(1)

Fil-5 ta’ Ottubru 2006, il-Kunsill, permezz tar-Regolament (KE) Nru 1472/2006 (1) (ir-“Regolament oriġinali”), impona dazju anti-dumping definittiv fuq importazzjonijiet ta’ ċertu tipi ta’ xedd tas-saqajn bil-parti ta’ fuq tal-ġilda li joriġinaw mir-Repubblika tal-Poplu taċ-Ċina (“RPĊ” jew iċ-“Ċina”) u l-Vjetnam (il-“pajjiżi kkonċernati”). Il-livelli ta’ dazju stabbiliti kienu jvarjaw minn 9.7 % għal 16.5 % fil-każ tar-RPĊ u 10 % fil-każ tal-Vjetnam. Il-miżuri ġew imposti għal perjodu ta’ sentejn. L-investigazzjoni li wasslet għal dawn il-miżuri għandha tkun imsejħa bħala “l-investigazzjoni oriġinali”.

(2)

Permezz tar-Regolament (KE) Nru 388/2008 (2) (“ir-Regolament estiż”), il-Kunsill estenda d-dazju tal-anti-dumping definittiv għal importazzjoni ta’ ċertu tipi ta’ xedd tas-saqajn bil-parti ta’ fuq tal-ġilda li joriġinaw fir-RPĊ għal importazzjonijiet ikkunsinjati mir-Reġjun Amministrattiv Speċjali tal-Makaw (“SAR”), sew jekk dikjarati li joriġinaw fil-Makaw SAR jew le. L-estensjoni ġiet wara investigazzjoni kontra ċ-ċirkumvenzjoni skont l-Artikolu 13(3) tar-Regolament bażiku.

(3)

It-talba ġiet sottomessa mill-Konfederazzjoni Ewropea tal-Industrija tax-Xedd tas-Saqajn (CEC, “l-applikant”), għan-nom tal-produtturi li jirrappreżentaw proporzjon ewlieni, f’dan il-każ iżjed minn 35 %, tal-produzzjoni totali tal-Unjoni ta’ ċertu tipi ta’ xedd tas-saqajn bil-parti ta’ fuq tal-ġilda.

(4)

Fil-kwadru tat-test eżistenti, diversi assoċjazzjonijiet nazzjonali ta’ produtturi ta’ xedd tas-saqajn fl-Istati Membri esprimew l-opinjonijiet tagħhom fir-rigward tal-ftuħ tar-reviżjoni tal-iskadenza u talbu li isimhom jibqa’ kunfidenzjali minħabba biża’ li l-kumpaniji membri tagħhom ikunu jistgħu jiġu ffaċċjati b’ritaljazzjoni minn xi klijenti. Xi partijiet oħra saqsew għalfejn l-ismijiet u l-pożizzjonijiet tal-assoċjazzjonijiet li qed jopponu u li qed jappoġġjaw inżammu kunfidenzjali. Il-Kummissjoni talbet b’mod espliċitu għal darb’oħra lill-assoċjazzjonijiet jekk kinux jaqblu mal-iżvelar tal-isem u l-pożizzjoni tagħhom. Erba’ assoċjazzjonijiet qablu li jiżvelaw l-ismijiet u l-pożizzjonijiet tagħhom, filwaqt li l-oħrajn kienu kontra li dan isir, u semmew għal darb’oħra l-biża’ tagħhom minn ritaljazzjoni kontra l-kumpaniji membri tagħhom. Il-Kummissjoni kkunsidrat li kien hemm fil-fatt possibbiltà konsiderevoli ta’ ritaljazzjoni fil-forma ta’ bejgħ mitluf għal dawn il-produtturi u aċċettat li l-ismijiet m’għandhomx jiġu żvelati.

(5)

Xi partijiet saħqu li l-Kummissjoni ma messiex bdiet investigazzjoni ta’ reviżjoni tal-iskadenza peress li l-Artikolu 3 tar-Regolament oriġinali jgħid li għandu jibqa’ fis-seħħ għal perjodu ta’ sentejn mid-data tad-dħul fis-seħħ tiegħu. Il-Premessa (326) tar-Regolament oriġinali, madankollu, tispjega li, minkejja d-dewmien iqsar tal-miżuri, ir-regoli tal-Artikolu 11 tar-Regolament bażiku għandhom japplikaw mutatis mutandis. B’konformità ma’ din il-premssa, it-test tal-avviż tal-iskadenza imminenti (3) jgħid li l-miżuri jiskadu fis-7 ta’ Ottubru 2008 sakemm ma tkunx inbdiet reviżjoni skont ir-regoli tal-Artikolu 11(2) tar-Regolament bażiku. Peress li reviżjoni tal-iskadenza tal-miżuri anti-dumping fil-fatt inbdiet, il-miżuri anti-dumping għandhom jibqgħu fis-seħħ waqt li din ir-reviżjoni tkun pendenti.

(6)

It-talba għar-reviżjoni tal-iskadenza kienet ibbażata fuq ir-raġuni li l-iskadenza tal-miżuri aktarx li twassal għal kontinwazzjoni jew rikorrenza ta’ dumping u ħsara lill-industrija tal-Unjoni.

(7)

Wara li ġie determinat, wara konsultazzjoni mal-Kumitat Konsultattiv, li kienu jeżistu biżżejjed provi għall-bidu ta’ reviżjoni tal-iskadenza, il-Kummissjoni ħabbret, permezz ta’ Notifika ta’ bidu ppubblikat f’Il-Ġurnal Uffiċjali tal-Unjoni Ewropew (4) fit-3 ta’ Ottubru 2008 (in-“Notifika ta’ Bidu”), il-bidu ta’ reviżjoni tal-iskadenza skont l-Artikolu 11(2) tar-Regolament bażiku.

(8)

L-investigazzjoni tal-probabbiltà ta’ tkomplija jew rikorrenza ta’ dumping u ħsara kopriet il-perjodu mill-1 ta’ Lulju 2007 sat-30 ta’ Ġunju 2008 (“perjodu ta’ investigazzjoni tar-reviżjoni” jew “RIP”). L-eżaminar tat-tendenzi rilevanti għall-valutazzjoni tal-probabbiltà tal-kontinwazzjoni jew ir-rikorrenza tal-ħsara kien ikopri l-perjodu mill-1 ta’ Jannar 2006 sal-aħħar tal-RIP (il-“perjodu kkunsidrat”). Saret ukoll referenza fejn xieraq għas-sena 2005 u għall-perjodu tal-investigazzjoni użat fl-investigazzjoni oriġinali li kien ikopri l-perjodu mill-1 ta’ April 2004 sal-31 ta’ Marzu 2005 (“perjodu ta’ investigazzjoni oriġinali” jew “OIP”).

(9)

Il-Kummissjoni avżat uffiċjalment lill-applikant, il-prodotturi tal-Unjoni msemmija fit-talba, kwalunkwe produtturi oħra magħrufa fil-Unjoni, l-importaturi magħrufa u l-assoċjazzjonijiet tagħhom, il-bejjiegħa bl-imnut/distributuri magħrufa u l-assoċjazzjonijiet tagħhom, l-organizzazzjonijiet tal-konsumatur magħrufa, il-produtturi esportaturi magħrufa fil-pajjiżi kkonċernati kif ukoll l-assoċjazzjonijiet tagħhom u l-awtoritajiet tal-pajjiżi kkonċernati bil-bidu tar-reviżjoni tal-iskadenza.

(10)

Il-partijiet interessati ngħataw l-opportunità li jgħaddu l-opinjonijiet tagħhom bil-miktub u li jitolbu smigħ fil-limiti taż-żmien stabbiliti fl-Avviż tal-bidu.

(11)

Il-partijiet kollha interessati li għamlu din it-talba u li wrew raġunijiet partikolari għalxiex għandhom jiġu mismugħa, ingħataw smigħ.

(12)

Minħabba n-numru kbir ta’ produtturi esportaturi fil-pajjiżi kkonċernati, ta’ produtturi tal-Unjoni u ta’ importaturi involuti fl-investigazzjoni, l-applikazzjoni tat-teħid ta’ kampjuni ġiet prevvista fin-Notifika tal-bidu skont l-Artikolu 17 tar-Regolament bażiku.

(13)

Sabiex il-Kummissjoni tkun tista’ tiddeċiedi jekk huwiex meħtieġ it-teħid ta’ kampjuni, u, jekk dan ikun il-każ, biex tagħżel kampjun, il-prodotturi esportaturi u r-rappreżentanti li jaġixxu f’isimhom, il-produtturi u l-importaturi tal-Unjoni ġew mitluba li jippreżentaw lilhom infushom u li jipprovdu l-informazzjoni kif speċifikat fin-Notifika tal-bidu.

(14)

Total ta’ 58 kumpanija jew gruppi ta’ kumpaniji relatati (“gruppi”) fir-RPĊ ippreżentaw lilhom infushom u provdew l-informazzjoni mitluba fil-limitu taż-żmien mogħti. Dawn it-58 kumpanija jew gruppi produċew u/jew esportaw il-prodott ikkonċernat lis-suq tal-Unjoni waqt il-perjodu tal-investigazzjoni u esprimew xewqa li jkunu inklużi fil-kampjun. Dawn tqiesu li kienu kumpaniji li kkooperaw u ġew meqjusa għall-inklużjoni fil-kampjun. Il-livell ta’ kooperazzjoni mir-RPĊ, i.e. il-perċentwal ta’ esportazzjonijiet lejn l-Unjoni mill-kumpaniji Ċiniżi li kkooperaw meta mqabbla mal-esportazzjonijiet Ċiniżi kollha lejn l-Unjoni, kien ta’ madwar 22 %.

(15)

Il-kampjun intgħażel bi ftehim mal-awtoritajiet Ċiniżi, fuq il-bażi tal-volumi tal-esportazzjoni u l-firxa ġeografika tal-kumpaniji li kkooperaw. Is-seba’ kumpaniji inklużi fil-kampjun kienu jirrappreżentaw madwar 56 % tal-esportazzjonijiet lejn l-Unjoni tat-58 kumpanija li kkooperat, u 13 % tal-esportazzjonijiet totali lejn l-Unjoni mir-RPĊ. Kollha wieġbu għall-kwestjonarji fil-limiti taż-żmien mogħtija.

(16)

Ċerti esportaturi Ċiniżi mhux inklużi fil-kampjun qalu li peress li ma ġewx magħżula biex ikunu fil-kampjun, ma kinux f’pożizzjoni li jiddefendu l-interessi tagħhom. Madankollu, huwa parti mill-prinċipju tat-teħid ta’ kampjuni li jintgħażel numru rappreżentattiv tal-produtturi esportaturi u li r-riżultati tal-valutazzjoni ta’ dan il-kampjun jistgħu jitqiesu bħala rappreżentattivi anke għal esportaturi oħra li kkooperaw. Barra minn hekk qed jiġi osservat li l-partijiet interessati kollha kienu kapaċi jipparteċipaw fl-investigazzjoni u jissottomettu l-opinjonijiet tagħhom. Għal din ir-raġuni dan l-argument ġie miċħud.

(17)

Total ta’ 51 kumpanija jew gruppi fil-Vjetnam ippreżentaw lilhom infushom u provdew l-informazzjoni mitluba fil-limitu taż-żmien mogħti. Dawn il-51 kumpanija jew gruppi produċew u/jew esportaw il-prodott ikkonċernat lejn is-suq tal-Unjoni matul il-perjodu tal-investigazzjoni u esprimew xewqa li jkunu inklużi fil-kampjun. Ġew meqjusa bħala kumpaniji li kkooperaw u ġew meqjusa għall-inklużjoni fil-kampjun. Il-livell ta’ kooperazzjoni mill-Vjetnam, i.e. il-perċentwal ta’ esportazzjonijiet lejn l-Unjoni mill-kumpaniji Vjetnamiżi li kkooperaw meta mqabbla mal-esportazzjonijiet Vjetnamiżi kollha lejn l-Unjoni, kien ta’ madwar 82 %.

(18)

Il-kampjun intgħażel bi ftehim mal-awtoritajiet Vjetnamiżi, fuq il-bażi tal-volumi tal-esportazzjoni. It-tliet kumpaniji inklużi fil-kampjun kienu jirrappreżentaw madwar 27 % tal-esportazzjonijiet lejn l-Unjoni mill-51 kumpanija li kkooperaw, u 22 % tal-esportazzjonijiet totali lejn l-Unjoni mill-Vjetnam. Kollha wieġbu għall-kwestjonarji fil-limiti taż-żmien mogħtija.

(19)

Il-proċedura biex tinkiseb l-informazzjoni meħtieġa għall-għażla tal-kampjun ta’ produtturi tal-Unjoni kienet din li ġejja. Is-CEC li taġixxi f’isem dawk kollha li għamlu lment ikkonfermat li l-produtturi kollha li lmentaw kienu lesti li jikkooperaw u jipparteċipaw fl-eżerċiżżju tat-teħid ta’ kampjuni. Minħabba l-informazzjoni dettaljata u estensiva disponibbli fil-fajl (li ġejja mill-ilment, mill-eżerċizzju eżistenzi, u mis-sottomissjonijiet tas-CEC), ma kienx meħtieġ li tintbagħat formola tat-teħid ta’ kampjuni lil produtturi li lmentaw individwalment. Barra minn hekk, in-Notifika ta’ bidu stiednet lil kwalunkwe produttur li jippreżenta lilu nnifsu jekk ikun jixtieq li jikkoopera fil-proċeduri. Minbarra dawk li għamlu l-ilmenti, ħames kumpaniji oħra ppreżentaw ruħhom wara l-bidu u talbu li jkunu inklużi fl-eżerċizzju tat-teħid ta’ kampjuni. Intbagħtu formoli tal-kampjuni lil dawn kollha fejn intalbu jagħtu informazzjoni li kienet diġà disponibbli għand dawk li għamlu l-ilment. Tnejn biss mill-ħames kumpaniji provdew il-kampjuni. Dawn iż-żewġ kumpaniji madankollu ma nżammux peress li kienu esklużi mid-definizzjoni tal-industrija tal-Unjoni (ara l-premessa (198)).

(20)

Il-produzzjoni fl-Unjoni tal-prodott ikkonċernat hi kkonċentrata l-iżjed fi tliet Stati Membri li għandhom madwar 2/3 tal-produzzjoni kollha. Il-kumplament hu mferrex madwar l-Istati Membri l-oħra. Kif jidher mill-premessi (202) u iżjed ‘il quddiem, il-mudelli tan-negozju tal-produtturi tal-Unjoni huma karatterizzati b’differenzi l-iżjed fil-firxa tal-prodott/kwalità, il-kanali tad-distribuzzjoni u jekk iseħħx ġbir tal-attivitajiet u sottokuntrattar ta’ partijiet tal-proċess tal-manifattura ġewwa jew barra l-Unjoni.

(21)

Fuq il-bażi tal-informazzjoni miksuba, il-Kummissjoni għażlet kampjun ibbażat fuq l-akbar volumi rappreżentattivi tal-produzzjoni u l-bejgħ fil-Unjoni li jistgħu jiġu investigati fiż-żmien disponibbli. Madankollu, kif imsemmi f’iżjed dettall hawn fuq, din mhijiex industrija kompletament omoġenja u sabiex tiġi valutata l-kwalità rappreżentattiva tal-kumpaniji magħżula, ġew ikkunsidrati wkoll il-firxa ġeografika tal-produtturi madwar l-Istati Membri (5), kif ukoll is-settur li fih jappartjenu l-prodotti tagħhom. B’konsegwenza ta’ dan, ġew magħżula tmien kumpaniji li joperaw f’erba’ Stati Membri. Il-kumpaniji magħżula jirrappreżentaw ukoll il-mudelli tan-negozju ewlenin kollha preżenti fl-Unjoni, f’termini ta’ kif jiġi manifatturat il-prodott, kif jiġi distribwit il-prodott, u l-ispeċjalizzazzjoni tal-prodott. Fir-rigward tal-ispeċjalizzazzjoni tal-prodott, il-kumpaniji magħżula kienu jinkludu l-produzzjoni fis-setturi tal-prezzijiet ewlenin kollha (firxa baxxa, firxa medja, firxa għolja) kif ukoll fis-setturi kollha tas-sess u tal-età (xedd tas-saqajn tan-nisa, tal-irġiel, għal kull sess, tat-tfal). Fir-rigward tad-distribuzzjoni tal-prodotti, il-kumpaniji magħżula kienu jinkludu l-livell ewlenin kollha tad-distribuzzjoni (għal bejjiegħa bl-ingrossa, bejjiegħa bl-imnut, kif ukoll bejgħ bl-imnut dirett). Fir-rigward tal-produzzjoni, il-kumpaniji magħżula kienu jinkludu l-manifattura sħiħa interna fl-istadji ewlenin kollha tal-proċess tal-produzzjoni kif ukoll kumpaniji li kienu għamlu trasferiment ta’ partijiet ta’ dan il-proċess tal-manifattura (kemm fl-Unjoni u barra mill-Unjoni).

(22)

It-tmien produtturi magħżula fil-kampjun għaldaqstant tqiesu li huma rappreżentattivi tal-produtturi in ġenerali fl-Unjoni, u li kienu jirrappreżentaw 8.2 % tal-produzzjoni tal-produtturi tal-Unjoni li lmentaw u 3.1 % tat-total tal-produzzjoni Komunitarja. Skont l-Artikolu 17(2) tar-Regolament bażiku, is-CEC ġiet konsultata fuq l-għażla tal-kampjun u ma qajmet l-ebda oġġezzjoni.

(23)

L-investigazzjoni żvelat li wieħed mill-produtturi tal-Unjoni inkluż fil-kampjun gradatament ma kompliex il-produzzjoni fl-Unjoni waqt l-RIP, u ttrasferixxa l-attività sħiħa tal-manifattura tiegħu barra l-Unjoni. Għandu jiġi ossevat li l-piż tal-kumpanija ma kienx tali li jkollu impatt konsiderevoli, għall-inqas mill-aspett kwantitattiv, fuq is-sitwazzjoni tal-kumpaniji inklużi fil-kampjun in ġenerali - inkluża l-kwalità rappreżentattiva tagħhom. Is-sejbiet kwantitattivi dwar il-ħsara ma kinux ikunu materjalment differenti kieku din il-kumpanija ġiet eskluża. F’dan il-kuntest, u meta wieħed iqis li (i) kienet għamlet produzzjoni fl-Unjoni waqt l-RIP, u li (ii) kienet tissottokuntratta parti kbira mill-produzzjoni, mudell tan-negozju li, skont ħafna partijiet, hu importanti fl-Unjoni, ġie deċiż li ma tiġix formalment eskluża din il-kumpanija mill-kampjun. Dan ikompli jiżgura li, kwalitattivament, il-kampjun jirrappreżenta r-realtà tas-settur b’mod xieraq kemm jista’ jkun possibbli. Barra minn hekk, meta wieħed iqis li reviżjoni tal-iskadenza titlob analiżi tal-kontinwazzjoni/rikorrenza tal-ħsara, dan jista’ jgħin fil-previżjoni aħjar ta’ kif tista’ tiżviluppa s-sitwazzjoni fis-suq tal-Unjoni jekk ma jitkomplewx il-miżuri. Madankollu, b’mod evidenti ntużat biss dejta li tappartjeni għall-attività tagħha bħala produttur fl-Unjoni.

(24)

L-istituzzjonijiet tal-Unjoni kkunsidraw jekk, peress li l-produzzjoni fl-Unjoni u l-bejgħ ta’ din il-kumpanija waqt l-RIP instabu li huma inqas milli kien ġie rappurtat fil-bidu fl-istadju tal-kampjun, il-produzzjoni u l-bejgħ tal-industrija tal-Unjoni in ġenerali messhomx jiġu mnaqqsa b’mod simili - i.e., l-impatt riżultanti tal-kampjun għandu jiġi traspost fuq il-popolazzjoni kollha. Madankollu, instab li l-iżball jidher li sar ġenwinament minn din il-kumpanija li bi żball inkludiet it-trasferiment lejn pajjiż fil-viċinanza tal-Unjoni bħala produzzjoni fl-Unjoni. Fid-dawl ta’ dan jiġi l-ewwel nett osservat li l-kampjun jintuża primarjament biex jevalwa dawk l-indikaturi tal-ħsara li ma jistgħux b’mod raġonevoli jinkisbu għall-industrija tal-Unjoni in ġenerali. Il-produzzjoni u l-bejgħ inkisbu f’livell aggregat għall-industrija tal-Unjoni, u għaldaqstant l-argument mhuwiex rilevanti. Barra minn hekk, l-informazzjoni fil-fajl, inkluża dik ikkumpilata b’mod parallel permezz ta’ analiżi addizzjonali tal-assoċjazzjonijiet nazzjonali li saret f’din l-investigazzjoni, ma tindika l-ebda bżonn għal aġġustament ta’ din ix-xorta. Fl-aħħar nett, għas-saħħa tal-argument, jekk iċ-ċifri sħaħ tal-produzzjoni u tal-bejgħ għall-industrija tal-Unjoni fir-RIP kellhom jitnaqqsu biex jiġu trasposti ċ-ċifri iżjed baxxi tal-kampjun, dan ma jaffetwa la l-kwalità rappreżentattiva tal-kampjun u lanqas il-konklużjonijiet ġenerali dwar il-ħsara.

(25)

Diversi partijiet interessati allegaw ksur tal-Artikolu 17 tar-Regolament bażiku, meta allegaw li l-kampjun tal-produtturi tal-Unjoni ma kienx rappreżentattiv f’termini tal-perċentwal tal-produzzjoni kopert, il-prezzijiet tal-bejgħ, il-proporzjon bejn il-produzzjoni u l-bejgħ, il-firxa ġeografika kif ukoll il-profitabbiltà u l-prestazzjoni. Ġie deċiż ukoll li l-kampjun ma kkunsidrax in-numru kbir ta’ produtturi li għandhom produzzjoni trasferita lejn pajjiżi terzi.

(26)

Dawn l-allegazzjonijiet ġew analizzati bir-reqqa u anke minħabba l-kumplessità ta’ dan il-każ, kwestjonarji addizzjonali ġew mibgħuta, proċessati u vverifikati fuq il-post mhux biss għal kumpaniji individwali, iżda wkoll għal assoċjazzjonijiet nazzjonali. F’dan il-kuntest, in-numru ta’ kumpaniji magħżula fil-kampjun kellu jkun limitat għal dak li seta’ jiġi raġonevolment investigat fil-perjodu taż-żmien disponibbli, i.e. tmien kumpaniji.

(27)

Barra minn hekk, peress li l-industrija tal-Unjoni hi frammentata ħafna f’dan il-każ, hu inevitabbli li l-kumpaniji fil-kampjun ikopru porzjon relattivament żgħir tal-produzzjoni globali tal-Unjoni. Din il-frammentazzjoni, flimkien mal-fatt li l-produtturi l-kbar ġew magħżula biex ikunu fil-kampjun, timplika li, fi kwalunkwe każ, iżjed żieda fin-numru ta’ kumpaniji m’għandhiex ikollha impatt konsiderevoli fuq il-proporzjon tal-kampjun meta mqabbel mal-produzzjoni globali tal-Unjoni.

(28)

Kif spjegat fil-premessa (21), il-Kummissjoni kkunsidrat il-firxa ġeografika meta għażlet il-kampjun. Għandu jiġi sottolineat li, min-natura tiegħu, kampjun m’għandux għalfejn jirrifletti l-firxa ġeografika eżatta (lanqas id-distribuzzjoni eżatta jew it-tqassim ta’ kwalunkwe kriterju ieħor) tal-popolazzjoni sħiħa sabiex ikun rappreżentattiv. Hu biżżejjed li, bħalma hu l-każ għall-kampjun attwali, li jinkludi erba’ Stati Membri, ikun jirrifletti l-proporzjonijiet rilevanti tal-pajjiżi ewlenin tal-manifattura involuti. Kwalunkwe approċċ ieħor ma kienx ikun prattikabbli fuq livell amministrattiv, b’mod partikolari jekk diversi kriterji differenti għandhom jiġu kkunsidrati sabiex tiġi żgurata l-kwalità rappreżentattiva. Fil-fatt, din l-allegazzjoni in fine tkun qed timplika li kampjun ikun rappreżentattiv biżżejjed biss jekk ikun fih il-popolazzjoni sħiħa. L-investigazzjoni għaldaqstant enfasizzat li l-kampjun li jkopri erba’ Stati Membri, inklużi t-tlieta bl-akbar produzzjoni, hu rappreżentattiv biżżejjed tal-produzzjoni globali tal-Unjoni, b’mod partikolari meta wieħed iqis il-produzzjoni li hi bbażata fuq arranġamenti ta’ ġbir ta’ tariffi u li għaldaqsant għandu jittieħed kont tagħhom fl-Istat Membru tal-kumpanija li tordna s-servizz tal-ġbir ta’ tariffi.

(29)

Il-kumpaniji inklużi fil-kampjun kienu jinkludu wkoll kampjun tal-firxiet tal-prodotti li jirriflettu l-ordnijiet tad-daqs rilevanti fil-produzzjoni tal-Unjoni. Barra minn hekk, il-firxiet tal-prodotti involuti jikkorrispondu ma’ dawk ta’ esportazzjonijiet Ċiniżi u Vjetnamiżi.

(30)

Fir-rigward tal-prezzijiet tal-bejgħ, tqajjem ukoll l-argument li l-prezzijiet tal-bejgħ medji tal-kampjun ma kinux rappreżentattivi relatati mal-prezzijiet tal-bejgħ indikati fit-talba tar-reviżjoni. F’dan il-kuntest għandu jiġi osservat madankollu li, kuntrarju għal din l-allegazzjoni, l-investigazzjoni wriet li l-prezzijiet tal-bejgħ medji tal-kampjun huma konsistenti mal-prezzijiet rappurtati fit-talba. Fi kwalunkwe każ, anke kieku dan ma kienx il-każ, il-prezzijiet tal-bejgħ medji m’għandhomx għalfejn ikunu eżattament l-istess bħal dawk rappurtati fit-talba, sakemm jinstabu li jirriflettu l-prezzijiet tal-bejgħ tal-popolazzjoni tal-produtturi in ġenerali.

(31)

Fir-rigward tal-kwalità rappreżentattiva f’termini ta’ proporzjon bejn produzzjoni u bejgħ, qed jiġi mfakkar li fis-settur globali, il-produzzjoni tipikament issir skont l-ordnijiet u tkun tirrifletti bil-qawwa t-tendenzi tal-moda. Għaldaqstant, l-istokk mhuwiex indikatur daqstant effettiv, u l-produzzjoni tqarreb ħafna l-bejgħ. Dan ġie kkonfermat fl-istadju tal-ilment u anke waqt l-investigazzjoni tal-kumpaniji inklużi fil-kampjun u għall-industrija tal-Unjoni in ġenerali.

(32)

Minbarra l-kunsiderazzjonijiet deskritti hawn fuq, qed jitfakkar li fi kwalunkwe każ, l-Artikolu 17 tar-Regolament bażiku jistabbilixxi li l-investigazzjonijiet jistgħu jkunu limitati għal kampjuni li huma jew statistikament validi, jew li jikkostitwixxu l-akbar volum rappreżentattiv tal-produzzjoni, bejgħ, jew esportazzjonijiet li jistgħu jiġu investigati b’mod raġonevoli. Jidher ċar mill-kliem ta’ din id-dispożizzjoni li m’hemmx indikazzjoni kwantitattiva jew limitu ta’ x’jikkostitwixxi l-livell tal-volum rappreżentattiv. L-unika indikazzjoni hi li dan il-volum jista’ jkun limitat għal dak li jista’ raġonevolment jiġi investigat fil-perjodu taż-żmien disponibbli.

(33)

Għar-raġunijiet spjegati hawn fuq, l-allegazzjonijiet magħmula mid-diversi partijiet ġew miċħuda u l-validità legali tal-kampjun qed tiġi hawnhekk ikkonfermata peress li l-kampjun hu rappreżentattiv u ntgħażel b’konformità sħiħa mal-Artikolu 17 tar-Regolament bażiku.

(34)

Skont l-informazzjoni disponibbli, ġew ikkuntattjati 139 importatur. 22 importatur mhux relatati wieġbu l-formola tat-teħid tal-kampjuni, li minnhom 21 qablu li jkunu inklużi fil-kampjun. Skont id-dejta sottomessa, dawn il-21 importatur kienu jammontaw għal 12 % tal-importazzjonijiet tal-prodott ikkonċernat mir-RPĊ u 40 % ta’ dawk l-importazzjonijiet mill-Vjetnam (fl-RIP).

(35)

L-ikbar ħames importaturi (Adidas, Clarks, Nike, Puma u Timberland) kienu jammontaw għal madwar 18 % tal-importazzjonijiet ikkonċernati għax kollha rrappurtaw importazzjonijiet konsiderevoli miż-żewġ pajjiżi. Għaldaqstant ġie meqjus li kampjun li jkun magħmul minn dawn il-ħames kumpaniji jkun rappreżentattiv fi ħdan it-tifsira tal-Artikolu 17(1) tar-Regolament bażiku, i.e. f’termini tal-volum tal-importazzjonijiet.

(36)

Madankollu, sabiex tiġi riflessa aħjar il-firxa ġeografika tal-importaturi u d-differenzi fit-tipi ta’ xedd tas-saqajn importati, ġew magħżula tliet importaturi oħra. F’dan ir-rigward, mir-ritorni tal-kampjuni, kien jidher li ħafna mill-importaturi li wieġbu kienu joperaw fuq skala iżgħar f’termini ta’ volum u li kienu importaw żraben tad-ditta inqas magħrufa/tal-moda jew żraben ta’ valur ogħla. Il-mudell tan-negozju u s-setturi tal-prodott innegozjat ta’ dawn l-importaturi iżgħar dehru li huma distinti mill-akbar importaturi u dawn l-importaturi iżgħar setgħu flimkien jammontaw għal sehem importanti tal-importazzjonijiet ikkonċernati. Għaldaqstant ġie meqjus importanti li dawn l-importaturi jiġu rappreżentati wkoll, għax ir-realtà ekonomika ta’ dawn il-kumpaniji tista’ tkun differenti minn dawk tal-importaturi l-kbar imsemmija fil-premessa (35) t’hawn fuq.

(37)

Fuq dawn il-bażijiet, ġie magħżul kampjun li jikkonsisti fi tmien importaturi inklużi l-akbar ħames importaturi u tliet importaturi iżgħar. Dawn irrappreżentaw madwar 10 % tal-importazzjonijiet mir-RPĊ u madwar 34 % tal-importazzjonijiet mill-Vjetnam.

(38)

L-importaturi kollha li kkooperaw li kienu wrew ix-xewqa li jikkooperaw ingħataw l-opportunità li jikkumentaw dwar l-għażla tal-kampjun. Intbgħatu kwestjonarji biex jimtlew mill-kumpaniji inklużi fil-kampjun. Sebgħa mill-importaturi inklużi fil-kampjun wieġbu fil-limitu taż-żmien stipulat. Minħabba n-nuqqas ta’ kooperazzjoni tiegħu, it-tmien importatur inkluż fil-kampjun kellu jiġi eskluż mill-kampjun.

(39)

Il-Kummissjoni kisbet u vverifikat l-informazzjoni kollha li qieset li hi neċessarja għall-iskop tad-determinazzjoni tal-kontinwazzjoni jew il-probabbiltà tar-rikorrenza tad-dumping u l-ħsara u l-interess tal-Unjoni. L-informazzjoni sottomessa mill-kumpaniji li ġejjin ġiet ivverifikata fuq il-post:

—

Yue Yuen Industrial (Holdings) Ltd., Ħong Kong

—

Guangzhou Panyu Pegasus Footwear Co. Ltd., Provinċja ta’ Guangdong;

—

HuaJian Industrial (Holding) Co. Ltd., Ħong Kong u l-kumpanija tal-produzzjoni tagħha Dongguan HuaBao Shoes Co. Ltd, Provinċja ta’ Guandong;

—

Zhejiang Aokang Shoes Co. Ltd., Provinċja ta’ Zhejiang Province;

—

Foshan City Nanhai Golden Step Industrial Co. Ltd., Provinċja ta’ Guangdong;

—

Jianle Footwear Industrial Co. Ltd, Provinċja ta’ Fujian;

—

General Footwear/Gentfort Shoes Co.Ltd, Provinċja ta’ Guangdong.

—

Pou Yuen Industrial Holdings Limited, Ħong Kong

—

Golden Star Co. Ltd, Belt ta’ Haiphong

—

Shyang Hung Cheng Industrials Co Ltd, Provinċja ta’ Binh Duong

—

Associação Portuguesa dos Industriais de Calçado, Componentes, Artigos de Pele e seus Sucedâneos (APICCAPS) (Portugall);

—

Federación de Industrias del Calzado Español (FICE) Spanja;

—

Associazione Nazionale Calzaturifici Italiani (L-ITALJA);

—

British Footwear Association LTd (Il-Gran Brittanja);

—

Fachverband der Lederverarbeitenden Industrie (L-Awstrija);

—

Fédération Française de la Chaussure (Franza);

—

HDS Hauptverband der Deutschen Schuhindustrie e.V. (Il-Ġermanja);

—

Polish Chamber of Shoe and Leather industry (Il-Polonja).

(40)

Twettqu wkoll żjarat ta’ verifika fil-postijiet tat-tmien produtturi tal-Unjoni, li jinsabu f’erba’ Stati Membri. Kif kien il-każ fl-investigazzjoni oriġinali, il-produtturi tal-Unjoni inklużi fil-kampjun kif ukoll produtturi oħra tal-Unjoni li kkooperaw talbu, fuq il-bażi tad-dispożizzjonijiet tal-Artikolu 19 tar-Regolament bażiku li l-identitajiet tagħhom jinżammu kunfidenzjali. Huma qalu li l-iżvelar tal-identità tagħhom jista’ jwassal għal riskju ta’ effetti negattivi konsiderevoli. Ċertu produtturi tal-Unjoni li lmentaw ifornu klijenti fl-Unjoni li jixtru wkoll il-prodotti tagħhom mir-RPC u l-Vjetnam, biex b’hekk jibbenefikaw direttament minn dawn l-importazzjonijiet. Dawk li għamlu l-ilmenti għaldaqstant jinsabu f’pożizzjoni sensittiva peress li wħud mill-klijenti tagħhom jista’ jkollhom raġunijiet evidenti li jopponu l-fatt li ssottomettew jew li appoġġjaw ilment kontra l-allegat dumping ta’ ħsara. Għal dawn ir-raġunijiet huma qiesu li kien hemm riskju ta’ ritaljazzjoni minn uħud mill-klijenti tagħhom, inkluża t-terminazzjoni possibbli tar-relazzjoni tan-negozju tagħhom. Din it-talba ġiet aċċettata għax kienet sostanzjata biżżejjed.

(41)

Ir-rappreżentanti ta’ ċertu produtturi esportaturi kif ukoll importaturi mhux relatati allegaw li ma setgħux b’mod xieraq jeżerċitaw id-dritt tad-difiża tagħhom peress li l-identità ta’ dawk li lmentaw ma ġietx żvelata. Huma argumentaw li, f’dawk iċ-ċirkostanzi, ma setgħux jivverifikaw li l-kumpaniji inklużi fil-kampjun kienu verament rappreżentattivi. F’każ ta’ sitwazzjoni alternattiva, dawn il-partijiet qalu li jekk il-kunfidenzjalità setgħet tiġi garantita b’mod ieħor, f’dan il-każ għandu jkun hemm żvelar sħiħ taċ-ċifri tal-kumpanija individwali.

(42)

F’dan il-kuntest, qed jiġi mfakkar li l-volum tal-produzzjoni tal-kampjun, imqassam bil-pajjiżi, sar disponibbli għall-ispezzjoni mill-partijiet interessati kollha. Fir-rigward tal-argument li għandha tiġi żvelata l-informazzjoni kollha ħlief l-identità tal-kumpanija, għandu jiġi osservat li dan l-iżvelar jista’ indirettament jiżvela l-identità tal-kumpanija inkluża fil-kampjun. Il-prassi normali tal-iżvelar ta’ verżjonijiet mhux limitati tat-tweġibiet tal-kwestjonarju għaldaqstant inżammet (i.e. li fiha dejta indiċjata) anke f’dan il-każ. Fid-dawl tal-affarijiet imsemmija, għandu jiġi konkluż li d-dritt tad-difiża tal-partijiet ġie preservat b’mod xieraq u t-talba ġiet għaldaqstant miċħuda.

—

Achten Beheer BV, Waalwijk, l-Olanda;

—

Adidas AG, Herzogenaurach, il-Ġermanja;

—

C&J Clark’s International Limited, Street, Somerset, ir-Renju Unit;

—

Footex International BV, Hazerswoude-dorp, l-Olanda;

—

Nike European Operations BV, Laakdal, il-Belġju;

—

Puma AG Rudolf Dassler Sport, Herzogenaurach, il-Ġermanja;

—

Timberland Europe BV, Enschede, l-Olanda.

—

Henrich & Cia Ltda, Dois Irmãos, il-Brażil;

—

Werner Calçados Ltda, Très Coroas, il-Brażil;

—

Industria de Calçados West Coast Ltda, Ivoti, il-Brażil.

(43)

Ċertu partijiet qajmu oġġezzjonijiet matul il-proċeduri dwar l-allegat indeboliment tad-drittijiet tad-difiża tagħhom. Huma qalu li, fir-rigward tal-produtturi tal-Unjoni inklużi fil-kampjun, l-informazzjoni miżmuma fil-fajl miftuħ għall-ispezzjoni mill-partijiet interessati ma kinitx kompluta u ma ġietx provduta fil-ħin.

(44)

F’dan ir-rigward għandha tiġi sottolineata li verżjoni tat-tweġiba tal-parti għall-ispezzjoni mill-partijiet interessati (“risposta miftuħa”) ġiet provduta mill-kumpaniji kollha inklużi fil-kampjun mingħajr dewmien mhux dovut u skont il-limiti taż-żmien mogħtija lill-partijiet l-oħra fl-investigazzjoni. Meta tiġi sottomessa risposta miftuħa lill-Kummissjoni, tista’ madankollu tiddaħħal biss fil-fajl miftuħ, ladarba l-kwistjonijiet tal-kunfidenzjalità possibbli jkunu ġew riżolti kif provdut fl-Artikolu 19 tar-Regolament bażiku. Għandu jiġi osservat ukoll li l-Kummissjoni għandha l-obbligu li ddaħħal l-informazzjoni fil-fajl miftuħ fil-ħin sabiex tippermetti li l-partijiet jeżerċitaw id-drittijiet tagħhom. Dan l-obbligu twettaq kif suppost f’dan il-każ.

(45)

Fir-rigward tal-kompletezza tar-risposti miftuħa, għandu jiġi osservat li hija parti normali tal-investigazzjonijiet li l-partijiet jagħmlu sottomissjonijiet addizzjonali matul iż-żmien li fih jipprovdu informazzjoni addizzjonali. Dawn huma miżjuda fil-fajl mhux kunfidenzjali hekk kif kwalunkwe kwistjoni tal-kunfidenzjalità tiġi riżolta. Dan il-proċess, li permezz tiegħu l-kontribuzzjonijiet magħmula mill-partijiet interessati kollha jiġu progressivament integrati fil-korp tal-evidenza użat biex iwassal għas-sejbiet u fil-fajl mhux kunfidenzjali, ma jistax jiġi mfixkel ma’ meta l-fajls ma jkunux kompluti.

(46)

Meta wieħed iqis il-kumplessità ta’ dan il-każ, l-aċċess tal-partijiet ġie ffaċilitat kif ġej. L-ewwel nett, ingħata aċċess elettroniku lill-partijiet interessati, li permezz tiegħu setgħu jiksbu, fuq talba tagħhom, kopja sħiħa tad-dokumenti kollha fil-fajl fuq CD-ROM. Barra minn hekk, id-dokumenti elettroniċi ġew akkompanjati b’indiċi ċar li jippermetti (i) aċċess faċli għall-ħafna dokumenti preżentati f’dan il-każ u (ii) għal rekord datat tad-dokumenti fuq il-fajl. Barra minn hekk, serje ta’ noti għall-fajl imdaħħal fil-fajl miftuħ kien jirrispondi għal mistoqsijiet li jista’ jkollhom impatt fuq id-drittijiet tad-difiża tal-partijiet.

(47)

Dan ippermetta li l-partijiet ikollhom aċċess imtejjeb u li jagħmlu kummenti estensivi matul l-investigazzjoni, li ġew imbagħad indirizzati mill-Kummissjoni kif xieraq. L-allegazzjonijiet dwar in-nuqqas tal-kompletezza u ż-żminijiet indikati fil-fajl miftuħ magħmula mid-diversi partijiet għandhom għaldaqstant jiġu miċħuda.

(48)

Parti interessata partikolari allegat ukoll li l-Kummissjoni ddiskriminat bejn l-importaturi u l-esportaturi billi offriet trattament iżjed favorevoli lill-produtturi tal-Unjoni li lmentaw fl-investigazzjoni. B’mod partikolari ġie allegat li l-importaturi u l-esportaturi ma ngħatawx kunfidenzjalità bħal ma ngħatat lill-produtturi. Ġie allegat ukoll li dawk li lmentaw ingħataw trattament iżjed favorevoli għax ma ġewx mitluba li jissottomettu formoli tal-kampjuni fil-bidu tal-proċeduri u li ngħatat iżjed flessibbiltà fir-rigward tal-limitu taż-żmien u l-istandard tar-risposti lil dawk li għamlu l-ilment filwaqt li esportatur fl-istess sitwazzjoni kien jiġi evalwat fuq il-bażi tal-aħjar fatti disponibbli taħt l-Artikolu 18 tar-Regolament bażiku.

(49)

F’dan il-kuntest għandu jiġi osservat li l-għoti tal-kunfidenzjalità għall-identità tal-produtturi tal-Unjoni li jappoġġjaw l-ilment kien ibbażat fuq talba motivata kif dovut skont l-Artikolu 19 tar-Regolament bażiku. L-ebda talba ta’ din ix-xorta ma ġiet sottomessa mill-esportaturi jew mill-importaturi u lanqas ma seħħew avvenimenti jew ma saret magħrufa informazzjoni tul il-kors tal-investigazzjoni li tissuġġerixxi li l-interessi tal-esportaturi jew l-importaturi kienu se jkunu milquta minħabba l-iżvelar tal-identità tagħhom. Meta wieħed iqis li s-sitwazzjoni tal-produtturi tal-Unjoni f’dan il-kuntest kien fundamentalment differenti minn dik tal-esportaturi u l-importaturi, l-allegazzjoni tad-diskriminazzjoni ma tistax tiġi aċċettata.

(50)

Fir-rigward tal-għażla tal-kampjun, qed issir referenza għall-premessa (19) ta’ hawn fuq. Is-sitwazzjoni għall-esportaturi u l-importaturi kienet pjuttost differenti minn dik tal-produtturi li għamlu l-ilment, għax ma kienx hemm informazzjoni dettaljata fuq il-fajl fir-rigward l-imsemmija esportaturi u importaturi. Għaldaqstant, il-kompletezza tal-formola tal-kampjun kienet neċessità kemm sabiex tiġi vverifikata x-xewqa tal-partijiet li jikkooperaw iżda anke sabiex tinkiseb l-informazzjoni bażika meħtieġa għall-għażla tal-kampjun. Għaldaqstant l-allegazzjoni tad-diskriminazzjoni għandha tiġi miċħuda.

(51)

Fir-rigward tal-flessibbiltà mogħtija lill-produtturi tal-Unjoni fil-kuntest tal-informazzjoni miġbura permezz tal-kwestjonarji fl-ambitu tal-investigazzjoni u l-użu tal-Artikolu 18 tar-Regolament bażiku, għandu jiġi osservat li meta wieħed iqis li l-istess approċċ ġie b’mod konsistenti użat għall-esportaturi u l-importaturi kif ukoll għall-produtturi tal-Unjoni, ma kienx hemm raġunijiet għal kwalunkwe allegazzjoni ta’ diskriminazzjoni. L-allegazzjoni mhux sostanzjata għaldaqstant għandha tiġi miċħuda.

(52)

Fir-rigward tal-għażla tal-pajjiż analogu, xi partijiet iddikjaraw li l-limiti taż-żmien qosra, iż-żmien u l-mod tat-trażmissjoni tal-kwestjonarji ddiskriminaw kontra kumpaniji Indjani u Indoneżjani. F’dan ir-rigward, qed jiġi osservat li l-bgħit tal-kwestjonarji lejn l-Indja u l-Indoneżja seta’ jitlesta biss sal-aħħar ta’ Diċembru tal-2008, wara li jkunu nkisbu l-indirizzi rilevanti tal-produtturi. Il-Kummissjoni assigurat li l-kumpaniji f’dawn il-pajjiżi ngħataw l-istess żmien biex jirrispondu bħal dawk fil-Brażil. Fir-rigward tat-trażmissjoni nnifisha tal-kwestjonarji, il-Kummissjoni għamlet użu mill-posta rreġistrata fil-każijiet kollha, kif ukoll mill-posta elettronika meta dan kien possibbli. Għaldaqstant l-allegazzjonijiet t’hawn fuq għandhom jiġu miċħuda.

(53)

Xi partijiet allegaw li informazzjoni dwar il-pajjiż analogu tpoġġiet fil-fajl miftuħ b’dewmien mhux dovut u li dan kien jikkostitwixxi indeboliment tad-drittijiet tad-difiża tagħhom. Il-Kummissjoni tosserva li fl-investigazzjoni attwali, ħafna mill-ewwel risposti mhux kunfidenzjali għall-kwestjonarji mill-kumpaniji fil-pajjiż analogu nstabu li fihom xi nuqqas, u għaldaqstant kellhom jiġu mitluba verżjonijet ġodda, iżjed adattati. Hekk kif ġew irċevuti, tpoġġew f’fajl miftuħ mingħajr dewmien mhux dovut. Sadanittant, il-Kummissjoni daħħlet fil-fajl miftuħ informazzjoni mqassra dwar il-kumpaniji kkonsultati u r-risposti rċevuti. Dawn l-allegazzjonijiet għaldaqstant għandhom jiġu miċħuda.

(54)

Il-prodott ikkonċernat minn din ir-reviżjoni hu l-istess bħall-prodott definit fir-Regolament oriġinali, i.e. ċertu xedd tas-saqajn bil-partijiet ta’ fuq tal-ġilda jew ġilda komposta, minbarra xedd tas-saqajn sportiv, xedd tas-saqajn li jinvolvi teknoloġija speċjali, papoċċi u xedd tas-saqajn ta’ ġewwa u xedd tas-saqajn b’maskaretta protettiva, li joriġinaw fir-Repubblika tal-Poplu taċ-Ċina u l-Vjetnam (“il-prodott ikkonċernat”), li preżentament jaqgħu taħt il-Kodiċi NM 6403 20 00 , ex 6403 51 05 , ex 6403 51 11 , ex 6403 51 15 , ex 6403 51 19 , ex 6403 51 91 , ex 6403 51 95 , ex 6403 51 99 , ex 6403 59 05 , ex 6403 59 11 , ex 6403 59 31 , ex 6403 59 35 , ex 6403 59 39 , ex 6403 59 91 , ex 6403 59 95 , ex 6403 59 99 , ex 6403 91 05 , ex 6403 91 11 , ex 6403 91 13 , ex 6403 91 16 , ex 6403 91 18 , ex 6403 91 91 , ex 6403 91 93 , ex 6403 91 96 , ex 6403 91 98 , ex 6403 99 05 , ex 6403 99 11 , ex 6403 99 31 , ex 6403 99 33 , ex 6403 99 36 , ex 6403 99 38 , ex 6403 99 91 , ex 6403 99 93 , ex 6403 99 96 , ex 6403 99 98 u ex 6405 10 00 .

(55)

Id-definizzjonijiet tal-Artikolu 1(2) tar-Regolament oriġinali japplikaw għall-investigazzjoni preżenti. Skont dawn id-definizzjonijiet

(56)

Il-prodott identiku soġġett għar-reviżjoni tal-iskadenza preżenti hu, kif definit fl-investigazzjoni oriġinali, ċertu xedd tas-saqajn bil-partijiet ta’ fuq tal-ġilda, sew jekk prodott u mibjugħ fuq is-suq domestiku, fis-suq analogu, u/jew esportat lejn l-Unjoni mir-RPĊ u l-Vjetnam.

(57)

Ċertu partijiet qajmu l-argument li l-prodott identiku mibjugħ fl-Unjoni ma kienx komparabbli mal-prodott ikkonċernat esportat mir-RPĊ u l-Vjetnam. Madankollu nstab li l-prodott mibjugħ fl-Unjoni (f’din ir-reviżjoni) kien komparabbli mal-prodott ikkonċernat esportat mill-pajjiżi kkonċernati. B’mod partikolari, instab li l-karatteristiċi u l-użi fiżiċi u tekniċi, kif ukoll il-kanali tad-distribuzzjoni tal-prodott ikkonċernat kienu simili u ma nbidlux mill-investigazzjoni oriġinali. Dan l-argument għaldaqstant ġie miċħud.

(58)

Ċertu partijiet argumentaw ukoll li s-sistema użata għat-tqabbil tat-tipi tal-prodotti mibjugħa mid-diversi kooperaturi fl-investigazzjoni ma kinitx adattata għax ma kinitx speċifika biżżejjed biex tiggarantixxi tqabbil ġust. Madankollu, is-sistema użata (is-sistema PCN) permessa għat-tqabbil ta’ massimu ta’ 600 kategorija differenti jew tipi ta’ prodotti organizzati f’ħames kriterji ewlenin, jiġifieri, l-istil tax-xedd tas-saqajn, it-tip tal-konsumatur, it-tip tax-xedd tas-saqajn, il-materjal tas-suletta ta’ barra u l-preżenza tal-inforra. Barra minn hekk, din is-sistema ta’ PCN ġiet diġà użata fl-investigazzjoni preċedenti. Ma nġiebu l-ebda raġunijiet sostanzjati li juru għalxiex għandha tiġi emendata. Għaldaqstant l-istess sistema ta’ PCN li kienet użata fl-investigazzjoni oriġinali ġiet applikata fl-investigazzjoni tar-reviżjoni tal-iskadenza preżenti. Dan l-argument għaldaqstant ġie miċħud.

