal PLN 35 miljun fl-2009. L-obbligazzjonijiet ammontaw għal PLN 7 miljun fl-2006 u għal PLN 18,4 miljun fl-2007.

(52)

L-awtoritajiet Pollakki infurmaw lill-Kummissjoni li skont il-liġi Pollakka (13) PZL Wroclaw kienet għada mhijiex eliġibbli għal proċeduri ta' falliment. Madankollu, jekk ma jirnexxix il-proċess ta' ristrutturar li għaddej bħalissa tal-Grupp Hydral ibbażat fuq is-suppożizzjonijiet li jappoġġjaw il-pjan ta' ristrutturar għall-obbligazzjonijiet taħt il-liġi pubblika u l-ftehim qafas mal-investitur, PZL Wroclaw ikollha tippreżenta applikazzjoni għal falliment.

(53)

Il-pjan ta' ristrutturar għal PZL Hydral u PZL Wroclaw (“il-Pjan”) għandu jitqies fil-kuntest tal-isforzi tal-Polonja biex tipprivatizza l-partijiet vijabbli tan-negozju, b'mod partikolari fil-qasam tal-avjazzjoni u d-difiża.

(54)

Fl-1998 grupp privat konsultattiv, Business Management Finance S.A, ipprepara strateġija għar-ristrutturar ta' PZL Hydral. L-istrateġija kienet tinkludi dijanjosi tal-istatus finanzjarju kurrenti ta' PZL Hydral flimkien ma' analiżi tal-ispejjeż u l-attivitajiet ta' ristrutturar. Hija tindika li jkun raġonevoli li jiġu iżolati xi wħud mill-assi ta' PZL Hydral u jinbiegħu lil investitur privat sabiex jiġu ristrutturati l-obbligazzjonijiet ta' PZL Hydral.

(55)

L-azzjonisti ta' PZL Hydral u, wara l-inkorporazzjoni tagħha fl-2004, ta' PZL Wroclaw, iltaqgħu regolarment sabiex jikkunsidraw il-privatizzazzjoni tal-grupp jew parti minnu (PZL Wroclaw) u nnegozjaw it-termini tat-tranżazzjoni mal-partijiet interessati.

(56)

Konsegwentement, l-awtoritajiet Pollakki daħlu f’negozjati ma' investituri potenzjali, li ġew segwiti mill-qrib minn kredituri privati (għall-ewwel attentat ta' privatizzazzjoni biss ma' […]) u minn kredituri pubbliċi. In-negozjati saru mal-kumpaniji li ġejjin: […] (2002-2006), […] (2007-2008), […] (2008) u, mill-2009, mal-investitur kurrenti, […] (“[…]” jew “l-investitur”).

(57)

Fl-2002, bħala riżultat ta' kooperazzjoni industrijali, it-taħditiet dwar il-bejgħ ta' PZL Hydral bdew ma' […], produttur globali ta' komponenti tal-avjazzjoni bi dħul annwali fl-2009 ta' […]. Fil-25 ta' Novembru 2002 […] u PZL Hydral ikkonkludew ftehim dwar in-nuqqas ta' divulgazzjoni ta' informazzjoni. Fit-22 ta' April 2003 […] bagħat ittra ta' intenzjoni lil PZL Hydral li fiha wera interess fix-xiri potenzjali tal-ishma ta' PZL Hydral u r-rieda tiegħu li jwettaq l-istudju ta' diliġenza dovuta. L-istudju ta' diliġenza dovuta twettaq f’Mejju tal-2003. F’April tal-2005 […] estenda l-ambitu tad-diliġenza dovuta fid-dawl tax-xiri potenzjali ta' PZL Wroclaw, li kienet ġiet inkorporata fl-2004. F'Ġunju tal-2005, id-dokumentazzjoni ngħatat lil […]. Fit-tieni nofs tal-2005 u fl-ewwel nofs tal-2006, saru diversi laqgħat mar-rappreżentanti ta' […]. Madankollu, […] ma ħa l-ebda azzjoni biex titlesta t-tranżazzjoni sa minn Novembru tal-2006.

(58)

Skont l-awtoritajiet Pollakki, […] irtira min-negozjati għaliex ma nstabet l-ebda soluzzjoni għall-kwistjoni tad-dejn tal-kumpanija.

(59)

Waqt dawn in-negozjati, il-kredituri pubbliċi u privati ġew aġġornati regolarment, kultant kull ġimgħa, dwar il-progress tagħhom.

(60)

L-awtoritajiet Pollakki segwew strateġija ta' privatizzazzjoni ġdida, li ffukat fuq li tagħmel lil PZL Wroclaw negozju vijabbli li għandu jinbiegħ u fuq l-istralċ ta' PZL Hydral wara mar-rikavat tal-bejgħ ta' PZL Wroclaw u s-sussidjarji u l-assi l-oħra tagħha. Din l-istrateġija qablu dwarha l-IDA, PZL Hydral u l-kredituri pubbliċi ta' PZL Hydral u ġiet ifformalizzata bħala l-pjan ta' ristrutturar tal-2007-2010 (“il-Pjan”) fir-raba’ trimestru tal-2007.

(61)

Skont il-Pjan, il-kredituri pubbliċi ġew imħallsa lura mir-rikavat tal-bejgħ tal-assi ta' PZL Hydral, li jidhru hawn taħt: Zakład Ciepłowniczy “Term-Hydral” Sp. z o.o. - PLN 1 miljun, Zakład Produkcji Hydrauliki “Hydral” Sp. z o.o. - PLN 3 miljun. Il-bejgħ ta' PZL Wroclaw kellu jġib PLN 65,9 miljun (inkluż l-impjant tal-ikkastjar). Il-bejgħ tal-assi finanzjarji l-oħra kien mistenni li jwassal għal qligħ ta' PLN 0,5 miljun u assi ta' proprjetà immobbli magħruf bħala BBCenter ta' PLN 47,5 miljun, parkeġġ ta' PLN 2 miljun u impjant tal-enerġija (GSZ) ta' PLN 0,9 miljun. Il-Pjan b’hekk kien ibbażat fuq suppożizzjoni li l-bejgħ tal-assi kien se jiġġenera dħul totali ta' mill-inqas PLN 120,8 miljun.

(62)

Il-Pjan ipprovda wkoll injezzjoni ta' kapital ta' PLN 36 miljun biex jiggarantixxi l-ħlas lura ta' PLN 156,8 miljun lill-kredituri pubbliċi. Huwa antiċipa wkoll il-possibbiltà li l-IDA tagħti injezzjoni ta' kapital addizzjonali ta' PLN 77,4 miljun biex tħallas lura l-obbligazzjonijiet tal-Uffiċċju tas-Sigurtà Soċjali għas-snin 1996-1998.

(63)

Sussegwentement, f’Jannar tal-2007, PZL Wroclaw kisbet ċertifikati militari u permessi biex tikkummerċjalizza l-armi (ara l-punt 16). Matul l-2007 kisbet aktar assi, makkinarju, tagħmir u kompetenzi. Din l-akkwiżizzjoni kienet iffinanzjata minn self ta' PLN 12,5 miljun, li l-IDA tat lil PZL fl-24 ta' Mejju 2007 (“Is-self tal-2007”), u permezz ta' kontribuzzjoni mhux finanzjarja għall-kapital ta' PZL Wroclaw mill-kumpanija prinċipali, PZL Hydral, f’forma ta' trasferiment tal-assi f’Diċembru tal-2007.

(64)

L-awtoritajiet Pollakki enfasizzaw ukoll li s-self tal-2007 ngħata bil-ħsieb li l-IDA tikseb sehem ta' madwar […]% f’PZL Wroclaw (li jikkorrisondi għal tpartit ta' dejn ma' ekwità) u li l-IDA kellha tikseb qligħ adegwat fuq il-kapital investit wara li tkun biegħet l-ishma tagħha f’PZL Wroclaw, filwaqt li PZL Hydral kellha tuża l-pussess tal-ishma tagħha biex tissodisfa l-kredituri pubbliċi.

(65)

Is-self tal-2007 ngħata f’varjabbli ta' WIBOR 3M flimkien ma' 200 punt bażiku, f’dak iż-żmien 6,45 % għal żmien inizjali sal-2007 u kien ibbażat fuq il-ftehim li jiġi estiż sa ma jsir il-tpartit ta' dejn ma' ekwità qabel il-bejgħ ta' PZL Wroclaw. Is-self ġie assigurat bit-titoli ta' sigurtà bħala garanzija ta' ħlas ta' self li ġejjin:

(66)

L-awtoritajiet Pollakki infurmaw lill-Kummissjoni li l-valur ta' PZL Wroclaw ġie evalwat fuq talba tal-IDA f’Marzu tal-2007 mill-konsulenti Realizacja Inwestycji Techniczno-Ekonomicznych, li jaħdmu bħala espert indipendenti. Intużaw tliet metodi ta' valutazzjoni: metodu tad-dħul ibbażat fuq il-profitt nett skontat (metodu 1), metodu tad-dħul ibbażat fuq il-profitt nett skontat flimkien mad-deprezzament (metodu 2) u metodu ta' fluss skontat ta' flus (metodu 3) (16), inkluża analiżi tas-sensittività (sitwazzjonijiet moderati, ottimisti u pessimisti).

(67)

Bl-użu ta' dawn it-tliet metodi, il-valur ta' PZL Wroclaw ġie stmat għal:

(68)

It-tliet elementi li ġejjin intużaw għall-valutazzjoni ta' PZL Wroclaw:

Tabella 23

Ix-xenarji differenti inkorporati fl-istudju tal-2007 (f’eluf ta' PLN)

(69)

Ir-rata ta' skont għat-tliet metodi ta' valutazzjoni hija bbażata fuq l-Infiq Peżat Medju tal-Kapital li huwa ta' 10,25 % (17). Il-previżjoni finanzjarja tal-kumpanija, inkluż il-fluss ta' flus, il-profitt nett u d-deprezzament għall-2007-2011 b’analiżi ta' sensittività (xenarji moderati, ottimisti u pessimisti għall-2007-2011) hija bbażata fuq dejta pprovduta minn PZL Wroclaw. Skont l-istudju din id-dejta hija l-biċċa l-kbira bbażata fuq l-ordnijiet ta' previżjoni mill-Ministeru tad-Difiża.

(70)

Abbażi ta' din il-valutazzjoni, meta ġie stabbilit il-valur tal-ishma tal-kumpanija, l-awtoritajiet Pollakki ddependew fuq ix-xenarju pessimist, li pproduċa l-aktar riżultat baxx. Fuq dik il-bażi huma assumew li t-titoli ta' sigurtà bħala garanzija ta' ħlas ta' self f’forma ta' pleġġ ordinarja fuq l-ishma ta' PZL Wroclaw kellhom valur fis-suq ta' mill-inqas PLN 20,3 miljun (18). B’hekk, meta jittieħed flimkien mal-pleġġ fuq il-makkinarju, li f’dak iż-żmien kellu valur ta' PLN 5,5 miljun, l-awtoritajiet Pollakki jikkusidraw li l-valur tat-titoli ta' sigurtà bħala garanzija ta' ħlas ta' self f’dak iż-żmien kien jaqbeż il-valur tas-self.

(71)

Barra minn hekk, abbażi ta' studju espert l-IDA fl-2007 qieset li jkun raġonevoli li wieħed jiddependi fuq valur ta' PZL Wroclaw fl-aħħar tal-2007 ta' […] u li jiġi kkunsidrat ix-xenarju moderat. L-IDA qieset ukoll li kienet se tikseb qligħ fuq l-investiment tagħha. Il-qligħ dirett li tista’ tikseb l-IDA, abbażi li se twettaq tpartit ta' dejn ma' ekwità qabel il-bejgħ u żżomm […]% tal-ishma (li huwa perċentwal approssimattiv u kienet l-ipoteżi ta' xogħol użata mill-IDA) ikun mill-inqas PLN 48,5 miljun.

(72)

Għal din ir-raġuni, l-awtoritajiet Pollakki sostnew li, fir-rigward tas-self tal-2007, l-IDA ħadmet bħala investitur fil-qafas tal-bejgħ ta' PZL Wroclaw. L-awtoritajiet Pollakki innotaw ukoll li s-self tal-2007 b’hekk ma kienx ingħata lil PZL Hydral kif iddikjarat fid-deċiżjoni tal-ftuħ.

(73)

Abbażi tal-istrateġija ta' privatizzazzjoni l-ġdida u l-pjan ta' ristrutturar tal-2007-2010, […], […] fornitur ewlieni globali ta' sistemi u servizzi għall-industrija tal-avjazzjoni, l-ispazju u d-difiża li kellu dħul ta' […] fl-2009 beda negozjati għall-bejgħ ta' PZL Wroclaw fl-ewwel trimestru tal-2007 u wettaq studju ta' diliġenza dovuta għal PZL Wroclaw f’Lulju/Awwissu tal-2007 u fi Frar tal-2008. Dawn in-negozjati kienu r-riżultat ta' kooperazzjoni industrijali eżistenti.

(74)

Fil-31 ta' Jannar 2008, […] għamel offerta għall-ishma ta' PZL Wroclaw, li żdiedet għall-ewwel darba fl-14 ta' Frar 2008. Fis-17-18 ta' Marzu 2008 rappreżentanti ta' […] kellhom laqgħa mal-IDA. Fit-2 ta' April 2008 […] żied l-offerta tiegħu għat-tieni darba. Il-prezz propost għall-ishma fit-2 ta' April 2008 kien […] (li kien jirrifletti l-valur ta' PZL Wroclaw fil-31 ta' Diċembru 2007), flimkien ma' bidliet għall-assi kurrenti kkalkolati skont formula speċifika. L-awtoritajiet Pollakki infurmaw lill-Kummisjoni li l-applikazzjoni tal-formula biex jiġi rifless it-tkabbir fil-profitt kien jirriżulta f’żieda fil-prezz ta' […].

(75)

Din l-offerta kienet konformi ma' valutazzjoni esperta indipendenti kkumissjonata mill-IDA. Din il-valutazzjoni, imwettqa minn Doradztwo Ekonomiczne Dariusz Zarzecki, ikkonkludiet li l-valur ta' PZL Wroclaw f’Marzu tal-2008 kien […] abbażi tal-metodu tal-valur tal-assi netti (“il-metodu NAV”). Dan il-metodu jieħu approċċ orjentat lejn l-assi għall-valutazzjoni u jikkunsidra l-valur tal-assi u n-naħa tal-kreditu u d-debitu kemm fil-karta tal-bilanċ kif ukoll dawk li ma jidhrux fiha. Fl-istess ħin, il-valur ta' PZL Hydral abbażi tal-metodu ta' fluss skontat ta' flus (“il-metodu DCF”), li jikkunsidra d-dħul futur mhux biss mill-assi materjali iżda wkoll mill-assi immaterjali fil-pussess ta' PZL Wroclaw. L-istudju m’għandu l-ebda analiżi tas-sensittività (jiġifieri ma jiddeskrivix xenarji differenti).

