4.6.2010   

MT

Il-Ġurnal Uffiċjali tal-Unjoni Ewropea

C 146/18

(1)

Fis-26 ta' April 2010 il-Kunsill eżamina l-programm ta' konverġenza aġġornat tar-Renju Unit, li jkopri l-perijodu mill-2009/2010 sal-2014/2015.

(2)

Il-kriżi ekonomika u finanzjarja li bdiet wara l-2007 wara diversi snin ta' tkabbir qawwi, rat il-produzzjoni ekonomika tar-Renju Unit tonqos b'mod kumulattiv b'madwar 6 %, b'irkupru żgħir li beda jidher fl-aħħar kwart tal-2009. Il-kriżi kienet preċeduta u aggravata parzjalment minn perijodu ta' żidiet progressivi fl-ingranaġġ tas-settur tad-djar u dak finanzjarju, b'tali mod li d-dipendenza fuq l-influssi kapitali netti kienet kbira u persistenti. Bi tweġiba għall-kriżi li qed tiżvolġi, il-Bank tal-Ingilterra rreaġixxa bi programm aggressiv ta' tnaqqis tar-rati tal-imgħax, appoġġ għal-likwidità għas-settur bankarju u minn Marzu tal-2009, tnaqqis kwantitattiv. Il-gvern intervjena wkoll b'mod estensiv biex jistabbilizza s-sistema finanzjarja, permezz ta' injezzjonijiet kbar ta' ekwità, garanziji ta' depożitu u l-provvista ta' assigurazzjoni ta' responsabbilità. F'konformità mal-PERE, il-gvern implimenta stimolu fiskali mdaqqas, li flimkien mat-tħaddim tal-istabbilizzaturi awtomatiċi u l-effetti fuq id-dħul tat-tnaqqis fil-prezzijiet tal-assi kkontribwew għal deterjorament kbir fil-finanzi pubbliċi. Id-dgħajfien tas-sostennibbilità tal-finanzi pubbliċi tar-Renju Unit ġie aggravat mill-fatt li l-bilanċ primarju kien diġà jinsab fi żbilanċ strutturali sostanzjali fil-perijodu li wassal għall-kriżi, li wassal biex l-iżbilanċ ta’ bażi tal-gvern ġenerali jaqbeż sew il-valur ta' referenza ta' 3 % tal-PDG hekk kif żvolġiet il-kriżi. Minħabba f'dan, ir-Renju Unit ġie soġġett għal proċedura ta' żbilanċ eċċessiv fit-8 ta' Lulju 2008, u fit-2 ta' Diċembru 2009 il-Kunsill ħareġ l-aħħar rakkomandazzjonijiet skont l-Artikolu 126(7) tat-Trattat dwar il-Funzjonament tal-Unjoni Ewropea (TFUE) biex jikkoreġi l-iżbilanċ sal-2014/2015. L-isfidi ewlenin għall-ekonomija tar-Renju Unit matul is-snin li ġejjin huma li l-finanzi pubbliċi jiġu stabbilizzati fil-kuntest tal-isforzi li għaddejjin min-naħa tas-settur tad-djar biex jitnaqqas l-ingranaġġ pendenti; biex jintlaħqu livelli adegwati ta' għoti ta' kreditu minn sistema finanzjarja li għadha fraġli b'bosta fornituri ta' kreditu li naqqsu l-kapaċità ta' self tagħhom; u biex tiġi enfasizzata mixja ta' produzzjoni lejn prodott iktar negozjabbli sabiex il-bilanċ estern jittejjeb b'mod permanenti.

(3)

Minkejja li ħafna mit-tnaqqis osservat fil-PDG reali fil-kuntest tal-kriżi huwa ċikliku, il-livell tal-produzzjoni potenzjali wkoll ġie affettwat b'mod negattiv. Barra minn hekk, il-kriżi tista' wkoll taffettwa t-tkabbir potenzjali fil-perijodu medju permezz ta' investiment iktar baxx u tnaqqis fid-dispoibbiltà tal-kreditu. Barra minn hekk, l-impatt tal-kriżi ekonomika jaggrava l-effetti negattivi tat-tixjiħ demografiku fuq il-produzzjoni potenzjali u s-sostenibbiltà tal-finanzi pubbliċi. Fuq dan l-isfond ser ikun essenzjali li jiġi mgħaġġel il-pass tar-riformi strutturali bl-għan li t-tkabbir potenzjali jiġi appoġġat. B'mod partikolari, huwa importanti għar-Renju Unit li jimpenja ruħu b'riformi li jtejbu l-livelli tal-ħiliet u jżidu l-produttività.

