8.4.2009
|
MT
|
Il-Ġurnal Uffiċjali tal-Unjoni Ewropea
|
L 94/97
|
DIRETTIVA TAL-KUMMISSJONI 2009/27/KE
tas-7 ta’ April 2009
Li temenda ċerti Annessi tad-Direttiva 2006/49/KE tal-Parlament Ewropew u tal-Kunsill fir-rigward ta’ dispożizzjonijiet tekniċi li għandhom x’jaqsmu mal-ġestjoni tar-riskju
(Test b’relevanza għaż-ŻEE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat id-Direttiva 2006/49/KE tal-Parlament Ewropew u tal-Kunsill tal-14 ta’ Ġunju 2006 dwar l-adegwatezza tal-kapital tal-kumpaniji tal-investiment u l-istituzzjonijiet tal-kreditu (kif ifformulata mill-ġdid) [titlu mhux uffiċjali] (1), u b’mod partikulari l-Artikolu 41 (1)(g) tagħha,
Billi:
(1)
|
Sabiex jiżguraw implimentazzjoni u applikazzjoni koerenti tad-Direttiva 2006/49/KE madwar l-UE kollha, fl-2006 l-Kummissjoni u l-Kumitat tas-Superviżuri Bankarji Ewropej waqqfu grupp ta’ ħidma (il-Grupp għat-Traspożizzjoni tad-Direttiva dwar ir-Rekwiżiti Kapitali – is-CRDTG) li kien inkarigat jiddiskuti u jsolvi kwistjonijiet li kellhom x’jaqsmu mal-implimentazzjoni u l-applikazzjoni ta’ dik id-Direttiva. Skont is-CRDTG, ċerti dispożizzjonijiet tekniċi inklużi fl-Annessi I, II u VII tad-Direttiva 2006/49/KE jeħtieġ li jiġu speċifikati iktar sabiex tkun żgurata l-applikazzjoni konverġenti tagħhom. Barra minn hekk, ċerti dispożizzjonijiet ma jikkorrispondux ma’ prattiki għaqlin tal-ġestjoni tar-riskju tal-istituzzjonijiet ta’ kreditu. Għalhekk huwa xieraq li dawn id-dispożizzjonijiet jiġu aġġustati.
|
(2)
|
Id-Direttiva 2006/49/KE għalhekk għandha tiġi emendata skont dan.
|
(3)
|
Il-miżuri pprovduti f’din id-Direttiva huma skont l-opinjoni tal-Kumitat Bankarju Ewropej,
|
ADOTTAT DIN ID-DIRETTIVA:
Artikolu 1
Id-Direttiva 2006/49/KE hija emendata kif ġej:
(1)
|
L-Anness I huwa emendat kif ġej:
(a)
|
Il-punt 8.B jitbiddel b’dan li ġej:
“B. IT-TRATTAMENT TAX-XERREJ TAL-PROTEZZJONI
Għal dik il-parti li tittrasferixxi r-riskju tal-kreditu (ix-“xerrej tal-protezzjoni”), il-pożizzjonijiet huma ddeterminati bħala l-prinċipju riflessiv (“mirror principle”) tal-bejjiegħ tal-protezzjoni, ħlief għan-nota b’rabta ma’ kreditu (“credit linked note”) (li ma tinvolvi l-ebda pożizzjoni ta’ nuqqas ta’ kreditu (“short position”) għall-emittent). Jekk, f’mument partikulari, ikun hemm dritt ta’ xiri (“call option”) flimkien ma’ “step-up”, dan il-mument jitqies bħala l-maturità tal-protezzjoni. Fil-każ ta’ derivattivi tal-kreditu li fihom ikun hemm l-ewwel nuqqas jew nuqqas “n” tal-obbligi (“first to default” u “nth to default”), it-trattament li ġej għandu japplika minflok il-prinċipju riflessiv.