(76)

Skont il-metodu DFC, il-previżjonijiet tal-fluss ta' flus mill-2008 ’l quddiem huma bbażati fuq il-pjan finanzjarju ta' PZL Wroclaw għall-2007-2013, li jassumi li l-inflazzjoni ser tkun l-istess kif previst mill-Bank Nazzjonali Pollakk fi Frar tal-2008 għall-perjodu inkwistjoni. L-ispiża tal-kapital hija vvalutata għal 16,65 %, u tinkorpora r-rata mingħajr riskju (4,70 %), il-primjum tar-riskju tas-suq (7,17 %), il-primjum tar-riskju tas-settur (1,78 %) u l-primjum tad-daqs tas-suq (3 %) u tippermetti li jitqies id-daqs ta' PZL Wroclaw meta mqabbel mal-kompetituri tagħha (bħal […] jew […]). Mill-2014 ’il quddiem l-istudju jassumi li l-fluss ta' flus se jiżdied bi 3 % kull sena (abbażi ta' inflazzjoni ta' 2 %).

Tabella 24

L-istimi tal-fluss futur ta' flus ta' PZL Wroclaw (eluf ta' PLN)

(77)

Il-metodu tal-valur tal-assi netti aġġustat huwa mezz ta' valutazzjoni ta' “negozju avvjat” billi jiġi aġġustat il-valur tal-assi u l-obbligazzjonijiet kollha għall-valur tas-suq ġust (19). L-aġġustament ta' obbligazzjonijiet b’valur skont il-kotba ta' PLN 18,35 miljun għal valur tal-assi netti ta' […] inkiseb abbażi tat-tpartit ta' dejn ma' ekwità ppjanat tal-2007. L-aħħar aġġustament ikkunsidra l-assi li ma jidhrux fil-karta tal-bilanċ.

Tabella 25

PZL Wroclaw – metodu NAV aġġustat (eluf ta' PLN)  (20)

(78)

Il-valur nett aġġustat tal-assi fissi huwa […], filwaqt li l-valur skont il-kotba tagħhom jammonta għal PLN 25,710 miljun. L-aġġustament essenzjalment isir billi jiġi kkalkolat il-valur tas-suq ġust tal-assi kollha abbażi ta' studju mħejji fid-29 ta' Marzu 2007 u sottomess lill-Kummissjoni minn espert indipendenti, Realizacja Inwestycji Techniczno-ekonomicznych. L-istudju bażikament jagħti valutazzjoni tal-valur tal-proprjetà immobbli bħal bini u art. Il-valur tal-bini ġie vvalutat abbażi tal-formula li ġejja:

V = Cn(1-Lu/100) × R

“Cn” hija l-ispiża tal-kostruzzjoni ta' bini ġdid; “Lu” huwa l-livell tal-użu tal-bini u “R” huwa koeffiċjent li jidħol f’differenzi fil-prezzijiet bejn reġjuni differenti. Il-valur tal-art huwa ddeterminat abbażi ta' approċċ komparattiv li jikkunsidra l-prezz tal-art bħala ugwali għall-prezz miksub għal plott simili ta' art, aġġustat biex jiġu riflessi d-differenzi fl-inflazzjoni.

(79)

L-aġġustament tal-obbligazzjonijiet b’valur skont il-kotba ta' PLN 18,350 miljun għall-valur tal-assi netti ta' […] inkiseb abbażi tat-tpartit ta' dejn ma' ekwità ppjanat tal-2007.

(80)

L-aħħar aġġustament ikkunsidra l-assi li ma jidhrux fil-karta tal-bilanċ. L-entrati li ma jidhrux fuq il-karta tal-bilanċ iżda li għandhom jidhru fil-valutazzjoni skont l-awturi tal-istudju huma: l-“organizzazzjoni tar-riżorsi umani” u l-“organizzazzjoni tal-proċess ta' produzzjoni”, filwaqt li jiġu kkunsidrati l-aspetti mhux kwantifikabbli fil-valutazzjoni marbuta mal-valur tal-amministrazzjoni tal-kumpanija.

(81)

Wara l-offerta mingħand […], l-awtoritajiet Pollakki pprovdew lill-Kummissjoni bin-notifikazzjoni tal-Pjan bħala għajnuna għar-ristrutturar lil PZL Hydral f’Marzu tal-2008, filwaqt li assumew li PZL Wroclaw kienet se tinbiegħ għal […]. Huma inkludew ukoll is-self tal-2007 u self addizzjonali ta' PLN 4 miljun li kellu jingħata lil PZL Wroclaw bħala parti minn miżuri biex jiġu finalizzati n-negozjati ma' […].

(82)

Is-self addizzjonali (“is-self tal-2008”) ngħata fit-2 ta' April 2008, il-jum li fih l-IDA irċeviet dettalji dwar it-tieni żieda fl-offerta. L-IDA tat dan is-self temporanju saż-żmien li fih ġie konkluż negozju ma' […]. PZL Wroclaw kellha bżonn il-flus sabiex tipproċessa l-irkuprar fl-ordnijiet mill-Ministeru tad-Difiża.

(83)

Is-self ingħata għal perjodu ta' ħames snin b’rata ta' imgħax varjabbli bbażata fuq ir-rata ta' referenza tal-Kummissjoni għall-Polonja (6,42 % meta ngħatat) u ġie ggarantit mit-titoli ta' sigurtà bħala garanzija ta' ħlas ta' self li ġejjin:

(84)

L-awtoritajiet Pollakki b’hekk iqisu li l-valur tal-pleġġijiet qabeż il-valur tas-self.

(85)

Is-self ingħata sabiex PZL Wroclaw tkun tista’ takkwista l-makkinarju meħtieġ għall-proċess tal-produzzjoni. L-IDA tat is-self tal-2008 fi stadju avvanzat tan-negozjati ma' […] abbażi tas-suppożizzjoni li kienet ser titħallas lura jew minn PZL Wroclow bl-użu tal-fondi tagħha stess jew mill-investitur.

(86)

Fuq dik il-bażi, l-awtoritajiet Pollakki sostnew li l-IDA mhux biss aġixxiet b’mod simili għal investitur privat iżda bħala l-entità tal-bejgħ ta' PZL Wroclaw.

(87)

Il-Kummissjoni bl-istess mod ġiet infurmata mill-awtoritajiet Pollakki li l-attività ta' PZL Wroclaw fl-2008 kienet parzjalment iffinanzjata minn kiri operattiv. F’Ġunju tal-2008 ġew iffirmati żewġ ftehim ta' kiri operattiv, […] u […] ma' kumpanija privata […]. Il-valur nett tal-kiri skont dawn il-ftehim ammonta għal EUR 271 002 u EUR 401 263,20 (PLN 0,82 miljun inkluża t-taxxa fuq il-valur miżjud) (21). L-ispiża tal-kiri għal PZL Wroclaw skont dawn il-ftehim kienet: EUR 88 762,30, li hija d-differenza bejn il-valur nett tal-makkinarju u l-valur nett tal-kiri. Dawn il-ftehim jaħdmu b’mod simili għas-self, fejn l-oġġett mikri jservi bħala titoli ta' sigurtà bħala garanzija ta' ħlas ta' self. Wara l-iskadenza tal-kiri, PZL Wroclaw se takkwista d-dritt li tixtri l-makkinarju għal ammont ta' EUR 5 835. Qabel ikkonkludiet dawn il-kuntratti ta' kiri ma' PZL Wroclaw, […] saret analiżi bir-reqqa tas-sitwazzjoni finanzjarja u ekonomika tal-kumpanija, inkluża l-kapaċità tagħha li tiġġenera fluss ta' flus biżżejjed għall-ħlas lura tal-ħlasijiet parzjali.

(88)

L-awtoritajiet Pollakki għamlu referenza wkoll għan-notifikazzjoni inizjali tagħhom għat-tpartit ta' dejn ma' ekwità previst fil-Pjan ta' PLN 13.5 miljun (flimkien mal-imgħax).

(89)

F’Marzu u April tal-2008 ġew konklużi negozjati dwar it-termini u d-dispożizzjonijiet tal-ftehim għat-trasferiment tal-ishma. Madankollu, fl-14 ta' April 2008, […] irtira l-offerta tiegħu. Skont l-awtoritajiet Pollakki, ir-raġuni possibbli għal dan l-irtirar kienu l-bidliet konsiderevoli li kienu seħħew fis-suq dinji bħala riżultat tal-kriżi ekonomika.

(90)

Bħala riżultat tal-irtirar ta' […] min-negozjati, il-proċess tal-bejgħ tnieda mill-ġdid. Il-bejgħ ġie rreklamat fl-istampa nazzjonali u internazzjonali fil-forma ta' stedina biex wieħed jieħu sehem f’negozjati għax-xiri ta' 100 % tal-ishma ta' PZL Wroclaw. Fid-19 ta' Mejju 2008 l-istedina ġiet ippubblikata f’Puls Biznesu (Business Pulse), l-aktar pubblikazzjoni speċjalizzata fil-Polonja, u f’ Rzeczpospolita, l-akbar gazzetta ta' kuljum tal-pajjiż. Fl-20-26 ta' Mejju 2008 ġiet ippubblikata wkoll fi Flight International, il-magazin speċjalizzat fl-avjazzjoni globali. F’Novembru tal-2008, id-dettalji tal-bejgħ ippjanat ġew ippubblikati f’ Raport Wojsko Technika Obronność, magazin tal-avjazzjoni bil-Pollakk b’qarrejja internazzjonali. Ma ġew riċevuti l-ebda offerti għax-xiri tal-ishma.

(91)

Għal din ir-raġuni, saru aktar sforzi u t-tagħrif imsemmi hawn fuq intbagħat u ġie ppreżentat direttament minn PZL Hydral lil kumpaniji li setgħu jkunu interessati fix-xiri ta' PZL Wroclaw. L-awtoritajiet Pollakki nnotaw li l-bejgħ ġie rreklamat waqt fieri u avvenimenti industrijali, inklużi l-wirjiet tal-ajru (22), kif ukoll permezz ta' ittri li ntbagħtu lil aktar minn 80 kumpanija. L-awtoritajiet Pollakki indikaw ukoll li t-tagħrif dwar il-bejgħ kien disponibbli b’mod permanenti fuq il-websajt ta' PZL Hydral, li tirreġistra 500 000 żjara kull sena. Filwaqt li ġiet ikkunsidrata n-natura speċifika tal-produzzjoni ta' PZL Wroclaw (bħala fornitur ta' oġġetti u servizzi għall-forzi armati Pollakki, PZL Wroclaw hija ta' importanza partikolari għas-sikurezza nazzjonali) u l-livell pjuttost għoli ta' konċentrazzjoni tal-industrija tal-avjazzjoni mad-dinja kollha, li jirriżulta f’numru relattivament baxx ta' investituri potenzjali, l-awtoritajiet Pollakki argumentaw li l-investituri potenzjali kollha kellhom l-opportunità li jiksbu tagħrif dwar il-bejgħ ta' PZL Wroclaw u li jieħdu sehem fil-proċess ta' privatizzazzjoni. B’hekk, skont l-awtoritajiet Pollakki, is-settur kollu kien jaf dwar il-bejgħ.

(92)

In-notifikazzjoni tal-bejgħ kienet biss stedina għan-negozjati, u ma kien fiha l-ebda kundizzjonijiet speċifiċi.

(93)

Wara l-isforzi mġedda tal-awtoritajiet Pollakki, fit-tieni nofs tal-2008, l-IDA irċeviet l-ewwel indikazzjoni ta' interess, u aktar tard offera mingħand […]. Fit-tieni nofs tal-2008, l-IDA irċeviet it-tieni indikazzjoni ta' interess, din id-darba mingħand […].

(94)

Fit-30 ta' Settembru 2008 […] issottometta offerta mhux vinkolanti preliminari għax-xiri ta' 100 % tal-ishma ta' PZL Wroclaw (“l-offerta tat-30 ta' Settembru 2008”) għal ammont ta' […]. […] huwa fond tal-investiment li jinvesti fis-suq tal-ekwità privata u li sidu (persuna privata) wkoll għandu sehem ta' 100 % fi […] (23). L-offerta tat-30 ta' Settembru 2008 saret minn kumpanija ħielsa mid-dejn u kienet tiddependi mill-fatt li r-riżultati finanzjarji tal-2009 (b’mod partikolari, il-profitt nett u l-qligħ qabel l-interessi, it-taxxi, id-deprezzament u l-amortizzament (EBITDA)) jkunu simili għall-2008. B’mod partikolari, kellu jintlaħaq EBITDA ta' mill-inqas […] u l-profitt nett fl-2009 kellu jkun mill-inqas […]; barra minn hekk, kien meħtieġ tkabbir fil-bejgħ ta' 5 %. Madankollu, minħabba l-kriżi finanzjrarja d-dħul ta' PZL Wroclaw naqas b’xi 35 %, u l-punti ta' riferiment stabbiliti fl-offerta ma ntlaħqux. Sal-ewwel trimestru tal-2009 PZL Hyrdal diġà kienet konxja li r-riżultat finanzjarju ma kienx se jilħaq il-limitu minimu stabbilit fl-offerta ta' […] Barra minn hekk, it-tnaqqis fl-ordinijiet mill-Ministeru tad-Difiża ġie kkonfermat fil-bidu tal-2009, b’implikazzjonijiet sinifikanti għall-profitt tal-kumpanija f’dik is-sena. Ma kien hemm l-ebda kuntatt sussegwenti ma' […].

(95)

[…], kumpanija […] li hija fost l-akbar fornituri fid-dinja ta' prodotti tal-avjazzjoni teknoloġikament avvanzati (għall-inġenji tal-ajru kummerċjali, reġjonali, korporattivi u militari) u prodotti industrijali, li kellha dħul fl-2009 ta' […] bdiet taħditiet bil-ħsieb li tixtri l-ishma f'PZL Wroclaw fl-ewwel trimestru tal-2009.

(96)

Din il-kumpanija wettqet studju ta' diliġenza dovuta bejn l-20 ta' April 2009 u t-12 ta' Mejju 2009. Abbażi ta' dan l-istudju, hija ffirmat memorandum ta' qbil (filwaqt li indikat l-istruttura ġenerali tat-tranżazzjoni ppjanata) mal-IDA fl-20 ta' Awwissu 2009 għax-xiri tal-ishma ta' PZL Wroclaw għal ammont ta' […]. L-IDA ħadet f’idejha r-responsabbiltà li tiżgura li l-assi kollha ta' PZL Wroclaw kienu ħielsa minn kwalunkwe talbiet min-naħa tal-kredituri pubbliċi ta' PZL Hydral. Il-memorandum ta' qbil assuma li l-IDA stess kienet se tixtri 100 % tal-ishma f’PZL Wroclaw u sussegwentement tbiegħhom lill-investitur. L-investitur assuma r-responsabbiltà li jwetttaq il-pjan tal-investiment dettaljat tiegħu stess li jiswa […] aktar wara l-bejgħ. Fit-18 ta' Diċembru 2009, l-IDA, PZL Hydral u […] iffirmaw ftehim qafas. L-Anness 2 għall-Ftehim, li jistabbilixxi r-regoli li jirregolaw it-tpartit ta' dejn ma' ekwità parzjali, it-tħassir parzjali u l-ħlas lura parzjali tas-self tal-2007 u l-2008, ġie konkluż fit-12 ta' Marzu 2010.