(4)

Il-programm fih żewġ xenarji makroekonomiċi: xenarju ċentrali u xenarju alternattiv aktar kawt ibbażat fuq tendenza ta’ tkabbir ta’ kwart ta’ punt perċentwali inqas mill-perspettiva ċentrali. Il-previżjonijiet tal-finanzi pubbliċi huma bbażati fuq ix-xenarju alternattiv, li jitqies bħala x-xenarju ta’ referenza fl-evalwazzjoni tal-programm aġġornat. Dan ix-xenarju jipprevedi tkabbir tal-PDG sa 2 % fl-2010/2011 u sa 3,25 % fis-sena bejn l-2011/2012 u l-2014/2015. Madankollu, b'riżultat tad-data reċenti issa anke dan ix-xenarju iktar kawt, iffinalizzat fil-bidu ta' Diċembru 2009, jidher li huwa bbażat fuq suppożizzjonijiet ta' tkabbir favorevoli, notevolment għas-snin 2010/2011 u 2011/2012 (2). Il-previżjonijiet għall-inflazzjoni jidhru realistiċi. Il-programm ma jinkludix previżjonijiet espliċiti tar-rata tal-kambju, u jassumi kontribut pożittiv għat-tkabbir tal-PDG mill-kummerċ nett, iċ-ċiklu tal-istokks u – mill-2011 'il quddiem – id-domanda domestika b'mod partikolari investiment fiss u l-infiq fid-djar. Dawn il-previżjonijiet huma plawsibbli b'mod wiesa'. Il-kontribut nett tal-kummerċ huwa konformi mal-previżjonijiet tal-Kummissjoni għalkemm il-kontribut nett negattiv tal-kummerċ fit-tieni nofs tal-2009 għandu impatt negattiv fuq dawn il-previżjonijiet. It-tnaqqis potenzjali fit-tkabbir tad-dħul disponibbli dovut inter alia għal irkupru insuffiċjenti tas-suq tax-xogħol u żieda oħra fil-proporzjon tat-tfaddil fid-djar tikkostitwixxi żewġ riskji negattivi għall-infiq fid-djar.

(5)

Il-programm jistima l-iżbilanċ tal-gvern ġenerali fl-2009/10 bħala 12,7 % tal-PDG. Id-deterjorament sinifikanti minn żbilanċ ta' 6,8 % tal-PDG fl-2008/09 jirrifletti fil-biċċa l-kbira l-impatt tal-kriżi fuq il-finanzi tal-gvern. It-tnaqqis fil-proporzjon tad-dħul tal-gvern u ż-żieda fil-proporzjon tal-infiq fl-2009/2010, aġġustat għall-effett tad-denominatur minn tnaqqis f'salt fil-PDG nominali, huwa stmat li kkontribwixxa madwar 45 % u 55 % rispettivament għad-deterjorament fl-iżbilanċ tal-gvern. L-impatt tat-tnaqqis fl-attività ekonomika fuq il-finanzi pubbliċi ġie aggravat minħabba t-tgħaqqid tar-reċessjoni mat-tnaqqis sever fis-suq finanzjarju u dak tad-djar, li kull wieħed minnhom kien s'issa sors ewlieni ta' dħul. Barra minn hekk, madwar kwart taż-żieda fl-iżbilanċ fl-2009/2010 rriżulta mill-miżuri ta' stimolu li ammonta għal 1½ % tal-PDG li l-gvern adotta f'konformità mal-Pjan Ewropew ta' Rilanċ Ekonomiku (PERE), flimkien mad-deċiżjoni li l-istabbilizzaturi awtomatiċi jitħallew joperaw bis-sħiħ b'appoġġ għall-ekonomija. Madankollu, id-deterjorament rapidu fil-finanzi pubbliċi affettwa b'mod sever l-ambitu tar-Renju Unit biex jimplimenta politika fiskali inqas stretta waqt li jżomm sostenibbiltà baġitarja u jappella għal titjib rapidu fil-qagħda baġitarja. F'konformità mal-istrateġija ta' ħruġ issuġġerita mill-Kunsill, u bil-ħsieb tal-korrezzjoni tal-iżbilanċ eċċessiv sal-2014/2015 u t-treġġigħ lura għal qagħda finanzjarja pubblika sostenibbli, jeħtieġ jiġi implimentat aktar issikkar fiskali. L-implimentazzjoni tal-pjanijiet ta' konsolidazzjoni stipulati fil-programm ser jgħinu fl-appoġġ għas-sostenibbiltà fil-perijodu medju u għat-titjib tal-qagħda fiskali.

(6)

L-aġġornament jipprevedi tnaqqis sena wara l-oħra fil-proporzjon tal-iżbilanċ tal-gvern ġenerali b'0,6 punt perċentwali, għal 12,1 % tal-PDG. It-titjib modest fl-iżbilanċ tal-gvern jirrifletti b'mod sħiħ żieda ppjanata fid-dħul tal-gvern b'6,5 % f'termini nominali, li madwar terz minnhom hija dovuta għal żieda fir-rata tal-VAT għal-livell ta' qabel l-istimolu implimentat f'Jannar 2010. Min-naħa l-oħra, l-infiq tal-gvern huwa previst li jkompli jikber b'ritmu għoli għalkemm iktar bil-mod: b'madwar 4,5 % f'termini nominali u 2,25 % f'termini reali matul is-sena preċedenti u li jħallu l-proporzjon tal-infiq vis-a-vis l-PDG l-istess bħas-sena ta' qabel. Kumplessivament, il-miżuri diskrezzjonarji li ser jidħlu fis-seħħ fl-2010/2011, inklużi dawk imħabbra fir-Rapport ta' qabel il-Baġit ta' Novembru 2008 u fil-Baġit ta' April 2009, ser inaqqsu l-iżbilanċ tal-gvern b'madwar 1,0 % tal-PDG. Il-bilanċ strutturali, jiġifieri, il-bilanċ nett aġġustat ċiklikament b'miżuri ta’ darba u oħrajn temporanji, fl-2010/2011 huwa smat li ser jitjieb anke b'inqas, bi 0,25 % tal-PDG. It-titjib stmat fl-iżbilanċ strutturali tal-baġit huwa sinifikament inqas mill-effett nett tal-miżuri diskrezzjonarji msemmija hawn fuq, li jirriflettu l-effetti kontinwi ta' kompożizzjoni li jnaqqsu l-elastiċità kumplessiva tad-dħul.

(7)

Għalkemm il-programm ma jistipolax pjanijiet għall-konsolidazzjoni fiskali mill-2010/2011 'il quddiem, l-aġġornament ma jippreżentax objettiv għall-perijodu medju li jwassal il-finanzi pubbliċi fi triq sostenibbli (3). Dan mhuwiex f'konformità mar-rekwiżiti tal-Patt ta' Stabbiltà u Tkabbir. L-istrateġija fiskali tal-programm għall-perijodu medju hija sinifikament inqas ambizzjuża minn dik irrakkomandata mill-Kunsill skont l-Artikolu 126(7) fit-2 ta' Diċembru 2009 u mhux f'konformità mar-rakkomandazzjoni biex jitnaqqas l-iżbilanċ għal inqas minn 3 % tal-PDG sal-2014/2015.

B'mod partikolari, l-iżbilanċ tal-gvern fl-2014/2015 – l-iskadenza ffissata fir-rakkomandazzjoni tal-Kunsill għar-Renju Unit biex iniżżel l-iżbilanċ għal inqas minn 3 % tal-PDG - huwa previst fil-programm għal 4,7 % tal-PDG. It-titjib medju annwali fl-iżbilanċ strutturali, kif ikkalkulat mill-ġdid mis-servizzi tal-Kummissjoni bl-użu tal-metodoloġija bi qbil komuni, bejn l-2010/2011 u l-2014/2015 huwa stmat li ser ikun biss ta' 1,0 % tal-PDG, 0,75 p.p. inqas minn dak irrakkomandat mill-Kunsill f'Diċembru 2009. Madwar 60 % tat-tnaqqis tas-7,5 p.p. fil-proporzjon tal-iżbilanċ tal-gvern bejn l-2011/2012 u l-2014/2015 huwa dovut għall-issikkar ippjanat fit-tkabbir tal-infiq. L-infiq primarju tal-gvern matul dawn is-snin huwa ppjanat li jiżdied b'medja annwali ta' madwar 1,5 %, li timplika tnaqqis f'termini reali ta' medja annwali ta' madwar 0,75 %. Kważi kwart mit-tnaqqis fil-proporzjon tal-infiq bejn l-2011/2012 u l-2014/2015 huwa dovut għal tnaqqis fl-infiq tal-investiment. Il-miżuri diskrezzjonarji li jżidu d-dħul, inkluża rata massima addizzjonali ta' taxxa tad-dħul f'April 2010 u minn April 2010, żieda ppjanata fir-rati tal-kontribuzzjonijiet tas-sigurtà soċjali, jammontaw għal madwar 10 % mit-tnaqqis previst fl-iżbilanċ tal-baġit mill-2001/2012 'il quddiem, filwaqt li madwar 30 % tat-titjib fl-iżbilanċ ewlieni huwa dovut għall-irkupru ċikliku previst fil-programm. Il-baġit għall-2010, li kien ippreżentat fl-24 ta' Marzu 2010, jistima li fl-2009/2010 kien hemm żbilanċ ta' 0,5 % inqas milli previst fil-programm, bir-riżultat aħjar milli mistenni jikkontribwixxi għal inqas żbilanċ fis-snin sussegwenti. Il-baġit ħabbar miżuri ta' ssikkar fiskali ġodda li jammontaw għal 0,1 % tal-PDG matul il-perijodu kollu tal-programm u l-iżbilanċ fl-2014/2015 huwa previst li jkun 4,2 % tal-PDG.

(8)

Ir-riżultati baġitarji jistgħu jkunu agħar minn dawk previsti fil-programm tul il-perijodu kollu. Il-previżjoni tas-servizzi tal-Kummissjoni tal-Ħarifa 2009 tipprevedi tkabbir ekonomiku aktar dgħajjef fl-2010/2011 u fl-2011/2012, filwaqt li skont il-valutazzjoni tas-servizzi tal-Kummissjoni, it-tkabbir ekonomiku annwali tar-Renju Unit bejn l-2012/2013 u l-2014/2015 x'aktarx li ma jilħaqx it-3,25 % fis-sena, kif huwa previst fil-programm. Il-kuntest makroekonomiku favorevoli ħafna previst fil-programm iġib miegħu riskji għall-previżjonijiet fiskali fil-programm.

Tkabbir ekonomiku inqas milli mistenni mill-2011/2012 'il quddiem jista' jwassal għal qabża tal-iżbilanċ tal-gvern previst fil-programm. Filwaqt li l-programm ta' konsolidazzjoni tal-gvern għall-perijodu medju huwa xprunat l-aktar mis-suppożizzjoni ta' restrizzjoni konsiderevoli u bla preċedent fl-infiq primarju, għas-snin bejn l-2011/2012 u l-2014/2015, din is-suppożizzjoni għadha mhix mirfuda mill-pjanijiet ddettaljati għall-infiq dipartimentali (li bħalissa jestendu biss sal-aħħar tas-sena finanzjarja 2010/2011). L-assenza ta' limiti ddettaljati għall-infiq dipartimentali bħala appoġġ għas-suppożizzjonijiet tal-programm fuq l-infiq aggregat tirrappreżenta sors ieħor ta' inċertezza dwar il-pjan fiskali għall-perijodu medju tal-programm. It-tnaqqis f'daqqa fit-tkabbir fl-infiq għall-perijodu medju li huwa fil-mira fl-aġġornament jimplika sfidi ta' effiċjenza konsiderevoli kif ukoll prijoritizzazzjoni mill-ġdid estensiva għas-settur pubbliku. B'mod ġenerali, hemm sfidi konsiderevoli ta' implimentazzjoni marbuta mal-grad bla preċedenti s'issa ta' restrizzjoni fl-infiq ippjanat li jeħtieġ li jkun sostnut fuq perijodu ta' żmien twil. Ir-Renju Unit impenja ruħu wkoll b'responsabbiltajiet ta' kontinġenza sostanzjali b'riżultat tal-interventi tiegħu fis-settur finanzjarju. Taħt l-Iskema ta' Protezzjoni tal-Assi, il-gvern qabel li jassigura l-assi tas-settur bankarju li jammontaw għal kważi 20 % tal-PDG. Filwaqt li l-limitu sa fejn is-self u l-investimenti assigurati huma f'riskju ta' inadempjament huwa soġġett għal livell għoli ta' inċertezza, l-iskema tista' tirriżulta fi spiża netta għall-gvern, jekk l-ispejjeż tal-appoġġ tal-gvern ma ġewx kompletament irkuprati fil-futur. Għalhekk, dan seta' jnaqqas il-pass tal-konsolidazzjoni fiskali.

(9)

Id-dejn gross tal-gvern huwa stmat madwar 73 % tal-PDG fl-2009/2010, 'il fuq mill-55,5 % tas-sena preċedenti. Madwar sittin fil-mija taż-żieda fil-proporzjon tad-dejn fl-2009/10 jirriflettu l-iżbilanċ primarju għoli, filwaqt li aġġustament fil-fluss tal-istock bħala riżultat tas-self tal-gvern biex jiffinanzja x-xiri tal-ekwità tas-settur bankarju u l-għoti ta' self lill-istituzzjonijiet finanzjarji kummerċjali kkontribwew għal żieda fil-proporzjon tad-dejn bi kważi 3,75 punti perċentwali. Il-proporzjon tad-dejn huwa previst li jiżdied bi 18,25 p.p. bejn l-2010/2011 u l-2014/2015. Sas-sena msemmija l-aħħar, il-programm jipprevedi stabilizzazzjoni fil-proporzjon tad-dejn ta' madwar 91,50 % tal-PDG, hekk kif il-kontribut għall-proporzjon tad-dejn ta' tkabbir tal-PDG nominali għoli huwa mistenni li jikkumpensa għaż-żieda fid-dejn tal-gvern dovut għall-bilanċ primarju, li mistenni li jibqa fi żbilanċ sal-aħħar tal-perijodu tal-programm, u għall-ħlasijiet tal-interessi, li huma mistennija li jiżdiedu minn 2,25 % tal-PDG fl-2009/2010 sa kważi 4 % fl-2013/2014. Il-proporzjon tad-dejn huwa wkoll soġġett għal għadd ta' riskji fuq il-perijodu tal-programm. Mil-lat pożittiv, il-bejgħ b'suċċess tal-ekwità tas-settur bankarju miksub bħala riżultat tal-intervenzjonijiet fis-settur finanzjarju tal-gvern jista' jintuża biex jitnaqqas id-dejn tal-gvern. Ir-riskji negattivi għal proporzjon tad-dejn ġejjin prinċipalment mill-probabbiltà ta' żbilanċi ikbar milli previsti u minn effett tad-denominatur tal-PDG negattiv bħala riżultat ta' tkabbir ekonomiku reali iżgħar; l-impatt ta' spejjeż għal self possibbilment ogħla milli previst, minn influwenzi tas-swieq globali jew domestiċi, għandu jkun relattivament imrażżan, meta wieħed iqis l-istruttura ta' skadenzi twal tar-Renju Unit, għalkemm xorta dan ma jkunx ta' għajnuna.

(10)

Il-previżjonijiet tad-dejn għall-perijodu medju li jassumu li r-rati tat-tkabbir tal-PDG ser jirkupraw gradwalment biss għall-valuri previsti qabel il-kriżi, u l-proporzjonijiet tat-taxxa ser jitreġġgħu lura għal-livelli ta' qabel il-kriżi u li jinkludu ż-żieda prevista fl-infiq relatat mat-tixjiħ juru li l-istrateġija baġitarji prevista fil-programm, meħuda b'valur nominali, u mingħajr iktar bidla fil-politika, ser ikunu biżżejjed biex jistabbilizzaw il-proporzjon tad-dejn mal-PDG sal-2020.

(11)

Filwaqt li l-impatt baġitarju għall-perijodu fit-tul tat-tixjiħ tal-popolazzjoni huwa qrib il-medja tal-UE, il-pożizzjoni baġitarja fl-2009 kif stmata fil-programm tikkostitwixxi riskju għal finanzi pubbliċi sostenibbli, anke qabel ma jitqies l-impatt baġitarju fit-tul ta' popolazzjoni li qed tixjieħ. Il-kisba ta’ bilanċi pożittivi primarji fil-perijodu medju, flimkien ma' riformi strutturali, tikkontribwixxi għat-tnaqqis tar-riskji għas-sostenibbiltà tal-finanzi pubbliċi li kienu vvalutati fir-Rapport ta' sostenibbiltà 2009 tal-Kummissjoni (4) bħala għolja. Il-proporzjon tad-dejn gross huwa ogħla mill-valur ta' referenza tat-Trattat tul il-perijodu kollu tal-programm.

(12)

L-Att ta' Responsabbiltà Fiskali (FRA), li ġie approvat mill-Parlament fl-10 ta' Frar 2010, stabbilixxa pjan fiskali statutorju għall-awtoritajiet tar-Renju Unit. Il-FRA jistabbilixxi Pjan ta' Konsolidazzjoni Fiskali (FCP) li jeħtieġ li l-gvern “fuq perijodu ta' erba' snin ikollu jnaqqas is-self nett tas-settur pubbliku bħala proporzjon tal-PDG, bin-nofs, kif imqabbel mal-ogħla valur previst għall-2009-2010. Fid-dispożizzjonijiet tal-leġiżlazzjoni sekondarja stabbiliti mil-Liġi (The Bill), il-Gvern qed jiffissa mira biex is-self ikun ta' 5,5 fil-mija tal-PDG jew inqas fl-2013-2014”. L-FCP jeħtieġ ukoll lill-gvern biex: “inaqqas is-self bħala proporzjon tal-PDG għal kull sena mill-2009-2010 sal-2015-2016, u jiżgura li d-dejn nett tas-settur pubbliku qed jonqos bħala proporzjon tal-PDG fl-2015-2016”. Jeżerċita iktar kontroll ta' nfiq speċifiku permezz ta' sistema ta' “reviżjonijiet ta' infiq” fuq ħafna snin, li tistabbilixxi pakketti ta' nfiq kumplessiv u limiti dipartmentali għal infiq li jista' jitbassar minn qabel dipartiment b'dipartiment (“limiti ta' nfiq dipartmentali”). Madankollu, l-infiq pubbliku mhux dejjem ġie mrażżan biżżejjed, bir-riżultati tal-infiq totali bejn 2002/2003 u l-2008/2009 fuq medja jaqbżu l-limiti massimi oriġinali stabbiliti fir-reviżjonijiet tal-infiq. L-Att ta' Responsabbilità Fiskali jeħtieġ ukoll li l-gvern “jipprovdi spjegazzjoni (lill-Parlament) jekk ma jintlaħqux il-miri”. Sabiex jitnaqqas ir-riskju li ma jintlaħqux il-miri, ikun utli li jkun hemm tisħiħ tal-mekkaniżmu li jivvaluta r-realizmu tagħhom u pjan ta' kontinġenza – li jiġi implimentat kemm il-darba s-suppożizzjonijiet bażiċi u l-previżjonijiet makroekonomiċi jirriżultaw mhux eżatti.

Kumplessivament, l-FRA huwa pass fid-direzzjoni t-tajba, il-pjan ta' konsolidazzjoni stabbilit fl-Att huwa sinifikament inqas ambizzjuż minn dak fir-rakkomandazzjoni tal-Kunsill skont l-Artikolu 126(7) tat-2 ta' Diċembru 2009 u mhuwiex konsistenti mat-tnaqqis fl-iżbilanċ għal inqas mill-valur referenzjali ta' 3 % tal-PDG sal-2014/2015.

(13)

Iż-żieda fil-proporzjon tal-infiq tal-gvern mill-2000 u b'mod aktar sever fis-snin reċenti, tenfasizza l-ħtieġa li jiġu żgurati l-effiċjenza u l-effettività tal-infiq pubbliku fir-Renju Unit. Matul il-perijodu ta' tliet snin kopert mir-Reviżjoni Komprensiva tal-Infiq (CSR) tal-2007 (jiġifieri bejn l-2008/2009 u l-2010/2011), il-gvern tar-Renju Unit ikkommetta ruħu biex jikseb iktar tfaddil permezz ta' effiċjenza finanzjarja aħjar ekwivalenti għal 2,5 % tal-PDG iktar. Madwar 20 fil-mija ta' dan tal-aħħar jirrappreżentaw tfaddil li l-gvern qed jippjana li jikseb matul il-perijodu tas-CSR tal-2007, b'segwitu għar-riżultati tal-programm ta' sena tiegħu l-Operational Efficiency Programme (OEP), li eżamina l-infiq operattiv fis-settur pubbliku u żvela ambitu għat-tfaddil annwali ibbażat fuq l-effiċjenza ta' 1 % tal-PDG sal-2013-2014 meta mqabbel mal-2007/2008. Il-kejl tas-suċċess ta' dawn l-inizjattivi ta' effiċjenza ambizzjużi u mfassla sew ser ikun pass importanti biex jintwera li dawn tabilħaqq itejbu l-kwalità tal-finanzi pubbliċi, kif ukoll jillimitaw l-iskala tal-infiq pubbliku. F'dak ir-rigward, il-pjanijiet imħabbra biex in-National Audit Office jevalwa t-tfaddil mis-CSR 2007 għandhom jintlaqgħu sew. Barra minn hekk, il-fokus qawwi tal-Public Value Programme biex jinkiseb tfaddil effiċjenti fis-settur tas-saħħa pubblika ta' madwar 0,5 % tal-PDG kull sena sal-2012/2013 jidher partikolarment iġġustifikat, meta wieħed iqis illi, sa mis-sena 2000, l-infiq fis-Servizz tas-Saħħa Pubblika tar-Renju Unit (NHS) żdied f'daqqa u l-produttività waqgħet, minkejja t-titjib fir-riżultati tas-saħħa.

(14)

Kumplessivament, fl-2010/2011 l-istrateġija bagitarja stabbilita fil-programm hija ġeneralment konsistenti mar-rakkomandazzjonijiet tal-Kunsill skont l-Art. 126(7), partikolarment il-bidu ta' konsolidazzjoni f'dik is-sena. Madankollu, mill-2011/2012 'il quddiem, l-istrateġija baġitarja mhix konsistenti mar-rakkomdazzjonijiet tal-Kunsill skont l-Art. 126(7). B'mod partikolari, anke met jitqies b'valur nominali, l-iżbilanċ tal-gvern fl-2014/15 — l-iskadenza ta' żmien stipulata f'Diċembru 2009 fir-rakkomdazzjoni għar-Renju Unit biex tiġi kkoreġuta s-sitwazzjoni ta' defiċit eċċessiv - hija prevista b'mod ċar 'il fuq mit-3 % tal-valur ta' referenza tal-PDG (4,7 % tal-PDG) u hija soġġetta wkoll għar-riskji ta' tnaqqis msemmija hawn fuq. Barra minn hekk, il-miżuri mħabbra wara r-rakkomandazzjoni tal-Kunsill fir-Rapport tal-Baġit għall-2009 tad-9 ta' Diċembru 2009, matul il-perijodu bejn l-2010/2011 u l-2012/2013 implikaw laxkar fiskali żgħir b'relazzjoni għall-pjanijiet fiskali fil-Baġit għall-2009 ta' April 2009, li huwa inkonsistenti mar-rakkomandazzjoni tal-Kunsill li “jiġu evitati aktar miżuri li jikkontribwixxu għad-deterjorament tal-finanzi pubbliċi”. It-titjib medju annwali fl-iżbilanċ strutturali, kif ikkalkulat mill-ġdid mis-servizzi tal-Kummissjoni bl-użu tal-metodoloġija bi qbil komuni, bejn 2010/2011 u l-2014/2015 huwa stmat li ser ikun ta' 1,0 % tal-PDG, 0,75 p.p. inqas minn dak irrakkomandat mill-Kunsill f'Diċembru 2009. Minħabba l-previżjonijiet tad-dejn ippreżentati fil-programm u r-riskji msemmija hawn fuq, l-istrateġija baġitarja tista' ma tkunx suffiċjenti biex il-proporzjon tad-dejn mal-PDG jinġieb lura fit-triq 'l isfel.

(15)

Fir-rigward tar-rekwiżiti tad-data speċifikati fil-kodiċi tal-kondotta għall-programmi ta' stabbiltà u konverġenza, il-programm għandu xi lakuni sinifikanti fil-provvediment ta' data rekwiżita u data fakultattiva (5). Il-Kunsill, fir-rakkomandazzjonijiet tiegħu skont l-Artikolu 126(7) fit-2 ta' Diċembru 2009 bil-ħsieb li tintemm is-sitwazzjoni ta' żbilanċ eċċessiv, stieden ukoll lir-Renju Unit biex jirrapporta dwar il-progress imwettaq fl-implimentazzjoni tal-istrateġija ta' konsolidazzjoni fiskali biex tiġi żgurata korrezzjoni tal-iżbilanċ eċċessiv f'kapitolu separat fl-aġġornamenti tal-programm ta' konverġenza. Ir-Renju Unit ma kkonformax b'mod sħiħ ma' din ir-rakkomandazzjoni, għalkemm l-informazzjoni kienet inkluża fil-programm.

(i)

jevita kwalunkwe miżura ulterjuri li tikkontribwixxi għad-deterjorament tal-finanzi pubbliċi fl-2010/2011 u f'każ ta' tkabbir ekonomiku aktar dgħajjef milli previst fil-programm jillimita l-iżbilanċ tal-gvern fl-2010/2011 sa mhux aktar minn dak previst fil-programm ta' Jannar 2010 f'każ li jseħħu r-riskji relatati mal-fatt li x-xenarju makroekonomiku tal-programm ikun aktar favorevoli mix-xenarju li fuqu hi bbażata r-Rakkomandazzjoni tal-Artikolu 126(7);

(ii)

jimmira għal tnaqqis iktar ambizzjuż tal-iżbilanċ tal-gvern għal inqas mill-valur referenzjali tat-Trattat ta' 3 % tal-PDG sa mhux aktar tard mill-2014/2015, inkluż billi jsaħħaħ ir-ritmu tal-isforz fiskali ppjanat mill-2011/2012 'il quddiem f'konformità mar-rakkomandazzjoni tal-Kunsill skont l-Artikolu 126(7), u jaħtaf kwalunkwe opportunità oħra, fosthom minn kondizzjonijiet ekonomiċi u tas-suq aħjar milli mistennija, biex jaċċelera t-tnaqqis tal-proporzjon tad-dejn gross u jqarrab iktar lejn il-valur referenzjali ta' 60 % tal-PDG, u b'hekk tittejjeb ukoll is-sostenibbiltà fit-tul tal-finanzi pubbliċi;

(iii)

fl-2010 jippubblika limiti ddettaljati ta' nfiq dipartmentali li fuqhom ikunu bbażati l-previżjonijiet tal-infiq ġenerali għal tal-inqas il-perijodu ta' tliet snin, li jaqbeż l-2010/2011;

(iv)

jimplimenta t-tfaddil fl-effiċjenza tal-infiq identifikat fl-Operational Efficiency Programme (OEP) u f'inizjattivi oħra finanzjarjament favorevoli;