Derivattivi tal-kreditu li fihom ikun hemm l-ewwel nuqqas tal-obbligi
Fejn istituzzjoni tikseb protezzjoni tal-kreditu għal għadd ta’ entitajiet ta’ referenza li fuqhom jissejjes derivattiv tal-kreditu bit-termini li l-ewwel nuqqas fost l-assi għandu jwassal għall-ħlas u li dan l-avveniment tal-kreditu għandu jtemm il-kuntratt, l-istituzzjoni tista’ tibbilanċja riskju speċifiku għall-entità ta’ referenza li għaliha japplika l-inqas perċentwali ta’ ħlas tar-riskju speċifiku minn fost l-entitajiet ta’ referenza tal-bażi skont it-Tabella 1 ta’ dan l-Anness.
Derivattivi tal-kreditu li fihom ikun hemm nuqqas “n” tal-obbligi
F’każ fejn in-nuqqas “n” fost l-iskoperturi jwassal għal ħlas skont il-protezzjoni tal-kreditu, ix-xerrej tal-protezzjoni jista’ jibbilanċja riskju speċifiku biss jekk tkun inkisbet il-protezzjoni wkoll għan-nuqqasijet 1 sa n-1 jew f’każ li jkunu diġà seħħew in-nuqqasijiet n-1. Fit-tali każijiet, il-metodoloġija mniżżla hawn fuq għad-derivattivi tal-kreditu li fihom ikun hemm l-ewwel nuqqas tal-obbligi għandha titbiddel kif xieraq għall-prodotti li fihom ikun hemm nuqqas “n” tal-obbligi.”
|
(b)
|
Fil-punt 14, it-Tabella 1 titbiddel b’dan li ġej:
“Tabella 1
Il-kategoriji
|
Tariffa tal-kapital għal riskju speċifiku
|
Titoli ta’ self maħruġin jew iggarantiti minn amministrazzjonijiet ċentrali, maħruġin minn banek ċentrali, organizzazzjonijiet internazzjonali, banek multilaterali tal-iżvilupp jew amministrazzjonijiet reġjonali jew awtoritajiet lokali tal-Istati Membri li jikkwalifikaw għall-grad ta’ kwalità tal-kreditu bin-numru 1 jew li jirċievu piż għar-riskju ta’ 0 % skont ir-regoli għall-ippeżar tar-riskju għall-iskoperturi skont l-Artikoli 78 sa 83 tad-Direttiva 2006/48/KE.
|
0 %
|
Titoli ta’ self maħruġin jew iggarantiti minn amministrazzjonijiet ċentrali, maħruġin minn banek ċentrali, organizzazzjonijiet internazzjonali, banek multilaterali tal-iżvilupp jew amministrazzjonijiet reġjonali jew awtoritajiet lokali tal-Istati Membri li jikkwalifikaw għall-grad ta’ kwalità tal-kreditu bin-numru 2 jew 3 skont ir-regoli għall-ippeżar tar-riskju għall-iskoperturi skont l-Artikoli 78 sa 83 tad-Direttiva 2006/48/KE, u titoli ta’ self maħruġin jew iggarantiti minn istituzzjonijiet li jikkwalifikaw għall-grad ta’ kwalità tal-kreditu bin-numru 1 jew 2 skont ir-regoli għall-ippeżar tar-riskju għall-iskoperturi skont l-Artikoli 78 sa 83 tad-Direttiva 2006/48/KE, u titoli ta’ self maħruġin jew iggarantiti minn istituzzjonijiet li jikkwalifikaw għall-grad ta’ kwalità tal-kreditu bin-numru 3 skont ir-regoli għall-ippeżar tar-riskju għall-iskoperturi skont il-punt 29 tal-Parti 1 tal-Anness VI tad-Direttiva 2006/48/KE, u titoli ta’ self maħruġin jew iggarantiti minn kumpaniji li jikkwalifikaw għall-grad ta’ kwalità tal-kreditu bin-numru 1, 2 jew 3 skont ir-regoli għall-ippeżar tar-riskju għall-iskoperturi skont l-Artikoli 78 sa 83 tad-Direttiva 2006/48/KE.
