(1)

Id-Direttiva 2006/88/KE tistabbilixxi r-rekwiżiti ta’ saħħet l-annimali li għandhom jiġu applikati għat-tqegħid fis-suq, l-importazzjoni u t-tranżitu mill-Komunità ta’ annimali tal-akkwakultura u l-prodotti tagħhom. L-Istati Membri għandhom jiżguraw li l-annimali tal-akkwakultura u l-prodotti tagħhom jiġu introdotti fil-Komunità biss minn pajjiżi terzi jew minn partijiet ta’ pajjiżi terzi li jidhru fuq lista ppreparata u aġġornata skont il-proċedura msemmija fiha.

(2)

L-Artikolu 11 tar-Regolament tal-Kummissjoni (KE) Nru 1251/2008 tat-12 ta’ Diċembru 2008 li jimplimenta d-Direttiva tal-Kunsill 2006/88/KE fir-rigward tal-kundizzjonijiet u r-rekwiżiti taċ-ċertifikazzjoni għat-tqegħid fis-suq u l-importazzjoni fil-Komunità ta’ annimali tal-akkwakultura u prodotti tagħhom u li jistabbilixxi lista ta’ speċi li jgħaddu l-mard (2), jistabbilixxi r-regoli applikabbli għall-importazzjoni ta’ annimali akkwatiċi ornamentali maħsuba għal faċilitajiet ornamentali magħluqa.

(3)

Skont l-Artikolu 11(2) ta’ dak ir-Regolament, l-Istati Membri għandhom jawtorizzaw biss l-importazzjonijiet ta’ ħut ornamentali li mhuwiex ta’ speċi suxxettibbli għal xi marda elenkata fil-Parti II tal-Anness IV għad-Direttiva 2006/88/KE, u molluski ornamentali u krustaċji ornamentali maħsuba għal faċilitajiet ornamentali magħluqa, li ġejjin minn pajjiżi terzi jew territorji li huma membri tal-Organizzazzjoni Dinjija għas-Saħħa tal-Annimali (OIE). Dik id-dispożizzjoni tiżgura li d-dejta epidemjoloġika rilevanti relatata ma’ dawk l-annimali tkun disponibbli għall-membri kollha tal-OIE.

(4)

L-Anness III għar-Regolament (KE) Nru 1251/2008 jistabbilixxi lista ta’ pajjiżi terzi, territorji, żoni jew kompartimenti li minnhom huma permessi l-importazzjonijiet ta’ annimali tal-akkwakultura maħsuba għall-biedja, żoni tas-sajd ripopolati artifiċjalment u faċilitajiet ornamentali miftuħa, u ta’ ħut ornamentali suxxettibbli għal waħda jew aktar mill-mard elenkat fil-Parti II tal-Anness IV għad-Direttiva 2006/88/KE u maħsuba għal faċilitajiet ornamentali magħluqa.

(5)

Is-Segretarjat tal-Komunità tal-Paċifiku (SPC) huwa organizzazzjoni internazzjonali li tipprovdi għajnuna teknika, taħriġ u servizzi ta’ riċerka lil 22 pajjiż u territorju tal-Gżejjer tal-Paċifiku f’oqsma bħas-saħħa, l-iżvilupp tal-bniedem, l-agrikoltura, il-forestrija u s-sajd. Ċerti membri tal-SPC mhumiex membri tal-OIE.

(6)

L-OIE u l-SPC ikkonkludew Ftehim f’Settembru 1999. Skont dak il-Ftehim, l-SPC għandu jħeġġeġ lil dawk fost il-membri tiegħu li mhumiex membri tal-OIE biex jipparteċipaw f’netwerk tal-informazzjoni tal-OIE għas-saħħa tal-annimali u s-saħħa tal-annimali akkwatiċi.

(7)

L-Anness għal dak il-Ftehim, konkluż mill-SPC u l-OIE fl-10 ta’ April 2003, jistabbilixxi t-termini ta’ kollaborazzjoni bejn iż-żewġ partijiet għall-iżvilupp, il-manutenzjoni u d-distribuzzjoni ta’ Sistema Reġjonali ta’ Informazzjoni dwar is-Saħħa tal-Annimali għall-Pajjiżi u t-Territorji tal-Gżejjer tal-Paċifiku.