(59)

Ċertu partijiet allegaw li l-Kummissjoni biddlet il-metodoloġija tagħha meta mqabbla mal-każ oriġinali billi biddlet id-definizzjoni tan-numri tal-kontroll tal-prodott (PCN’s) tul il-kors tal-investigazzjoni. Din l-allegazzjoni madankollu mhix korretta. Minflok, tul il-kors tal-investigazzjoni, ħareġ ċar li ċertu partijiet kienu interpretaw u applikaw ħażin l-istruttura tal-PCN għal ċertu tipi ta’ prodotti. Sabiex jiġi żgurat approċċ konsistenti, il-mudelli tax-xedd tas-saqajn in kwistjoni ġew għaldaqstant klassifikati mill-ġdid u ngħataw it-titolu tal-PCN xieraq kull meta dan instab li hu meħtieġ. Għaldaqstant, kull meta l-Kummissjoni sabet li l-partijiet taw informazzjoni mhux preċiża, kellha tikkoreġi dan. Din il-korrezzjoni għaldaqstant la tista’ titqies bħala bidla fil-metodoloġija, u lanqas bħala bidla tal-kontenut tal-PCN. Għall-kuntrarju, il-bżonn li tiġi rispettata l-metodoloġija tal-PCN kien l-istess raġuni għalxiex kellha titwettaq il-korrezzjoni. Għaldaqstant l-argument kellu jiġi miċħud.

(60)

Diversi partijiet interessati għamlu talbiet simili għal dawk irċevuti fl-investigazzjoni oriġinali. Huma argumentaw li ċertu tipi ta’ xedd tas-saqajn, li jaqgħu taħt l-ambitu tal-prodott identiku, eż. żraben tal-ħajkijiet, żraben tal-brilli, żraben tal-qdif bil-kenura fuq l-ilma baxx, żraben tat-teknoloġija speċjali, żraben għall-irkib taż-żwiemel u żraben ta’ daqsijiet speċjali, kienu differenti wisq biex jappartjenu għall-istess kategorija. Talba oħra li saret kienet li l-limitu tal-valur ta’ EUR 7.5 għal kull par applikabbli għaż-żraben STAF għandu jitnaqqas. Qed jiġi mfakkar li fl-investigazzjoni oriġinali, dan il-limitu tal-valur kien tnaqqas minn EUR 9 għal EUR 7.5 kull par.

(61)

F’dan ir-rigward, reviżjoni tal-iskadenza ma tippermettix bidla fl-ambitu tal-prodott taħt dawn il-miżuri. Bidla ta’ din ix-xorta setgħet ġiet ikkunsidrata kieku parti kellha tagħmel talba sostanzjata skont l-Artikolu 11(3) tar-Regolament bażiku. Għaldaqstant it-talba ta’ hawn fuq kellha tiġi miċħuda.

(62)

Skont l-Artikolu 11(2) tar-Regolament bażiku, ġie eżaminat jekk id-dumping kienx aktarx se jkompli jew jiġi ripetut mal-iskadenza possibbli tal-miżuri fis-seħħ kontra r-RPĊ u l-Vjetnam.

(63)

Il-volumi u l-prezzijiet tal-importazzjonijiet miż-żewġ pajjiżi kkonċernati żviluppaw kif muri fit-tabella ta’ hawn taħt. L-importazzjonijiet Ċiniżi ġew soġġetti għal kwoti sal-31 ta’ Diċembru 2004 u l-importazzjonijiet żdiedu sostanzjalment wara din id-data u kienu f’livelli għolja fl-2006. Fl-2007 u fl-RIP, il-volumi tal-importazzjoni stabbilizzaw wara tnaqqis meta mqabbel mal-2006. Minħabba l-investigazzjoni kontra ċ-ċirkumvenzjoni, il-miżuri ġew estiżi għall-importazzjonijiet tal-Makaw SAR li kienu soġġetti għal reġistrazzjoni sa minn Settembru tal-2007.

(64)

L-importazzjonijiet mill-Vjetnam ma kinux soġġetti għall-kwoti u kienu f’livelli għolja fl-OIP. Il-volumi tal-importazzjonijiet imbagħad naqsu sal-2007 qabel ma reġgħu telgħu fl-RIP.

(65)

Dawn iċ-ċifri juru li, kuntrarju għall-argumenti magħmula minn xi partijiet interessati, l-importazzjonijiet mill-pajjiżi kkonċernati baqgħu f’livelli għolja fl-RIP. Is-sehem tas-suq ikkombinat tagħhom fl-RIP hu ta’ 28.7 % u għaldaqstant hu konsiderevolment ogħla mil-livelli murija fl-OIP (23.2 %). Minkejja li l-ishma tas-suq rispettivi tagħhom tbiddlu mill-OIP, b’mod ġenerali baqgħu sostanzjali, għax kull wieħed mill-pajjiż kellu iżjed minn 10 % tas-sehem tas-suq fl-RIP.

(66)

Fuq il-bażi taċ-ċifri tal-Eurostat, il-prezzijiet medji tal-importazzjoni miż-żewġ pajjiżi kkonċernati żdiedu bejn l-OIP u l-2006. Minn dak iż-żmien, il-prezzijiet stabbilizzaw għar-RPĊ u waqgħu għall-Vjetnam.

(67)

Peress li d-dejta tal-Eurostat hi neċessarjament ġenerali u, filwaqt li tkopri l-prodotti ikkonċernat, ma tagħtix indikazzjonijiet ta’ bidliet possibbli fit-taħlita tal-prodotti, saret analiżi li teżamina t-tendenzi fil-prezzijiet tas-seba’ kumpaniji inklużi fil-kampjun għar-RPĊ u t-tliet kumpaniji inklużi fil-kampjun għall-Vjentam. B’mod ġenerali, għall-kumpaniji inklużi fil-kampjun fiż-żewġ pajjiżi, instab li l-prezzijiet tal-importazzjonijiet naqsu matul il-perjodu mill-2006 sal-RIP.

Tabella 1

Volumi u valuri totali tal-importazzjoni minn pajjiżi taħt investigazzjoni

Tabella 2

Volumi u valuri totali tal-importazzjoni tal-kumpaniji inklużi fil-kampjun

(68)

Skont l-Artikolu 2(7) tar-Regolament bażiku, fil-każ ta’ importazzjonijiet minn pajjiżi li m’għandhomx l-ekonomija tas-suq u safejn tista’ tingħata l-MET, għal pajjiżi speċifikati fl-Artikolu 2(7)(b) tar-Regolament bażiku, il-valur normali għandu jiġi stabbilit fuq il-bażi tal-prezz jew il-valur kostruwit f’pajjiż terz bl-ekonomija tas-suq xieraq.

(69)

Għall-iskop li jiġi stabbilit il-valur nomali għar-RPĊ u l-Vjetnam, il-Kummissjoni indikat fin-Notifika tal-bidu l-intenzjoni li tuża l-Brażil bħala pajjiż analogu, kif kien intuża bħala pajjiż analogu adattat fl-investigazzjoni oriġinali. Il-Kummissjoni stiednet lill-partijiet interessati biex jikkumentaw dwar dan.

(70)

Ġew irċevuti kummenti minn diversi kategoriji ta’ partijiet interessati, bħal produtturi esportaturi li kkooperaw, l-assoċjazzjonijiet rappreżentattivi tagħhom, l-awtoritajiet nazzjonali tagħhom kif ukoll rappreżentanti tal-importaturi li ssuġġerixxew li t-Tajlandja, l-Indja jew l-Indoneżja jkunu pajjiż analogu iżjed adattat mill-Brażil. Il-Kummissjoni eżaminat dawn il-proposti fid-dawl tal-kriterji applikati għall-għażla tal-pajjiż analogu.

(71)

F’dan ir-rigward, il-Kummissjoni stabbilixxiet li d-daqs tas-suq għal xedd tas-saqajn tal-ġilda fl-RIP seta’ jiġi stmat għal 189 miljun par għall-Brażil, 800 miljun par għall-Indja, 109 miljuni għall-Indoneżja u 6 miljuni biss għat-Tajlandja. Minħabba d-daqs żgħir ħafna tas-suq Tajlandiż u d-disponibbiltà ta’ għażliet oħra, il-Kummissjoni ma komplietx tinvestiga t-Tajlandja bħala pajjiż analogu potenzjali.

(72)

B’konsegwenza ta’ dan, il-Kummissjoni talbet il-kooperazzjoni minn produtturi tax-xedd tas-saqajn fil-Brażil, l-Indja u l-Indoneżja, wara t-talbiet mill-partijiet, Intbagħtu kwestjonarji fit-tliet pajjiżi u ġew lura risposti utli minn ħames produtturi Brażiljani, wieħed Indjan u ħames produtturi Indoneżjani.

(73)

Il-Kummissjoni eżaminat il-kwalità rappreżentattiva tal-kumpaniji li rrispondew dwar il-bejgħ domestiku tagħhom.

(74)

Fir-rigward tal-Brażil, it-tliet kumpaniji investigati kellhom bejgħ domestiku tal-prodott identiku fil-perjodu tal-investigazzjoni li kien jirrappreżenta madwar 17 % tal-esportazzjonijiet Ċiniżi u madwar 19 % tal-esportazzjonijiet Vjetnamiżi inklużi fil-kampjun.

(75)

Fir-rigward tal-Indja, kumpanija waħda biss ippreżentat lilha nnifisha, u rrappurtat bejgħ domestiku tal-prodott identiku fil-perjodu tal-investigazzjoni li jirrappreżenta madwar 5 % tal-esportazzjonijiet Ċiniżi u madwar 6 % tal-esportazzjonijiet Vjetnamiżi inklużi fil-kampjun.

(76)

Fir-rigward tal-Indoneżja, il-ħames kumpaniji li kkooperaw kellhom bejgħ domestiku tal-prodott identiku li jirrappreżenta madwar 2 % tal-esportazzjonijiet Ċiniżi u madwar 2 % tal-esportazzjonijiet Vjetnamiżi inklużi fil-kampjun.

(77)

Il-Brażil għaldaqstant kien l-uniku pajjiż bl-iżjed volum rappreżentattiv tal-bejgħ domestiku fil-perjodu tal-investigazzjoni.

(78)

Sussegwentament il-Kummissjoni eżaminat kemm-il tip ta’ xedd tas-saqajn meta mqabbla ma’ dawk esportati miċ-Ċina u l-Vjetnam kienu koperti mill-bejgħ domestiku fit-tliet pajjiżi kkonċernati.

(79)

Il-bejgħ domestiku tal-produtturi Brażiljani u Indoneżjani kien ikopri fl-RIP firxa wiesgħa ta’ prodotti, li hu komparabbli ma’ numru konsiderevoli ta’ PCNs esportati miċ-Ċina u l-Vjetnam. Fil-każ tal-Indja, il-produttur uniku tal-kooperazzjoni rrapporta bejgħ domestiku fl-RIP li jaqbel biss ma’ 1 PCN esportat miċ-Ċina u l-Vjetnam.

(80)

Skont id-dejta miġbura mill-Kummissjoni, it-tliet pajjiżi eżaminati kollha għandhom numru importanti ta’ produtturi li jiżguraw li hemm livell għoli ta’ kompetizzjoni bejn operaturi domestiċi fis-swieq rispettivi tagħhom. Il-Brażil għandu madwar 7 800 produttur tax-xedd tas-saqajn tal-ġilda, li 1 500 minnhom jistgħu jitqiesu li huma ta’ daqs li jista’ b’mod suffiċjenti jitqabbel ma’ kumpaniji Ċiniżi/Vjetnamiżi. L-Indja hi rrappurtata li għandha madwar 3 000 produttur. Għall-Indoneżja, in-numru ta’ produtturi hu stmat li hu 212. It-tliet pajjiżi għandhom esportazzjonijiet sostanzjali (stmati madwar 64 miljun par għall-Brażil, 67 miljun għall-Indja u 27 miljun għall-Indoneżja). Il-Brażil instab li għandu konsum domestiku ogħla ta’ żraben tal-ġilda per capita (1) meta mqabbel mal-Indja (0.7) u l-Indoneżja (0.5).

(81)

Fir-rigward tal-importazzjonijiet fil-pajjiżi eżaminati, dawn laħqu fl-RIP sehem fis-suq ta’ madwar 2 % fil-Brażil, madwar1 % fl-Indja u madwar1.5 % fl-Indoneżja.

(82)

Fuq il-bażi ta’ dawn l-elementi, il-Kummissjoni kkunsidrat li l-Brażil kien l-iżjed għażla adattata bħala pajjiż analogu. B’mod partikolari, il-Brażil instab li għandu l-iżjed volum rappreżentattiv tal-bejgħ domestiku tax-xedd tas-saqajn bil-partijiet ta’ fuq tal-ġilda. Barra minn hekk, il-kumpaniji Brażiljani li kkooperaw jipproduċu firxa wiesgħa ta’ prodotti, li tixbah ħafna lil dawk taċ-Ċina u l-Vjetnam. Il-produtturi Indoneżjani li kkooperaw, li wkoll kellhom firxa wiesgħa ta’ prodotti, kellhom bejgħ domestiku ferm inqas, filwaqt li l-bejgħ domestiku Indjan, għalkemm laħaq volum sostanzjali, kien ta’ firxa limitata ħafna.

(83)

Diversi partijiet qalu li l-Brażil m’għandux jintuża bħala suq analogu, għax jispeċjalizza biss f’xedd tas-saqajn tan-nisa. Qalu li dan seta’ jintwera mit-tweġibiet tal-kwestjonarju tal-kumpaniji Brażiljani li kkooperaw u mill-fatt li l-Brażil jesporta l-iżjed żraben tan-nisa.

(84)

Madankollu, l-investigazzjoni wriet li iżjed minn nofs il-bejgħ domestiku totali rrapurtat mill-kumpaniji Brażiljani li kkooperaw kienu żraben tal-irġiel. Matul iż-żjarat ta’ verifika li l-Kummissjoni għamlet lill-produtturi Brażiljani, instab li filwaqt li ż-żewġ kumpaniji ż-żgħar kienu fil-fatt iżjed speċjalizzati f’xedd tas-saqajn tan-nies, l-akbar waħda kienet tbiegħ l-iżjed xedd tas-saqajn tal-irġiel fis-suq domestiku. Għaldaqstant il-bejgħ fis-suq domestiku isir fi kwantitajiet suffiċjenti kemm għal tipi tax-xedd tas-saqajn tan-nisa u kif ukoll tal-irġiel. Fir-rigward tal-argument li l-esportazzjonijiet tal-Brażil huma l-iżjed ta’ xedd tas-saqajn tan-nisa, il-Kummissjoni ma tqisx li t-tendenza tal-esportazzjonijiet ta’ pajjiż neċessarjament tikkorrispondi ma’ dik tal-prodotti mibjugħa fis-suq domestiku tiegħu.

(85)

Xi partijiet qalu li r-risposti għall-kwestjonarju kienu juru li l-Brażil kien jispeċjalizza fis-sandlijiet li għaldaqstant ma jistgħux jitqabblu mat-tipi ta’ xedd tas-saqajn esportati miċ-Ċina u l-Vjetnam, li jkopru varjetà ikbar. L-eżaminazzjoni mill-Kummissjoni ma kkonfermatx din l-allegazzjoni, iżda wriet li l-produtturi Brażiljani jbiegħu firxa wiesgħa ta’ tipi ta’ xedd tas-saqajn, li tiġi tradotta fil-livell tal-PCN f’iżjed minn 50 % tar-rata tat-tqabbil mal-mudelli esportati mill-kumpaniji Ċiniżi u Vjetnamiżi fil-kampjuni.

(86)

Xi partijet qalu li l-Brażil ma jistax jintuża bħala pajjiż analogu għal xedd tas-saqajn tat-tfal, għax kellu produzzjoni żgħira ħafna ta’ dan it-tip ta’ żraben. Il-Kummissjoni tqis li hu komuni li pajjiż analogu ma jipproduċix is-sottotipi kollha tal-prodott identiku. Madankollu, dan ma jostakolax li jiġi stabbilit tqabbil ġust tal-valur normali billi jsiru aġġustamenti xierqa għal dan it-tip. Peress li fil-fatt l-ebda mill-produtturi Brażiljani li kkooperaw ma jimmanifatturaw xedd tas-saqajn tat-tfal, il-valur normali għal din it-tip ġie kkalkulat, bħal fl-investigazzjoni oriġinali, bl-aġġustament xieraq tal-valur normali kkalkulat għal żraben tal-adulti. Għaldaqstant qed jiġi konkluż li l-Brażil jista’ jintuża bħala pajjiż analogu għat-tipi kollha ta’ xedd tas-saqajn tal-ġilda, inklużi żraben tat-tfal.

(87)

Xi partijiet iddikjaraw li x-xedd tas-saqajn prodott fil-Brażil juża ġilda ta’ kwalità għolja u għaldaqstant għandu prezzijiet ogħla miċ-Ċina u l-Vjetnam. Għaldaqstant ma jkunx komparabbli max-xedd tas-saqajn li joriġina fiż-żewġ pajjiżi li qed jiġu investigati. Parti oħra interessata però ssottomettiet li l-prezzijiet Brażiljani kellhom jiġu aġġustati b’mod xieraq għax il-ġilda tax-xedd tas-saqajn Brażiljan kienet ta’ kwalità aktar baxxa mill-ġilda użata fiċ-Ċina u l-Vjetnam. Il-Kummissjoni eżaminat din il-kwistjoni u sabet li f’termini tal-prezzijiet u l-kwalità ma kienx hemm differenza bejn il-ġilda użata f’xedd tas-saqajn prodott fil-Brażil u dik użata għal xedd tas-saqajn prodott fiċ-Ċina u l-Vjetnam. Qed jiġi mfakkar f’dan il-kuntest li ġie applikat aġġustament għall-valur normali fil-każ oriġinali, għax il-ġilda użata mill-prodotturi Brażiljani fil-pajjiż analogu nstabet li hi ta’ kwalità inferjuri u mibjugħa bi prezzijiet iżjed baxxi meta mqabbla mal-ġilda użata mill-produtturi inklużi fil-kampjun fil-pajjiżi tal-esportazzjoni. Fl-investigazzjoni tar-reviżjoni preżenti, il-produtturi fil-Brażil (u l-maġġoranza tal-produtturi fil-pajjiżi tal-esportazzjoni) huma differenti minn dawk li kkooperaw fl-investigazzjoni oriġinali. Fil-fatt, it-taħlita differenti tal-kumpaniji wasslet għal spejjeż differenti fl-input tal-ġilda.

(88)

Xi partijiet esprimew l-opinjoni li l-prodotti Brażiljani u Vjetnamiżi mhumiex komparabbli, u argumentaw li l-Brażil jesporta xedd tas-saqajn ta’ livell għoli u li jiswa l-flus filwaqt li l-Vjetnam tesporta prodotti bi prezzijiet irħas, iżda ma ssottomettewx provi li jissostanzjaw dan. Il-Kummissjoni tosserva li fi kwalunkwe każ il-prodotti Vjetnamiżi għandhom jitqabblu ma’ prodotti mibjugħa fis-suq domestiku Brażiljan, u mhux dawk esportati mill-Brażil. Il-Kummissjoni ma sabitx evidenza li x-xedd tas-saqajn li joriġina mill-Vjetnam jew li jinbiegħ fil-Brażil kien limitat għal xi settur tas-suq speċifiku.

(89)

Xi partijiet iddikjaraw li l-Brażil kien żied it-tariffi tiegħu fuq ix-xedd tas-saqajn minn 20 % għal 35 % sa minn Jannar tal-2008 u argumentaw li dan jagħmel lil Brażil suq protett ħafna b’kompetizzjoni mnaqqsa. Argumentaw ukoll li s-sehem tas-suq miżmum minn importazzjonijiet fil-Brażil kien baxx ħafna meta mqabbel mal-konsum. Il-Kummissjoni eżaminat dawn l-allegazzjonijiet. Instab li l-Brażil fil-fatt għolla t-tariffi tiegħu minn 20 % għal 35 % fil-bidu tal-2008, i.e. f’nofs l-RIP. Madankollu, il-Kummissjoni sabet ukoll li l-valur tal-munita Brażiljana meta mqabbla mad-Dollaru Amerikan żdiedet konsiderevolment fuq l-RIP, u b’mod partikolari wara li ġiet introdotta ż-żieda fit-tariffa mill-Brażil. B’mod iżjed preċiż, il-valur tar-Real Brażiljan issaħħaħ b’massimu ta’ 19 % (i.e. żieda akbar miż-żieda fit-tariffi) meta mqabbla mal-bidu tal-RIP. B’konsegwenza ta’ dan, iż-żieda fil-valur tal-munita Brażiljana meta mqabbla mad-Dollaru Amerikan tibbilanċja ħafna l-effett taż-żieda fit-tariffa fuq il-prezzijiet tal-importazzjoni. Barra minn hekk, il-Kummissjoni ma sabet l-ebda prova li ż-żieda fit-tariffi kienet riflessa f’żieda sostanzjali fil-prezzijiet domestiċi, u lanqas li kienet fixklet l-importazzjonijiet. Fil-fatt, il-Kummissjoni stabbilixxiet li, minkejja ż-żieda fit-tariffi, l-importazzjonijiet taż-żraben tal-ġilda fil-Brażil fl-ewwel nofs tal-2008 (i.e. wara ż-żieda fit-tariffi) żdiedu konsiderevolment meta mqabbel mal-ewwel nofs tal-2007. Għaldaqstant, ma kienx hemm impatt effettiv fiż-żieda fit-tariffa fis-suq Brażiljan.

(90)

Xi partijiet iddikjaraw li l-Brażil mhuwiex suq miftuħ għax-xedd tas-saqajn għax l-importazzjonijiet tax-xedd tas-saqajn fil-pajjiż huma mfixkla b’liċenzjar mhux awtomatiku. Il-Kummissjoni sabet li l-Brażil japplika liċenzjar mhux awtomatiku tal-importazzjonijiet fuq ix-xedd tas-saqajn, iżda tosserva li dan ma jidhirx li kkostitwixxa ostaklu għall-importazzjonijiet minħabba t-tnaqqis imsemmi fl-importazzjonijiet. Barra minn hekk, il-Kummissjoni stabbilixxiet li l-Indoneżja wkoll tapplika liċenzjar mhux awtomatiku fir-rigward tal-importazzjonijiet tax-xedd tas-saqajn. Il-Kummissjoni tosserva li l-liċenzjar tal-importazzjoni mhux awtomatiku hu prassi kompatibbli mad-WTO. Il-Kummissjoni għaldaqstant tikkonkludi li ma jeżistux raġunijiet għalxiex l-liċenzji tal-importazzjoni mhux awtomatiċi applikati mill-Brażil għandhom jitqiesu bħala restrizzjoni tal-importazzjoni li tista’ twassal għal konklużjoni li l-Brażil huwa suq mhux miftuħ.

(91)

Xi partijiet argumentaw li ż-żieda konsiderevoli fil-valur tar-Real Brażiljan fis-snin riċenti affetwat ħażin il-kompetittività fil-Brażil, jew li t-tnaqqis fir-Real b’25 % mill-RIP affetwa ħażin il-kompetittività internazzjonali. Dawn l-argumenti ma ġewx appoġġjati bi provi sostanzjali, iżda fi kwalunkwe każ, l-iżviluppi wara l-RIP ma jistgħux jitqiesu li huma pertinenti fl-għażla tal-pajjiż analogu.

(92)

Meta wieħed iqis dan kollu, il-Kummissjoni ma sabitx provi li l-kundizzjonijiet globali tal-kompetizzjoni fis-suq Brażiljan inbidlu konsiderevolment minn meta saret l-investigazzjoni oriġinali b’mod li jagħmlu l-Brażil mhux adattat bħala pajjiż analogu.

(93)

Diversi partijiet qajmu l-argument li l-Indja jew l-Indoneżja huma għażliet iżjed adattati għal suq analogu, għax il-Brażil m’għandux l-istess similaritajiet għaċ-Ċina u l-Vjetnam f’termini ta’ żvilupp ekonomiku, jew GNP per capita.

(94)

Għandu jiġi osservat li bħala definizzjoni, pajjiż li m’għandux l-ekonomija tas-suq jew ekonomija fi tranżizzjoni m’għandhomx l-istess karatteristiċi ekonomiċi bħal pajjiż li għandu l-ekonomija tas-suq. Hu komuni li din id-differenza fl-iżvilupp ekonomiku teżisti bejn pajjiż analogu u pajjiż li m’għandux l-ekonomija tas-suq jew ekonomija fi tranżizzjoni. Dan jgħodd ukoll għad-differenza fid-dħul per capita li hu wkoll indikatur tal-iżvilupp ekonomiku. Dan, madankollu, ma jimpedix lill-Brażil milli jintgħażel bħala pajjiż analogu sakemm jitqies li hu iżjed adattat fir-rigward tal-fatturi l-oħra meqjusa.

(95)

Diversi partijiet interessati saħqu l-fatt li l-ispejjeż tax-xogħol huma ogħla fil-Brażil milli fiċ-Ċina u fil-Vjetnam u li l-Indja, l-Indoneżja jew it-Taljandja, fejn l-ispejjeż tax-xogħol tagħhom huma iżjed komparabbli, għaldaqstant huma iżjed adattati bħala pajjiżi analogi. Ġie dikjarat li minħabba l-pagi ogħla, l-ispejjeż tax-xogħol fil-Brażil jammontaw għal 50-70 % tan-nefqa fil-produzzjoni meta mqabbel ma’ 30 % fiċ-Ċina.

(96)

F’dan ir-rigward, pajjiż b’livell differenti ta’ żvilupp ekonomiku jista’ fil-fatt jintgħażel bħala pajjiż analogu għal pajjiż li m’għandux ekonomija tas-suq jew ekonomija fi tranżizzjoni. B’mod simili, l-ispejjeż tax-xogħol li huma indikatur għall-iżvilupp ekonomiku ta’ pajjiż ma jistgħux jitqiesu bħala kriterju rilevanti b’mod iżolat minn kriterji oħra. Fi kwalunkwe każ, fir-rigward tal-parti tal-ispejjeż tax-xogħol fl-ispiża totali tal-produzzjoni, il-Kummissjoni stabbilixxiet fil-verifika fuq il-post li l-ispejjeż tax-xogħol fil-Brażil huma inqas minn 40 % tal-ispiża tal-produzzjoni totali u għaldaqstant ħafna eqreb għal-livell Ċiniż rilevanti milli allegat.

(97)

Tqajjem ukoll l-argument minn diversi partijiet li l-Brażil mhuwiex adattat biex jiġi stabbilit valur normali, għax il-kumpaniji Brażiljani jerfgħu r-responsabbiltà għall-ispejjeż għad-disinn u r-riċerka u l-iżvilupp, li fil-każ taċ-Ċina u l-Vjetnam jitħallsu mill-klijenti tagħhom barra l-pajjiż. Il-Kummissjoni sabet li din id-differenza fl-istruttura tal-ispejjeż tista’ tkun plawżibbli, peress li l-esportaturi fil-pajjiżi kkonċernati biegħu l-prodott ikkonċernat lil manifatturi li qabel kienu manifatturi tal-Unjoni fl-Unjoni li għadhom jappoġġjaw il-komponenti msemmija tal-ispiża tal-produzzjoni u li jbiegħu l-prodott taħt l-isem tad-ditta tagħhom. Madankollu, din mhijiex raġuni għalxiex il-Brażil għandu jiġi miċħud bħala pajjiż analogu adattat għax jistgħu jsiru aġġustamenti għal dawn l-ispejjeż meta jkun qed jiġi stabbilit il-valur normali (ara l-premessa (118) et seqq.).

(98)

Xi partijiet iddikjaraw li kuntrarju għaċ-Ċina u l-Vjetnam, il-prezzijiet tal-fabbrika fil-Brażil kienu jinkludu spejjeż ta’ tqegħid fis-suq, taxxi speċjali, u spejjeż ta’ kreditu u ta’ kunsinna. Barra minn hekk, kien allegat li l-ispejjeż ġenerali fil-Brażil kienu ogħla, minħabba d-daqs iżgħar tal-kumpaniji Brażiljani. Hawn ukoll, il-Kummissjoni tqis li din mhix raġuni għalxiex il-Brażil għandu jiġi miċħud bħala pajjiż analogu adattat, għax jistgħu jsiru aġġustamenti għal dawn id-differenzi fil-kalkolu tal-valur normali (ara l-premessa (118) et seqq.).

(99)

Xi partijiet allegaw li l-pajjiżi Asjatiċi għandhom aċċess aħjar għall-materja prima mill-Brażil, b’mod partikolari għall-ġilda. Il-Kummissjoni eżaminat id-dokumentazzjoni sottomessa. Fil-fatt intwera li l-produzzjoni tal-ġilda progressat iżjed malajr fl-Asja, iżda dan għandu jiġi kkunsidrat fid-dawl taż-żieda fil-produzzjoni Asjatika tal-oġġetti tal-ġilda. Il-pajjiżi tal-Amerika Latina jammontaw għal ftit iżjed minn 15 % tal-produzzjoni dinjija taż-żraben tal-ġilda u għal kważi 15 % tal-produzzjoni dinjija tal-ġilda mhux maħduma. Il-pajjiżi Asjatiċi jipproduċu iżjed minn 50 % taż-żraben tal-ġilda fid-dinja iżda inqas minn 40 % tal-ġilda mhux maħduma fid-dinja. Għaldaqstant jista’ jiġi konkluż li, minkejja d-differenzi f’ċifri assoluti tal-produzzjoni tal-ġilda, il-pajjiżi tal-Amerika Latina għandhom awtosuffiċjenza ogħla meta mqabbla mal-pajjiżi Asjatiċi u għaldaqstant aċċess iżjed faċli għall-ġilda mhux maħduma.

(100)

Xi partijiet interessati argumentaw li l-Brażil mhuwiex pajjiż ta’ referenza adattat, għax ix-xedd tas-saqajn Brażiljan mhuwiex sostitut għal xedd tas-saqajn Ċiniż u Vjetnamiż, peress li wara l-impożizzjoni ta’ dazji anti-dumping mill-Unjoni, l-importazzjonijiet fil-KE li joriġinaw mill-Brażi ma żdidux filwaqt li dawk mill-Indja u l-Indoneżja żdiedu. F’dan ir-rigward, l-importazzjonijiet fl-Unjoni mill-Indja u l-Indoneżja żdiedu wara li ġew imposti d-dazji anti-dumping. Madankollu, il-Kummissjoni tosserva li l-operaturi kummerċjali jibqgħu liberi fl-għażla tal-fornituri tagħhom, u kif ġie eżaminat aktar ‘il quddiem taħt l-analiżi tal-ħsara, f’dan il-każ ippreferew li jixtru l-prodotti tagħhom minn pajjiżi ġirien taċ-Ċina u l-Vjetnam. Dan ma jrendix il-Brażil mhux adattat bħala pajjiż analogu. Barra minn hekk, pajjiż analogu jservi biex jistabbilixxi l-valur normali. Il-fatt ta’ jekk jesportax jew le lejn l-Unjoni mhuwiex rilevanti għal dan l-iskop. Għaldaqstant, dan l-argument ġie miċħud.

(101)

Xi partijiet argumentaw li l-Brażil ma jistax ikun suq komparabbli għall-Vjetnam, għax il-Vjetnam hu orjentat lejn l-esportazzjoni filwaqt li l-Brażil primarjament ibiegħ fis-suq domestiku. Il-Kummissjoni ma tistax taċċetta r-rilevanza ta’ dan l-argument. Il-Vjetnam hu biċ-ċar iżjed orjentat lejn l-esportazzjoni mill-Brażil, madankollu mhuwiex evidenti kif dan jista’ jaffetwa l-valur normali kkalkulat fil-Brażil, li bħala definizzjoni hu marbut mal-ispejjeż tal-produzzjoni Brażiljani u l-bejgħ domestiku.

(102)

Diversi partijiet qajmu l-argument li l-prezzijiet tal-esportazzjoni fil-Brażil huma aktar baxxi minn dawk domestiċi. Għal uħud mill-partijiet, dan jindika li għandhom jintużaw il-prezzijiet tal-esportazzjoni minflok dawk domestiċi biex jiġi stabbilit il-valur normali. Partijiet oħra argumentaw li dan jikkostitwixxi prova li l-esportaturi Brażiljani qed jagħmlu dumping u qalu li l-Brażil għaldaqstant mhuwiex adattat bħala pajjiż analogu. L-ewwel nett il-Kummissjoni tosserva li l-prezzijiet tal-esportazzjoni mhumiex rilevanti f’dan il-każ, għax hemm disponibbli prezzijiet domestiċi li huma rappreżentattivi u li jrendu profitt b’mod suffiċjenti. It-tieni nett, l-allegazzjoni li l-prezzijiet tal-esportazzjoni Brażiljani huma oġġett ta’ dumping ma ġietx sostanzjata u fi kwalunkwe każ ma tistax tiġi kkonfermata jew miċħuda mingħajr investigazzjoni proprja ta’ din il-kwistjoni.

(103)

Xi partijiet interessati allegaw li l-Brażil mhuwiex adattat bħala pajjiż analogu għax il-produtturi Brażiljani jirċievu appoġġ mill-gvern għall-esportazzjonijiet. Il-Kummissjoni l-ewwel nett tosserva li dan it-tip t’appoġġ jaffetwa primarjament il-prezzijiet tal-esportazzjoni li, kif imsemmija hawn fuq, mhumiex rilevanti għall-investigazzjoni preżenti. Il-Kummissjoni minkejja dan eżaminat il-provi sottomessi mill-partijiet u sabet li l-appoġġ imsemmi kien marbut ma’ programmi ta’ promozzjoni tal-esportazzjoni, simili għal dawk li jistgħu jinstabu f’ħafna pajjiżi oħra, bl-għan li l-prodotti jsiru iżjed magħrufa barra l-pajjiż, permezz ta’ kampanji pubbliċitarji u parteċipazzjoni f’fieri tal-kummerċ internazzjonali. Il-Kummissjoni ma sabet l-ebda indikazzjoni li l-appoġġ għal promozzjoni tal-esportazzjoni fil-Brażil kien jibbenefika l-bejgħ domestiku taż-żraben.

(104)

Diversi partijiet interessati qajmu l-fatt li l-Brażil beda investigazzjoni ta’ anti-dumping ta’ xedd tas-saqajn li joriġina fiċ-Ċina, li fiha l-Italja ntużat bħala pajjiż analogu, u qalu li l-kumpaniji Taljani u Brażiljani aġixxew f’kollużjoni sabiex jimmassimizzaw is-sejbiet ta’ dumping fl-investigazzjoni ta’ reviżjoni mwettqa mill-Unjoni. Madankollu, dawn l-allegazzjonijiet ma ġewx sostanzjati, u ma nġiebu l-ebda provi oħra relatati. Għaldaqstant il-Kummissjoni tiċħad dan l-argument.

(105)

Fid-dawl ta’ dak li ssemma, ġie konkluż li l-Brażil kien l-iżjed pajjiż analogu adattat.

(106)

Numru kbir ta’ partijiet interessati allegaw li l-għażla tal-Brażil bħala l-pajjiż analogu għandu jkun determinati għal sejba ta’ dumping u li d-dumping ma kienx jinstab kieku ġie magħżul wieħed mill-pajjiżi l-oħra. Għas-saħħa tal-argument, il-Kummissjoni għaldaqstant ivverifikat x’kien ikun ir-riżultat kieku ntgħażlet l-Indoneżja, li, għalkemm ma kinitx tkun l-aħjar għażla kif indikat hawn fuq, kienet l-unika alternattiva li setgħet ġiet ammessa għall-Brażil.

(107)

Ir-riżultati huma mogħtija fit-taqsima rilevanti t’hawn taħt, u kkonfermaw li l-għażla tal-pajjiż analogu f’dan il-każ, bejn il-possibiltajiet ammessibbli disponibbli, ma ddeterminatx r-riżultati tal-kalkoli tad-dumping.

(108)

Għaldaqstant il-Brażil intgħażel bħala l-pajjiż analogu.

(109)

Wara l-għażla tal-Brażil bħala pajjiż analogu, il-valur normali ġie kkalkulat fuq il-bażi tad-dejta vverifikata fil-postijiet tal-produtturi Brażiljani li kkooperaw.

(110)

Il-bejgħ domestiku ta’ dawn il-produtturi nstab li kien rappreżentattiv meta mqabbel mal-volum tal-esportazzjonijiet għall-Unjoni mill-produtturi esportaturi fir-RPĊ u l-Vjetnam. Ġie eżaminat ukoll jekk il-bejgħ domestiku għandux jitqies li sar tul il-kors ordinarju tal-kummerċ, billi ġie stabbilit il-proporzjon tal-bejgħ li jrendi profitt lil klijenti indipendenti. L-investigazzjoni wriet li l-bejgħ għal prezzijiet daqs jew iżjed mill-kost unitarju kien jirrappreżenta iżjed minn 80 % tal-volum totali tal-bejgħ ta’ kull produttur. Għaldaqstant, il-valur normali kien ibbażat fuq prezzijiet domestiċi attwali, ikkalkulati bħala medja kkalkulata tal-prezzijiet tal-bejgħ domestiku kollu ta’ tip ta’ prodott magħmula waqt l-RIP, irrispettivament minn jekk dan il-bejgħ kienx irendi profitt jew le.

(111)

Fil-każ ta’ Golden Step, il-valur normali ġie determinat fuq il-bażi tad-dejta tal-kumpanija nnifisha dwar il-bejgħ domestiku u l-ispiża tal-produzzjoni. Dawn id-dejta ġew ivverifikati fil-post tal-kumpanija.

(112)

Il-Kummissjoni l-ewwel stabilixxiet li Golden Step m’għamlet l-ebda bejgħ domestiku matul l-RIP. Għaldaqstant, ma setax jiġi stabbilit valur normali fuq il-bażi tal-prezzijiet domestiċi tagħha, kif provdut bl-Artikolu 2(1), sottoparagrafu 1, tar-Regolament bażiku. Għaldaqstant kellu jiġi applikat metodu ieħor.

(113)

Peress li ma seta’ jintuża l-ebda prezz domestiku biex jiġi stabbilit il-valur normali, kellu jiġi kkalkulat valur normali kkalkulat fuq il-bażi tal-ispejjeż tal-produttur in kwistjoni. B’konsegwenza ta’ dan, skont l-Artikolu 2(3) tar-Regolament bażiku, il-valur normali ġie kkalkulat billi ġew miżjuda mal-ispejjeż tal-manifattura tal-mudell taż-żraben esportati, aġġustati fejn meħtieġ, ammont raġonevoli għall-ispejjeż tal-bejgħ, ġenerali u amministrattivi (“SG&A”) u marġini raġonevoli ta’ profitt.

(114)

F’dan ir-rigward, SG&A u l-profitt ma setgħux jiġu determinati skont l-Artikolu 2(6)(a) tar-Regolament bażiku fuq il-bażi tal-ammonti attwali determinati għal produtturi oħra tal-esportazzjoni fil-pajjiż ikkonċernat għax l-ebda prodottur Ċiniż eżistenti ieħor ma kien ingħata l-MET. Barra minn hekk, peress li Golden Step ma kinitx għamlet l-ebda bejgħ domestiku fl-istess kategorija ġenerali ta’ prodotti fil-pajjiż ikkonċernat, l-SG&A u l-profitt ma setgħux jiġu stabbiliti skont l-Artikolu 2(6)(b) tar-Regolament bażiku. B’konsegwenza ta’ dan, kellhom jiġu determinati skont l-Artikolu 2(6)(c) tar-Regolament bażiku, i.e. fuq il-bażi ta’ kwalunkwe metodu raġonevoli ieħor.

(115)

F’dan il-kuntest, il-Kummissjoni vvalutat l-SGA u r-rati tal-profitt permezz ta’ tliet xenarji possibbli. L-ewwel stabbilixxiet l-SGA u l-profitti bl-użu ta’ dejta tal-investigazzjoni oriġinali. Ikkunsidrat ukoll l-SGA u l-profitti minn produtturi Ċiniżi li jesportaw li riċentament kisbu l-MET f’investigazzjonijiet riċenti oħra u li kellhom bejgħ domestiku tul il-kors ordinarju tan-negozju. Fit-tielet xenarju, eżaminat informazzjoni dwar SG&A u l-profitt fil-pajjiż analogu. Il-valur normali ġie mbagħad valutat fuq dawn ix-xenarji.

(116)

Meta l-bejgħ tal-esportazzjoni kien sar direttament lil klijenti indipendenti fil-Unjoni, il-prezzijiet tal-esportazzjoni ġew stabbiliti fuq il-bażi tal-prezzijiet li fil-fatt tħallsu jew li kienu dovuti għall-prodott ikkonċernat skont l-Artikolu 2(8) tar-Regolament bażiku.

(117)

Meta l-bejgħ tal-esportazzjoni lill-Unjoni kien sar permezz ta’ kumpaniji tal-kummerċ mhux relatati li jinsabu barra l-Unjoni, il-prezzijiet tal-esportazzjoni ġew stabbiliti fuq il-bażi tal-prezzijiet tal-prodott meta mibjugħ għall-esportazzjoni lill-kumpaniji tal-kummerċ i.e. lil xerrej mhux relatat, mill-produtturi kkonċernati skont l-Artikolu 2(8) tar-Regolament bażiku.

(118)

Skont il-metodoloġija użata fl-investigazzjoni oriġinali, għal tipi ta’ prodotti esportati mibjugħa fuq is-suq domestiku Brażiljan, intużaw il-prezzijiet tal-bejgħ domestiku tat-tipi ta’ prodotti li l-iżjed jixbħuhom biex jiġu stabbiliti l-valuri normali. Dawn ġew aġġustati b’mod xieraq skont il-bżonn.

(119)

Il-valur normali u l-prezzijiet tal-esportazzjoni tqabblu fuq bażi ta’ ex-works. Għall-iskopijiet li tiġi żgurata kompetizzjoni ġusta bejn il-valur normali u l-prezz tal-esportazzjoni, saret konċessjoni dovuta fil-forma ta’ aġġustamenti għad-differenzi li jaffetwaw il-prezzijiet u t-tqabbil tal-prezzijiet skont l-Artikolu 2(10) tar-Regolament bażiku. B’mod partikolari, saru dawn l-aġġustamenti li ġejjin:

(120)

Ġie eżaminat jekk aġġustament tal-livell tal-kummerċ taħt l-Artikolu 2(10)(d) tar-Regolament bażiku huwiex ġustifikat. F’dan il-kuntest instab li l-livelli tal-kummerċ fis-swieq domestiċi u tal-esportazzjoni kienu differenti. Għaldaqstant, saru aġġustamenti skont l-Artikolu 2(10)(d)-(i) tar-Regolament bażiku sabiex jirriflettu l-iskontijiet mogħtija lil bejjiegħa bl-ingrossa fuq is-suq Brażiljan, meta mqabbla ma’ bejgħ lil bejjiegħa bl-imnut li kienu saru biss mit-tliet produtturi Brażiljani investigati.

(121)

Sabiex jiġi żgurat tqabbil ġust bejn l-esportazzjonijiet Ċiniżi u Vjetnamiżi min-naħa l-waħda u l-bejgħ domestiku Brażiljan min-naħa l-oħra, ingħatat konċessjoni skont l-Artikolu 2(10)(i) tar-Regolament bażiku sabiex tirrifletti d-differenzi fil-kummissjonijiet imħallsa lill-aġenti indipendenti fil-Brażil.

(122)

Skont l-Artikolu 2(10)(k) tar-Regolament bażiku, ingħatat ukoll konċessjoni għar-riċerka u l-iżvilupp u d-disinn sabiex tirrifletti l-ispejjeż minfuqa mill-produtturi Brażiljani kuntrarju għal produtturi Ċiniżi/Vjetnamiżi.

(123)

Sar ukoll aġġustament skont l-Artikolu 2(10)(a) tar-Regolament bażiku fl-investigazzjoni preċedenti biex jirrifletti d-differenzi fil-kwalità tal-ġilda użata għall-manifattura tax-xedd tas-saqajn. Fl-investigazzjoni preżenti aġġustament ta’ din ix-xorta ma nstabx li hu neċessarju minħabba l-kwalità simili tal-ġilda użata mill-esportaturi Brażiljani, Ċiniżi u Vjetnamiżi (ara l-premessa (87)).

(124)

Aġġustamenti oħra, inklużi dawk li jikkonċernaw it-trasport u l-assigurazzjoni skont l-Artikolu 2(10)(e) tar-Regolament bażiku, saru fil-każijiet kollha meta nstabu li huma raġonevoli, preċiżi u appoġġjati bil-provi.

(125)

Ċertu partijiet interessati argumentaw li t-tibdil fir-rata tal-kambju USD/EUR kellu impatt fuq il-marġini tad-dumping li nstabu u għalhekk kien meħtieġ aġġustament. Din l-allegazzjoni ġiet miċħuda. Taħt l-Artikolu 2(10)(j) tar-Regolament bażiku, dan l-aġġustament jista’ jingħata biss meta jseħħ ċaqliq sostnut fir-rati tal-kambju. Meta r-rati tal-kambju jiċċaqalqu b’mob liberu, bħal fil-każ tar-rata USD/EUR, jiċċaqalqu b’mod regolari ‘l fuq u ‘l isfel. L-ebda moviment sostnut ma jista’ jiġi identifikat f’dan il-każ u għaldaqstant l-ebda aġġustament ma jista’ jingħata.

(126)

Fil-każ tal-Golden Step, it-tqabbil tal-prezz tal-esportazzjoni tiegħu mal-valur normali kif spjegat fil-premessi (111) ‘il quddiem wera marġini tad-dumping fil-firxa bejn 5 % u 16 %.

(127)

Skont l-Artikolu 2(11) u (12) tar-Regolament bażiku, il-marġini tad-dumping ġie stabbilit fuq il-bażi ta’ tqabbil ta’ valur normali bil-medja kkalkulata mat-tip tal-prodott bi prezz tal-esportazzjoni bil-medja kkalkulata skont it-tip tal-prodott. Għall-kumpaniji kollha kampjunati, ġie kkalkulat marġini tad-dumping bil-medja kkalkulata fir-RPĊ. Dan il-marġini tad-dumping ġie attribwit għall-produtturi esportaturi l-oħra kollha fir-RPĊ.

(128)

Il-livell tad-dumping madwar il-pajjiż tar-RPĊ ġie stabbilit f’firxa bejn 35 % u 38 % tal-prezz tal-fruntiera tal-Unjoni CIF, skont il-metodu tal-kalkolu użat għal Golden Step kif spjegat fil-premessa (115).

(129)

Fid-dawl ta’ dak li ġie konkluż dwar l-għażla tal-pajjiż analogu, twettaq ukoll kalkolu tad-dumping bl-użu tal-metodoloġija msemmija hawn fuq, minbarra li l-valuri normali Brażiljani ġew mibdula b’dawk tal-produtturi Indoneżjani li kkooperaw. Dan il-kalkolu rriżulta f’marġini tad-dumping li jvarja bejn 19 % u 22 %, skont il-metodu tal-kalkolu użat għal Golden Step.

(130)

Skont l-Artikolu 2(11) u (12) tar-Regolament bażiku, il-marġini tad-dumping ġie stabbilit fuq il-bażi ta’ tqabbil ta’ valur normali bil-medja kkalkulata skont it-tip ta’ prodott. Peress li l-ebda mill-kumpaniji inklużi fil-kampjun ma ngħataw l-MET, ġie kkalkulat marġini tad-dumping bil-medja kkalkulata fil-Vjetnam. Dan il-marġini tad-dumping ġie attribwit għall-produtturi esportaturi l-oħra kollha fil-Vjetnam.

(131)

Il-livell madwar il-pajjiż ta’ dumping għall-Vjetnam ġie stabbilit li hu 43.8 % tal-prezz tal-fruntiera tal-Unjoni CIF.

(132)

B’mod simili għar-RPĊ, twettaq ukoll kalkolu tad-dumping bl-użu tal-metodoloġija msemmija hawn fuq, minbarra li l-valuri normali Brażiljani ġew mibdula b’dawk tal-produtturi Indoneżjani li kkooperaw. Dan il-kalkolu rriżulta f’marġini tad-dumping ta’ 28.4 %.

(133)

Ċertu partijiet argumentaw li l-esportazzjonijiet mill-pajjiżi kkonċernati bejn l-impożizzjoni ta’ miżuri definittivi f’April tal-2006 u t-tmiem tal-RIP kienu naqsu. Ġie argumentat li dan it-tnaqqis irrifletta t-tnaqqis fil-produzzjoni u l-kapaċità tal-produzzjoni fir-RPĊ u l-Vjetnam li kienu dovuti għall-impożizzjoni tal-miżuri definittivi, il-bidla fil-produzzjoni mir-RPĊ u l-Vjetnam għal pajjiżi oħra jew żieda fil-bejgħ domestiku tagħhom. Allegazzjoni oħra kienet li l-prezzijiet tal-importazzjoni kienu jew żdiedu jew baqgħu stabbli. Il-partijiet allegaw għaldaqstant li l-volumi tal-importazzjoni u l-prezzijiet ma setgħux jiġġustifikaw is-sejba ta’ kontinwazzjoni fid-dumping f’volumi konsiderevoli matul l-RIP.

(134)

Dawn l-argumenti ma jibdlux is-sejba li nstabu marġini tad-dumping sostanzjali għall-RIP u li dawn il-marġini jkopru volumi kbar ta’ importazzjonijiet b’ishma tas-suq kbar fil-Unjoni. Għaldaqstant ġie konkluż li seħħet kontinwazzjoni tad-dumping fir-rigward tal-prodott ikkonċernat li joriġinaw mir-RPĊ u l-Vjetnam.