Elementi oħra li jikkwalifikaw kif iddefiniti fil-punt 15.
|
0,25 % (li jkun baqgħalhom sitt xhur jew anqas biex jimmaturaw)
1,00 % (li jkun baqgħalhom aktar minn sitt xhur u mhux aktar minn 24 xahar sal-maturità finali tagħhom)
1,60 % (li jkun baqgħalhom aktar minn 24 xahar biex jimmaturaw)
|
Titoli ta’ self maħruġin jew iggarantiti minn amministrazzjonijiet ċentrali, maħruġin minn banek ċentrali, organizzazzjonijiet internazzjonali, banek multilaterali tal-iżvilupp jew amministrazzjonijiet reġjonali jew awtoritajiet lokali jew istituzzjonijiet tal-Istati Membri li jikkwalifikaw għall-grad ta’ kwalità tal-kreditu bin-numru 4 jew 5 skont ir-regoli għall-ippeżar tar-riskju għall-iskoperturi skont l-Artikoli 78 sa 83 tad-Direttiva 2006/48/KE, u titoli ta’ self maħruġin jew iggarantiti minn istituzzjonijiet li jikkwalifikaw għall-grad ta’ kwalità tal-kreditu bin-numru 3 skont ir-regoli għall-ippeżar tar-riskju għall-iskoperturi skont il-punt 26 tal-Parti 1 tal-Anness VI tad-Direttiva 2006/48/KE, u titoli ta’ self maħruġin jew iggarantiti minn kumpaniji li jikkwalifikaw għall-grad ta’ kwalità tal-kreditu bin-numru 4 skont ir-regoli għall-ippeżar tar-riskju għall-iskoperturi skont l-Artikoli 78 sa 83 tad-Direttiva 2006/48/KE. Skoperturi li għalihom mhijiex disponibbli valutazzjoni tal-kreditu magħmula minn ECAI nominata.
|
8,00 %
|
Titoli ta’ self maħruġin jew iggarantiti minn amministrazzjonijiet ċentrali, maħruġin minn banek ċentrali, organizzazzjonijiet internazzjonali, banek multilaterali tal-iżvilupp jew amministrazzjonijiet reġjonali jew awtoritajiet lokali jew istituzzjonijiet tal-Istati Membri li jikkwalifikaw għall-grad ta’ kwalità tal-kreditu bin-numru 6 skont ir-regoli għall-ippeżar tar-riskju għall-iskoperturi skont l-Artikoli 78 sa 83 tad-Direttiva 2006/48/KE, u titoli ta’ self maħruġin jew iggarantiti minn kumpaniji li jikkwalifikaw għall-grad ta’ kwalità tal-kreditu bin-numru 5 jew 6 skont ir-regoli għall-ippeżar tar-riskju għall-iskoperturi skont l-Artikoli 78 sa 83 tad-Direttiva 2006/48/KE.
|
12,00 %”
|
|
|
(2)
|
Fl-Anness II, il-punt 11 qed jitbiddel b’dan li ġej:
“11.
|
F’każ fejn derivattiv tal-kreditu mdaħħal fil-kotba tal-kummerċ jifforma parti minn kopertura (“hedge”) interna u l-protezzjoni tal-kreditu tkun irrikonoxxuta taħt id-Direttiva 2006/48/KE, l-ebda riskju ma għandu jitqies li jirriżulta għall-kontroparti mill-pożizzjoni fid-derivattiv tal-kreditu. B’mod alternattiv, sabiex jiġu kkalkulati r-rekwiżiti kapitali għar-riskju tal-kreditu għall-kontroparti (RKK), istituzzjoni tista’ tinkludi, b’mod konsistenti, id-derivattivi tal-kreditu kollha mdaħħlin fil-kotba tal-kummerċ li jiffurmaw parti minn koperturi interni jew li jkunu nxtraw bħala protezzjoni minn skopertura għar-RKK f’każ fejn il-protezzjoni tal-kreditu tkun irrikonoxxuta taħt id-Direttiva 2006/48/KE.”
