(1)

Id-Direttiva 96/23/KE tistabbilixxi miżuri għall-monitoraġġ ta’ sustanzi u gruppi ta’ residwi mniżżla fl-Anness I tagħha. Skont id-Direttiva 96/23/KE, l-inklużjoni u l-permanenza fuq il-listi tal-pajjiżi terzi li minnhom l-Istati Membri huma awtorizzati jimpurtaw annimali u prodotti primarji li joriġinaw mill-annimali koperti minn dik id-Direttiva, għandhom ikunu soġġetti għat-tressiq ta’ pjan mill-pajjiżi terzi kkonċernati li jistipula l-garanziji li huma joffru fejn jidħol il-monitoraġġ tal-gruppi ta’ residwi u sustanzi elenkati f’dak l-Anness. Dawn il-pjanijiet għandhom jiġu aġġornati fuq it-talba tal-Kummissjoni, partikolarment meta ċerti verifiki jkunu jeżiġu dan.

(2)

Id-Deċiżjoni tal-Kummissjoni 2004/432/KE tad-29 ta’ April 2004 dwar l-approvazzjoni tal-pjanijiet tal-monitoraġġ tar-residwi sottomessi minn pajjiżi terzi skont id-Direttiva tal-Kunsill 96/23/KE (2) tapprova l-pjanijiet għall-monitoraġġ tar-residwi mressqa minn ċerti pajjiżi terzi elenkati fl-Anness ta’ dik id-Deċiżjoni għall-annimali u l-prodotti tal-annimali primarji indikati f’dik il-lista.

(3)

Il-Botswana ssottomettiet pjan għall-monitoraġġ tar-residwi lill-Kummissjoni għall-ekwini. L-evalwazzjoni ta’ dak il-pjan u l-informazzjoni addizzjonali miksuba mill-Kummissjoni jipprovdu biżżejjed garanziji għal dak il-pjan fir-rigward tal-ekwini. Għaldaqstant, l-ekwini għandhom jiġu inklużi fl-annotazzjoni għall-Botswana fil-lista fl-Anness tad-Deċiżjoni 2004/432/KE.

(4)

Il-Gambja naqset milli tissottometti pjan ta’ monitoraġġ tar-residwu għall-akkwakultura għas-sena 2009. Għaldaqstant, l-ekwini għandhom jiġu inklużi fl-annotazzjoni għall-Gambja fil-lista fl-Anness tad-Deċiżjoni 2004/432/KE. Il-Gambja ġiet infurmata skont dan.

(5)

L-ispezzjoni tal-Kummissjoni għall-Indja żvelat nuqqasijiet serji fl-implimentazzjoni tal-pjan ta’ monitoraġġ tar-residwu għall-ħalib u l-għasel. Għaldaqstant, l-annotazzjoni għall-Indja li tikkonċerna l-ħalib u l-għasel għandha titħassar mil-lista fl-Anness tad-Deċiżjoni 2004/432/KE. L-Indja ġiet infurmata skont dan.

(6)

Ir-Repubblika tal-Moldova ssottomettiet pjan għall-monitoraġġ tar-residwi lill-Kummissjoni għall-għasel. L-evalwazzjoni ta’ dak il-pjan u l-informazzjoni addizzjonali miksuba mill-Kummissjoni jipprovdu biżżejjed garanziji dwar il-pjan li jikkonċerna l-għasel. Għaldaqstant, l-għasel għandu għalhekk jiġi inkluż fl-annotazzjoni għar-Repubblika tal-Moldova fil-lista fl-Anness tad-Deċiżjoni 2004/432/KE.

(7)

Dik li kienet ir-Repubblika Jugoslava tal-Maċedonja ppreżentat pjan ta’ monitoraġġ tar-residwu għall-Kummissjoni għall-ħnieżer, it-tjur, il-prodotti tal-akkwakultura, il-bajd, it-tjur selvaġġ u l-għasel. Il-valutazzjoni ta’ dak il-pjan u l-informazzjoni addizzjonali miksuba mill-Kummissjoni jipprovdu biżżejjed garanziji, dwar il-pjan għall-monitoraġġ tar-residwi għal dawk il-prodotti. Għaldaqstant, l-għasel għandu għalhekk jiġi inkluż fl-annotazzjonijiet għal dik li kienet ir-Repubblika Jugoslava tal-Maċedonja fil-lista fl-Anness tad-Deċiżjoni 2004/432/KE.

(8)

Is-Singapor issottometta pjan għall-monitoraġġ tar-residwi lill-Kummissjoni għall-akkwakultura. Il-valutazzjoni ta’ dak il-pjan u l-informazzjoni addizzjonali miksuba mill-Kummissjoni jipprovdu biżżejjed garanziji, dwar il-pjan għall-monitoraġġ tar-residwi tal-prodotti tal-akkwakultura. Għalhekk, l-annotazzjoni għall-akkwakultura għas-Singapor fil-lista fl-Anness għad-Deċiżjoni 2004/432/KE għandha tiġi emendata biex tħassar ir-restrizzjoni tal-importazzjonijiet għall-prodotti tal-ħut magħmula minn materja prima tal-akkwakultura mill-Istati Membri tal-UE jew pajjiżi terzi approvati mill-UE.

(9)

L-Uganda ppreżentat pjan għall-monitoraġġ tar-residwi lill-Kummissjoni għall-għasel u għall-akkwakultura. L-evalwazzjoni ta’ dak il-pjan u l-informazzjoni addizzjonali miksuba mill-Kummissjoni jipprovdu biżżejjed garanziji dwar dak il-pjan biex jiġġustifikaw l-inklużjoni tal-għasel u tal-akkwakultura fl-annotazzjonijiet għall-Uganda fil-lista tal-Anness għad-Deċiżjoni 2004/432/KE.

(10)

Sabiex jiġi evitat kwalunkwe tfixkil għall-kummerċ, għandu jiġi stabbilit perjodu tranżitorju biex ikopri konsenji ta’ prodotti ta’ akkwakultura mill-Gambja u għasel mill-Indja li ntbagħtu lill-Unjoni qabel id-data tal-applikazzjoni ta’ din id-Deċiżjoni. Ma hemmx bżonn li jiġi pprovdut arranġament tranżitorju bħal dan għal prodotti tal-ħalib mill-Indja għaliex bħalissa ma hemm l-ebda importazzjoni ta’ prodotti bħal dawn mill-Indja ġewwa l-Unjoni Ewropea minħabba li ma hemm l-ebda stabbilimenti ta’ prodotti tal-ħalib elenkati fl-Indja li l-importazzjoni tal-prodotti tal-ħalib tagħhom jista’ jiġi permess.

(11)

Id-Deċiżjoni 2004/432/KE għandha għalhekk tiġi emendata skont dan.

(12)

Il-miżuri stipulati f’din id-Deċiżjoni huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali,