1.9.2009   

MT

Il-Ġurnal Uffiċjali tal-Unjoni Ewropea

L 228/7

(1)

Ir-Regolament tal-Kummissjoni (KE) Nru 595/2004 tat-30 ta’ Marzu 2004 li jniżżel regoli dettaljati biex japplika r-Regolament tal-Kunsill (KE) Nru 1788/2003 li jistabbilixxi imposta fis-settur tal-ħalib u tal-prodotti tal-ħalib (2) kif emendat bir-Regolament (KE) Nru 258/2009 (3), jipprovdi miżura biex l-Istati Membri jirrapportaw annwalment dwar kemm ġiet użata l-kwota, id-distribuzzjoni tal-kwota mhux użata lill-produtturi, u fejn rilevanti, dwar il-ġbir tal-imposta dovuta mill-produtturi bl-iskop li jappoġġjaw is-superviżjoni tal-Kummissjoni għall-implimentazzjoni tas-sistema ta’ kwota u partikolarment fil-kuntest tar-rapporti li se jiġu provduti mill-Kummissjoni lill-Parlament Ewropew u lill-Kunsill qabel it-tmiem tal-2010 u l-2012.

(2)

Ir-Regolament tal-Kunsill (KE) Nru 1788/2003 (4), li r-regoli tiegħu ġew sostitwiti mir-Regolament (KE) Nru 1234/2007, bidlu r-rwol tal-Istati Membri u tal-Kummissjoni fir-rigward tal-imposta għaż-żejjed u b’riżultat ta’ dan il-Kummissjoni mhijiex kompletament konxja tal-kwistjonijiet li jirriżultaw fil-ġbir tal-imposta. Peress li tagħrif bħal dan huwa meħtieġ sabiex tiġi żviluppata evalwazzjoni kumplessiva tas-sistema u tal-implimentazzjoni tagħha, huwa xieraq li l-Istati Membri jipprovdu tagħrif rilevanti għal kull perjodu mill-2003/2004.

(3)

Sabiex l-Istati Membri jkunu jistgħu jikkomunikaw it-tagħrif rilevanti b’mod uniformi, jeħtieġ li tiġi stabbilita formola li tagħti l-ispeċifikazzjoni dettaljata għad-dejta.

(4)

Għalhekk ir-Regolament (KE) Nru 595/2004 għandu jiġi emendat skont dan.

(5)

Il-miżuri provduti f’dan ir-Regolament huma skont l-opinjoni tal-Kumitat tal-Ġestjoni tal-Organizzazzjoni Komuni tas-Swieq Agrikoli,

(1)

Fl-Artikolu 27, il-paragrafu 4 huwa sostitwit bil-paragrafi 4, 5 u 6 li ġejjin:

“4.   Qabel l-1 ta’ Ottubru ta’ kull sena, l-Istati Membri għandhom jikkomunikaw lill-Kummissjoni rapport dwar l-użu tal-kwota u l-ġbir tal-imposta fir-rigward tal-perjodu ta’ 12-il xahar li jispiċċa fil-31 ta’ Marzu tal-istess sena kalendarja. Qabel l-1 ta’ Diċembru, l-Istati Membri għandhom jikkomunikaw aġġornament tar-rapport lill-Kummissjoni biex ikun jinkludi kull tagħrif ġdid disponibbli u rilevanti.

5.   Ir-rapport imsemmi fil-paragrafu 4 għandu jinkludi t-tagħrif dwar ir-riallokazzjoni ta’ kwota mhux użata inkluż l-għadd ta’ produtturi li saru allokazzjonijiet għalihom u l-bażi għall-allokazzjonijiet. Fir-rapport, l-Istati Membri għandhom jinkludu tal-inqas it-tagħrif imsemmi fil-Parti 1 tal-Anness IIa. Fil-każ tar-rapport li għandu jiġi kkomunikat qabel l-1 ta’ Ottubru 2009, dan għandu jipprovdi t-tagħrif rilevanti fir-rigward tal-perjodi ta’ 12-il xahar kemm tal-2008/2009 kif ukoll tal-2007/2008.

6.   Ir-rapport imsemmi fil-paragrafu 4 għandu jistipula l-ammont ta’ imposta għaż-żejjed imħallsa sa dik id-data lill-awtorità kompetenti, l-għadd ta’ produtturi li qed jagħtu kontribut għall-ħlas ta’ imposta għaż-żejjed imħallsa sa dik id-data, l-ammont u l-għadd ta’ każijiet fejn l-imposta għad trid titħallas, u l-ammont u l-għadd ta’ każijiet fejn l-imposta għaż-żejjed ġiet meqjusa impossibli li tinġabar minħabba każ ta’ falliment jew in-nuqqas konfermat fil-kapaċità tal-produtturi li jħallsu. L-Istati Membri għandhom jikkomunikaw it-tagħrif rilevanti fil-format stabbilit fil-Parti 2 tal-Anness IIa. Ir-rapport li għandu jiġi kkomunikat qabel l-1 ta’ Ottubru 2009 għandu jinkludi d-dettalji fir-rigward tal-ġbir tal-imposta għal kull perjodu ta’ 12-il xahar mill-2003/2004 ‘l quddiem, jew dettalji fir-rigward ta’ kull perjodu ta’ implimentazzjoni ta’ 12-il xahar fil-każ tal-Istati Membri li implimentaw r-Regolament għall-ewwel darba wara l-2003/2004. Kull rapport sussegwenti għandu jaġġorna l-pożizzjoni fir-rigward tal-ġbir ta’ kwalunkwe imposta għaż-żejjed li qabel kienet ġiet irrappurtata bħala mhux imħallsa”.

(2)

Wara l-Anness II għandu jiddaħħal l-Anness IIa, li t-test tiegħu huwa stabbilit fl-Anness għal dan ir-Regolament.