(1)

Ir-Regolament (KE) Nru 246/2009 jagħti s-setgħa lill-Kummissjoni sabiex tapplika l-Artikolu 81(3) tat-Trattat permezz ta’ regolament għal ċerti kategoriji ta’ akkordji, deċiżjonijiet u prattiċi miftiehma bejn kumpanniji marittimi li jikkonċernaw l-operazzjoni konġunta ta’ servizzi tat-trasport marittimu tal-linja (konsorzji), li, bis-saħħa tal-kooperazzjoni bejn dawn il-kumpanniji marittimi li huma partijiet fihom, jistgħu jwasslu sabiex jirrestrinġu l-kompetizzjoni fis-suq komuni u jaffettwaw il-kummerċ bejn l-Istati Membri u jistgħu għalhekk jaqgħu taħt il-projbizzjoni stipulata fl-Artikolu 81(1) tat-Trattat.

(2)

Il-Kummissjoni użat is-setgħa tagħha billi adottat ir-Regolament tal-Kummissjoni (KE) Nru 823/2000 tad-19 ta’ April 2000 dwar l-applikazzjoni tal-Artikolu 81(3) tat-Trattat lil ċerti kategoriji ta’ ftehim, deċiżjonijiet u prattiċi miftiehma bejn kumpanniji ta’ trasport bil-baħar (konsorzji) (3), li għandu jiskadi fil-25 ta’ April 2010. Abbażi tal-esperjenza tal-Kummissjoni sal-lum, wieħed jista’ jikkonkludi li għadhom validi l-ġustifikazzjonijiet għal eżenzjoni ġenerali għall-konsorzji ta’ bastimenti tal-linja. Madanakollu, ċerti tibdiliet huma meħtieġa sabiex jitneħħew ir-referenzi għar-Regolament tal-Kunsill (KEE) Nru 4056/86 tat-22 ta’ Diċembru 1986 li jistabbilixxi regoli dettaljati għall-applikazzjoni tal-Artikoli 85 u 86 tat-Trattat għat-trasport marittimu (4) li kien jippermetti lill-kumpanniji marittimi tal-linja jiffissaw il-prezzjijiet u l-kapaċità, li iżda issa ġie mħassar. Tibdiliet huma meħtieġa wkoll biex tkun żgurata konverġenza akbar ma’ regolamenti oħra ta’ eżenzjoni ġenerali għall-kooperazzjoni orizzontali li hemm fis-seħħ filwaqt li jittieħdu inkunsiderazzjoni l-prassi tas-suq attwali fl-industrija tal-bastimenti tal-linja.

(3)

L-akkordji ta’ konsorzju jvarjaw b’mod sinifikanti u jvarjaw minn dawk li huma ferm integrati, li jeħtieġu livell għoli ta’ investiment pereżempju minħabba x-xiri jew in-noleġġ ta’ bastimenti mill-membri tagħhom speċifikament għall-fini ta’ twaqqif tal-konsorzju u t-twaqqif ta’ ċentri ta’ operazzjonijiet konġunti, għal akkordji flessibbli ta’ tpartit ta’ slots. Għall-iskop ta’ dan ir-Regolament akkordju ta’ konsorzju jikkonsisti f’akkordju wieħed jew f’sensiela ta’ akkordji separati iżda marbuta ma’ xulxin bejn kumpanniji marittimi tal-linja li abbażi tagħhom il-partijiet joperaw is-servizz konġunt. Il-forma legali tal-arranġamenti hi anqas importanti mir-realtà ekonomika sottostanti li l-partijiet jipprovdu servizz konġunt.

(4)

Il-benefiċċju tal-eżenzjoni ġenerali jrid ikun limitat għal dawk l-akkordji li għalihom jista’ jiġi preżunt b’ċertezza suffiċenti li jissodisfaw il-kundizzjonijiet tal-Artikolu 81(3) tat-Trattat. Madanakollu, ma hemm l-ebda preżunzjoni li l-konsorzji li ma jibbenefikawx minn dan ir-Rogolament jaqgħu fl-ambitu tal-Artikolu 8(1) tat-Trattat jew, jekk jaqgħu f’dak l-ambitu, li ma jissodisfawx il-kundizzjonijiet tal-Artikolu 81(3) tat-Trattat. Meta jagħmlu valutazzjoni huma stess tal-kompatibbiltà tal-akkordju tagħhom mal-Artikolu 81 tat-Trattat, il-partijiet f’tali konsorzji jistgħu jikkunsidraw il-fatturi speċifiċi tas-swieq b’volumi trasportati żgħar jew sitwazzjonijiet fejn il-limitu tas-sehem mis-suq ikun inqabeż b’riżultat tal-preżenza fil-konsorzju ta’ trasportatur żgħir mingħajr riżorsi importanti u li ż-żieda tiegħu mas-sehem fis-suq globali tal-konsorzju ma tkunx sinifikanti.

