4.9.2009 |
MT |
Il-Ġurnal Uffiċjali tal-Unjoni Ewropea |
L 233/1 |
REGOLAMENT TAL-KUNSILL (KE) Nru 803/2009
tas-27 ta’ Awwissu 2009
li jimponi dazju anti-dumping definittiv fuq importazzjonijiet ta’ ċerti fittings ta’ tubi u pajpijiet, tal-ħadid jew tal-azzar, li joriġinaw mir-Repubblika tal-Poplu taċ-Ċina u mit-Tajlandja, u dawk kunsinjati mit-Tajwan, kemm jekk dikjarati bħala oriġinarji mit-Tajwan, kif ukoll jekk mhumiex, u li jirrevoka l-eżenzjoni mogħtija lil Chup Hsin Enterprise Co. Ltd. u Nian Hong Pipe Fittings Co. Ltd.
IL-KUNSILL TAL-UNJONI EWROPEA,
Wara li kkunsidra t-Trattat li jistabbilixxi l-Komunità Ewropea,
Wara li kkunsidra r-Regolament tal-Kunsill (KE) Nru 384/96 tat-22 ta’ Diċembru 1995 dwar il-protezzjoni kontra l-importazzjonijiet li huma l-oġġett ta’ dumping minn pajjiżi mhux membri tal-Komunità Ewropea (1) (“ir-Regolament bażiku”), u b’mod partikolari l-Artikoli 11(2) u (3) u 13(4) tiegħu,
Wara li kkunsidra l-proposta mressqa mill-Kummissjoni, wara li kkonsultat lill-Kumitat Konsultattiv,
Billi:
A. PROĊEDURA
1. Il-miżuri fis-seħħ u l-investigazzjonijiet preċedenti
(1) |
Permezz tar-Regolament tal-Kunsill (KE) Nru 584/96 (2), ġie impost dazju antidumping definittiv fuq importazzjonijiet ta’ ċerti fittings ta’ tubi u pajpijiet tal-ħadid jew tal-azzar (“FTP” jew “il-prodott konċernat”), li joriġinaw, inter alia, fir-Repubblika tal-Poplu taċ-Ċina (“RPĊ”) u t-Tajlandja (“l-investigazzjoni oriġinali”). Skont l-Artikolu 13(3) tar-Regolament bażiku, dawn il-miżuri ġew estiżi bir-Regolament tal-Kunsill (KE) Nru 763/2000 (3) biex ikopru ċerti importazzjonijiet tal-prodott konċernat li huma kunsinjati mit-Tajwan, ibbażati fuq is-sejbiet tal-investigazzjoni ta’ kontra l-elużjoni. |
(2) |
Il-miżuri fis-seħħ bħalissa huma dazju antidumping definittiv imposti mir-Regolament tal-Kunsill (KE) Nru 964/2003 (4) fuq importazzjonijiet ta’ ċerti tubi jew pajpijiet aċċessorji, tal-ħadid u l-azzar, li joriġinaw mir-Repubblika tal-Poplu taċ-Ċina u t-Tajlandja (“il-pajjiżi konċernati”), u dawk kunsinjati mit-Tajwan, kemm jekk dikjarati bħala oriġinarji mit-Tajwan, kif ukoll jekk le, skont reviżjoni ta’ skadenza mal-Artikolu 11(2) tar-Regolament (“l-ewwel reviżjoni ta’ skadenza”). Id-dazju antidumping fis-seħħ huwa ta’ 58,6 % għar-Repubblika tal-Poplu taċ-Ċina u 58,9 % għat-Tajlandja minbarra għal Thai Benkan Co. Ltd. (0 %) u Awaji Materia Co. Ltd. (5) (7,4 %). Tliet kumpaniji Tajwaniżi, Chup Hsin Enterprise Co. Ltd, Rigid Industries Co. Ltd u Nian Hong Pipe Fittings Co. Ltd., huma eżentati mill-estensjoni tal-miżuri għat-Tajwan. |
(3) |
Permezz tad-Deċiżjoni tal-Kummissjoni 96/252/KE (6) ġew aċċettati impenji minn ċerti produtturi Tajlandiżi. Fl-2004, dawn l-impenji ġew irtirati permezz tar-Regolament tal-Kunsill (KE) Nru 1496/2004 (7) li jemenda r-Regolament tal-Kunsill (KE) Nru 964/2003. |
(4) |
Skont l-Artikolu 13(3) tar-Regolament bażiku, il-miżuri għall-prodott konċernat li joriġina fir-RPĊ ġew estiżi għal importazzjonijiet tal-istess prodott kunsinjat mill-Indoneżja bir-Regolament tal-Kunsill (KE) Nru 2052/2004 (8), mis-Sri Lanka bir-Regolament tal-Kunsill (KE) Nru 2053/2004 (9), u mill-Filippini bir-Regolament tal-Kunsill (KE) Nru 655/2006 (10), kemm jekk dikjarat li joriġina mill-Filippini, l-Indoneżja, u s-Sri Lanka kif ukoll jekk le. |
(5) |
Bħalissa hemm ukoll fis-seħħ miżuri antidumping imposti permezz tar-Regolament tal-Kunsill (KE) Nru 1001/2008 (11) fuq importazzjonijiet tal-prodott konċernat mir-Repubblika tal-Korea u l-Malażja. |
2. It-talbiet għar-reviżjonijiet
(6) |
Wara l-pubblikazzjoni ta’ avviż ta’ skadenza imminenti (12) tal-miżuri anti-dumping fis-seħħ fuq importazzjonijiet ta’ FTP li joriġinaw fir-RPĊ u t-Tajlandja, il-Kummissjoni rċeviet talba ta’ reviżjonijiet skont l-Artikolu 11(2) u (3) tar-Regolament bażiku. |
(7) |
It-talba tressqet fil-5 ta’ Marzu 2008 mill-Kumitat tad-Difiża tal-iSteel Butt-Welding Fittings Industry tal-Unjoni Ewropea (“l-applikant”) f’isem il-produtturi li jirrappreżentaw proporzjon maġġuri, f’dan il-każ aktar minn 50 %, tal-produzzjoni totali tal-Komunità ta’ FTP. |
(8) |
It-talba skont l-Artikolu 11(2) kienet ibbażata fuq ir-raġuni li l-iskadenza tal-miżuri x’ aktarx li tirriżulta f’kontinwazzjoni jew f’rikorrenza ta’ dumping u ta’ ħsara lill-industrija Komunitarja. |
(9) |
It-talba skont l-Artikolu 11(3) kienet ibbażata fuq informazzjoni mogħtija mill-applikant li, fir-rigward ta’ importazzjonijiet tal-prodott konċernat mir-RPĊ, il-miżura ma għadhiex biżżejjed biex tagħmel tajjeb għad-dumping ta’ ħsara, b’mod partikolari fejn għandha x’taqsam l-estensjoni tal-miżura għal importazzjonijiet kunsinjati mit-Tajwan. L-applikant ta evidenza prima facie li l-eżenzjoni tal-importazzjonijiet prodotti minn Chup Hsin Enterprise Co. Ltd, u Nian Hong Pipe Fittings Co. Ltd. mill-miżura estiża ma għadhiex iġġustifikata minħabba li dawn il-kumpaniji jidhru li huma involuti fi prattiċi ta’ elużjoni bħalma hija trażbord it-Tajwan ta’ FTP li joriġinaw fir-RPĊ. |
(10) |
Billi ddeterminat, wara konsultazzjoni mal-Kumitat Konsultattiv, li hemm biżżejjed evidenza biex tiġġustifika t-tnedija ta’ reviżjoni ta’ skadenza u ta’ reviżjoni parzjali interim, limitati għall-eżenzjoni ta’ FTP prodotti minn Chup Hsin Enterprise Co. Ltd, Kaohsiung (it-Tajwan) u Nian Hong Pipe Fittings Co. Ltd, Kaohsiung (it-Tajwan) mill-estensjoni tal-miżuri antidumping imposti fuq importazzjonijiet li joriġinaw fir-RPĊ kkunsinjati mit-Tajwan, il-Kummissjoni nediet reviżjonijiet (13) skont l-Artikolu 11(2) u (3) tar-Regolament bażiku (“ir-reviżjonijiet attwali”). |
3. L-investiġazzjoni
3.1. Il-partijiet konċernati mill-investigazzjoni
(11) |
Il-Kummissjoni avżat b’mod uffiċjali lill-produtturi Komunitarji applikanti, il-produtturi Komunitarji l-oħra, il-produtturi esportaturi fil-pajjiżi konċernati, l-importaturi/il-kummerċjanti, l-utenti u l-assoċjazzjonijiet tagħhom magħrufa li huma konċernati, kif ukoll, lir-rappreżentanti tal-gvernijiet tal-pajjiżi esportaturi, dwar it-tnedija tar-reviżjoni. |
(12) |
Il-Kummissjoni bagħtet kwestjonarji lil dawn il-partijiet kollha u lil dawk li introduċew ruħhom fiż-żmien stipulat fl-avviż tat-tnedija. Il-Kummissjoni tat ukoll l-opportunità lill-partijiet interessati li jippreżentaw il-fehmiet tagħhom bil-miktub u li jitolbu seduta fil-limitu ta’ żmien stipulat fl-avviż tat-tnedija. |
(13) |
Bħala riżultat ta’ dan, it-tweġibiet tal-kwestjonarju waslu miż-żewġ produtturi esportaturi fit-Tajwan u t-tliet produtturi Komunitarji li ntagħżlu bħala kampjun kif ukoll it-tliet importaturi mhux relatati li ntagħżlu bħala kampjun fil-Komunità (ara l-premessi (14) sa (17) hawn taħt). |
3.2. Kampjunament
(14) |
Fid-dawl tal-għadd apparentament għoli ta’ produtturi esportaturi fir-RPĊ, importaturi mhux relatati tal-prodott konċernat fil-Komunità u produtturi Komunitarji li appoġġjaw it-talba, il-kampjunament ġie previst fl-avviż tat-tnedija, skont l-Artikolu 17 tar-Regolament bażiku. Biex tkun tista’ tiddeċiedi jekk il-kampjunament huwiex neċessarju u, jekk dan ikun il-każ, biex tagħżel kampjun, il-Kummissjoni talbet lil dawn il-partijiet biex jagħtu l-informazzjoni elenkata fl-avviż tat-tnedija fit-Taqsima 5.1.(a) (i) sa (iii) u bagħtet formoli għall-kampjunament fejn talbet informazzjoni speċifika dwar il-volum ta’ bejgħ u l-prezzijiet medji ta’ kull produttur Komunitarju, kull produttur esportatur u kull importatur konċernat. |
(15) |
Ma waslet l-ebda tweġiba minn l-ebda produttur esportatur Ċiniż jew Tajlandiż, u għalhekk il-kampjunament ma kienx applikabbli. |
(16) |
Disa’ produtturi Komunitarji wieġbu għall-formola ta’ kampjunament. Intgħażel kampjun ta’ erba’ produtturi Komunitarji bbażat fuq il-volum tal-bejgħ tagħhom fis-suq tal-Komunità matul il-perjodu tal-investigazzjoni tar-reviżjoni. Dawn il-produtturi ntalbu biex jimlew il-kwestjonarju kollu. Waħda mill-kumpaniji magħżula sussegwentement ma mlietx il-kwestjonarju kollu u għalhekk ġiet eskluża mill-kampjun. Il-kampjun finali ta’ tliet kumpaniji kien jgħodd għal aktar minn 59 % tal-produzzjoni totali tal-industrija tal-Komunità u kien jirrappreżenta 62 % tal-volum tal-bejgħ tal-industrija Komunitarja fis-suq tal-Komunità. |
(17) |
F’dak li għandhom x’jaqsmu l-produtturi tal-prodott konċernat, disgħa wieġbu għall-formola tat-teħid tal-kampjuni. Intagħżel kampjun ta’ erba’ importaturi ibbażat fuq il-volum tal-importazzjonijiet tagħhom tal-prodotti konċernati lejn il-Komunità mill-pajjiżi konċernati matul il-perjodu tal-investigazzjoni tar-reviżjoni. Minkejja dan, waħda mill-kumpaniji sussegwentement ma mlietx il-kwestjonarju kollu u għalhekk ġiet eskluża mill-kampjun. |
3.3. L-investigazzjoni u ż-żjarat ta’ verifika
(18) |
Il-Kummissjoni fittxet u vverifikat l-informazzjoni kollha meqjusa neċessarja għall-iskopijiet tad-determinazzjoni tal-kontinwazzjoni jew rikorrenza probabbli ta’ dumping u ħsara u tal-interess Komunitarju u biex tivverifika jekk l-eżenzjoni ta’ ċerti FTP prodotti mill-kumpaniji msemmija hawn fuq fil-premessa (9) mill-estensjoni tal-miżuri antidumping li hemm fis-seħħ kontra r-RPĊ għadhiex ġustifikata biex tagħmel tajjeb għad-dumping ta’ ħsara. Iż-żjarat ta’ verifika twettqu fl-istabbilimenti tal-kumpaniji li ġejjin:
|
3.4. Il-perjodu tal-investigazzjoni tar-reviżjoni
(19) |
L-investigazzjoni tal-kontinwazzjoni jew tar-rikorrenza tad-dumping kopriet il-perjodu mill-1 ta’ April 2007 sal-31 ta’ Marzu 2008 (“il-perjodu tal-investigazzjoni tar-reviżjoni” jew il-“PIR”). L-investigazzjoni tax-xejriet rilevanti għal-valutazzjoni tal-probabbiltà ta’ kontinwazzjoni jew rikorrenza tal-ħsara kopriet il-perjodu mill-1 ta’ Jannar 2004 sa tmiem il-PIR (il-“perjodu meqjus”). |
B. IL-PRODOTT KONĊERNAT U L-PRODOTT SIMILI
1. Il-prodott li qed jiġi kkunsidrat
(20) |
Il-prodott li għaddej minn reviżjoni huwa l-istess bħal dak fl-investigazzjoni oriġinali u fl-ewwel reviżjoni ta’ skadenza: ċerti fittings ta’ tubi u pajpijiet (għajr fittings fonduti, flanġijiet u fittings bil-kamin), tal-ħadid jew tal-azzar (ma jinkludix l-istainless steel), b’dijametru estern massimu ta’ 609,6 mm, tat-tip li jiġi użat għall-issaldjar jew xi użi oħra, li joriġinaw mir-Repubblika tal-Poplu taċ-Ċina u t-Tajlandja. |
(21) |
Il-PTP huma mmanifatturati essenzjalment permezz tal-qtugħ u l-iffurmar ta’ tubi u pajpijiet. Jintużaw biex jgħaqqdu t-tubi u l-pajpijiet u jistgħu jkunu ta’ għamliet differenti: liwjiet, kmiem ta’ riduzzjoni, forom ta’ “T” u tappijiet, kif ukoll qisien u gradi materjali differenti. Dawn jintużaw prinċipalment fl-industrija tal-petrokimika, tal-bini, tal-ġenerazzjoni tal-enerġija, tal-bini tal-bastimenti u l-istallazzjonijiet industrijali. Meta jinbiegħu biex jintużaw fl-industrija petrokimika, l-istandard globali użat huwa l-istandard ANSI. Għal għanijiet oħra, l-aktar standard komuni użat fil-Komunità huwa l-istandard DIN. |
2. Il-prodott simili
(22) |
Bħalma ġara fl-investigazzjoni oriġinali u l-ewwel reviżjoni ta’ skadenza, instab li l-FTP prodotti fil-pajjiżi konċernati, mibjugħa lokalment u/jew esportati lejn il-Komunità, għandhom l-istess karatteristiċi fiżiċi, tekniċi u kimiċi bażiċi u l-istess użi finali bħall-prodotti mibjugħa fil-Komunità mill-produtturi Komunitarji applikanti u għalhekk jitqiesu li huma prodotti simili fi ħdan it-tifsira tal-Artikolu 1(4) tar-Regolament bażiku. |
C. IL-PROBABBILTÀ TA’ KONTINWAZZJONI JEW RIKORRENZA TA’ DUMPING
(23) |
Skont l-Artikolu 11(2) tar-Regolament bażiku, ġie investigat jekk l-iskadenza tal-miżuri x’aktarx li twassal għal kontinwazzjoni jew rikorrenza ta’ dumping. |
1. Il-kummenti preliminari
(24) |
Kif imsemmi hawn fuq, fin-nuqqas ta’ kooperazzjoni minn kwalunkwe produttur esportatur fir-RPĊ u t-Tajlandja, din l-investigazzjoni kellha tiġi bbażata fuq informazzjoni disponibbli għall-Kummissjoni minn sorsi oħra, bħalma hija t-talba ta’ reviżjoni, l-Eurostat, l-istatistika tad-Dwana Ċiniża, u l-informazzjoni miġbura fil-pajjiż analogu. |
2. It-Tajlandja
(a)
(25) |
Skont l-Artikolu 18 tar-Regolament bażiku, u fin-nuqqas ta’ kwalunkwe kooperazzjoni mill-produtturi esportaturi Tajlandiżi, il-valur normali kien ibbażat fuq id-data mogħtija fit-talba, jiġifieri l-ispiża stmata tal-manifattura fit-Tajlandja li magħha żdied 15 % għall-ispejjeż ġenerali u amministrattivi u 11 % għall-qligħ. Ma kien hemm l-ebda indikazzjoni li dan il-livell ta’ qligħ għandu jaqbeż il-qligħ li normalment isir minn esportaturi jew produtturi oħra minn bejgħ ta’ prodotti tal-istess kategorija ġenerali fis-suq doemstiku tal-pajjiż tal-oriġini kif previst fl-Artikolu 2(6)(c). |
(b)
(26) |
Skont l-Artikolu 18 tar-Regolament bażiku, u fin-nuqqas tal-kooperazzjoni minn produtturi esportaturi Tajlandiżi, il-prezz tal-esportazzjoni ġie kkalkulat billi ntużat id-data tal-Eurostat. Dawn iċ-ċifri ġew aġġustati skont it-tipi ta’ prodott proporzjonalment għat-tunnellaġġ ta’ kull tip ta’ prodott abbażi tal-informazzjoni mogħtija fit-talba. |
(c)
(27) |
Biex jiġi żgurat tqabbil ġust il-prezz tal-esportazzjoni ġie aġġustat għat-trasport intern u bil-baħar, l-assigurazzjoni, il-kummissjonijiet u l-imballaġġ skont l-Artikolu 2(10) tar-Regolament bażiku. |
(d)
(28) |
Biex tikkalkula l-marġini tad-dumping, il-Kummissjoni qabblet il-valur normali medju bil-piż differenzjat mal-prezz medju tal-esportazzjoni lejn il-Komunità f’livell ex fabbrika u fl-istess livell tal-kummerċ, skont l-Artikolu 2(11) tar-Regolament bażiku. Dan it-tqabbil wera l-eżistenza ta’ maġini ta’ dumping għat-Tajlandja ta’ 17,8 %, li huwa daqs l-ammont li bih il-valur normali stabbilit qabeż il-prezz tal-esportazzjoni. |
3. Ir-Repubblika tal-Poplu taċ-Ċina
(a)
(29) |
Il-miżuri eżistenti jipprevedu dazju wieħed għall-pajjiż kollu fuq l-importazzjonijiet kollha fil-Komunità tal-prodott simili li joriġina fir-RPĊ. Għalhekk, il-valur normali kien iddeterminat fuq il-bażi tal-informazzjoni miksuba f’ekonomija tas-suq ta’ pajjiż terz (“il-pajjiż analogu”). Fl-investigazzjoni oriġinali t-Tajlandja kien il-pajjiż li ntagħżel bħala l-pajjiż analogu. Minkejja dan, l-Istati Uniti tal-Amerika kienet maħsuba bħala l-pajjiż analogu fl-avviż tat-tnedija minħabba li l-industrija tal-Komunità fit-talba tagħha għal reviżjoni indikat li bħalissa kienet għażla iktar adattata milli t-Tajlandja. Minkejja dan, saru l-isforzi kollha biex jinstabu alternattivi possibbli f’pajjiżi terzi oħra, iżda l-ebda kumpanija ma qablet li tikkoopera, minbarra kumpanija waħda fl-Istati Uniti tal-Amerika. |
(30) |
L-għażla tal-Istati Uniti tal-Amerika, skont l-Artikolu 2(7) tar-Regolament bażiku, kienet meqjusa bħala adattata minħabba d-daqs tas-suq tagħha, il-livell tal-importazzjonijiet u l-kompetizzjoni b’saħħitha f’dan is-suq li tirriżulta minnhom. Minbarra dan, minħabba li l-ebda esportatur Tajlandiz ma kkoopera fl-investigazzjoni, tqies bħala xieraq li l-valur normali għar-RPĊ jiġi bbażat fuq id-data verifikata tal-kumpanija Amerikana li kkooperat. Bl-istess mod, ma wasal l-ebda kumment minn xi parti interessata wara l-pubblikazzjoni tal-avviż tat-tnedija dwar il-proposta li jintużaw l-Istati Uniti tal-Amerika bħala pajjiż analogu. B’riżultat ta’ dan, il-valur normali ġie bbażat fuq id-data mogħtija mill-produttur fl-Istati Uniti tal-Amerika. |
(b)
(31) |
Għal dak li għandu x’jaqsam mal-esportazzjonijiet lill-Komunità, ladarba l-ebda produttur esportatur fir-RPĊ ma kkpopera, is-sejbiet kellhom jiġu bbażati fuq il-fatti disponibbli, skont l-Artikolu 18(1) tar-Regolament bażiku. Il-prezz tal-esportazzjoni ġie ddeterminat fuq il-bażi tal-istatistika Ċiniża tad-dwana, wara li ssegwiet l-istess metodoloġija bħal fl-investigazzjoni oriġinali. Din id-data ġiet ipparagunata ma’ data mill-Eurostat. Instabu differenzi konsiderevoli kemm fil-kwantità kif ukoll fil-prezz. Fuq il-bażi ta’ evidenza dokumentata qabel ta’ elużjoni mir-RPĊ li tindika li l-użu tad-data tal-Eurostat ma kienx preċiż biżżejjed, tqies li jkun xieraq li ma jintużawx f’din ir-reviżjoni. |