(135)

L-iżvilupp probabbli tal-importazzjonijiet mir-RPĊ ġie analizzat f’termini kemm tal-prezzijiet kif ukoll tal-volumi mistennija.

(136)

Bħala punt tat-tluq, il-prezzijiet ġew stabbiliti għal-RIP. Id-dejta kienet disponibbli mir-ritorni tal-kampjuni (irċevuti minn 58 produttur tal-esportazzjoni li kkoopera) li kien fihom prezzijiet tal-bejgħ għas-suq domestiku u prezzijiet tal-esportazzjoni kemm lis-suq tal-Unjoni u kif ukoll lil swieq ta’ pajjiżi terzi. Din l-informazzjoni ntużat għaliex tqieset li kienet l-aħjar sors ta’ informazzjoni dwar il-prezzijiet disponibbli għall-prodott ikkonċernat bl-għan li jitqabblu l-indikazzjonijiet tal-prezzijiet fis-swieq differenti. Dawn id-dejta tqiesu li huma rappreżentattivi għax kienu jkopru 22 % tal-importazzjonijiet tas-suq fl-Unjoni. Il-prezzijiet tal-esportazzjoni fl-Unjoni inklużi fir-ritorni tal-kampjuni ġew kontraverifikati ma’ informazzjoni statistika disponibbli lill-Kummissjoni, anke jekk l-informazzjoni statistika ma setgħetx tintuża għal tqabbil tal-prezzijiet għax ma kinitx tkopri bejgħ domestiku Ċiniż u esportazzjonijiet lil terzi pajiiżi.

(137)

Għalkemm id-dejta bbażata fuq il-Eurostat kienet sors ieħor affidabbli, din ma pprovdietx, kif diġà ġie spjegat fil-premessa (67), il-possibbiltà li jitqabblu l-prezzijiet fis-swieq differenti.

(138)

Il-prezzijiet fis-suq tal-Unjoni nkisbu mid-dejta tal-kampjuni tal-produtturi tal-Unjoni. L-investigazzjoni stabbilixxiet li dawn il-prezzijiet medji kienu ta’ tipi komparabbli max-xedd tas-saqajn impurtat għax:

(139)

L-impatt ta’ ċertu żviluppi ġodda mit-tmiem tal-RIP ġie analizzat ukoll għax ġie meqjus li hu konsiderevoli biżżejjed biex jaffetwa l-probabbiltà tal-kontinwazzjoni tad-dumping. Din l-analiżi ntalbet ukoll mill-partijiet interessati.

(140)

Ir-ritorni tal-kampjuni indikaw li l-prezzijiet domestiċi Ċiniżi stabbiliti fuq il-bażi tad-dejta tal-esportaturi stess kienu aktar baxxi mill-prezzijiet fuq is-suq tal-Unjoni. Madankollu, għandu jiġi osservat li d-dejta tal-kumpaniji kollha mhux inklużi fil-kampjun (inkluża dejta relatata ma’ kwalunkwe bejgħ domestiku) ma setgħetx tiġi vverifikata. Għaldaqstant ma setgħetx titwettaq analiżi tal-prezzijiet domestiċi fir-RPĊ. Barra minn hekk, ma nħassitx il-ħtieġa għaliha, meta wieħed iqis is-sejbien ġenerali tal-kontinwazzjoni tad-dumping.

(141)

Ir-ritorni tal-kampjuni indikaw li l-prezzijiet miksuba mill-kooperaturi Ċiniżi fi swieq ta’ pajjiżi terzi ewlenin kienu inqas mill-prezzijiet prevalenti fis-suq tal-Unjoni. Dan kien jindika għal darb’oħra li l-produtturi Ċiniżi setgħu jesportaw kwantitajiet ikbar lejn l-Unjoni. Jekk il-miżuri jitħallew jiskadu, ikun iżjed ta’ profitt għal produtturi esportaturi Ċiniżi li jidderieġu mill-ġdid l-esportazzjonijiet tagħhom lejn l-Unjoni. Madankollu, din id-dejta dwar il-prezzijiet miksuba mill-kooperaturi Ċiniżi fuq swieq terzi ewlenin ma setgħetx tiġi vverifikata u għaldaqstant din l-analiżi ma tkomplietx iżjed.

(142)

Ċertu partijiet interessati qalu li swieq oħra saru iżjed attraenti mis-suq tal-Unjoni. Bħala sostenn għal din l-allegazzjoni, parti waħda ssottomettiet analiżi tal-istatistiċi tad-dwana Ċiniża. Madankollu, l-analiżi tal-Kummissjoni wriet li, minbarra s-suq tal-Istati Uniti, is-suq tal-Unjoni jibqa’ l-iżjed suq attraenti għall-esportaturi Ċiniżi. Fil-fatt, l-esportazzjonijiet żdiedu matul il-perjodu kopert mill-analiżi ta’ din il-parti (i.e. mill-2005 sal-2008). Jekk id-dazji anti-dumping jitħassru, is-suq tal-Unjoni jsir iżjed attraenti u l-volumi għaldaqstant aktarx li jiżdiedu.

(143)

Ir-ritorni tal-kampjuni rċevuti mit-58 kumpanija Ċiniża li kkooperat juru li l-prezzijiet tal-esportazzjoni lejn swieq ewlenin ta’ pajjiżi terzi huma taħt il-prezzijiet miksuba fuq is-suq domestiku. Madankollu, din id-dejta ma setgħetx tiġi vverifikata u għaldaqstant din l-analiżi ma tkomplietx.

(144)

Barra minn hekk, il-livell tal-prezzijiet tal-esportazzjoni lejn pajjiżi terzi meta mqabbla mal-valur normali Brażiljan indika li dawk il-prezzijiet tal-esportazzjoni huma ġeneralment sostanzjalment iżjed baxxi. Madankollu, għal darb’oħra għar-raġunijiet imsemmija fil-premessa (140), din id-dejta ma setgħetx tiġi vverifikata u għaldaqstant din l-analiżi ma tkomplietx iżjed.

(145)

B’konklużjoni d-dejta disponibbli indikat probabbiltà ta’ kontinwazzjoni tad-dumping.

(146)

Il-kumpaniji Ċiniżi kollha fil-kampjun kienu jħaddmu sistema ta’ produzzjoni skont l-ordni u għaldaqstant l-istokks tagħhom kienu ta’ oġġetti lesti biex jintbgħatu. Is-sistema tal-produzzjoni skont l-ordni tintuża għax is-settur tax-xedd tas-saqajn għandu jadatta għal modi ġodda kull staġun fuq il-bażi tal-ordnijiet mill-klijenti u ma jistax jagħmel bejgħ mill-istokks. Għaldaqstant, peress li l-kumpaniji ma kellhomx stokks reali, dan l-element ma setax jitqies bħala indikatur utli għall-analiżi tal-probabbiltà tal-kontinwazzjoni tad-dumping.

(147)

L-investigazzjoni stabbilixxiet li l-kapaċitajiet mhux użati tat-58 kumpanija Ċiniża kollha li kkooperaw kienu jammontaw għal madwar 9 % tal-kapaċità tal-produzzjoni totali tagħhom tax-xedd tas-saqajn. Din il-kwantità tikkorrispondi għal 14.5 miljun par għat-58 kooperatur jew madwar 65 miljun par għall-produtturi esportaturi kollha. Din iċ-ċifra tal-aħħar hi madwar 10 % tal-konsum totali fl-Unjoni (kif jidher fit-tabella 3).

(148)

L-użu probabbli ta’ din il-kapaċità żejda ġie analizzat. Meta wieħed iqis id-differenzi msemmija bejn il-livelli tal-prezzijiet il-Unjoni, fis-suq domestiku Ċiniż u f’pajjiżi terzi, il-kumpaniji Ċiniżi aktarx li jkollhom inċentiv biex jużaw il-kapaċità żejda għall-esportazzjonijiet lejn l-Unjoni. Fattur ieħor, li jagħmel is-suq tal-UE attraenti għall-esportaturi Ċiniżi, hu d-daqs tiegħu.

(149)

Barra minn hekk, għandu jiġi indikat li l-linji tal-immuntar eżistenti jistgħu jintużaw biex jiġu prodotti tipi oħra ta’ xedd tas-saqajn bħal STAF u żraben bil-partijiet ta’ fuq tad-drapp kif ukoll il-prodott ikkonċernat. Il-kumpaniji inklużi fil-kampjun u l-kooperaturi l-oħra fiċ-Ċina produċew kwantitajiet kbar ta’ xedd tas-saqajn li mhuwiex il-prodott ikkonċernat. Il-qasma preżenti bejn il-produzzjoni tal-prodott ikkonċernat u xedd tas-saqajn ieħor tiddependi fuq ir-rekwiżiti tal-konsumaturi u l-politika tal-ordnijiet u l-akkwisti tal-importaturi tal-Unjoni. Madankollu jekk jitħassru l-miżuri, l-importaturi tal-Unjoni żgur li jerġgħu jevalwaw mill-ġdid il-politika tal-akkwisti tagħhom u jistgħu jordnaw proporzjon akbar tal-prodott ikkonċernat mill-produtturi Ċiniżi. Dan jista’ jwassal għal żieda fil-kwantitajiet tal-prodott ikkonċernat esportat lejn l-Unjoni.

(150)

Kif stabbilit bir-Regolament (KE) Nru 388/2008, il-miżuri eżistenti li jkopru r-RPĊ ġew evitati b’kunsinni mill-Makaw SAR. Sussegwentament, il-miżuri ġew estiżi għal kunsinni tal-prodott ikkonċernat immuntati fi u trasbordati permezz tal-Makaw SAR. Dawn il-prattiki taċ-ċirkumvenzjoni juru l-attraenza tas-suq tal-Unjoni għal produtturi esportaturi Ċiniżi.

(151)

L-investigazzjoni wriet li jekk jitħassru l-miżuri, ikun hemm probabbiltà ta’ kontinwazzjoni ta’ dumping. Din il-konklużjoni hi bbażata fuq l-attraenza tas-suq tal-Unjoni f’termini ta’ volum kif ukoll fuq tqabbil tal-prezzijiet bejn is-swieq tal-Unjoni, Ċiniżi u ta’ pajjiżi terzi.

(152)

Barra minn hekk, numru ta’ fatturi inklużi l-livelli relattivi tal-prezzijiet, id-disponibbiltà tal-kapaċitajiet żejda, iċ-ċirkumvenzjoni u l-abbiltà tal-qlib mill-produzzjoni ta’ xedd tas-saqajn ieħor għall-prodott ikkonċernat jipprovdu provi għal żieda probabbli fil-kwantitajiet importati jekk il-miżuri jitħassru. Mill-banda l-oħra, fatturi oħra bħall-kriżi ekonomika dinjija u tendenza għal bidla fil-produzzjoni għal pajjiżi oħra tista’ b’mod inevitabbli tnaqqas il-kwantitajiet importati sa ċertu punt. Dawn il-fatturi huma analizzati f’iżjed dettall fl-Artikolu 5 (żviluppi wara l-RIP) hawn taħt.

(153)

Qed jiġi konkluż li l-importazzjonijiet mir-RPĊ se jibqgħu jidħlu fis-suq tal-Unjoni f’volumi kbar u li dawn il-volumi se jinbiegħu bi prezzijiet baxxi u oġġett ta’ dumping, għalhekk hemm probabbiltà ta’ kontinwazzjoni ta’ dumping jekk il-miżuri jitħallew jiskadu.

(154)

L-iżvilupp probabbli tal-importazzjonijiet mill-Vjetnam ġie analizzat f’termini kemm tal-prezzijiet u kif ukoll tal-volumi mistennija.

(155)

Bħala punt tat-tluq, ġew stabbiliti l-prezzijiet għall-RIP. Id-dejta kienet disponibbli mir-ritorni tal-kampjuni (irċevuti minn 51 produttur esportatur Vjetnamiż li kkoopera) li kien fihom prezzijiet tal-bejgħ għas-suq domestiku u prezzijiet tal-esportazzjoni kemm lejn is-suq tal-Unjoni u kif ukoll lejn swieq ta’ pajjiżi terzi. Din l-informazzjoni ntużat għax tqieset li hi l-aħjar sors ta’ informazzjoni dwar il-prezzijiet għall-prodott ikkonċernat bl-għan li jitqabblu l-indikazzjonijiet tal-prezz fis-swieq differenti. Dawn id-dejta tqiesu li huma rappreżentattivi għax kienu jkopru 82 % tal-importazzjonijiet lejn is-suq tal-Unjoni. Il-prezzijiet tal-bejgħ tal-Unjoni inklużi fir-ritorni tal-kampjuni ġew kontraverifikati mal-informazzjoni statistika (dejta Tarika) disponibbli lill-Kummissjoni. Madankollu, l-informazzjoni statistika ma setgħetx tintuża għal tqabbil tal-prezzijiet għax ma kinitx tkopri l-bejgħ domestiku Vjetnamiż u l-esportazzjonijiet lejn pajjiżi terzi.

(156)

Għalkemm id-dejta bbażata fuq il-Eurostat kienet sors ieħor affidabbli, din ma pprovdietx, kif diġà ġie spjegat fil-premessa (67), il-possibbiltà li jitqabblu l-prezzijiet fis-swieq differenti.

(157)

Il-prezzijiet fuq is-suq tal-Unjoni nkisbu mid-dejta tal-kampjuni tal-produtturi tal-Unjoni. L-investigazzjoni stabbilixxiet li dawn il-prezzijiet medji kienu ta’ tipi komparabbli għax-xedd tas-saqajn importat għax:

(158)

Ir-ritorni tal-kampjuni indikaw li l-prezzijiet domestiċi Vjetnamiżi stabbiliti fuq il-bażi tad-dejta tal-esportaturi kienu inqas mill-prezzijiet fuq is-suq tal-Unjoni. Madankollu, għandu jiġi osservat li d-dejta tal-kumpaniji kollha mhux inklużi fil-kampjun (inkluża dejta relatata ma’ kwalunkwe bejgħ domestiku) ma setgħetx tiġi vverifikata. Għaldaqstant ma setgħetx titwettaq analiżi dettaljata tal-prezzijiet domestiċi fil-Vjetnam. Barra minn hekk, bħal fil-każ tar-RPĊ, ma tqisitx meħtieġa, meta wieħed iqis is-sejbien ġenerali tal-kontinwazzjoni tad-dumping.

(159)

Skont id-dejta mill-Uffiċċju tal-Istatistika Ġenerali tal-Vjetnam u d-Dipartiment Ġenerali tad-Dwana tal-Vjetnam (sena kalendari tal-2008) madwar 50 % tal-esportazzjonijiet tax-xedd tas-saqajn Vjetnamiżi jintbagħtu lejn is-suq tal-Unjoni. Barra minn hekk, l-informazzjoni mill-kampjuni rċevuti turi li waqt l-RIP l-esportaturi li kkooperaw biegħu wkoll volumi kbar ħafna fi swieq ta’ pajjiżi terzi.

(160)

Ir-ritorni tal-kampjuni indikaw li l-prezzijiet miksuba mill-kooperaturi Vjetnamiżi kienu iżjed baxxi mill-prezzijiet prevalenti fis-suq tal-Unjoni. Dan kien jindika li l-produtturi Vjetnamiżi setgħu jesportaw kwantitajiet akbar lejn l-Unjoni.

(161)

Meta wieħed iżomm f’moħħu l-volum baxx ta’ bejgħ magħmul minn produtturi esportaturi fuq is-suq domestiku Vjetnamiż, l-ebda konklużjoni utli ma tista’ ssir fir-rigward ta’ dan it-tqabbil.

(162)

Il-kumpaniji Vjetnamiżi kollha fil-kampjun kienu joperaw sistema ta’ produzzjoni skont l-ordni u għaldaqstant l-uniċi stokks tagħhom kienu ta’ oġġetti lesti li qed jistennew biex jintbagħtu. Is-sistema tal-produzzjoni skont l-ordni tintuża għax is-settur tax-xedd tas-saqajn għandu jadatta għal modi ġodda kull staġun fuq il-bażi tal-ordnijiet mill-klijenti u ma jistax isir bejgħ mill-istokks. Għaldaqstant jitqies li l-istokks f’dan il-każ, mhumiex indikatur b’saħħtu ħafna.

(163)

L-investigazzjoni stabbilixxiet li l-kapaċitajiet mhux użati tal-51 kumpanija Vjetnamiża li kkooperat jammontaw għal madwar 17 % tal-kapaċità tal-produzzjoni totali tagħhom għax-xedd tas-saqajn. Din il-kwantità tikkorrispondi ma’ 34 miljun par għall-51 kooperatur jew madwar 42 miljun par għall-produtturi esportaturi kollha. Iċ-ċifra tal-aħħar hi ta’ madwar 6 % tal-konsum totali fl-Unjoni (kif jidher fit-tabella 3).

(164)

L-użu probabbli ta’ din il-kapaċità żejda ġie analizzat. Meta wieħed iqis id-differenzi msemmija bejn il-livelli tal-prezzijiet fl-Unjoni u fis-swieq ta’ pajjiżi terzi, il-kumpaniji Vjetnamiżi aktarx li jkollhom inċentiv biex jużaw il-kapaċità żejda għall-esportazzjonijiet lejn l-Unjoni. Din il-konklużjoni hi appoġġjata bl-attraenza tas-suq tal-Unjoni f’termini tad-daqs tiegħu.

(165)

Barra minn hekk, għandu jiġi indikat li l-linji tal-immuntar eżistenti jistgħu jintużaw biex jiġu prodotti tipi oħra ta’ xedd tas-saqajn bħal STAF u żraben bil-partijiet ta’ fuq tad-drapp kif ukoll il-prodott ikkonċernat. Il-kumpaniji inklużi fil-kampjun u l-kooperaturi l-oħra fil-Vjetnam ipproduċew kwantitajiet kbar ta’ xedd tas-saqajn li mhuwiex il-prodott ikkonċernat. Il-qasma preżenti bejn il-produzzjoni tal-prodott ikkonċernat u xedd tas-saqajn ieħor tiddependi fuq ir-rekwiżiti tal-konsumaturi u l-politika tal-ordnijiet u l-akkwisti tal-importaturi tal-Unjoni. Madankollu jekk jitħassru l-miżuri, l-importaturi tal-Unjoni żgur li jerġgħu jevalwaw il-politika tal-akkwisti tagħhom u jistgħu jordnaw proporzjon akbar tal-prodott ikkonċernat mill-produtturi Vjetnamiżi. Dan jista’ jwassal f’żieda fil-kwantitajiet tal-prodott ikkonċernat esportat lejn l-Unjoni.

(166)

Minbarra l-kontinwazzjoni tad-dumping f’livelli għolja, l-investigazzjoni wriet li jekk jitħassru l-miżuri, ikun hemm probabbiltà ta’ kontinwazzjoni ta’ dumping. Din il-konklużjoni hi bbażata fuq l-attraenza tas-suq tal-Unjoni f’termini tad-daqs u tal-livelli tal-prezzijiet.

(167)

Barra minn hekk, numru ta’ fatturi inklużi l-livelli relattivi tal-prezzijiet, id-disponibbiltà tal-kapaċitajiet żejda, u l-abbiltà tal-qlib mill-produzzjoni ta’ xedd tas-saqajn ieħor għall-prodott ikkonċernat jipprovdu provi ta’ żieda probabbli fil-kwantitajiet importati jekk il-miżuri jitħassru. Mill-banda l-oħra, fatturi oħra bħall-kriżi ekonomika dinjija u t-tendenza għal bidla fil-produzzjoni għal pajjiżi oħra, tista’ b’mod inevitabbli tnaqqas il-kwantitajiet importati sa ċertu punt. Dawn il-fatturi huma analizzati f’iżjed dettall fit-taqsima 5 (żviluppi wara l-RIP) hawn taħt.

(168)

Qed jiġi konkluż li l-importazzjonijiet mill-Vjentam se jibqgħu jidħlu fis-suq tal-Unjoni f’volumi kbar u li dawn il-volumi se jinbiegħu fi prezzijiet baxxi u oġġett ta’ dumping, għalhekk hemm probabbiltà ta’ kontinwazzjoni ta’ dumping jekk il-miżuri jitħallew jiskadu.

(169)

L-impatt tal-iżviluppi ta’ wara l-RIP fir-rigward kemm tar-RPĊ u kif ukoll tal-Vjetnam ġie analizzat ukoll għax tqiesu li huma konsiderevoli biżżejjed li jaffetwaw il-volumi tal-prodott ikkonċernat prodott fil-pajjiżi kkonċernati u esportati lejn is-suq tal-Unjoni, u l-prezzijiet tiegħu.

(170)

Il-kriżi bdiet fit-tieni nofs tal-2008 (i.e. wara t-tmiem tal-RIP). Xi partijiet argumentaw li kien se jkollha impatt fuq il-produzzjoni u l-esportazzjonijiet (inklużi esportazzjonijiet lill-Unjoni) tal-prodott ikkonċernat li joriġina fil-pajjiżi kkonċernati minħabba l-konsum li qed jiċkien fid-dinja u s-swieq tax-xedd tas-saqajn fl-Unjoni.

(171)

Għandu jingħad mill-bidu li l-allegazzjonijiet magħmula mill-partijiet dwar l-impatt probabbli tal-iżviluppi post-RIP fuq il-volumi tal-esportazzjoni mill-pajjiżi kkonċernati u l-konsum fl-Unjoni kienu kontradittorji. Xi partijiet interessati stmaw li l-esportazzjonijiet mill-pajjiżi kkonċernati setgħu jaqgħu b’25-30 % fl-2009 meta mqabbla maċ-ċifri tal-RIP. Xi partijiet interessati oħra stennew li dawn l-importazzjonijiet jibqgħu stabbli. L-istatistiċi disponibbli tal-Eurostat għall-ewwel nofs tal-2009 fil-fatt kienu juru tnaqqis ta’ 25 % tal-volumi tal-importazzjoni miċ-Ċina u tnaqqis ta’ 28 % tal-volumi tal-importazzjoni mill-Vjetnam. F’termini ta’ prezzijiet, l-istatistiċi tal-Eurostat juru żieda ta’ 34 % għal importazzjonijiet tal-prodott ikkonċernat miċ-Ċina u żieda ta’ 26 % għal importazzjonijiet tal-prodott ikkonċernat mill-Vjetnam. Madankollu, meta wieħed iqis ir-raġunijiet espressi fil-premessa (67) t’hawn fuq, dawn it-tendenzi ma jistgħux jitqiesu li huma rappreżentattivi.

(172)

Xi partijiet argumentaw li l-esportazzjonijiet tal-prodott ikkonċernat li joriġinaw fil-pajjiżi kkonċernati kienu se jaqgħu minħabba bidla fl-akkwisti lil hinn mir-RPĊ u l-Vjetnam għal pajjiżi oħra bħall-Indoneżja, il-Kambodja u l-Indja. Kien argumentat li l-proċess beda wara l-impożizzjoni tal-miżuri f’April tal-2006 u għandu jkompli jekk jerġgħu jiġu imposti miżuri wara r-reviżjoni preżenti. Issemmew ukoll raġunijiet oħra għal din il-bidla, l-iżjed notevoli l-ispejjeż tal-produzzjoni li qed jiżdiedu. Għaċ-Ċina, dawn kienu allegatament dovuti minħabba żieda fl-ispejjeż tax-xogħol, tal-enerġija u tal-materjali lokali, kif ukoll il-leġislazzjoni ambjentali u tax-xogħol. Tqajmet ukoll iż-żieda fil-valur tal-RMB bħala kawża possibbli tal-bidla lejn pajjiżi oħra. Għall-Vjetnam kien allegat li kien hemm bidla fl-akkwisti minn pajjiżi oħra minħabba ż-żieda fl-ispejjeż tax-xogħol flimkien mat-telfien tat-3.5 % benefiċċju tad-dazju GSP fuq l-importazzjonijiet lejn l-UE. Barra minn hekk, kien argumentat li l-bidla għal akkwisti lil hinn miċ-Ċina u l-Vjetnam kienet attraenti minħabba t-titjib fil-kompetittività fil-produzzjoni tax-xedd tas-saqajn fil-pajjiżi li huma s-sors il-ġdid. Kien argumentat ukoll li l-bidla ġiet iffaċilitata mill-fatt li ħafna produtturi fil-pajjiżi kkonċernati kienu proprjetà ta’ jew ikkontrollati minn kumpaniji f’partijiet oħra tal-Asja tax-Xlokk, bħal Tajwan jew Ħong Kong u minħabba l-fatt li l-akkwisti tax-xedd tas-saqajn għas-suq tal-Unjoni huma kkontrollati minn importaturi kbar fl-Unjoni, li għandhom il-mezzi biex jibdlu faċilment is-sorsi tal-provvisti tagħhom meta jkun meħtieġ.

(173)

Għar-RPĊ, għalkemm kien jidher li xi esportaturi ċaqalqu l-operat tagħhom u li jistgħu jerġgħu jagħmlu hekk biex inaqqsu l-ispejjeż, ir-rilokazzjoni xi drabi saret lejn partijiet oħra tar-RPĊ (lil hinn mill-provinċji kostali li kienu jiffurmaw il-bażi tradizzjonali tal-produzzjoni tax-xedd tas-saqajn). Ċaqliq ta’ din ix-xorta, fih innifsu, ma jwassalx għal tnaqqis fil-produzzjoni u l-esportazzjonijiet mir-RPĊ.

(174)

Fir-rigward tal-Vjetnam, mhuwiex meqjus probabbli li ż-żieda fid-dazju ta’ 3.5 % riżultanti mill-gradwazzjoni tal-GSP hi ta’ kobor biżżejjed li twassal għal rilokazzjoni tal-produzzjoni konsiderevoli. Filwaqt li ma jistax jiġi eskluż li din il-gradwazzjoni jista’ jkollha xi impatt fuq il-volumi tal-esportazzjoni mill-Vjetnam, aktarx li ma taffetwax konsiderevolment id-deċiżjonijiet tal-akkwisti tal-importaturi l-kbar tal-Unjoni. Qed jiġi mfakkar li minkejja li l-impożizzjoni tad-dazji anti-dumping hi ħafna ogħla minn 3.5 %, kemm il-Vjetnam u kif ukoll iċ-Ċina żammew livelli għolja ta’ volumi tal-importazzjoni lejn l-Unjoni.

(175)

Għaldaqstant qed jitqies li kwalunkwe rilokazzjoni tal-produzzjoni m’għandhiex tkun ta’ kobor li radikalment ibiddel id-deċiżjonijiet tal-akkwisti tal-importaturi.

(176)

Fir-rigward tal-importazzjonijiet minn pajjiżi oħra ġewwa l-Unjoni, instab li, wara l-impożizzjonijiet tal-miżuri anti-dumping, dawn żdiedu minn ċertu pajjiżi Asjatiċi. Dan, madankollu, ma jibdilx il-fatt li l-prodott ikkonċernat baqa’ jiġi importat miż-żewġ pajjiżi li qed jiġu investigati fl-Unjoni f’volumi konsiderevoli ħafna u bi prezzijiet oġġett ta’ dumping.

(177)

Xi partijiet argumentaw li l-esportazzjonijiet mir-RPĊ jaqgħu minħabba żieda fil-konsum domestiku Ċiniż, imħeġġa mill-politika tal-awtoritajiet Ċiniżi. Madankollu, l-ebda mill-partijiet ma tat provi li jippermettu li ssir evalwazzjoni tat-tkabbir tal-konsum mistenni – din l-evalwazzjoni ssir iżjed diffiċli minħabba l-kriżi ekonomika.

(178)

Filwaqt li hu raġonevoli li wieħed jassumi li t-tkabbir ekonomiku riċenti fiċ-Ċina għandu jirriżulta, mill-inqas fil-perjodu taż-żmien medju, f’xi żieda fil-konsum domestiku tax-xedd tas-saqajn, ma ġiet sottomessa l-ebda prova li turi li dan it-tkabbir għandu jwassal għal (iżjed) tnaqqis fl-esportazzjonijiet lejn l-Unjoni.

(179)

Il-kriżi ekononika qed ikollha influwenza negattiva fuq l-importazzjonijiet lejn l-Unjoni mill-pajjiżi kkonċernati. Madankollu hu raġonevoli li wieħed jassumi li għandu jkun hemm irkupru f’xi stadju, li mbagħad jirriżulta f’volumi tal-bejgħ miżjuda. Anke jekk l-ogħla previżjoni ta’ tnaqqis ta’ 25 – 30 % kellha timmaterjalizza matul l-2009 in ġenerali, il-volumi mir-RPĊ xorta jilħqu ‘l fuq minn 80 miljun par u jiksbu sehem tas-suq tal-Unjoni ta’ iżjed minn 10 % u l-volumi mill-Vjetnam xorta jilħqu madwar 48 miljun par u jiksbu sehem tas-suq tal-Unjoni ta’ madwar 7 %.

(180)

Fir-rigward tal-bidla fl-akkwisti tal-importazzjonijiet tal-Unjoni, ġie osservat li r-rilokazzjoni osservata s’issa ma kellhiex effett determinanti, u m’hemmx indikazzjoni li fil-futur għandu jkun hemm xi bidla ewlenija fit-tendenzi osservati s’issa.

(181)

L-esportazzjonijiet mill-pajjiżi kkonċernati lejn l-Unjoni baqgħu jsiru bi prezzijiet li huma oġġett ta’ dumping matul l-RIP. Minħabba l-kriżi ekonomika u t-tnaqqis (mistenni) fid-domanda, u n-nuqqas ta’ kwalunkwe informazzjoni dwar il-prezzijiet tal-importazzjoni fil-perjodu ta’ wara l-RIP li jindikaw mod ieħor, jidher li hu raġonevoli li wieħed jipprevedi li l-esportazzjonijiet għandhom jibqgħu jsiru bi prezzijiet li huma oġġett ta’ dumping.

(182)

Fid-dawl tas-sejbien t’hawn fuq li jikkonċernaw kemm l-RIP u l-iżviluppi wara l-RIP, qed jiġi konkluż li hemm probabbiltà ta’ kontinwazzjoni ta’ dumping.

(183)

Wara l-iżvelar tas-sejbiet waslu għadd ta’ kummenti. Madankollu, dawn ma kinux tali li setgħu jbiddlu l-konklużjonijiet. L-argumenti ewlenin li tqajmu kienu dawn li ġejjin.

(184)

Bosta partijiet tennew il-kummenti li kienu għamlu matul l-investigazzjoni dwar l-għażla tal-pajjiż analogu. Huma enfasizzaw, inter alia, il-fehma li l-Brażil ma kienx għażla adegwata minħabba l-protezzjoni għolja permezz ta’ tariffi u liċenzji mhux awtomatiċi, l-iżvilupp soċjoekonomiku ogħla miċ-Ċina u l-Vjetnam, l-ispeċjalizzazzjoni preżunta fix-xedd tas-saqajn tan-nisa, u l-allegati prattiki ta’ dumping. Il-Kummissjoni diġà kienet qieset dawn l-argumenti, u indirizzathom fil-fond fl-iżvelar u fil-premessi (68)-(108) ta’ dan ir-Regolament. L-analiżi wriet biċ-ċar li l-Brażil kien l-aktar għażla adegwata bħala pajjiż analogu f’dan il-każ.

(185)

Xi partijiet interessati ddikjaraw li l-kampjun tal-esportaturi kien anqas rappreżentattiv milli kien irrapportat fil-premessi (15) u (18), għaliex il-marġni ta’ dumping ġie kkalkolat fuq il-bażi ta’ erba’ mit-12-il xahar tal-RIP. Ta’ min ifakkar, li din hi l-metodoloġija li normalment tintuża mill-Kummissjoni fir-reviżjonijiet ta’ skadenza, fejn irid jiġi determinat jekk hemmx kontinwità ta’ dumping jew probabbiltà li d-dumping jerġa’ jseħħ. L-investigazzjoni fuq il-post żgurat li l-erba’ xhur kienu rappreżentattivi tal-perjodu sħiħ ta’ 12-il xahar. Dan inkiseb billi tqabblu l-ispejjeż u l-prezzijiet tad-dejta pprovduta għal erba’ xhur mat-tmien xhur li fadal. Barra minn hekk, l-erba’ xhur magħżula kienu l-aħħar xahar ta’ kull kwart u għalhekk, kienu mifruxa b’mod regolari fuq il-perjodu ta’ 12-il xahar. Għaldaqstant, il-Kummissjoni ma taqbilx li l-metodu applikat naqqas il-kwalità rappreżentattiva tal-kampjun.

(186)

Ġie ddikjarat minn ċerti partijiet interessati li billi kkoreġiet l-iżbalji fuq il-PCNs li saru mill-esportaturi li kkooperaw, kif imsemmi fil-premessa (59), il-Kummissjoni biddlet il-metodoloġija użata fil-każ oriġinali. Din l-allegazzjoni mhijiex ġustifikata. Kien preċiżament biex tintuża s-sistema PCN adottata fil-każ preċedenti li l-Kummissjoni kkoreġiet l-iżbalji fil-klassifikazzjoni tal-PCN magħmula minn xi esportaturi

(187)

Ġie allegat minn ċerti partijiet interessati li kien hemm livell insuffiċjenti ta’ tqabbil dirett ta’ PCNs u li l-metodu li jirrikorri għal PCNs simili ferm mhuwiex korrett. Din it-talba ma tistax tintlaqa’. Din is-sistema diġà ġiet applikata fl-investigazzjoni oriġinali. Fl-iżvelar speċifiku mibgħut lill-partijiet fl-investigazzjoni preżenti, il-Kummissjoni żiedet it-tabelli ta’ korrelazzjoni fejn ġie spjegat l-użu ta’ kull PCN simili. L-użu ta’ PCNs simli ferm jiżgura tqabbil ġust bejn il-mudelli Brażiljani u l-mudelli mibjugħa mill-pajjiżi esportaturi. Barra minn hekk, fejn meħtieġ, il-valuri normali li joriġinaw minn PCNs simili ġew aġġustati kif xieraq. Barra dan, l-ebda parti ma ressqet kumment dwar il-possibbiltà ta’ ineżattezza tal-aktar PCN simili użata.

(188)

Xi partijiet interessati ddikjaraw li l-kalkolu ta’ dumping bl-użu tal-Indoneżja bħala pajjiż analogu ma kienx korrett, għax id-dejta użata la ġiet ivverifikata u lanqas aġġustata kif xieraq. Il-Kummissjoni eżaminat id-dejta ppreżentata mill-kumpaniji Indoneżjani, li l-użu tagħha ġie ssuġġerit minn bosta partijiet. Billi ma ntalbux aġġustamenti, il-Kummissjoni ma qisitx neċessarju li tapplikahom. F’kull każ, ta’ min ifakkar li f’dan il-każ partikolari l-Indoneżja ntużat biss biex tiġi kkonfermata s-sejba bbażata fuq il-Brażil.

(189)

Bosta partijiet argumentaw li t-tnaqqis fil-volumi ta’ importazzjoni miċ-Ċina u l-Vjetnam bejn l-2005 u l-2008 (li ssokta wara l-PI) u ż-żieda ta’ prezzijiet tal-importazzjoni fl-istess perjodu jissuġġerixxu li mhemmx probabbiltà ta’ kontinwità ta’ dumping ta’ ħsara. Ta’ min ifakkar li l-importazzjonijiet miċ-Ċina u l-Vjetnam għandhom aktar minn 28 % ta’ sehem mis-suq fl-RIP, u dan hu sostanzjali ferm. Wieħed jinnota li f’ċifri assoluti l-volumi ta’ importazzjoni miċ-Ċina u l-Vjetnam fl-RIP kienu akbar milli fl-OIP, li għalih id-dumping ta’ ħsara diġà ġie stabbilit. Barra minn hekk, l-analiżi tad-dejta vverifikata tal-esportaturi li kienet parti mill-kampjun uriet li mill-2006 ‘l quddiem il-prezzijiet naqsu.

(190)

Ġie ddikjarat minn ċerti partijiet interessati li l-ispejjeż ta’ produzzjoni fiċ-Ċina u l-Vjetnam żdiedu u b’hekk naqqsu t-theddida kompetittiva tal-kumpaniji. Il-Kummissjoni hi tal-fehma li, billi ċ-Ċina u l-Vjetnam mhumiex ekonomiji tas-suq, żieda fl-ispiża ma tfissirx neċessarjament telf ta’ kompetittività fis-suq dinji. L-investigazzjoni wriet li ż-żewġ pajjiżi komplew iżommu ishma mis-suq għoljin fis-suq tal-UE u għalhekk kienu ta’ theddida.

(191)

Xi partijiet stqarrew li, filwaqt li l-UE aċċettat li l-importazzjonijiet waqgħu wara l-RIP minħabba l-kriżi ekonomika, din ma kinitx aċċettata bħala punt deċiżiv fil-probabbiltà ta’ rikorrenza ta’ dumping. Kif ġie spjegat fil-premessi (179) sa (180) din ma kinitx aċċettata bħala punt deċiżiv għax il-volumi ta’ wara l-RIP għadhom għoljin ferm u għandhom sehem kbir mis-suq tal-UE bi prezzijiet li huma oġġett ta’ dumping. Jidher ċar li hemm indikaturi li dawn se jissoktaw ikunu oġġett ta’ dumping fil-ġejjieni f’volumi sinifikanti.

(192)

Xi partijiet interessati kkontestaw l-attrazzjoni tas-suq tal-Unjoni u ddikjaraw li destinazzjonijiet oħra, b’mod partikolari l-Istati Uniti u, b’mod parzjali, r-Russja, huma għall-inqas ta’ interess ugwali għall-esportaturi Ċiniżi u Vjetnamiżi. Issemma wkoll li s-sottomissjonijiet minn parti dwar it-tkabbir sostanzjali mistenni tas-suq Ċiniż innifsu ma ġiex meqjus kif xieraq. Il-Kummissjoni eżaminat din il-kwistjoni u sabet li s-suq tal-Unjoni għadu wieħed mill-aktar swieq attraenti għall-esportaturi Ċiniżi. Jekk id-dazji anti-dumping jitħassru, is-suq tal-Unjoni jsir aktar attraenti u l-volumi, għalhekk, x’aktarx li jiżdiedu. Fir-rigward tat-tkabbir mistenni tal-konsum fiċ-Ċina, il-Kummissjoni eżaminat l-elementi pprovduti minn din il-parti, iżda ma qisithomx biżżejjed biex ibiddlu l-konklużjonijiet. Anki jekk dan it-tkabbir jista’ jiġi antiċipat, m’hemm l-ebda evidenza sostanzjata li t-tkabbir ikun daqstant li jwassal għal tnaqqis sinifikanti ta’ esportazzjonijiet. Minħabba dawn ir-raġunijiet, l-argument kellu jiġi miċħud.

(193)

It-talba għar-reviżjoni tressqet mis-CEC f’isem il-produtturi tal-Unjoni li jirrappreżentaw iżjed minn 25 % tal-produzzjoni tal-Unjoni tal-prodott ikkonċernat matul l-RIP.

(194)

Parti interessata partikolari qalet li numru tal-membri tas-CEC li preżumibbilment jappoġġjaw l-ilment bdew huma stess jimportaw volumi kbar mill-pajjiżi kkonċernati. Intqal ukoll li produzzjoni “reali” konsiderevoli ma seħħitx iżjed fl-Unjoni. Ma ġewx provduti provi f’dan ir-rigward li jissostanzjaw din l-allegazzjoni.

(195)

F’dan il-kuntest, l-informazzjoni kollha disponibbli, inkluża l-informazzjoni provduta fl-ilment, id-dejta miġbura mill-proċeduri tal-Unjoni u l-assoċjazzjonijiet nazzjonali qabel u wara l-bidu tal-investigazzjoni, kif ukoll l-istatistiċi tal-produzzjoni ġenerali intużaw sabiex tiġi stabbilita l-produzzjoni totali fil-Unjoni u l-appoġġ għall-investigazzjoni. L-investigazzjoni żvelat li ħadd mill-produtturi tal-Unjoni li lmenta m’għandu jiġi eskluż mid-definizzjoni tal-produzzjoni tal-Unjoni għax, fuq il-bażi tal-informazzjoni miksuba permezz ta’ min għamel l-ilment, l-ebda wieħed minnhom ma nstab li huwa relatat mal-produtturi esportaturi fil-pajjiżi kkonċernati u l-importazzjonijiet mill-pajjiżi kkonċernati, jekk kien hemm, kienu minimi. Għal kull kumpanija kkonċernata, dawn l-importazzjonijiet kienu jikkostitwixxu l-iżjed 25 % tal-produzzjoni tagħha fl-Unjoni.

(196)

Kif spjegat fid-dettall taħt il-premessa (23) u iżjed ‘il quddiem, waħda mill-kumpaniji inklużi fil-kampjun tal-industrija tal-Unjoni nstabet li għandha produzzjoni mhux kontinwata fl-Unjoni fil-perjodu kkunsidrat. Ġie meqjus jekk din il-kumpanja għandhiex tiġi eskluża mid-definizzjoni ta’ industrija tal-Unjoni. Madankollu, il-piż ta’ din il-kumpanija kien minimu f’termini tal-produzzjoni totali kif ukoll b’rabta mal-kumplament tal-kampjun (6). Għaldaqstant, anke kieku din il-kumpanija ġiet eskluża, ma kienx ikun hemm bidla fl-istampa ġenerali f’termini ta’ pożizzjoni.

(197)

B’kollox, l-investigazzjoni wriet li għad hemm produzzjoni konsiderevoli tax-xedd tas-saqajn tal-ġilda fl-Unjoni, stabbilita f’diversi Stati Membri li jħaddmu madwar 262 000 persuna. Is-settur tal-produzzjoni tax-xedd tas-saqajn hu magħmul minn madwar 18 000 SME li jinsabu principalment f’seba’ pajjiżi Ewropej b’konċentrazzjoni fi tliet pajjiżi tal-produzzjoni ewlenin.

(198)

L-investigazzjoni, madankollu, żvelat li żewġ kumpaniji li jappartjenu għall-istess grupp instabu li huma relatati mal-produtturi esportaturi fir-RPĊ u l-grupp innifsu kien qed jimporta kwantitajiet konsiderevoli tal-prodott ikkonċernat, inkluż mill-esportaturi relatati tiegħu fir-RPĊ. Għaldaqstant, dawn il-kumpaniji ġew esklużi mid-definizzjoni ta’ produzzjoni fl-Unjoni skont it-tifsira tal-Artikoli 4(1) u 5(4) tar-Regolament bażiku.

(199)

Fuq din il-bażi, instab li l-produzzjoni ġenerali tal-Industrija tal-Unjoni skont it-tifsira tal-Artikoli 4(1) u 5(4) tar-Regolament bażiku kienet ta’ 366 miljun par matul l-RIP.

(200)

Meta wieħed iqis li l-produtturi tal-Unjoni li jappoġġjaw it-talba kienu jammontaw għal iżjed minn 25 % tal-produzzjoni totali u fin-nuqqas ta’ oppożizzjoni daqs jew ikbar minn dan il-kobor, għaldaqstant qed jiġi konkluż li t-talba hi appoġġjata minn proporzjon maġġuri tal-industrija tal-Unjoni skont it-tifsira tal-Artikolu 4(1) u l-Artikolu 5(4) tar-Regolament bażiku.

(201)

Id-dejta tal-każ preżenti tirreferi għal Unjoni mkabbra ta’ 27 Stat Membru minflok il-25 pajjiż eżaminat fil-każ oriġinali. Ir-Rumanija, li issieħbet fl-UE fl-2007, hi produttur konsiderevoli. Madankollu, parti importanti tal-produzzjoni tagħha jinvolvi t-trasformazzjoni ta’ materja prima għal tariffa tas-servizz (“manifattura b’tariffa”) għal kumpaniji oħra fl-Unjoni. L-impatt tal-produzzjoni ġenwina Rumena fuq l-istampa ġenerali tal-produzzjoni tal-Unjoni u indikaturi oħra għaldaqstant hu limitat. L-istess impatt limitat jista’ jiġi attribwit għall-Bulgarija. It-tkabbir għaldaqstant ma kellux effett konsiderevoli f’dan ir-rigward.

(202)

Is-settur tax-xedd tas-saqajn fl-Unjoni hu karatterizzat b’netwerks ta’ intrapriżi mikro (li jħaddmu inqas minn 10 persuni) u intrapriżi żgħar. Kumpaniji ta’ iżjed minn 500 impjegat huma eċċezzjonijiet u jħaddmu biss porzjon limitat tal-ħaddiema globali fis-settur. Intrapriżi mikro u żgħar għandhom il-vantaġġ li huma iżjed flessibbli u kapaċi jadattaw għal bidliet fid-domanda tas-suq, iżda mill-banda l-oħra, huma finanzjarjament iżjed vulnerabbli għall-kompetizzjoni internazzjonali u għat-tnaqqis fir-ritmu ekonomiku.

(203)

Meta mqabbla mas-sitwazzjoni li nstabet fl-investigazzjoni oriġinali, l-istrutturi tal-produzzjoni nbidlu f’ħafna modi. Taħt il-pressjoni tal-kompetizzjoni internazzjonali, ħafna produtturi sparixxew, uħud għal kollox u oħrajn saru distributuri tal-produzzjoni fil-pajjiżi Asjatiċi u f’postijiet eqreb (Bożnija, Kroazja, Marokk, Tuneżija, Serbja). Oħrajn iddeċiedew li jmexxu partijiet mill-proċess tal-manifattura fi ħdan l-Unjoni (Rumanija, Ungerija, Polonja).

(204)

Bħala parti mill-proċess ta’ bidla fil-mudell tan-negozju, ħafna operaturi kkontribwixxew faċilitajiet tal-produzzjoni permezz tal-integrazzjoni fi gruppi mwaqqfa permezz ta’ sottokuntratti ma’ produtturi oħra. B’din is-sistema l-kumpanija li tmexxi tipprovdi d-disinn, il-materja prima (li tibqa’ l-proprjetà tal-kumpanija li tmexxi) u tagħmel trasferiment fil-viċinanza ġeografika tagħha tal-manifattura (jew ta’ fażi waħda jew iżjed tal-manifattura bħall-ħjata) lil diversi kumpaniji mikrospeċjalizzati sabiex ittiehom attività staġonali regolari bil-kwantitajiet miftiehma. Fl-aħħar tal-proċess, il-kumpanija li tmexxi tħallas tariffa għax-xogħol imwettaq mis-sottokuntratturi.

(205)

Parti mill-industrija għaddiet ukoll minn bidla fil-mudell tan-negozju karatterizzata minn ċaqliq fil-produzzjoni lejn is-settur ta’ livell għoli b’konċentrazzjoni fi prodotti ta’ valur ogħla. Uħud mill-akbar produtturi tal-Unjoni għaldaqstant jistgħu jsibu opportunitajiet ġodda billi joħolqu d-ditta tagħhom. Uħud minn dawn il-produtturi jużaw ħwienet ta’ frankiġja b’ditta waħda meta jkun possibbli, oħrajn irnexxielhom jiksbu partijiet ta’ ħwienet indipendenti rriservati għad-ditta tagħhom.

(206)

Ħafna kumpaniji f’dan il-grupp barra minn hekk immodifikaw il-politika tad-distribuzzjoni tagħhom, li tiffavorixxi l-bejgħ lil xerrejja bl-imnut (jew anke bejgħ bl-imnut tagħhom stess) minflok bejgħ lil xerrejja bl-ingrossa. In ġenerali, dawn il-bidliet juru settur fejn mudelli tan-negozju differenti jeżistu flimkien.

(207)

Il-bidliet imsemmija lejn produzzjoni fi grupp, settur ta’ prodotti ta’ livell ogħla u bidliet fil-politika tad-distribuzzjoni ppermettew iżjed flessibbiltà u effiċjenza permezz tal-ġbir tar-riżorsi sabiex ikun jista’ jsir użu mill-ekonomiji tal-kobor. Żdiedu wkoll l-abbiltà tagħhom li jiksbu l-mezzi finanzjarji meħtieġa mis-sistema tal-banek.

(208)

Dawn l-iżviluppi juru settur fejn mudelli tan-negozju differenti jeżistu flimkien. Parti kbira tal-industrija għadha fi stadju kmieni ħafna tal-bidla tal-mudell tan-negozju u għandha bżonn iżjed żmien biex tlesti l-proċess. It-tieni grupp, li biddel il-mudell tan-negozju, żdied konsiderevolment matul il-perjodu kkunsidrat iżda baqgħu xorta mhux kapaċi li jibbenefikaw b’mod sħiħ mit-tnaqqis fin-numru ta’ produtturi fis-suq, kif kien ikun normalment mistenni.

(209)

Il-konsum apparenti naqas b’7 % matul il-perjodu kkunsidrat, i.e. minn 725 miljun par fl-2006 għal 675 miljun par matul l-RIP.

(210)

It-tnaqqis fil-konsum għandu jitqies flimkien maż-żieda paralleli fil-konsum ta’ tipi oħra ta’ żraben barra l-ambitu tal-prodott (eż., drapp, lastku & plastik). Bħala referenza, il-konsum ta’ żraben tad-drapp, tal-lastku u tal-plastik żdied bi 23 % fl-istess perjodu. Dan jidher li juri xi sostituzzjoni fost iż-żewġ kategoriji tal-prodotti, konnessi anke ma’ tendenzi tal-moda (penetrazzjoni ta’ żraben sintetiċi/tal-ġilda, jew żraben sintetiċi li jixbhu l-ġilda). Meta wieħed iqis madankollu, li ż-żieda fil-konsum tax-xedd tas-saqajn ieħor hu ferm ogħla (23 %) mit-tnaqqis fil-konsum tax-xedd tas-saqajn tal-ġilda (7 %), ma jistax madankollu jiġi konkluż li d-drapp u materjali oħra ħadu post ix-xedd tas-saqajn tal-ġilda ħlief sa livell limitat. Barra minn hekk, il-prezzijiet medji tal-importazzjoni ta’ xedd tas-saqajn ieħor hu inqas minn dak tax-xedd tas-saqajn tal-ġilda u din id-differenza fil-prezzijiet tagħmilha ċara li kieku kien hemm interkambjalità bejn iż-żewġ tipi, is-settur tax-xedd tas-saqajn tal-ġilda li hu ferm ogħla kien jinqered għal kollox. Għall-kuntrarju, studju tas-suq disponibbli għall-pubbliku (7) juri li ż-żraben tal-ġlda se jibqa’ jkollhom pożizzjoni b’saħħitha fi-suq. Fil-fatt jidher li l-konsumaturi issa qed jixtru żraben tal-ġilda daqs kemm kienu jixtru qabel, iżda barra dan qegħdin jixtru konsiderevolment aktar żraben tad-drapp u sintetiċi.