|
|
(3)
|
Fil-Parti Ċ tal-Anness VII, il-punt 3 qed jitbiddel b’dan li ġej:
“3.
|
B’deroga mill-punti 1 u 2, f’każ li istituzzjoni tkopri skopertura għar-riskju tal-kreditu li mhix imdaħħla fil-kotba tal-kummerċ bl-użu ta’ derivattiv tal-kreditu mdaħħal fil-kotba tal-kummerċ tagħha (bl-użu ta’ kopertura interna), l-iskopertura ta’ element li mhuwiex imdaħħal fil-kotba tal-kummerċ ma għandhiex titqies li hi koperta sabiex jiġu kkalkulati r-rekwiżiti kapitali sakemm l-istituzzjoni ma tixtrix, mingħand parti terza li tkun eliġibbli bħala fornitriċi tal-protezzjoni, derivattiv tal-kreditu li jkun jissodisfa r-rekwiżiti stabbiliti fil-punt 19 tal-Parti 2 tal-Anness VIII tad-Direttiva 2006/48/KE fir-rigward tal-iskopertura ta’ element li mhuwiex imdaħħal fil-kotba tal-kummerċ. Mingħajr ħsara għat-tieni sentenza tal-punt 11 tal-Anness II, f’każ fejn tinxtara din it-tip ta’ protezzjoni mingħand parti terza u din tkun irrikonoxxuta bħala kopertura ta’ skopertura ta’ element li mhuwiex imdaħħal fil-kotba tal-kummerċ sabiex jiġu kkalkulati r-rekwiżiti kapitali, la l-kopertura tad-derivattiv tal-kreditu interna u lanqas dik esterna m’hu se jiddaħħlu fil-kotba tal-kummerċ sabiex jiġu kkalkulati r-rekwiżiti kapitali.”
|
|
Artikolu 2
1. L-Istati Membri għandhom jadottaw u jippubblikaw il-liġijiet, ir-regolamenti u d-dispożizzjonijiet amministrattivi meħtieġa sabiex ikunu konformi ma’ din id-Direttiva sa mhux aktar tard mill-31 ta’ Ottubru 2010. Huma għandhom jikkomunikaw minnufih lill-Kummissjoni t-test ta’ dawk id-dispożizzjonijiet u t-tabella ta’ korrelazzjoni bejn dawk id-dispożizzjonijiet u din id-Direttiva.
Huma għandhom japplikaw dawk id-dispożizzjonijiet mill-31 ta’ Diċembru 2010.
Meta l-Istati Membri jadottaw dawk id-dispożizzjonijiet, dawn għandhom jinkludu referenza għal din id-Direttiva jew jinkludu din ir-referenza meta jippubblikawhom b’mod uffiċjali. L-Istati Membri għandhom jistabbilixxu kif għandha ssir din ir-referenza.
2. L-Istati Membri għandhom jikkomunikaw lill-Kummissjoni t-test tad-dispożizzjonijiet ewlenin tal-liġi nazzjonali li jadottaw fil-qasam kopert minn din id-Direttiva.
Artikolu 3
Din id-Direttiva għandha tidħol fis-seħħ fl-għoxrin jum wara dak tal-pubblikazzjoni tagħha f’Il-Ġurnal Uffiċjali tal-Unjoni Ewropea.
Artikolu 4
Din id-Direttiva hija indirizzata lill-Istati Membri.
Magħmul fi Brussell, 7 ta’ April 2009.
Għall-Kummissjoni
Charlie McCREEVY
Membru tal-Kummissjoni
(1) ĠU L 177, 30.6.2006, p. 201.