(5)

Il-konsorzji, kif inhuma definiti f’dan ir-Regolament, ġeneralment jgħinu sabiex itejbu l-produttività tas-servizzi marittimi tal-linja disponibbli bis-saħħa tar-razzjonalizzazzjoni li jġibu magħhom fl-attivitajiet tal-kumpanniji membri u permezz tal-ekonomiji ta’ skala li jippermettu fl-operazzjoni ta’ bastimenti u l-użu ta’ faċilitajiet tal-port. Jgħinu wkoll sabiex jippromwovu progress tekniku u ekonomiku billi jiffaċilitaw u jinkoraġġixxu użu akbar ta’ kontejners u użu aktar effiċjenti tal-kapaċità tal-bastimenti. Għall-fini li jitwaqqaf u jitmexxa servizz konġunt, fattur essenzjali inerenti fil-konsorzji huwa l-possibbiltà li jsiru aġġustamenti tal-kapaċità b’rispons għaċ-ċaqlieq fl-offerta u d-domanda. B’kuntrast, limitazzjoni mhux ġustifikata tal-kapaċità u tal-bejgħ kif ukoll l-iffissar konġunt tar-rati tal-ġarr jew l-allokazzjoni tas-suq jew tal-konsumatur aktarx li ma jġibux magħhom l-effiċjenza. Għaldaqstant, l-eżenzjoni pprovduta minn dan ir-Regolament ma tridx tapplika għall-akkordji ta’ konsorzju li jkunu jinvolvu tali attivitajiet, irrispettivament mill-qawwa tas-suq tal-partijiet.

(6)

Sehem ġust mill-benefiċċji li jirriżultaw mill-effiċjenzi jrid jgħaddi għand l-utenti tat-trasport. L-utenti tas-servizzi marittimi pprovduti mill-konsorzji jistgħu jibbenefikaw mit-titjib fil-produttività li jistgħu jġibu magħhom il-konsorzji. Dawk il-benefiċċji jistgħu jieħdu l-forma wkoll ta’ titjib fil-frekwenza ta’ tbaħħir u waqfien fil-portijiet, jew titjib fl-iskedar kif ukoll kwalità aħjar u servizzi personalizzati permezz tal-użu ta’ bastimenti aktar moderni u tagħmir ieħor, inklużi faċilitajiet tal-port.

(7)

L-utenti jistgħu jibbenefikaw b’mod effettiv minn konsorzji biss jekk ikun hemm kompetizzjoni biżżejjed fl-oqsma li fihom joperaw il-konsorzji. Din il-kundizzjoni trid titqies li tkun ġiet sodisfatta meta konsorzju jibqa’ taħt limitu partikolari ta’ sehem fis-suq u għaldaqstant jista’ jiġi preżunt li jkun soġġett għal kompetizzjoni effettiva attwali jew potenzjali minn trasportaturi li ma jkunux jiffurmaw parti minn dak il-konsorzju. Sabiex ikun ivvalutat is-suq rilevanti, għandha tingħata konsiderazzjoni mhux biss lill-kummerċ dirett bejn il-portijiet servuti minn konsorzju iżda wkoll lil kull kompetizzjoni minn servizzi marittimi tal-linja oħra li jbaħħru minn portijiet li jistgħu jissostitwixxu dawk servuti mill-konsorzju u, fejn xieraq, lil mezzi oħra ta’ trasport.

(8)

Dan ir-Regolament ma jridx jeżenta akkordji li jkun fihom restrizzjonijiet tal-kompetizzjoni li mhumiex indispensabbli biex jintlaħqu l-għanijiet li jiġġustifikaw l-għoti tal-eżenzjoni. Għal dak il-għan, restrizzjonijiet anti-kompetittivi severi (restrizzjonijiet iebsa) marbuta mal-iffissar tal-prezzijiet mitluba lill-partijiet terzi, il-limitazzjoni tal-kapaċità jew tal-bejgħ u l-allokazzjoni tas-swieq jew tal-klijenti jridu jiġu esklużi mill-benefiċċju ta’ dan ir-Regolament. Minbarra l-attivitajiet li huma espressament eżentati minn dan ir-Regolament, iridu jkunu koperti biss minn dan ir-Regolament attivitajiet anċillari li huma marbuta direttament mal-operazzjoni tal-konsorzju, li jkunu neċessarji għall-implimentazzjoni tiegħu u li jkunu proporzjonati miegħu.