(97)

L-awtoritajiet Pollakki kkonfermaw li l-bejgħ ma kienx kondizzjonali, b’mod partikolari fuq ix-xogħlijiet li kienu se jinżammu. L-awtoritajiet Pollakki infurmaw ukoll lill-Kummissjoni li l-investitur kien liberu li jiddetermina n-negozjati kummerċjali tiegħu mal-Ministru tad-Difiża.

(98)

Deskrizzjoni dettaljata tan-negozjati ma' […] tista’ tinstab fil-punt VI.

(99)

L-awtoritajiet Pollakki indikaw li l-ispejjeż globali tar-ristrutturar kienu se jammontaw għal PLN 262,2 miljun, li jinqasmu kif ġej: ir-ristrutturar tad-dejn pubbliku f’ammont ta' PLN 234 miljun, ristrutturar finanzjarju ieħor f’ammont ta' PLN 11,5 miljun, investimenti ta' PLN 11 miljun, ristrutturar tal-assi ta' PLN 5,6 miljun u ristrutturar tal-impjiegi ta' PLN 0,3 miljun.

(100)

Skont l-awtoritajiet Pollakki, l-ispejjeż globali tar-ristrutturar ta' PZL Hydral kienu se jkunu ffinanzjati mill-għajnuna mill-Istat ta' PLN 130,5 miljun u minn kontribuzzjoni proprja ta' PLN 132 miljun. Skont il-Pjan, il-kontribuzzjoni proprja tirrappreżenta 50,3 % tal-ispejjeż tar-ristrutturar. Il-kontribuzzjoni proprja tinkludi dħul mill-bejgħ tal-assi fissi u ishma kif ukoll fondi li għandhom jiġu pprovduti mill-investitur futur f’PZL Wroclaw.

(101)

Fir-rigward ta' miżuri ta' kumpens, il-Pjan ippropona l-bejgħ ta' xi assi tal-produzzjoni, li ġie implimentat parzjalment bejn l-2004 u l-2006, u rriżulta fi tnaqqis fil-kapaċità. Skont il-Pjan, il-bejgħ ta' makkinarju u tagħmir kellu jnaqqas il-kapaċità tal-kumpanija b’total ta' 380 000 siegħa ta' magna, jiġifieri b’42 %. Il-biċċa l-kbira tat-tnaqqis ippjanat (315 000 siegħa ta' magna) diġà ġie implimentat. L-awtoritajiet Pollakki sostnew li terz ta' dan it-tnaqqis ma kienx meħtieġ biex tiġi rkuprata l-vijabbiltà iżda kienet ippjanata sabiex tnaqqas il-produzzjoni fil-qasam tal-prodotti idrawliċi industrijali, qasam bi profitt baxx li l-kumpanija kienet iddeċidiet li tillimita l-involviment tagħha fih.

(102)

Barra minn hekk, il-Pjan kien jindika li l-irtirar ippjanat minn xi attivitajiet (li skont kif qed jingħad huma ta' profitt) u l-bejgħ tal-assi mhux relatati mal-produzzjoni għandhom jitqiesu bħala miżuri ta' kumpens fis-sens tal-Linji Gwida dwar l-għajnuna mill-Istat għas-salvataġġ u r-ristrutturar ta' intrapriżi f’diffikultà (24) (“il-linji gwida dwar is-salvataġġ u r-ristruttuar”). Fl-aħħar nett, l-awtoritajiet Pollakki sostnew li l-privatizzazzjoni ta' PZL Wroclaw, li se tippermetti l-kompetituri tal-kumpanija li jakkwistaw il-kapaċità, il-kompetenzi u s-sehem fis-suq ta' PZL Hydral, ukoll għandha titqies bħala miżura ta' kumpens.

(103)

Il-Pjan ġie nnotifikat bħala xenarju ta' ristrutturar skont il-linji gwida għas-salvataġġ u r-ristrutturar. Il-Kummissjoni b’hekk ibbażżat il-valutazzjoni preliminari tagħha fuq it-tagħrif disponibbli għaliha f’dak l-istadju. Abbażi ta' dak it-tagħrif, il-Kummissjoni esprimiet it-tħassib li ġej:

(104)

Fir-rigward tal-eliġibbiltà tal-kumpanija għall-għajnuna għar-ristrutturar skont il-linji gwida għas-salvataġġ u r-ristrutturar, il-Kummissjoni ddubitat jekk PZL Hydral kinitx ibbenefikat jew le minn għajnuna ta' salvataġġ u ristrutturar fl-għaxar snin preċedenti.

(105)

B’mod partikolari, il-Kummissjoni tħassbet dwar jekk in-nuqqas ta' infurzar jew l-infurzar tard tal-obbligazzjonijiet pubbliċi kellhomx jiġu trattati bħala għajnuna mill-Istat. Il-Kummissjoni osservat li, meta korp irregolat bil-liġi pubblika li jiġbor il-kontribuzzjonijiet tas-sigurtà soċjali jittollera nuqqas ta' pagament jew pagament tard ta' dawn il-kontribuzzjonijiet tul perjodu twil ta' żmien, bla ebda dubju dan jagħti vantaġġ lir-riċevitur billi jitnaqqas il-piż li tirrappreżenta l-applikazzjoni normali tas-sistema ta' sigurtà soċjali għar-riċevitur. (25) Il-Kummissjoni, filwaqt li għarfet li l-kredituri pubbliċi kienu ħadu xi miżuri ta' infurzar, iddubitat jekk dawn kinux biżżejjed jew, jekk ittieħdu fi stadju tard, kinux effettivi, speċjalment fir-rigward tat-titoli ta' sigurtà bħala garanzija ta' ħlas ta' self miżmum mill-kredituri pubbliċi u li wieħed seta’ jiddependi fuqhom. F’dan l-istadju tal-proċeduri, b’hekk, il-Kummissjoni iddubitat jekk l-imġiba tal-kredituri pubbliċi kinitx konformi mal-mod li bih il-kredituri privati kienu jġibu ruħhom f’dawk iċ-ċirkostanzi.

(106)

Il-Kummissjoni esprimiet ukoll dubji fir-rigward ta' miżuri oħra rapportati mill-awtoritajiet Pollakki bħala ħielsa minn għajnuna mill-Istat.

(107)

Il-Kummissjoni ddubitat jekk il-ħlas lura parzjali u t-tħassir parzjali tal-obbligazzjonijiet pubbliċi rrapportati mill-awtoritajiet Pollakki bħala ħielsa minn għajnuna mill-Istat, kienux konformi tar-regola tal-kreditur privat.

(108)

Il-Kummissjoni esprimiet ukoll dubji dwar il-kompatibbiltà tal-Pjan mas-suq intern fid-dawl tal-punt 31 et seq. tal-linji gwida għas-salvataġġ u r-ristrutturar.

(109)

Il-Kummissjoni kellha dubji dwar jekk il-kontribuzzjoni proposta kinitx reali u attwali u b’hekk dwar jekk il-Pjan kienx jikkonforma mal-punti 43-45 tal-linji gwida għas-salvtaġġ u r-ristrutturar. Il-Kummissjoni kellha dubji dwar jekk id-dħul ippjanat mill-bejgħ ta' PZL Wroclaw, anki jekk jinkiseb, jistax jitqies bħala kontribuzzjoni proprja għar-ristrutturar. Kif imsemmi hawn fuq, PZL Wroclaw twaqqfet fit-tmiem tal-2004. Skont il-Pjan, l-assi tal-produzzjoni kellhom jiġu ttrasferiti u l-proċess ta' privatizzazzjoni kellu jitnieda kmieni mill-2007. L-offerti inizjali minn investituri potenzjali kellhom jiġu sottomessi sar-raba’ trimestru tal-2007 u, wara negozjati, kellu jiġi konkluż ftehim ta' bejgħ preliminari fl-ewwel nofs tal-2008. Madankollu, meta ġiet adottata din id-deċiżjoni tal-ftuħ, il-Kummissjoni ma kinitx ġiet infurmata dwar kwalunkwe interess min-naħa ta' investituri potenzjali fix-xiri ta' PZL Wroclaw.

(110)

Il-Kummissjoni esprimiet ukoll dubji dwar jekk il-Pjan kienx se jiżgura vijabbiltà fit-tul kif meħtieġ skont il-punti 34-37 tal-linji gwida għas-salvataġġ u r-ristrutturar. Il-Kummissjoni osservat li r-ristrutturar ippjanat kien jiffoka fuq ir-ristrutturar finanzjarju, jiġifieri madwar 90 % tal-ispejjeż tar-ristrutturar kollha kienu maħsuba għall-ħlas lura tal-arretrati tad-dejn pubbliku. Konsegwentement, il-miżuri tar-ristrutturar li kien fadal kienu pjuttost limitati. Il-Kummissjoni osservat ukoll li, kif diġà ġie spjegat, fiż-żmien li fih ġiet adottata d-deċiżjoni tal-ftuħ, ma kinitx ġiet mgħarrfa dwar kwalunkwe interess min-naħa ta' investituri potenzjali. Il-Polonja indikat ukoll li jistgħu jkunu meħtieġa miżuri ta' ristrutturar oħrajn wara li l-kumpanija tkun ġiet privatizzta, u dan qajjem dubji addizzjonali dwar il-vijabbiltà tal-Pjan.

(111)

Il-Kummissjoni qalet ukoll li kellha bżonn ta' aktar kjarifiki fir-rigward tal-kompatibbiltà tal-miżuri ta' kumpens proposti bil-punti 38-42 tal-linji gwida għas-salvataġġ u r-ristrutturar. L-awtoritajiet Pollakki argumentaw fin-notifikazzjoni li mill-inqas terz tat-tnaqqis tal-kapaċità kien maħsub sabiex inaqqas il-kapaċità fis-segment bi profitt baxx tal-prodotti idrawliċi industrijali. Skont it-tagħrif għad-dispożizzjoni tagħha, il-Kummissjoni ddubitat jekk it-tnaqqis fil-kapaċità tal-produzzjoni implimentat jew ippjanat mill-kumpanija kienx biżżejjed. Il-Kummissjoni nnutat ukoll li mill-inqas xi wħud mill-miżuri proposti kienu jidhru neċessarji sabiex tinkiseb vijabbiltà fit-tul. B’mod partikolari, il-Kummissjoni indikat li l-bejgħ ta' xi assi tal-produzzjoni fil-passat kienu jidhru ppjanati speċifikament biex tiġi rkuprata l-vijabbiltà. Bl-istess mod, il-bejgħ ippjanat tal-proprjetà immobbli kien iservi bħala sors ta' finanzjament aktar milli bħala kumpens għal tfixkil fil-kompetizzjoni.

(112)

L-awtoritajiet Pollakki ssottomettew il-kummenti tagħhom dwar id-deċiżjoni tal-ftuħ fir-rigward tal-possibbiltà tal-applikazzjoni tat-test tal-kreditur privat fix-xenarju rrapportat, jiġifieri flimkien mal-injezzjonijiet ta' kapital.

(113)

L-awtoritajiet Pollakki ddikjaraw li t-tħassir propost kien konformi mar-regola tal-kreditur privat fid-dawl tal-fatt li l-kredituri pubbliċi kienu se jiksbu aktar fil-każ li jinbiegħu l-assi ta' PZL Hydral milli kieku tfalli l-kumpanija. L-awtoritajiet Pollakki ddikkjaraw ukoll li din il-perspettiva kienet ibbażata fuq analiżi ekonomika u finanzjarja u kienet kondiviża bejn il-kredituri pubbliċi kkonċernati.

(114)

L-awtoritajiet Pollakki sostnew li ż-żewġ injezzjonijiet ta' kapital mogħtija mill-IDA lil PZL Hydral u li, skont in-notifikazzjoni, ġew allokati għall-ħlas lura tal-kredituri pubbliċi, ma kinux jipprekludu l-applikazzjoni tar-regola tal-kreditur privat.

(115)

Barra minn hekk, l-awtoritajiet Pollakki sostnew li l-valur fis-suq ta' PZL Wroclaw kien marbut mill-qrib mal-pussess tagħha ta' ċertifikati tal-avjazzjoni u permessi għall-kummerċ tal-armi u l-forza tax-xogħol esperjenzata u kkwalifikata tagħha. Fil-każ ta' falliment, ikun impossibbli biex din l-organizzazzjoni tiġi rkpurata sa punt aċċettabbli għas-servizzi ta' superviżjoni tal-avjazzjoni.

(116)

L-awtoritajiet Pollakki vvalutaw il-kontribuzzjoni proprja għal PLN 130 miljun, li tammonta għal 50 % tal-ispejjeż tar-ristrutturar jekk in-nuqqas ta' infurzar tad-djun pubbliċi kellu jitqies bħala għajnuna mill-Istat. Barra minn hekk, l-awtoritajiet Pollakki osservaw li l-bejgħ ta' assi kien qed isir, u b’hekk l-assi kollha stipulati fil-Pjan kellhom jinħelsu fil-qafas tar-ristrutturar.

(117)

Fir-rigward tal-vijabbiltà fit-tul tal-Pjan, l-awtoritajiet Pollakki affermaw li l-għanijiet tar-ristrutturar kienu qed jiġu implimentati b’mod xieraq. B’mod partikolari, il-proċess tal-konċentrazzjoni tal-produzzjoni fil-parti tal-Lvant tas-sit ta' PZL Hydral ipprovdiet tnaqqis fl-ispejjeż fissi, titjib operazzjonali fil-produzzjoni u dħul addizzjonali mill-kiri tal-ispazju meħlus. Barra minn hekk, il-produzzjoni u l-bejgħ (inkluż 570 impjegat) kienu ġew allokati mill-ġdid lil PZL Wroclaw, li kien ekonomikament vijabbli f’dak iż-żmien (dejta għall-ewwel għaxar xhur tal-2008). Il-profitt nett ta' PZL Wroclaw fit-tmiem tal-2008 kien stmat għal madwar PLN 6 miljun, b’bejgħ ta' PLN 50 miljun. L-awtoritajiet Pollakki żiedu jgħidu li peress li l-ftehim intlaħaq fix-xenarju tal-kreditur privat fir-raba’ trimestru tal-2007, kemm PZL Hydral kif ukoll PZL Wroclaw kienu ħallsu l-obbligazzjonijiet kurrenti tagħhom lill-kredituri pubbliċi fil-ħin.

(118)

Il-Kummissjoni ma rċeviet l-ebda kummenti ta' partijiet terzi.

(119)

L-awtoritajiet Pollakki jikkunsidraw li l-prezz tal-bejgħ tal-ishma ta' PZL Wroclaw offerti minn […] jikkorrispondi għall-valur fis-suq ta' din il-kumpanija. Skont l-awtoritajiet Pollakki, il-prezz offrut kien jirrifletti s-sitwazzjoni finanzjarja tal-kumpanija, li marret għall-agħar fl-2009 bħala riżultat tal-kriżi finanzjarja u tnaqqis fl-ordnijiet mill-forzi armati Pollakki.