(c)
(32) |
Għall-għan ta’ tqabbil ġust, u skont l-Artikolu 2(10) tar-Regolament bażiku, saret allokazzjoni dovuta fil-forma ta’ aġġustamenti għad-differenzi fir-rigward tat-trasport (trasport bil-baħar), l-ispejjeż tal-assigurazzjoni, l-ispiża tal-kreditu u l-ħlasijiet lill-intermedjaturi, li tqiesu li jaffettwaw il-prezzijiet u t-tqabbil tal-prezz. |
(d)
(33) |
Skont l-Artikolu 2(11) tar-Regolament bażiku, il-valur normali medju differenzjat, fuq bażi ex fabbrika tal-Istati Uniti tal-Amerika, tqabbel mal-prezz medju differenzjat tal-esportazzjoni, fuq bażi ex fabbrika taċ-Ċina, fl-istess livell tal-kummerċ. It-tqabbil ta’ hawn fuq wera l-eżistenza ta’ marġini tad-dumping ta’ 100 % għar-RPĊ. |
(e)
(34) |
L-investigazzjoni żvelat li, l-importazzjonijiet miż-żewġ pajjiżi ssuktaw fil-livelli għolja ta’ dumping. L-investigazzjoni ma żvelatx xi raġuni li għaliha l-livell ta’ dumping jista’ jisparixxi jew jonqos fil-każ li kieku l-miżuri kellhom jiġu revokati. Għalhekk ġie konkluż li hemm probabbiltà ta’ kontinwazzjoni tad-dumping. Barra minn hekk, għandu jiġi nnutat li, minkejja l-livell għoli tad-dazji antidumping imposti fuq l-esportazzjonijiet tagħhom, il-volumi ta’ importazzjonijiet minn dawn il-pajjiżi żdiedu b’mod massiv. Madankollu, tqies xieraq li jiġi investigat ukoll jekk ikunx hemm rikorrenza ta’ dumping f’volumi miżjuda tal-esportazzjoni jekk il-miżuri eżistenti jiġu revokati. |
4. L-iżvilupp tal-importazzjonijiet jekk il-miżuri jiġu revokati
(35) |
Bl-iskop tal-investigazzjoni tal-probabbiltà ta’ rikorrenza ta’ dumping, ġew ivvalutati l-fatturi li ġejjin: l-evoluzzjoni tal-esportazzjoni u/jew il-kapaċità tal-produzzjoni tal-pajjiżi konċernati, l-isfond tal-elużjoni fil-każ tar-RPĊ u l-qagħda fl-imġiba tal-esportazzjoni fis-swieq ta’ pajjiżi terzi. |
5. It-Tajlandja
(36) |
Fin-nuqqas ta’ kooperazzjoni minn kwalunkwe produttur esportatur Tajlandiż, din l-investigazzjoni kellha tiġi bbażata fuq l-informazzjoni disponibbli għall-Kummissjoni minn sorsi oħra, jiġifieri t-talba. Il-kapaċità annwali ta’ produzzjoni Tajlandiża kienet stmata skont it-talba, għal 63 000 tunnellata, għal konsum domestiku ta’ 4 200 tunnellata biss, li tagħmel l-industrija Tajlandiża dipendenti bil-kbir fuq l-esportazzjonijiet. Il-produzzjoni annwali kienet stmata għal madwar 38 000 tunnellata. B’riżultat ta’ dan, il-kapaċità supplementari kienet stmata għal 25 000 tunnellata. |
(37) |
L-investigazzjoni wriet li l-ebda suq ieħor madwar id-dinja ma jista’ jassorbi din il-kapaċità disponibbli minħabba li t-Tajlandja hija diġà suġġetta għal miżuri antidumping. Dawn il-miżuri jifirxu minn 10,68 % sa 52,6 % fl-Istati Uniti tal-Amerika għal prodott li għandu ħafna inkomuni ma’ dak konċernat f’din l-investigazzjoni, limitat għal dijamentru intern ta’ 14-il pulzier. Barra dan, abbażi tal-esperjenza tal-imgħoddi u skont it-talba għal din ir-reviżjoni, jidher li teżisti sovrakapaċità enormi li tifrex mad-dinja kollha u speċjalment fl-Ażja tax-Xlokk. |
(38) |
Konsegwentement, jekk il-miżuri jitħallew jiskadu, probabbli li parti sostanzjali tal-kapaċità eċċessiva Tajlandiża tiġi diretta lejn is-suq tal-UE, fid-dawl tar-restrizzjonijiet attwali u l-livell għoli ta’ miżuri fis-seħħ fi swieq ewlenin oħra. |
6. Ir-Repubblika tal-Poplu taċ-Ċina
(a)
(39) |
Fid-dawl tan-nuqqas tal-koperazzjoni minn produtturi esportaturi Ċiniżi, is-servizzi tal-Kummissjoni kellhom jagħmlu użu mill-fatti disponibbli. Minħabba li ftit informazzjoni hija magħrufa dwar l-industrija Ċiniża, il-konklużjonijiet li ġejjin jorbtu fuq l-informazzjoni miġbura fit-talba u l-istatistika tad-dwana Ċiniża. Sostenn għal dawn is-sejbiet instab ukoll fl-informazzjoni li kienet saret pubblika fil-qafas ta’ proċedimenti simili fl-Istati Uniti tal-Amerika. |
(40) |
Skont dawn is-sorsi, il-kapaċità totali tal-produzzjoni Ċiniża għall-prodott konċernat kienet ta’ madwar 365 000 tunnellata kull sena. Il-volum anwali attwali tal-produzzjoni Ċiniża, kif stmat fit-talba, kien madwar 291 000 tunnellata. Din l-istima ġiet ibbażata fuq il-volum Ċiniż tal-esportazzjoni mad-dinja kollha mogħti mill-istatistika tad-dwana kummerċjali (madwar 70 000 tunnellata fis-sena), u fuq il-konsum domestiku stmat għal madwar 221 000 tunnellata fis-sena. |
(41) |
Fuq din il-bażi, il-kapaċità Ċiniża supplementari għandha tilħaq l-74 000 tunnellata li waħidha kienet kważi biżżejjed biex tforni l-konsum totali tal-UE (79 813 tunnellata). |
(42) |
Minħabba li r-RPĊ, bħat-Tajlandja, hija wkoll suġġetta għal miżuri antidumping li jestendu minn 35,06 % għal 182,9 % fl-Istati Uniti tal-Amerika huwa probabbli li parti sostanzjali tal-kapaċità Ċiniża eċċessiva tiġi diretta lejn is-suq tal-UE. |
(43) |
Il-fatt li, minkejja l-eżistenza ta’ dazji antidumping għolja (58,6 %) fis-seħħ kontra l-importazzjonijiet Ċiniżi, il-produtturi esportaturi Ċiniżi rnexxielhom iżidu sostanzjalment l-esportazzjonijiet tagħhom lejn l-UE minn 2 550 tunnellata fl-2004 għal 10 268 tunnellata fil-PIR jindika l-interess qawwi ssuktat tal-esportaturi Ċiniżi fis-suq tal-UE. |
7. L-isfond għall-elużjoni
(44) |
Barra dan, l-esportaturi Ċiniżi wrew id-determinazzjoni ssuktata tagħhom għall-esportazzjoni lejn l-UE bi kwalunkwe mezz kif jixhdu l-attentati numerużi ta’ elużjoni tal-miżuri imposti permezz tar-Regolament (KE) Nru 964/2003 billi jesportaw billi jgħaddu suċċessivament mit-Tajwan, l-Indoneżja, is-Sri Lanka u l-Filippini. |
(45) |
Saħansitra joħroġ iktar biċ-ċar, abbażi tal-istatistika tad-dwana Ċiniża, li l-UE hija suq attraenti ħafna għall-produtturi esportaturi Ċiniżi minħabba li kisbu wħud mill-ogħla prezzijiet ta’ esportazzjoni (minkejja li huma l-oġġett ta’ dumping) meta esportaw lejn l-UE. |
8. Konklużjoni
(46) |
L-investigazzjoni wriet li kemm il-produtturi esportaturi fir-RPĊ kif ukoll dawn fit-Tajlandja ssuktaw il-prassi tagħhom tad-dumping tagħhom matul il-PIR. |
(47) |
Iż-żewġ pajjiżi f’daqqa laħqu d-99 000 tunnellata ta’ kapaċità supplementari li kienet ikbar ferm mill-produzzjoni totali tal-Komunità matul il-PIR (86 723 tunnellata) u saħansitra ikbar mill-konsum totali tal-Komunità matul l-istess perjodu (79 813 tunnellata). |
(48) |
Minħabba l-fatt li r-RPĊ għandha kapaċità ta’ produzzjoni supplementari kbira ħafna disponibbli u li kenet diġà wettqet elużjoni tal-miżuri, hemm probabbiltà qawwija li l-produtturi esportaturi Ċiniżi jżidu sostanzjalment l-esportazzjoniet tagħhom li huma l-oġġett ta’ dumping tal-prodott konċernat lejn il-Komunità f’każ li l-miżuri attwali jiġu revokati. |
(49) |
Fir-rigward tat-Tajlandja għandu jiġi nnutat li minn mindu l-kumpaniji Tajlandiżi huma orjentati lejn l-esportazzjoni u fid-dawl tal-attrazzjoni tas-suq tal-Komunità, huwa probabbli ħafna illi, jekk il-miżuri attwali jiġu revokati, dawn il-kumpaniji jerġgħu jibdew jesportaw il-prodott konċernat lis-suq tal-Komunità f’volumi sostanzjali u bi prezzijiet li huma l-oġġett ta’ dumping. |
(50) |
Fl-aħħar nett, qed issir referenza għall-prassi ta’ dumping minn produtturi esportaturi Ċiniżi u Tajlandiżi fis-suq tal-Istati Uniti u l-miżuri antidumping tal-Istati Uniti li ġġeddu f’Ottubru 2005. |
(51) |
Fil-qosor, huwa ferm probabbli li l-importazzjonijiet lejn il-Komunità mill-pajjiżi konċernati jissuktaw fi kwantitajiet sinifikanti u fi prezzijiet li jkunu l-oġġett ta’ dumping, jekk il-miżuri jiġu revokati. |
D. ID-DEFINIZZJONI TAL-INDUSTRIJA KOMUNITARJA
(52) |
L-industrija Komunitarja, skont l-Artikolu 4(1) tar-Regolament bażiku kienet magħmula minn tliet produtturi tal-Komunità li f’isimhom tressqet it-talba u li ntagħżlu wkoll fil-kampjun kif ukoll sitt produtturi tal-Komunità li appoġġjaw din it-talba. Fuq din il-bażi, l-industrija Komunitarja kienet tirrappreżenta proporzjon maġġuri tal-produzzjoni totali tal-Komunità, jiġifieri f’dan il-każ iktar minn 76 %. |