(211)

L-importazzjonijiet Ċiniżi totali naqsu minn 157 għal 125 miljun par matul il-perjodu kkunsidrat, jew minn 21.6 % għal 18.5 % tas-suq tal-UE.

(212)

Madankollu kif muri hawn fuq, meta mqabbel mal-OIP, seħħet żieda qawwija fl-importazzjonijiet miċ-Ċina wara t-tmiem tas-sistema tal-kwota (1 ta’ Jannar tal-2005), fuq il-bażi tal-prezzijiet tal-importazzjoni baxxi. Il-livelli tal-importazzjoni naqsu wara l-impożizzjoni tal-miżuri, stabilizzaw fl-2007 u l-RIP f’iżjed minn 120 miljun par – kważi darbtejn daqs l-ammont tal-volumi tal-importazzjoni tal-OIP.

(213)

Barra minn hekk, għandu jiġi osservat li investigazzjoni kontra ċ-ċirkumvenzjoni sabet li l-prodotti Ċiniżi oġġett ta’ dumping kienu qed jevitaw id-dazji u jfixklu l-effett rimedjali tal-miżuri biċ-ċirkumvenzjoni tal-miżuri msemmija permezz tal-Makaw skont it-tifsira tal-Artikolu 13 tar-Regolament Bażiku. Dan juri li s-suq tal-Unjoni baqa’ importanti ħafna għall-produtturi esportaturi Ċiniżi.

(214)

L-importazzjonijiet Vjetnamiżi naqsu fil-perjodu kkunsidrat minn 79 għal 69 miljun par. Minkejja dan in-nuqqas ta’ iżjed minn 13 % meta mqabbel mal-OIP, il-livelli tal-importazzjoni baqgħu konsiderevoli u l-ishma tas-suq huma bejn wieħed u ieħor stabbli qrib il-marka ta’ 10 % matul l-RIP.

(215)

Flimkien, l-importazzjonijiet miċ-Ċina u l-Vjetnam kienu jammontaw għal 237 miljun par fl-2006, 185 miljun par fl-2007 u 194 miljun par fl-RIP. Filwaqt li kien hemm tnaqqis fil-volumi fil-perjodu kkonċernat, il-livelli tal-importazzjoni huma xorta ogħla minn dawk li wasslu għall-impożizzjoni tal-miżuri (166 miljun). Is-sehem tas-suq konġunt taċ-Ċina u l-Vjetnam naqas minn 32.7 % għal 28.7 % matul il-perjodu iżda anke f’dan il-każ, is-sehem tas-suq tal-RIP hu konsiderevolment ogħla minn dak tal-OIP ta’ 23 %.

(216)

Il-Kummissjoni kkunsidrat jekk l-effetti tal-importazzjonijiet oġġett ta’ dumping mill-pajjiżi kkonċernati għandhomx jiġu evalwati b’mod kumulattiv, fuq il-bażi tal-kriterji stabbiliti fl-Artikolu 3(4) tar-Regolament bażiku. Dan l-Artikolu jipprovdi li l-effetti tal-importazzjonijiet minn żewġ jew tliet pajjiżi fl-istess waqt soġġetti għal investigazzjonijiet anti-dumping għandhom jiġu evalwati b’mod kumulattiv biss jekk ikun determinat li (a) il-marġini tad-dumping stabbilit b’rabta mal-importazzjonijiet minn kull pajjiż hu iżjed mid-de minimis kif definit fl-Artikolu 9(3) tar-Regolament bażiku u li l-volum tal-importazzjonijiet ta’ kull pajjiż mhuwiex negliġibbli u (b) li evalwazzjoni kumulattiva tal-effetti tal-importazzjonijiet hi adattata fid-dawl tal-kundizzjonijiet tal-kompetizzjoni bejn il-prodotti importati u l-kundizzjonijiet tal-kompetizzjoni bejn il-prodotti importati u l-prodott tal-Unjoni identiku.

(217)

F’dan ir-rigward, l-ewwel instab li l-marġini tad-dumping stabbilit għal kull wieħed mill-pajjiżi kkonċernati kienu iżjed mid-de minimis. Barra minn hekk, il-volum tal-importazzjonijiet oġġett ta’ dumping minn kull wieħed minn dawn il-pajjiżi ma kienx negliġibbli fis-sens tal-Artikolu 5(7) tar-Regolament bażiku. Fil-fatt, il-volum impurtat rappreżentat għar-RPĊ u l-Vjetnam rispettivament jammonta għal madwar 18 u 10 % tal-konsum tal-Unjoni waqt l-RIP.

(218)

L-investigazzjoni kompliet uriet li l-kundizzjonijiet tal-kompetizzjoni kemm bejn l-importazzjonijiet oġġett ta’ dumping u bejn l-importazzjonijiet oġġett ta’ dumping u l-prodott tal-Unjoni identiku kienu simili. Instab li, irrispettivament mill-oriġini tagħhom, ix-xedd tas-saqajn bil-partijiet ta’ fuq tal-ġilda prodotti/mibjugħa mill-pajjiżi kkonċernati u dawk prodotti/mibjugħa mill-industrija tal-Unjoni jikkompetu kontra xulxin peress li huma l-istess f’termini tal-karatteristiċi bażiċi tagħhom, b’mod li jistgħu jiġu użati wieħed flok l-ieħor min-naħa tal-konsumatur u mqassma permezz tal-istess kanali tad-distribuzzjoni. Barra minn hekk, l-investigazzjoni żvelat li għaż-żewġ pajjiżi, il-volum tal-importazzjonijiet żviluppa b’mod parallel: iż-żewġ pajjiżi naqsu l-importazzjonijiet tagħhom b’madwar 10-25 % bejn l-2006 u l-RIP. Il-prezzijiet tal-importazzjoni ta’ dawn iż-żewġ pajjiżi huma wkoll fl-istess ordni ta’ kobor. Barra minn hekk, dawn il-prezzijiet instabu li huma inqas mill-prezzijiet tal-industrija fl-Unjoni f’livell tan-negozju komparabbli.

(219)

Fuq din il-bażi, ġie konkluż li l-kundizzjonijiet kollha tal-akkumulazzjoni jintlaħqu u li għaldaqstant l-effett tal-importazzjonijiet oġġett ta’ dumping li joriġinaw fil-pajjiżi kkonċernati għandhom jiġu evalwati flimkien għall-iskop tal-analiżi tal-ħsara.

(220)

Il-prezzijiet medji tal-importazzjonijiet Ċiniżi fil-perjodu taħt kunsiderazzjoni baqgħu pjuttost stabbli, madwar EUR 8.4 kull par. Dan hu bejn wieħed u ieħor 20 % ogħla mil-livell tal-prezz tal-OIP (EUR 7.2) Il-prezzijiet medji tal-importazzjonijiet Vjetnamiżi naqsu matul il-perjodu meqjus, u fl-RIP huma qrib il-livell ta’ EUR 9.2 li kien disponibbli fl-OIP. L-evalwazzjoni tat-tendenzi tal-prezzijiet medji madankollu ma tikkunsidrax il-bidliet fit-taħlita tal-prodott li setgħu seħħew fil-perjodu kkunsidrat.

(221)

L-approċċ għall-kalkolu tat-tnaqqis fil-prezzijiet isegwi dak tal-investigazzjoni oriġinali. Il-prezzijiet tal-importazzjoni, inklużi d-dazji anti-dumping, tal-produtturi esportaturi inklużi fil-kampjun kienu mqabbla mal-prezzijiet tal-industrija fl-Unjoni, fuq il-bażi ta’ medji kkalkulati għal tipi ta’ prodotti komparabbli matul l-RIP. Il-prezzijiet tal-industrija tal-Unjoni ġew aġġustati għal livell ex-works u mqabbla mal-prezzijiet tal-importazzjoni fuq il-fruntiera tal-Unjoni tas-CIF, flimkien ma’ dazji anti-dumping u tad-dwana. Dan it-tqabbil tal-prezzijiet sar għal tranżazzjonijiet fl-istess livell tal-kummerċ, aġġustat kif dovut meta meħtieġ, u wara t-tnaqqis fir-ribassi u l-iskonti. Biex isir tqabbil ġust, saru aġġustamenti li jirriflettu l-ispejjeż dovuti mħallsa fl-Unjoni mill-importaturi, bħal disinn, għażla ta’ materja prima, eċċ. li kieku ma kinux ikunu riflessi fil-prezz tal-importazzjoni. Dan kien ġustifikat peress li x-xedd tas-saqajn importat ġie prodott skont l-ordni fuq il-bażi tal-ispeċifikazzjonijiet (materja prima, disinn) mogħtija mill-importaturi nnifishom.

(222)

Fuq il-bażi tal-prezzijiet tal-produtturi esportaturi li kkooperaw, il-marġini ta’ tnaqqis fil-prezzijiet li nstab, espress bħala perċentwal tal-prezzijiet fl-industrija tal-Unjoni, huma kif ġejjin:

Tabella 6

Marġini tat-tnaqqis fil-prezzijiet

(223)

Kif muri hawn fuq, l-importazzjonijiet totali tal-importazzjonijiet minn pajjiżi terzi żdiedu f’termini assoluti fil-perjodu li qed jiġi kkunsidrat. L-importazzjonijiet globali żdiedu minn 185 miljun par fl-2006 għal 201 miljun par fl-RIP u fis-sehem tas-suq żdiedu minn 26 % għal 30 % fl-RIP.

(224)

Il-prezzijiet minn pajjiżi terzi huma madankollu bħala medja 34 % ogħla mill-prezzijiet Ċiniżi, u 28 % ogħla mill-prezzijiet Vjetnamiżi.

(225)

Skont l-Artikolu 3(5) tar-Regolament bażiku, il-Kummissjoni analizzat il-fatturi ekonomiċi kollha u l-indiċijiet li għandhom effett fuq l-istat tal-industrija tal-Unjoni.

(226)

Kif spjegat hawn fuq, meta wieħed iqis il-karatteristiċi partikolari tas-settur u n-numru kbir ta’ produtturi tal-Unjoni li għamlu l-ilment, kellhom jintużaw id-dispożizzjonijiet fuq it-teħid tal-kampjuni. Għall-iskop tal-analiżi tal-ħsara, l-indikaturi tal-ħsara ġew stabbiliti fiż-żewġ livelli li ġejjin:

(227)

Il-produzzjoni naqset b’6 % fil-perjodu kkunsidrat, u dan jirrifletti t-tnaqqis fil-konsum taż-żraben tal-ġilda osservat għall-istess perjodu.

(228)

Xi partijiet interessati li jirrappreżentaw l-importaturi u l-bejjiegħa bl-imnut allegaw, iżda mingħajr ma provdew provi, li t-tnaqqis fil-produzzjoni fl-Unjoni għandu jitqies bħala indikazzjoni pożittiva minflok sinjal li l-industrija tal-Unjoni baqgħet iġġarrab il-ħsara fil-perjodu kkonċernat. Skont dawn il-partijiet, it-tnaqqis fil-produzzjoni kien konsegwenza ta’ proċess konxju ta’ organizzazzjoni fl-industrija tal-Unjoni fejn is-settur ta’ livell baxx ġie abbandunat favur is-settur ta’ livell medju u għoli li fih l-industrija tal-Unjoni kienet dejjem kompetittiva.

(229)

F’dan ir-rigward għandu madankollu jiġi osservat u kif ġie determinat diġà fl-investigazzjoni oriġinali, ħafna produtturi tal-Unjoni għebu għax ma kinux kapaċi jikkompetu mal-importazzjonijiet oġġett ta’ dumping - mhux neċessarjament minħabba nuqqas inerenti jew strutturali ta’ kompetittività. Għaldaqstant l-allegazzjoni li t-tnaqqis fil-produzzjoni tal-Unjoni għandu jitqies bħala indikazzjoni pożittiva qed tiġi miċħuda.

(230)

Parti interessata qalet li l-fatt li l-użu tal-kapaċità tal-industrija tal-Unjoni baqgħet stabbli juri li l-ebda ħsara ma seħħet.

(231)

Kif kien diġà ġie konkluż fl-investigazzjoni oriġinali, il-kapaċità attwali f’dan is-settur tiddependi ħafna fuq in-numru ta’ ħaddiema disponibbli iżjed milli fuq il-kapaċità teknika tal-magni fil-linja tal-produzzjoni. Għal dan ir-raġuni, il-kapaċità titkejjel l-aħjar permezz tal-evalwazzjoni tal-livell tal-impjieg kif dettaljat hawn taħt fl-Artikolu 2.3. Fi kwalunkwe każ kuntrarju għall-allegazzjoni magħmula mill-partijiet, l-investigazzjoni wriet li l-użu tal-kapaċità ġiet evalwata mill-aspett tal-kapaċità teknika, imnaqqsa minn 71 % għal 66 % fil-perjodu kkunsidrat u l-argument li r-rata tal-użu stabbli tkun sinjal ta’ l-ebda ħsara, għaldaqstant ma jistax jiġi aċċettat.

(232)

Il-bejgħ fl-industrija tal-Unjoni naqas f’termini assoluti bi 8 % fil-perjodu kkunsidrat. Madankollu, minħabba l-fatt li l-istess perjodu esperjenza tnaqqis fil-konsum ta’ 7 %, l-industrija tal-Unjoni xorta rnexxielha żżomm is-sehem tas-suq tagħha f’rata stabbli, Meta mqabbla mas-sitwazzjoni fl-investigazzjoni oriġinali li rat tnaqqis fil-bejgħ ta’ 33 %, hu ċar ukoll li t-tnaqqis drastiku fil-bejgħ u fl-ishma tas-suq twaqqaf wara l-impożizzjoni tal-miżuri.

(233)

Parti interessata qalet li ma kienet teżisti l-ebda ħsara minn meta l-industrija tal-Unjoni kienet żiedet is-sehem tas-suq tagħha fil-perjodu kkunsidrat. L-investigazzjoni madankollu żvelat li s-sehem tas-suq tal-industrija tal-Unjoni għadda minn bidliet żgħar ħafna fil-perjodu kkunsidrat. Barra minn hekk, kif provdut f’iżjed dettall hawn fuq fit-taqsima E.2 kien mistenni li l-organizzazzjoni tal-produzzjoni u l-bidla fil-mudell tan-negozju kien jippermetti li l-kumpaniji li jifdal jibqgħu jżidu materjalment il-preżenza tagħhom fis-suq. Il-fatt li l-bejgħ tal-produtturi tal-Unjoni baqa’ l-istess jindika li l-pressjoni kkawżata mill-importazzjonijiet oġġett ta’ dumping tibqa’ sors ta’ tħassib.

(234)

Xi partijiet interessati allegaw li l-fatt li l-industrija tal-Unjoni ma kinitx żiedet is-sehem tas-suq tagħha mill-introduzzjoni tad-dazju, wera li l-industrija tal-Unjoni ma kinitx kapaċi li tibbenefika mid-dazji u li l-prodotti impurtati fi kwalunkwe każ ma kinux sostitwibbli mal-prodott immanifatturat fl-Unjoni.

(235)

Għal darb’oħra għandu jiġi osservat li s-sehem tas-suq hu biss wieħed mill-indikaturi eżaminati u li kif spjegat f’iżjed dettall hawn taħt fatturi oħra, l-investigazzjoni wriet li hemm kompetizzjoni konsiderevoli bejn il-prodotti manifatturati fl-Unjoni u l-prodott impurtati mill-pajjiżi kkonċernati. Filwaqt li hu minnu li l-produtturi tal-Unjoni ma kinux kapaċi li jżidu konsiderevolment is-sehem tas-suq tagħhom, it-tnaqqis enormi fil-bejgħ esperjenzat fl-investigazzjoni oriġinali twaqqaf u l-miżuri ppermettew lill-produtturi tal-Unjoni jistabbilizzaw il-bejgħ u s-sehem tas-suq. Aktar żidiet fis-sehem tas-suq jidher li twaqqfu bil-pressjoni fuq il-prezzijiet iġġenerata materjalment bl-importazzjonijiet li huma oġġett ta’ dumping kif jidher fil-premessi (261) - (262).

(236)

Partijiet interessati oħra qalu li l-industrija tal-Unjoni esperjenzat titjib konsiderevoli fil-prestazzjoni tal-esportazzjoni u li m’għadx hemm periklu ta’ ħsara.

(237)

Kif muri fit-tabella t’hawn taħt, kuntrarju għal din l-allegazzjoni, l-investigazzjoni madankollu żvelat li l-prestazzjoni tal-esportazzjonijiet tal-industrija tal-Unjoni fil-perjodu kkunsidrat uriet tnaqqis ħafif minflok żieda.

(238)

Fi kwalunkwe każ, għandu jiġi osservat li l-esportazzjonijiet jgħoddu għal 25 % biss tal-bejgħ tal-produtturi tal-Unjoni. Il-prestazzjoni fl-Unjoni hi għaldaqstant bla dubju xorta waħda l-iżjed fattur importanti għad-determinazzjoni tas-sitwazzjoni finanzjarja tal-produtturi tal-Unjoni. Barra minn hekk, l-investigazzjoni ma wrietx li żieda fl-attività tal-esportazzjoni twassal għal tnaqqis fil-bejgħ fl-Unjoni.

(239)

Meta wieħed iqis dan kollu, l-argument li l-prestazzjoni tal-esportazzjoni mtejba kienet telimina l-ħsara sostnuta mill-industrija tal-Unjoni ma jistax jiġi aċċettat.

Tabella 11

Esportazzjonijiet mill-produtturi tal-Unjoni

(240)

Il-produtturi tal-Unjoni kienu jħaddmu madwar 260 000 persuna direttament involuti fil-produzzjoni tal-prodott ikkonċernat fl-RIP.

(241)

Parti interessata allegat li l-fatt li l-livelli tal-impjieg fl-industrija tal-Unjoni kienu baqgħu stabbli jindikaw li m’għadhiex tiġi sostnuta ħsara.

(242)

F’dan il-kuntest, qed jiġi mfakkar li l-valutazzjoni tal-ħsara għandha tkun ibbażata fuq analiżi tal-indikaturi rilevanti kollha u mhux biss fuq fattur wieħed iżolat. Barra minn hekk, l-investigazzjoni aċċertat li l-impjieg tal-industrija tal-Unjoni naqqas ftit (-2.0 %). Il-fatt li parti kbira tal-industrija tal-Unjoni mxiet lejn sistema ta’ produzzjoni fi grupp aktarx li kien strumentali biex jippermetti li l-livelli tal-impjieg ma jkomplux jonqsu u li jinżammu l-kompetenzi importanti fil-kumpaniji li jipproduċu.

(243)

Parti interessata oħra indikat li n-nuqqas ta’ xogħol disponibbli fl-Unjoni, iżjed milli l-kompetizzjoni minn importazzjonijiet mill-pajjiżi kkonċernati, kien wieħed mir-raġunijiet ewlenin tal-problemi affaċċjati mill-industrija tal-Unjoni.

(244)

Meta wieħed iqis madankollu li ma ġiet provduta l-ebda prova li tappoġġja din l-allegazzjoni u peress li s-sejbiet tal-investigazzjoni ma kinux jissuġġerixxu li d-disponibbiltà tal-ħaddiema għandha tkun problema konsiderevoli għall-produtturi tal-Unjoni, dan l-argument ma jistax jiġi aċċettat.

(245)

F’din ir-reviżjoni, il-produttività medja fil-perjodu kkunsidrat ġiet valutata fuq il-bażi tal-impjieg totali, inklużi l-ħaddiema kollha tal-faċilitajiet tal-produzzjoni f’sistema fi grupp. Il-produttività naqqset moderatament matul dan il-perjodu. Kif imsemmi taħt it-taqsima E.2. il-produttività hi konnessa mal-istruttura ġenerali u t-tipi tax-xedd tas-saqajn prodotti fil-kumpaniji u tista’ tvarja ħafna minn pajjiż għal ieħor u minn kumpanija għal oħra. Għaldaqstant, it-tnaqqis ma jistax jitqies li hu konsiderevoli.

(246)

Bejn l-2006 u l-RIP, is-sehem tal-industrija tal-Unjoni baqa’ stabbli iżda meta wieħed iqis il-fatt li l-konsum naqas, il-produtturi tal-Unjoni xorta tilfu l-bejgħ f’termini assoluti.

(247)

Fir-rigward tal-impatt fuq l-industrija tal-Unjoni tal-kobor tal-marġini attwali tad-dumping, meta wieħed iqis il-volum u l-prezzijiet tal-importazzjonijiet mill-pajjiżi kkonċernati, dan l-impatt ma jistax jitqies li hu negliġibbli.

(248)

Miżuri anti-dumping kontra importazzjonijiet ta’ ċertu xedd tas-saqajn bil-partijiet ta’ fuq tal-ġilda li joriġinaw fir-RPĊ u l-Vjetnam ġew imposti f’Ottubru tal-2006. F’dan il-perjodu, ġie osservat biss irkupru parzjali tas-sitwazzjoni tal-produtturi tal-Unjoni kif provdut f’iżjed dettaljat hawn taħt.

(249)

L-istokks baqgħu negliġibbli f’madwar 2 % tal-produzzjoni. Qed jiġi mfakkar li l-importanza ta’ dan l-indikatur m’għandhiex tiġi stmata ogħla għax il-produzzjoni għal dan it-tip ta’ prodott issir fuq ordni u l-istokk f’punt taż-żmien determinat ikun ir-riżultat tal-oġġetti mibjugħa li iżda għadhom ma ġewx kunsinnati.

(250)

Il-prezzijiet tal-bejgħ żdiedu bi 30 % matul il-perjodu. Din iż-żieda hi r-riżultat ta’ żewġ fatturi ewlenin. Min-naħa l-waħda, ir-riżultat tal-iżviluppi fil-mudell tan-negozju msemmija; min-naħa l-oħra, iż-żieda fl-ispejjeż attribwibbli l-iżjed għall-materja prima.

(251)

Il-livelli tal-profitt tal-industrija tal-Unjoni tjiebu fil-perjodu kkonċernat minn 1.3 % fl-2006 għal 3 % fl-RIP. It-titjib fil-qligħ influwenza l-evoluzzjoni tal-likwidità u r-redditu mill-investimenti. Dan madankollu, għandu jitqies fil-dawl tad-deterjorament konsiderevoli u l-livelli baxxi tal-investiment fl-investigazzjoni oriġinali.

(252)

Xi partijiet interessati argumentaw li l-profitti tal-industrija tal-Unjoni kienu tjiebu b’mod notevoli u li dan il-profitt fil-fatt kien sostanzjalment ogħla mill-profitt mira ta’ 6 % stabbilit fl-investigazzjoni oriġinali. Għaldaqstant kien allegat li ma kienx għad hemm ħsara, irrispettivament mill-istat tal-indikaturi tal-ħsara l-oħra.

(253)

F’dan il-kuntest għandu jiġi osservat li filwaqt li huwa veru li l-livelli tal-profitabilità tjiebu, l-investigazzjoni żvelat li l-industrija tal-Unjoni ma kinitx kapaċi tilħaq il-profitt mira ta’ 6 % kif determinat fl-investigazzjoni oriġinali. Kienet mistennija żieda akbar fil-livelli tal-profitt, l-iżjed meta wieħed iqis l-isforz magħmul minn parti kbira tal-industrija biex tidħol f’mudelli tan-negozju ġodda. Dan juri li l-industrija għadha f’sitwazzjoni fraġli mill-aspett tal-profittabilità. L-argument li l-livelli tal-profitt ikunu tali li jindikaw li l-industrija tal-Unjoni m’għadhiex tbati minn ħsara, għaldaqstant għandu jiġi miċħud.

(254)

L-investigazzjoni wriet li l-SMEs, li essenzjalment jikkostitwixxu s-settur kollu, mhumiex f’pożizzjoni, minħabba s-sitwazzjoni finanzjarja batuta tagħhom, li jipprovdu garanziji tal-banek suffiċjenti u għaldaqstant isibu diffikultajiet li jiġġeneraw kapital ġdid.

(255)

Filwaqt li l-investimenti esperjenzaw żieda fil-perjodu kkunsidrat, f’termini assoluti kienu għadhom jirrappreżentaw biss 6 % tad-dħul fl-RIP. Barra minn hekk, din iż-żieda hi influwenzata minn investimenti eċċezzjonali magħmula fil-bini minn wieħed mill-produtturi tal-Unjoni inklużi fil-kampjun. Inkella, il-livell tal-investiment ikun stabbli matul il-perjodu ta’ referenza u f’livell baxx. Għal darb’oħra, dan għandu jitqies fid-dawl tad-deterjorament konsiderevoli u l-livelli baxxi ta’ investiment fl-investigazzjoni oriġinali.

(256)

Il-pagi medji baqgħu l-istess matul il-perjodu kkunsidrat, u dan jindika li s-salarji attwali qed jonqsu u mhumiex isegwu l-iżvilupp normali tas-salarji. Dan ikompli juri iżjed il-livell tal-pressjoni mpoġġija fuq il-produtturi tal-Unjoni.

(257)

Kif jidher hawn fuq, mhux il-fatturi kollha mniżżla fir-Regolament bażiku nstabu li għandhom effett dirett fuq l-istat tal-industrija tax-xedd tas-saqajn tal-Unjoni għad-determinazzjoni tal-ħsara. B’mod partikolari, meta wieħed iqis li l-produzzjoni sseħħ skont l-ordni, l-istokks normalment jew ma jinżammux jew ikunu jikkonsistu biss f’ordnijiet kompluti li għadhom ma ġewx ikkunsinnati/fatturati u għaldaqstant instabu li għandhom sinifikat żgħir ħafna fl-analiżi tal-ħsara. B’mod simili, peress li s-settur jibqa’ jkun intensiv fix-xogħol, il-kapaċità tal-produzzjoni mhijiex limitata teknikament u tiddependi l-iżjed fuq in-numru ta’ ħaddiema mħaddma mill-produtturi.

(258)

L-analiżi tal-indikaturi makro b’effett iżjed dirett fuq l-istat tal-industrija tal-Unjoni turi li l-produzzjoni tal-Unjoni kif ukoll il-volum tal-bejgħ naqas għal bejn wieħed u ieħor l-istess rata daqs il-konsum tal-Unjoni fil-perjodu kkunsidrat. Il-bejgħ, is-sehem tas-suq u l-impjieg tal-produtturi tal-Unjoni għaldaqstant baqgħu stabbli. Il-produttività esperjenzat tnaqqis iżda dan kien biss moderat. In ġenerali, waqt li kien mistenni li ċ-ċaqliq għal mudell tan-negozju ġdid kien se jkun kapaċi li jżid il-bejgħ u l-produzzjoni tal-produtturi tal-Unjoni li jifdal, hu ċar ikoll li t-tnaqqis drastiku ekonomiku li kienet qed issofri l-industrija qabel l-impożizzjoni tal-miżura twaqqaf minn meta ġew imposti l-miżuri. Dan ippermetta wkoll li parti kbira tal-industrija tal-Unjoni tibdel il-mudell tan-negozju permezz tal-organizzazzjoni tal-proċessi tal-produzzjoni permezz tal-iżvilupp ta’ gruppi speċjalizzati, billi jkun hemm ċaqliq ‘il fuq fis-settur tal-prodotti kif ukoll permezz tal-bidla fl-attenzjoni minn distribuzzjoni bl-ingrossa għal provvista diretta bl-imnut.

(259)

L-analiżi tal-indikaturi mikro rilevanti tappoġġja wkoll l-irkupru parzjali tal-industrija tal-Unjoni li turi żieda fil-prezzijiet tal-bejgħ, investiment fil-fluss tal-likwidità, u profitt. Madankollu, l-industrija għadha ma kinitx kapaċi tirkupra għal livelli ta’ profitt u investiment normali u għad għandha problemi fil-ġenerazzjoni tal-kapital u fl-iżvilupp tas-salarji li juru li s-sitwazzjoni għadha fraġli u li l-ħsara għadha ma tneħħitx għal kollox.

(260)

In ġenerali, l-investigazzjoni żvelat li l-industrija tal-Unjoni għadha ssofri ħsara materjali.

(261)

Filwaqt li l-volumi tal-importazzjonijiet ikkombinati mill-pajjiżi kkonċernati esperjenzaw tnaqqis fil-perjodu kkunsidrat, il-volumi fl-RIP għadhom ferm iżjed minn dawk fl-investigazzjoni oriġinali. Fil-każ taċ-Ċina, il-livelli huma kważi darbtejn daqs dawk fl-OIP u filwaqt li l-volumi tal-importazzjoni tal-Vjetnam naqsu fl-istess perjodu, il-preżenza tagħhom fis-suq għadha konsiderevoli b’sehem tas-suq ta’ madwar 10 %.

(262)

Analiżi tal-prezzijiet tal-importazzjonijiet mill-pajjiżi kkonċernati fil-perjodu kkunsidrat, turi li l-prezzijiet tal-importazzjonijiet Ċiniżi baqgħu stabbli fil-perjodu kkunsidrat waqt li l-prezzijiet Vjetnamiżi naqsu. Meta mqabbla mal-prezzijiet fl-OIP, il-prezzijiet Ċiniżi żdiedu b’madwar 20 % iżda l-prezzijiet Vjetnamiżi huma viċin dawk li hemm fl-OIP. Minkejja d-differenzi fit-taħlita tal-prodotti u l-livell ta’ kunsiderazzjonijiet tal-kummerċ, hu ċar li l-prezzijiet medji tal-importazzjonijiet ta’ 8.6 EUR għar-RPĊ u 9.51 EUR mill-Vjetnam jibqgħu jikkawżaw tħassib ewlieni lill-produtturi tal-Unjoni li l-prezzijiet medji tal-bejgħ tagħhom huma ferm iżjed minn 30 EUR. Dan isir iżjed evidenti meta wieħed jikkunsidra l-livelli tat-tnaqqis fil-prezzijiet li esperjenzaw tnaqqis drastiku meta mqabbla mal-OIP. Għaċ-Ċina, il-livelli tat-tnaqqis tal-prezzijiet żdiedu minn 13.5 % għal 31.9 % f’dan il-perjodu u għall-Vjetnam iż-żieda ekwivalenti hi minn 15.9 % għal 38.9 %.

(263)

Fuq il-bażi t’hawn fuq, għandu jiġi konkluż li l-importazzjonijiet mill-pajjiżi kkonċernati kemm f’termini ta’ volum u ta’ prezzijiet, jibqa’ jkollhom effett negattiv fuq il-prestazzjoni tal-produtturi tal-Unjoni.

(264)

Il-Kummissjoni analizzat bir-reqqa jekk xi fatturi oħra magħrufa apparti l-importazzjonijiet li huma oġġett ta’ dumping setgħux kellhom effett fuq il-ħsara kontinwata mġarrba mill-produtturi tal-Unjoni sabiex tiżgura li l-ħsara possibbli kkawżata minn dawn il-fatturi ma kinitx attribwibbli għall-importazzjonijiet li huma oġġett ta’ dumping.

(265)

Xi partijiet interessati insistew li m’hemm l-ebda konnessjoni bejn l-importazzjonijiet mill-pajjiżi kkonċernati u l-prestazzjoni tal-industrija tal-Unjoni. B’mod partikolari, intqal li ma kienx hemm sostituzzjoni bejn il-prodott simili prodott fl-Unjoni u l-prodott ikkonċernat. Skont dawn il-partijiet, m’hemmx kompetizzjoni bejn żraben tal-ġilda prodotti fl-Unjoni u dawk impurtati miċ-Ċina u l-Vjetnam għax dik ta’ qabel għandha t-tendenza li topera fis-settur tas-suq ta’ livell medju sa livell għoli filwaqt li dawk tal-aħħar huma destinati għas-settur ta’ livell medju sa livell baxx. Il-fatt li l-industrija tal-Unjoni ma kinitx kapaċi terġa’ tikseb is-sehem tas-suq wara l-impożizzjoni tal-miżuri nġieb bħala prova f’dan ir-rigward. It-titjib ġenerali fir-rigward tal-indikaturi tal-ħsara l-oħra huwa minflok il-konsegwenza tal-bidla fil-mudell tan-negozju mill-industrija tal-Unjoni fejn it-tnaqqis tal-produzzjoni u l-bidla lejn produzzjoni b’valur ogħla żiedu l-produzzjoni biex b’hekk tnaqqset il-ħsara li kienet iġġarrbet qabel għal parti mill-industrija tal-Unjoni. Id-difikultajiet esperjenzati mill-grupp l-ieħor tal-produtturi tal-Unjoni tqiesu li ġew ikkawżati min-nuqqas li jadattaw iżjed milli minħabba l-importazzjonijiet li huma oġġett ta’ dumping mill-pajjiżi kkonċernati.

(266)

L-investigazzjoni wriet li għalkemm parti mill-industrija tal-Unjoni kienet miexja ‘l fuq fis-suq, xorta għadha tokkupa xi partijiet mis-settur baxx u partijiet kbar mis-settur medju. Meta wieħed iħares lejn l-importazzjonijiet li huma oġġett ta’ dumping,, dawn ikopru mhux biss is-settur ta’ livell baxx, iżda wkoll is-settur ta’ livell medju - u f’xi każijiet, anke s-settur ta’ livell ogħla. Fi kliem ieħor hemm kompetizzjoni sostanzjali bejn iż-żraben tal-ġilda prodotti fl-Unjoni u dawk importati mill-pajjiżi kkonċernati.

(267)

Kien hemm ukoll allegazzjonijiet li ma kienx hemm kompetizzjoni bejn il-produtturi tal-Unjoni u l-esportaturi kkonċernati għax il-produtturi tal-Unjoni huma kkonċentrati fuq prodotti niche u li ma jipprovdux firxa sħiħa ta’ żraben speċjalizzati bħal żraben tal-ħajkijiet, tal-brilli u ortopoediċi. F’dan il-kuntest, għandu madankollu jiġi osservat li dawn iż-żraben speċjalizzati jiffurmaw biss parti żgħira tal-prodott ikkonċernat u għaldaqstant l-impatt ma jistax ikun konsiderevoli. Fi kwalunkwe każ, l-investigazzjoni wriet li kuntrarju għal din l-allegazzjoni, dawn iż-żraben speċjalizzati huma prodotti fl-Unjoni avolja fi kwantitajiet limitati u dawn jinsabu f’kompetizzjoni diretta maż-żraben speċjalizzati importati. Barra minn hekk u kif provdut f’iżjed dettall hawn fuq, issa hemm żieda fil-kompetizzjoni bejn ħafna minn dawn iż-żraben speċjalizzati u ż-“żarbun kannella” klassiku li hu tradizzjonalment prodott mill-industrija tal-Unjoni.

(268)

Fir-rigward tat-tqabbil tal-produzzjoni tal-Unjoni u l-importazzjonijiet mill-pajjiżi kkonċernati skont l-età u s-sess, l-investigazzjoni wriet li hemm produzzjoni sostanzjali fl-Unjoni taż-żraben tal-irġiel, tan-nisa u tat-tfal. L-attenzjoni tkun fuq iż-żraben tan-nisa li jammontaw għal madwar 55 % tal-produzzjoni waqt li ż-żraben tal-irġiel u tat-tfal jammontaw għal 35 % u 10 % rispettivament. Meta wieħed iħares lejn it-tqassim fl-età u s-sess għal żraben impurtati mill-pajjiżi kkonċernati, iċ-ċifri jkunu differenti b’iżjed attenzjoni b’mod partikolari fuq żraben tat-tfal f’madwar 25 %. Minkejja dawn il-varjazzjonijiet, hu ċar li t-tliet kategoriji kollha jinbiegħu fis-suq tal-Unjoni fi kwantitajiet konsiderevoli mill-industrija tal-Unjoni kif ukoll mill-esportaturi.

(269)

Parti waħda, li tirrappreżenta l-interessi tal-Konsumatur, qalet li l-allegat dumping ma kellux impatt fuq is-sitwazzjoni fl-industrija tal-Unjoni. Iżjed milli l-kummerċ mhux ġust, kienu t-tendenza tal-globalizzazzjoni u l-bidla għal produzzjoni lejn pajjiżi b’inqas spejjeż li wasslu għal telfien fl-impjieg u l-għeluq tal-fabbriki fl-Unjoni.

(270)

Diversi partijiet interessati oħra indikaw li l-inabbiltà tal-industrija tal-Unjoni li tibbenifika mill-miżuri u l-effett tal-bidla fil-mudell tan-negozju fost il-produtturi tal-Unjoni huma provi favur l-allegazzjoni li m’hemmx konnessjoni bejn l-importazzjonijiet u l-prestazzjoni tal-industrija tal-Unjoni.

(271)

Skont dawn l-allegazzjonijiet, l-industrija tal-Unjoni hi strutturalment inkapaċi li tikkompeti fis-suq tal-produzzjoni tal-massa l-iżjed minħabba n-nuqqas tal-ħaddiema meħtieġa u l-ispejjeż tagħhom. B’konsegwenza ta’ dan, parti konsiderevoli tal-industrija tal-Unjoni ċċaqalqet għal mudell tan-negozju ġdid u investiet fl-innovazzjoni tal-prodott u t-titjib sabiex l-attenzjoni tiġi devjata mis-settur tal-prodotti ta’ livell medju sa baxx għas-settur tal-prodotti ta’ livell medju sa għoli u tal-prodotti lussużi. Dawn il-kumpaniji li ffokaw fuq prodotti niche b’valur ogħla miżjud qegħdin juru wkoll livell għoli ta’ prestazzjoni. Għall-kuntrarju, dawk il-kumpaniji li naqsu milli jirreaġixxu għall-globalizzazzjoni qed ikomplu juru riżultati batuti. Skont din l-argumentazzjoni, is-sitwazzjoni tal-produtturi tal-Unjoni għandha għaldaqstant titqies li hi konsegwenza tal-istrateġija tan-negozju tagħhom u mhix marbuta mal-importazzjonijiet mill-pajjiżi kkonċernati.

(272)

Kif muri hawn fuq fit-taqsima E.2 u G.4 l-investigazzjoni fil-fatt żvelat stampa eteroġenja tal-industrija tal-Unjoni. Partijiet mill-industrija qed jipproduċu xedd tas-saqajn mhux tad-ditta fis-settur tal-prodotti ta’ livell medju sa baxx u qed ibiegħu permezz ta’ bejjiegħa bl-ingrossa minflok direttament bl-imnut. Iżda dan ma jfissirx li dawn il-kumpaniji huma bilfors ineffiċjenti. Li joħroġ ċar mill-investigazzjoni hu li, irrispettivament mill-pożizzjoni kompetittiva tagħhom, is-sitwazzjoni diffiċli tagħhom qed tiġi materjalment ikkawżata minn importazzjonijiet li huma oġġett ta’ dumping. B’konsegwenza ta’ dan, jinsabu f’sitwazzjoni finanzjarja diffiċli ħafna u l-istat tagħhom mar lura ħafna matul il-perjodu kkunsidrat. Ħafna minn dawn il-kumpaniji qed jagħmlu sforzi sabiex jerġgħu jmorru għas-settur ta’ livell medju sa għoli u biex jibdlu l-kanali tad-distribuzzjoni iżda l-pressjoni fil-preżent ikkawżata minn importazzjonijiet oġġett ta’ dumping jagħmlu dan l-iżvilupp diffiċli ħafna.

(273)

Minkejja t-titjib notevoli tagħhom u l-adattament tal-mudell tan-negozju, dawk il-kumpaniji li rridefinixxew il-mudell tan-negozju ma jilħqux il-profitti mira ta’ 6 % kif stabbilit fl-investigazzjoni oriġinali. Dan juri li anke dan il-grupp hu affetwat mill-pressjoni ġenerali l’isfel eżerċitata fis-setturi kollha b’konsegwenza tal-importazzjonijiet li huma oġġett ta’ dumping. Għaldaqstant hu probabbli li dan il-grupp kien ikun kapaċi jirkupra b’mod sħiħ kieku ma kienx għall-pressjoni ‘l isfel fuq il-prezzijiet ikkawżata b’importazzjonijiet kontinwi (u anke miżjuda) ta’ xedd tas-saqajn tal-ġilda li huwa oġġett ta’ dumping.

(274)

Il-fatt li anke l-kumpaniji li mxew għal mudell tan-negozju ġdid għadhom jiġu affetwati mid-dumping ta’ ħsara minkejja li huma verament effiċjenti f’termini ta’ ġbir ta’ riżorsi u speċjalizzazzjoni, jissuġġerixxi li n-nuqqas ta’ effiċjenza u problemi strutturali fl-industrija mhix qed tkisser il-konnessjoni bejn id-dumping u l-ħsara sostnuta.

(275)

Diversi partijiet interessati indikaw li l-industrija tax-xedd tas-saqajn li qed tikber f’pajjiżi terzi oħra żiedet b’mod drammatiku l-esportazzjonijiet lejn l-Unjoni. F’dan ir-rigward, intqal li l-importazzjonijiet minn pajjiżi terzi kellhom impatt konsiderevoli fuq is-sitwazzjoni fl-industrija tal-Unjoni matul il-perjodu kkunsidrat u jkollhom l-istess importanza fl-analiżi tal-kontinwazzjoni jew ir-rikorrenza probabbli tal-ħsara jekk ma jitkomplewx il-miżuri. Skont dawn il-partijiet, it-terminazzjoni tal-miżuri tista’ taffetwa l-bilanċ tal-importazzjonijiet bejn l-importazzjonijiet mill-pajjiżi kkonċernati u l-importazzjonijiet minn pajjiżi oħra peress li jkun hemm sostituzzjoni bejn dawn is-sorsi. It-terminazzjoni tal-miżuri għaldaqstant ma jkollha l-ebda effett fuq l-industrija tal-Unjoni.

(276)

F’dan ir-rigward, l-investigazzjoni wriet li l-importazzjonijiet minn pajjiżi terzi bi prezzijiet baxxi bħall-Indja u l-Indoneżja huma kbar u qed jiżdiedu. Is-settur tax-xedd tas-saqajn hu fil-biċċa kbira organizzat fi gruppi internazzjonali li għandhom bażijiet tal-produzzjoni differenti f’pajjiżi differenti. Dan jippermetti għal ċertu livell ta’ flessibbiltà għaċ-ċaqliq tal-produzzjoni ladarba l-bażi tal-produzzjoni tiġi stabbilita f’pajjiżi oħra. L-investigazzjoni wriet li ċ-ċaqliq lejn pajjiż ġdid jista’ jsir fi żmien sena sa sentejn.

(277)

F’termini tas-sehem tas-suq, l-ishma mitlufa miċ-Ċina u l-Vjetnam setgħu ttieħdu minn pajjiżi oħra tal-esportazzjoni - b’mod partikolari mill-Indja u l-Indoneżja. Madankollu, l-effett tal-prezzijiet tagħhom mhuwiex komparabbli mal-effett tal-prezzijiet tal-importazzjonijiet miċ-Ċina u l-Vjetnam. Meta ma jiġux ikkunsidrati d-differenzi fit-taħlita tal-prodott, id-differenza fil-prezz hi partikolarment viżibbli fil-każ tal-Indja, fejn il-prezz medju tal-esportazzjoni hu 25.8 % ogħla mill-prezz medju tal-esportazzjoni taż-żraben importati mill-Vjetnam u 40.3 % ogħla mill-prezz medju tal-esportazzjoni taż-żraben importati miċ-Ċina. Għaldaqstant l-effett tagħhom fl-industrija tal-Unjoni hu konsiderevolment inqas ċar. Il-prezz medju tal-esportazzjoni taż-żraben importati mill-Indoneżja hu 13.2 % ogħla mill-prezz medju taż-żraben importati miċ-Ċina u komparabbli mal-prezz medju tal-esportazzjoni taż-żraben importati mill-Vjetnam. Minkejja dan, il-volumi tal-importazzjonijiet Indoneżjani jibqgħu jfissru li l-impatt relattiv tagħhom ikun limitat. Meta wieħed iqis dan, il-volumi relattivi u l-prezzijiet ogħla tal-importazzjonijiet minn pajjiżi Asjatiċi oħra ma jwasslux għall-konklużjoni li l-effett tagħhom ikun suffiċjenti sabiex tinkiser il-konnessjoni bejn il-ħsara mġarrba mill-industrija tal-Unjoni u l-volumi kbar ta’ importazzjonijiet li huma oġġett ta’ dumping miċ-Ċina u l-Vjetnam.

(278)

Ġie allegat ukoll li l-prestazzjoni batuta tal-industrija tal-Unjoni m’għandhiex tkun konnessa mal-importazzjonijiet mill-pajjiżi kkonċernati iżda iżjed mat-tnaqqis fil-konsum fl-Unjoni. Dan it-tnaqqis fil-konsum ikun allegatament konness ma’ tendenzi fil-moda li mxew minn xedd tas-saqajn formali għal xedd tas-saqajn iżjed informali. Għaldaqstant, il-konsumatur bidel il-preferenza tiegħu favur is-settur tal-prezzijiet baxxi tipikament rappreżentat minn importazzjonijiet minn pajjiżi terzi.

(279)

F’dan il-kuntest l-investigazzjoni wriet li kien hemm tnaqqis fil-konsum tal-prodott ikkonċernat. Madankollu, kieku ż-żraben tal-ġilda u l-materjali l-oħra kienu sostitwibbli, dan it-tnaqqis kien ikun ikbar. It-tnaqqis fil-konsum u l-bidliet fil-preferenzi tal-konsumatur għaldaqstant ma jidhrux li waħedhom huma fattur li jikser il-konnessjoni kawżali.

(280)

L-investigazzjoni wriet ukoll li l-bejgħ bl-imnut taż-żraben iddiversifika minn ħanut taż-żraben tradizzjonali għal numru ta’ stabbilimenti ġodda inklużi department stores, ħwienet tal-ħwejjeġ ġenerali kif ukoll supermarkits/ipermarkits, li jammontaw għal ammont verament konsiderevoli tal-bejgħ, li possibilment jaqbeż l-40 %.

(281)

Ġie argumentat ukoll li dan ix-xenarju verament kompetittiv jeżerċita pressjoni ‘l isfel fuq il-prezzijiet u li dan l-effett kellu impatt akbar fuq l-industrija tal-Unjoni mill-importazzjonijiet li huma oġġett ta’ dumping. Filwaqt li l-pressjoni mis-settur tal-bejgħ bl-imnut fiha nnifisha ma tistax titħalla barra bħala fattur li seta’ kellu impatt fuq l-industrija tal-Unjoni, wieħed għandu madankollu jżomm f’moħħu li anke din l-istruttura hi dipendenti fuq is-sejbien ta’ fornituri li jistgħu jipprovdu fi prezzijiet hekk baxxi. Il-volumi kbar ta’ prodotti li huma oġġett ta’ dumping kienu ċertament fattur ewlieni fl-iżvilupp u ż-żamma ta’ din il-pressjoni fuq il-prezzijiet. Barra minn hekk, il-fatt li l-produtturi tal-Unjoni rnexxielhom iżidu l-prezzijiet jindika wkoll li l-impatt tal-bidliet fl-istruttura tal-bejgħ bl-imnut mhuwiex tali li jikser il-konnessjoni bejn il-ħsara u l-importazzjonijiet li huma oġġett ta’ dumping.

(282)

Il-prestazzjoni tal-esportazzjoni batuta tal-industrija tal-Unjoni konnessa mas-saħħa tal-EURO kontra l-USD tqajmet ukoll bħala kawża ta’ ħsara mġarrba mill-industrija tal-Unjoni u li għaldaqstant kellu jiġi distint mill-effetti tal-importazzjonijiet mill-pajjiżi kkonċernati.

(283)

Madankollu, it-tqabbil tal-prezzijiet domestiċi ġenerali mal-esportazzjonijiet ġenerali jissuġġerixxi li l-prezzijiet tal-esportazzjoni tal-produtturi tal-Unjoni żdiedu b’madwar 12 % fil-perjodu kkunsidrat u li dawn il-prezzijiet, matul l-RIP, kienu madwar 20 % ogħla mill-prezzijiet domestiċi. Il-volumi tal-esportazzjoni baqgħu stabbli u jassorbixxu ca. 25 % tal-produzzjoni. Meta wieħed iqis li l-investigazzjoni wriet li l-prestazzjoni tal-esportazzjoni tal-produtturi tal-Unjoni rat biss tnaqqis żgħir, l-argument li dik il-prestazzjoni tal-esportazzjoni kienet il-kawża tal-ħsara fil-Unjoni ma tistax tiġi sostnuta.

(284)

Kif muri hawn fuq, diversi partijiet interessati qalu li fatturi oħra minbarra l-importazzjonijiet li huma oġġett ta’ dumping kienu l-kawża ewlenija tal-ħsara fl-industrija tal-Unjoni.

(285)

Il-fatturi rilevanti l-oħra ġew identifikati u analizzati bir-reqqa. Madankollu, l-fatti tal-każ juru li l-ebda mill-fatturi l-oħra magħrufa m’huma kapaċi, waħedhom jew flimkien, li jiksru l-konnessjoni kawżali bejn l-importazzjonijiet li huma oġġett ta’ dumping u l-ħsara mġarrba mill-produtturi tal-Unjoni.

(286)

Skont l-Artikolu 11(2) tar-Regolament bażiku, l-importazzjonijiet mill-pajjiżi li bħalissa qed jiġu riveduti ġew valutati sabiex jiġi stabbilit jekk kienx hemm probabbiltà ta’ kontinwazzjoni ta’ ħsara.