(120)

L-awtoritajiet Pollakki indikaw ukoll li dan il-prezz kien jirrifletti kundizzjonijiet makroekonomiċi. Fil-Borża ta' Warsaw biss l-Indiċi tal-Borża ta' Warsaw (WIG) waqa’ b’36 %. Bejn April tal-2008 (rtirar ta' […] min-negozjati) u Ġunju tal-2009, il-klassifikazzjoni tas-suq tal-kumpaniji tas-settur tal-avjazzjoni elenkati bi profil ta' produzzjoni simili għal PZL Wroclaw waqgħet drammatikament. Ishma f’[…], li fiha tappartjeni […], naqsu bi […] %, ishma f' […] bi […] % u ishma f’[…] bi […] %.

(121)

[…] sar studju ta' diliġenza dovuta (ara l-punt 96). L-istudju qabbel il-figuri li jikkonċernaw […] mit-32 kumpanija tas-settur tal-avjazzjoni. L-istudju mbagħad ikkalkula l-koeffiċjenti medji li ddeterminaw kif dawn […]. Dawn il-koeffiċjenti mbagħad ġew applikati għal […]. Ir-riżultat kien […].

(122)

Madankollu, it-taħdidiet mal-IDA dwar il-valutazzjoni tal-investitur jissuġġerixxu li f’dan l-istadju […] jiddependi ħafna minn konsumatur wieħed, il-forzi armati Pollakki, mingħand min stenna li jikseb […]% tad-dħul ippjanat tiegħu fl-2010-13 taħt il-programm tal-immodernizzar, li r-riżultat tiegħu mhuwiex ċert, u l-proċeduri ta' falliment jistgħu jitnedew jekk is-sitwazzjoni finanzjarja ta' PZL Wroclaw ma titjiebx fl-2010.

(123)

Abbażi ta' dan, l-investitur isostni li bl-offerta ta' […] għall-ishma ta' PZL Wroclaw, de facto huwa se jħallas primjum għalihom.

(124)

Meta l-prezz offrut mill-investitur sar magħruf, l-IDA bdiet negozjati mal-kredituri pubbliċi dwar ħlasijiet lura parzjali u tħassir parzjali tat-talbiet tagħhom kif stabbilit fil-Pjan, abbażi tar-rikavat tal-bejgħ tal-assi ta' PZL Hydral mingħajr l-ebda injezzjonijiet ta' kapital addizzjonali.

(125)

Għal dan l-għan, ġie kkummissjonat studju mill-IDA minn Ernst&Young fil-15 ta' Jannar 2010. Ernst&Young ġie mitlub, bħala espert indipendenti, biex jipproduċi tqabbil bejn iż-żewġ xenarji li ġejjin:

(126)

Ernst&Young ivvalutaw is-sitwazzjoni għal kull kreditur pubbliku individwali: l-Uffiċċju tas-Sigurtà Soċjali, l-Uffiċċju tat-Taxxa tar-Reġjun ta' Lower Silesia, l-Uffiċċju tat-Taxxa ta' Wroclaw Psie Pole, il-Kunsill tal-Belt ta' Wroclaw, il-Fond Statali għar-Rijabilitazzoni tal-Persuni b’Diżabilità, l-Uffiċċju Reġjonali ta' Lower Silesia u l-Ministeru tal-Finanzi. L-analiżi ma tinkludix l-IDA għaliex din ma kinitx kreditur ta' PZL Hydral iżda biss azzjonista.

(127)

L-istudju ta' Ernst&Young tlesta fl-24 ta' Frar 2010. L-istudju kien ibbażat fuq approċċ konservattiv: l-ammonti mistennija li jiġu direttament irkuprati f'kull xenarju biss ġew ikkwantifikati. B’hekk l-analiżi ma kkunsidratx l-ispejjeż alternattivi (26), il-previżjonijiet tal-profitt fit-tul u l-inflazzjoni.

(128)

Ix-xenarju ta' falliment li wassal għal-likwidazzjoni ġie analizzat abbażi tas-suppożizzjoni li l-likwidazzjoni tkun effettiva b’mod raġonevoli. Dan jirreferi, bħala l-bażi għall-metodoloġija tiegħu, għar-rekwiżiti ta' test tal-kreditur privat xieraq ibbażat fuq każistika (Spanja vs Il-Kummissjoni u Hamsa vs Il-Kummissjoni) li janalizza l-imġiba ta' korp irregolat bil-liġi pubblika mill-perspettiva ta' kreditur pubbliku li jkun qed ifittex li jakkwista pagament minn debitur f’diffikultajiet finanzjarji (27). Ir-rapport huwa bbażat fuq analiżi għal kull kreditur individwali, u jikkunsidra, b’mod partikolari, it-titoli ta' sigurtà bħala garanzija ta' ħlas ta' self tal-kreditur fuq l-assi tad-debitur u l-punt sa fejn jistgħu jiġu sodisfatti t-talbiet fil-każ li d-debitur ifalli (28).

(129)

Sabiex jiġi stabbilit il-valur ta' falliment tal-assi, l-istudju ta' Ernst&Young assuma li l-valur tal-bejgħ bl-għaġġla tal-assi fissi immobbli kien 50 % tal-valur ġust tagħhom. Biex jistabbilixxi l-valur ġust, Ernst&Young iddependa fuq metodi stabbiliti fl-Istandard Internazzjonali tal-Kontabilità 16 dwar proprjetà, impjant u tagħmir, u għamel użu minn valutazzjonijiet disponibbli minn esperti indipendenti. It-tnaqqis ta' 50 % huwa ġġustifikat mill-effettività baxxa tal-proċeduri ta' falliment fil-Polonja, fejn id-dħul mill-bejgħ tal-assi jikkostitwixxi madwar 26.86 % tal-valur ġust tagħhom.

(130)

L-istudju ta' Ernst and Young jinnota wkoll li r-rikavat li jistgħu jistennew il-kredituri pubbliċi f’xenarju ta' falliment jiddependi mill-klassifikazzjoni rispettiva tat-titoli ta' sigurtà tagħhom bħala garanzija ta' ħlas ta' self fuq l-assi li magħhom huma marbuta l-ipoteki. L-istudju ta' Ernst&Young għal dan l-għan jipprovdi deskrizzjoni ġenerali tal-ipoteki marbuta ma' kull komponent tal-assi ta' PZL Hydral, il-valur tal-ipoteki rispettivi u l-klassifikazzjoni tal-kredituri.

(131)

Abbażi tas-suppożizzjonijiet stabbiliti fiż-żewġ paragrafi preċedenti, Ernst&Young jistma li l-ammont totali li jista’ jiġi rkuprat fil-każ ta' falliment mill-assi ggarantiti minn ipoteki huwa ta' PLN 52,4 miljun; tliet kredituri pubbliċi (il-Fond tal-Istat għar-Rijabilitazzjoni tal-Persuni b’Diżabilità, l-Uffiċċju Reġjonali ta' Lower Silesia u l-Ministeru tal-Finanzi) ma jkunu jistgħu jirkupraw xejn u l-kredituri li jkun baqa’ jkunu jistgħu jirkupraw l-ammonti li ġejjin: l-Uffiċċju tas-Sigurtà Soċjali – PLN 44,8 miljun, l-Uffiċċju tat-Taxxa tar-Reġjun ta' Lower Silesia – PLN 2,3 miljun, l-Uffiċċju tat-Taxxa ta' Wroclaw Psie Pole – PLN 0,457 miljun u l-Kunsill tal-Belt ta' Wroclaw – PLN 4,9 miljun.

(132)

L-ammont effettiv tar-rikavat f’xenarju ta' falliment imbagħad għandu jiġi aġġustat billi jiżdied l-ammont irkuprat mill-assi l-oħra ta' PZL Hydral, jiġifieri PLN 13,5 miljun (29). Għalhekk, ir-rikavat mill-falliment jammonta għal PLN 66 miljun, kif jidher fit-Tabella 26.

(133)

Ix-xenarju ta' bejgħ tal-assi jipprovdi għall-bejgħ tal-assi kollha ta' PZL Hydral imsemmija fil-Pjan għal PLN 122 323 202,31: Zakład Produkcji Hydrauliki “Hydral” Sp. z o.o. għal […], il-proprjetà immobbli ta' BBCenter għal […], parkeġġ għal […], Zakład Cieplowniczy “Term-Hydral” Sp. z o.o. għal […], impjant tal-enerġija (GSZ) għal […], PZL Wrocław għal […], l-impjant tal-ikkastjar għal PLN […], sehem minoritarju għal […] u ħlas lura tar-riċevibbli ta' PZL Hydral f’ammont ta' […].

Tabella 26

Paragun tax-xenarju tal-bejgħ u x-xenarju ta' falliment mill-perspettiva ta' PZL Hydral fl-2010 (f’PLN) fl-istudju ta' Ernst&Young

(134)

It-Tabella 26 tindika li skont l-istudju ta' Ernst&Young l-Uffiċċju tas-Sigurtà Soċjali jista’ jirkupra 47,7 % tat-talbiet tiegħu, l-Uffiċċju tat-Taxxa tar-Reġjun ta' Lower Silesia jista’ jirkupra 30,6 %, l-Uffiċċju tat-Taxxa ta' Wroclaw Psie Pole 85,5 %, il-Kunsill tal-Belt ta' Wroclaw 18,2 %, l-Uffiċċju Reġjonali ta' Lower Silesia jista’ jirkupra t-talbiet kollha tiegħu, il-Fond tal-Istat għar-Rijabilitazzjoni tal-Persuni b'Diżabilità jista’ jirkupra 38,9 % u l-Ministeru tal-Finanzi 2,1 %.

(135)

Skont il-Liġi Pollakka, meta l-kredituri pubbliċi jaqblu dwar is-saldu tat-talbiet tagħhom permezz ta' tħassir parzjali, l-imgħax ma jibqax jiżdied fuq dawn it-talbiet u jiġi impost biss jekk is-saldu ma jiġix implimentat, kif ikun il-każ f’xenarju ta' falliment. B’hekk l-obbligazzjonijiet li jidhru fit-Tabella 26 jinkludu imgħax approprjat li jmur lura għad-data tal-ftehim tal-2007 għall-kredituri pubbliċi kollha minbarra l-Uffiċċju tat-Taxxa tar-Reġjun ta' Lower Silesia (li għalih l-imgħax għadu qed jiġi impost fuq xi obbligazzjonijiet fiskali) u l-Uffiċċju Reġjonali ta' Lower Silesia (li għadu qed jiġi impost imgħax fuqu) minħabba n-natura legali speċjali tat-talba tagħhom.

(136)

Għandu jiġi osservat li fejn għandhom x’jaqsmu l-Kunsill tal-Belt ta' Wroclaw, il-Fond tal-Istat għar-Rijabilitazzjoni tal-Persuni b’Diżabilità u l-Uffiċċju tat-Taxxa tar-Reġjun ta' Lower Silesia, il-Pjan rivedut ipprovda għad-differiment parzjali tal-ħlas lura lill-kredituri pubbliċi u meta jsir il-ħlas lura f’pagamenti parzjali ta' parti minn dawn l-obbligazzjonijiet sal-bejgħ tal-assi ta' PZL Hydral, jiġifieri l-obbligazzjonijiet se jitħallsu lura parzjalment. B’mod partikolari, il-ftehim jipprovdi dispożizzjoni dettaljata għal dan li ġej:

(137)

Abbażi ta' dan, skont l-istudju ta' Ernst&Young (ara t-Tabella 26) il-kredituri jirċievu total ta' PLN 122 miljun jekk isir il-bejgħ ta' PZL Wroclaw u l-assi l-oħrajn ta' PZL Hydral, filwaqt li fil-każ ta' falliment li jirriżulta fil-likwidazzjoni ta' PZL Hydral, il-kredituri jirċievu biss PLN 66 miljun, u tlieta minnhom (il-Ministeru tal-Finanzi, l-Uffiċċju Reġjonali ta' Lower Silesia u l-Fond tal-Istat għar-Rijabilitazzjoni tal-Persuni b’Diżabilità) ma jirċievu xejn.

(138)

Fix-xenarju ta' bejgħ, il-kredituri pubbliċi b’kollox se jħassru PLN 195 miljun tal-obbligazzjonijiet pubbliċi. Minkejja dan, kull kreditur pubbliku jkun aħjar fix-xenarju ta' bejgħ milli f’xenarju ta' falliment. B’kollox, il-kredituri pubbliċi jirkupraw 38,5 % tal-ammont dovut lilhom.

(139)

L-awtoritajiet Pollakki infurmaw lill-Kummissjoni li skont ir-riżultati tal-istudju ta' Ernst&Young, il-kredituri pubbliċi qablu dwar il-ħlas lura parzjali tat-talbiet tagħhom fl-2010.

(140)

Fil-qafas tat-taħditiet ma' […], l-IDA qablet li l-krediti tagħha jiġu skambjati parzjalment, jitħallsu lura parzjalment u jiġu rrinunzjati parzjalment. Skont l-Anness 2 għall-Ftehim Qafas, l-IDA kellha tikkonverti parti mill-kapital tas-self tal-2007 u parti mill-kapital tas-self tal-2008 li jammontaw għal […] fil-kapital azzjonarju ta' PZL Wroclaw u assi likwidi u tirrinunzja għal imgħax f’ammont ta' […] fuq is-self tal-2007. Wara dan it-tpartit, il-kapital azzjonarju ta' PZL Wroclaw kellu jitnaqqas billi tiġi ppreżentata applikazzjoni għal dak l-għan lill-qorti li għandha ġurisdizzjoni.

(141)

L-awtoritajiet Pollakki indikaw li d-deterjorazzjoni fis-sitwazzjoni finanzjarja ta' PZL Wroclaw seħħet biss fl-2009 u kienet ikkawżata mit-tnaqqis fir-ritmu ekonomiku, li ma setax jiġi previst u li rriżulta fi tnaqqis fl-ordnijiet mill-forzi armati Pollakki ta' kważi […]%. Konsegwentement, is-sitwazzjoni tal-IDA bħala kreditur marret għall-agħar b’mod konsiderevoli, u l-istess ġralhom il-prospetti għall-irkupru bis-sħiħ tat-talbiet tagħha.

(142)

Id-dispożizzjonijiet tal-Anness 2 għall-Ftehim Qafas ġew negozjati f’korrelazzjoni mill-qrib mar-riżultati tas-suppliment għall-istudju ta' Ernst&Young. Dan is-suppliment ġie ppreparat fl-24 ta' Frar 2010. Huwa janalizza żewġ xenarji, falliment li jwassal għal-likwidazzjoni ta' PZL Wroclaw u l-bejgħ tagħha lill-investitur. B’mod partikolari, huwa jiffoka fuq dak li setgħet takkwista l-IDA mit-titoli ta' sigurtà tagħha bħala garanzija ta' ħlas ta' self fix-xenarju ta' falliment u jqabbel dan mal-ammonti li tista’ tistenna jekk PZL Wroclaw kellha tinbiegħ lill-investitur.

(143)

Is-suppliment għall-istudju ta' Ernst&Young josserva li l-assi ta' PZL Wroclaw kienu soġġetti għal pleġġijiet u ipoteki. Il-valur skont il-kotba tal-assi kollha ta' PZL Wroclaw fil-31 ta' Diċembru 2009 kien PLN 52,5 miljun, li minnu l-assi garantiti ammontaw għal PLN 21,3 miljun u l-assi mhux garantiti/mhux soġġetti għal PLN 31,2 miljun.