(8)

Permezz tal-ittri tal-31 ta’ Marzu 2009 u t-30 ta’ April 2009, l-SPC informa lill-Kummissjoni li l-membri tal-SPC li mhumiex membri tal-OIE jistgħu jiksbu informazzjoni rilevanti dwar il-mard fis-Sistema Internazzjonali ta’ Informazzjoni dwar is-Saħħa tal-Annimali tal-OIE b’konformità mal-kriterji tal-OIE, minn Mejju 2009.

(9)

Għaldaqstant, huwa xieraq li jiġi emendat l-Artikolu 11(2) tar-Regolament (KE) Nru 1251/2008, sabiex jiġu awtorizzati l-importazzjonijiet ta’ ħut ornamentali li mhuwiex speċi suxxettibbli għal xi marda elenkata fil-Parti II tal-Anness IV għad-Direttiva 2006/88/KE, u molluski ornamentali u krustaċji ornamentali, maħsuba għal faċilitajiet ornamentali magħluqa, ukoll minn pajjiżi terzi u territorji li mhumiex membri tal-OIE iżda li għandhom ftehim uffiċjali ma’ dik l-organizzazzjoni biex jipparteċipaw fin-netwerk tagħha ta’ informazzjoni għas-saħħa tal-annimali u s-saħħa tal-annimali akkwatiċi.

(10)

L-Istati Uniti kkonfermaw li Pwerto Riko, il-Gżejjer Verġni Amerikani, is-Samoa Amerikana, Guam u l-Gżejjer tan-Northern Mariannas jitqiesu territorji tal-Istati Uniti u l-awtorità kompetenti tal-Istati Uniti hija responsabbli għan-notifika tal-mard tal-annimali lill-OIE.

(11)

L-Anness III għal dak ir-Regolament għandu wkoll jiġi emendat skont dan, biex jinkludi l-membri rilevanti tal-SPC.

(12)

Skont id-Direttiva tal-Kunsill 91/67/KEE tat-28 ta’ Jannar 1991 dwar il-kondizzjonijiet tas-saħħa tal-annimali li jirregolaw it-tqegħid fuq is-suq tal-annimali u prodotti tal-akkwakultura (3), l-Istati Membri kellhom jiżguraw li l-importazzjonijiet ta’ annimali u l-prodotti tal-akkwakultura minn pajjiżi terzi kienu suġġetti għal kundizzjonijiet mill-inqas ekwivalenti għal dawk li japplikaw għall-produzzjoni u t-tqegħid fis-suq ta’ prodotti Komunitarji.

(13)

Waqt li d-Direttiva 91/67/KEE kienet fis-seħħ, l-importazzjonijiet mill-Istati Uniti ta’ krustaċji għall-biedja, żoni tas-sajd ripopolati artifiċjalment, u faċilitajiet ornamentali miftuħa kienu permessi fl-Istati Membri. Dik id-Direttiva ġiet revokata u sostitwita mid-Direttiva 2006/88/KE, li armonizzat ir-rekwiżiti tas-saħħa tal-annimali għal dawn l-importazzjonijiet.

(14)

L-Artikolu 20(3)(b) tar-Regolament (KE) Nru 1251/2008 jistabbilixxi perjodu tranżitorju li matulu kunsinni ta’ krustaċji għall-biedja, żoni tas-sajd ripopolati artifiċjalment, u faċilitajiet ornamentali miftuħa jistgħu jkomplu jiġu importati skont is-sistema li kienet teżisti qabel ma daħlet fis-seħħ id-Direttiva 2006/88/KE. Dak il-perjodu tranżitorju jiskadi fit-30 ta’ Ġunju 2009.

(15)

Għaldaqstant, l-Istati Uniti għandhom jiġu inklużi fl-Anness III għar-Regolament (KE) Nru 1251/2008, sakemm jitlestew l-ispezzjonijiet fuq il-post imwettqa skont id-Direttiva 2006/88/KE biex tkun ivverifikata l-konformità mar-regoli Komunitarji dwar is-saħħa tal-annimali akkwatiċi.

(16)

L-Anness III għar-Regolament (KE) Nru 1251/2008 għandu għalhekk jiġi emendat skont dan.

(17)

Il-miżuri stipulati f’dan ir-Regolament huma skont l-opinjoni tal-Kumitat Permanenti dwar il-Katina Alimentari u s-Saħħa tal-Annimali,

(1)

Fl-Artikolu 11, il-paragrafu 2 għandu jinbidel b’dan li ġej:

(2)

L-Anness III huwa sostitwit bit-test fl-Anness għal dan ir-Regolament.