(9)

Il-limitu tas-sehem fis-suq u l-kundizzjonijiet l-oħra stipulati f’dan ir-Regolament, kif ukoll l-esklużjoni ta’ ċertu aġir mill-benefiċċju tiegħu, għandhom normalment jiżguraw li l-akkordji li għalihom tapplika l-eżenzjoni ġenerali ma jkunux joffru l-possibbiltà lill-kumpannija kkonċernati li jeliminaw il-kompetizzjoni f’parti sostanzjali mis-suq rilevanti kkonċernat.

(10)

Għall-valutazzjoni dwar jekk il-konsorzju jkunx jissodisfa l-kundizzjoni tas-sehem fis-suq, iridu jiżdiedu l-ishma fis-suq globali tal-membri tal-konsorzju. Is-sehem fis-suq ta’ kull membru jrid jieħu inkunsiderazzjoni l-volumi globali li huwa jittrasporta fi ħdan il-konsorzju u barra minnu. F’dan l-aħħar każ, iridu jittieħdu inkunsiderazzjoni l-volumi kollha trasportati minn membru fi ħdan konsorzju ieħor jew b’rabta ma’ kwalunkwe servizz ipprovdut individwalment mill-membru, kemm jekk dan ikun bil-bastimenti tiegħu stess jew inkella b’bastimenti ta’ parti terza skont l-arranġamenti kuntrattwali bħalma huwa n-noleġġ ta’ slots.

(11)

Barra minn hekk, il-benefiċċju tal-eżenzjoni ġenerali jrid ikun soġġett għad-dritt ta’ kull membru tal-konsorzju li jirtira mill-konsorzju bil-kundizzjoni li dan jagħti preavviż fi żmien raġonevoli. Madankollu, iridu jiġu previsti perjodu ta’ preavviż itwal u perjodu inizjali ta’ permanenza obbligatorja fil-każ ta’ konsorzji ferm integrati sabiex jittieħdu inkunsiderazzjoni l-investimenti akbar li jkunu saru sabiex jitwaqqfu u r-riorganizzazzjoni aktar estensiva meħtieġa fl-eventwalità li membru jitlaq.

(12)

F’każijiet partikolari li fihom l-akkordji li jaqgħu taħt dan ir-Regolament xorta jkollhom effetti inkompatibbli mal-Artikolu 81(3) tat-Trattat, il-Kummissjoni tista’ tirtira l-benefiċċju tal-eżenzjoni ġenerali, abbażi tar-Regolament tal-Kunsill (KE) Nru 1/2003 tas-16 ta’ Diċembru 2002 fuq l-implimentazzjoni tar-regoli tal-kompetizzjoni mniżżlin fl-Artikoli 81 u 82 tat-Trattat (5). F’dak ir-rigward, l-effetti negattivi li jistgħu jinbtu mill-eżistenza ta’ rabtiet bejn il-konsorzju u/jew il-membri tiegħu u konsorzji oħra u/jew trasportaturi marittimi tal-linja fl-istess suq rilevanti huma ta’ importanza partikolari.

(13)

Barra minn hekk, fejn akkordji għandhom effetti li huma inkompatibbli mal-Artikolu 81(3) tat-Trattat fit-territorju ta’ Stat Membru, jew f’parti minnu, li għandu l-karatteristiċi ta’ suq ġeografiku distint, l-awtorità tal-kompetizzjoni tal-Istat Membru tista’ tirtira l-benefiċċju tal-eżenzjoni ġenerali fir-rigward ta’ dak it-territorju skont ir-Regolament (KE) Nru 1/2003.

(14)

Dan ir-Regolament huwa bla ħsara għall-applikazzjoni tal-Artikolu 82 tat-Trattat.

(15)

Minħabba li r-Regolament (KE) Nru 823/2000 wasal biex jiskadi, huwa xieraq li jiġi adottat Regolament ġdid li jġedded l-eżenzjoni ġenerali,