(287)

Fir-rigward tal-effett probabbli fuq l-industrija tal-Unjoni tal-iskadenza tal-miżuri fis-seħħ, il-fatturi li ġejjin ġew ikkunsidrati skont l-elementi mqassra hawn fuq fir-rigward tal-probabbiltà tal-kontinwazzjoni tad-dumping.

(288)

Kif ġie konkluż hawn fuq fil-premessa (261)-(262), l-importazzjonijiet ta’ volumi kbar ta’ prezzijiet li huma oġġett ta’ dumping mir-RPĊ komplew għaddejjin waqt l-RIP.

(289)

Analiżi tal-kapaċitajiet u l-iżvilupp tas-suq domestiku fir-RPĊ żvelaw ukoll li dan il-volum diġà għoli ta’ esportazzjonijiet għandu jkompli jekk jiġu terminati l-miżuri. Anke f’każ li l-importazzjonijiet, kif allegat, jonqsu b’massimu ta’ 30 % b’konsegwenza tat-tnaqqis fir-ritmu tas-suq, il-volumi xorta jibqgħu kbar ħafna.

(290)

Ġie konkluż ukoll li, minħabba l-livell tal-prezz ogħla, meta mqabbel mas-suq domestiku Ċiniż kif ukoll ma’ swieq ta’ pajjiżi terzi, l-Unjoni tibqa’ tkun suq attraenti għal esportazzjonijiet Ċiniżi jekk il-miżuri jitħallew jiskadu. Filwaqt li ċertu żieda fil-prezz tal-esportazzjoni ma tistax ma tiġix ikkunsidrata, ġie madankollu konkluż li dawn l-esportazzjonijiet se jkomplu jkunu oġġett ta’ dumping.

(291)

Il-livelli konsiderevoli ta’ dumping u tnaqqis fil-prezzijiet osservati jindikaw li l-volumi tal-esportazzjoni lejn l-Unjoni msemmija hawn fuq isiru fi prezzijiet li huma oġġett ta’ dumping li jkunu konsiderevolment taħt il-prezzijiet u l-ispejjeż tal-produtturi tal-Unjoni.

(292)

L-effett kombinat ta’ dawn il-volumi u l-prezzijiet ikun għaldaqstant kapaċi li jwassal għal deterjorazzjoni tas-sitwazzjoni tal-produtturi tal-Unjoni li hi diġà prekarja.

(293)

Anke fil-każ tal-Vjetnam, il-kontinwazzjoni tad-dumping f’volumi kbar ġiet stabbilita fl-RIP.

(294)

Ġie konkluż ukoll li l-Unjoni tibqa tkun l-iżjed suq importanti għall-esportaturi Vjetnamiżi u li dan aktarx li se jibqa’ l-każ jekk il-miżuri ma jitkomplewx.

(295)

Meta wieħed iqis il-kapaċitajiet żejda konsiderevoli u meta wieħed iqis il-livell tal-prezzijiet fil-Unjoni meta mqabbla ma’ dawk fil-prezz domestiku Vjetnamiż kif ukoll ma’ swieq oħra tal-esportazzjoni, hu probabbli li l-importazzjonijiet ta’ prodotti oġġett ta’ dumping se jkomplu jiżdiedu jekk il-miżuri jfallu. Kif inhu l-każ għaċ-Ċina, anke f’każ li l-importazzjonijiet, kif ġie allegat, jonqsu minħabba t-tnaqqis fir-ritmu ekonomiku, il-volumi tal-importazzjoni xorta jkunu konsiderevoli ħafna.

(296)

Bħal fil-każ tar-RPĊ, il-livell konsiderevoli ta’ dumping u tnaqqis fil-prezzijiet osservat jindika li l-volumi tal-esportazzjoni lejn l-Unjoni msemmija hawn fuq isiru bi prezzijiet li huma oġġett ta’ dumping u li jkunu konsiderevolment taħt il-prezzijiet u l-ispejjeż tal-produtturi tal-Unjoni. B’mod simili, l-effett ikkombinat ta’ dawn il-volumi u prezzijiet ikun tali li jwassal għal deterjorazzjoni fis-sitwazzjoni diġà prekarja tal-prodotturi tal-Unjoni.

(297)

Numru ta’ partijiet interessati ressqu allegazzjonijiet li fatturi oħra minbarra importazzjonijiet li huma oġġett ta’ dumping mill-pajjiżi kkonċernati jqajmu dubbji fuq l-effett probabbli tal-importazzjonijiet oġġett ta’ dumping fuq is-sitwazzjoni tal-industrija tal-Unjoni fil-futur.

(298)

Il-fatturi mressqa huma fil-biċċa l-kbira tagħhom diġà msemmija fit-taqsima G.5 dwar il-ħsara u għaldaqstant ma jkollhomx għalfejn jiġu rrepetuti f’din it-taqsima. Uħud mill-argumenti, madankollu, ġew konnessi ma’ avvenimenti ta’ wara l-RIP u għaldaqstant ġew soġġetti għal analiżi addizzjonali f’termini tal-impatt probabbli tagħhom fil-futur.

(299)

Diversi partijiet qalu li l-effetti tat-tnaqqis fir-ritmu ekonomiku għandu jiġi distint mill-effetti allegati tal-importazzjonijiet għax dan l-avvenimenti għandu jitqies li hu estern għall-probabbiltà tal-kontinwazzjoni/rikorrenza tad-dumping ta’ ħsara. Skont dawn il-partijiet interessati, l-industrija tal-Unjoni tkun partikolarment affetwata mit-tnaqqis fir-ritmu għax il-konsumatur f’dawn iċ-ċirkostanżi tipikament jaqleb għal prodott ta’ kwalità/prezz aktar baxx minħabba t-tnaqqis fis-setgħa tax-xiri.

(300)

It-tnaqqis fir-ritmu tas-suq aktarx li għandu jwassal għal iżjed tnaqqis fil-konsum tal-prodott ikkonċernat. Filwaqt li ż-żraben tal-ġilda xorta għandu jkollhom pożizzjoni b’saħħitha fis-suq, il-bejgħ aktarx li jkompli jonqos b’iżjed minn 7 % kif diġà muri fil-perjodu ta’ qabel it-tnaqqis fir-ritmu.

(301)

Hu probabbli li l-limiti ekonomiċi għandhom jagħmlu l-konsumaturi u l-bejjiegħa bl-imnut iżjed sensittivi għall-prezz u tnaqqis fis-setgħa tax-xiri tal-konsumatur jista’ jpoġġi limitu massimu fuq il-prezzijiet fil-livell tal-bejgħ bl-imnut. Dan imbagħad jista’ jwassal għal bidla fis-settur (konsumaturi li jiċċaqalqu mis-settur ta’ livell għoli/medju għal dak medju kif ukoll mis-settur ta’ livell medju għal dak medju/baxx) u għal iżjed tiswijiet. Il-kompetizzjoni bejn iż-żraben tal-ġilda u prodotti oħra orħos magħmula mid-drapp u mill-materjali sintetiċi taħt dawn iċ-ċirkostanzi aktarx li tiżdied.

(302)

Fil-qosor, ma tistax tinqata’ barra l-possibbiltà li t-tnaqqis fir-ritmu tas-suq għandu jikkontribwixxi għad-deterjorazzjoni tas-sitwazzjoni tal-industrija tal-Unjoni meta wieħed iqis il-konsum relatat u l-effetti tal-prezzijiet. Fl-istess ħin, madankollu, hu probabbli wkoll li t-tnaqqis fir-ritmu ekonomiku għandu jkompli jkabbar iżjed l-effett tal-importazzjonijiet li huma oġġett ta’ dumping. Ir-raġuni għal dan hi li t-tnaqqis fir-ritmu aktarx li jqiegħed pressjoni fuq il-prezzijiet tal-operaturi kollha, inklużi l-esportaturi mill-pajjiżi kkonċernati, li jistgħu jkomplu jnaqqsu l-prezzijiet tagħhom li diġà huma oġġett ta’ dumping. Anke l-prezzijiet iżjed baxxi jqiegħdu pressjoni wkoll fis-settur medju sa għoli u jwasslu għal riskju li l-produtturi tal-Unjoni jiġu mġiegħla jmorru lura lejn is-settur ta’ livell medju sa baxx. Dan imbagħad iwassal għal kompetizzjoni iżjed ħarxa bejn il-prodotti li ġejjin minn produzzjoni fl-Unjoni u l-importazzjonijiet li huma oġġett ta’ dumping.

(303)

Diversi partijiet interessati allegaw li kwalunkwe tnaqqis fil-futur fil-prestazzjoni tal-industrija tal-Unjoni, jekk ikun hemm, ma jkunx konness ma’ importazzjonijiet mill-pajjiżi kkonċernati iżda minflok ma’ tnaqqis fil-konsum fl-Unjoni. Dan it-tnaqqis fil-konsum allegatament ikun konness mhux biss ma’ bidliet fit-tendenzi tal-moda tax-xedd tas-saqajn li mxew minn formali għal inqas informali iżda wkoll ma’ tnaqqis fir-ritmu tas-suq. Dan l-avveniment iżid it-tendenza tal-konsumatur li jibdel il-preferenza favur is-settur ta’ prezz baxx tipikament rappreżentat minn importazzjonijiet minn pajjiżi terzi.

(304)

Hu probabbli li tnaqqis fil-konsum ġenerali jkollu effett negattiv fuq il-prestazzjoni tal-produtturi tal-Unjoni. Jista’ madankollu jkun mistenni wkoll li tnaqqis fis-setgħa tax-xiri tal-konsumatur jagħmel is-suq inqas reattiv għal tendenzi tal-moda fil-perjodu taż-żmien qasir li jwassal għal irkupru taż-“żarbun kannella” klassiku li hu s-settur fejn l-industrija tal-Unjoni hi l-iżjed b’saħħitha. Għaldaqstant jista’ ma jiġix konkluż li tnaqqis fil-konsum jolqot agħar iż-żraben prodotti fl-Unjoni minn dawk importati. In ġenerali, filwaqt li l-produtturi tal-Unjoni aktax li ma jkunux milquta minn tnaqqis fil-konsum, l-effett ta’ volumi kbar ta’ importazzjonijiet li huma oġġett ta’ dumping mill-pajjiżi kkonċernati xorta jkun kawża konsiderevoli ta’ ħsara jekk il-miżuri jitħallew jiskadu.

(305)

Ġie argumentat ukoll minn xi partijiet interessati li t-tnaqqis fir-ritmu ekonomiku għandu jinħass l-iżjed min-naħa tal-esportazzjoni fil-produzzjoni tal-Unjoni.

(306)

F’dan il-kuntest, tista’ ssir preżunzjoni li t-tnaqqis fir-ritmu finanzjarju, li jinħass madwar id-dinja, għandu jkollu wkoll impatt fuq l-esportazzjonijiet tal-Unjoni. Filwaqt li tnaqqis fl-attività tal-esportazzjoni jista’ ċertament jikkontribwixxi b’mod negattiv għall-iżvilupp ġenerali tas-settur, wieħed għandu madankollu jżomm f’moħħu li tliet kwarti tal-attività tal-produtturi tal-Unjoni hi mmirata lejn is-suq domestiku tal-Unjoni. Meta wieħed iqis dan, ma jistax jiġi konkluż li l-impatt probabbli tat-tnaqqis fir-ritmu tal-prestazzjoni tal-esportazzjoni fiha nnifisha għandu jkisser il-konnessjoni każwali bejn importazzjonijiet li huma oġġett ta’ dumping u l-ħsara kkawżata lill-produtturi tal-Unjoni.

(307)

Ġie argumentat li l-produtturi tal-Unjoni kellhom problemi biex jibbenefikaw minn miżuri fil-passat minħabba l-fatt li s-sors tal-problemi mġarrba huwa konness ma’ problemi strutturali u l-ineffiċjenza tal-industrija iżjed milli l-allegat dumping miċ-Ċina u l-Vjetnam. Skont dawn l-allegazzjonijiet, l-avveniment tat-tnaqqis fir-ritmu ekonomiku għandu jkompli jżid il-problemi strutturali fis-settur u jkompli jnaqqas il-konnessjoni bejn il-ħsara mġarrba u d-dumping.

(308)

L-ewwel u qabel kollox qed jiġi mfakkar li l-investigazzjoni wriet li, irrispettivament mill-pożizzjoni kompetittiva tagħhom, il-produtturi tal-Unjoni ġarrbu ħsara materjali mill-importazzjonijiet tal-prodotti li huma oġġett ta’ dumping. Fi kwalunkwe każ, għandu jiġi osservat kif muri hawn fuq, li l-industrija tal-Kummissjoni, waqt li għadha f’sitwazzjoni prekarja, tal-anqas wriet irkupru parzjali fil-perjodu kkunsidrat u kienet kapaċi żżomm sehem tas-suq stabbli. Barra minn hekk, parti kbira mis-settur kienet kapaċi li tirridefinixxi l-mudell tan-negozju jew qed tipprova tagħmel hekk permezz (i) tal-ġabra tar-riżorsi fi gruppi li jagħmlu l-aħjar użu tal-ispeċjalizzazzjoni u li jippermettu li l-gruppi jibbenefikaw mill-ekonomiji tal-kobor, (ii) il-bejgħ dirett lill-bejjiegħ bl-imnut u (iii) il-produzzjoni ta’ żraben fis-setturi ta’ livell medju sa għoli u ta’ livell għoli. Ma kienx ikun probabbli li l-industrija kienet tkun kapaċi tkompli bil-proċess kieku l-miżuri ma kinux f’posthom u fi kwalunkwe każ dawk li issa jinsabu fil-proċess li jibdlu l-mudell tan-negozju tagħhom, f’kull probabbiltà ma kinux ikunu kapaċi li jlestuh.

(309)

Madankollu hu mistenni wkoll li t-tnaqqis fir-ritmu tas-suq għandu jżid il-pressjoni u possibbilment anke jwaqqaf il-proċess għall-kumpaniji li għadhom ma kinux kapaċi li jiffukaw mill-ġdid permezz ta’ bidla fil-mudell tan-negozju. Is-sitwazzjoni ta’ dawn il-kumpaniji tirriskja li tkompli tmur lura u ħafna kumpaniji f’dan il-grupp jista’ jkun li jkollhom jagħlqu hekk kif il-kompetizzjoni tintensifika. Il-kumpaniji li jkunu adottaw il-mudelli tan-negozju iżjed avvanzati aktarx li ma jirnexxielhomx jaħarbu mill-effetti tat-tnaqqis fir-ritmu tas-suq għax il-prezzijiet fis-settur ta’ livell għoli/medju li fih huma speċjalizzati, huma wkoll probabbli soġġetti għal pressjoni ġenerali ‘l isfel.

(310)

Madankollu, fir-rigward tal-valutazzjoni tas-sitwazzjoni evalwata fil-perjodu kkunsidrat, ikun diffiċli li wieħed jargumenta li, waħdu, l-avveniment tat-tnaqqis fir-ritmu ekonomiku jfixkel il-konnessjoni każwali mal-importazzjonijiet li huma oġġett ta’ dumping. Għall-kuntrarju, kif provdut f’iżjed dettall fil-premessa (302) il-pressjoni ‘l isfel fuq il-prezz sostnuta b’importazzjonijiet li huma oġġett ta’ dumping u rħas, aktarx li wkoll tiġġenera effett domino, li twassal biex sehem akbar tal-produzzjoni tal-Unjoni tersaq lejn l-istess settur bħall-importazzjonijiet li huma oġġett ta’ dumping sabiex iżżid il-pressjoni tal-importazzjonijiet oġġett ta’ dumping fuq il-produtturi tal-Unjoni. Taħt dawn iċ-ċirkostanzi, il-produtturi tal-Unjoni għaldaqstant ikunu iżjed dipendenti minn qatt qabel fuq l-eżistenza tal-miżuri fil-futur.

(311)

Ġie eżaminat ukoll jekk l-importazzjonijiet minn pajjiżi terzi aktarx li jkollhom impatt fuq l-effetti tal-importazzjonijiet oġġett ta’ dumping fuq is-sitwazzjoni tal-industrija tal-Unjoni jekk il-miżuri jitħallew jiskadu. F’dan il-kuntest, intqal li l-esportazzjonijiet minn pajjiżi terzi lejn l-Unjoni kienu qegħdin kontinwament jikbru u li fid-dawl tal-ispejjeż ogħla fiċ-Ċina u l-Vjetnam u meta mqabbla mat-tnaqqis fir-ritmu ekonomiku, dawn għandhom ikunu l-kawża ewlenija ta’ tħassib għall-Unjoni fil-futur.

(312)

Meta wieħed iżomm f’moħħu d-differenza fil-prezz bejn l-importazzjonijiet li huma oġġett ta’ dumping mill-pajjiżi kkonċernati u dawk ta’ pajjiżi terzi, madankollu jkun probabbli li l-esportazzjonijiet Ċiniżi u Vjetnamiżi se jkollhom vantaġġ fil-prezz fuq l-importazzjonijiet minn pajjiżi terzi. Dan min-naħa tiegħu juri tnaqqis relattiv ta’ dawn l-importazzjonijiet fil-futur. Kif muri hawn fuq fit-taqsimiet C.3 u C.4 m’hemmx sinjali li l-esportaturi Ċiniżi jew Vjetnamiżi aktarx li se jneħħu l-preżenza tagħhom mis-suq tal-Unjoni. Għall-kuntrarju, il-kapaċitajiet kbar disponibbli jissuġġerixxu li għandhom inċentiv li jibqgħu fis-suq kemm jista’ jkun possibbli.

(313)

Fid-dawl ta’ dak fuq imsemmi, l-importazzjonijiet minn pajjiżi terzi aktarx li jkollhom inqas impatt fuq is-sitwazzjoni tal-industrija tal-Unjoni jekk jiskadu l-miżuri.

(314)

Ġie argumentat ukoll li ħsara għall-produtturi tal-Unjoni aktarx li tonqos minħabba ż-żieda fil-valur tal-USD meta mqabbel mal-Euro. Il-varjazzjoni fil-munita żżid il-prezzijiet tal-importazzjonijiet oġġett ta’ dumping li huma nnegozjati fl-Euro sabiex jiċċekken id-distakk fil-prezzijiet bejn l-importazzjonijiet li huma oġġett ta’ dumping u l-prezzijiet tal-produttur tal-Unjoni.

(315)

F’dan il-kuntest għandu jiġi osservat li l-investigazzjoni għandha tistabbilixxi jekk l-importazzjonijiet li huma oġġett ta’ dumping (f’termini ta’ prezzijiet u volum) ikkawżawx (jew aktarx li jikkawżaw) ħsara materjali għall-industrija tal-Unjoni jew jekk din il-ħsara materjali (jew il-probabbiltà tiegħu) kinitx dovuta għal fatturi oħra. F’dan ir-rigward, l-Artikolu 3(6) tar-Regolament bażiku jgħid li hu meħtieġ li jintwera jekk il-livell tal-prezz tal-importazzjonijiet li huma oġġett ta’ dumping jistax jikkawża (jew hux aktarx li jikkawża) ħsara. Għaldaqstant dan jirreferi biss għal differenza bejn il-livelli tal-prezz, u għaldaqstant m’hemm l-ebda rekwiżit li jiġu analizzati l-fatturi li jolqtu l-livell ta’ dawk il-prezzijiet.

(316)

L-effett probabbli tal-importazzjonijiet li huma oġġett ta’ dumping fuq il-prezzijiet tal-industrija tal-Unjoni hu essenzjalment eżaminat billi jiġi stabbilit it-tnaqqis fil-prezz, il-kriżi fil-prezzijiet u t-trażżin tal-prezzijiet. Għal dan l-iskop, il-prezzijiet tal-esportazzjoni li huma oġġett ta’ dumping u l-prezzijiet tal-bejgħ tal-industrija tal-Unjoni huma mqabbla, u l-prezzijiet tal-esportazzjoni użati għall-kalkoli tal-ħsara jista’ jkollhom xi kultant jinqalbu f’munita oħra sabiex ikun hemm bażi komparabbli. B’konsegwenza ta’ dan, l-użu tar-rati tal-kambju f’dan il-kuntest jiżgura biss li d-differenza fil-prezz tiġi stabbilita fuq bażi komparabbli. Minn dan, isir ovvju li r-rata tal-kambju tista’ bħala prinċipju ma tkunx fattur ieħor tal-ħsara.

(317)

Dan li ssemma hu kkonfermat ukoll bil-kliem tal-Artikolu 3(7) tar-Regolament bażiku, li jirreferi għal fatturi magħrufa minbarra l-importazzjonijiet li huma oġġett ta’ dumping. Il-lista tal-fatturi l-oħra magħrufa f’dan l-Artikolu ma tagħmilx referenza għal kwalunkwe fattur li jaffetwa l-livell tal-prezz tal-importazzjonijiet oġġett ta’ dumping.

(318)

Madankollu, anke fil-każ li dan il-fattur jitqies, meta wieħed iqis il-pressjoni probabbli fuq il-prezzijiet tal-konsumatur f’kuntest ta’ tnaqqis fir-ritmu tas-suq, mhuwiex probabbli li l-importaturi li jixtru mill-pajjiżi kkonċernati jkunu kapaċi jżidu l-prezzijiet għall-bejgħ bl-imnut minħabba ż-żieda fil-valur tal-USD. Barra minn hekk, ir-rati tal-kambju ta’ din ix-xorta huma diffiċli ħafna li jiġu prevvisti u ġie previst depprezzament tal-USD kontra l-Euro wara l-RIP li jagħmilha impossibbli li jiġi konkluż li l-flutwazzjonijiet tal-muniti għandhom ikollhom effett ‘il fuq fuq il-prezzijiet tal-importazzjonijiet li huma oġġett ta’ dumping mill-pajjiżi kkonċernati.

(319)

Fid-dawl ta’ dak imsemmi, ma jistax jiġi konkluż li l-iżvilupp tar-rata tal-kambju jista’ jkun fattur ieħor li jikkawża l-ħsara.

(320)

Kif muri hawn fuq, filwaqt li ma tistax tinqata’ barra l-possibbiltà li fatturi oħra inkluż it-tnaqqis fir-ritmu ekonomiku għandhom ikollhom effett fuq is-sitwazzjoni finanzjarja tal-prodotturi tal-Unjoni, l-investigazzjoni ma wrietx li dawn waħedhom jistgħu jkissru l-konnessjoni bejn l-importazzjonijiet li huma oġġett ta’ dumping u l-ħsara kontinwata li tista’ ġġarrab l-industrija tal-Unjoni.

(321)

Kif stabbilit hawn fuq fit-taqsima G4, l-investigazzjoni wriet li s-sitwazzjoni ta’ ħsara tal-industrija tal-Unjoni kompliet fl-RIP. Il-kontinwazzjoni tal-ħsara hi skont l-Artikolu 11(2) tar-Regolament Bażiku fiha nnifisha indikatur b’saħħtu li l-ħsara aktarx li tkompli fil-futur li jissuġġerixxi li għandhom jinżammu f’posthom il-miżuri.

(322)

Is-sejbiet li jappartjenu għall-importazzjonijiet juru li l-importazzjonijiet ta’ volumi kbar fi prezzijiet li huma oġġett ta’ dumping aktarx li jkomplu u li l-pressjoni fuq il-prezzijiet (mhux l-inqas fil-kuntest tat-tnaqqis fir-ritmu ekonomiku) aktarx li jintensifika l-kompetizzjoni bejn importazzjonijiet li huma oġġett ta’ dumping u ż-żraben tal-ġilda prodotti il-Unjoni. L-investigazzjoni wriet ukoll li m’hemmx fatturi oħra magħrufa li għandhom ikissru l-konnessjoni b’saħħitha bejn l-importazzjonijiet li huma oġġett ta’ dumping u l-ħsara li l-produtturi tal-Unjoni jsofru.

(323)

Analiżi ġenerali tas-sejbiet fl-investigazzjoni tindika li l-konsegwenza tat-tneħħija tal-miżuri aktarx li twassal għal volumi kontinwament kbar u li possibilment jiżdiedu ta’ importazzjonijiet kemm miċ-Ċina u kif ukoll mill-Vjetnam fi prezzijiet li jkomplu jnaqqsu l-prezzijiet ta’ dawk fl-industrija tal-Unjoni. It-tnaqqis fir-ritmu ekonomiku aktarx li jkompli jħarrax dan l-iżvilupp. L-importazzjonijiet li huma oġġett ta’ dumping għaldaqstant aktarx li jkollhom effetti detrimentali konsiderevoli fuq l-industrija tal-Unjoni. Taħt dawn iċ-ċirkostanzi, l-industrija tal-Unjoni jkollha jew issegwi t-tnaqqis fil-prezzijiet sabiex iżżomm is-sehem fis-suq tagħha, jew iżżomm il-prezzijiet tal-bejgħ f’livelli kurrenti u minflok titlef il-klijenti u eventwalment il-bejgħ. Fil-każ imsemmi l-ewwel, l-industrija tal-Unjoni jkollha topera b’telf u fil-każ imsemmi l-aħħar, it-telfien tal-bejgħ fih innifsu eventwalment iwassal għal spejjeż miżjuda segwiti b’telfien.

(324)

Barra minn hekk, l-industrija tal-Unjoni sofriet mill-effetti ta’ importazzjonijiet li huma oġġett ta’ dumping għal ħafna snin u preżentament tinsab f’sitwazzjoni ekonomika prekarja. Madankollu, ġie stabbilit ukoll li parti kbira mill-produtturi tal-Unjoni kienu kapaċi jirridefinixxu l-mudelli tan-negozju tagħhom, billi kkonċentraw fuq valur miżjud ogħla, is-settur tal-prodott ta’ livell medju sa għoli u b’kanali tad-distribuzzjoni iżjed organizzati. Dan il-grupp gradwalment qiegħed jassorbi wkoll l-attività ta’ parti mill-industrija li s’issa għadha ma kinitx kapaċi taġġusta u timplimenta mudelli tan-negozju ġodda u perjodu ieħor ta’ aġġustament ikun meħtieġ sabiex titlesta din il-bidla fl-industrija kollha.

(325)

Jekk il-miżuri jinġiebu fi tmiemhom f’dan l-istadju sensittiv, is-sitwazzjoni tal-produtturi tal-Unjoni għandha tiddeterjora u l-proċess ta’ ċaqliq lejn mudell tan-negozju ġdid aktarx li jitwaqqaf u l-eżistenza innifisha ta’ parti kbira tal-industrija tkun ipperikolata.

(326)

Għaldaqstant l-investigazzjoni żvelat li hemm, minħabba l-importazzjonijiet kemm miċ-Ċina u kif ukoll mill-Vjetnam, probabbiltà ċara ta’ kontinwazzjoni tal-ħsara għall-industrija tal-Unjoni għall-perjodu taż-żmien qasir/medju, sakemm jitlesta l-proċess tal-aġġustament.

(327)

Waslu għadd ta’ kummenti wara l-iżvelar tas-sejbiet. Madankollu, dawn ma kinux tali li setgħu jbiddlu l-konklużjonijiet. L-argumenti ewlenin imqajma kienu dawn li ġejjin.

(328)

Bosta partijiet interessati tennew it-tħassib tagħhom dwar it-trattament ta’ kunfidenzjalità mogħti lil min jagħmel l-ilment, filwaqt li ddikjaraw li fil-fajl ma kien hemm l-ebda ħjiel ta’ sostenn għall-allegazzjoni li l-qagħda ta’ min jagħmel l-ilment tkun affetwata negattivament jekk tiġi żvelata l-identità tagħhom. Waħda mill-partijiet interessati żiedet tgħid li biex din ma tiġix żvelata, il-prassi tad-WTO tkun teħtieġ li jintwerew raġunijiet validi għad-dokumenti kollha, sew jekk jitqiesu kunfidenzjali sew jekk le. Skont din il-parti f’dan il-każ ma ntweriet l-ebda raġuni valida.

(329)

L-istess parti argumentat ukoll li jekk it-talba għal kunfidenzjalità tiġi madankollu milqugħa, dan min-naħa l-oħra għandu jfisser li għall-inqas id-dettalji sħaħ fuq il-prezz ta’ unità u l-indikaturi ta’ profitabbiltà tal-kampjun jistgħu jiġu żvelati.

(330)

Kif indikat fil-premessi (40)-(42) il-kunfidenzjalità dwar l-identitajiet ta’ min għamel l-ilment u l-produtturi magħżula għall-kampjun kienu bbażati fuq talba ġġustifikata b’mod validu b’konformità mal-Artikolu 19 fir-Regolament Bażiku. Għaldaqstant, mhuwiex korrett li ma ntwerietx raġuni valida minn min għamel l-ilment. Fir-rigward tal-argument li għandhom jiġu żvelati d-dettalji sħaħ fuq il-prezz ta’ unità u l-profitabbiltà, jitqies li dan, meta tiġi kkunsidrata l-informazzjoni disponibbli għall-pubbliku, jista’ jiżvela b’mod indirett l-identità ta’ min għamel l-ilment. Barra minn hekk, fil-grupp ta’ kumpaniji inklużi fil-kampjun, dan l-iżvelar jaffettwa l-interessi kummerċjali tal-kumpaniji l-oħra inklużi fil-kampjun li wkoll huma kompetituri fis-suq.

(331)

Fid-dawl ta’ dak li ntqal hawn fuq, il-kummenti li waslu mhumiex tali li jistgħu jbiddlu l-konklużjoni li jingħata trattament kunfidenzjali għall-identità tal-produtturi tal-Unjoni li jsostnu t-talba.

(332)

Bosta partijiet interessati argumentaw li l-Kummissjoni applikat id-definizzjoni tal-industrija tal-Unjoni u tal-produzzjoni tal-Unjoni b’mod mhux korrett.

(333)

Żewġ partijiet iddikjaraw li valutazzjoni tal-ħsara trid tkun ibbażata fuq informazzjoni dwar min għamel l-ilment u dawk li jsostnu l-ilment u mhux fuq il-bażi tat-total ta’ produzzjoni tal-Unjoni. Skont dawn il-partijiet, dan ifisser li l-indikaturi makro użati ma kinux rappreżentattivi.

(334)

Ġie sostnut ukoll li l-Kummissjoni naqset milli teskludi mill-kampjun kumpanija li kienet waqqfet il-produzzjoni fl-Unjoni fl-RIP. Xi partijiet iddikjaraw li l-inklużjoni ta’ din il-kumpanija għawġet l-indikaturi mikro kif ukoll l-analiżi dwar it-twaqqigħ tal-prezzijiet u l-bejgħ bit-telf. Bil-maqlub, parti interessata oħra li ma oġġezzjonatx għall-inklużjoni fil-kampjun ta’ din il-parti, iddikjarat li d-dejta kollha ta’ din il-kumpanija u mhux biss dik relatata mal-attività tagħha fl-Unjoni għandha titqies fl-analiżi tal-ħsara.

(335)

L-istess partijiet interessati ddikjaraw li l-Kummissjoni naqset milli teskludi mid-definizzjoni tal-industrija tal-Unjoni ta’ kumpaniji li importaw sa 25 % tal-produzzjoni totali minn pajjiżi terzi. Skont dawn il-partijiet interessati dan jikkostitwixxi bidla fil-metodoloġija meta mqabbel mal-premessa (231) tar-Regolament li jimponi miżuri provviżorji fl-investigazzjoni oriġinali, li tistipula li l-kumpaniji kollha li kienu ddelokalizzaw kienu ġew esklużi. Ġie ddikjarat ukoll li l-prassi Komunitarja b’mod ġenerali fir-rigward tal-applikazzjoni tal-Artikolu 4(1) tar-Regolament Bażiku, tkun teħtieġ l-esklużjoni tal-kumpaniji li jimportaw madwar 25 % tal-produzzjoni totali. F’dan il-kuntest waħda mill-partijiet iddikjarat ukoll li l-Kummissjoni kkonkudiet b’mod żbaljat li l-ebda wieħed mill-membri tas-CEC ma kien ittrasferixxa l-produzzjoni anki meta ġiet ippreżentata, matul l-investigazzjoni, sottomissjoni li turi l-kuntrarju.

(336)

Bosta partijiet interessati indikaw ukoll li d-dokument ta’ żvelar ġenerali kien inkonsistenti għax il-premessa 3 indikat li s-sostenn għall-ilment kien 35 %, filwaqt li l-premessa (193) indikat 25 %.

(337)

Kif diġà ntwera fil-premessi (193)-(200) l-industrija tal-Unjoni kienet definita kif previst fl-Artikolu 4.1 tar-Regolament Bażiku. Il-valutazzjoni tal-qagħda tal-produzzjoni tal-Unjoni kollha tikkonforma mar-Regolament Bażiku. L-argument li l-valutazzjoni tal-ħsara kienet ibbażata fuq definizzjoni mhux korretta tal-industrija tal-Unjoni għandha għalhekk tiġi miċħuda.

(338)

Fir-rigward tan-nuqqas li tiġi eskluża waħda mill-kumpaniji inklużi fil-kampjun, ta’ min ifakkar li l-premessi (23) u (196) jagħtu r-raġunijiet għaliex il-kumpanija għandha tinżamm fil-kampjun. Ġie konkluż ukoll li l-possibbiltà ta’ esklużjoni ma jkollha l-ebda effett fuq il-kwalità rappreżentattiva tal-kampjun jew fuq is-sitwazzjoni ta’ ħsara, inkluż it-twaqqigħ tal-prezzijiet. Dan hu dovut għall-piż minimu ta’ din il-kumpanija fil-kampjun. Għaldaqstant, jekk il-kumpanija tkunx formalment eskluża jew le ma għandu l-ebda implikazzjoni prattika fuq ir-riżultat tal-analiżi.

(339)

Kif jidher fil-premessa (195), il-produzzjoni tal-Unjoni kienet ibbażata biss fuq kumpaniji li jaqgħu taħt id-definizzjoni tal-Artikolu 4 (inkluż l-Artikolu 4(1)). Fuq il-bażi tal-informazzjoni rreġistrata, ma tqieset l-ebda entità ġuridika li kienet iddelokalizzata u li kellha tiġi eskluża mid-definizzjoni ta’ produttur tal-Unjoni skont l-Artikolu 4(1) F’dan il-kuntest ta’ min ifakkar li l-importazzjonijiet limitati bħala tali ma jwasslux għal delokalizzazzjoni. Filwaqt li għadd żgħir ta’ produtturi li lmentaw fil-fatt importaw, dawn il-volumi kienu ferm limitati u f’kull każ mhux iktar minn 25 % tal-produzzjoni totali tal-kumpanija kkonċernata. Fid-dawl ta’ dan, id-dikjarazzjoni li l-Kummissjoni ddevjat mill-prassi fil-każ oriġinali jew mid-dispożizzjonijiet tar-Regolament bażiku mhijiex korretta.

(340)

Fir-rigward tal-allegazzjoni ta’ inkonsistenza bejn iċ-ċifri ta’ sostenn għall-ilmenti msemmija fil-premessi (3) u (193), ta’ min jinnota li l-premessa (193) tiddikjara sempliċiment li s-sostenn jaqbeż il-minimu legali ta’ 25 % u għaldaqstant mhuwiex indikazzjoni tas-sostenn effettiv lil hinn minn dan il-limitu.

(341)

Bosta partijiet interessati ddikjaraw li l-perjodu għall-valutazzjoni tal-ħsara ma kienx koerenti. B’mod partikolari, intqal li l-użu tal-perjodu meqjus għal ċerti indikaturi, filwaqt li jirreferi lura għall-OIP u għall-2005 għal indikaturi oħra ta’ ħsara, iwassal għal riżultat inkonsistenti. Partijiet oħra interessati ddikjaraw li l-Kummissjoni qagħdet fuq dejta tal-2005 u tal-OIP mingħajr ma żvelat din id-dejta.

(342)

Il-valutazzjoni tal-analiżi tal-ħsara kienet ibbażata fuq is-sejbiet fil-perjodu kkonċernat, i.e. mill-2006 sa u inkluż l-RIP. Ir-referenzi għall-OIP u l-2005 saru biss biex jikkumplimentaw l-analiżi iżda ma kellhomx impatt deċiżiv fuq il-konklużjonijiet. Fid-dawl ta’ dan, id-dikjarazzjoni li l-perjodu għall-valutazzjoni tal-ħsara wassal għal analiżi inkonsistenti trid tiġi miċħuda.

(343)

Bosta partijiet saħqu li l-kampjun ta’ produtturi tal-Unjoni ma kienx rappreżentattiv fejn għandhom x’jaqsmu t-tipi ta’ prodotti, id-daqs u l-firxa ġeografika.

(344)

F’dan il-kuntest ġie ddikjarat li l-Kummissjoni ma tatx spjegazzjoni biżżejjed għall-firxa ġeografika tal-kampjun u li dan, f’kull każ, ma kienx rappreżentattiv billi x-xedd tas-saqajn hu prodott f’mill-inqas seba’ Stati Membri li minnhom erba’ biss kienu parti mill-kampjun. Barra minn hekk, ġie ddikjarat li Stat Membru wieħed b’mod partikolari ġie rrappreżentat iżżejjed. Waħda mill-partijiet interessati talbet ukoll li l-Kummissjoni tipprovdi informazzjoni dwar il-livell ta’ arranġamenti ta’ ħlasijiet li jeżistu fl-industrija tal-Unjoni.

(345)

Parti waħda ddikjarat ukoll li x-xedd tas-saqajn tan-nisa kienu rrappreżentati żżejjed fil-kampjun u parti oħra fakkret li l-profitabbiltà tal-kampjun ma kinitx irrappreżentata meta mqabbla maċ-ċifra li rriżultat mill-ilment.

(346)

Il-premessa (28) tipprovdi dettalji dwar il-firxa ġeografika tal-kampjun u l-kwalità rappreżentattiva tiegħu meta mqabbla mal-firxa globali fl-Unjoni. F’dan il-kuntest ta’ min ifakkar li l-kampjun kien jirrifletti, fil-parti l-kbira, il-firxa ġeografika tal-popolazzjoni kollha u li firxa ġeografika eżattament identika mhijiex meħtieġa. Barra minn hekk, l-investigazzjoni żvelat li madwar 60 % tal-produzzjoni tal-kampjun saret permezz tal-hekk imsejjaħ “sottokuntrattar” jew arranġamenti ta’ “ħlasijiet”.

(347)

Barra minn hekk, billi tali “sottokuntrattar” jew “ħlasijiet” iseħħu wkoll fost kumpaniji fi Stati Membri differenti, ingħatat attenzjoni biex jiġi żgurat li l-produzzjoni tkun allokata lill-Istat Membru tal-kumpanija li kienet ordnat is-servizz.

(348)

Meta jitqies dak li ntqal hawn fuq, ċertu grad ta’ varjazzjoni fir-rigward tal-piż ta’ Stat Membru mhuwiex se jwassal biex il-kampjun ma jkunx rappreżentattiv. Bl-istess mod, meta jitqies l-arranġament ta’ sottokuntrattar u l-fatt li żewġ terzi tal-produzzjoni huma kkonċentrati fi tliet Stati Membri, ma jista’ jkun hemm l-ebda rekwiżit biex jiġu inklużi rappreżentanti minn seba’ pajjiżi produtturi.

(349)

Huwa mfakkar mill-premessa (29) li l-produtturi Komunitarji inklużi fil-kampjun instabu li jkopru grupp rappreżentattiv ta’ firxiet ta’ prodotti li fil-parti l-kbira jirrifletti dak tal-popolazzjoni ġenerali. L-istess jgħodd għad-diviżjoni skont is-sessi u għalkemm jeżistu varjazzjonijiet fil-kategoriji kollha, ix-xedd tas-saqajn tal-irġiel, tan-nisa u tat-tfal jinbiegħu fi kwantitajiet sinfikanti mill-kumapniji inklużi fil-kampjun kif ukoll mill-popolazzjoni ġenerali. Fir-rigward tal-livell ta’ profitt, il-fatt li hemm varjazzjoni bejn il-kampjun u min ressaq it-talba, ma jwassalx biex il-kampjun ma jkunx rappreżentattiv. F’kull każ, ta’ min jinnota li l-profitabbiltà tal-kampjun hi fl-istess firxa bħal dak stabbilit meta ġiet analizzata l-informazzjoni kollha fl-ilment.

(350)

Xi partijiet argumentaw li ċ-Ċina ġiet iddiksriminata vis-à-vis l-Vjetnam, diġà fil-każ oriġinali, għax ġie applikat dazju ogħla fuq l-importazzjonijiet Ċiniżi għalkemm il-marġni ta’ dumping stabbilit għaċ-Ċina kien aktar baxx minn dak għall-Vjetnam. Ġie ddikjarat ukoll li ċ-Ċina ġiet iddiskriminata minħabba l-metodu użat biex jiġi aġġustat il-marġni ta’ ħsara fl-investigazzjoni oriġinali.

(351)

L-ewwel nett, il-liġi fl-UE teżiġi li d-dazji jkunu stabbiliti b’konformità mar-regola ta’ inqas dazju, li jfisser li l-marġni ta’ ħsara jista’ jkun qed jiffissa d-dazju, minflok il-marġni ta’ dumping. It-tieni, fil-każ oriġinali nstab li, biex ikun impost l-aktar livell baxx possibbli ta’ rimedju għad-dumping ta’ ħsara, kien jinħtieġ li jitqiesu l-volumi u l-valuri mhux ta’ ħsara, li ġew ikkalkolati biex jaslu sal-aktar livell baxx possibbli ta’ rimedju ta’ ħsara kkważata kemm miċ-Ċina kif ukoll mill-Vjetnam, u li rriżultat fl-impożizzjoni tad-dazji. F’dan il-kuntest, ta’ min ifakkar li l-għan ta’ reviżjoni ta’ skadenza hu li teżamina jekk il-fatti kkonċernati jiġġustifikawx li l-miżuri fil-forma attwali tagħhom jibqgħu fis-seħħ għal perjodu ulterjuri. Meta wieħed iqis li m’hemm l-ebda ambitu għal tibdil fil-livell ta’ miżuri fil-kuntest ta’ din ir-reviżjoni, ma jistgħux jitqiesu l-argumenti għal dan il-għan.

(352)

Waħda mill-partijiet interessati ddikjarat li l-kundizzjonijiet għall-akkumulazzjoni ma ġewx sodisfatti billi x-xejra li tikkonċerna l-Vjetnam kienet ferm differenti minn dik taċ-Ċina. Ġie ddikjarat ukoll li l-importazzjonijiet mill-Vjetnam ma setgħux jibqgħu jitqiesu li jikkawżaw ħsara billi l-volumi fl-RIP kienu inqas minn dawk tal-volumi mhux ta’ ħsara kif stabbilit fl-investigazzjoni oriġinali.

(353)

Ta’ min ifakkar li fil-premessa (216) hawn fuq u aktar ‘il quddiem twettqet analiżi estensiva li turi li l-kundizzjonijiet għall-akkumulazzjoni ġew sodisfatti. Fid-dawl ta’ dan il-fatt, l-argument dwar il-volum mhux ta’ ħsara mhuwiex rilevanti.

(354)

Waħda mill-partijiet interessati osservat li d-dokument ta’ żvelar wera li l-industrija Komunitarja qed tkompli tiġi ddelokalizzata. Skont dawn il-partijiet, dan wera li d-dazji fis-seħħ ma setgħux iwaqqfu l-proċess ta’ delokalizzazzjoni.

(355)

F’dan il-kuntest ta’ min ifakkar li l-għan tad-dazji mhuwiex li jwaqqfu jew iħeġġu xi proċess ta’ delokalizzazzjoni, iżda li jsewwu d-distorsjonijiet fil-kummerċ ikkawżati minn importazzjonijiet oġġett ta’ dumping. Ta’ min jinnota wkoll li bosta kumpaniji ġew delokalizzati lejn Stati Membri oħra jew lejn pajjiżi terzi li mhumiex sottomessi għal miżuri. Fid-dawl ta’ dak li ntqal hawn fuq, dan l-argument ma jistax jitqies.

(356)

Waħda mill-partijiet interessati qieset li t-tweġibiet minn assoċjazzjonijiet nazzjonali ma kinux biżżejjed bħala sors għal indikaturi ta’ ħsara billi mit-tweġibiet tagħhom setgħet toħroġ biss informazzjoni dwar xi wħud mill-indikaturi ta’ ħsara. Il-fatt li nkisbu biss disa’ tweġibiet, ġie wkoll ikkontestat.

(357)

Bosta partijiet ikkontestaw l-indikaturi makro minħabba l-fatt li dawn kienu bbażati fuq produzzjoni Komunitarja b’mod ġenerali aktar milli fuq informazzjoni minn dawk li għamlu l-ilment u dawk li sostnew l-ilment. Il-ġustifikazzjoni għat-twaqqif tal-indikaturi makro diġà ġiet spjegata hawn fuq fil-premessa (337) u għalhekk ma għandhiex bżonn tiġi vvalutata aktar. Waħda mill-partijiet interessati osservat li l-indikaturi makro, f’kull każ, ma kinux affidabbli. Il-fatt li ġiet osservata żieda fl-impjiegi ta’ 359 % sa mill-investigazzjoni oriġinali, wera għaliex iċ-ċifri ma kellhomx jitqiesu raġjonevoli. Din id-dikjarazzjoni ġiet sostnuta mill-osservazzjoni li wriet li l-indikaturi makro f’diversi okkażjonijiet kienu differenti minn dawk osservati fil-kampjun.

(358)

Bosta partijiet interessati osservaw li x-xejriet tal-konsum li ġew żvelati ma kinux koerenti, billi parti waħda mid-dokument semmiet tnaqqis ta’ 7 % filwaqt li f’parti oħra tad-dokument jissemma tnaqqis ta’ 14 %. Bl-istess mod, id-dejta dwar il-kapaċità tal-produzzjoni u d-dejta dwar l-impjiegi tqiesu li huma inkonsistenti għax dawn urew xejriet differenti anki jekk id-dokument ta’ żvelar ikkonkluda li t-tnejn kienu relatati ma’ xulxin.

(359)

Fir-rigward tas-sorsi u kif spjegat hawn fil-premessi (225)-(226), il-Kummissjoni talbet u kisbet mill-assoċjazzjonijet nazzjonali l-informazzjoni li kienet, b’mod raġjonevoli, għad-dispożizzjoni tagħhom. Il-fatt li din ma tkoprix l-indikaturi kollha ta’ ħsara ma hi bl-ebda mod anomalija, iżda pjuttost riflessjoni li dawn l-enitajiet sempliċement ma għandhomx aċċess għal dejta dwar xi indikaturi speċifiċi. Din hi r-raġuni għaliex l-awtorità ta’ investigazzjoni tikseb din id-dejta minn kampjun rappreżentattiv ta’ kumpaniji. Id-disa’ tweġibiet miksuba mill-assoċjazzjonijiet nazzjonali jirrappreżentaw maġġoranza kbira tal-produzzjoni (‘il fuq minn 80 % tat-total ta’ produzzjoni Komunitarja) u ġew ikkumplimentati wkoll minn informazzjoni tal-istatistika disponibbli u dejta oħra mogħtija minn partijiet interessati.

(360)

Fir-rigward tal-livell ta’ impjiegi ta’ min ifakkar li fl-investigazzjoni oriġinali, iċ-ċifra ta’ 57 000 ħaddiem kienet ibbażata fuq iċ-ċifri ta’ dawk li għamlu l-ilment. Iċ-ċifra attwali tal-impjiegi ta’ 262 000 hija indikatur makro u tirrigwarda l-industrija tal-Unjoni, kif definit hawn fuq. Fejn għandhom x’jaqsmu d-differenzi bejn l-indikaturi għall-kampjun u għall-Industrija tal-Unjoni kollha, ta’ min ifakkar li dawk l-indikaturi ma hemmx bżonn jirriflettu perfettament lil xulxin biex ikunu rappreżentattivi. Il-fatt li segwew l-istess xejriet ikompli juri l-kwalità rappreżentattiva tagħhom. Fir-rigward tal-allegata inkonsistenza għall-konsum, it-tnaqqis ta’ 7 % kien jirreferi għall-perjodu 2006 - RIP filwaqt li t-tnaqqis ta’ 14 % kien jirreferi għall-perjodu 2005 - RIP.

(361)

Fid-dawl ta’ dak li ntqal hawn fuq, il-kummenti dwar il-kompożizzjoni u l-analiżi tal-indikaturi makro għandhom jiġu miċħuda.

(362)

Waħda mill-partijiet interessati osservat li l-profitt ta’ 3 % li ntlaħaq mill-industrija tal-Unjoni għandu jitqies bħala riżultat tajjeb, b’mod partikolari meta jitqies li s-suq qiegħed jonqos. Ġie indikat ukoll li d-dikjarazzjoni li l-industrija tal-Unjoni qed tħabbat wiċċha ma’ pressjoni fuq il-prezzijiet mill-importazzjonijiet Ċiniżi u Vjetnamiżi ma ġietx sostnuta mis-sejbiet li l-industrija tal-Unjoni rnexxielha tgħolli l-prezzijiet bi 30 % fil-perjodu meqjus.

(363)

Kif stabbilit fl-investigazzjoni oriġinali, il-livell ta’ profitt mistenni fin-nuqqas ta’ dumping ta’ ħsara hu 6 %, ferm ogħla mil-livell ta’ madwar 3 % miksub mill-industrija tal-Unjoni, li barra minn hekk mhuwiex għoli biżżejjed biex jiżgura l-vijabbiltà fuq medda medja ta’ żmien u biex jiffinanzja l-proċess ta’ ristrutturar li għaddej bħalissa. Dan ukoll għandu jitqabbel mal-livell ta’ profitt b’saħħtu ħafna tal-importaturi. Fir-rigward tal-prezzijiet ta’ bejgħ tal-Industrija tal-Unjoni, iż-żieda tagħhom ma waqqfitx il-kompetizzjoni diretta bejn il-prodotti u għalhekk it-twaqqigħ tal-prezzijiet u l-bejgħ bit-telf ġew milquta. Il-marġni ta’ profitt baxx juri l-pressjoni fuq il-prezzijiet, billi l-industrija tal-Unjoni ma tistax tapplika marġni ogħla.

