dwar il-Pjan ta' Azzjoni Doganali tal-UE għall-ġlieda kontra l-Ksur tad-drittijiet ta' proprjetà intellettwali (IPR) għas-snin 2009 sal-2012

(1) Komunikazzjoni mill-Kummissjoni lill-Kunsill Ewropew “Rapport strateġiku dwar l-istrateġija ta' Lisbona mġedda għat-tkabbir u l-impjiegi: it-tnedija taċ-ċiklu l-ġdid (2008-2010) — Jinżamm ir-ritmu tal-bidla” COM(2007) 803 finali.

ANNESS

Il-Pjan ta' Azzjoni Doganali tal-UE għall-ġlieda kontra l-Ksur tad-drittijiet ta' proprjetà intellettwali (IPR) għas-snin 2009 sal-2012

Introduzzjoni

Il-Kummissjoni u l-Istati Membri analizzaw attivitajiet fl-UE relatati mal-infurzar doganali tad-drittijiet tal-proprjetà intellettwali (IPR) mill-2005 sal-2008, għall-perijodu tal-pjan ta' azzjoni doganali preċedenti għall-ġlieda kontra l-falsifikazzjoni (1). L-implimentazzjoni tar-Regolament tal-Kunsill (KE) Nru 1383/2003 u l-attivitajiet li jinsabu fil-pjan ta' azzjoni tqiesu li pprovdew reazzjoni b'suċċess għall-kummerċ fil-prodotti ffalsifikati. L-istatistika annwali ppubblikata mill-Kummissjoni wriet xejra 'l fuq fl-attività doganali, kif ukoll aktar kooperazzjoni mad-detenturi tad-drittijiet.

Madankollu, kien rikonoxxut li d-diversità dejjem tiżdied ta' prodotti maqbuda u xejriet ġodda, bħall-importazzjoni ta' konsenji żgħar li jirriżultaw mill-bejgħ bl-Internet, uriet li kienu meħtieġa aktar miżuri u li ma kienx hemm lok għal kompjaċenza. Il-ħtieġa li jkun hemm reazzjoni għal din il-problema dejjem tikber kienet sottolinjata hekk kif il-kummerċ fil-prodotti ffalsifikati rrappreżenta theddida reali għal kull ċittadin u għas-soċjetà kollha kemm hi.

Il-Kummissjoni qieset li l-isforzi li saru mill-awtoritajiet doganali biex jipproteġu l-interessi ekonomiċi u s-saħħa u s-sigurtà taċ-ċittadini għandhom jitkomplew u ġie rrakkomandat pjan ta' azzjoni ieħor. Pjan bħal dan għandu jkopri l-oqsma prinċipali li jinsabu fil-pjan preċedenti, jiġifieri l-leġislazzjoni, il-prestazzjoni operattiva, il-kooperazzjoni tal-industrija, il-kooperazzjoni internazzjonali, u l-komunikazzjoni. Il-pjan il-ġdid għandu jieħu kont tal-iżviluppi rilevanti fil-qasam doganali, bħall-Kodiċi Doganali Komunitarju mmodernizzat, kif ukoll fatturi esterni, bħaż-żieda fil-bejgħ minn fuq l-Internet. B'mod partikolari, il-Pjan ta' Azzjoni tal-UE ġdid għandu jiffoka fuq:

—	it-titjib u fejn meħtieġ l-immodifikar, tal-leġislazzjoni eżistenti dwar id-drittijiet ta' proprjetà intellettwali;

—	it-titjib tal-kooperazzjoni mad-detenturi tad-drittijiet;

—	it-tisħiħ tal-kooperazzjoni operattiva bejn id-dwana fl-UE u ma' pajjiżi terzi;

—	l-iżvilupp ta' aktar kooperazzjoni internazzjonali dwar l-infurzar tad-drittijiet ta' proprjetà intellettwali;

—	it-titjib tal-pubbliċità u tas-sensibilizzazzjoni; u

—	ir-reazzjoni għall-problema tal-bejgħ minn fuq l-Internet u l-għoti ta' taħriġ ad hoc lill-uffiċjali tad-dwana.

Il-pjan il-ġdid għandu wkoll jieħu kont ta' xejriet u forom ġodda oħra użati fid-distribuzzjoni ta' prodotti ffalsifikati perikolużi għas-soċjetà, li jirriżultaw mill-globalizzazzjoni tal-kummerċ dinji, u l-involviment dejjem jikber tal-kriminalità organizzata.

L-Istati Membri u l-Kummissjoni kkollaboraw mill-qrib fuq firxa ta' kwistjonijiet relatati mal-eżami tal-qafas kurrenti għall-attivitajiet doganali relatati mal-infurzar tad-drittijiet ta' proprjetà intellettwali. L-Istati Membri kollha wrew li l-protezzjoni tad-drittijiet ta' proprjetà intellettwali kienet tirrappreżenta priorità ċara għalihom u ħafna qiesu li sabiex jagħmlu l-attivitajiet doganali fid-drittijiet ta' proprjetà intellettwali aktar effiċjenti, ikun adatt li tiġi żviluppata u tibda tintuża bażi tad-data informattiva konġunta li fiha l-applikazzjonijiet approvati għall-azzjoni.