E. IL-QAGĦDA FIS-SUQ KOMUNITARJU
1. Il-konsum fis-suq Komunitarju
(53) |
Il-produzzjoni totali tal-Komunità ġiet iddeterminata fuq il-bażi tal-informazzjoni mogħtija mid-disa’ produtturi tal-Komunità li appoġġjaw il-kwerela u l-volum stmat ta’ produzzjoni tal-produtturi tal-Komunità li ma kkooperawx mogħti fit-talba. |
(54) |
L-invstigazzjoni żvelat li parti konsiderevoli tal-bejgħ tal-produtturi tal-Komunità kienet saret lil bejjiegħa bl-ingrossa li min-naħa tagħhom imbagħad esportaw il-prodott konċernat ‘il barra mill-Komunità, jiġifieri dan il-bejgħ ma kienx bil-ħsieb għall-konsum fis-suq tal-Komunità. Il-volum ta’ bejgħ ta’ esportazzjoni minn dawn il-bejjigħa bl-ingrossa lil pajjiżi terzi oħra ma setax jiġi stabbilit matul l-investigazzjoni. Il-konsum viżibbli tal-Komunità ġie għalhekk stabbilit fuq il-bażi tal-volum totali ta’ produzzjoni fil-Komunità kif definit hawn fuq fil-premessa (53), u fuq il-volum tal-importazzjoni u l-esportazzjoni totali tal-Komunità tal-prodott konċernat ibbażat fuq id-data tal-Eurostat. |
(55) |
Fuq din il-bażi, matul il-perjodu meqjus, il-konsum Komunitarju żdied bi 28 %, minn 62 317-il tunnellata fl-2004 għal 79 813-il tunnellata matul il-PIR. Tabella 1 – Il-konsum Komunitarju
|
2. L-importazzjonijiet attwali mill-pajjiżi konċernati
(a)
(56) |
Biex jiġu stabbiliti l-volumi totali ta’ importazzjoni tal-prodott konċernat mir-RPĊ, tqies bħala xieraq li jiġu inklużi importazzjonijiet minn dawk il-pajjiżi li għalihom ġew estiżi l-miżuri antidumping attwali skont l-Artikolu 13(3) tar-Regolament bażiku, jiġifieri is-Sri Lanka, l-Indoneżja, il-Filippini u t-Tajwan (ara l-premessa (2) u (4) hawn fuq). Fil-fatt, tqies li l-importazzjonijiet minn dawn il-pajjiżi kienu fil-fatt prodotti li joriġinaw fir-RPĊ. Fuq din il-bażi, il-volum totali ta’ importazzjoni ta’ FTP mir-RPĊ u t-Tajlandja żdiedu minn 6 861 tunnellata fl-2004 għal 17 605 tunnellati matul il-PIR, jiġifieri b’157 %. Is-sehem mis-suq ta’ dawn l-importazzjonijiet, espressi bħala perċentwali tal-konsum Komunitarju, żdied minn 11 % fl-2004 għal 22 % fil-PIR. Tabella 2 – L-importazzjonijiet mill-pajjiżi konċernati
|
(b)
(57) |
Fin-nuqqas ta’ kooperazzjoni mill-produtturi esportaturi fir-RPĊ u t-Tajlandja, il-prezz tal-esportazzjoni ġie bbażat fuq id-data tal-Eurostat. Għar-raġunijiet stipulati hawn fuq fil-premessa (56), il-prezz medju tal-esportazzjoni mir-RPĊ kien ibbażat ukoll fuq il-prezzijiet medji tal-esportazzjoni mis-Sri Lanka, l-Indoneżja u l-Filippini, jiġifieri l-pajjiżi li għalihom ġew estiżi l-miżuri minħabba prassi ta’ elużjoni. Fuq din il-bażi, matul il-perjodu kkunsidrat, il-prezz medju tal-esportazzjoni tal-prodott konċernat mir-RPĊ, inkluża l-elużjoni, żdied bi 17 % minn 997 EUR/tunnellata għal 1 169 EUR/tunnellata, mit-Tajlandja b’69 % minn 1 223 EUR/tunnellata għal 2 067 EUR/tunnellata u mit-Tajwan bi 22 % minn 1 412 EUR/tunnellata għal 1 718 EUR/tunnellata. B’mod ġenerali, il-prezz medju tal-prodott mill-pajjiżi konċernati inkluż it-Tajwan żdied minn EUR 1 137 fl-2004 għal EUR 1 479 fil-PIR, jiġifieri bi 30 %. Matul l-istess perjodu, l-ispiża tal-produzzjoni żdiedet b’mod konsiderevoli minħabba ż-żieda fil-prezz tal-materja prima bażika, jiġifieri t-tubu tal-azzar. |
(58) |
Tqabbil bejn il-prezzijiet ex fabbrika tal-produtturi tal-Komunità li ttieħdu bħala kampjun mal-prezzijiet tal-Eurostat aġġustat kif xieraq, wera twaqqigħ tal-prezz fuq bażi medja għar-RPĊ ta’ 54,8 %, għat-Tajlandja ta’ 20 % u għat-Tajwan 33,5 %. |
3. L-importazzjonijiet minn pajjiżi terzi oħra
(59) |
Id-dazji antidumping huma fis-seħħ fuq importazzjonijiet mir-Repubblika tal-Korea u l-Malażja; l-importazzjonijiet minn dawn il-pajjiżi naqsu għal livell baxx ħafna matul il-perjodu meqjus (jiġifieri inqas minn 1 % tal-konsum tal-Komunità) kif rappurtat mill-Eurostat. |
(60) |
Il-volumi totali ta’ importazzjoni ta’ FTP minn pajjiżi terzi minbarra dawk imsemmija fil-premessa preċedenti żdiedu minn 4 679 tunnellata fl-2004 għal 10 563 tunnellata fl-aħħar tal-PIR, jiġifieri b’126 %. Is-sehem mis-suq ta’ dawn l-importazzjonijiet laħaq it-13 % tal-konsum tal-Komunità. Dan ifisser żieda ta’ 76 % fil-perjodu meqjus minn 8 % għal 13 %. Tabella 3 – L-importazzjonijiet u s-sehem mis-suq ta’ importazzjonijiet minn pajjiżi terzi oħra
Tabella 4 – L-importazzjonijiet ewlenin lejn il-Komunità
|
4. Il-qagħda ekonomika tal-industrija Komunitarja
4.1. Ir-rimarka preliminari
(61) |
Ix-xejriet tal-indikaturi ekonomiċi bħalma huma produzzjoni, kapaċità ta’ produzzjoni, użu tal-kapaċità, impjieg, produttività, bejgħ, sehem mis-suq u tkabbir ġew ivvalutati fuq il-bażi tat-tagħrif miġbur mill-produtturi kollha tal-Komunità, filwaqt li x-xejriet fir-rigward ta’ prezzijiet, profittabbiltà, likwidità, kapaċità li jinkiseb il-kapital u l-investimenti, ħażniet, introjtu mill-investiment u pagi ġew ivvalutati abbażi tat-tagħrif verifikat mogħti fit-tweġiba sħiħa għall-kwestjonarju mill-produtturi tal-Komunità li ntgħażlu bħala kampjun. |
4.2. Data relatata mal-industrija Komunitarja komplessivament
(a)
(62) |
Il-produzzjoni globali tal-industrija Komunitarja żdiedet bi 8 % matul il-perjodu meqjus, filwaqt li l-kapaċità ta’ produzzjoni żdiedet b’5 %. Matul l-istess perjodu l-użu tal-kapaċità żdiedet bi ftit. Madankollu, dan għandu jitqies fid-dawl taż-żieda ta’ 28 % fil-konsum Komunitarju. Tabella 5 – Il-produzzjoni, il-kapaċità tal-produzzjoni u l-użu tal-kapaċità
|
(b)
(63) |
Il-livell ta’ impjieg fi ħdan l-industrija Komunitarja baqa’ relattivament stabbli, minbarra fl-2005, fejn wera tnaqqis ta’ 1 % matul il-perjodu sħiħ meqjus. Il-produttività, imkejla bħala produzzjoni f’tunnellati għal kull persuna impjegata, żdiedet b’9 %. Tabella 6 – L-impjieg u l-produttività
|
(c)
(64) |
Il-volum ta’ bejgħ tal-industrija tal-Komunità lill-klijenti mhux relatati fis-suq tal-Komunità żdied b’4 %, minn 59 399 tunnellata fl-2004 għal 61 991 tunnellata fil-PIR. Minkejja dan, is-sehem mis-suq tal-industrija Komunitarja naqas b’mod kostanti matul il-perjodu meqjus. Għalhekk, is-sehem globali mis-suq miżmum mill-industrija tal-Komunità naqas b’21 %. Kif spjegat hawn fuq, parti konsiderevoli tal-prodotti tal-Komunità tinbiegħ għall-esportazzjoni permezz ta’ bejjiegħa bl-ingrossa. Għalhekk, is-sehem mis-suq ġie espress bħala proporzjon tal-produzzjoni Komunitarja totali meta tneħħi l-esprtazzjonijiet totali fil-konsum Komunitarju viżibbli. Tabella 7 – Il-volum tal-bejgħ u s-sehem mis-suq
|
(d)
(65) |
Filwaqt li l-konsum Komunitarju kiber bi 28 % bejn l-2004 u l-PIR, it-tnaqqis ta’ 21 % fis-sehem mis-suq tal-industrija tal-Komunità u ż-żieda parallela fl-importazzjonijiet mill-pajjiżi konċernati juru biċ-ċar li l-industrija tal-Komunità ma setgħatx tipparteċipa fit-tkabbir tas-suq. |
(e)
(66) |
Meta jitqies il-volum, is-sehem tas-suq u l-prezzijiet tal-importazzjonijiet li huma l-oġġett ta’ dumping mill-pajjiżi konċernati, ma jistax jitqies li l-impatt fuq l-industrija Komunitarja tal-marġini effettivi tad-dumping huwa wieħed negliġibbli. |
(f)
(67) |
Kif muri mill-evoluzzjoni pożittiva tal-biċċa l-kbira tal-indikaturi elenkati hawn fuq, fis-snin 2004 sal-bidu tal-2008, il-qagħda ekonomika tal-industrija Komunitarja rkuprat b’mod parzjali mill-effett ta’ ħsara ta’ importazzjonijiet li huma l-oġġett ta’ dumping li joriġinaw fil-pajjiżi konċernati. |
4.3. Data relatata biss mal-produtturi Komunitarji kampjunati
(a)
(68) |
Il-ħażniet żdiedu bi 3 % matul il-perjodu sħiħ meqjus. Il-livelli ta’ ħażniet kienu ogħla b’mod sinifikanti fl-2007 u dan kien dovut għaż-żieda fil-prezzijiet tat-tubi tal-azzar li wasslet biex il-kumpaniji jiġbru aktar ħażniet. Tabella 8 – Il-ħażniet
|
(b)
(69) |
Matul il-perjodu meqjus il-prezzijiet medji ta’ bejgħ miżmuma mill-produtturi Komunitarji meħuda bħala kampjun fis-suq Komunitarju żdiedu gradwalment. Iż-żieda totali bejn l-2004 u l-PIR kienet ta’ 57 %. Din iż-żieda hija spjegata parzjalment miż-żieda fl-ispiża tal-materja prima ewlenija, it-tubi tal-azzar, u parzjalment minn bidla fl-ambitu ta’ produzzjoni ta’ żewġ produtturi Komunitarji biex jiffokaw fuq tipi speċjali aktar għaljin. Tabella 9 – Il-prezz medju tal-bejgħ