(364)

Fid-dawl ta’ dak li ntqal hawn fuq, l-argumenti fir-rigward tal-analiżi tal-indikaturi mikro għandhom jiġu miċħuda.

(365)

Bosta partijiet interessati esprimew tħassib rigward l-analiżi tat-twaqqigħ tal-prezzijiet imwettqa mill-Kummissjoni. F’dan il-kuntest ġie ddikjarat li l-Kummissjoni żiedet artifiċjalment it-tqabbil tan-numri ta’ kontroll tal-prodott (PCNs) bi klassifikazzjoni mill-ġdid ta’ ċertu xedd tas-saqajn mill-grupp ta’ prodotti E għal A.

(366)

Bosta partijiet interessati qiesu li l-Kummissjoni naqset milli tiżvela għaliex il-livell ta’ aġġustament għar-riċerka u l-iżvilupp, kif stabbilit fl-investigazzjoni oriġinali, issa naqas. Bl-istess mod, tqies li l-Kummissjoni ma żvelatx sa liema punt twettqu aġġustamenti għall-bejgħ lil kumpaniji kummerċjali mhux relatati.

(367)

Id-dikjarazzjoni li nkiseb tqabbil artifiċjali permezz ta’ klassifikazzjoni mill-ġdid tal-PCNs mhijiex korretta. Kif spjegat fil-premessa (57) u aktar ‘il quddiem ma kien hemm l-ebda klassifikazzjoni mill-ġdid, madankollu, fejn xieraq, kellha ssir korrezzjoni fejn il-partijiet iddikjaraw ix-xedd tas-saqajn fil-kategorija żbaljata.

(368)

Fir-rigward tad-dikjarazzjoni li ma ngħatat l-ebda ġustifikazzjoni għall-bidla fl-aġġustament tar-riċerka u l-iżvilupp, ta’ min jinnota li dan ġie stabbilit billi ntuża l-istess metodu bħal fl-investigazzjoni oriġinali, i.e. fuq il-bażi ta’ informazzjoni verifikata pprovduta mill-partijiet li kkooperaw, li tirreferi għall-RIP. Il-prezz CIF tal-esportaturi ġie stabbilit fuq il-bażi tad-dejta pprovduta mill-kumpaniji nnfishom u kkoreġut fejn meħtieġ.

(369)

Fid-dawl ta’ dak li ntqal hawn fuq, id-dikjarazzjonijiet li l-analiżi tat-twaqqigħ tal-prezzijiet kienet dgħajfa għandhom jiġu miċħuda.

(370)

Bosta partijiet interessati ddikjaraw li l-indikaturi ta’ ħsara globali kienu kollha pożittivi u li l-Kummissjoni kienet ibbażat il-konklużjoni tal-kontinwazzjoni tal-ħsara fuq il-profitabbiltà biss. Barra minn hekk, meta jitqies il-fatt li l-profitabbiltà fl-RIP kienet l-ogħla mill-2001 ‘l hawn, dan l-indikatur għandu wkoll jiġi interpretat bħala sinjal li l-industrija tal-Unjoni ma għadhiex iġġarrab ħsara. Barra dan, bosta partijiet interessati, semmew u pprovdew eżempji speċifiċi ta’ kumpaniji li kienu sejrin tajjeb biex isostnu d-dikjarazzjoni tagħhom li l-industrija tal-Unjoni ma ġarrbitx ħsara.

(371)

Parti oħra interessata qieset li l-Kummissjoni naqset milli tqis l-impatt tal-bidla fil-mudell tan-negozju fil-valutazzjoni tal-produzzjoni u tal-bejgħ kif ukoll il-qagħda ġenerali tal-ħsara. Bl-istess mod ġie ddikjarat li l-effetti tat-trasferiment ma tqisux u skont din il-parti l-profitt medju tal-kampjun kien ikun ferm ogħla li kieku tqiesu l-attivitajiet trasferiti.

(372)

F’dan il-kuntest, hu enfasizzat li l-analiżi tal-indikaturi ta’ ħsara hija globali fin-natura tagħha u mhux l-indikaturi kollha għandhom juru deterjorament biex tinstab il-ħsara. Wieħed għandu jqis ukoll li l-miżuri kienu fis-seħħ matul il-perjodu analizzat, u li għalhekk wieħed għandu jistenna, b’mod loġiku, ċertu trażżin tal-ħsara. Minkejja dan u kif diġà stabbilit fil-premessa (257) u aktar ‘il quddiem, il-konsum, il-produzzjoni, il-bejgħ, l-utilizzazzjoni tal-kapaċità marru lura matul il-perjodu, it-twaqqigħ tal-prezzijiet u l-bejgħ bit-telf baqgħu għaddejjin f’livelli sinifikanti, u l-profitabbiltà baqgħet f’livelli baxxi ħafna, sostanzjalment inqas mill-profitt normali li hu mistenni fin-nuqqas tad-dumping ta’ ħsara. Flimkien, jidher li l-miżuri ppermettew it-tneħħija parzjali tal-ħsara, iżda bl-ebda mod ma wasslu għall-għajbien tagħha.

(373)

F’industrija b’aktar minn 18 000 kumpanija, huwa naturali li jkun hemm firxa fir-rendiment ta’ kumpaniji individwali, madankollu, dan ma jimplikax li l-ħsara ma teżistix għall-industrija b’mod ġenerali. Ta’ min ifakkar li l-analiżi tal-indikaturi makro għall-industrija kollha u l-indikaturi mikro għal kampjun rappreżentattiv tal-produtturi (it-tnejn skont l-Artikolu 4(1) tar-Regolament Bażiku), wriet li l-ħsara kompliet.

(374)

Fir-rigward tal-impatt tal-bidla fil-mudell tan-negozju, il-profitt medju kkalkolat jirreferi għall-produtturi tal-Unjoni inklużi fil-kampjun. It-tibdil kollu (pereżempju l-mudell tan-negozju, il-livell ta’ kummerċ) ġie inkluż fl-analiżi. Skont kif mitlub mil-liġi, l-attività tal-operatur bħala importatur ma tistax tiġi attribwita għall-qagħda tiegħu bħala produttur.

(375)

Fid-dawl ta’ dak li ntqal hawn fuq, il-konklużjonijiet dwar il-ħsara kif stabbilit fil-premessi (257)-(260) jibqgħu l-istess.

(376)

Bosta partijiet interessati qiesu li l-Kummissjoni naqset milli tqis l-impatt sħiħ ta’ kawżi oħra fuq il-vijabbiltà finanzjarja tal-produtturi tal-Unjoni. B’mod ġenerali, ġie ddikjarat li l-Kummissjoni ħadet approċċ ta’ iżolament lejn l-impatt ta’ kawżi oħra. F’dan il-kuntest ġie affermat li l-valutazzjoni ta’ kull kwistjoni waħidha kienet tfisser li l-effetti kollha, għajr dik ivvalutata dakinhar, kienu attribwiti għall-importazzjonijiet oġġett ta’ dumping.

(377)

Bosta partijiet interessati qiesu li l-Kummissjoni ssottovalutat l-impatt tal-importazzjonijiet minn pajjiżi terzi oħra. Skont dawn il-partijiet il-prezz medju differenzjat tal-importazzjonijiet minn pajjiżi terzi kien biss EUR 0.39 ogħla minn dawk tar-RPĊ u l-Vjetnam u għalhekk ikollu impatt sinifikanti fuq l-industrija Komunitarja. Ġie osservat ukoll li, kieku t-tqabbil kien ibbażat fuq valuri mniżżla, minflok fuq il-valuri CIF, il-prezzijiet tal-importazzjonijiet b’mod partikolari mill-Indja u l-Indoneżja kienu jkunu aktar baxxi minn dawk tal-pajjiżi kkonċernati.

(378)

Bosta partijiet iddikjaraw li l-Kummissjoni naqset milli tiġġustifika l-konklużjoni li kien hemm kompetizzjoni bejn il-prodott ikkonċernat u l-prodott simili. Ġie ddikjarat ukoll li din il-konklużjoni tkun kontradittorja billi diversi taqsimiet fid-dokument ta’ żvelar iddeskrivew kif l-industrija tal-Unjoni hi kkonċentrata lejn il-firxa medja sa dak superjuri. Din is-sejba tqieset diffiċli biex tiġi rikonċiljata mal-konklużjoni li l-industrija tal-Unjoni tikkonpeti mal-prodotti ta’ kwalità baxxa miċ-Ċina u l-Vjetnam. Waħda mill-partijiet interessati qieset li l-Kummissjoni naqset milli tagħti definizzjoni ta’ dawk li għandhom jitqiesu bħala prodotti ta’ kwalità għolja, medja u baxxa u ddikjarat li ma ġiet ipprovduta l-ebda evidenza li turi li l-industrija tal-Unjoni kienet fil-fatt qed tgħolli l-kwalità tal-prodotti.

(379)

Waħda mill-partijiet interessati qieset li l-Kummissjoni naqset milli tqis l-impatt tal-bidla fil-konsum u tal-kriżi fuq l-industrija tal-Unjoni. B’mod partikolari tqies li l-Kummissjoni kkonkludiet b’mod żbaljat li l-prezzijiet tal-importazzjoni kienu se jonqsu b’konsegwenza tal-kriżi, meta l-iżviluppi reali fis-sitt xhur wara l-RIP urew tnaqqis fil-volumi u żieda fil-prezzijiet.

(380)

Waħda mill-partijiet interessati qieset li l-Kummissjoni ma pprovditx biżżejjed evidenza li turi li n-nuqqasijiet strutturali ma kinux ir-raġuni għall-problemi li qed tħabbat wiċċha magħhom l-industrija. Skont din il-parti, l-argument li skontu l-ħsara kienet teżisti wkoll għall-kumpaniji li kienu biddlu n-negozju, kellu jiġi miċħud għax tqies li bidla fil-mudell tan-negozju bħala tali ma tindikax neċessarjament li ma kienet teżisti l-ebda problema strutturali.

(381)

Minbarra l-kawżi l-oħra msemmija hawn fuq, waħda mill-partijiet interessati ddikjarat li l-Kummissjoni naqset milli teżamina fl-analiżi globali ta’ kawżi oħra, l-effetti tat-tfassil mill-ġdid tal-mudell tan-negozju fuq il-profitt tal-produtturi tal-Unjoni u l-effett tat-trasferiment fuq l-industrija tal-Unjoni kif ukoll l-effett tan-nuqqas ta’ ħaddiema tas-sengħa.

(382)

ċF’dan il-kuntest ta’ min ifakkar li kienet saret analiżi bir-reqqa u komprensiva ferm ta’ fatturi oħra fil-kuntest tar-reviżjoni. Ta’ min ifakkar ukoll, kif ġie konkluż fil-premessa (285), li dawn il-fatturi ġew analizzati meħuda flimkien kif ukoll individwalment u d-dikjarazzjoni li l-Kummissjoni kienet qed tuża approċċ ta’ iżolament, għalhekk, ma setgħetx tintlaqa’.

(383)

B’rabta mal-impatt ta’ importazzjonijiet minn pajjiżi terzi, l-investigazzjoni stabbiliet li hemm differenzi konsiderevoli fil-prezz tal-importazzjoni bejn il-pajjiżi kkonċernati u pajjiżi terzi oħra, li l-biċċa l-kbira minnhom għandhom prezzijiet medji ferm ogħla minn dawk tar-RPĊ u l-Vjetnam. Hu mfakkar mill-premessa (277) li dawn id-differenzi japplikaw ukoll għall-Indja, u meta mqabbla mar-RPĊ, anki għall-Indoneżja. Barra minn hekk, anki jekk wieħed iwarrab id-differenza fil-prezzijiet tal-importazzjoni, is-sehem mis-suq tal-Indja u l-Indoneżja huwa biss 8 % u 5 % rispettivament, kif imqabbel mas-sehem mis-suq ta’ 29 % tar-RPĊ u l-Vjetnam. F’termini ta’ volumi, l-impatt tal-importazzjonijiet, għaldaqstant, ma jiksirx il-konnessjoni każwali.

(384)

Il-premssa (265) tipprovdi analiżi komprensiva fir-rigward tal-kompetizzjoni bejn iż-żraben importati mill-pajjiżi kkonċernati u dawk prodotti fl-Unjoni. F’dan il-kuntest, wieħed jista’ jżid biss li s-sejbiet dwar il-kumpaniji inklużi fil-kampjun li kienu biddlu l-mudell tan-negozju wrew biċ-ċar li din il-parti tal-industrija kienet qed tersaq lejn firxa ta’ prodotti ta’ kwalità ogħla. Ġiet stabbilita wkoll preżenza sinifikanti ta’ importazzjonijiet li huma oġġett ta’ dumping fil-firxiet medji/superjuri. Fil-fajl mhux kunfidenzjali ġiet ipprovduta wkoll evidenza dwar it-tipi ta’ prodotti mmanifatturati fl-Unjoni kif ukoll dawk tal-importazzjonijiet. Kif diġà ġie stabbilit fl-investigazzjoni preċedenti, il-firxa “medja/superjuri” tirrifletti essenzjalment prodotti tad-ditta bi prezz bl-imnut ogħla. Il-firxiet baxxi jirriflettu prodotti mhux tad-ditta bi prezzijiet aktar baxxi. Meta jitqies dan ta’ hawn fuq, id-dikjarazzjoni li l-analiżi tal-kompetizzjoni bejn il-prodotti kienet nieqsa minn bażi fattwali, ma tistax tintlaqa’.

(385)

Kif jidher fil-premessa (278) u aktar ‘il quddiem, saret analiżi komprensiva dwar l-impatt tal-bidla fix-xejriet tal-konsum. Fir-rigward tal-impatt tal-kriżi ekonomika, fl-investigazzjoni ngħatat attenzjoni biex jiġi żgurat li l-effett tat-tnaqqis fir-ritmu ekonomiku ma jkunx attribwit għall-importazzjonijiet li huma oġġett ta’ dumping. F’dan il-kuntest, wieħed għandu l-ewwel nett jenfasizza li l-RIP, li fuqu kienet ibbażata l-analiżi tal-ħsara, ikopri perjodu qabel il-kriżi. Għaldaqstant, l-effett tat-tnaqqis fir-ritmu ekonomiku ma kienx rifless fl-analiżi tal-RIP. Meta jitqies il-fatt li għadd ta’ partijiet interessati argumentaw li l-kriżi ekonomika, aktar milli l-importazzjonijiet li huma oġġett ta’ dumping, kienet fil-qalba tal-problemi li qed tħabbat wiċċha magħhom l-industrija tal-Unjoni, madankollu, twettqet ukoll analiżi addizzjonali li eżaminat b’mod partikolari l-avvenimenti wara l-RIP. Iż-żieda fil-prezzijiet tal-importazzjoni fil-perjodu ta’ sitt xhur wara l-RIP ma tiċħadx il-konklużjoni kif spjegata fil-premessa (302) li t-tnaqqis fir-ritmu ekonomiku jista’ jkabbar l-effett tad-dumping. Il-pressjoni mistennija fuq il-prezzijiet tkun tapplika fuq il-livelli kollha, mhux l-inqas fil-livell tal-imnut. Fid-dawl ta’ dak li ntqal hawn fuq, id-dikjarazzjoni li l-effett tat-tnaqqis fil-konsum u tat-tnaqqis fir-ritmu ekonomiku ma kienx meqjus, ma tistax tintlaqa’.

(386)

Fid-dokument ingħatat analiżi estensiva tal-qagħda tal-industrija tal-Unjoni, b’rabta mal-bidla tal-mudell tan-negozju u l-effiċjenza. F’dan il-kuntest, wieħed għandu jżid li l-effett tal-bidla tal-mudell tan-negozju jista’ jidher biċ-ċar fix-xejra li qed titjieb tal-indikaturi ta’ ħsara ta’ dan il-grupp ta’ kumpaniji. It-titjib fir-relazzjoni bejn l-ispejjeż u l-prezzijiet wera li dan il-mudell ġdid tan-negozju kien imfassal fuq l-effiċjenza u huwa vijabbli. Għaldaqstant, id-dikjarazzjoni li l-bidla fil-mudell tan-negozju ma jipprovdix evidenza tal-effiċjenza tal-industrija Komunitarja ma tistax tintlaqa’.

(387)

Fl-aħħar nett ta’ min ifakkar li bil-maqlub ta’ dak li ġie ddikjarat, l-impatt tal-bidla fil-mudell tan-negozju fuq il-profitabbiltà, il-bejgħ u l-produzzjoni ġie analizzat u ġie meqjus meta ġiet ivvalutata d-dikjarazzjoni li l-industrija tal-Unjoni ġarrbet problemi strutturali. Bl-istess mod, kif spjegat hawn fuq fil-premessa (23), l-analiżi qieset ukoll il-mudell tan-negozju li jikkostitwixxi t-trasferiment. Madankollu, saret ukoll valutazzjoni taħt it-taqsima dwar l-interess tal-Unjoni tal-qagħda tal-importaturi u l-bejjiegħa bl-imnut u d-dejta kollha mogħtija mill-uniku produttur li kkoopera eskluż mid-definizzjoni tal-industrija tal-Unjoni ġiet analizzata bir-reqqa. Fir-rigward tad-dikjarazzjoni mhux sostanzjata li n-nuqqas ta’ ħaddiema tas-sengħa huma l-kawża tal-problemi li qed tgħaddi minnhom l-industrija tal-Unjoni, dan l-argument diġà ġie indirizzat fil-premessa (244) u għalhekk mhijiex meħtieġa kjarifka ulterjuri. Fid-dawl ta’ dak li ntqal hawn fuq, id-dikjarazzjoni li l-Kummissjoni naqset milli tqis fatturi oħra għandha tiġi miċħuda.

(388)

Skont l-Artikolu 21 tar-Regolament bażiku, ġie eżaminat jekk iż-żamma tal-miżuri anti-dumping tmurx kontra l-interess tal-Unjoni in ġenerali. Id-determinazzjoni tal-interess tal-Unjoni kienet ibbażata fuq apprezzament tad-diversi interessi involuti, i.e. dawk tal-industrija tal-Unjoni, produtturi, importaturi, bejjiegħa bl-imnut/distributuri oħra tal-Unjoni u konsumaturi.

(389)

Sabiex jiġi evalwat l-impatt tal-kontinwazzjoni jew it-terminazzjoni tal-miżuri, il-Kummissjoni talbet informazzjoni mill-partijiet interessati rilevanti kollha. Għalkemm mhux strettament neċessarju mill-aspett legali, iżda meta wieħed iqis il-kumplessità tal-każ, ġie meqjus xieraq li tinġabar, meta possibbli, informazzjoni oħra minn firxa wiesgħa ta’ angoli milli hu normali fil-prattika tal-Unjoni. Dan ippermetta lill-awtorità tal-investigazzjoni li tagħmel kontraverifika tal-validità tas-sejbiet. Fejn tidħol l-industrija tal-Unjoni, mhux biss il-kumpaniji inklużi fil-kampjun f’din l-investigazzjoni tar-reviżjoni tal-iskadenza ġew mitluba li jipprovdu dejta speċifika iżda wkoll prodotturi oħra tal-Unjoni. Flimkien, il-kummenti tal-14-il prodottur tal-Unjoni kif ukoll l-informazzjoni provduta minn disa’ assoċjazzjonijiet tal-industrija tax-xedd tas-saqajn setgħu jitqiesu. Kwestjonarji dwar it-teħid ta’ kampjuni ntbagħtu lil 139 kumpanija li jew kienu magħrufa li huma jew kienu mniżżla fit-talba bħala importaturi tal-prodott ikkonċnernat. Diversi oħrajn irċevew kwestjonarju fuq talba tagħhom. 21 importatur imlew dan il-kwestjonarju tat-teħid tal-kampjuni u wrew xewqa li jkunu inklużi fil-kampjun. Kwestjonarji speċifiċi għall-iskop ta’ dan l-analiżi ntbgħatu wkoll lil assoċjazzjonijiet tal-importaturi kif ukoll lil bejjiegħa bl-ingrossa, distributuri, bejjiegħa bl-imnut u l-assoċjazzjonijiet tagħhom. F’dan il-kuntest, ġew irċevuti tmien risposti. Finalment, l-assoċjazzjonijiet tal-konsumatur ġew ikkuntattjati wkoll b’mistoqsijiet speċifiċi. Tlieta minnhom wieġbu lura.

(390)

Il-fatt li l-investigazzjoni preżenti hi reviżjoni, li għaldaqstant qed tanalizza sitwazzjoni fejn miżuri anti-dumping diġà seħħew, tippermetti l-valutazzjoni ta’ kwalunkwe impatt negattiv mhux dovut fuq il-partijiet ikkonċernati bil-miżuri anti-dumping attwali. Fuq il-bażi ta’ dak li ssemma, ġie eżaminat jekk, minkejja l-konklużjonijiet dwar il-kontinwazzjoni tad-dumping u l-ħsara, kienx hemm raġunijiet konvinċenti li jwasslu għall-konklużjoni li ma kienx fl-interess tal-Unjoni li jinżammu l-miżuri f’dan il-każ partikolari.

(391)

F’dak li jikkonċerna l-industrija tal-Unjoni kif stabbilit fit-taqsimiet G.2, G.3 u G.4, l-investigazzjoni wriet li parti konsiderevoli tal-produtturi tal-Unjoni kienet kapaċi li tibbenefika mill-impożizzjoni tal-miżuri. Il-waqgħa ekonomika li nstabet fl-investigazzjoni oriġinali u li wasslet għall-impożizzjoni ta’ miżuri anti-dumping definittivi twaqqfet hekk kif it-telfien kontinwu tas-sehem tas-suq, profitti u impjieg ġew fi tmiemhom. Din l-istabbilizzazzjoni tas-sitwazzjoni tal-industrija tal-Unjoni hi fil-fatt meqjusa bħala titjib importanti peress li turi li f’perjodu taż-żmien qasir, parti kbira mill-produtturi tal-Unjoni tista’ treġġa’ lura t-tendenza qawwija ‘l isfel osservata qabel l-impożizzjoni ta’ dawn il-miżuri. Fil-fatt, ir-reviżjoni żvelat li għad hemm produzzjoni/importazzjoni importanti tax-xedd tas-saqajn bil-partijiet ta’ fuq tal-ġilda fl-Unjoni, li jammontaw għal madwar 360 miljun par żarbun fl-RIP u li jipprovdu impjieg għal madwar 260 000 persuna. Qed jiġi mfakkar li l-maġġoranza vasta ta’ dawn il-produtturi huma kumpaniji ta’ daqs żgħir sa medju li huma essenzjali għall-prosperità f’ċertu reġjuni. Proporzjon konsiderevoli ta’ dawk il-produtturi żviluppaw mudelli tan-negozju li żiedu l-kompetittività tagħhom pereżempju billi gradwalment imxew ‘il fuq fis-suq, billi kkonċentraw fuq prodotti ta’ valur ogħla, bil-ħolqien ta’ ditti, bl-organizzazzjoni tal-kanali tad-distribuzzjoni tagħhom, bil-ħolqien ta’ netwerks ta’ kooperazzjoni fil-viċinanza tagħhom jew band’oħra, kif deskritt fil-premessi (201) et seqq. Fir-rigward tal-parti li għadha konsiderevoli, iżda li qed tonqos, tal-industrija tal-Unjoni li s-sitwazzjoni tagħha baqgħet tiddeterjora fl-aspetti kollha, minkejja l-impożizzjoni tal-miżuri, dawn ibbenefikaw mill-miżuri safejn il-miżuri evitaw deterjorazzjoni saħansitra iżjed rapida u falliment potenzjali, billi pprovdewhom bi żmien prezzjuż biex jadattaw għall-kundizzjonijiet tas-suq li dejjem jinbidlu.

(392)

Min-naħa l-oħra, l-investigazzjoni wriet li wara sentejn ta’ miżuri, l-industrija tal-Unjoni għadha f’sitwazzjoni globalment fraġli u vulnerabbli għall-effett tal-importazzjonijiet li huma oġġett ta’ dumping li qed inaqqsu l-prezzijiet tal-industrija tal-Unjoni kif elaborat fil-premessa (259) et seqq.

(393)

Fil-qosor, l-industrija bbenefikat mill-miżuri u wriet il-kapaċità tagħha li ttejjeb is-sitwazzjoni u l-vijabbiltà tagħha hekk kif il-miżuri jnaqqsu l-effetti tad-dumping ta’ ħsara.

(394)

F’dan ir-rigward, diversi partijiet interessati allegaw u tennew wara l-iżvelar tas-sejbiet definittivi li l-miżuri ma kellhomx l-effett mixtieq li jġibu lura parti mis-sehem tas-suq jew mill-produzzjoni lill-produtturi tal-Unjoni, iżda primarjament kienu ta’ benefiċċju għal produtturi ta’ pajjiżi terzi. Qed jiġi osservat li, kif muri fit-tabella 10, is-sehem tas-suq tal-industrija tal-Unjoni baqa’ stabbli filwaqt li s-sehem tas-suq tal-importazzjonijiet minn pajjiżi oħra żdied konsiderevolment. Għaldaqstant, mid-dejta bażika diġà ntwera li l-industrija tal-Unjoni stabbilizzat il-pożizzjoni tagħha fuq is-suq minn meta ġew imposti l-miżuri anti-dumping. Fuq sfond ta’ bejgħ u ishma tas-suq li qegħdin dejjem jonqsu kif imsemmi fl-investigazzjoni oriġinali, stabilizzazzjoni f’livell ta’ ca. 40 % tas-sehem tas-suq għandha titqies bħala suċċess importanti għall-industrija tal-Unjoni. Madankollu, qed jiġi sottolineat li miżuri anti-dumping mhumiex imposti biex joħolqu l-impjieg fl-UE jew biex fl-aħħar mill-aħħar iġibu lura l-produzzjoni lejn l-UE (jew biex iwaqqfu l-importazzjonijiet), iżda biex jinġiebu kundizzjonijiet indaqs bejn prodotti tal-UE u l-importazzjonijiet li huma oġġett ta’ dumping. Miżuri anti-dumping huma imposti biss bl-għan li jiġu restawrati l-kundizzjonijiet tal-kummerċ ħieles fis-suq tal-Unjoni u biex għaldaqstant jippermettu li l-produtturi tal-Unjoni jirkupraw billi jew iżidu l-bejgħ tagħhom u/jew billi jżidu l-prezzijiet tagħhom għal livelli sostenibbli. Barra minn hekk, kif stabbilit fit-tabella 8, dawn l-importazzjonijiet minn pajjiżi terzi kellhom prezz medju tal-importazzjoni konsiderevolement ogħla jew kienu magħmula f’volumi relattivament baxxi sabiex l-effett tagħhom fuq il-produtturi tal-Unjoni jinħass inqas. Bħala konklużjoni, il-produtturi tal-UE bbenefikaw mill-impożizzjoni tal-miżuri għax it-telfien kontinwu tas-sehem tas-suq twaqqaf, stabilizzaw il-volumi tal-bejgħ tagħhom u rnexxielhom iżidu l-profitti u l-prezzijiet tal-bejgħ tagħhom. Fid-dawl ta’ dan, l-argument ma ġiex aċċettat.

(395)

Jekk il-miżuri jinżammu, jista’ jkun mistenni li l-industrija tal-Unjoni tkompli tibbenefika mill-miżuri billi mill-inqas iżżomm il-pożizzjoni tas-suq relattiv tagħha u tkompli ttejjibha hekk kif jingħelbu l-effetti negattivi tat-tnaqqis fir-ritmu ekonomiku. Matul it-tnaqqis fir-ritmu ekonomiku, il-miżuri aktarx li jgħinu biex itaffu l-effett tal-ammont konsiderevoli ta’ importazzjonijiet li huma oġġett ta’ dumping, ta’ prezz baxx billi jevitaw fluss ieħor ta’ importazzjonijiet kif kien osservat qabel ma ġew imposti l-miżuri, partikolarment fl-2005 wara li skadew il-kwoti. Meta wieħed iqis li l-kompetizzjoni żdiedet fis-setturi tal-prodotti, i.e. minħabba tendenzi tal-moda li rriżultaw fl-użu interkambjabbli ta’ tipi ta’ prodotti, il-miżuri jgħinu wkoll biex jipproteġu prodotti manifatturati fil-Unjoni milli jħallu importazzjonijiet li huma oġġett ta’ dumping li jidħlu fis-settur tal-prodott tagħhom. Fil-fatt, kif instab fl-investigazzjoni, anke ċerti produtturi fil-pajjiżi kkonċernati mxew ‘il fuq, billi bdew jipproduċu iżjed żraben ta’ livell medju sa għoli. Dan għandu jippermetti li l-industrija tal-Unjoni żżomm il-pożizzjonar relattiv tagħha u għaldaqstant iżżomm rata ta’ impjieg konsiderevoli.

(396)

Jista’ jkun mistenni wkoll li bit-titjib fil-kundizzjonijiet ekonomiċi u biż-żieda fil-konsum, in-nies ikunu lesti li jonfqu iżjed fuq xedd tas-saqajn u b’mod partikolari fuq xedd tas-saqajn b’valur ogħla, biex b’hekk jibbenefikaw iżjed il-produtturi tal-UE. F’dan ix-xenarju, il-kontinwazzjoni tal-miżuri għandha tippermetti li parti li qed tiżdied tal-produtturi tal-Unjoni (jibqgħu) jiżviluppaw il-mudelli tan-negozju, il-proċess tal-produzzjoni u l-kanali tad-distribuzzjoni tagħhom u b’hekk itejbu s-sitwazzjoni finanzjarja tagħhom gradwalment, kif intwera matul il-perjodu tal-investigazzjoni tar-reviżjoni.

(397)

Jekk il-miżuri jiskadu, hu mistenni li l-kompetizzjoni diġà ħarxa, b’mod partikolari fis-settur ta’ livell medju/baxx, għandha tiġi rinforzata konsiderevolment. Ikun mistenni wkoll li din il-kompetizzjoni miżjuda fuq il-prezzijiet fis-settur ta’ kwalità baxxa u medja jkollha effett dirett fuq il-prezzijiet tal-istili l-oħra kollha. Dan imbagħad aktarx li jipperikola wkoll il-grupp kbir ta’ produtturi tal-Unjoni li rnexxielhom jirridefinixxu l-mudell tan-negozju tagħhom u li jtejbu s-sitwazzjoni tagħhom. Peress li s-sitwazzjoni finanzjarja u l-profittabilità ta’ dawn il-produtturi mhumiex robusti biżżejjed biex jifilħu għall-pressjoni fuq il-prezzijiet eżerċitata minn ammonti kbar ta’ importazzjonijiet oġġetti ta’ dumping li konsiderevolment naqqsu l-prezzijiet tal-industrija tal-Unjoni għal perjodu taż-żmien estiż, dan aktarx li jwassal għal ħafna produtturi oħra li jgħibu u għal telfien konsiderevoli ta’ impjieg dirett ta’ produtturi tal-UE u fornituri ta’ oġġetti u servizzi għall-industrija tal-Unjoni.

(398)

Sabiex tinkiseb stampa iżjed sħiħa tal-interess tal-manifatturi tal-Unjoni u lil hinn mill-analiżi standard tal-impatt fuq l-industrija tal-Unjoni in ġenerali, inġabret informazzjoni addizzjonali permezz tal-assoċjazzjonijiet tal-industrija tax-xedd tas-saqajn u l-kumpaniji inklużi fil-kampjun fl-investigazzjoni oriġinali. Barra minn hekk, produttur wieħed li koopera li kien ġie eskluż mill-industrija tal-Unjoni iżda li għad għandu produzzjoni konsiderevoli fl-UE ssottometta l-opinjonijiet tiegħu.

(399)

L-informazzjoni addizzjonali miġbura mill-assoċjazzjonijiet tax-xedd tas-saqajn nazzjonali wriet stampa mħallta, dipendenti l-iżjed fuq jekk hemmx produzzjoni tax-xedd tas-saqajn konsiderevoli fl-Istat Membru li fadal jew jekk il-pajjiż kellux interessi tal-importazzjoni importanti. Filwaqt li ħames assoċjazzjonijiet nazzjonali bi produzzjoni tax-xedd tas-saqajn importanti appoġġjaw il-kontinwazzjoni tal-miżuri u wrew il-benefiċċji tal-miżuri għall-produtturi tax-xedd tas-saqajn nazzjonali tagħhom, erba’ assoċjazzjonijiet oħra li jirrappreżentaw pajjiżi fejn il-produzzjoni tax-xedd tas-saqajn hi fil-biċċa l-kbira tagħha jew kollha kemm hi trasferita lejn pajjiżi terzi jew b’kapaċità tal-produzzjoni importanti iżda wkoll b’importazzjonijiet konsiderevoli, qalu li l-kontinwazzjoni tal-miżuri in ġenerali tmur kontra l-interess tal-Unjoni. L-assoċjazzjonijiet imsemmija l-aħħar irrappreżentaw iżjed kumpaniji li kienu qed jimpurtaw jew jiddistribwixxu/ibiegħu bl-imnut sa estent konsiderevoli. Għaldaqstant, l-opinjonijiet tagħhom ġew ikkunsidrati wkoll taħt il-premessi li jitrattaw mal-interessi ta’ importaturi u bejjiegħa bl-imnut mhux relatati msemmija hawn taħt. Bħala bilanċ, il-volum totali tal-produzzjoni li kien jammonta għal dawn l-erba’ assoċjazzjonijiet kien konsiderevolment iżjed baxx minn dak tal-ħames assoċjazzjonijiet li argumentaw li l-miżuri kienu jibbenefikaw lill-manifatturi.

(400)

Barra minn hekk, il-produtturi tal-Unjoni li kienu inklużi fil-kampjun fl-investigazzjoni oriġinali ġew ikkuntattjati wkoll sabiex jikkumplimentaw l-istampa u janalizzaw uħud mill-allegazzjonijiet magħmula li l-industrija tal-Unjoni kienet għebet u għaldaqstant ma bbenefikatx mill-impożizzjoni tal-miżuri. Din il-ġabra ta’ informazzjoni addizzjonali mill-produtturi tal-Unjoni inklużi fil-kampjun qabel kienet ġustifikata wkoll taħt l-aspetti tal-interess tal-Unjoni għax is-settur tax-xedd tas-saqajn fl-Unjoni jappartjeni għal industrija li hi tant maqsuma u eteroġenja li l-kampjun tal-ħsara hu inevitabbilment żgħir.

(401)

Din il-ħarsa lejn is-sitwazzjoni tal-produtturi tal-Unjoni inklużi fil-kampjun ta’ qabel kienet tindika li l-kumpaniji kollha li kkooperaw fl-investigazzjoni oriġinali żammew parti konsiderevoli tal-produzzjoni tagħhom fl-Unjoni. In ġenerali, kienu favorevoli għall-kontinwazzjoni tal-miżuri anti-dumping u indikaw l-effett pożittiv tagħhom għall-impjieg fil-Unjoni. Fl-istess ħin, ħafna minnhom parzjalment iddelokalizzaw partijiet mill-produzzjoni taż-żraben tagħhom barra mill-Unjoni inkluż wieħed mill-pajjiżi kkonċernati u segwew soluzzjonijiet kumplimentari fl-istrateġija tan-negozju tagħhom sabiex itejbu l-kompetittività. Dawk li jibqgħu jipproduċu biss ġewwa l-Unjoni jispeċjalizzaw fi prodotti ta’ livell u kwalità ogħla bi żmien tal-produzzjoni relattivament qasir. Ir-risposti ta’ dawk il-produtturi li kienu ġew inklużi fil-kampjun ta’ qabel ikkonfermaw li, kif ġie deskritt fil-parti tal-ħsara għall-produtturi tal-Unjoni inklużi fil-kampjun, ġew żviluppati mudelli tan-negozju differenti u wħud mill-produtturi tal-Unjoni adattaw għaċ-ċirkostanzi tas-suq li jinbidlu b’numru ta’ azzjonijiet, inkluż it-trasferiment ta’ parti mill-produzzjoni lejn pajjiżi terzi u/jew fi ħdan l-Unjoni, il-bidla tal-kanali tal-bejgħ, l-investiment fil-kwalità u l-immaġni tad-ditta eċċ. Dawn ir-risposti kkonfermaw ukoll l-istampa ġenerali deskritta hawn fuq dwar il-benefiċċji taż-żamma tal-miżuri u l-iżvantaġġi tat-tħassir tagħhom għall-industrija tal-Unjoni.

(402)

Fl-aħħar nett, sabiex ikun hemm stampa iżjed kompluta tal-interessi tal-manifattura fl-Unjoni, ġiet analizzata wkoll ir-risposta mill-produttur eskluż mid-definizzjoni tal-industrija tal-Unjoni. Dan kien issottometta risposta konsolidata tal-attivitajiet Ewropej tagħha kollha kif ukoll risposti speċifiċi miż-żewġ operazzjonijiet tal-manifattura Ewropej tiegħu. Dan il-produttur kien oppona t-talba tar-reviżjoni għax kienet kontra l-kontinwazzjoni tal-miżuri anti-dumping in kwistjoni.

(403)

Il-kumpanija għandha żewġ faċilitajiet tal-produzzjoni fl-Unjoni li huma operazzjonijiet tal-immuntar, li jużaw il-partijiet ta’ fuq taż-żraben li jkunu ġew manifatturati fl-Asja. Minkejja dan, il-volumi tal-produzzjoni ta’ dawn iż-żewġ impjanti naqsu konsiderevolment bejn l-2005 u l-RIP. Filwaqt li fl-2005, ix-xedd tas-saqajn impurtat kien jirrappreżenta inqas minn nofs il-volumi taż-żraben mibjugħin minn din il-kumpanija, dan il-perċentwal żdied konsiderevolment sal-RIP li fih il-maġġoranza tax-xedd tas-saqajn mibjugħ mill-kumpanija kienet xirja diretta mill-Asja. Intelliġenza tas-suq iżjed riċenti tindika li l-kumpanija qed tkompli tnaqqas l-attivitajiet tal-produzzjoni tagħha fl-Unjoni u tibdel dawn il-kwantitajiet bl-importazzjonijiet.

(404)

Għalkemm il-kumpanija kienet konsiderevolment naqqset l-attivitajiet tal-manifattura tagħha fl-Unjoni, dan kien irriżulta biss fi tnaqqis ħafif fl-impjieg ġenerali fi ħdan l-Unjoni. Kien jidher li, mill-2005, il-kumpanija kienet żiedet id-dħul globali tagħha u żiedet konsiderevolment il-profitti tagħha. Dan kien wassal għal iżjed impjiegi fl-Unjoni f’oqsma oħra barra dak tal-manifattura (amministrazzjoni, disinn u żvilupp, tqegħid fis-suq u bejgħ, eċċ.). Mill-informazzjoni disponibbli, kien jidher li filwaqt li d-dazji anti-dumping kellhom impatt negattiv fuq ir-riżultati finanzjarji tal-kumpanija, ma kinux tant konsiderevoli għax il-profitt ġenerali tjieb. L-eżistenza ta’ miżuri anti-dumping ma kinitx tostakola l-kumpanija milli tibqa’ għaddejja bit-trasferiment tal-produzzjoni lejn pajjiżi terzi, inklużi lejn il-pajjiżi kkonċernati. Min-naħa l-oħra, l-impożizzjoni ta’ miżuri ma wasslitx lill-kumpanija li żżid l-attivitajiet tal-produzzjoni tagħha fl-Unjoni lanqas. Għaldaqstant, id-deċiżjonijiet strateġiċi dwar l-attivitajiet tal-produzzjoni jidhru li ttieħdu fuq il-bażi ta’ kunsiderazzjonijiet tal-ispejjeż usa’.

(405)

Jekk il-miżuri jinżammu, il-kumpanija aktarx tibqa’ tiġi affetwata mid-dazji anti-dumping, għax aktarx li tibqa’ timporta mill-pajjiżi kkonċernati. L-isfera ta’ dan l-impatt negattiv tad-dazji aktarx se jibqa’ ma jkunx konsiderevoli, peress li l-kumpanija tista’ tiddiversifika s-sorsi tal-importazzjoni tagħha, kif għamlet fil-passat. Jekk il-miżuri jitħassru, mill-banda l-oħra, il-kumpanija tibbenefika minħabba l-importazzjonijiet tagħha mill-pajjiżi kkonċernati u tista’ aktarx tkompli żżid il-profitti tagħha.

(406)

B’konklużjoni, analiżi raffinata ta’ produtturi oħra tal-Unjoni tikkonferma s-sejbiet ġenerali, i.e. il-produtturi żviluppaw diversi mudelli tan-negozju u ħafna minnhom dehru li bbenefikaw mill-impożizzjoni ta’ miżuri anti-dumping, għax irrappurtaw li kellhom titjib ħafif tas-sitwazzjoni tagħhom u żiedu l-kompetittività tagħhom billi adattaw, inter alia, l-istrateġiji tal-produzzjoni u l-kanali tal-bejgħ. Għaldaqstant, l-informazzjoni disponibbli tissuġġerixxi li ħafna minn dawn il-produtturi għandhom ikomplu jibbenefikaw miż-żamma tal-miżuri mill-inqas safejn hi kkonċernata d-deċiżjoni tagħhom li jinżammu l-attivitajiet tal-produzzjoni fl-UE. Min-naħa tagħhom, dawn il-produtturi jsofru wkoll jekk il-miżuri jiskadu għax l-importazzjonijiet li huma oġġett ta’ dumping mill-pajjiżi kkonċernati jeżerċitaw pressjoni ‘l isfel fuq il-prezzijiet fuq is-setturi kollha tal-prodotti li jipproduċu huma.

(407)

L-effetti negattivi fuq xi produtturi li jkunu għamlu trasferiment tal-produzzjoni lejn il-pajjiżi kkonċernati aktarx jibqgħu ma jkunux sproporzjonati, kif intwera fil-passat u peress li l-miżuri ma fixklux lil dawn il-produtturi milli jibqgħu jagħmlu trasferiment lejn il-pajjiżi kkonċernati. Għaldaqstant, l-impatt tad-dazji anti-dumping fuq dawn il-produtturi tkun tiddependi l-iżjed fuq id-deċiżjoni tal-akkwisti tagħhom. Għalhekk, ikun f’idejn il-kumpaniji li jġestixxu l-impatt tad-dazji anti-dumping.

(408)

L-investigazzjoni tar-reviżjoni kkonfermat li tista’ ssir distinzjoni bejn żewġ kategoriji ewlenin ta’ importaturi. Kategorija waħda tikkonsisti f’kumpaniji li jimpurtaw u jbiegħu mill-ġdid iż-żraben tad-ditta tagħhom, li l-produzzjoni tagħhom tkun ġejja minn trasferiment f’pajjiżi terzi. Dawn il-kumpaniji normalment ikollhom attivitajiet konsiderevoli fl-Unjoni, eż. fid-disinn, ir-riċerka u l-iżvilupp, l-akkwist ta’ materja prima, u xi drabi anke l-katina tad-distribuzzjoni tagħhom. Minn dan isegwi li din il-kategorija ta’ importaturi għandha attivitajiet “li jżidu l-valur” il-Unjoni fejn normalment iħaddmu numru relattivament għoli ta’ nies. It-tieni kategorija tikkonsisti f’importaturi li huma negozjanti puri li n-negozju tagħhom hu iżjed iffokat fuq volumi u inqas fuq ditti – dawn jinnegozjaw l-iżjed fi żraben b’“tikketta privata”. Dawn l-importaturi in ġenerali għandhom spejjeż strutturali iżjed baxxi u inqas attivitajiet bil-valur miżjud fl-Unjoni.

(409)

Instab li fi ħdan dawn iż-żewġ kategoriji ewlenin, hemm mudelli tan-negozju differenti. Pereżempju, fl-ewwel kategorija wieħed jista’ jiddistinwgi bejn ditti ta’ oriġini Ewropea, iżda wkoll ditti mhux Ewropej, u xedd tas-saqajn formali kif ukoll xedd tas-saqajn informali. Fit-tieni kategorija wieħed isib importaturi li għandhom il-ħwienet tal-bejgħ bl-imnut tagħhom, iżda wkoll importaturi li jbiegħu biss lil bejjiegħa bl-ingrossa/distributuri. Uħud mill-kumpaniji f’din it-tieni kategorija jinnegozjaw biss fi żraben bit-tikketta privata, iżda oħrajn ikollhom ukoll ftehim ta’ akkwisti speċifiċi ma’ ditti stabbiliti, u/jew ftehim ta’ liċenzjar, u/jew negozju bi sħab.

(410)

Minħabba d-diversità fost l-importaturi, kif deskritt hawn fuq, u sabiex tingħata stampa kompluta kemm jista’ jkun possibbli, is-sitwazzjoni tal-importaturi ġiet analizzata minn diversi angoli differenti. L-ewwel nett, il-kummenti rċevuti mill-importaturi u l-assoċjazzjonijiet tagħhom ġew analizzati. Barra minn hekk, id-dejta statistika kif ukoll il-pubblikazzjonijiet rilevanti ġew ukoll ikkonsultati u użati f’dan ir-rigward. Finalment, għal xi dejta ekonomika ewlenija, intużat l-informazzjoni vverifikata tal-kampjun tal-importaturi.

(411)

Kif imsemmi hawn fuq, għat-twaqqif ta’ xi dejta ekonomika ewlenija, ġie deċiż li jittieħed kampjun tal-importaturi. Din id-deċiżjoni ttieħdet fuq il-bażi tal-fatt li l-investigazzjoni oriġinali wriet li n-numru ta’ importaturi li kkooperaw kien għoli u ħafna minnhom kienu bagħtu risposta għall-kwestjonarju. Għaldaqstant tqies li hu xieraq, f’din ir-reviżjoni tal-iskadenza, li jiġi applikat it-teħid ta’ kampjuni.

(412)

Kif diġà ssemma fil-premessa (37), mill-21 importatur tal-Unjoni li prreżenta ruħu u li wera interess li jikkoopera fl-investigazzjoni, tmienja ġew inklużi fil-kampjun. Il-kampjun kien jikkonsisti fl-akbar ħames kumpaniji f’termini ta’ volum u valur tal-importazzjonijiet u l-bejgħ mill-ġdid fl-Unjoni flimkien ma’ ftit importaturi żgħar; dawn tal-aħħar sabiex ikollhom kampjun aktar rappreżentattiv tal-partijiet li joffru kooperazzjoni bil-mudelli tan-negozju differenti tagħhom, il-lokazzjoni ġeografika u s-setturi tal-prodott innegozjati. Il-kumpaniji iklużi fil-kampjun kienu jikkostitwixxu n-numru massimu ta’ kumpaniji li setgħu jiġu raġonevolment investigati fiż-żmien disponibbli. Skont iċ-ċifri disponibbli f’dak l-istadju tal-investigazzjoni, l-importaturi inklużi fil-kampjun kienu jammontaw għal madwar 18 % tal-importazzjonijiet tal-Unjoni tal-prodott ikkonċernat matul l-RIP. Waħda mill-kumpaniji inklużi fil-kampjun, għalkemm kienet indikat interess li tkun inkluża fil-kampjun, finalment ma rrispondietx il-kwestjonarju u l-isforzi kollha biex tiġi żgurata l-kooperazzjoni ta’ dan l-importatur żgħir kienu inutli. Għaldaqstant, din il-kumpanija eventwalment kellha tiġi eskluża mill-kampjun. Is-seba’ importaturi oħra inklużi fil-kampjun ikkooperaw b’mod sħiħ mal-investigazzjoni u bagħtu tweġibiet għall-kwestjonarju fil-limiti taż-żmien stipulati.

(413)

Kif imsemmi hawn fuq, id-dejta vverifikata tal-importaturi inklużi fil-kampjun, fuq bażi aggregata, ġiet, inter alia, permessa għal analiżi dettaljata ta’ ċertu parametri ekonomiċi ewlenin li, minħabba n-numru kbir ta’ operaturi, setgħet tinkiseb biss permezz tat-teħid ta’ kampjuni. Madankollu, l-analiżi tas-sitwazzjoni tal-importaturi ma ġietx limitata għall-informazzjoni provduta fil-qafas tal-eżerċiżzju tat-teħid ta’ kampjuni. L-istudji speċjalizzati tal-istampa u s-suq kif ukoll l-informazzjoni mitluba u rċevuta minn partijiet interessati ġew ikkunsidrati wkoll fl-analiżi tal-interess tal-Unjoni. L-użu ta’ din l-informazzjoni kompliet żgurat li l-mudelli tan-negozju ewlenin kollha attivi f’dan is-settur kienu rappreżentati biżżejjed fl-analiżi.

(414)

Fuq il-bażi tal-informazzjoni vverifikata tal-importaturi inklużi fil-kampjun u informazzjoni oħra fuq il-fajl, hu stmat li l-importazzjoni u l-bejgħ mill-ġdid lil distributuri/bejjiegħa bl-imnut tal-prodott ikkonċernat provdiet impjieg lil madwar 23 000 persuna fl-Unjoni matul l-RIP.

(415)

Kif ġie diġà rifless fit-tabella 4, id-dejta tal-Eurostat turi li, mill-2005, l-importazzjonijiet tal-prodott ikkonċernat naqsu konsiderevolment b’ca. 90 miljun par. Matul l-istess perjodu, l-importazzjonijiet taż-żraben tal-ġilda minn pajjiżi oħra żdiedu b’ca. 43 miljun par għal 201 miljun par. Ir-riżultat hu li, fejn fl-2005, il-volum tal-importazzjonijiet mir-RPĊ u l-Vjetnam kien ferm ogħla (+80 %) mill-volum tal-importazzjonijiet mill-pajjiżi l-oħra kollha, matul l-RIP, il-livell tal-importazzjonijiet minn pajjiżi oħra kien qabeż il-livell tal-importazzjonijiet mir-RPĊ u l-Vjetnam b’4 %. Id-dejta tal-Eurostat turi wkoll li mill-2005, l-importazzjonijiet ġenerali tal-prodott in kwistjoni naqas bi 11 %.