(144)

Anke jekk l-assi mhux garantiti/mhux soġġetti kienu jirrappreżentaw […] % tal-valur tal-assi ta' PZL Wroclaw, jekk il-bejgħ ta' PZL Wroclaw ma jkunx sar, l-awtoritajiet fiskali joħorġu deċiżjoni fiskali skont l-Artikoli 112 u 118 tal-Kodiċi tat-Taxxa (31) u jiddikkjaraw li PZL Wroclaw kienet responsabbli għall-obbligazzjonijiet tal-2006-07 ta' PZL Hydral sabiex jinfurzaw it-talbiet tagħhom. Dan huwa kkonfermat permezz ta' ittra mill-Uffiċċju tat-Taxxa tar-Reġjun ta' Lower Silesia tat-23 ta' Novembru 2007, li tiddikjara li jekk ma jirnexxix ir-ristrutturar, se jittieħdu passi ta' infurzar skont l-Artikolu 112 tal-Kodiċi tat-Taxxa.

(145)

Peress li PZL Wroclaw hija fil-pussess tal-assi tal-produzzjoni ta' PZL Hydral (li xtrat bejn l-2004 u l-2007), din id-deċiżjoni taffettwa xi wħud mill-obbligazzjonijiet pubbliċi ta' PZL Hydral. Il-valur tat-talbiet li jkunu affettwati minn proċeduri bħal dawn jikkorrispondi għall-obbligazzjonijiet pubbliċi ta' PZL Hydral iġġenerati fl-2006-07 u jkun jammonta għal minimu ta' PLN 64,4 miljun (32). Skont is-suppliment tal-istudju ta' Ernst&Young, il-valur ta' dawn it-talbiet jaqbeż il-valur skont il-kotba tal-assi mhux garantiti/mhux ipotekati. Fl-istess ħin, il-valur skont il-kotba ta' dawn l-assi għandu jiġi kkunsidrat fid-dawl tal-valur fis-suq tagħhom peress li huma riċevibbli, flus kontanti u assi monetarji oħra.

(146)

Fil-każ li PZL Wroclaw tfalli, l-assi garantiti minn ipoteki u pleġġijiet irreġistrati biss jieħdu prijorità fuq it-talbiet tal-awtoritajiet fiskali. It-talbiet tal-kredituri privati mhux garantiti ta' PZL Wroclaw ma setgħux jiġu sodisfatti mill-assi ta' PZL Wroclaw. Fid-dawl tal-fatt li mhux it-talbiet tal-kredituri kollha jiġu sodisfatti mill-proprjetà ta' falliment, l-ishma ta' PZL Wroclaw ikollhom valur żero fil-każ ta' falliment. Bl-istess mod, peress li dawk li jżommu pleġġijiet irreġistrati u ipoteki biss jiġu sodisfatti, il-pleġġijiet ordinarji ma jiswew xejn.

(147)

Abbażi ta' hekk, is-suppliment tal-istudju ta' Ernst&Yound janalizza l-valur tal-pleġġ irreġistrata tal-IDA fuq l-assi ta' PZL Wroclaw. Il-valur tat-titoli ta' sigurtà bħala garanzija ta' ħlas ta' self fil-forma ta' pleġġijiet irreġistrati fuq makkinarju huwa ddeterminat abbażi tas-suppożizzjoni li l-valuri tal-assi ppleġġjati f’każ ta' falliment ikun 50 % tal-valur skont il-kotba nett tagħhom, peress li l-valur ġust tagħhom ma kienx disponibbli u l-valur tal-assi mobbli fissi kien soġġett għal bidla skont ir-rata ta' deprezzament applikabbli. Ernst&Young qiesu li l-valur fil-każ ta' bejgħ bl-għaġġla kien rappreżentattiv fid-dawl tal-possibbiltà li jintużaw l-assi vvalutati għal xi skopijiet bħala parti minn ċerti proċessi ta' produzzjoni, il-possibbiltà li jintużaw għal skopijiet alternattivi u n-natura tal-kuntratti li kienu assoċjati magħhom. L-istudju ta' Ernst&Young jindika li meta l-assi li għandhom jinbiegħu ikunu speċifiċi ħafna u jintużaw biex jiġi prodott xerrej speċifiku, il-valur tal-likwidazzjoni tagħhom jista’ jkun baxx ħafna u jista’ jammonta għal 30 % tal-valur skont il-kotba nett tagħhom. Bħala eżempju, Autoglass Group Sa, li kellu valur tal-karta tal-bilanċ ta' PLN 19,8 miljun, ġie mibjugħ fi proċeduri ta' falliment għal PLN 6 miljun. Barra minn hekk, l-assi ta' PZL Wroclaw inkwistjoni li kienu jservu bħala pleġġ irreġistrata jinkludu ħafna oġġetti ta' valur baxx. B’mod partikolari, is-self tal-2007 ġie garantit b’lista ta' 1 709 oġġett li l-valur tagħhom naqas tul is-snin u madwar 1 400 oġġett b’valur ta' inqas minn PLN 3 500; konsegwentement, ġie mwettaq deprezzament ta' darba.

(148)

Bħar-rapport ewlieni, is-suppliment għall-istudju ta' Ernst&Young injora l-effett tal-inflazzjoni, jiġifieri fid-dawl ta' proċeduri ta' falliment possibbilment fit-tul, abbażi tal-valutazzjoni tas-sitwazzjoni ta' falliment mill-perspettiva tal-kredituri ta' PZL Wroclaw.

(149)

Skont dan l-istudju, il-valur nett skont il-kotba tal-assi li jservi bħala pleġġ irreġistrata fuq il-makkinarju kien PLN 2 106 392,71 fil-31 ta' Jannar 2010. Jekk din il-formula tiġi applikata għall-valur nett skont il-kotba tal-assi, il-valur tagħhom (fil-falliment) fil-każ ta' bejgħ bl-għaġġla huwa stmat għal PLN 1 053 196,36.

(150)

Is-suppliment għall-istudju ta' Ernst&Young jikkonkludi li l-IDA takkwista PLN 1 053 196,36 fix-xenarju ta' falliment u [> PLN 1 053 196,36] fix-xenarju tal-bejgħ (kif speċifikat fl-Anness 2 għall-Ftehim Qafas).

(151)

L-awtoritajiet Pollakki infurmaw lill-Kummissjoni li l-valur nett skont il-kotba tal-assi li jservi bħala pleġġ irreġistrata għas-self tal-2007 fir-rapporti finanzjarji awditjati tal-2007 ammonta għal PLN 5 480 861,37, u fir-rapporti finanzjarji awditjati fil-31 ta' Jannar 2010 għal PLN 818 967,55.

(152)

L-awtoritajiet Pollakki infurmaw lill-Kummissjoni li l-valur nett skont il-kotba tal-assi li jservi bħala pleġġ irreġistrata għas-self tal-2008 ammonta għal PLN 2 763 000 skont ir-rapport tal-espert indipendenti tal-1 ta' Frar 2008. Il-valur skont il-kotba ta' dawn l-assi skont ir-rapporti finanzjarji awditjati ammonta għal PLN 1 883 098,97 fl-1 ta' Frar 2008 u l-valur nett skont il-kotba ta' dawn l-assi skont ir-rapporti finanzjarji awditjati ammonta għal PLN 1 287 425,16 fil-31 ta' Jannar 2010.

(153)

Għalhekk, l-awtoritajiet Pollakki rtiraw miż-żewġ injezzjonijiet ta' kapital lil PZl Hydral, u argumentaw li t-tħassir parzjali u l-ħlasijiet lura parzjali ta' obbligazzjonijiet pubbliċi kienu ħielsa mill-għajnuna mill-Istat fid-dawl tar-regola tal-kreditur privat. Huma ddikjaraw ukoll li l-imġiba tal-kredituri pubbliċi fil-passat (1998-2007) kienet tikkonforma mar-regola tal-kreditur privat. Huma indikaw ukoll li l-bejgħ ta' PZL Wroclaw kien miftuħ, trasparenti u mhux kondizzjonali u li l-prezz offrut mill-investitur jista’ jitqies bħala l-prezz tas-suq. L-awtoritajiet Pollakki argumentaw li kemm is-self tal-2007 kif ukoll tal-2008 kien ingħata fuq termini tas-suq. Huma rtiraw ukoll mit-tpartit ta' dejn ma' ekwità għas-self tal-2007 deskritt hawn fuq iżda pproponew tpartit parzjali kemm għas-self tal-2007 u tal-2008 qabel il-bejgħ, filwaqt li argumentaw li dan kien konformi mar-regola tal-kreditur privat.

(154)

Il-parti inizjali ta' ċerti miżuri, jiġifieri n-nuqqas ta' infurzar tal-obbligazzjonijiet pubbliċi kontra PZL Hydral, bdew fl-1998, jiġifieri qabel l-adeżjoni tal-Polonja mal-UE fl-1 ta' Mejju 2004.

(155)

Skont it-Trattat tal-Adeżjoni, il-miżuri ta' għajnuna li jiddaħħlu fis-seħħ fi Stati Membri ġodda qabel l-adeżjoni u li jibqgħu applikabbli wara l-adeżjoni li jikkostitwixxu għajnuna mill-Istat fis-sens tal-Artikolu 107(1) tat-TFUE u li mhumiex għajnuna eżistenti, għandhom jiġu kkunsidrati bħala għajnuna ġdida għall-iskop tal-applikazzjoni tal-Artikolu 108(3) tat-TFUE.

(156)

Il-Punt 3 tal-Anness IV għat-Trattat tal-Adeżjoni jistabbilixxi l-proċedura ta' mekkaniżmu interim. Huwa jikkostitwixxi qafas legali għall-valutazzjoni ta' skemi tal-għajnuna u miżuri ta' għajnuna individwali li jiddaħħlu fis-seħħ fi Stat Membru ġdid qabel id-data tal-adeżjoni tiegħu mal-UE u li huma applikabbli wara l-adeżjoni.

(157)

Il-miżuri ta' għajnuna li ddaħħlu fis-seħħ qabel l-adeżjoni u li mhumiex applikabbli wara l-adeżjoni ma jistgħux jiġu eżaminati mill-Kummissjoni, jew taħt il-proċedura ta' mekkaniżmu interim jew taħt il-proċedura stabbilita fl-Artikolu 108(2) tat-TFUE. Min-naħa l-oħra, miżuri li ma ddaħħlux fis-seħħ sa wara l-adeżjoni se jiġu vvalutati mill-Kummissjoni bħala għajnuna notifikata jew bħala għajnuna mhux legali skont il-proċedura stabbilita fl-Artikolu 108(2) tat-TFUE.

(158)

Miżura hija applikabbli wara l-adeżjoni jekk tkun iddaħħlet fis-seħħ qabel l-adeżjoni iżda tkun għadha tista’ twassal, wara l-adeżjoni, għall-għoti ta' għajnuna addizzjonali jew għal żieda fl-ammont tal-għajnuna diġà pprovduta, jiġifieri jekk l-espożizzjoni ekonomika preċiża tal-Istat ma tkunx magħrufa fid-data li fiha l-miżura tkun daħlet fis-seħħ u tibqa’ mhux magħrufa fid-data tal-adeżjoni.

(159)

F’dan il-każ, il-Kummissjoni tinnota li n-nuqqas ta' infurzar tal-obbligazzjonijiet tal-kredituri pubbliċi beda fl-1998, u kompla fid-data tal-adeżjoni. Il-Kummissjoni tqis li n-nuqqas ta' infurzar tal-obbligazzjonijiet kollha pendenti fl-1 ta' Mejju 2004 waqgħu taħt il-ġurisdizzjoni tagħha minn dik id-data ’l quddiem.

(160)

Fid-dawl ta' dak li ntqal hawn fuq, in-nuqqas ta' infurzar tal-obbligazzjonijiet pubbliċi pendenti fl-1 ta' Mejju 2004 jikkostitwixxi miżura applikabbli wara l-adeżjoni u jaqa’ taħt il-ġurisdizzjoni tal-Kummissjoni skont l-Artikolu 108 tat-TFUE.

(161)

Skont l-Artikolu 107(1) tat-TFUE, l-għajnuna mill-Istat hija għajnuna mogħtija minn Stat Membru jew permezz ta' riżorsi tal-Istat f’kwalunkwe għamla li tfixkel jew thedded li tfixkel il-kompetizzjoni billi tiffavorixxi xi intrapriżi jew il-produzzjoni ta' xi oġġetti sa fejn din taffettwa l-kummerċ bejn l-Istati Membri.

(162)

Il-kundizzjonijiet stabbiliti fl-Artikolu 107(1) tat-TFUE huma kumulattivi u b’hekk biex miżura tikkwalifika bħala għajnuna mill-Istat għandhom jiġu sodisfatti l-kundizzjonijiet kollha b’mod simultanju.

(163)

Fit-taqsimiet li ġejjin, il-Kummissjoni tevalwa għajnuna mill-Istat potenzjali għal PZL Hydral u PZL Wroclaw separatament.

(164)

Hija tidentifika l-miżuri li ġejjin li jikkonċernaw lil PZL Hydral:

(165)

Hija tidentifika l-miżuri li ġejjin li jikkonċernaw lil PZL Wroclaw:

(166)

Il-Kummissjoni tosserva li l-awtoritajiet Pollakki kkontestaw il-klassifikazzjoni tal-miżuri msemmija hawn fuq bħala għajnuna mill-Istat, filwaqt li sostnew li l-miżuri għaddew mit-test tal-kreditur privat (fil-każ tal-miżuri għal PZL Hydral u t-tpartit ta' dejn ma' ekwità tal-2010 għal PZL Wroclaw) u t-test tal-investitur tas-suq (fil-każ tas-self tal-2007 u tal-2008 lil PZL Wroclaw).

(167)

Skont l-Artikolu 8 tar-Regolament tal-Kunsill (KE) Nru 659/1999 tat-22 ta' Marzu 1999 li jistabbilixxi regoli dettaljati għall-applikazzjoni tal-Artikolu 93 tat-Trattat tal-KE (33) (“ir-Regolament Proċedurali”), Stat Membru jista’, wara li jiftaħ proċedura ta' investigazzjoni formali, jirtira n-notifikazzjoni fil-ħin qabel ma l-Kummissjoni tkun ħadet deċiżjoni dwar jekk il-miżura notifikata tkunx tikkostitwixxi għajnuna. F’sitwazzjonijiet bħal dawn, il-Kummissjoni ttemm il-proċedura fuq il-bażi li ma tkun għada sservi l-ebda skop.

(168)

L-awtoritajiet Pollakki rtiraw iż-żewġ injezzjonijiet ta' kapital notifikati (PLN 113 miljun). Għalhekk, l-investigazzjoni tal-Kummissjoni ta' dawn il-miżuri m'għada sservi l-ebda skop.

(169)

L-għajnuna mill-Istat setgħet kienet mogħtija lil PZL Hydral f’għamla ta' nuqqas ta' infurzar kontinwu tal-obbligazzjonijiet pubbliċi kontra l-kumpanija minn diversi kredituri pubbliċi.