|
(c)
(70) |
Matul il-perjodu meqjus l-ispiża medja tal-produzzjoni żdiedet ukoll bil-mod fil-biċċa l-kbira minħabba l-prezzijiet miżjuda tal-azzar. L-ispiża medja tal-produzzjoni żdiedet minn 1 628 EUR/tunnellata għal 2 401 EUR/tunnellata fil-PIR, jiġifieri bi 48 %. Tabella 10 – L-ispejjeż medji tal-produzzjoni
|
(d)
(71) |
Il-profittabbiltà tal-produtturi Komunitarji meħuda bħala kampjun segwiet xejra pożittiva, b’konformità maż-żieda fil-prezzijiet tal-bejgħ. Minkejja problemi sinifikanti fl-2004 u fl-2005, il-profittabbiltà globali laħqet id-9,1 % fil-PIR. Dan kien parzjalment dovut għal bidla fil-produzzjoni ta’ prodotti b’valur miżjud ogħla matul il-perjodu meqjus. |
(72) |
Kien hemm varjazzjonijiet konsiderevoli fil-likwidità bejn l-2004 u l-2006 segwiti minn żieda sinifikanti ħafna u gradwali sal-aħħar tal-perjodu meqjus. Tabella 11 – Il-profittabbiltà u l-likwidità
|
(e)
(73) |
Il-produtturi tal-Komunità meħuda bħala kampjun ziedu l-investimenti b’115 % matul il-perjodu meqjus. L-investimenti fil-biċċa l-kbira saru għall-iżvilupp tal-makkinarju u biex tinbena l-kapaċità aqwa ta’ loġistika biex tiżdied il-produttività. |
(74) |
L-introjtu mill-investimenti, espress bħala qligħ/telf tal-prodott konċernat b’rabta mal-valur nett tal-kontabbiltà tal-investimenti, segwa l-istess xejra bħall-profittabbiltà. |
(75) |
Matul il-perjodu kkunsidrat, ma kienet ipprovduta l-ebda evidenza lill-Kummissjoni rigward il-kapaċità mnaqqsa jew miżjuda biex jinkiseb il-kapital. Tabella 12 – L-investimenti u l-introjtu mill-investimenti
|
5. Il-konklużjoni dwar il-qagħda tal-industrija Komunitarja
(76) |
Il-miżuri antidumping ħallew impatt pożittiv fuq il-qagħda tal-produtturi Komunitarji meħuda bħala kampjun kif muri bl-iżvilupp pożittiv tal-biċċa l-kbira tal-indikaturi mill-2004 ’l hawn, matul perjodu ta’ ċiklu ekonomiku favorevoli. L-industrija Komunitarja żiedet il-volumi tagħha tal-bejgħ u l-prezzijiet. L-indikaturi ta’ ħsara bħall-produzzjoni, il-kapaċità ta’ produzzjoni, il-profittabbiltà, l-investimenti, l-introjtu mill-investimenti u l-produttività wrew ukoll żvilupp pożittiv. L-investimenti miżjuda maħsuba biex itejbu l-faċilitajiet ta’ produzzjoni ħallew impatt dirett fuq il-profittabbiltà tal-produtturi meħuda bħala kampjun, minkejja t-telfa sinifikanti fis-sehem mis-suq. |
(77) |
Minkejja dan, għandu jitqies li l-produtturi Komunitarji jeħtieġ li jippreservaw ċertu livell ta’ produzzjoni u volum ta’ bejgħ biex jassorbu l-ispejjeż fissi. Il-FTP huma prodotti permezz ta’ makkinarju speċjalizzat u mfassal apposta li huwa fattur sinifikanti tal-ispiża. Il-kumpaniji meħuda bħala kampjun kienu joperaw f’kapaċità ta’ madwar 50 % matul il-perjodu meqjus u ma setgħux iżidu l-użu tal-kapaċità tagħhom b’mod sinifikanti. Għalhekk il-profittabbiltà tibqa’ vulnerabbli għat-tnaqqis fil-produzzjoni. |
(78) |
Minkejja l-iżviluppi pożittivi deskritti hawn fuq, l-industrija Komunitarja tilfet parti sinifikanti mis-sehem tagħha mis-suq matul il-perjodu meqjus minn 81 % fl-2004 għal 65 % matul il-PIR. Wara l-waqa’ fil-volumi tal-bejgħ, il-produtturi Komunitarji rnexxielhom jirkupraw il-livell ta’ volum tal-bejgħ li kien diġà ntlaħaq fl-2004, filwaqt li l-konsum totali tal-Komunità żdied bi 28 % matul l-istess perjodu. Jidher ċar li l-industrija Komunitarja ma rnexxilhiex tapprofitta mit-tkabbir sinifikanti fil-konsum fil-Komunità. Barra dan, uħud mill-fatturi pożittivi huma r-riżultat tal-għejbien ta’ produttur sinifikanti tal-Komunità fir-Renju Unit, li ħadulu l-attivitajiet żewġ kumpaniji li qed jappoġġjaw din it-talba. |
(79) |
Fid-dawl ta’ dan ta’ hawn fuq, jista’ jiġi konkluż li l-introduzzjoni tal-miżuri kontra r-RPĊ u t-Tajlandja ħallew ċertu impatt pożittiv fuq il-qagħda finanzjarja tal-industrija Komunitarja li tista’ terġa’ tikseb il-profittabbiltà. Minkejja dan, għalkemm l-industrija Komunitarja rnexxielha żżid il-produzzjoni u l-volumi tagħha tal-bejgħ bi ftit, is-sehem mis-suq intilef meta d-domanda mis-suq Komunitarju żdiedet b’mod sinifikanti. Dan juri li minkejja l-investimenti li saru f’faċilitajiet moderni ta’ produzzjoni l-qagħda tal-industrija Komunitarja għadha fraġili b’mod ġenerali u dipendenti ħafna, minn naħa waħda, fuq livelli suffiċjenti tal-prezz u, min-naħa l-oħra, fuq volumi biżżejjed ta’ produzzjoni li jippermettu l-assorbiment tal-ispejjeż fissi għoljin. |
F. IL-PROBABBILTÀ TA’ RIKORRENZA TA’ ĦSARA
(80) |
Biex jiġi vverifikat l-effett probabbli tal-iskadenza tal-miżuri fis-seħħ, tqiesu l-elementi li ġejjin: |
(81) |
Il-pressjoni tal-prezz fis-suq Komunitarju jibqa’ għoli ħafna fid-dawl tal-marġini sinifikanti ta’ twaqqigħ tal-prezz misjub matul il-PIR. Filwaqt li l-ispiża tal-produzzjoni tal-produtturi Komunitarji żdiedet b’48 % matul il-perjodu (fil-biċċa l-kbira minħabba ż-żieda tal-prezz tal-materja prima, jiġifieri t-tubu tal-azzar), il-prezz medju tal-importazzjonijiet mill-pajjiżi konċernati żdied biss bi 30 %. |
(82) |
Konsegwentement, l-importazzjonijiet mill-pajjiżi konċernati żiedu s-sehem tagħhom mis-suq b’mod konsiderevoli matul il-perjodu meqjus. Dan juri li l-parti ewlenija tat-telfa tas-sehem mis-suq tal-industrija Komunitarja ħaduha l-importazzjonijiet mill-pajjiżi konċernati li saru fi prezzijiet li huma l-oġġett ta’ dumping li kienu orħos ferm mill-prezzijiet tal-bejgħ tal-industrija Komunitarja, minkejja d-dazji antidumping fis-seħħ. |
(83) |
Barra minn dan, kif imsemmi fil-premessi (40) u (36), il-kapaċitajiet ta’ produzzjoni supplementari disponibbli fil-pajjiżi konċernati huma bil-qabda iktar mill-produzzjoni totali tal-Komunità matul il-PIR jew mill-konsum totali tal-Komunità matul l-istess perjodu. Għalhekk, huwa mistenni li, jekk il-miżuri jiġu revokati, kwantitajiet kbar tal-prodotti manifatturati f’dawn il-pajjiżi għandhom jippenetraw is-suq tal-Komunità. Fi swieq potenzjali oħra ta’ esportazzjoni hemm fis-seħħ miżuri antidumping għolja li jagħmlu lis-suq Komunitarju wieħed aktar faċli li jiġi ppenetrat. Barra dan, l-attentati ripetuti ta’ elużjoni tal-miżuri antidumping jikkonfermaw l-interess għoli tal-produtturi esportaturi tal-pajjiżi konċernati fis-suq tal-Komunità. |
(84) |
Fid-dawl tal-imġiba tal-imgħoddi u dik attwali tal-prezz tal-produtturi esportaturi fil-pajjiżi konċernati huwa mistenni li l-importazzjonijiet se jkunu pprezzati f’livell baxx u b’hekk orħos ferm mill-prezzijiet tal-industrija Komunitarja. Importazzjonijiet ipprezzati f’livell baxx ċertament għandhom iħallu impatt negattiv fuq l-industrija Komunitarja li rkuprat biss minħabba li l-livelli tal-prezz setgħu jinżammu f’ċertu livell iżda li għadha vulnerabbli għal importazzjonijiet enormi u livelli ta’ prezz li huma l-oġġett ta’ dumping. |
(85) |
Fid-dawl ta’ dan ta’ hawn fuq, huwa konkluż li jekk il-miżuri jitħallew jiskadu, dan x’aktarx jirriżulta f’rikorrenza ta’ ħsara lill-industrija Komunitarja kkawżata mill-importazzjonijiet li huma l-oġġett ta’ dumping. Huwa partikolarment mistenni li l-livell tal-prezz fil-Komunità se jonqos b’mod sinifikanti u jħalli impatt qawwi negattiv fuq il-livelli ta’ qligħ tal-produtturi Komunitarji li għandu mhux biss jipperikola l-investimenti sinifikanti li saru mill-2004 ’l hawn, iżda wkoll ma jippermetti l-ebda investiment ulterjuri ieħor. Dan inevitabbilment għandu jwassal għal telfa importanti tal-impjiegi tal-industrija Komunitarja. Il-probabbiltà tar-rikorrenza tal-ħsara ġiet amplifikata dan l-aħħar fid-dawl tal-qagħda attwali kkawżata mill-attività mbattija tal-ekonomija. |
G. L-INTERESS KOMUNITARJU
1. Id-daħla
(86) |
Skont l-Artikolu 21 tar-Regolament bażiku, ġie investigat jekk estensjoni tal-miżuri antidumping eżistenti tmurx kontra l-interessi tal-industrija Komunitarja kollha kemm hi. L-interess Komunitarju ġie stabbilit fuq il-bażi ta’ stima tad-diversi interessi involuti kollha, jiġifieri dawk tal-industrija Komunitarja, tal-importaturi/tal-kummerċjanti kif ukoll tal-utenti tal-prodott konċernat. |
(87) |
Biex tivvaluta l-impatt li x’aktarx ikollha l-kontinwazzjoni inkella n-nuqqas ta’ kontinwazzjoni tal-miżuri, il-Kummissjoni talbet tagħrif mill-partijiet kollha interessati msemmija hawn fuq. Il-Kummissjoni bagħtet kwestjonarji ta’ kampjunament lil 62 importatur tal-prodott konċernat u rċeviet disa’ tweġibiet. Il-Kummissjoni għażlet kampjun ta’ erba’ kumpaniji li minnhom kien hemm tlieta li taw tweġiba għall-kwestjonarju kollu. Ma waslet l-ebda sottomissjoni mill-utenti. |
(88) |
Għandu jerġa’ jissemma li, fl-investigazzjoni preċedenti, l-adozzjoni tal-miżuri kienet ikkunsidrata li mhux kontra l-interess tal-Komunità. Barra minn hekk, il-fatt li l-investigazzjoni attwali hija reviżjoni, li tanalizza qagħda li fiha diġà huma stabbiliti l-miżuri antidumping jippermetti stima ta’ kwalunkwe impatt eċċessiv negattiv fuq il-partijiet konċernati mill-miżuri antidumping attwali. |
(89) |
Fuq din il-bażi, ġie investigat jekk minkejja l-konklużjonijiet dwar il-kontinwazzjoni ta’ dumping u l-probabbiltà ta’ rikkorrenza ta’ ħsara, kinux jeżistu raġunijiet perswassivi li jwasslu għall-konklużjoni li mhuwiex fl-interess tal-Komunità li jiġu ppreservati l-miżuri f’dan il-każ partikolari. |
2. L-interessi tal-industrija Komunitarja
(90) |
L-industrija Komunitarja wriet li hija industrija strutturalment vijabbli. Dan ġie kkonfermat mill-iżvilupp pożittiv tal-qagħda ekonomika tagħha fi żmien meta ġiet stabbilita mill-ġdid kompetizzjoni effettiva wara l-impożizzjoni tal-miżuri antidumping li jinsabu fis-seħħ bħalissa. Tabilħaqq, l-isforzi li saru mill-industrija Komunitarja biex tirrazzjonalizza l-produzzjoni tagħha u ssaħħaħ il-kompetittività tagħha wasslu għal qligħ raġjonevoli fl-aħħar sentejn tal-perjodu meqjus. Bl-istess mod, l-attività profittabbli ta’ esportazzjoni tal-industrija Komunitarja żviluppat b’mod pożittiv li juri li kienet kompetittiva fi swieq ta’ pajjiżi terzi (l-esportazzjonijiet tal-produtturi meħuda bħala kampjun żdiedu b’21 % matul il-perjodu meqjus). |
(91) |
Għar-raġunijiet deskritti fil-qosor fil-premessa (77), l-industrija Komunitarja teħtieġ li tipproduċi ċertu volum ta’ prodott standard biex tikseb ekonomiji tal-iskala u b’hekk tibqa’ kompetittiva. Għalhekk il-prodotti standard jinsabu f’kompetizzjoni diretta mal-importazzjonijiet mir-RPĊ u t-Tajlandja. Li kieku l-prodotti fi prezzijiet li huma l-oġġett ta’ dumping kellhom jidħlu fis-suq, l-ekonomiji tal-iskala u għalhekk il-profittabbiltà tal-operat fil-Komunità konsegwentement jiċkienu b’mod konsiderevoli. Konsekuttivament, jista’ jiġi raġjonevolment mistenni li l-industrija tal-Komunità għandha tkompli tibbenefika mill-miżuri li qegħdin imposti bħalissa. F’każ li l-miżuri ma jiġux ippreservati, probabbli l-industrija Komunitarja ssofri ħsara materjali. |
3. L-interessi tal-importaturi/il-kummerċjanti
(92) |
L-ebda wieħed mill-importaturi li kkooperaw ma importa l-prodott konċernat mir-RPĊ jew mit-Tajlandja, iżda biss mit-Tajwan. L-investigazzjoni ma tat l-ebda evidenza li l-miżuri fis-seħħ affettwaw materjalment lill-importaturi. Jidher ċar li l-importaturi sabu għejun oħra ta’ forniment, kif jista’ jidher mis-sehem sinifikanti mis-suq (13 %) miżmum minn pajjiżi terzi oħra, li juri li l-kundizzjonijiet ta’ kompetizzjoni fis-suq Komunitarju huma żgurati. |
(93) |
F’dak li għandu x’jaqsam mat-Tajwan, u kif deskritt fil-qosor fil-premessi (98) sa (105), l-eżenzjoni attwali għal żewġ produtturi esportaturi ġiet ivvalutata mill-ġdid minħabba allegazzjonijiet ta’ prassi ta’ elużjoni. L-importaturi kienu kunfidenti li f’każ li tiġi revokata l-eżenzjoni ta’ dawn il-kumpaniji, huma għandu jirnexxilhom isibu għejun oħra ta’ forniment. Għalhekk, il-preservazzjoni tal-miżuri ma għandhiex tħalli effett negattiv sinifikanti fuq l-importaturi minħabba mezzi oħra ta’ forniment. Minkejja dan, għandu jiġi nnutat li jistgħu jinqalgħu xi problemi għas-suq speċjalizzat tal-prodott ta’ standard tar-Renju Unit fejn il-forniment magħruf huwa limitat għal produttur Ewropew wieħed u produttur Tajwaniż wieħed. Minkejja dan, l-effett għandu probabbilment jinħass biss fuq medda qasira ta’ żmien sakemm jinbtu għejun oħra. |
(94) |
Għaldaqstant, ġie konkluż li l-qagħda ekonomika tal-importaturi tal-prodott konċernat ma ġietx influwenzata b’mod negattiv sa punt sinifikanti bl-impożizzjoni tal-miżuri antidumping li jinsabu fis-seħħ bħalissa. Dan huwa kkonfermat mill-fatt li l-importaturi ssuktaw jinnegozjaw il-prodott konċernat f’volumi sinfikanti, u saħansitra żiedu l-volum importat matul il-perjodu meqjus. Għall-istess raġunijiet, huwa wkoll improbabbli li l-kontinwazzjoni tal-miżuri twassal għal deterjorament fil-qagħda ekonomika tagħhom fil-ġejjieni. |
4. L-interessi tal-utenti
(95) |
L-utenti tal-prodott konċernat huma prinċipalment l-industrija petrokimika u dik tal-bini. Il-Kummissjoni bagħtet kwestjonarji lil 9 utenti. L-ebda wieħed minn dawn ma kkoopera jew ippreżenta ruħu fl-investigazzjoni attwali. In-nuqqas ta’ kooperazzjoni tagħhom jidher li jikkonferma li l-fittings ta’ tubi jew pajpijiet jirrappreżentaw parti żgħira ħafna tal-ispejjeż totali ta’ produzzjoni u li l-miżuri fis-seħħ ma jidhrux li kkawżaw xi telf ta’ kompetittività għalihom. |
5. Il-konklużjoni dwar l-interess tal-Komunità
(96) |
L-investigazzjoni wriet li l-miżuri antidumping attwali ippermettew lill-industrija Komunitarja biex issir profittabbli, minkejja li din sofriet telf sinifikanti fis-sehem mis-suq minħabba l-kontinwazzjoni ta’ importazzjonijiet li huma l-oġġett ta’ dumping. Jekk il-miżuri jitħallew jiskadu, dan jipperikola l-proċess ta’ rkupru u possibbilment iwassal għall-għejbien tal-industrija Komunitarja. |
(97) |
Barra minn hekk, fil-passat, jidher li l-miżuri eżistenti ma kellhom l-ebda effett negattiv sinifikanti fuq il-qagħda ekonomika u finanzjarja tal-utenti u tal-importaturi. Għaldaqstant, ġie konkluż li ma hemm l-ebda raġuni konvinċenti kontra l-kontinwazzjoni tal-miżuri antidumping attwali. |
H. IR-REVIŻJONI INTERIM DWAR IL-KUMPANIJI TAJWANIŻI EŻENTATI
1. L-isfond
(98) |
Fl-2000, ir-Regolament (KE) Nru 763/2000 li estenda l-miżuri antidumping imposti fuq importazzjonijiet li joriġinaw fir-RPĊ għal importazzjonijiet ikkunsinjati mit-Tajwan ta’ ċerti fittings ta’ tubi jew pajpijiet, tal-ħadid jew tal-azzar bl-eċċezzjoni ta’ dawk prodotti u esportati minn Chup Hsin Enterprise Co. Ltd (“Chup Hsin”), Nian Hong Pipe Fittings Co. Ltd, (“Nian Hong”) u Rigid Industries Co., Ltd. (Kaohsiung, it-Tajwan) għaliex instab li huma ma wettqux elużjoni tal-miżuri. |
(99) |
Ir-reviżjoni parzjali interim attwali kienet limitata għar-reviżjoni tan-nuqqas ta’ estensjoni tad-dazji mogħtija lil Chup Hsin u Nian Hong. |
(100) |
Iż-żewġ kumpaniji kkooperaw f’din l-investigazzjoni billi wieġbu l-kwestjonarju tal-Kummissjoni u aċċettaw żjara ta’ verifika fuq il-post. |
(101) |
B’reazzjoni għad-dokument finali ta’ revelazzjoni, kumpanija waħda ddikjarat li t-tnedija tal-investigazzjoni attwali ma kenitx ġustifikata. B’mod speċifiku, il-kumpanija ddikjarat li minħabba li kienu eżenti mill-miżuri estiżi fl-2000, ma kien hemm l-ebda miżuri fis-seħħ kontrihom li kellhom jiġu riveduti. F’dan ir-rigward, il-kumpanija rreferiet għar-Rapport tal-Korp tal-Appell tad-WTO fil-każ Beef & Rice Mexico. Dan ir-Rapport jinterpreta l-Artikolu 5.8 tal-Ftehim dwar Antidumping, bħala applikabbli għal investigazzjonijiet ġodda fejn l-esportaturi jinstabu li għandhom marġini de minimis ta’ dumping. Fil-fatt l-Artikolu 5.8 jirreferi espliċitament għal “applikazzjoni li taqa’ taħt l-Artikolu 5.1”. Minkejja dan, fil-każ attwali, Chup Hsin u ż-żewġ kumpaniji l-oħra kienu suġġetti għal investigazzjoni ta’ kontra l-elużjoni li tnediet fuq il-bażi tal-Artikolu 13 tar-Regolament Bażiku u mhux għal investigazzjoni ġdida dwar l-antidumping. Fil-fatt, fl-2000 l-importazzjonijiet mit-Tajwan instabu li kienu qed jeludu l-miżuri imposti fuq ir-RPĊ, bl-eżenzjoni ta’ tliet kumpaniji, għar-raġunijiet li ma kenux qed jimportaw il-prodott konċernat mir-RPĊ f’dak il-waqt. Ir-Regolament bażiku ma jeskludix eżenzjoni bħal din milli tiġi riveduta fi kwalunkwe mument jekk teżisti l-evidenza ta’ elużjoni. Għalhekk, it-tnedija tar-reviżjoni attwali interim kienet tabilħaqq ġustifikata u legalment soda. Fuq din il-bażi t-talba tal-kumpanija ġiet rifjutata. |