(416)

Importatur kbir li kkoopera mal-investigazzjoni li iżda ma pparteċipax fl-eżerċizzju tat-teħid ta’ kampjuni rraporta evoluzzjoni simili tal-importazzjonijiet. Din il-kumpanija ssottomettiet li x-xiri tagħha tal-prodott ikkonċernat naqas b’25 % mill-2005, filwaqt li l-importazzjonijiet taż-żraben tal-ġilda minn pajjiżi oħra naqsu konsiderevolment.

(417)

Fir-rigward tal-importaturi inklużi fil-kampjun, l-importazzjonijiet taż-żraben tal-ġilda matul il-perjodu 2005 - RIP żviluppaw kif ġej fit-termini tal-volumi:

Tabella 19

Volumi tal-importazzjoni tal-importaturi inklużi fil-kampjun (pari)

(418)

Skont id-dejta statistika ġenerali, l-importaturi inklużi fil-kampjun żiedu konsiderevolment ix-xirjiet taż-żraben tal-ġilda tagħhom minn pajjiżi oħra. Il-volumi tal-importazzjonijiet mir-RPĊ u l-Vjetnam baqgħu pjuttost stabbli mill-2005, b’ċertu tnaqqis fl-2007, iżda bl-irkupru fl-RIP għal kważi l-istess livell bħal fl-2005. Għaldaqstant isegwi li, fir-rigward tal-importaturi inklużi fil-kampjun, il-volum ġenerali tax-xedd tas-saqajn innegozjat żdied b’madwar 1/3 mill-2005, b’tendenza stabbli mill-pajjiżi kkonċernati, minkejja l-miżuri anti-dumping imposti, u tendenza li qed tiżdied minn pajjiżi terzi. Mill-pajjiżi terzi li jkunu bbenefikaw minn dawn il-volumi tal-importazzjoni miżjuda, l-Indoneżja u l-Indja bbenefikaw l-iżjed.

(419)

It-tendenza tax-xiri tal-kampjun mill-pajjiżi kkonċernati hi stabbli u ma tikkorispondix mat-tendenza osservata fil-Eurostat (tnaqqis konsiderevoli). Ħarsa mill-viċin lejn il-kampjun tissuġġerixxi li t-tendenza stabbli għall-importazzjonijiet mill-pajjiżi kkonċernati toħroġ mill-fatt li wieħed mill-akbar importaturi inklużi fil-kampjun – għall-kuntrarju tat-tendenza mhux biss tal-Eurostat iżda wkoll tal-importaturi l-oħra inklużi fil-kampjun – mhux biss żied sew ix-xirjiet tiegħu minn pajjiżi terzi iżda, sabiex jilħaq id-domanda, żied konsiderevolment ukoll l-importazzjonijiet tiegħu mill-pajjiżi kkonċernati, biex b’hekk kien hemm tpaċija tat-tendenza ġenerali tat-tnaqqis ta’ dawn l-importazzjonijiet fil-kampjun. Meta wieħed iqis dan, ġie konkluż li l-evoluzzjoni tal-importazzjonijiet tal-prodott in kwistjoni fil-kampjun hi konformi mal-analiżi kwantitattiva tal-bażi ta’ dejta tal-Eurostat, i.e. tnaqqis ġenerali tal-importazzjonijiet mill-pajjiżi kkonċernati.

(420)

Kif muri fit-tabelli 5 u 8, id-dejta tal-Eurostat tissuġġerixxi li l-prezzijiet medji tal-importazzjoni taż-żraben tal-ġilda mill-pajjiżi kkonċernati u l-pajjiżi terzi kienu żdiedu t-tnejn mill-2005, u l-prezzijiet tal-importazzjoni CIF taż-żraben tal-ġilda minn pajjiżi terzi anke ftit iżjed mill-prezzijiet tal-importazzjoni CIF taż-żraben tal-ġilda mill-pajjiżi kkonċernati. Madankollu, meta wieħed iqis li t-taħlita taż-żraben impurtati kellha impatt konsiderevoli fuq il-prezzijiet u li din it-taħlita għall-pajjiżi kollha tal-esportazzjoni setgħet inbidlet konsiderevolment, il-prezzijiet medji li jistgħu jiġu kkalkulati mill-volumi u l-valuri tal-Eurostat rappurtati mhumiex neċessarjament l-iżjed preċiżi biex jiġu stabbiliti t-tendenzi tal-prezzijiet. F’dan ir-rigward, it-tendenza tal-prezzijiet tal-kampjun tal-importaturi tista’ titqies li hi iżjed konsiderevoli għax it-taħlita tal-prodotti tal-importaturi aktarx li nbidlet inqas peress li dawk il-kumpaniji huma kollha speċjalizzati f’ċerti tipi u stili ta’ xedd tas-saqajn għal perjodu taż-żmien twil.

(421)

Kif deskritt fil-premessi (412) u (408) et seqq., l-importaturi inklużi fil-kampjun irrappreżentaw diversi mudelli tan-negozju differenti li rriżultaw, inter alia, f’differenzi konsiderevoli fil-prezzijiet medji għal kull importatur. Barra minn hekk, uħud mill-importaturi nnegozjaw ħafna miljuni ta’ pari kull sena, filwaqt li oħrajn innegozjaw “biss” ftit mijiet t’eluf ta’ pari fis-sena. It-tielet nett, għal uħud mill-importaturi individwali, il-volumi nnegozjati – u, għaldaqstant, il-piż tagħhom fil-kampjun – iċċaqlaq ħafna matul il-perjodu kkunsidrat. Għal dawk ir-raġunijiet, ġie meqjus li r-riżultati medji kkalkulati għandhom jiġu kumplimentati b’analiżi medja tal-aritmetika sabiex tinkiseb stampa kompluta tat-tendenzi rilevanti.

(422)

Il-prezzijiet medji tal-importazzjoni tal-importaturi inklużi fil-kampjun matul il-perjodu 2005-RIP kienu dawn li ġejjin:

Tabella 20

Prezzijiet medji tal-importazzjoni ta’ importaturi inklużi fil-kampjun (EUR)

(423)

Analiżi tal-prezzijiet tal-importazzjoni CIF mir-RPĊ u l-Vjetnam mill-2005, i.e. l-aħħar sena mingħajr miżuri anti-dumping, sa ma l-RIP turi żieda bi 2 % (medja aritmetika) jew tnaqqis b’9 % (medja kkalkulata). In ġenerali, id-dejta analizzata turi prezzijiet tal-importazzjoni stabbli jew li jonqsu ftit qabel id-dazji tal-importazzjoni u anti-dumping. Fiż-żewġ xenarji, il-prezzijiet tal-importazzjoni qabel id-dazji żdiedu ħafna fl-2006 u naqsu wara.

(424)

Fl-istess żmien, il-prezzijiet tal-importazzjoni CIF taż-żraben tal-ġilda minn pajjiżi oħra waqgħu taħt iż-żewġ evalwazzjonijiet (-20 % sa -6 %). B’konsegwenza ta’ dan, il-qabża bejn il-prezz tal-importazzjoni ta’ żraben tal-ġilda qabel id-dazji mill-pajjiżi kkonċernati u pajjiżi oħra naqset, bejn wieħed u ieħor minn EUR 2,00 għal kull par għal EUR 1,00 (f’perċentwali: minn ca. 20 % għal ca. 10 % - medji aritmetiċi) jew minn EUR 2,00 għal EUR 0,50 (f’perċentwali: minn ca. 20 % għal ca. 5 % - medji kkalkulati). Id-dazji anti-dumping huma miżjuda biss fil-każ tar-RPĊ u l-Vjetnam. Il-prezzijiet tal-iżbark medji (i.e. prezzijiet tal-importazzjoni inklużivi tal-ispejjeż tal-importazzjoni, id-dazji tal-importazzjoni u, jekk applikabbli, id-dazji anti-dumping) taż-żraben tal-ġilda mir-RPĊ u l-Vjetnam min-naħa l-waħda u minn pajjiżi oħra min-naħa l-oħra issa jistgħu jitqiesu li huma f’livelli iżjed komparabbli. Għaldaqstant, il-prezzijiet taż-żraben tal-ġilda prodotti f’pajjiżi oħra jsiru iżjed attraenti meta mqabbla mal-prezzijiet taż-żraben prodotti fil-pajjiżi kkonċernati.

(425)

Fejn jidħlu l-prezzijiet tal-bejgħ mill-ġdid tal-importatur, inkisbet informazzjoni dettaljata permezz tal-kampjun tal-importaturi. Il-prezzijiet tal-bejgħ mill-ġdid tal-importaturi inklużi fil-kampjun taħt reviżjoni żviluppaw kif ġej:

Tabella 21

Prezzijiet medji tal-bejgħ mill-ġdid tal-importaturi inklużi fil-kampjun (EUR)

(426)

Id-dejta t’hawn fuq tindika prezzijiet tal-bejgħ mill-ġdid stabbli jew li jiżdiedu bil-mod matul il-perjodu 2005 - RIP. Fl-2006, il-prezzijiet tal-bejgħ mill-ġdid żdiedu minn 7 % għal 10 % li hi żieda simili għaż-żieda tal-prezzijiet tax-xiri CIF fl-2006 (ara l-premessa (422) t’hawn fuq). Mill-2006 sal-RIP, il-prezzijiet tal-bejgħ mill-ġdid naqsu.

(427)

L-investigazzjoni ma ġabet l-ebda informazzjoni jew provi, li jindikaw li l-prezzijiet tal-bejgħ mill-ġdid ta’ importaturi oħra kienu se jiżviluppaw f’direzzjoni differenti minn kif deskritt hawn fuq.

(428)

Fir-rigward tal-importaturi inklużi fil-kampjun, il-profitabbiltà ġiet stabbilita fuq il-kombinazzjoni tal-istampa tal-prezzijiet tal-importazzjoni u tal-bejgħ mill-ġdid li għadha kemm ġiet deskritta u l-iżvilupp tal-fatturi tal-ispejjeż l-oħra tal-importaturi. Wara l-iżvelar, xi wħud mill-importaturi inklużi fil-kampjun ikkontestaw id-dejta li ntużat dwar il-profitt individwali tagħhom u talbu biex tiġi aċċettata r-reviżjoni tad-dejta. Xi wħud minn dawn it-talbiet intlaqgħu u xi żbalji klerikali ġew ikkoreġuti. L-istampa tal-profitabbiltà riveduta hija kif ġej:

Tabella 22

Profitt medju fuq il-prodott ikkonċernat miksub mill-importaturi inklużi fil-kampjun

(profitt nett qabel it-taxxi/dħul)

(429)

Iċ-ċifri t’hawn fuq ġew ikkalkulati fuq il-bażi taċ-ċifri tal-profitt fuq il-prodott ikkonċernat, kif ġie rappurtat mill-importaturi inklużi fil-kampjun. F’xi każijiet, iċ-ċifri rappurtati kellhom jiġu riveduti wara l-verifika fuq il-post. Kif ġie ddikjarat hawn fuq, wara l-iżvelar definittiv, erba’ importaturi inklużi fil-kampjun ikkontestaw l-analiżi tal-profitabbiltà individwali tagħhom u tennew li d-dejta riveduta kif ippreżentata wara l-verifika fuq il-post għandha tintlaqa’. Fir-rigward ta’ importatur wieħed inkluż fil-kampjun, ta’ min jinnota li t-talba tiegħu dwar l-ispejjeż tal-bejgħ, ġenerali u amministrattivi (SG&A) ġiet milqugħa parzjalment billi ġie kkoreġut żball klerikali, u dan wassal għal tnaqqis żgħir fil-profitabbiltà tal-kampjun kif żvelat lill-partijiet interessati. Madankollu, it-talba tiegħu biex jiġu aċċettati l-SG&A kif irrapportati oriġinarjament u biex, barra minn hekk, jitqies l-ammont konsiderevoli ta’ drittijiet li allegatament kellhom jitħallsu lill-kumpanija relatata tiegħu barra mill-Unjoni, għandha tiġi miċħuda. Fir-rigward tal-SG&A kif ġew irrapportati oriġinarjament, waqt iż-żjara ta’ verifika, dawn instabu li ġew minfuħa billi l-kumpanija ma setgħetx tiġġustifika l-ammonti ddikjarati. Għaldaqstant saret korrezzjoni bbażata fuq dokumenti li waslu waqt iż-żjara ta’ verifika. Fir-rigward tal-ispejjeż allegati għad-drittijiet, dan l-ammont ġie ddikjarat biss wara ż-żjara ta’ verifika u d-dikjarazzjoni ma ġietx issostanzjata biżżejjed. Fir-rigward tat-tieni importatur inkluż fil-kampjun, dan ukoll enfasizza t-talba tiegħu biex id-dejta tal-profitabbiltà riveduta bbażata fuq il-profitt, irrapportata f’formola li ġiet allegatament ippreżentata lill-awtoritajiet tal-Istati Uniti, tiġi aċċettata. F’dan ir-rigward, ta’ min jinnota li l-kumpanija kienet ippreżentat tabella tal-profitabbiltà għall-prodott ikkonċernat li ġiet ikkonfermata matul il-verifika billi setgħet tiġi rrikonċiljata għal kollox mal-kontijiet verifikati u dejta oħra disponibbli.

Id-dokument mibgħut wara l-verifika semma biss livell ta’ profitt globali għall-“Ewropa” u inkluda l-prodotti kollha u probabbilment anki dawk l-operazzjonijiet barra mis-27 Stat Membru, iżda ġeografikament fl-Ewropa (l-Iżvizzera, il-Balkani). Din il-formola ma setgħetx titqabbel mad-dejta verifikata fuq il-post u għalhekk it-talba ġiet miċħuda. Fis-sottomissjoni tagħha wara l-iżvelar, il-kumpanija pprovdiet aktar dettalji f’dan ir-rigward, iżda minħabba s-sottomissjoni tard u n-nuqqas ta’ evidenza ssostanzjata, xorta waħda ma setgħetx tiġi milqugħa. It-tieni talba ta’ din il-kumpanija hi marbuta ma’ ċerti elementi ta’ spejjeż li kellhom jitqiesu, li tnejn minnhom ma setgħux jiġu konnessi mal-informazzjoni verifikata fuq il-post. Madankollu, ġie aċċettat li jiġi kkunsidrat it-tielet element ta’ spiża li ġie vverifikat għal kollox waqt il-verifika imma dak tħalla barra mit-tabella bi żball. L-impatt fuq il-profitabbiltà globali kien madankollu limitat. It-tielet importatur oriġinarjament ippreżenta biss dejta tal-profitt għal parti żgħira tal-operazzjonijiet tiegħu fl-Unjoni. Id-dejta ppreżentata ma tistax titqies rappreżentattiva għall-operazzjonijiet tal-kumpanija fl-Unjoni b’mod ġenerali minħabba li jeżistu differenzi konsiderevoli bejn ir-reġjuni fir-rigward tal-ispejjeż u d-dħul. Għaldaqstant, id-dejta tal-profitt ġiet ikkumplimentata waqt il-verifika fuq il-post miċ-ċifri relatati mal-bqija tal-operazzjonijiet imwettqa fl-Unjoni u bbażati fuq l-informazzjoni kollha disponibbli li tista’ tiġi vverifikata. Il-kumpanija kkontestat ir-riżultat ta’ dik il-komputazzjoni u fi tmiem il-verifika, ippreżentat tabella tal-profitabbiltà riveduta li kienet differenti mill-komputazzjoni tal-Kummissjoni f’element wieħed biss, i.e. l-ispiża tax-xiri. Billi din l-ispiża tax-xiri proposta ma setgħetx, madankollu, titqabbel mal-informazzjoni disponibbli, bil-maqlub tal-ispejjeż tax-xiri kif stabbiliti mill-Kummissjoni, it-tabella riveduta ma ġietx milqugħa. Għaldaqstant, it-talba ġiet miċħuda u ntużat id-dejta ta’ profitabbiltà kif stabbilita waqt il-verifika fuq il-post. Wara l-iżvelar, ir-raba’ importatur ikkontesta d-dejta dwar il-profitabbiltà tiegħu stess li ġiet ippreżentata, verifikata u aċċettata mingħajr aġġustamenti ulterjuri waqt il-verifika fuq il-post, billi argumenta li l-metodoloġija kollha użata ma kinitx korretta. Iżda billi l-kumpanija ma ssuġġerietx metodoloġija differenti li għandha tiġi applikata biex jiġi stabbilit il-profitt fuq il-prodott ikkonċernat, it-talba trid tiġi miċħuda minħabba li mhijiex issostanzjata.

(430)

Qed jiġi mfakkar li fl-investigazzjoni oriġinali, ir-risposti tal-kwestjonarju mill-importaturi li kkooperaw kienu jindikaw profitt nett tal-medja kkalkulata ta’ 12 % għall-perjodu mill-1 ta’ April 2004 sal-31 ta’ Marzu 2005. F’din l-investigazzjoni ta’ reviżjoni, id-dejta verifikata tal-importaturi inklużi fil-kampjun madankollu wriet li l-profitt medju kkalulat ta’ dawn l-importaturi inklużi fil-kampjun fl-2005 kien ‘il fuq minn 20 %. Fl-2006, kien hemm tnaqqis konsiderevoli fil-profitti, b’iżjed minn 18-il punt perċentwali fuq bażi ta’ medja kkalkulata u bi qrib it-12-il punt perċentwali fuq medja aritmetika. Kien jidher li ħafna mill-kuntratti ta’ bejgħ kienu diġà ġew maqbula qabel l-impożizzjoni tal-miżuri provviżorji f’Marzu tal-2006 u f’ħafna każijiet, il-prezzijiet tal-bejgħ maqbula ma kinux ikkunsidraw l-impożizzjoni possibbli ta’ dazji anti-dumping. B’konsegwenza, il-profitt tal-importaturi inklużi fil-kampjun miksub fuq il-prodott ikkonċernatnaqas fl-2006. Fl-2007 u fl-RIP il-profitt reġa’ żdied, iżda għadu 8-16–il punt perċentwali taħt il-profitt miksub fl-2005.

(431)

Peress li wara Marzu tal-2006, ħafna mill-importaturi inklużi fil-kampjun adattaw il-kanali tal-akkwisti u l-politika tal-ipprezzar tagħhom skont iċ-ċirkostanzi li kienu qed jitbiddlu, i.e. l-impożizzjoni ta’ dazji anti-dumping, twettqet analiżi iżjed mill-viċin tal-fatturi li qed jolqtu l-profitti sa mill-2007. Dan li ġej jista’ jiġi osservat. L-ewwel nett, filwaqt li t-tnaqqis fil-profitti fl-2006 jista’ jiġi attribwit l-iżjed għad-dazji anti-dumping, fl-2007 u fl-RIP kien hemm fatturi oħra, speċifiċi għall-kumpaniji, li kien qed ikollha impatt negattiv importanti fuq il-profitt tal-kampjun tal-importaturi. Fl-2007 u l-RIP ċertu importaturi inklużi fil-kampjun kellhom żidiet konsiderevoli fl-ispejjeż SG&A, li rriżultaw f’marġini gross li ddeterjoraw ħafna. Dan kellu effett fuq il-profitt ikkalkulat għall-kampjun in ġenerali. Ma nstabet l-ebda raġuni komuni, bħal pereżempju spejjeż tat-tqegħid fis-suq ogħla għal avvenimenti sportivi, għal din iż-żieda fl-ispejjeż SG&A għal dawk l-importaturi inklużi fil-kampjun.

(432)

Fl-istess ħin, ġie osservat li r-rata tal-kambju bejn l-Euro u d-dollaru Amerikan kienet għenet lill-importaturi sabiex iżommu l-ispejjeż tax-xiri tagħhom baxxi, inklużi l-ispejjeż tal-prodott ikkonċernat. Mill-aħħar tal-2005 sat-tmiem tal-RIP, il-valur tal-Euro kien żdied bi kważi 30 % meta mqabbel mad-dollaru Amerikan u, peress li l-kuntratti tal-importaturi mal-fornituri tagħhom ikunu normalment stabbiliti f’dollari Amerikani u peress li ġie rappurtat biss hedging limitat, dan il-“qligħ” taffa l-effett tad-dazji anti-dumping u żidiet oħra fl-ispejjeż. Fuq il-bażi tal-informazzjoni provduta minn wieħed mill-importaturi inklużi fil-kampjun, il-livelli tal-profitt matul l-RIP setgħu kienu sa massimu ta’ 6 punti perċentwali iżjed baxxi kieku r-rati tal-kambju baqgħu stabbli.

(433)

Barra minn hekk, saret analiżi alternattiva tal-profitti, li tiddistingwi l-profitt miksub fuq ix-xedd tas-saqajn bit-tikketta privata minn profitt magħmul fuq xedd tas-saqajn tad-ditta. Għal dan il-għan, id-dejta verifikata disponibbli mill-importaturi inklużi fil-kampjun ġiet kumplimentata bl-informazzjoni miksuba minn importatur kbir ieħor ta’ żraben bit-tikketta privata, li ma ppreżentax ruħu fl-eżerċizzju tat-teħid ta’ kampjuni, iżda li kkoopera fl-investigazzjoni billi ssottometta l-fehmiet tiegħu. Din l-informazzjoni tissuġġerixxi li l-livelli tal-profitt tal-importaturi taż-żraben bit-tikketta privata kienu b’mod ġenerali konsiderevolment iżjed baxxi mil-livelli tal-profitt ta’ ħafna mill-importaturi taż-żraben tad-ditta, iżda kienu għadhom għoljin u fil-firxa ta’ bejn 11 % sa 17 % matul l-RIP. Dan jikkonferma s-sejbiet tal-investigazzjoni oriġinali li fiha din il-kategorija tal-importaturi rrapurtat li wettqet livell ta’ profitt medju ta’ 17 %. Min-naħa l-oħra, din l-analiżi raffinata wriet ukoll li għall-importaturi tax-xedd tas-saqajn tad-ditta, il-profitti żdiedu mill-investigazzjoni oriġinali. F’dik l-investigazzjoni, dawk l-importaturi kienu rrapurtaw bħala medja profitti ta’ madwar 10 % filwaqt li l-profitt tal-importaturi inklużi fil-kampjun tax-xedd tas-saqajn tad-ditta matul l-RIP kienu jammontaw għal iżjed minn 20 %. Għaldaqstant jista’ jiġi konkluż li, in ġenerali, is-sitwazzjoni ekonomika tal-grupp tal-importaturi tax-xedd tas-saqajn bit-tikketta privata baqgħet fil-biċċa l-kbira tagħha l-istess mill-investigazzjoni oriġinali, filwaqt li s-sitwazzjoni tal-importaturi tax-xedd tas-saqajn tad-ditta tidher li kompliet tjiebet.

(434)

Fi kwalunkwe każ, taħt kwalunkwe xenarju, il-livelli tal-profitt miksuba mill-importaturi inklużi fil-kampjun kienu relattivament għolja, u ma kinux juru tendenza ta’ tnaqqis wara l-2006. Qed jiġi osservat ukoll li l-livell ġenerali tal-profitti tal-importatur inklużi fil-kampjun, i.e. dejjem iżjed minn 10 %, jindikaw negozju pjuttost stabbli u sostenibbli.

(435)

L-investigazzjoni ma wasslet għall-ebda informazzjoni jew provi, li jindikaw li l-livell tal-profitt ta’ importaturi oħra jkun żviluppa f’direzzjoni differenti mit-tendenzi tal-profitt kif deskritt hawn fuq.

(436)

Minħabba l-kriżi finanzjarja u ekonomika globali li bdiet minnufih wara l-RIP, ġie meqjus xieraq li tiġi analizzata s-sitwazzjoni tal-importaturi lil hinn mill-RIP. F’diversi mis-sottomissjonijiet irċevuti, kienet saret referenza għall-impatt negattiv dirett li dan it-tnaqqis fir-ritmu ekonomiku jkollu fuq is-settur, li jaggrava l-impatt negattiv tad-dazji anti-dumping. Fuq il-bażi ta’ informazzjoni addizzjonali u kummenti provduti mill-partijiet, kif ukoll informazzjoni disponibbli pubblikament bħal Eurostat, intelliġenza fis-suq eċċ, toħroġ l-istampa li ġejja.

(437)

Mid-dejta statistika disponibbli, jidher li l-importazzjonijiet mill-pajjiżi kkonċernati għandhom jibqgħu neżlin, għalkemm it-tnaqqis hu moderat meta mqabbel mat-tnaqqis fil-perjodu mill-2005 sal-RIP (-15 % wara l-RIP). Fl-istess ħin, l-importazzjonijiet minn pajjiżi terzi jibqgħu jiżdiedu. Fi kliem ieħor, il-proċess tax-xaqlib tal-produzzjoni mill-pajjiżi kkonċernati għal pajjiżi terzi għadu għaddej. Id-dejta tal-Eurostat turi wkoll żidiet b’saħħithom fil-prezzijiet tal-importazzjoni, notevolment f’dak li hu marbut ma’ xedd tas-saqajn mill-pajjiżi kkonċernati (+21.5 % meta mqabbla mal-RIP).

(438)

Ġiet rappurtata evoluzzjoni simili wara l-RIP mill-importaturi inklużi fil-kampjun, li baqgħu jżidu l-akkwisti tagħhom minn pajjiżi oħra u jnaqqsu l-akkwisti tagħhom mill-pajjiżi kkonċernati. In ġenerali, il-volumi impurtati tagħhom tal-prodott in kwistjoni baqgħu pjuttost stabbli. L-importaturi spjegaw li minħabba ż-żmien tal-proċess ta’ madwar sitt xhur, ix-xirjiet wara l-RIP kienu riżultat ta’ ordnijiet imqiegħda qabel il-bidu tat-tnaqqis fir-ritmu ekonomiku. Il-prezzijiet tax-xiri medji tal-importaturi inklużi fil-kampjun f’Euro tal-prodott ikkonċernatżdiedu meta mqabbla mal-RIP, b’madwar 15 %. Ir-raġunijiet għal din iż-żieda fil-prezz kif rappurtata mill-importaturi kienu l-ewwel l-apprezzament tal-USD fl-aħħar tal-2008 u fil-bidu tal-2009 li żiedu l-ispejjeż tal-akkwisti tagħhom f’termini ta’ EUR tal-prodotti mill-pajjiżi kkonċernati u t-tieni nett, l-ispejjeż miżjuda tal-produzzjoni fil-pajjiżi kkonċernati, b’mod speċjali ż-żieda fl-ispejjeż tax-xogħol.

(439)

Peress li l-prezzijiet tal-bejgħ mill-ġdid baqgħu stabbli jew żdiedu ftit biss, jidher li l-profitti tal-importaturi inklużi fil-kampjun fuq il-kummerċ fil-prodott taħt reviżjoni setgħu ġew affetwati iżjed. Barra minn hekk, l-importaturi qalu li minħabba l-ordnijiet tax-xiri avvanzati u t-tnaqqis sussegwenti fid-domanda, l-inventarji tagħhom żdiedu konsiderevolment. Madankollu, kalkolu tal-livelli tal-profitt wara l-RIP ibbażati fuq id-dejta tal-prezzijiet provduti juri li t-tnaqqis fil-profitt aktarx li jkun moderat (b’2 punti perċentwali, bejn wieħed u ieħor), li jirriżulta f’livelli tal-profitti ġenerali li xorta għadhom b’saħħithom.

(440)

Madankollu ssemma minn diversi importaturi li, mill-Ħarifa tal-2008, id-domanda tal-konsumatur battiet konsiderevolment u li din id-domanda batuta għadha ma ġietx riflessa fil-volumi tal-importazzjoni għax l-ordnijiet kienu saru minn sitt xhur sa disa’ xhur qabel, i.e. qabel it-tnaqqis fir-ritmu ekonomiku. Għaldaqstant, l-importaturi stennew tnaqqis iżjed konsiderevoli fil-volumi tal-importazzjoni fl-istaġun li jmiss. Barra minn hekk, diversi importaturi rrapurtaw li xi ktajjen tad-distribuzzjoni ewlenin jew qegħdin fi stat ta’ insolvenza jew għandom diffikultajiet finanzjarji li minħabba fihom ġew ikkanċellati l-ordnijiet, l-istokks tal-importaturi qed jiżdiedu u għandhom bżonn jagħtu skonti speċjali lill-klijenti tagħhom. Uħud mill-importaturi inklużi fil-kampjun kienu ħabbru pjanijiet ta’ ristrutturar maġġuri minħabba t-tnaqqis fir-ritmu ekonomiku, waqt li oħrajn irrapurtaw li kienu qegħdin iżjed ma jmur jippruvaw jikkontrollaw l-ispejjeż tagħhom b’mezzi oħra.

(441)

Minn dak li ġie fuq imsemmi, jidher li sa Lulju tal-2009, l-impatt tal-kriżi kien għadu limitat f’termini tal-importazzjoni u l-volumi tal-bejgħ, peress li l-ordnijiet tqiegħdu qabel ma bdiet il-kriżi fil-livell tal-konsumatur u li kienu saru fuq il-bażi ta’ aspettattivi tal-konsum ottimistiċi. F’termini ta’ profittabilità, jidher li ħafna importaturi, sa issa, irnexxielhom jillimitaw l-impatt tal-kriżi ukoll billi ħadu diversi miżuri mmirati li jikkontrollaw l-ispejjeż.

(442)

Jekk ikomplu l-miżuri, hu probabbli ħafna li dawn jolqtu l-importaturi iżjed fil-futur għax il-parametri ekonomiċi tbiddlu konsiderevolment: biż-żidiet fil-prezz tax-xiri li ġew riċentament osservati u t-tnaqqis ġlobali mistenni fil-konsum, l-effett tad-dazju anti-dumping għandu jsir iżjed evidenti milli kien fil-passat, anke jekk l-iżvilupp tar-rata tal-kambju ttaffi ż-żieda fil-prezz tax-xiri kif ġara matul il-perjodu kkunsidrat. Barra minn hekk, diversi importaturi indikaw li kienu seħħew żidiet importanti oħra fl-ispejjeż fil-pajjiżi kkonċernat, fosthom spejjeż tax-xogħol ogħla eċċ. Kollox ma’ kollox, il-profitti fuq il-prodott ikkonċernataktarx li jonqsu fil-futur qarib, iżda wkoll fil-biċċa l-kbira tagħhom minħabba żidiet fl-ispejjeż ġejjin minn dazji anti-dumping. Madankollu, peress li l-importaturi ġeneralment iġġeneraw marġini b’saħħithom dan it-tnaqqis f’kull probabbiltà m’għandux jipperikola dawn il-kumpaniji.

(443)

Kif muri mill-2005, l-importaturi probabbilment jibqgħu jew jibdew jakkwistaw kwantitajiet saħansitra ogħla minn pajjiżi terzi, peress li d-dazju anti-dumping għandu jaffetwahom iżjed. Fl-istess ħin, l-importaturi aktarx li għandhom jippruvaw jgħaddu proporzjon ogħla ta’ kwalunkwe żieda fl-ispejjeż ġenerali lill-bejjiegħa bl-imnut/distributuri. Madankollu, meta wieħed iqis l-importanza relattiva ta’ dawn il-bejjiegħa bl-imnut/distributuri għall-importaturi (kif spjegat aħjar fil-premessa (472) hawn taħt), l-importaturi aktarx li mhux se jgħaddu kompletament ż-żidiet fl-ispejjeż li għad iridu jiġu lill-klijenti tagħhom. Dan ġie osservat ukoll fil-perjodu bejn Lulju tal-2008 – Marzu tal-2009.

(444)

L-effett tad-dazji anti-dumping miżmuma, f’perjodu ta’ domanda li dejjem tiċkien, prezzijiet tax-xiri li jiżdiedu u iżjed għarfien dwar l-ispejjeż min-naħa tal-konsumaturi, fuq l-importaturi madankollu għandu jkun differenti skont il-flessibbiltà tal-importatur. Qed jiġi mfakkar li xi importaturi diġà wrew flessibbiltà kbira fl-istrateġiji tal-akkwisti tagħhom u fit-taħlita tal-prodotti tagħhom (iżjed STAF u/jew żraben tad-drapp/tal-plastik u/jew aċċessorji). Dan jippermettielhom li jnaqqsu l-effett tad-dazju fil-futur. Importaturi oħra li jżommu l-kanali tal-akkwisti tagħhom fil-pajjiżi kkonċernati u li qed jiffukaw fuq ix-xedd tas-saqajn jistgħu fil-fatt jesperjenzaw tnaqqis globali fil-profitti u/jew fil-bejgħ.

(445)

Kif imsemmi fil-premessi (60) et seq., diversi partijiet interessati allegaw l-esklużjoni ta’ tipi speċifiċi ta’ żraben mill-ambitu tal-prodotti. Barra minn hekk, ħafna partijiet issottomettew li, jekk ma jkunx possibbli li jiġi rivedut l-ambitu tal-prodotti fl-investigazzjoni attwali, it-tipi ta’ żraben impurtati tagħhom għandhom jiġu esklużi mill-miżuri taħt l-Artikolu 21 tar-Regolament bażiku. Dawn l-allegazzjonijiet tal-aħħar kienu bbażati l-iżjed fuq l-allegat nuqqas ta’ produzzjoni (kapaċità tal-produzzjoni u intenzjoni li tipproduċi) ta’ dawn it-tipi ta’ żraben fl-Unjoni, li jwassal għal tnaqqis fil-kompetizzjoni ma’ u ħsara għall-industrija tal-Unjoni, u l-ambjent ekonomiku mhux favorevoli li fihom il-miżuri jkollhom effett dejjem iżjed negattiv fuq l-importaturi, id-distributuri, il-bejjiegħa bl-imnut u l-konsumaturi fi ħdan il-Unjoni.

(446)

F’dan ir-rigward, hu importanti li jiġi osservat li nstabet kompetizzjoni konsiderevoli bejn l-importazzjonijiet mill-pajjiżi kkonċernati u t-tip ta’ xedd tas-saqajn prodott fl-Unjoni, kif stabbilit fil-premessa (267) et seqq. Dan ifisser ukoll li għad hemm produzzjoni konsiderevoli ta’ xedd tas-saqajn tal-ġilda fl-Unjoni. B’mod iżjed ġenerali, qed jiġi osservat ukoll li l-ambitu tal-prodott ma jistax jiġi modifikat, estiż jew imnaqqas fil-kwadru ta’ reviżjoni tal-iskadenza irrispettivament mill-evoluzzjoni eventwali tat-tendenza tal-produzzjoni fil-Unjoni waqt l-eżistenza tal-miżura.

(447)

Minkejja dan, il-Kummissjoni kkuntattjat l-assoċjazzjonijiet tax-xedd tas-saqajn rilevanti sabiex tingħata stampa iżjed ċara tat-tipi/kwantitajiet ta’ ċertu xedd tas-saqajn li hu prodott fl-Unjoni. Mill-informazzjoni miġbura, jidher li ħafna miż-żraben li dwarhom saret l-allegazzjoni (għadhom) qed jiġu prodotti fl-Unjoni u li t-tendenza fil-produzzjoni ma nbidlitx konsiderevolment matul il-perjodu tal-miżuri eżistenti. L-informazzjoni miġbura ma tippermettix determinazzjoni ġenerali finali ta’ jekk ċertu tipi ta’ prodotti niche prodotti fl-Unjoni jkoprux id-domanda għal dawn il-prodotti.

(448)

Ħafna minn dawn il-prodotti huma prodotti niche speċifiċi mibjugħa lil konsumaturi speċjalizzati fi kwantitajiet żgħar, li għandhom kwalità għolja u karatteristiċi tekniċi kumplessi u li jappartjenu għall-kategorija tal-prezzijiet għolja i.e. żraben tal-irkib taż-żwiemel, żraben tal-brilli jew żraben ta’ daqsijiet speċjali/għal saqajn dojoq. Għaldaqstant dawn it-tipi ta’ prodotti bħala prinċipju jaqgħu fil-mudell tal-ispeċifikazzjoni ġenerali tal-produtturi tal-Unjoni. Permezz tal-impożizzjoni jew iż-żamma tal-miżuri, il-produtturi tal-Unjoni jistgħu jiġu inkoraġġiti li jinvestu mill-ġdid f’dan it-tip ta’ produzzjoni ta’ prodotti niche jew li jżidu l-kapaċitajiet tal-produzzjoni eżistenti tagħhom. Inkella ma jkun hemm l-ebda inċentiv għall-produtturi tal-Unjoni li jinvestu f’dawn il-linji ta’ prodotti. Barra minn hekk, peress li l-miżuri mhumiex intiżi li jwaqqfu l-importazzjonijiet u m’għamlux hekk fil-każ preżenti, hu ġustifikabbli li jkun hemm miżuri anti-dumping anke fuq dawn it-tipi ta’ prodotti niche, sakemm ma tkunx tista’ tinqata’ linja diviżorja bejn it-tipi differenti ta’ prodotti. Fi kwalunkwe każ, safejn il-prodotti niche huma kkonċernati, id-dejta limitata disponibbli tindika li s-sehem tagħhom fl-importazzjonijiet ġenerali hi limitata ħafna u li għaldaqstant l-impatt tal-miżuri fuq dawn it-tipi ta’ prodotti mhuwiex meqjus li hu sproporzjonat b’rabta mal-maġġoranza vasta tal-importazzjonijiet.

(449)

Ċertu importaturi tax-xedd tas-saqajn sportiv kif ukoll l-assoċjazzjoni tagħhom issottomettew li ma kienx hemm alternattiva vijabbli għall-akkwisti tagħhom fl-Unjoni.

(450)

F’dan ir-rigward, għandu jiġi l-ewwel nett osservat li l-informazzjoni miġbura mill-assoċjazzjonijiet tax-xedd tas-saqajn nazzjonali tissuġġerixxi li għad hemm produzzjoni konsiderevoli tax-xedd tas-saqajn fl-Unjoni, għalkemm ma jistax jiġi eskluż li d-domanda taqbeż il-provvista f’dan is-settur. Anke jekk wieħed jassumi li m’hemmx biżżejjed produzzjon ta’ xedd tas-saqajn fl-Unjoni, l-investigazzjoni wriet li jeżistu sorsi alternattivi ta’ provvista, bħal l-Indoneżja u l-Indja li joffru prezzijiet dejjem iżjed kompetittivi, kif muri hawn fuq.

(451)

Barra minn hekk ġie maqbul minn diversi importaturi inklużi fil-kampjun, notevolment id-ditti tax-xedd tas-saqajn globali akbar, li huma għandhom relazzjonijiet strateġiċi fuq perjodu taż-żmien twil ma’ ċertu gruppi ta’ fabbriki fir-RPĊ u l-Vjetnam fuq il-bażi ta’ kwalità għolja, standards soċjali, tas-sigurtà u ambjentali li ħadu s-snin biex jiġu kkultivati. Għaldaqstant, it-tibdil tas-sorsi permezz tar-rilokazzjoni tal-produzzjoni jwassal għal spejjeż għolja u żmien ta’ stennija twil (12 sa 18-il xahar).

(452)

F’dan ir-rigward hu importanti li jiġi sottolineat li l-miżuri anti-dumping ikkonċernati mhumiex projbittivi; fi kliem ieħor, il-fatt li l-miżuri jkunu ġew imposti – sabiex tiġi kkoreġuta d-distorzjoni fil-kummerċ – ma wassalx għal twaqqif fl-importazzjonijiet mill-pajjiżi kkonċernati u għal bżonn konsegwenti għall-importaturi li jakkwistaw minn pajjiżi oħra. Minkejja dak fuq imsemmi, l-investigazzjoni wriet li jeżisti livell sinifikanti ta’ flessibbiltà; l-importaturi normalment jixtru minn gruppi ta’ fornituri bil-bażijiet tal-produzzjoni f’diversi pajjiżi Asjatiċi. Dawn il-gruppi huma flessibbli u jistgħu jibdlu l-akkwisti tagħhom minn pajjiż għal ieħor, jekk ikun hemm inċentiv li jagħmlu hekk. Id-dettalji provduti permezz tal-eżerċizzju tat-teħid tal-kampjuni dwar l-akkwisti tal-prodott in kwistjoni mill-2005, kif imqassra fuq bażi aggregata taħt il-premessa (417) hawn fuq, turi li ħafna mill-importaturi inklużi fil-kampjun, fi żmien sena sa sentejn, biddlu l-oriġini ta’ parti konsiderevoli tax-xedd tas-saqajn tal-ġilda akkwistat minnhom. Importatur kbir mhux inkluż fil-kampjun irraporta wkoll importazzjonijiet miżjuda minn pajjiżi Asjatiċi oħra, minflok importazzjonijiet mill-pajjiżi kkonċernati. Għaldaqstant, l-informazzjoni fil-fajl turi li, għalkemm jista’ jkun hemm involuti spejjeż żejda, ix-xaqlib tal-produzzjoni minn pajjiż għal ieħor mhuwiex meqjus bħala skomdu u jidher li hu pjuttost komuni. L-argument għaldaqstant qed jiġi miċħud.

(453)

Ġie wkoll sottomess mill-assoċjazzjonijiet tal-importaturi u xi importaturi li l-importaturi ma kienx għadhom f’pożizzjoni li jassorbu l-effett tad-dazji. Ġie allegat li matul il-perjodu 2006-RIP, l-effett negattiv tal-miżuri għall-konsumaturi kien (parzjalment) kumpensat bl-effett tal-iżvilupp tar-rata tal-kambju mill-2006, iżda, skont dawn is-sottomissjonijiet, it-teħid lura tal-iżvilupp tar-rata tal-kambju mill-aħħar tal-RIP kienet tagħmel żieda fil-prezzijiet tal-bejgħ mill-ġdid inevitabbli u tirriżulta fi prezzijiet ogħla għall-konsumaturi fil-ħwienet jekk jinżammu d-dazji.

(454)

Hu rikonoxxut li l-apprezzament tal-Euro meta mqabbel mad-dollaru Amerikan mill-impożizzjoni tal-miżuri anti-dumping kien konsiderevoli kif deskritt ukoll fil-premessa (432) hawn fuq. Fil-fatt l-iżvilupp tar-rata tal-kambju kien ta’ benefiċċju għall-importaturi tal-prodott ikkonċernat mill-aħħar tal-2005 sal-aħħar tal-RIP, peress li l-kuntratti mal-fornituri tagħhom huma normalment stabbiliti f’dollari Amerikani u l-Euro żdiedet fil-valur bi kważi 30 % meta mqabbla mad-dollaru Amerikan tul il-kors ta’ dak il-perjodu.

(455)

Fejn tidħol l-allegata inabbiltà tal-importaturi li jassorbixxu d-dazju minħabba l-iżvilupp tar-rata tal-kambju differenti sa minn nofs l-2008, li jwassal għal prezzijiet tal-importazzjoni ogħla f’Euro, għandu jiġi osservat li l-livell tal-profitt miksub mill-importaturi fil-kummerċ tal-prodott ikkonċernat, kif analizzat permezz tal-kampjun (ara t-tabella 22 t’hawn fuq), kien għadu b’saħħtu fl-RIP. Dan jissuġġerixxi li l-importaturi jkunu f’pożizzjoni li jibqgħu joperaw b’mod sostenibbli anke jekk f’ċertu perjodu l-iżviluppi tar-rata tal-kambju jkunu ta’ żvantaġġ għalihom. Barra minn hekk, fejn jidħlu l-iżviluppi tar-rata tal-kambju, m’hemmx sinjali li l-Euro tinsab fi kriżi meta mqabbla mad-Dollaru Amerikan; għall-kuntrarju, filwaqt li l-Euro ddepprezzat fir-rigward tad-Dollaru Amerikan minn Lulju sa Novembru tal-2008, reġgħet irkuprat minn dak iż-żmien. Għaldaqstant hu spekulattiv li wieħed jantiċipa depprezzament tal-Euro għall-perjodu taż-żmien qasir u medju. Fejn jidħlu il-prezzijiet tal-bejgħ bl-imnut taż-żraben tal-ġilda, għandu jiġi barra minn hekk osservat li hemm diversi sorsi oħra għal xedd tas-saqajn tal-ġilda u dawn is-sorsi huma dejjem iżjed użati mill-importaturi. Għaldaqstant m’hemmx dejta fil-fajl li tindika n-neċessità għall-importaturi li jgħaddu kompletament dan id-dazju lill-bejjiegħa bl-ingrossa/bl-imnut, li mbagħad jirriżulta f’żidiet konsiderevoli fil-prezzijiet fil-livell tal-bejgħ bl-imnut. Għaldaqstant, l-argument mhuwiex konvinċenti.

(456)

Uħud mill-importaturi, ħafna minnhom li jappartjenu għall-grupp ta’ produtturi tax-xedd tas-saqajn tad-ditta, issottomettew li l-miżuri jagħmlu ħsara “għall-valur tal-manifattura miżjud” minnhom fl-Unjoni permezz tal-attivitajiet konsiderevoli tagħhom fl-oqsma tad-disinn, l-iżvilupp, id-ditti u l-akkwisti. F’dan ir-rigward, l-investigazzjoni kkonfermat li fil-fatt ħafna importaturi ma jinnegozjawx sempliċiment fiż-żraben iżda huma involuti wkoll, fl-Unjoni, f’attivitajiet li jżidu l-valur bħal dawk fuq imsemmija. Dawn l-attivitajiet qed jiġġeneraw livell konsiderevolment għoli ta’ impjieg.

(457)

F’dan ir-rigward qed jiġi osservat li l-informazzjoni provduta mill-importaturi inklużi fil-kampjun ma tindikax tnaqqis fl-impjieg ta’ dawn il-kumpaniji allokat għall-prodott ikkonċernat matul il-perjodu 2005 - RIP. Għall-kuntrarju, iċ-ċifri tal-impjieg aggregati tal-produtturi tax-xedd tas-saqajn tad-ditta inklużi fil-kampjun jindikaw minflok żieda żgħira f’dan l-impjieg. Dan isegwi mill-fatt li, skont l-iskop tagħhom, il-miżuri anti-dumping ma bblukkawx id-dħul fis-suq tal-Unjoni ta’ żraben tal-ġilda li joriġinaw fir-RPĊ u l-Vjetnam, iżda minflok aġġustaw il-livell tal-prezz tagħhom sabiex jerġa’ jkun hemm kundizzjonijiet indaqs. Barra minn hekk, il-livell ta’ dazji f’dan il-każ hu modest u l-importaturi jistgħu, barra minn hekk, jaqilbu l-oriġini – kif fil-fatt għamlu f’xi każijiet. Minħabba dan, l-argument li l-miżuri anti-dumping ifixklu x-xogħolijiet ta’ livell għoli li dawn l-importaturi ġġeneraw fl-Unjoni qed jiġi miċħud.

(458)

Fuq il-bażi tal-analiżi t’hawn fuq, ġie konkluż b’mod definittiv li, matul il-perjodu 2006-RIP, il-miżuri tal-anti-dumping kellhom impatt fuq is-sitwazzjoni ekonomika tal-importaturi tal-prodott ikkonċernat fl-Unjoni, iżda dan l-impatt ma jitqiesx li hu sproporzjonat minħabba l-pożizzjoni globalment b’saħħitha tal-importaturi fis-suq li ġiet stabbilita fl-investigazzjoni. Id-deterjorazzjoni limitata tas-sitwazzjoni ekonomika tal-importaturi tidher li kompliet matul id-disa’ xhur wara l-RIP. Madankollu, is-settur jinsab b’mod ġenerali fi stat tajjeb u l-profitti miksuba fuq il-prodott taħt reviżjoni għadhom għolja. Għaldaqstant mhuwiex probabbli li ż-żamma tal-miżuri jkollha effett negattiv konsiderevoli fuq l-interessi tal-importaturi.

(459)

L-informazzjoni disponibbli tindika li fis-suq tal-bejgħ bl-imnut/distribuzzjoni fl-Unjoni, madwar 60 % tax-xedd tas-saqajn kollu hu nnegozjat bid-distribuzzjoni speċjalista “tradizzjonali” li tikkonsisti f’bejjiegħa bl-imnut kbar li ħafna drabi jkunu qed jimpurtaw iż-żraben huma stess u l’hekk imsejħa gruppi tax-xiri u madwar 40 % tax-xedd tas-saqajn kollu hu nnegozjat b’distribuzzjoni “mhux speċjalista”, li tkun tikkonsisti f’supermarkits, ħwienet tal-ħwejjeġ kif ukoll stabbilimenti kbar. Hu stmat li s-settur tal-bejjiegħa bl-imnut/distributuri fl-Unjoni jimpjega madwar 140 000 persuna fil-bejgħ tal-prodott ikkonċernat lill-konsumaturi. Għandu jiġi osservat li filwaqt li fl-Istati Membri tat-Tramuntana il-bejjiegħa bl-imnut l-iżjed kbar huma dominanti, fl-Istati Membri tan-Nofsinhar il-bejgħ bl-imnut spiss isir mill-SME’s.

(460)

Filwaqt li l-ktajjen tal-bejgħ bl-imnut il-kbar ma xtaqux li jipparteċipaw fil-kampjun tal-importaturi u ma rrispondewx għall-kwestjonarju dettaljat tal-bejjiegħa bl-imnut, importatur/bejjiegħ bl-imnut wieħed kbir kif ukoll grupp ta’ bejjiegħa bl-imnut issottomettew rappreżentazzjonijiet bil-miktub u ngħataw smigħ. B’konsegwenza, l-uniku bejjiegħ bl-imnut li r-risposti tiegħu setgħu jiġu vverifikati kien Clark’s, li kkoopera bħala importatur.

(461)

Ġew irċevuti risposti għall-kwestjonarju tal-assoċjazzjonijiet tal-bejjiegħa bl-ingrossa, distributuri u bejjiegħa bl-imnut mill-Assoċjazzjoni Ewropea tal-Bejjiegħa bl-Imnut tal-Moda (AEDT), il-Koalizzjoni Ewropea tax-Xedd tas-Saqajn tad-Ditta (EBFC), il-Grupp Ewropew ta’ Barra (EOG), l-EuroCommerce li tirrappreżenta s-setturi tal-kummerċ tal-bejgħ bl-imnut, bl-ingrossa u l-kummerċ internazzjonali fl-Ewropa, il-Federazzjoni Ewropea tal-Industriji tal-Oġġetti Sportivi (FESI), l-Assoċjazzjoni tal-Kummerċ Barrani (FTA), l-assoċjazzjoni Olandiża tal-moda, il-bejjiegħa bil-imnut taż-żraben u sportivi MITEX, u Svenskt Sportforum. L-ebda katina ta’ supermarkits ma rrispondiet għall-kwestjonarju, madankollu Lidl provdiet informazzjoni dwar ix-xiri u l-bejgħ mill-ġdid tagħha tal-prodott ikkonċernat bejn l-2005 u l-2008. L-assoċjazzjonijiet u l-bejjiegħa bl-imnut ta’ hawn fuq opponew il-miżuri u kwalunkwe titwil tagħhom, u bażikament argumentaw li l-miżuri naqqsu l-profitti u kkawżaw ħafna bejjiegħa bl-imnut li jfittxu sorsi alternattivi tal-provvista. Huma allegaw ukoll li l-estensjoni tal-miżuri kienu jkunu ta’ ħsara għall-industrija Ewropea tax-xedd tas-saqajn li addattat b’suċċess għall-isfidi u l-opportunitajiet tas-swieq moderni li jagħmlu trasferiment tal-manifattura. Huma sostnew li l-miżuri ma evitawx delokalizzazzjoni massiva tal-produzzjoni li mhux se tiġi lura lejn l-Unjoni għax il-produtturi tal-Unjoni mhumiex kapaċi li jissodisfaw id-domanda għal għażla wiesgħa ta’ xedd tas-saqajn ta’ kwalità bi prezzijiet baxxi.

(462)

Sabiex tiġi evalwata l-allegazzjoni ta’ marġini tal-profitti mnaqqsa mill-impożizzjoni ta’ miżuri anti-dumping, bħala l-ewwel pass, saret analiżi tal-prezzijiet tax-xiri tad-distributuri/bejjiegħa bl-imnut tal-prodott ikkonċernat meta mqabbla mal-prezzijiet tal-bejgħ miksuba matul il-perjodu 2005 - RIP. Kif deskritt fil-premessa (425) t’hawn fuq, ibbażat fuq ir-risposti tal-kwestjonarju tal-importaturi inklużi fil-kampjun, jidher li l-prezzijiet tal-bejgħ mill-ġdid tal-importaturi, li huma daqs il-prezzijiet tax-xiri tad-distributuri/bejjiegħa bl-imnut, kienu stabbli jew żdiedu ftit biss matul il-perjodu 2005 - RIP.

(463)

Bħala t-tieni pass, ġie eżaminat l-iżvilupp tal-prezzijiet tal-bejgħ mill-ġdid, u, minħabba n-nuqqas ta’ dejta preċiża sottomessa mill-bejjiegħa bl-imnut, l-informazzjoni nġabret mill-uffiċċji tal-istatistika tal-Istati Membri li flimkien kienu jirrappreżentaw 66 % tal-popolazzjoni tal-Unjoni. Din l-informazzjoni tissuġġerixxi li l-iżvilupp tal-prezzijiet bl-imnut matul il-perjodu kkunsidrat kien, ġeneralment, wieħed ta’ żieda verament modesta, kif turi t-tabella t’hawn taħt:

Tabella 23

Prezzijiet medji tal-konsumatur f’ċertu Stati Membri (indiċjati)

(464)

Il-kategoriji ta’ żraben fuq imsemmija, għalkemm ma jaqblux eżatt mad-definizzjoni tal-prodott, huma dominati mill-prodott in kwistjoni u t-tendenzi t’hawn fuq għaldaqstant jistgħu jitqiesu bħala referenza valida għall-prezzijiet tal-bejgħ bl-imnut tal-prodott ikkonċernat.

(465)

It-tendenzi t’hawn fuq ġew ikkonfermati aktar minn diversi partijiet interessati li ssottomettew li l-prezzijiet tal-bejgħ bl-imnut kienu baqgħu relattivament stabbli għal perjodu itwal u fi kwalunkwe każ matul il-perjodu 2005 – RIP. Huma spjegaw il-fatt li l-prezzijiet taż-żraben fil-livell tal-bejgħ bl-imnut kienu stabbli għal perjodu tant twil minħabba (i) fatturi tal-ispejjeż favorevoli waqt il-bidla kontinwa tal-produzzjoni lejn pajjiżi bi spejjeż baxxi u l-iżvilupp favorevoli tar-rata tal-kambju u (ii) il-prinċipju tal-“punti tal-prezz” li hu applikat mill-bejjiegħa bl-imnut u l-intenzjoni tal-konsumaturi li jħallsu. Il-prinċipju tal-“punti tal-prezz” hu l-fatt li ż-żraben normalment jinbiegħu f’punti tal-prezz fissi u mhux fin-nofs, pereżempju kategorija taż-żraben tinbiegħ għal EUR 44,95, kategorija oħra iżjed ‘il fuq għal EUR 49,95, kategorija oħra iżjed ‘il fuq għal EUR 54,95 eċċ.

(466)

Peress li l-informazzjoni sottomessa mill-bejjiegħa bil-imnut ma kinitx dettaljata biżżejjed, ma kienx possibbli li tinkiseb direttament id-dejta tal-profittabilità tal-bejjiegħa bl-imnut. Madankollu, meta wieħed iqabbel l-iżvilupp tal-prezz tax-xiri tal-bejjiegħa bl-imnut, kif imsemmi fil-premessa (462) hawn fuq, mal-iżvilupp tal-prezz tal-bejgħ mill-ġdid tagħhom, kif imsemmi taħt il-premessi (463) et seqq., m’hemmx sinjal ta’ marġini tal-profitt li qed jonqsu li huma attribwibbli għall-effett tal-ispejjeż tad-dazji hekk kif il-prezzijiet tax-xiri tal-prodott ikkonċernat baqgħu stabbli jew żdiedu ftit, filwaqt li l-prezzijiet tal-bejgħ mill-ġdid żdiedu ftit.

(467)

Fir-rigward tal-livell ġenerali tal-profitt tas-settur tal-bejgħ bl-imnut, hemm xi indikazzjonijiet li dan hu inqas mil-livell tal-profitt miksub mill-importaturi. Barra minn hekk, skont l-istampa speċjalizzata, xi reġjuni jidhru b’mod partikolari li huma iżjed kompetittivi u diffiċli mill-aspett tal-bejjiegħa bl-imnut (kompetizzjoni b’saħħitha, proċess konsolidat fis-suq, dipendenza qawwija fuq is-suq finanzjarju li hu xettiku mill-investiment u fallimenti strateġiċi). Fl-istess ħin, madankollu, waħda mill-ikbar ktajjen tal-bejgħ bl-imnut taż-żraben li toperaw fl-Unjoni rrapurtat profitti rekord fl-2008 fl-istampa u ħabbret pjanijiet ta’ espansjoni ambizzjużi.

(468)

Fir-rigward tal-profitti ġenerali tal-bejjiegħa bl-imnut, għandu jiġi osservat ukoll li l-effett tad-dazju anti-dumping hu, fi kwalunkwe każ, imtaffi bid-dħul miksub fuq il-prodotti l-oħra tagħhom bħal STAF, xedd tas-saqajn tal-ġilda minn oriġini oħra, tipi oħra ta’ xedd tas-saqajn u aċċessorji.

(469)

B’konklużjoni, l-argument tat-tnaqqis fil-profitti ma kienx sostanzjat mill-bejjiegħa bl-imnut matul l-investigazzjoni ta’ reviżjoni u anke s-sejbiet tal-investigazzjoni ma kinux jappoġġjaw din id-dikjarazzjoni. Mill-informazzjoni disponibbli jidher li hu iżjed probabbli li l-impożizzjoni ta’ miżuri anti-dumping ma affetwatx negattivament lill-bejjiegħa bl-imnut mill-2006 sal-RIP, jew sa punt limitat biss.

(470)

L-informazzjoni limitata disponibbli dwar l-impatt tat-tnaqqis fir-ritmu ekonomiku wara l-RIP fis-settur tal-bejgħ bl-imnut tax-xedd tas-saqajn juri marġini li qed jonqsu u tnaqqis fid-domanda matul l-ewwel disa’ xhur wara l-RIP. Madankollu, l-informazzjoni ġiet sottomessa biss minn kumpanija waħda, li topera l-iżjed f’reġjun speċifiku wieħed, li qed topera wkoll bħala importatur u li għaldaqstant tista’ titqies li tirrappreżenta s-settur tal-bejgħ bl-imnut in ġenerali. Barra minn hekk, l-istampa speċjalizzata rrappurtat titjib konsiderevoli tas-sitwazzjoni fis-settur tal-bejgħ bl-imnut taż-żraben f’dak ir-reġjun (b’volumi tal-bejgħ u dħul li qed jiżdiedu) minn nofs l-2009. B’konsegwenza, fin-nuqqas ta’ kooperazzjoni rappreżentattiva mis-settur tal-bejgħ bl-imnut, l-ebda konklużjonijiet finali ma jistgħu jittieħdu dwar l-impatt eżatt tat-tnaqqis fir-ritmu ekonomiku.

(471)

Fl-isfond tat-tnaqqis fir-ritmu ekonomiku attwali, hu probabbli li l-konsum tax-xedd tas-saqajn tal-ġilda għandu jonqos u l-pressjoni fuq il-prezzijiet eżerċitata minn konsumaturi li huma dejjem iżjed sensittivi għall-prezz għandha tiżdied fil-perjodu taż-żmien qasir sa medju. Min-naħa l-oħra, l-importaturi aktarx li jippruvaw jgħaddu mill-inqas parzjalment iż-żidiet fil-prezz tagħhom lill-bejjiegħa bl-imnut. Għaldaqstant is-sitwazzjoni li sabu ruħhom fiha l-bejjiegħa bl-imnut, jiġifieri mdeffsa bejn l-importaturi u l-konsumaturi tista’ twassal għal sitwazzjoni dejjem iżjed diffiċli.

(472)

Dawk il-bejjiegħa bl-imnut/distributuri li joperaw fi swieq kompetittivi ħafna u li jakkwistaw iż-żraben tal-ġilda l-iżjed mill-pajjiżi kkonċernati jistgħu, f’dan ix-xenarju, jispiċċaw f’sitwazzjoni fraġli meta wieħed iqis l-ispejjeż relattivament għolja tagħhom u l-marġini netti relattivament baxxi tagħhom. Tħassir tal-miżuri anti-dumping fuq il-prodott ikkonċernat joffri lil dawn il-kumpaniji serħan f’dan ix-xenarju. Għal dawk il-bejjiegħa bl-imnut/distributuri, madankollu, li qed jakkwistaw ukoll minn pajjiżi terzi/l-Unjoni u li għandhom taħlita tal-prodotti iżjed diversifikata, l-impatt taż-żidiet possibbli fil-prezzijiet aktarx li għandu jidher li hu inqas fid-dħul. Barra minn hekk, l-investigazzjoni wriet li minkejja li jinsabu f’pożizzjoni tas-suq partikolari, l-importanza tal-bejjiegħa bl-imnut u tal-gruppi tal-bejgħ bl-imnut hi konsiderevoli biżżejjed biex twaqqaf l-importaturi milli jgħaddu kompletament iż-żidiet fl-ispejjeż.

(473)

Bħala konklużjoni, dawk il-bejjiegħa bl-imnut li jibqgħu jakkwistaw l-iżjed il-prodott ikkonċernat, għandhom isofru iżjed minn titwil tal-miżuri filwaqt li dawk il-bejjiegħa bl-imnut b’mudell tan-negozju mħallat u flessibbli, li jaqilbu l-akkwisti tagħhom għal sorsi iżjed alternattivi u jiddervisifikaw it-taħlita tal-prodotti tagħhom, aktarx li għandhom jiġu affetwati inqas – għalkemm jistgħu jsofru iżjed milli waqt l-RIP.

(474)

Ġie maqbul li l-miżuri kienu kkawżaw li ħafna iżjed bejjiegħa bl-imnut ifittxu sorsi alternattivi tal-provvista. L-informazzjoni fil-fajl turi li xi bejjiegħa bl-imnut biddlu l-akkwisti tagħhom, iżda ħadd mill-bejjiegħa bl-imnut jew l-assoċjazzjonijiet tagħhom ma rrappurtaw li kien hemm nuqqasijiet ta’ provvista jew anke diffikultajiet biex jinstabu sorsi alternattivi wara l-impożizzjoni tal-miżuri. Għaldaqstant, filwaqt li fil-fatt diversi bejjiegħa bl-imnut fittxew sorsi alternattivi, l-informazzjoni tissuġġerixxi li kellhom suċċess biex isibu sorsi alternattivi tal-provvista. Filwaqt li ġie rikonoxxut li dan l-isforz kien jieħu ż-żmien għal xi bejjiegħa bl-imnut, dan jitqies li hu effett indirett, mhux sproporzjonali tal-impożizzjoni tal-miżuri meta mqabbla mal-benefiċċji għall-produtturi Ewropej li jsofru minn importazzjonijiet li huma oġġett ta’ dumping.

(475)

Ġie sottomess minn diversi partijiet interessati li l-fatturi tal-ispejjeż favorevoli li kienu fis-seħħ matul il-perjodu kkunsidrat, kif imqassra fil-premessa (465) hawn fuq, kienu ntemmu. Minflok, mit-tmiem tal-RIP, l-iżvilupp tar-rata tal-kambju żviluppa negattivament u l-ispejjeż tal-produzzjoni fir-RPĊ u l-Vjetnam kienu qed jiżdiedu mill-ġdid. B’konsegwenza ta’ dan, jekk jinżammu l-miżuri, dan iġib is-sitwazzjoni tal-bejgħ bl-imnut f’sitwazzjoni diffiċli, għax ikollhom jitilgħu ‘l fuq il-punti tal-prezzijiet. Dan jirriżulta mhux biss fi prezzijiet ogħla fil-livell tal-bejgħ bl-imnut iżda wkoll f’inqas dħul u, minħabba l-ispiża fissa għolja, tnaqqis qawwi fil-profitt.

(476)

Kif imsemmi fil-premessa (454) hawn fuq, hu ferm spekulattiv li jiġi antiċipat deprezzament tal-Euro fil-perjodu taż-żmien qasir u medju. Barra minn hekk, filwaqt li l-ispejjeż li qed jiżdiedu fir-RPĊ aktarx li jaffetwaw il-pożizzjoni tal-importaturi, l-argument mhuwiex validu għall-bejjiegħa bl-imnut għax l-informazzjoni fuq il-fajl tal-prezzijiet tal-bejgħ tal-importaturi għall-bejjiegħa bl-imnut, matul il-perjodu kkunsidrat u wara l-RIP, juru li ż-żidiet fil-prezzijiet ġew mgħoddija lill-bejjiegħa bl-imnut sa ċertu limitu biss. Dan jindika pożizzjoni tas-suq ġeneralment b’saħħitha għall-bejjiegħa bl-imnut.

(477)

Għaldaqstant, filwaqt li hu rikonoxxut li l-prinċipju tal-“punti tal-prezz” hu użat ħafna fis-settur tal-bejgħ bl-imnut tax-xedd tas-saqajn u li jippermetti li żidiet żgħar fil-prezz jattiraw inqas attenzjoni mill-konsumatur, m’hemmx indikazzjonijiet fil-fajl li l-bejjiegħa bl-imnut huma ffaċċjati b’żieda ġenerali konsiderevoli fil-prezzijiet tax-xiri tal-prodott ikkonċernat. Għaldaqstant, m’hemmx provi fil-fajl li se jkun hemm bżonn, b’mod ġenerali, li jitmexxew ‘il fuq il-punti tal-prezzijiet għall-prodott ikkonċernat. Barra minn hekk, anke jekk ikollhom jagħmlu hekk għal ċertu mudelli speċifiċi, l-effett ta’ dan ikun jista’ jiġi newtralizzat billi jinbidlu s-sorsi jew it-taħlita tal-prodotti. Minħabba dan, l-argument ġie miċħud.

(478)

Bħala konklużjoni, fuq il-bażi tal-informazzjoni limitata disponibbli, m’hemmx indikazzjonijiet li l-miżuri kellhom effett negattiv fuq is-sitwazzjoni finanzjarja tad-distributuri/bejjiegħa bl-imnut matul il-perjodu 2006-RIP. Meta wieħed iqis l-effetti probabbli tat-tnaqqis fir-ritmu ekonomiku wara l-RIP, notevolment minħabba l-pożizzjoni mdeffsa tal-bejjiegħa bl-imnut bejn l-importaturi u l-konsumaturi u l-profitti modesti possibbli tal-bejjiegħa bl-imnut, ma jistax madankollu jiġi eskluż li s-sitwazzjoni finanzjarja ta’ dawn il-bejjiegħa bl-imnut li primarjament qed ibiegħu l-prodott ikkonċernat se tiddeterjora. Madankollu qed jiġi osservat li l-bejjiegħa bl-imnut huma ħielsa li jakkwistaw il-prodotti tagħhom minn oriġini oħra u li jiddiversifikaw il-prodotti offruti sabiex ikunu jistgħu jnaqqsu l-effetti tad-dazji anti-dumping fid-dħul tagħhom. In ġenerali, il-bejjiegħa bl-imnut jinsabu f’pożizzjoni iżjed favorevoli fis-suq minn produtturi tal-Unjoni, għax għandhom din il-flessibbiltà fuq deskritta filwaqt li l-prodotturi tal-Unjoni huma totalment esposti għall-pressjoni fuq il-prezzijiet eżerċitata mill-prodotti importati li huma oġġett ta’ dumping.

(479)

Il-Kummissjoni kkuntattjat 39 assoċjazzjoni tal-konsumaturi fil-Komunità biex tinfurmahom dwar il-bidu tar-reviżjoni tal-iskadenza. Dawn l-assoċjazzjonijiet ġew b’mod espliċitu mistiedna jispjegaw il-pożizzjoni tagħhom fuq il-miżuri eżistenti u li jipprovdu kwalunkwe informazzjoni oħra li tista’ tkun rilevanti għall-investigazzjoni. Tliet organizzazzjonijiet tal-konsumaturi ppreżentaw ruħhom bħala parti interessata u ssottomettew kummenti bil-miktub.

(480)

Żewġ assoċjazzjonijiet tal-konsumaturi nazzjonali wrew l-appoġġ tagħhom għall-miżuri anti-dumping. Waħda minnhom speċifikament semmiet li, anke bil-miżuri imposti, il-prezzijiet tax-xedd tas-saqajn mill-pajjiżi kkonċernati baqgħu baxxi ħafna. L-organizzazzjoni tal-konsumaturi Ewropej BEUC opponiet il-miżuri, u argumentat inter alia li l-miżuri kienu ta’ ħsara għall-konsumatur.

(481)

F’dan ir-rigward, fl-investigazzjoni oriġinali, l-impatt fuq il-konsumaturi kien previst li hu limitat meta wieħed iqis li r-rati tad-dazju relattivament moderati jkunu mnaqqsa fis-saffi differenti tal-katina tad-distribuzzjoni u ma jiġux mgħoddija kompletament lill-konsumaturi. Madankollu, tfassal xenarju tal-“agħar każ”, i.e. ġiet stmata mgħoddija kompluta lill-konsumatur. L-istima fil-każ oriġinali kienet żieda massima ta’ prezzijiet tal-konsumatur bi 2 %, jew ta’ EUR 1 kull par.

(482)

Ir-riżultati tal-investigazzjoni tar-reviżjoni fil-fatt urew li l-prezzijiet tal-konsumatur taż-żraben tal-ġilda żdiedu ftit biss minn meta ġew imposti l-miżuri (ara l-premessi (463et seqq.). Iż-żieda fil-prezzijiet medji tal-bejgħ bl-imnut taż-żraben kif rappurtata mill-uffiċċji statistiċi nazzjonali tal-grupp ta’ Stati Membri rappreżentattivi msemmija f’dawk il-premessi u fit-tabella 23 hi bejn -0,5 % u +4,1 %, li hi inqas mill-inflazzjoni rappurtata f’dak il-perjodu.

(483)

Fuq il-bażi tal-analiżi tal-prezzijiet tal-importazzjoni, ġie stabbilit ukoll li l-prezzijiet tax-xedd tas-saqajn tal-ġilda mir-RPĊ u l-Vjetnam baqgħu relattivament baxxi, anke wara ż-żieda tad-dazji anti-dumping (ara l-premessa (422) hawn fuq). Għaldaqstant, mill-informazzjoni fuq il-fajl, ma jidhirx li l-miżuri kienu ta’ ħsara għall-konsumaturi sa livell konsiderevoli.

(484)

Diversi partijiet interessati argumentaw li l-miżuri kienu ta’ ħsara għall-konsumaturi, u li wasslu għal prezzijiet ogħla. Ġie argumentat ukoll minn ċertu importaturi li l-impatt tal-miżuri fuq il-konsumaturi jsir iżjed notevoli issa li ma setgħux jassorbixxu iżjed id-dazji.

(485)

Kif imsemmi fil-premessa (482) hawn fuq, dawn id-dazji anti-dumping jidhru li ma wasslux għal żieda notevoli fil-prezzijiet tal-bejgħ bl-imnut. Fir-rigward tal-inabbiltà allegata tal-importaturi li jassorbixxu d-dazji, l-analiżi ta’ wara l-RIP diġà tagħti xi indikazzjonijiet f’dan ir-rigward. Fil-fatt, kif spjegat fil-premessa (438) hawn fuq, matul il-perjodu bejn Lulju 2008 sa Marzu 2009, il-prezzijiet tax-xiri tal-importaturi żdiedu sew filwaqt li l-prezzijiet tal-bejgħ mill-ġdid tagħhom baqgħu stabbli jew l-iżjed l-iżjed żdiedu ftit. Dik l-informazzjoni tissuġġerixxi li l-importaturi ma jkollhomx neċessarjament bżonn li jgħaddu ż-żieda fl-ispejjeż għal-livell li jmiss fil-katina tad-distribuzzjoni. L-argument għaldaqstant hu miċħud.

(486)

Parti interessata waħda qalet li l-miżuri jirriżultaw/kienu rriżultaw f’għażla mnaqqsa tax-xedd tas-saqajn tal-ġilda għall-konsumaturi, notevolment nuqqas ta’ żraben tal-ġilda ta’ livell medju/sa baxx bi prezzijiet li jintlaħqu. Din l-allegazzjoni kienet diġà saret matul l-investigazzjoni oriġinali.

(487)

L-allegazzjoni t’hawn fuq ma ġietx sostanzjata. Barra minn hekk, minħabba l-prezzijiet tal-bejgħ bl-imnut stabbli fuq perjodu taż-żmien twil, mhuwiex probabbli li l-konsumaturi jitilfu l-interess fil-prodott in kwistjoni għal raġunijiet ta’ evoluzzjoni tal-prezz. Ġie osservat ukoll li għajr assoċjazzjoni waħda li ddikjrat li l-miżuri jwasslu għal inqas għażla għall-konsumaturi mingħajr ma jissostanzjaw dan l-argument b’evidenza, l-ebda bejjiegħ bl-imnut jew assoċjazzjoni tal-bejgħ bl-imnut oħra ma lmentaw dwar għażla mnaqqsa jew tnaqqis fil-provvista. Anke jekk l-investigazzjoni kkonfermat li l-għażla tal-konsumaturi kienet iċċaqalqet ftit mill-prodott in kwistjoni, meta wieħed iqis it-tnaqqis modest fil-konsum taż-żraben tal-ġilda osservat matul il-perjodu kkunsidrat u d-domanda miżjuda għal żraben tad-drapp, dan jista’ madankollu jkun attribwit għal tendenzi tal-moda li jinbidlu minflok għal għażla mnaqqsa ta’ xedd tas-saqajn tal-ġilda.

(488)

Minn dan isegwi li parti konsiderevoli tal-produtturi fl-industrija tal-Unjoni tejbet is-sitwazzjoni tagħha mill-impożizzjoni tal-miżuri anti-dumping u ppruvat il-vijabbiltà tagħha billi adattat il-mudelli tan-negozju tagħha għall-isfidi tas-suq globalizzat. Jekk jinżammu l-miżuri, dawn għandhom jippermettu iżjed żmien biex jitkompla dan il-proċess. Jekk jitneħħew il-miżuri, il-pressjoni fuq il-prezz tal-importazzjonijiet oġġett ta’ dumping fuq il-prodotti ta’ livell medju sa’ baxx aktax li jkollha wkoll impatt fuq il-prodotti ta’ livell ogħla u eventwalment taffetwa x-xedd tas-saqajn tal-ġilda kollu. F’dan ix-xenarju, hu probabbli li iżjed produtturi tal-Unjoni jfallu meta wieħed iqis li minħabba d-daqs primarjament żgħir sa medju tagħhom, huma finanzjarjament iżjed vulnerabbli.

(489)

Min-naħa l-oħra, l-impatt tad-dazji anti-dumping mill-2006 sal-RIP fuq l-importaturi, bejjiegħa bl-imnut/distributuri u konsumaturi ma kienx sproporzjonat. Jekk ikomplu l-miżuri u fuq il-preżunzjoni li d-domanda tal-konsumaturi għandha tkompli tbatti u fid-dawl tal-kriżi ekonomika, l-impatt tad-dazji anti-dumping fuq il-parteċipanti kollha f’kull probabbiltà jkun ogħla milli fil-passat. Madankollu, meta wieħed iqis l-istat ġeneralment b’saħħtu u l-flessibbiltà pruvata tal-importaturi u l-pożizzjoni fis-suq ġeneralment b’saħħitha tal-bejjiegħa bl-imnut/distributuri li jistgħu jiddiversifikaw it-taħlita tal-prodott tagħhom konsiderevolment, tista’ ssir preżunzjoni li dawn l-operaturi m’għandhomx isofru sproporzjonalment fit-terminu qasir sa medju. Fir-rigward tal-konsumaturi, ma kienx hemm żieda notevoli fil-prezz meta wieħed iqis l-impożizzjoni tad-dazji anti-dumping u, anke meta wieħed iqis ir-riżultati tal-analiżi ta’ wara l-RIP, m’hemmx indikazzjonijiet li l-prezzijiet tal-konsumatur għandhom jiżdiedu sproporzjonalment fil-futur.

(490)

Bħala konklużjoni, l-investigazzjoni tar-reviżjoni ma żvelatx raġunijiet konvinċenti għala m’għandhomx jinżammu l-miżuri anti-dumping.

(491)

Waslu għadd ta’ kummenti wara l-iżvelar tas-sejbiet. Madankollu, dawn ma kinux tali li setgħu jbiddlu l-konklużjonijiet. L-argumenti ewlenin li tqajmu kienu dawn li ġejjin.

(492)

Wara l-iżvelar tas-sejbiet definittivi, waħda mill-partijiet interessati ddikjarat li ma kinux il-miżuri anti-dumping li għenu lill-industrija tal-Unjoni, iżda l-isforzi ta’ ristrutturar biss. Din id-dikjarazzjoni ma saritx biss mingħajr ma ġiet issostanzjata aktar, iżda tinjora wkoll is-sejbiet oġġettivi ta’ din l-investigazzjoni tar-reviżjoni. B’mod partikolari, din tinjora l-koinċidenza fiż-żmien bejn l-impożizzjoni tal-miżuri anti-dumping u l-proċess ta’ stabbilizzazzjoni tal-industrija tal-Unjoni. Tabilħaqq, minn mindu ġew imposti l-miżuri, iż-żieda kbira fl-importazzjonijiet li huma oġġett ta’ dumping u bi prezz baxx, waqfet u l-importazzjonijiet ikkombinati naqsu minn sehem mis-suq ta’ 35.5 % għal 28.7 %. Dan it-tnaqqis fl-importazzjonijiet li huma oġġett ta’ dumping fuq is-suq tal-Unjoni taffa l-pressjoni fuq il-prezz ikkawżata minn dan ix-xedd tas-saqajn bi prezz baxx u għen lill-industrija tal-Unjoni biex tkompli bl-isforzi tagħha ta’ ristrutturar.

(493)

Ġie enfasizzat ukoll li l-Unjoni ma tistax tiżgura produzzjoni bil-massa u minħabba n-nuqqas konsegwenti ta’ ekonomiji ta’ skala din ma tkunx tista’ tissodisfa d-domanda qawwija fl-Unjoni għal żraben orħos. L-ewwel nett, ta’ min josserva li din id-dikjarazzjoni ma ġietx issostanzjata. It-tieni, fost il-produtturi tal-Unjoni, hemm ukoll għadd ta’ produtturi akbar ta’ żraben ta’ firxa inferjuri bi prezzijiet ta’ bejgħ aktar baxxi, li wħud minnhom ġew analizzati fil-kampjun. Barra minn hekk, fir-rigward tad-dikjarazzjoni li l-industrija tal-Unjoni mhijiex f’pożizzjoni li tipprovdi l-volumi meħtieġa, ta’ min jinnota li l-investigazzjoni wriet li l-biċċa l-kbira tal-importaturi l-kbar magħżula fil-kampjun ma jordnawx biss mingħand fornitur wieħed biss, iżda jixtru wkoll volumi relattivament iżgħar mingħand diversi fornituri. Dan, flimkien mal-effetti tal-“mudell ta’ raggruppament” kif stabbilit fit-taqsima E.2., li permezz tiegħu jingħaqdu l-ħaddiema ta’ diversi kumpaniji iżgħar, għandu b’mod loġiku jippermetti wkoll lill-industrija tal-Unjoni tipproduċi volumi akbar. Għaldaqstant, din id-dikjarazzjoni qed tiġi miċħuda.

(494)

Żewġ partijiet interessati ddikjaraw li l-qagħda tal-produtturi tal-Unjoni li jittrasferixxu x-xogħol b’mod globali ma ġietx analizzata fl-istess dettall kif sar għall-produtturi tal-Unjoni inklużi fil-kampjun. Madankollu, ta’ min jinnota li l-analiżi inkludiet valutazzjoni tal-partijiet kollha interessati skont safejn dawn ikkooperaw fl-investigazzjoni. Pereżempju, l-interess ta’ produttur tal-Unjoni kbir li ġie eskluż mid-definizzjoni tal-industrija tal-Unjoni minħabba l-volumi ta’ importazzjoni tiegħu, (ara l-premessa (402) et seqq) ġie eżaminat relattivament fid-dettall. Ta’ min jinnota wkoll li l-kumpaniji fl-Unjoni li trasferew il-biċċa l-kbira tal-produzzjoni tagħhom lejn pajjiżi terzi għandhom teknikament jitqiesu fl-investigazzjoni anti-dumping bħala importaturi u l-qagħda tal-importaturi ġiet meqjusa u analizzata b’mod sħiħ fil-premessa (409) et seqq.

(495)

Waħda mill-partijiet osservat li kien hemm valutazzjoni żbaljata tal-interessi tal-produtturi tal-Unjoni li qabel kienu inklużi fil-kampjun, billi xi wħud minnhom kienu allegatament kontra l-kontinwazzjoni tal-miżuri. Madankollu, dan mhuwiex korrett, billi anki l-kumpanija li ma ratx il-benefiċċju għaliha stess, għenet biex tnaqqas l-importazzjonijiet li huma oġġett ta’ dumping. Kumpanija oħra semmiet biss li hu diffiċli għaliha, fil-kriżi ekonomika, biex tipprevedi l-effett preċiż tad-dazji anti-dumping fil-ġejjieni, iżda din il-kumpanija ma semmietx li d-dazji kienu mingħajr mertu. Għaldaqstant, anki l-partijiet li ma semmewx b’mod espliċitu li kienu bbenefikaw direttament mill-miżuri, osservaw li l-miżuri ġabu magħhom il-benefiċċju indirett ta’ tnaqqis tal-importazzjonijiet mir-RPĊ u l-Vjetnam.

(496)

Għaldaqstant, hu kkonfermat b’mod definittiv li ġeneralment il-produtturi tal-Unjoni bbenefikaw mill-miżuri u wrew il-kapaċità tagħhom li jtejbu l-qagħda tagħhom ladarba l-miżuri jkunu taffew l-effetti ta’ ħsara tad-dumping.

(497)

Bosta partijiet interessati kkritikaw b’mod ġenerali li l-interessi ta’ dawk li għamlu l-ilmenti b’mod anonimu jitħarsu filwaqt li l-interessi tal-importaturi, tal-operaturi ekonomiċi oħra kif ukoll tal-konsumaturi jiġu fil-biċċa l-kbira injorati. Ta’ min jinnota li l-impożizzjoni tad-dazji anti-dumping, b’mod ġenerali, instab li kienet ta’ ġid għall-produtturi tal-Unjoni u ma nstabitx li kienet sproporzjonatament negattiva għall-operaturi l-oħra kollha rilevanti. L-allegazzjoni ta’ diskriminazzjoni bejn dawk il-partijiet hi, madankollu, miċħuda b’mod qawwi billi l-istess trattament ġie offrut lill-partijiet kollha fl-investigazzjoni u l-interessi kollha tal-operaturi ekonomiċi li kkooperaw bħal importaturi, bejjiegħa bl-imnut, produtturi tal-Unjoniesterni u l-konsumaturi ġew meqjusa u analizzati bir-reqqa fl-investigazzjoni.

(498)

Bosta partijiet interessati ddikjaraw li l-profitti tal-importaturi ma jkunux għolja biżżejjed biex ikopru ż-żieda fl-ispejjeż tal-importazzjoni, l-iżviluppi fir-rati tal-kambju, l-ispiża biex wieħed jaqleb għal sorsi oħra ta’ forniment u d-dazji anti-dumping. Din id-dikjarazzjoni madankollu ma ġietx issostanzjata biżżejjed. Kif jidher fit-tabella 22, id-daqs tal-profitt tal-importaturi, i.e. madwar 20 %, huwa tali li jidher li jħallilhom spazju biex ikopru l-ispejjeż imsemmija qabel.

(499)

Ġie ddikjarat li ċ-ċifra tal-impjiegi mogħtija għall-importaturi, i.e. madwar 23 000 persuna, hija baxxa wisq billi ma tinkludix “impjiegi b’valur miżjud” fl-Unjoni. Madankollu, dan mhuwiex veru. Iċ-ċifra tal-impjiegi tal-importaturi ġiet ikkalkolata fuq il-bażi taċ-ċifri tal-impjiegi verifikati tal-importaturi inklużi fil-kampjun li kienu jinkludu wkoll impjiegi b’valur qawwi miżjud, bħall-iddisinjar, marketing, riċerka u żvilupp, l-użu tal-marka (branding) eċċ, li huma attribwiti għall-prodott ikkonċernat. Iċ-ċifri kollha tal-impjiegi verifikati ġew miżjuda u mqabbla mal-volum ta’ importazzjoni tal-prodott ikkonċernat tal-importaturi inklużi fil-kampjun. Imbagħad, dan ir-riżultat ġie kkalkolat mal-volum tal-importazzjoni globali mill-pajjiżi kkonċernati. Għaldaqstant, iċ-ċifra tal-impjiegi stabbilita inkludiet ukoll “impjiegi b’valur miżjud” sinifikanti fl-Unjoni.

(500)

Xi partijiet iddikjaraw li l-argument li l-importaturi jistgħu faċilment jaqilbu s-sorsi ta’ forniment huwa fil-fatt żbaljat u sempliċistiku. Waħda mill-partijiet interessati ddikjarat li ma kien hemm l-ebda sors alternattiv ta’ forniment. F’dan ir-rigward, ta’ min jinnota li qatt ma ġie ddikjarat li kien se jkun faċli li wieħed jaqleb is-sorsi ta’ forniment. Il-Kummissjoni ma tiċħadx li t-tibdil tal-fornituri jista’ jġib miegħu spejjeż żejda u jeħtieġ iż-żmien u li xi importaturi għandhom relazzjonijiet fit-tul mal-fornituri tagħhom. Fuq il-bażi tal-informazzjoni miġbura mill-importaturi inklużi fil-kampjun u importatur ieħor mhux inkluż fil-kampjun, wieħed, madankollu, jista’ jikkonkludi fil-premessa (452) tar-Regolament li kien jeżisti livell sinifikanti ta’ flessibbiltà u li kull sforz addizzjonali biex jitbiddlu s-sorsi ma kienx tali li seta’ jżomm dawk l-operaturi milli jagħmlu dan. Tabilħaqq, dawk l-importaturi żiedu b’mod konsiderevoli l-forniment tagħhom minn pajjiżi terzi kif jidher fit-tabella 19. L-istess xejra ġiet osservata għal importaturi mhux inklużi fil-kampjun, minħabba li l-Eurostat uriet żieda ta’ 4 punti perċentwali fir-rigward tal-importazzjonijiet minn pajjiżi terzi (it-tabella 7).

(501)

Xi partijiet interessati argumentaw li l-kontinwazzjoni tal-miżuri se tintensifika t-tnaqqis fl-impjiegi fl-Unjoni, ċertament fir-rigward tal-importaturi u tal-bejjiegħa bl-imnut. Din id-dikjarazzjoni ma ġietx issostanzjata mill-partijiet interessati. Barra minn hekk, il-fajl juri li, fir-rigward tal-importaturi inklużi fil-kampjun, l-impjiegi relatati mal-prodott ikkonċernat żdiedu b’6 % mill-2005 sal-RIP.

(502)

Ġie ddikjarat li analiżi tal-benefiċċji potenzjali tas-sospensjoni tal-miżuri għall-importaturi kienet nieqsa. F’dan ir-rigward, ta’ min jinnota li fuq il-bażi tat-test tal-Artikolu 21 tar-Regolament bażiku dwar l-anti-dumping, għandu jiġi analizzat jekk hemmx raġunijiet konvinċenti biex ma jiġux imposti l-miżuri anti-dumping. Fil-qafas ta’ reviżjoni ta’ skadenza dan ifisser li għandu jiġi analizzat jekk jeżistux raġunijiet konvinċenti biex ma jinżammux il-miżuri, i.e. għandhom jiġu identifikati l-effetti negattivi ta’ titwil ta’ dawk il-miżuri u dawn l-effetti għandhom jiġu bbilanċjati mal-benefiċċji tal-industrija tal-Unjonibiex jiġi vvalutat jekk dawk l-effetti negattivi humiex sproporzjonati. Għaldaqstant, mil-lat legali, ix-xenarju oppost, i.e. li l-miżuri jitħallew jiskadu, irid biss jiġi analizzat aktar jekk hemm indikazzjonijiet speċifiċi fil-każ li dan ikun jikkostitwixxi piż sproporzjonat għall-importaturi, il-bejjiegħa bl-imnut jew il-konsumaturi. Ma nstabux indikazzjonijiet bħal dawn. Madankollu, u għas-saħħa tal-argument biss, dan li ġej jista’ jintqal dwar l-effetti probabbli fuq l-importaturi, il-bejjiegħa bl-imnut u l-konsumaturi jekk il-miżuri jiskadu. Fir-rigward tal-importaturi, l-investigazzjoni wriet li parti tat-telf tagħhom ta’ profitabbiltà mill-2005 sal-RIP tista’ tkun attribwita għad-dazji anti-dumping imħallsa. Jekk il-miżuri jiskadu u l-ispejjeż l-oħra jibqgħu stabbli, dawn l-ispejjeż jgħibu u f’dan ir-rigward, il-livelli ta’ profitt jistgħu jiżdiedu għal livell ogħla minn dak ta’ madwar 20 % li nstab matul l-investigazzjoni. Għall-bejjiegħa bl-imnut, mhuwiex ċar mill-informazzjoni fil-fajl jekk dawn jibbenefikawx minn skadenza tal-miżuri, għax l-importaturi inklużi fil-kampjun mhux dejjem adattaw il-prezzijiet tagħhom ta’ bejgħ mill-ġdid f’każ li l-prezzijiet tal-importazzjoni jaqgħu, kif jista’ jidher minn tqabbil tal-prezz tal-importazzjoni medju aritmetiku u l-prezz tal-bejgħ mill-ġdid medju aritmetiku mill-2007 sal-RIP.

Fir-rigward tal-effett fuq il-konsumaturi, hu saħansitra inqas probabbli li l-iskadenza tal-miżuri twassal għal tnaqqis fil-prezzijiet, billi l-prezzijiet tal-bejgħ bl-imnut baqgħu fil-biċċa l-kbira stabbli minkejja ċ-ċaqliq fil-prezzijiet fil-livell ta’ importazzjoni mill-2005 sal-RIP. Barra minn hekk, x’aktarx ukoll li l-konsumaturi ma jibbenefikawx permezz ta’ għażla akbar billi ma hemm l-ebda evidenza fil-fajl li turi li l-għażla għall-konsumaturi ġiet affettwata mill-impożizzjoni tad-dazji anti-dumping. F’kull każ, dan kollu ma jistax ibiddel il-konklużjonijiet globali li ma hemmx raġunijiet konvinċenti biex ma jinżammux il-miżuri.

(503)

Xi wħud mill-importaturi u l-assoċjazzjonijiet tagħhom iddikjaraw li l-impatt tal-kriżi ġie sottovalutat u li l-effetti tat-tnaqqis fir-ritmu ekonomiku se jkomplu sejrin lura. L-ewwel nett, dawn id-dikjarazzjonijiet ma ġewx issostanzjati biżżejjed billi ma tressqet l-ebda dejta konkreta relatata mal-prodott. Kif iddikjarat fil-premessa (436) et seqq. tar-Regolament, l-impatt tal-kriżi ġie analizzat sa Ġunju 2009 fuq il-bażi tal-aħjar dejta disponibbli i.e. intbagħat kwestjonarju addizzjonali biex tiġi eżaminata speċifikament din il-kwistjoni. Fuq il-bażi tal-informazzjoni miġbura, saret analiżi prudenti tad-dejta miksuba u jidher ċar li din l-analiżi hija prinċipalment ibbażata fuq dejta sa Ġunju 2009. Għaldaqstant, ma jistax jinqata’ barra li l-impatt tal-kriżi ekonomika fuq il-konsum u l-prezzijiet huwa agħar milli kien sa Ġunju 2009, iżda xorta jista’ jiġi konkluż li billi l-livell ta’ profitt kien ferm ogħla minn 15 %, l-importaturi x’aktarx li ma jkunux affettwati b’mod sproporzjonat mill-effett iżolat tad-dazji anti-dumping.

Dan hu aktar minnu billi l-qagħda tas-suq wara Ġunju 2009 wriet sinjali mħallta b’sinjali ta’ titjib f’xi Stati Membri. Għaldaqstant, ma jidhirx f’dan l-istadju li l-impatt tal-kriżi ġie sottovalutat serjament. Barra minn hekk, ta’ min jinnota li meta titqies id-dejta ta’ hawn fuq, il-Kummissjoni marret ferm lil hinn mill-obbligi legali tagħha għax l-Artikolu 6(1) tar-Regolament bażiku jiddikjara li l-informazzjoni relatata ma’ perjodu sussegwenti għall-perjodu ta’ investigazzjoni, normalment, ma għandhiex titqies.

(504)

Fl-aħħar nett, xi partijiet tennew id-dikjarazzjoni tagħhom li xi tipi ta’ prodotti għandhom jiġu esklużi mill-miżuri anti-dumping mil-lat tal-interess tal-Unjoni billi fl-Unjoni hemm biss produzzjoni negliġibbli ta’ xedd tas-saqajn sportiv u estern, b’mod partikolari. Ġie allegat li t-tnaqqis fil-produzzjoni tal-Unjoni jkun jikkostitwixxi ċirkustanzi mibdula li jridu jitqiesu fir-reviżjoni ta’ skadenza. L-ewwel nett, ta’ min ifakkar li mhuwiex possibbli li jiġi modifikat l-ambitu tal-miżuri fil-qafas ta’ reviżjoni ta’ skadenza skont l-Artikolu 11(2) tar-Regolament bażiku kif ġie ddikjarat fil-premessa (61) ta’ dan ir-Regolament. Anki jekk wieħed jassumi li jkun legalment possibbli, li mhuwiex il-każ, hu osservat li din id-dikjarazzjoni ta’ tnaqqis fil-produzzjoni diġà saret fl-investigazzjoni oriġinali u ġiet ikkonfutata fil-premessi (28) u (38) tar-Regolament definittiv. Billi dawk il-partijiet ma ppreżentaw l-ebda evidenza ġdida ssostanzjata biex turi sa liema punt il-produzzjoni tal-UE ta’ dawn it-tipi ta’ xedd tas-saqajn naqset b’rabta mal-investigazzjoni oriġinali, din id-dikjarazzjoni ġiet miċħuda u s-sejbiet kif deskritti fil-premessa (450) ta’ dan ir-Regolament huma b’dan ikkonfermati.

(505)

Waħda mill-partijiet interessati ddikjarat li l-analiżi ddistingwiet b’mod artifiċjali bejn l-importaturi u l-bejjiegħa bl-imnut u li l-interess tal-kumpaniji integrati li jkollhom jieħdu fuqhom il-piż kollu tal-miżuri ma kienx meqjus. L-ewwel nett, ta’ min jinnota li l-unika kumpanija li kkooperat bħala bejjiegħ bl-imnut kienet fil-fatt importatur/bejjiegħ bl-imnut integrat, kif hu indikat fil-premessa (450) hawn fuq, u għalhekk, l-ispeċifiċità ta’ dawk il-kumpaniji integrati kienet irrappreżentata kemm fost l-importaturi inklużi fil-kampjun kif ukoll fl-analiżi tal-bejjiegħa bl-imnut. It-tieni, l-informazzjoni kollha pprovduta minn bejjiegħa bl-imnut oħra li ma kkooperawx bis-sħiħ fl-investigazzjoni, tqieset ukoll. Għaldaqstant, il-Kummissjoni qieset u analizzat l-informazzjoni kollha disponibbli dwar il-kumpaniji integrati. Meta jitqies dak li ntqal hawn fuq, id-dikjarazzjoni li l-interess tal-kumpaniji integrati ma kienx meqjus, ma tistax tiġi aċċettata.

(506)

Xi partijiet interessati esprimew kritika ġenerali billi ddikjaraw li l-impatt tal-miżura fuq il-bejjiegħa bl-imnut ma ġietx analizzata f’biżżejjed dettall. Din id-dikjarazzjoni ma ġietx issostanzjata. Kif deskritt fil-premessa (459) et seqq., il-Kummissjoni, b’mod proattiv u ripetut, ippruvat tiġbor informazzjoni mill-bejjiegħa bl-imnut iżda għajr għal importatur/bejjiegħ bl-imnut wieħed integrat li kkoopera bħala importatur, l-ebda katina tal-bejgħ bl-imnut ma aċċettat li tikkoopera bis-sħiħ fl-investigazzjoni. Minkejja l-kooperazzjoni limitata tal-bejjiegħa bl-imnut, l-analiżi qieset, safejn hu possibbli, l-informazzjoni kollha disponibbli fis-settur tal-bejgħ bl-imnut bħal sottomissjonijiet bil-miktub minn partijiet interessati, informazzjoni pprovduta fis-seduti ta’ smigħ, għarfien tas-suq, studji u l-istampa speċjalizzata. Fid-dawl ta’ dan ta’ hawn fuq, id-dikjarazzjoni li l-impatt tal-miżuri fuq il-bejgħ bl-imnut ma ġiex analizzat f’biżżejjed dettall, għandha tiġi miċħuda.

(507)

Għadd ta’ partijiet iddikjaraw li l-Kummissjoni ma qisitx l-informazzjoni disponibbli għall-pubbliku dwar il-profitabbiltà tal-bejjiegħa bl-imnut. Waħda mill-partijiet argumentat li d-dejta tal-profitabbiltà miġbura mir-rapporti finanzjarji disponibbli għall-pubbliku tal-bejjiegħa bl-imnut kbar fl-Unjoni turi qagħda ta’ tħassib kbir li l-analiżi injorat. Fl-istess vena, xi partijiet qiesu li l-effetti serji tal-kriżi ekonomika fuq is-settur tal-bejgħ bl-imnut ma ġewx meqjusa. Ġie argumentat li għalkemm waħda mill-akbar katini ta’ bejgħ bl-imnut taż-żraben irrapportat profitti rekord fl-2008, din hija eċċezzjoni għar-regola u l-bejjiegħa bl-imnut iżgħar ibatu b’mod qawwi. F’dan ir-rigward, hu enfasizzat li kien hemm kooperazzjoni limitata ħafna mill-bejjiegħa bl-imnut, billi bejjiegħ bl-imnut/importatur wieħed biss ikkoopera bis-sħiħ fl-investigazzjoni. Barra minn hekk, la qabel u lanqas wara l-iżvelar ma ġiet ippreżentata informazzjoni speċifika dwar il-profitt tal-bejjiegħa bl-imnut, fejn għandu x’jaqsam ix-xedd tas-saqajn tal-ġilda jew il-prodott ikkonċernat. Minkejja dan, il-Kummissjoni qieset u analizzat varjetà ta’ sorsi oħra ta’ informazzjoni, bħal sottomissjonijiet mill-bejjiegħa bl-imnut, informazzjoni dwar is-suq, rapporti għall-istampa li indikaw varjabbiltà wiesgħa ta’ profitti fis-settur tal-bejgħ bl-imnut: filwaqt li xi bejjiegħa bl-imnut tabilħaqq jidhru li esperjenzaw tnaqqis fil-mar.ġnijiet u dgħufija fid-domanda, l-istampa speċjalizzata rrapportat żieda fil-bejgħ u fid-dħul għal oħrajn. Għaldaqstant, l-informazzjoni disponibbli għall-pubbliku msemmija mill-partijiet ta’ hawn fuq tqieset iżda ntwera li din tagħti biss stampa parzjali u għalhekk intużat varjetà ta’ sorsi oħra ta’ informazzjoni li indikat firxa usa’ ta’ profitti. Għaldaqstant, l-impatt tat-tnaqqis fir-ritmu ekonomiku fuq il-bejjiegħa bl-imnut ġie analizzat safejn hu possibbli fuq il-bażi tal-informazzjoni disponibbli. Id-dikjarazzjoni li l-profitabbiltà tal-bejjiegħa bl-imnut ma ġietx analizzata b’mod korrett għandha għalhekk tiġi miċħuda.