(170)

Il-Kummissjoni tindika li l-Artikolu 107(1) tat-TFUE jkopri interventi f’diversi għamliet li jnaqqsu l-ispejjeż normali tal-kumpanija u li, mingħajr ma huma sussidji fil-veru sens tal-kelma, huma simili fin-natura tagħhom u għandhom l-istess effett. Fil-każistika huwa universalment aċċettat li l-imġiba ta' korp irregolat bil-liġi pubblika responsabbli għall-ġbir tal-kontribuzzjonijiet tas-sigurtà soċjali li jittollera l-ħlas tard ta' dawn il-kontibuzzjonijiet jagħti kumpanija f’diffikultajiet finanzjarji li tgawdi minn dik l-imġiba vantaġġ kummerċjali sinifikanti billi jnaqqas il-piż assoċjat mal-applikazzjoni normali tas-sistema tas-sigurtà soċjali li ma jistax jitneħħa għal kollox mill-imgħax u l-imposti miżjuda ta' inadempjenza applikati magħha (34). Dan ir-raġunament japplika mutatis mutandis għal tariffi, imposti u taxxi oħra li jinġabru mill-awtoritajiet pubbliċi.

(171)

F'dan il-każ, il-korpi ta' ġbir pubbliċi ma kienux irkupraw it-talbiet tagħhom kontra PZL Hydral tal-1998-2007 bis-sħiħ meta l-kredituri pubbliċi adottaw il-Pjan (ara l-punt 60 et seq.).

(172)

Mill-każistika jirriżulta li, sabiex jiġi determinat jekk tkunx ingħatat għajnuna mill-Istat mill-awtoritajiet pubbliċi permezz ta' nuqqas ta' infurzar ta' talbiet pubbliċi, għandu jiġi vverifikat jekk il-kumpanija involuta kinitx se tkun inkapaċi li tikseb faċilitajiet simili minn kreditur privat fl-istess sitwazzjoni fil-konfront ta' dik il-kumpanija bħala l-korp ta' ġbir pubbliku (35).

(173)

Il-Kummissjoni tosserva li sabiex tiġi żgurata l-vijabbiltà ekonomika fit-tul ta' PZL Hydral, is-sid tagħha f’dak iż-żmien, it-Teżor Pollakk, u sussegwentement l-IDA, żviluppaw strateġija ta' privatizzazzjoni abbażi ta' istudju tal-1998 mwettaq minn konsulenti privati, u bdew tfittxija għal investituri (ara l-punt 54). Il-kredituri privati u pubbliċi appoġġjaw dan l-approċċ u kienu involuti mill-qrib fih.

(174)

Fl-2002 l-awtoritajiet Pollakki, li kien għad għandhom l-appoġġ ta' kredituri privati u pubbliċi, bdew negozjati ma' […]. Dawn il-kredituri ġew aġġornati regolarment dwar il-progress li sar (ara l-punti 30 u 56).

(175)

Il-Kummissjoni tinnota li kemm il-kredituri privati kif ukoll dawk pubbliċi qiesu li l-valur ta' PZL Hydral, u b’mod partikolari l-attivitajiet tal-avjazzjoni u d-difiża tagħha, bħala negozju avvjat kien jaqbeż sew il-valur tal-assi tagħha, b'mod partikolari permezz taċ-ċertifikati militari u l-permessi għall-kummerċ tal-armi tagħha, kif ukoll il-kapital uman tagħha, u għal dik ir-raġuni qablu li jżommu lura milli jibdew proċeduri ta' falliment kontra PZL Hydral.

(176)

Il-Kummisjoni tinnota b’mod partikolari l-kredituri privati ewlenin, jiġifieri l-Bank […] u l-Bank […], żammew lura mill-infurzar furzat tal-obbligazzjonijiet tagħhom minkejja li kellhom titoli ta' sigurtà bħala garanzija ta' ħlas ta' self tal-ewwel grad (ara l-punti 32 u 34) li seta’ jiġi infurzat direttament abbażi ta' ordnijiet infurzati tal-bank u seta’ jitneħħa b’mod pjuttost faċli (ara l-punt 28).

(177)

Il-kredituri pubbliċi, min-naħa l-oħra, ħadu azzjonijiet ta' infurzar permezz tal-uffiċjal tal-infurzar tal-qorti, u sal-aħħar tal-2007 kienu rkupraw ammont totali ta' PLN 28,76 miljun (ara l-punt 41).

(178)

Il-Kummissjoni b’hekk tikkonkludi li bejn l-1998 u l-2007, PZL Hydral kienet kapaċi takkwista faċilitajiet simili minn żewġ kredituri privati, jiġifieri l-Bank […] u l-Bank […], li mhux biss kienu fl-istess sitwazzjoni iżda f’waħda aħjar fil-konfront ta' dik il-kumpanija mill-korpi tal-ġbir pubbliċi.

(179)

Il-Kummissjoni tikkonkludi wkoll li d-deċiżjoni tal-kredituri privati u pubbliċi li jżommu lura milli jibdew proċeduri ta' falliment kontra PZL Hydral kienet iġġustifikata minn prospetti tajbin biex tiġi restawrata l-vijabbiltà għall-attivitajiet tal-avjazzjoni u d-difiża meta l-arretrati tad-djun tagħhom kienu tħallsu lura, kif indikat fl-istrateġija żviluppata fl-1998 (ara l-punt 54).

(180)

B’hekk, in-nuqqas ta' infurzar mill-korpi ta' ġbir pubbliċi tal-ammonti dovuti lilhom fl-1998-2007 ma jagħtix vantaġġ lil PZL Hydral għaliex l-awtoritajiet pubbliċi aġixxew bl-istess mod bħalma kien jaġixxi kreditur privat, u b’hekk dan ma jikkostitwixxix għajnuna mill-Istat fis-sens tal-Artikolu 107(1) tat-TFUE.

(181)

Wara li ma rnexxewx in-negozjati ta' privatizzazzjoni ma' […], il-kredituri privati ewlenin għal PZL Hydral, jiġifieri l-Bank […] u l-Bank […], issaldaw it-talbiet tagħhom fil-konfront ta' PZL Hydral.

(182)

It-talbiet tal-kredituri pubbliċi ġew issaldati f'April tal-2003 (Bank […]) u f’Novembru tal-2006 (Bank […]) rispettivament. Minkejja l-kwalità tajba tat-titoli ta' sigurtà tagħhom bħala garanzija ta' ħlas ta' self, il-Bank […] aċċetta s-saldu tad-djun ta' PZL Hydral ta' PLN 51,6 miljun għal pagament ta' PLN 4 miljun u l-Bank […] aċċetta s-saldu tad-djun ta' PZL Hydral ta' PLN 86,4 miljun għal pagament ta' PLN 11,5 miljun rispettivament (ara l-punti 31 u 33).

(183)

Il-korpi ta' ġbir pubbliċi laħqu ftehim ta' saldu ta' dejn mal-IDA u PZL Hydral fl-2007, li kien inkorporat fil-Pjan f’Novembru tal-2007. Dan il-ftehim kien fih erba’ elementi essenzjali:

(184)

Skont ir-rikavat stmat mill-bejgħ fl-2007-2010, il-Pjan ipprovda għall-korpi ta' ġbir pubbliċi biex jirkupraw PLN 120,8 miljun (ara l-punt 61). Ex post, din irriżultat stima tajba, peress li l-ammont stabbilit fl-2010 huwa ta' PLN 122,3 miljun (ara l-punt 133).

(185)

Il-Kummissjoni tinnota li l-Pjan ipprovda wkoll għal żewġ injezzjonijiet ta' kapital lil PZL Hydral, li kienu ppjanati biex iżidu l-ammont ta' flus disponibbli sabiex jiġu ssaldati l-obbligazzjonijiet passati. L-inklużjoni ta' dawn l-injezzjonijiet ta' kapital fil-Pjan kienet soġġetta għall-awtorizzazzjoni minn qabel tal-Kummissjoni; b’hekk, kien ċar għall-kredituri pubbliċi meta ntlaħaq il-ftehim dwar il-Pjan li ma setgħux iqisu l-inklużjoni ta' dawn l-ammonti addizzjonali fil-Pjan bħala miksuba u ċerta.

(186)

Il-Kummissjoni tinnota wkoll li l-Pjan ma jinkludix deċiżjoni finali dwar kif ir-rikavat se jinqasam bejn il-kredituri pubbliċi differenti. Dan il-qsim kellu jsir wara li jkun twettaq il-proċess tal-bejgħ tas-sussidjarji u l-assi abbażi tar-rikavat attwali tal-bejgħ, filwaqt li jitqiesu t-titoli ta' sigurtà bħala garanzija ta' ħlas ta' self tal-kredituri pubbliċi differenti fuq dawn l-assi.

(187)

Fir-rigward tal-valutazzjoni tal-imġiba tal-kredituri pubbliċi mill-2007 sal-2010, il-Kummissjoni tikkunsidra li għandhom jiġu vvalutati żewġ deċiżjonijiet differenti min-naħa tal-kredituri pubbliċi: l-ewwel, id-deċiżjoni fl-2007 li jaqblu mal-Pjan, u t-tieni, id-deċiżjoni fl-2010 li jaċċettaw is-saldu finali kif spjegat fit-Tabella 26 ta' din id-Deċiżjoni.

(188)

Skont il-każistika tal-Qorti, f’sitwazzjonijiet bħal dawn il-Kummissjoni għandha tapplika r-regola tal-kreditur privat, jiġifieri sabiex tiddetermina jekk it-tnaqqis f’xi wħud mid-djun dovuti minn intrapriża f’diffikultà lil korp irregolat bil-liġi pubblika jikkostitwixxix għajnuna mill-Istat, għandha tqabbel dak il-korp ma' kreditur privat li jfittex li jirkupra l-ammonti dovuti lilu minn debitur f’diffikultà finanzjarja (36).

(189)

Madankollu, skont il-każistika, meta kumpanija li tkun sejra lura mhux ħażin fis-sitwazzjoni finanzjarja tagħha tipproponi ftehim jew serje ta' ftehim għar-ristrutturar tad-dejn lill-kredituri tagħha bl-għan li ttejjeb is-sitwazzjoni u tevita l-falliment, kull kreditur għandu jieħu d-deċiżjoni tiegħu fid-dawl tal-ammont offrut lilu skont il-ftehim propost minn naħa waħda, u l-ammont li jistenni li jirkupra fil-każ tal-likwidazzjoni tal-kumpanija min-naħa l-oħra. Id-deċiżjoni tiegħu hija influwenzata minn numru ta' fatturi, inkluż l-istatus tal-kreditur bħala d-detentur tat-talba garantita, preferenzjali jew ordinarja, in-natura u l-estent ta' kwalunkwe titolu ta' sigurtà bħala garanzija ta' ħlas ta' self li jista’ jkollu, il-valutazzjoni tiegħu tal-probabbiltà li l-kumpanija terġa' ssir vijabbli u li r-riskji tat-telf tagħha jiżdiedu fil-każ li dan ma jseħħx u l-ammont li jirċievi fil-każ ta' likwidazzjoni. Jekk jirriżulta, per eżempju, li fil-każ ta' kumpanija li tkun qed tiġi likwidata, il-valur tal-bejgħ tal-assi serva biss biex ikopri l-ipoteka u t-talbiet preferenzjali, it-talbiet ordinarji ma jkollhom l-ebda valur. F’dawn iċ-ċirkostanzi, l-aċċettazzjoni minn kreditur ordinarju tal-kanċellazzjoni ta' parti kbira tat-talba tiegħu ma tkunx sagrifiċċju fil-veru sens tal-kelma (37).

(190)

Il-Kummissjoni tinnota li t-termini tas-saldu mal-korpi ta' ġbir pubbliċi huma differenti mit-termini tas-saldu maż-żewġ banek privati.

(191)

L-ewwel nett, il-banek privati għażlu ħlas immedjat, filwaqt li l-awtoritajiet ta' ġbir pubbliċi qablu li jistennew ir-riżultati tal-bejgħ tal-assi u s-sussidjarji ta' PZL Hydral.

(192)

It-tieni nett, ir-rata ta' rkupru tal-awtoritajiet tal-ġbir pubbliċi taqbeż b'ħafna r-rata ta' rkupru tal-banek privati: Il-Bank […] irkupra 7 %, il-Bank […] irkupra 13 %, filwaqt li l-awtoritajiet tal-ġbir pubbliċi setgħu jistennew li jirkupraw 38,5 % abbażi tal-proċeduri tal-bejgħ ta' PLN 122,3 miljun.

(193)

Il-Kummissjoni għandha tevalwa jekk id-deċiżjoni tal-kredituri pubbliċi biex jaqblu mal-Pjan fl-2007, li huwa differenti fin-natura tiegħu mis-saldu miksub mill-kredituri privati, kinitx tittieħed minn kreditur privat flokhom, bl-applikazzjoni tal-prinċipji stabbiliti fil-punti 188 u 189 t’hawn fuq.

(194)

L-ewwel nett, il-Kummissjoni tinnota li l-kredituri pubbliċi kienu biss illimitaw it-titoli ta' sigurtà bħala garanzija ta' ħlas ta' self, u li t-titoli ta' sigurtà tagħhom bħala garanzija ta' ħlas ta' self kienu ta' kwalità inferjuri għal dawk tal-banek privati (ara t-Tabelli 16 u 20 t’hawn fuq). B’hekk huma kienu f’pożizzjoni ta' negozjar aktar dgħajfa. Fl-istess ħin, wara s-saldu mal-kredituri privati, il-kwalità tat-titoli ta' sigurtà bħala garanzija ta' ħlas ta' self tagħhom żdiedet b’mod sinifikanti, u dan ipprovdielhom sigurtà addizzjonali, anki fil-każ li l-Pjan ma jaħdimx kif previst, xorta kienu jiksbu rata ta' rkupru aċċettabbli mill-assi.

(195)

It-tieni nett, il-Kummissjoni tinnota li l-kredituri pubbliċi jistgħu jistennew, abbażi tas-suppożizzjonijiet li jappoġġjaw il-Pjan, rata ta' rkupru sostanzjalment ogħla mill-kredituri privati, li kienu għażlu saldu ta' malajr.

(196)

It-tielet nett, il-Kummissjoni tinnota li l-kredituri privati kisbu garanziji minn PZL Hydral u PZL Wroclaw li l-obbligazzjonijiet il-ġodda kollha kellhom jitħallsu fil-ħin.

(197)

Ir-raba’, il-Kummissjoni tosserva li fir-rigward tal-obbligazzjonijiet pendenti, PZL Hydral qablet għal skeda ta' ħlasijiet li tipprovdi għal parti mid-dejn li għandu jitħallas lura fi ħlasijiet parzjali u għall-bqija li għandu jitħallas lura meta jsir magħruf ir-rikavat tal-bejgħ tal-assi u s-sussidjarji. Dawn il-ħlasijiet kienu jikkostitwixxu titjib sostanzjali meta mqabbel mal-irkupru fis-snin qabel sar il-qbil dwar il-Pjan: fl-2008, l-ewwel sena tal-Pjan, PZL Hyrdal ħallset lura PLN 54,6 miljun, meta mqabbel ma' PLN 9,5 miljun biss fl-2007 (ara t-Tabella 21).