(102) |
Minħabba li n-nuqqas ta’ estensjoni tad-dazji ġiet stabbilita fuq il-bażi tas-sejbiet tal-investigazzjoni iniżjali ta’ kontra l-elużjoni, fir-reviżjoni attwali ġie investigat jekk dawk is-sejbiet kenux għadhom validi. Skont l-Artikolu 13(1) tar-Regolament bażiku, ġie investigat jekk intlaħqux il-kundizzjonijiet għall-elużjoni. |
2. Il-bidla fix-xejra tal-kummerċ
(103) |
F’dak li għandu x’jaqsam ma’ Nian Hong is-sejbiet urew li l-kumpanija importat FTP tat-tipi kollha (liwjiet, kmiem ta’ riduzzjoni, tappijiet u forom ta’ “T”) mir-RPĊ. Il-kumpanija ddikjarat li dawn l-importazzjonijiet ma kenux il-prodott konċernat iżda oġġetti kważi finalizzati. Ir-riżultat tal-investigazzjoni ma setax jikkonferma dawn id-dikjarazzjonijiet. Barra minn hekk, instab li l-kontribut ta’ Nian Hong f’dawn l-oġġetti kien limitat għal ċanfrinatura, l-immarkar tal-logo tal-kumpanija u l-imballaġġ, li kien jirrappreżenta inqas minn 10 % tal-ispiża totali tal-produzzjoni. Barra dan, id-dikjarazzjoni tal-importazzjoni tad-dwana Tajlandiża mir-RPĊ semmiet il-kodiċi NM tal-prodott konċernat (7307 93), jiġifieri l-prodott finalizzat. |
(104) |
Fir-rigward ta’ Chup Hsin, it-tweġiba tagħhom tal-kwestjonarju ma semmiet l-ebda xiri jew bejgħ mill-ġdid korrispondenti tal-FTP b’oriġini Ċiniża. Huwa biss waqt iż-żjara ta’ verifika ta’ fuq il-post li nstab li l-kumpanija impurtat FTP mir-RPĊ. L-evidenza miġbura wriet li dawk l-importazzjonijiet saru permezz ta’ kumpanija Ġappuniża. Wara ż-żjara ta’ verifika, il-kumpanija ddikjarat li l-importazzjonijiet kollha tal-FTP b’oriġini Ċiniża kineu jinbiegħu fis-suq domestiku Tajwaniż. Il-kumpanija ppreżentat data riveduta għal uħud mit-tabelli tat-tweġiba għall-kwestjonarju. Minkejja dan, il-fatt li t-tagħrif dwar l-importazzjonijiet mir-RPĊ oriġinarjament tħalla barra tqies li kien qarrieqi fis-sens tal-Artikolu 18 tar-Regolament bażiku u tefa’ dubji serji dwar l-attendibbiltà tat-tagħrif imressaq kemm qabel kif ukoll wara ż-żjara ta’ verifika. |
(105) |
Kif imsemmi hawn fuq, ir-raġunijiet li għalihom ingħataw eżenzjoni Chup Hsin u Nian Hong kienu li ż-żewġ kumpaniji dak iż-żmien ma xtraw l-ebda FTP mir-RPĊ, li ma għadux il-każ. Fid-dawl tal-prassi ta’ elużjoni żvelata, il-bidla fix-xejra tal-kummerċ hija stabbilita minħabba li l-prodotti li joriġinaw fir-RPĊ issa qed jiġu kkunsinjati minn ġo t-Tajwan anki miż-żewġ kumpaniji msemmija hawn fuq. |
3. Kawżali dovuta insuffiċjenti jew ġustifikazzjoni ekonomika insuffiċjenti
(106) |
Għall-ebda waħda mill-kumpaniji ma kien hemm xi kawżali dovuta jew ġustifikazzjoni ekonomika suffiċjenti għall-prassi ta’ esportazzjoni mill-ġdid tal-prodotti Ċiniżi importati apparti dik tal-elużjoni tal-miżuri antidumping. |
(107) |
Fil-każ ta’ Nian Hong, il-prodotti kienu sempliċiment modifikati ftit u l-valur miżjud mal-prodtt konċernat kien għalhekk baxx ħafna. |
(108) |
Fir-rigward ta’ Chup Hsin, il-fatt li l-kumpanija naqset milli tirrapporta l-importazzjonijiet tagħha tal-prodott Ċiniż fit-tweġiba tagħha għall-kwestjonarju tqies bħala qarrieqi min-naħa l-waħda u min-naħa l-oħra indikazzjoni li kienet konxja li kienet qed teludi l-miżuri imposti fuq fittings tat-tubi u l-pajpijiet li joriġinaw fir-RPĊ. Barra dan, abbażi tal-evidenza mogħtija miż-żewġ kunmpaniji, l-investigazzjoni stabbiliet li kien possibbli li timporta oġġetti minn pajjiż terz għal ġewwa t-Tajwan u tesportahom mill-ġdid b’ċertifikat ta’ oriġini tat-Tajwan mingħajr ma dawn jgħaddu minn kwalunkwe trasformazzjoni sostanzjali. |
4. L-imminar tal-effetti rimedjali tad-dazju f’termini ta’ prezzijiet u/jew kwantitajiet tal-prodotti simili
(109) |
Abbażi tal-Eurostat, l-esportazzjonijiet totali mit-Tajwan lill-Komunità żdiedu b’209 % minn 2 372 tunnellata fl-2003 għal 7 335 tunnellata fil-PIR. Minkejja dan, il-volum tal-esportazzjonijiet baqa’ bejn wieħed u ieħor stabbli bejn l-2003 u l-2005, iżda żdied b’mod enormi mill-2006 sa tmiem il-PIR. Iż-żewġ kumpaniji Tajwaniżi, li waħidhom huma responsabbli għal kważi t-total tal-esportazzjoni Tajwaniża tal-prodott konċernat lill-UE matul il-PIR, żiedu l-esportazzjonijiet tagħhom lejn l-UE b’206 % bejn l-2005 u l-PIR. |
(110) |
Il-volum tal-importazzjonijiet konċernati kienu jirrappreżentaw 9 % tal-konsum tal-Komunità, li huwa meqjus sinifikanti. Jidher għalhekk biċ-ċar li l-bidla notevoli fil-flussi tal-kummerċ imminat l-effetti rimedjali tal-miżuri f’dak li għandu x’jaqsam mal-kwantitajiet importati lejn is-suq tal-Komunità. |
(111) |
Fir-rigward ral-prezzijiet tal-prodotti kkunsinjati mit-Tajwan, id-data tal-Eurostat uriet li l-prezzijiet medji tal-esportazzjoni ta’ importazzjonijiet mit-Tajwan matul il-PIR laħqu EUR 1 718/tunnellata, li kien inqas ferm mill-prezzijiet tal-industrija Komunitarja (– 33,5 %). Tqabbil bejn il-prezzijiet ex fabbrika tal-produtturi tal-Komunità meħuda bħala kampjun u l-prezzijiet ta’ esportazzjoni ta’ Chup Hsin u Nian Hong wera bejgħ bi prezz imwaqqa’ fuq bażi medja ta’ 86,6 % u 71 % rispettivament, jiġifieri l-perċentwali li biha l-prezzijiet tal-esportazzjoni ta’ dawn il-kumpaniji kienu inqas mill-prezzijiet mhux dannużi tal-industrija Komunitarja. Għalhekk, l-effetti rimedjali tad-dazju antidumping impost huma mminati f’termini ta’ prezz. |
(112) |
Abbażi ta’ dan ta’ hawn fuq, kien konkluż li l-bidla fil-flussi kummerċjali, flimkien maż-żieda sostanzjali fl-importazzjonijiet mit-Tajwan magħmulin bi prezzijiet irħas ħafna, imminat l-effetti rimedjali tal-miżuri antidumping kemm mil-lat ta’ kwantitajiet kif ukoll mil-lat ta’ prezzijiet tal-prodott simili. |
5. L-evidenza ta’ dumping fir-rigward tal-valuri normali li kienu stabbiliti minn qabel għall-prodott simili
(113) |
Biex jiġi ddeterminat jekk l-evidenza tad-dumping setgħetx tinstab fir-rigward tal-prodott konċernat esportat lejn il-Komunità miż-żewġ kumpaniji Tajwaniżi matul il-PI, il-prezzijiet tal-esportazzjoni ġew ibbażati fuq id-data tal-kumpaniji nfushom. |
(114) |
Skont l-Artikolu 13(1) tar-Regolament bażiku, dawn il-prezzijiet ta’ esportazzjoni kienu mqabbla mal-valur normali stabbilit minn qabel għall-prodott simili. Fir-reviżjoni preċedenti ta’ skadenza fl-2003, it-Tajlandja nstabet li kienet pajjiż b’ekonomija ta’ suq li tixbah lil dik tar-RPĊ għar-raġunijiet biex ikun stabbilit il-valur normali. |
(115) |
Biex ikun hemm paragun ġust bejn il-valur normali u l-prezz tal-esportazzjoni, saret allokazzjoni dovuta fil-forma ta’ aġġustamenti għad-differenzi li laqtu l-prezzijiet u l-komparabbiltà tal-prezz. Dawn l-aġġustamenti saru skont l-Artikolu 2(10) tar-Regolament bażiku fir-rigward tal-ispejjeż tat-trasport u ta’ kreditu abbażi tat-tagħrif miġbur waqt iż-żjarat ta’ verifika. |
(116) |
Skont l-Artikolu 2(11) tar-Regolament bażiku, it-tqabbil bejn il-valur medju normali differenzjat kif stabbilit fl-investigazzjoni oriġinali u medja differenzjata tal-prezzijiet tal-esportazzjoni matul l-investigazzjoni tar-reviżjoni, espress bħala perċentwali tal-prezz CIF fil-fruntiera tal-Komunità, bid-dazju mhux imħallas, wera li kien hemm dumping għall-importazzjonijiet ta’ fittings ta’ tubi jew pajpijiet miż-żewġ kumpaniji Tajwaniżi. Il-marġnijiet tad-dumping li nstabu, espressi bħala perċentwali tal-prezz CIF fil-fruntiera tal-Komunità, bid-dazju mhux imħallas, kienu bejn 56,09 % għal Chup Hsin u 44,77 % għal Nian Hong. |