(198)

Il-Kummissjoni tikkonkludi li abbażi ta' dawn il-garanziji u l-assigurazzjonijiet irċevuti minn PZL Hydral, il-kredituri pubbliċi aġixxew bħalma kien jaġixxi kreditur privat f’sitwazzjoni simili.

(199)

Il-Kummissjoni tosserva wkoll li minħabba l-falliment tan-negozjati ma' […] u […] (ara l-punt 94), it-twettiq attwali tal-Pjan dam aktar milli kien maħsub għall-ewwel. Il-Kummissjoni tikkunsidra li dan kien riskju inerenti fil-ftehim mogħti lill-Pjan mill-korpi ta' ġbir pubbliċi.

(200)

Is-saldu finali bejn PZL Hydral u l-kredituri pubbliċi huwa deskritt fit-Tabella 26. Meta l-prezz tal-bejgħ għal PZL Wroclaw kien ġie stabbilit wara offerta li saret minn […], il-kredituri pubbliċi qablu għal saldu mill-bejgħ tal-assi ta' PZL Hydral, mingħajr l-ebda injezzjoni ta' kapital, skont ir-regola tal-kreditur privat, filwaqt li qiesu l-valur tat-talbiet tagħhom u l-kwalità tat-titoli ta' sigurtà tagħhom bħala garanzija ta' ħlas ta' self (ara l-punt 96).

(201)

Il-Kummissjoni b’hekk għandha tiddetermina jekk, fil-każ ta' bejgħ mingħajr injezzjonijiet ta' kapital, kull wieħed mill-kredituri pubbliċi jkunx aħjar milli f'każ ta' falliment, u jekk bejgħ lil […] ikunx l-aħjar xenarju ta' bejgħ li jistgħu jistennew il-kredituri pubbliċi.

(202)

Il-kredituri pubbliċi kollha se jirkupraw aktar mill-kredituri privati (ara l-punt 134), minbarra l-Ministeru tal-Finanzi, li, madankollu, ma kellu l-ebda titolu ta' sigurtà bħala garanzija ta' ħlas ta' self u b’hekk ma jistax jitqabbel mal-kredituri pubbliċi li għandhom titoli ta' sigurtà bħala garanzija ta' ħlas ta' self tal-ewwel grad (ara l-punti 32 u 34).

(203)

Għandu jiġi nnutat ukoll li l-istudju ta' Ernst&Yount ikkummissjonat mill-IDA qabbel l-ammonti li jista’ jistenna li jirċievi kull kreditur pubbliku f’każ ta' falliment u f’każ ta' bejgħ (li sar fl-2010) (ara l-punt 137). L-istudju jikkonkludi li kull kreditur pubbliku jkun f’sitwazzjoni aħjar f’każ ta' bejgħ.

(204)

Il-Kummissjoni evalwat l-istudju ta' Ernst&Young b’mod kritiku sabiex tiddetermina jekk ir-riżultati tiegħu jifilħux għal skrutinju u biex turi li permezz ta' qbil mas-saldu, kull kreditur pubbliku jkun aġixxa bħal kreditur privat f’sitwazzjoni simili, abbażi tal-każistika kkwotata fil-punti 188 u 189 t’hawn fuq.

(205)

L-ewwel nett, il-Kummissjoni tinnota li l-istudju ta' Ernst&Young għamel użu bħala metodoloġija mill-każistika rilevanti tal-qrati Ewropej biex jivvaluta r-regola tal-kreditur privat u kkunsidra l-istatus ta' kull kreditur pubbliku, it-titoli ta' sigurtà bħala garanzija ta' ħlas ta' self tiegħu, il-klassifikazzjoni u l-ammont li jirkupra fil-każ ta' likwidazzjoni.

(206)

It-Tabella 26 għal din id-deċiżjoni turi li skont din il-valutazzjoni, kull kreditur pubbliku (l-Uffiċċju tas-SigurtàSoċjali, l-Uffiċċju tat-Taxxa tar-Reġjun ta' Lower Silesia, l-Uffiċċju tat-Taxxa ta' Wroclaw Psie Pole, il-Kunsill tal-Belt ta' Wroclaw, il-Fond tal-Istat għar-Rijabilitazzjoni tal-Persuni b’Diżabilità, l-Uffiċċju Reġjonali ta' Lower Silesia u l-Ministeru tal-Finanzi) jinsab aħjar f’każ tal-bejgħ tal-assi kollha ta' PZL Hydral, jiġifieri kull wieħed minn dawn jirkupra proporzjon ogħla tal-obbligazzjonijiet pendenti tiegħu, milli f’xenarju ta' falliment li jwassal għal likwidazzjoni, filwaqt li tiġi kkunsidrata l-klassifikazzjoni u t-titoli ta' sigurtà bħala garanzija ta' ħlas ta' self rispettivi tal-kredituri pubbliċi (ara l-punt 134).

(207)

Il-Kummissjoni mbagħad ivverifikat il-kredibbiltà tax-xenarju ta' falliment żviluppat minn Ernst&Young. Il-punt tal-bidu ta' din il-valutazzjoni huwa li l-valur ta' PZL Hydral huwa żero, peress li l-obbligazzjonijiet tagħha jaqbżu b’ħafna l-valur tal-assi u s-sussidjarji tagħha. B’hekk kwalunkwe kreditur f’xenarju ta' falliment ikun jista’ biss jirkupra parti mill-obbligazzjonijiet pendenti tiegħu li tkun garantita minn titoli ta' sigurtà bħala garanzija ta' ħlas ta' self, sa fejn il-grad tiegħu jippermettilu li jgawdi mill-valur ta' likwidazzjoni tal-assi garantiti.

(208)

It-tabelli 16 u 20 juru t-titoli ta' sigurtà bħala garanzija ta' ħlas ta' self għal kull kreditur pubbliku. Il-limitu sa fejn jiġi sodisfatt kull kreditur pubbliku mit-titoli ta' sigurtà tiegħu bħala garanzija ta' ħlas ta' self, meta jiġi kkunsidrat il-grad tagħhom, fil-każ li PZL Hydral tiġi ddikjarata li falliet, qed jidher fil-punt 131. Bil-ħsieb li jiġi stmat il-valur tal-bejgħ bl-għaġġla tal-proprjetà immobbli, Ernst&Young ħadu l-valur ġust kurrenti tal-assi li jiffurmaw parti mill-kumpanija skont il-punt 30 u l-istandard internazzjonali tal-kontabilità (IAS) 16 dwar proprjetà, impjant u tagħmir. (38) Il-Kummissjoni tinnota li l-użu tal-IAS huwa obbligatorju fl-UE u b’hekk huwa punt ta' bidu adegwat għall-valutazzjoni tal-valur tal-likwidazzjoni. Il-Kummissjoni tqis bħala raġonevoli li l-valur f’każ ta' falliment ta' dawn l-assi jitnaqqas fil-bejgħ bl-għaġġla b’50 % minħabba l-fatt li dawn l-assi se jinbiegħu separatament, li mhux se jkun possibbli li tiġi applikata r-regola tal-“avvjament” minħabba t-talba mnaqqsa għall-assi industrijali fil-kriżi ekonomika u li dan il-valur huwa ’l fuq mid-dħul medju mill-bejgħ tal-assi waqt falliment fil-Polonja, li huwa 26,86 % meta mqabbel mal-valur ġust tagħhom.

(209)

Il-Kummissjoni tikkonkludi li kull kreditur pubbliku jkun aħjar f’xenarju ta' bejgħ lil […] milli f’xenarju ta' falliment.

(210)

Għad irid jiġi ddeterminat jekk l-offerta mingħand […] hijiex l-aħjar offerta li jistgħu jistennew il-kredituri pubbliċi. Il-Kummissjoni tinnota li meta fl-ewwel nofs tal-2009 deher biċ-ċar li l-kundizzjonijiet tal-offerta mingħand […] ma kinux ġew sodisfatti, […] kien l-uniku xerrej interessat fl-akkwist tal-ishma ta' PZL Wroclaw. Minkejja l-pubblikazzjoni ta' sejħa għall-espressjoni ta' interess u tfittxija attiva għal investituri potenzjali sa minn Mejju tal-2008 (ara l-punt 90 et seq.), l-ebda investiture ieħor ma ppreżenta ruħu. B’hekk il-kredituri pubbliċi ma kellhomx bażi raġonevoli biex jemmnu li xi investitur ieħor kien se joffri prezz aħjar fil-futur.

(211)

Abbażi ta' dan, il-Kummissjoni tikkunsidra li billi fl-2010 il-kredituri pubbliċi qablu mal-istruttura ta' saldu li tidher fit-Tabella 26, huma aġixxew bħala kreditur privat li jfittex li jirkupra l-ammonti dovuti lilu minn debitur f’diffikultà finanzjarja. B’hekk il-kredituri pubbliċi ma tawx vantaġġ lil PZL Hydral. Għal din ir-raġuni, is-saldu tal-obbligazzjonijiet pendenti f’għamla ta' tħassir parzjali tal-obbligazzjonijiet pubbliċi skont l-istudju ta' Ernst&Young ma kienx jinvolvi għajnuna mill-Istat fis-sens tal-Artikolu 107(1) tat-TFUE.

(212)

Il-Kummissjoni teħtieġ li tiddetermina jekk is-self tal-2007 kienx ta' vantaġġ għal PZL Wroclaw. Għal dak l-għan, il-Kummissjoni għandha tistabbilixxi jekk investitur privat (“il-prinċipju ta' investitur f’ekonomija tas-suq”) kienx jikkonkludi t-tranżazzjoni inkwistjoni fuq l-istess termini u, jekk le, fuq liema termini kien jagħmel hekk (39).

(213)

Il-Kummissjoni tinnota li sabiex taċċerta jekk self mogħti minn korp tal-Istat li diġà jkun azzjonist fil-kumpanija jikkonformax mal-prinċipju ta' investitur f'ekonomija tas-suq, l-investiment tiegħu għandu jitqabbel mal-investimenti minn kumpanija prinċipali privata jew grupp privat ta' kumpaniji li jfittxu l-politika strutturali u jkunu ggwidati minn prospetti aktar fit-tul (40).

(214)

Il-Kummissjoni hija tal-opinjoni li l-IDA mhijiex kreditur estern li jinvesti sabiex jikseb profitti bbażati fuq il-qligħ fuq l-investiment tiegħu f’għamla ta' rata tal-imgħax, iżda li hija azzjonist b'aktar minn 90 % tal-ishma f'PZL Hydral, li min-naħa tagħha għandha 100 % tal-ishma f'PZL Wroclaw. B’hekk għandu jiġi ddeterminat jekk investitur privat kienx jagħti s-self tal-2007 fl-istess ċirkostanzi.

(215)

Fir-rigward tas-self tal-2007 lil PZL Wroclaw, il-Kummissjoni tinnota l-ewwel li ġie mogħti lil PZL Wroclaw, kumpanija li f’dak iż-żmien kienet finanzjarjament vijabbli u mhux f’diffikultà finanzjarja fis-sens tal-linji gwida għas-salvataġġ u r-ristrutturar (ara l-punti 47 u 48). Għall-kuntrarju kienet kumpanija ġdida mingħajr dejn li diġà kellha numru sinifikanti ta' ordnijiet fil-kotba tagħha, l-aktar fil-forma ta' kuntratti mal-Ministeru tad-Difiża Pollakk, li miegħu kellha relazzjoni fin-negozju li kienet ilha teżisti.

(216)

Il-Kummissjoni tinnota li l-IDA antiċipat li tiggarantixxi qligħ fuq l-investiment tagħha permezz ta' tpartit ta' dejn ma' ekwità ta' […]% u l-bejgħ sussegwenti ta' dan is-sehem f’PZL Wroclaw lil investitur privat (għal madwar […]), kif huwa ddikkjarat fil-Pjan.

(217)

L-IDA ikkunsidrat in-negozjati li kienu għaddejjin ma' […] (ara l-punt 74).

(218)

Sabiex jiġi stabbilit jekk l-IDA kinitx aġixxiet skont il-prinċipju tal-investitur privat, jeħtieġ li jiġi ddeterminat xi prezz tal-bejgħ setgħet tistenna l-IDA għas-sehem tagħha, x’kien il-livell ta' riskju, u jekk il-qligħ mill-investiment li jirriżulta mill-bejgħ kienx adegwat meta mqabbel mar-riskju meħud mill-IDA.

(219)

Qabel tat is-self, l-IDA kienet ikkummissjonat studju minn espert indipendenti sabiex tistabbilixxi l-valur ta' PZL Wroclaw meta nfirdet minn PZL Hydral (ara l-punt 66).

(220)

Il-Kummissjoni evalwat dan l-istudju b’mod kritiku u kkonkludiet li kien raġonevoli li wieħed jistenna prezz tal-bejgħ ta' mill-inqas […] (ara l-punt 71 et seq.). Permezz tal-bejgħ ta' madwar […]% tal-ishma, l-IDA b’hekk setgħet tistenna qligħ konsiderevoli ta' mill-inqas PLN 48,5 miljun fil-każ ta' bejgħ ta' suċċess.

(221)

Il-Kummissjoni tirrikonoxxi li dejjem hemm riskji konsiderevoli marbuta ma' kull privatizzazzjoni. F’dan il-każ l-ewwel attentat diġà kien falla. Fl-istess ħin, il-Kummissjoni tinnota li l-prospetti globali għall-kumpanija tal-avjazzjoni u d-difiża Pollakka kienu relattivament stabbli meta wieħed iqis id-dmirijiet kontinwi tal-armata Pollakka barra mill-pajjiż u l-impenn tal-Polonja lejn in-NATO fir-rigward tal-kapaċitajiet ta' difiża tagħha. Barra minn hekk, fid-dawl tal-ħtieġa għall-pussess ta' permessi speċjali, l-ostakoli għad-dħul fis-segment tas-suq huma għoljin, u dan iżid l-attrazzjoni tal-atturi stabbiliti.

(222)

Il-Kummissjoni tinnota wkoll li l-qligħ mistenni mill-investiment kien importanti biżżejjed biex jiġġustifika riskju pjuttost għoli u li, barra minn hekk, l-IDA kienet kisbet titoli ta' sigurtà bħala garanzija ta' ħlas ta' self fl-għamla ta' pleġġ irreġistrata fuq il-makkinarju għal PLN 5,5 miljun u pleġġ ordinarja fuq […]% tal-ishma (ara l-punt 65).

(223)

Fuq din il-bażi, il-Kummissjoni hija sodisfatta li s-self tal-2007 ngħata skont il-prinċipju tal-investitur privat u b’hekk ma jikkostitwix għajnuna mill-Istat fis-sens tal-Artikolu 107(1) tat-TFUE.

(224)

Il-Kummissjoni teħtieġ li tiddetermina jekk is-self tal-2008 kienx ta' vantaġġ għal PZL Wroclaw. Għal dak l-għan il-Kummissjoni se tapplika l-prinċipju tal-investitur privat kif stabbilit fil-punti 212 sa 214 u għar-raġunijiet spjegati fihom.