6. Il-konklużjoni dwar ir-reviżjoni tal-eżenzjonijiet mill-estensjoni tal-miżuri għall-importazzjonijiet mit-Tajwan
(117) |
Minħabba s-sejba ta’ elużjoni msemmija hawn fuq, u skont l-ewwel sentenza tal-Artikolu 13(1) tar-Regolament bażiku, il-miżuri antidumping attwali fuq importazzjonijiet tal-prodott konċernat li joriġinaw fir-RPĊ għandhom jiġu estiżi għal importazzjonijiet tal-istess prodott ikkunsinjat minn Chup Hsin u Nian Hong. |
7. In-natura dejjiema taċ-ċirkustanzi mibdula
(118) |
Skont l-Artikolu 11(3) tar-Regolament bażiku, ġie investigat ukoll jekk kienx raġjonevoli li ċ-ċirkustanzi mibdula jitqisux bħala ta’ natura dejjiema. |
(119) |
Fir-rigward ta’ Nian Hong, l-investigazzjoni wriet li l-kumpanija ilha snin ma jkollha produzzjoni ġenwina u li l-esportazzjonijiet kollha lejn il-Komunità minn din il-kumpanija kienu fittings ta’ tubi u pajpijiet importati mir-RPĊ. Fid-dawl li l-produzzjoni ġenwina ilha bosta snin li waqfet, ma hemm l-ebda raġuni li tagħti x’tifhem li l-qagħda mhijiex ta’ natura dejjiema. |
(120) |
F’dak li għandu x’jaqsam ma’ Chup Hsin, kif imsemmi hawn fuq fl-inċiż (104), it-tagħrif ippreżentat tqies li mhuwiex attendibbli. Il-fatt li l-kumpanija naqset milli tirrapporta l-prodotti li hija impurtat miċ Ċina fit-tweġiba tagħha għall-kwestjonarju tal-Kummissjoni, huwa meqjus bħala indikazzjoni li kienet konxja mill-elużjoni u ma hemm l-ebda tagħrif li l-intenzjoni tal-kumpanija mhijiex se tissokta din il-prassi fil-ġejjieni. |
(121) |
F’dawn iċ-ċirkustanzi, is-sejbiet mil-PIR jistgħu jitqiesu bħala dejjiema. Bħala konklużjoni, u skont l-Artikolu 11(3), fid-dawl tal-prassi ta’ elużjoni li nstabu għaż-żewġ produtturi esportaturi fit-Tajwan, speċifikament Chup Hsin u Nian Hong, huwa xieraq li jiġu rtirati dawn l-eżenzjonijiet mill-miżuri estiżi. |
I. MIŻURI ANTIDUMPING
(122) |
Il-partijiet kollha konċernati ġew informati dwar il-fatti u l-konsiderazzjonijiet essenzjali li abbażi tagħhom huwa maħsub li jiġi rakkomandat li l-miżuri attwali jiġu ppreservati u l-eżenzjoni mill-estensjoni tad-dazju għall-importazzjonijiet tal-prodott konċernat prodott minn Chup Hsin u Nian Hong tiġi revokata. Huma ngħataw ukoll perjodu li fih setgħu jagħmlu rappreżentazzjonijiet wara l-iżvelar. |
(123) |
Wara l-iżvelar imsemmi hawn fuq, wieħed mill-produtturi esportaturi li għalih ġiet irtirata l-eżenzjoni offra impenn skont l-Artikolu 8(1) tar-Regolament bażiku. |
(124) |
Din l-offerta ġiet investigata u nstab li l-offerta formali saret wara l-limitu ta’ żmien stipulat biex isiru r-rappreżentazzjonijiet, b’ġustifikazzjoni insuffiċjenti għad-dewmien. L-offerta kienet allegatament ibbażata fuq il-volum tal-esportazzjonijiet matul il-PIR limitat għal produzzjoni proprja tal-kumpanija u l-produzzjoni fornuta minn sottokuntrattur fit-Tajwan, li ma għandhiex tkun soġġetta għal kwalunkwe dazju antidumping sa limitu kwantitattiv. |
(125) |
Minkejja dan, fid-dawl li matul l-investigazzjoni ta’ fuq il-post il-kumpanija ma rnexxilhiex tagħti prova ta’ liema parti mill-bejgħ tagħha lill-Komunità kienet ta’ produzzjoni Tajwaniża u liema kienet importata mir-RPĊ, l-argument tal-kumpanija li ċ-ċifri tal-esportazzjoni jistgħu jiġu sorveljati permezz ta’ bażijiet xierqa tad-data ma kenitx valida, minħabba li l-esportazzjonijiet lejn il-Komunità jistgħu jinkludu oġġetti li joriġinaw fir-RPĊ. Flimkien ma’ dan, il-fatt li l-kumpanija naqset milli tirrapporta l-importazzjonijiet tagħha mir-RPĊ tqies li kien qarrieqi fis-sens tal-Artikolu 18 tar-Regolament bażiku u jitfa’ dubji serji fuq l-attendibbiltà tat-tagħrif imressaq mill-kumpanija kemm qabel kif ukoll wara ż-żjara ta’ verifika. |
(126) |
Għal dawn ir-raġunijiet ta’ hawn fuq, l-impenn offrut mill-produttur konċernat ma setax jiġi aċċettat. |
(127) |
Minn dan ta’ hawn fuq jirriżulta li, kif previst fl-Artikolu 11(2) tar-Regolament bażiku, id-dazji antidumping fuq importazzjonijiet ta’ fittings ta’ tubi u pajpijiet li joriġinaw mir-RPĊ u t-Tajlandja jew ikkunsinjati mit-Tajwan kif imposti mir-Regolament (KE) Nru 964/2003, għandhom jiġu ppreservati. |
(128) |
B’konsegwenza ta’ dan, l-estensjoni tal-miżuri għall-prodott konċernat li joriġina fir-RPĊ għal importazzjonijiet ikkunsinjati mill-Indoneżja bir-Regolament (KE) Nru 2052/2004, mis-Sri Lanka bir-Regolament (KE) Nru 2053/2004, u mill-Filippini bir-Regolament (KE) Nru 655/2006, kemm jekk dikjarat li joriġina mill-Filippini, l-Indoneżja, u s-Sri Lanka kif ukoll jekk le għandha tiġi ppreservata. |
(129) |
L-eżenzjonijiet ta’ ċerti FTP prodotti minn Chup Hsin u Nian Hong mill-estensjoni tal-miżuri antidumping għandhom jiġu rtirati. B’konsegwenza ta’ dan, dawn il-kumpaniji għandhom ikunu soġġetti għall-istess dazju antidumping bħal produtturi fir-RPĊ skont l-Artikolu 13(1) tar-Regolament bażiku, |
ADOTTA DAN IR-REGOLAMENT:
Artikolu 1
1. B’dan huwa impost dazju antidumping definittiv fuq l-importazzjonijiet ta’ fittings ta’ tubi u pajpijiet (għajr fittings fonduti, flanġijiet u fittings bil-kamin), tal-ħadid jew tal-azzar (ma jinkludix l-istainless steel), b’dijametru estern massimu ta’ 609,6 mm, tat-tip li jiġi użat għall-issaldjar jew xi użi oħra, li joriġinaw mir-Repubblika tal-Poplu taċ-Ċina u mit-Tajlandja u li attwalment jaqgħu fi ħdan il-kodiċi NM ex 7307 93 11, ex 7307 93 19, ex 7307 99 30 u ex 7307 99 90 (il-kodiċi TARIC 7307931191, 7307931193, 7307931194, 7307931195, 7307931199, 7307931991, 7307931993, 7307931994, 7307931995, 7307931999, 7307993092, 7307993093, 7307993094, 7307993095, 7307993098, 7307999092, 7307999093, 7307999094, 7307999095, 7307999098).
2. Ir-rata tad-dazju antidumping definittiv applikabbli għall-prezz nett u liberu fil-fruntiera Komunitarja, qabel id-dazju, tal-prodotti deskritti fil-paragrafu 1 u manifatturati mill-kumpaniji ta’ hawn taħt għandha tkun kif ġej:
Pajjiż |
Kumpanija |
Rata tad-dazju (%) |
Kodiċi Addizzjonali TARIC |
Ir-Repubblika tal-Poplu taċ-Ċina |
Il-kumpaniji kollha |
58,6 |
— |
It-Tajlandja |
Awaji Materia (It-Tajlandja) Co. Ltd. Samutprakarn |
7,4 |
8850 |
|
Thai Benkan Co. Ltd. Prapadaeng - Samutprakarn |
0 |
A118 |
|
Il-kumpaniji l-oħra kollha |
58,9 |
A999 |
3. Sakemm ma jkunx speċifikat mod ieħor, għandhom japplikaw id-dispożizzjonijiet fis-seħħ dwar id-dazji doganali.
Artikolu 2
Id-dazju antidumping definittiv impost mill-Artikolu 1 fuq importazzjonijiet li joriġinaw fir-Repubblika tal-Poplu taċ-Ċina huwa b’dan estiż għall-importazzjonijiet tal-istess fittings ikkunsinjati mit-Tajwan (kodiċi TARIC: 7307931191, 7307931991, 7307993092 u 7307999092; kodiċi addizzjonali TARIC A999), l-Indoneżja (kodiċi TARIC: 7307931193, 7307931993, 7307993093 u 7307999093), is-Sri Lanka (kodiċi TARIC: 7307931194, 7307931994, 7307993094 u 7307999094), u l-Filippini (kodiċi TARIC: 7307931195, 7307931995, 7307993095 u 7307999095), kemm jekk dikjarati li joriġinaw rispettivament fit-Tajwan, l-Indoneżja, is-Sri Lanka u l-Filippini kif ukoll jekk le, bl-eċċezzjoni ta’ dawk prodotti minn Rigid Industries Co. Ltd, Kaohsiung (it-Tajwan) (kodiċi addizzjonali TARIC A099). L-eżenzjoni mill-estensjoni tad-dazju għall-importazzjonijiet tal-istess fittings prodotti minn Chup Hsin Enterprise Co. Ltd, Kaohsiung (it-Tajwan) (kodiċi addizzjonali TARIC A098) u Nian Hong Pipe Fittings Co. Ltd, Kaohsiung (it-Tajwan) (kodiċi addizzjonali TARIC A100) hija permezz ta’ dan ta’ hawnhekk revokata.
Artikolu 3
Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jorbot fl-intier tiegħu u japplika direttament fl-Istati Membri kollha.
Magħmul fi Brussell, is-27 ta’ Awwissu 2009.
Għall-Kunsill
Il-President
C. BILDT
(5) Preċedentement Awaji Sangyo Co Ltd., ara ĠU C 152, 6.7.2007, p. 16.
(7) ĠU L 275, 25.8.2004, p. 1.
(8) ĠU L 355, 1.12.2004, p. 4.
(9) ĠU L 355, 1.12.2004, p. 9.
(10) ĠU L 116, 29.4.2006, p. 1.
(11) ĠU L 275, 16.10.2008, p. 18
(12) ĠU C 238, 10.10.2007, p. 20.
(13) ĠU C 138, 5.6.2008, p. 42.