(225)

Fir-rigward tas-self tal-2008 lil PZL Wroclaw, il-Kummissjoni tinnota l-ewwel li dan ingħata lil PZL Wroclaw, kumpanija li dak iż-żmien kienet finanzjarjament vijabbli u mhux f’diffikultà finanzjarja fis-sens tal-linji gwida għas-salvataġġ u r-ristrutturar. Minflok, din kienet kumpanija ġdida mingħajr dejn li diġà kellha numru sinifikanti ta' ordnijiet fil-kotba tagħha, l-aktar fil-forma ta' kuntratti għal ammont ta’[…] mal-Ministeru tad-Difiża Pollakk (ara l-punt 48). Il-Kummissjoni tqis li dan is-self ingħata speċifikament bl-għan li jiġi pproċessat in-numru dejjem jikber ta' ordnijiet mill-Ministeru tad-Difiża. Barra minn hekk, fl-2008 l-kumpanija kisbet finanzjament privat fil-forma ta' kiri operattiv (ara l-punt 87).

(226)

Il-Kummissjoni tinnota li l-IDA tat is-self tal-2008 ftit qabel it-tmiem mistenni tan-negozjati ma' […] dwar il-bejgħ ta' PZL Wroclaw (ara l-punt 74). Għamlet hekk sabiex tipprovdi self temporanju għall-perjodu qabel ġie konkluż il-ftehim, meta PZL Wroclaw kellha tespandi l-kapaċità tagħha malajr sabiex tkampa maż-żieda fl-ordnijiet mill-Ministeru tad-Difiża. Il-motivazzjoni ewlenija tal-IDA għall-għoti tas-self b’hekk kienet li tiżgura li l-kumpanija tibbenefika mill-opportunitajiet kummerċjali qabel ma' ġie konkluż il-ftehim ma' […] u biex tiżgura li l-ftehim jiġi konkluż malajr.

(227)

Il-Kummissjoni tinnota li s-self huwa limitat għal PLN 4 miljun, l-ammont meħtieġ biex jinkisbu l-assi meħtieġa biex tintlaħaq id-domanda addizzjonali mill-Ministeru tad-Difiża.

(228)

Barra minn hekk, il-Kummissjoni tosserva li s-self ġie ggarantit permezz ta' pleġġ irreġistrata fuq il-makkinarju għal valur ta' PLN 2,8 miljun u permezz ta' pleġġ ordinarja fuq l-ammonti riċevibbli mill-kuntratti kummerċjali għal valur ta' PLN 5,2 miljun, u li kellha rata tal-imgħax varjabbli li kienet identika għar-rata ta' referenza ppubblikata mill-Kummissjoni (ara l-punt 83). Minkejja dan, qabel l-għoti tas-self tal-2008, l-IDA eżaminat is-sitwazzjoni finanzjarja ta' PZL Wroclaw u sabet li kienet qed tagħmel il-qligħ. Fuq dik il-bażi l-IDA setgħet tistenna li PZL Wroclaw tiġġenera fluss ta' flus biżżejjed biex tħallas lura s-self u biex l-IDA tirċievi qligħ mill-investiment tagħha.

(229)

Il-Kummissjoni tosserva li huwa komportament tan-negozju normali għal azzjonist b’maġġoranza li jkun fil-proċess li jbiegħ kumpanija li jagħti self temporanju żgħir, jekk dak is-self ikun meħtieġ biex jittieħed vantaġġ mill-opportunitajiet kummerċjali u jiżgura li l-bejgħ jiġi konkluż mingħajr xkiel. Il-Kummissjoni hija tal-opinjoni li s-self tal-2008, li barra minn hekk, kien garantit b’mod adegwat u pprovda għall-imgħax skont ir-rata ta' referenza, ingħata mill-IDA skont dik il-loġika.

(230)

Fuq din il-bażi, il-Kummissjoni hija sodisfatta li s-self tal-2008 ngħata skont il-prinċipju ta' investitur f'ekonomija tas-suq u b'hekk ma jikkostitwixxix għajnuna mill-Istat fis-sens tal-Artikolu 107(1) tat-TFUE.

(231)

Billi qablet li tpartat id-dejn tagħha ma' ekwità u mbagħad tgħaddi r-rikavat kollu tal-bejgħ tal-ekwità lil PZL Hydral sabiex tippermettilha li tħallas l-obbligazzjonijiet pendenti tagħha kollha lill-korpi rregolati bil-liġi pubblika kif previst fil-Pjan, l-IDA irrinunzjat djun ta' PLN 17,2 miljun, u rkuprat biss [> PLN 1 053 196,36].

(232)

Huwa meħtieġ li jiġi stabbilit jekk tpartit ta' dejn ma' ekwità jinvolvix vantaġġ mogħti mill-IDA lil PZL Wroclaw. Għal dan l-għan, il-Kummissjoni għandha tiddetermina jekk, meta wettqet din it-tranżazzjoni, l-IDA kkonformatx mar-regola tal-kreditur privat kif stabbilita fil-punti 188 u 189.

(233)

Il-Kummissjoni l-ewwel tinnota li l-offerta ta' […] tal-2009 […] kienet inqas mill-offerta ta' […] tal-2008 Il-Kummissjoni tikkunsidra li din id-differenza tirrifletti d-deterjorament tas-sitwazzjoni ta' PZL Wroclaw, li fl-2008 kienet qed tagħmel profitt u kellha prospetti tajbin, filwaqt li fl-2009 kienet qed turi sinjali ta' diffikultajiet, l-aktar minħabba t-tnaqqis sinifikanti fl-ordnijiet mill-Ministeru tad-Difiża.

(234)

Il-Kummissjoni tinnota wkoll li l-IDA ma kinitx qed tistenna li ssib xerrej ieħor minbarra […] għall-ishma li kienet kisbet f’PZL Wroclaw b'riżultat tat-tpartit ta' dejn ma' ekwità (ara l-punt 210). Sabiex tiżgura li l-ftehim kien ta' suċċess, l-IDA kellha tiżgura li tista’ tikseb is-saldu tal-obbligazzjonijiet tal-kredituri pubbliċi, sakemm kellhom ipoteki fuq l-assi ta' PZL Wroclaw, għaliex inkella ma kinitx tkun f’pożizzjoni li tirrispetta l-impenn li titrasferixxi l-assi kollha ħielsa minn titoli ta' sigurtà bħala garanzija ta' ħlas ta' self.

(235)

Barra minn hekk, jekk il-bejgħ ta' PZL Wroclaw - li kien l-avveniment li fuqu kien ibbażat ir-ristrutturar tal-obbligazzjonijiet pubbliċi permezz ta' ħlasijiet mill-ġdid parzjali - ma tkompliex, l-awtoritajiet fiskali kellhom jinfurzaw it-talbiet tagħhom skont il-Kodiċi tat-Taxxa (ara l-punt 114). Barra minn hekk, fid-dawl tas-sitwazzjoni finanzjarja ta' PZL Wroclaw, il-falliment tal-ftehim tal-bejgħ kien iwassal għall-falliment ta' PZL Wroclaw (ara l-punt 52).

(236)

B’hekk il-Kummissjoni tikkonkludi li l-unika alternattiva għall-aċċettazzjoni tar-rinunzja de facto ta' PLN 17,2 miljun kien li PZL Wroclaw u PZL Hydral jitqiegħdu f’likwidazzjoni.

(237)

Is-suppliment għall-istudju ta' Ernst&Young wettaq valutazzjoni ta' dawn iż-żewġ xenarji. Il-Kummissjoni evalwat l-istudju ta' Ernst&Young b’mod kritiku sabiex tiddetermina jekk ir-riżultati tiegħu jifilħux għal skrutinju u juru li, billi qablet mas-saldu, l-IDA aġixxiet bħala kreditur privat f’sitwazzjoni simili, billi bbażat ruħha fuq il-każistika kkwotata fil-punti 188 u 189.

(238)

Fil-każ ta' falliment, l-istudju jikkonkludi li l-kredituri ordinarji mhuma se jirċievu xejn, billi ħafna mill-assi huma soġġetti għal pleġġijiet u ipoteki u, barra minn hekk, l-awtoritajiet fiskali se jkunu jistgħu jinfurzaw it-talbiet tagħhom kontra PZL Wroclaw (ara l-punti 143 et seq.). Il-Kummissjoni kkonfermat dan it-tagħrif billi eżaminat ir-rapporti finanzjarji ta' PZL Wroclaw u billi analizzat l-implimentazzjoni tal-Liġi Pollakka, u waslet għall-konklużjoni li l-valutazzjoni ta' Ernst&Young hija ġustifikata.

(239)

Bħala riżultat, il-Kummissjoni tikkunsidra li l-valur tal-pleġġ ordinarja fuq ir-riċevibbli li tiggarantixxi s-self tal-2008 hija mingħajr l-ebda valur f’xenarju ta' likwidazzjoni. Barra minn hekk, il-pleġġ fuq […]% tal-ishma hija mingħajr l-ebda valur fix-xenarju ta' likwidazzjoni, peress li l-valur tal-ishma stess huwa żero.

(240)

B’hekk, sabiex tistabbilixxi x’takkwista l-IDA f’xenarju ta' likwidazzjoni, huwa meħtieġ li jiġu stmati l-profitti li tista’ tistenna mill-bejgħ ta' oġġetti li fuqhom tkun irreġistrat pleġġijiet.

(241)

Is-suppliment tal-istudju ta' Ernst&Young jinnota li l-makkinarju li fuqu l-IDA kellha pleġġijiet għas-self tal-2007 kellu valur skont il-kotba fl-2007 ta' PLN 5,5 miljun, filwaqt li l-makkinarju li fuqu kellha pleġġijiet għas-self tal-2008 kellu valur skont il-kotba ta' PLN 2,8 miljun fl-2008.

(242)

Fis-suppliment tal-istudju ta' Ernst&Young il-valutazzjoni tal-valur ta' likwidazzjoni tal-pleġġijiet irreġistrati favur l-IDA kien ibbażat fuq il-valur skont il-kotba tal-assi elenkati fir-rapporti finanzjarji awditjati ta' PZL Wroclaw (ara l-punti 151 u 152) fil-31 ta' Jannar 2010, jiġifieri PLN 2,1 miljun.

(243)

Il-Kummissjoni tqis li l-valur skont il-kotba tal-assi mobbli fissi (li jservu bħala pleġġ għas-self tal-2007 u l-2008), kif imdaħħal fir-rapport finanzjarju awditjat, huwa punt tal-bidu adegwat għall-valutazzjoni tal-valur tal-likwidazzjoni tagħhom. Il-Kummissjoni l-ewwel tinnota li d-differenza l-kbira bejn il-valur skont il-kotba u l-valur nett tal-assi li l-istudju tal-2008 ta' valutazzjoni ta' PZL Wroclaw kien sab kien minħabba ż-żieda sinifikanti fil-valur tal-proprjetà immobbli. Ma sar l-ebda aġġustament għall-valur tal-makkinarju. It-tieni, il-Kummissjoni tinnota li, fid-dawl tal-perjodu qasir ta' żmien bejn l-istabbiliment tal-pleġġ u l-valutazzjoni, m’hemm l-ebda indikazzjonijiet oħra li l-valur skont il-kotba ma jirriflettix il-valur stmat b'mod konservattiv tal-makkinarju.

(244)

Is-suppliment tal-istudju ta' Ernst&Young jsostni li fil-każ ta' likwidazzjoni, dawn l-assi kienu jinbiegħu f’bejgħ bl-għaġġla bi tnaqqis ta' 50 %, u li b’hekk il-valur mistenni huwa ta' PLN 1 053 196,36. Il-Kummissjoni tirrikonoxxi li l-assi bħall-makkinarju li jitqiegħdu għall-bejgħ fil-kuntest ta' likwidazzjoni normalment jinbiegħu anqas mill-valur skont il-kotba tagħhom.

(245)

Il-Kummissjoni tqis li l-iskont ta' 50 % huwa ġustifikat għar-raġunijiet imsemmija minn Ernst&Young, u deskritti fil-punt 147 t’hawn fuq. B’mod partikolari tikkunsidra li l-valutazzjoni tal-valur ipotetiku fil-każ ta' falliment saret permezz ta' metodoloġija li tista’ tiġi kkunsidrata bħala adegwata għall-iskop li jiġi determinat il-valur realizzabbli ta' talbiet fil-konfront ta' debituri mhedda minn falliment, filwaqt li jiġi kkunsidrat it-tip ta' makkinarju li jkun qed jinbiegħ, il-kontinġenza tal-bejgħ fuq konsumatur speċifiku (il-Ministeru tad-Difiża) li qed inaqqas l-ispejjeż tiegħu fid-dawl tal-ħtieġa li jadatta għat-tnaqqis fid-dħul fiskali li rriżulta mill-kriżi.

(246)

Il-Kummissjoni b’hekk tikkonkludi li, skont it-tagħrif disponibbli għaliha meta ġiet adottata din id-deċiżjoni, il-valur ta' falliment tas-self pendenti tal-IDA kien PLN 1 053 196,36.

(247)

Fix-xenarju tal-bejgħ, il-valur tas-self pendenti tal-IDA kien ogħla, peress li […] offriet li tħallas lill-IDA [> PLN 1 053 196,36].

(248)

Il-Kummissjoni tikkonkludi li kreditur privat fis-sitwazzjoni tal-IDA kien jaċċetta li jirrinunzja PLN 17.2 miljun, għaliex ma setax jistenna li jirkupra aktar mit-talbiet tiegħu fi proċeduri ta' falliment. B’hekk, fuq dik il-bażi, il-Kummissjoni hija sodisfatta li l-imġiba tal-IDA fir-rigward tat-tpartit ta' dejn ma' ekwità tal-2010 hija konformi mal-prinċipju tal-investitur privat u li t-tpartit ta' dejn ma' ekwità ma jinkludix għajnuna mill-Istat fis-sens tal-Artikolu 107(1) tat-TFUE.

(249)

Il-Kummissjoni tinnota li l-investigazzjoni formali dwar l-injezzjonijiet ta' kapital ta' PLN 113 miljun innotifikata iżda sussegwentement irtirata mill-awtoritajiet Pollakki m’għadha sservi l-ebda skop skont l-Artikolu 8 tar-Regolament Proċedurali.

(250)

Fir-rigward tan-nuqqas ta' infurzar tal-obbligazzjonijiet tal-kredituri pubbliċi u s-saldu eventwali tagħhom, il-Kummissjoni sabet li l-kredituri pubbliċi aġixxew skont ir-regola tal-kreditur privat. Konsegwentement, l-imġiba tal-kredituri pubbliċi ma tinvolvix għajnuna mill-Istat fis-sens tal-Artikolu 107(1) tat-TFUE.

(251)

Il-Kummissjoni sabet li t-tpartit parzjali ppjanat ta' dejn ma' ekwità mill-Aġenzija tal-Iżvilupp Industrijali fil-qafas tal-Pjan, kif emendat, ma jikkostitwix għajnuna mill-Istat fis-sens tal-Artikolu 107(1) tat-TFUE peress li dan jikkonforma mar-regola tal-kreditur privat. Il-Kummissjoni tqis ukoll li s-self tal-2007 u s-self tal-2008 favur PZL Wroclaw ma jikkostitwixxux għajnuna mill-Istat fis-sens tal-Artikolu 107(1) tat-TFUE peress li huma jikkonformaw mal-prinċipju tal-investitur privat.