Il-Kunsill, fir-Riżoluzzjoni tiegħu tal-25 ta' Settembru 2008 dwar pjan Ewropew globali għall-ġlieda kontra l-falsifikazzjoni u l-piraterija, stieden lill-Kummissjoni u lill-Istati Membri jippreżentaw pjan doganali ġdid għall-ġlieda kontra l-falsifikazzjoni għall-perijodu mill-2009 sal-2012.

Konklużjonijiet tas-Seminar ta' Livell Għoli dwar il-ġlieda kontra l-falsifikazzjoni

L-eżami tal-attivitajiet doganali relatati mal-infurzar tad-drittijiet ta' proprjetà intellettwali laħaq l-ogħla punt f'Seminar ta' Livell Għoli organizzat f'Pariġi mill-25 sas-26 ta' Novembru 2008, lejn tmiem il-Presidenza Franċiża.

L-għan ta' dan is-seminar kien li titqies ir-reazzjoni tad-dwana għall-ġlieda kontra l-falsifikazzjoni. Id-Diretturi Ġenerali tad-Dwana tal-Istati Membri u tal-Kummissjoni kkonkludew li l-pjan ta' azzjoni doganali futur għandu jittratta erba' sfidi prinċipali ppreżentati mill-falsifikazzjoni:

1. Prodotti ffalsifikati perikolużi

Il-konsumatur għandu jkun informat dwar il-konsegwenzi, xi kultant drammatiċi, assoċjati ma' prodotti ffalsifikati, permezz ta' kampanji ta' sensibilizzazzjoni fil-livell tal-UE, li magħhom tista' tiġi assoċjata d-dwana. Il-leġislazzjoni u l-proċeduri kemm fil-livell Komunitarju u f'dak nazzjonali għandhom, fejn meħtieġ, jiġu mmodifikati biex isaħħu l-abbiltà tad-dwana biex tinterċetta prodotti ffalsifikati. Għandha tingħata attenzjoni partikolari lill-armonizzazzjoni ta' miżuri relatati ma' proċeduri simplifikati u kwantitajiet żgħar ta' merkanzija kontenzjuża.

2. Il-kriminalità organizzata

Permezz ta' Osservatorju Ewropew, fejn id-dwana tista' tagħti kontribut sinifikanti u fejn jistgħu jiġu skambjati l-aħjar prattiki, tkun tista' ssir evalwazzjoni u analiżi regolari tal-fenomenu dejjem jikber tal-kriminalità organizzata fil-falsifikazzjoni. Il-kooperazzjoni bejn il-partijiet interessati għandha tissaħħaħ permezz tal-iżvilupp ta' sistemi elettroniċi ta' skambju ta' informazzjoni. L-analiżi ta' riskju fil-livell Komunitarju huwa meħtieġ u għandu jiġi żviluppat, filwaqt li jieħu vantaġġ mill-mekkaniżmi eżistenti. Ser jiġu żviluppati azzjonijiet doganali Ewropej konġunti, b'iffokar fuq temi jew setturi partikolari. Is-sħubija essenzjali bejn id-dwana u l-industrija ser tissaħħaħ.

3. Il-globalizzazzjoni tal-falsifikazzjoni

Il-pjan ta' azzjoni doganali maċ-Ċina, li ġie ffinalizzat mis-servizzi tal-Kummissjoni, jippermetti l-iskambju ta' informazzjoni, kif ukoll lill-uffiċjali ma' dan il-pajjiż li jiġġieldu kontra l-falsifikazzjoni. L-Istati Membri u l-Kummissjoni ser ikompu jaħdmu lejn l-adozzjoni ta' miżuri tal-fruntieri effettivi fin-negozjati kurrenti dwar l-ACTA, il-ftehim kummerċjali propost dwar il-ġlieda kontra l-falsifikazzjoni. Il-kooperazzjoni internazzjonali fil-forma ta' skambju ta' informazzjoni u operazzjonijiet konġunti ser tissaħħaħ ma' pajjiżi msieħba prinċipali.

4. Bejgħ ta' prodotti ffalsifikati minn fuq l-Internet

L-Istati Membri kollha għandhom jeżaminaw il-fenomenu tal-bejgħ minn fuq l-Internet u jikkondividu “l-aħjar prattiki”. Ser jiġu organizzati seminars u gruppi ta' ħidma sabiex jiġu konklużi memoranda ta' fehim bi pjattaformi fuq l-Internet u l-istituzzjonijiet finanzjarji involuti fi ħlasijiet onlajn, biex jiskambjaw l-informazzjoni, u jikkondividu prattiċi dwar il-monitoraġġ u l-identifikazzjoni ta' bejjiegħa professjonali ta' prodotti ffalsifikati.

Il-Pjan ta' Azzjoni Doganali tal-UE għall-ġlieda kontra l-Ksur tad-drittijiet ta' proprjetà intellettwali (IPR) għas-snin 2009 sal-2012

Huwa rikonoxxut li hemm kwistjonijiet li għandhom impatt fuq ħidmet u l-effiċjenza tad-dwana, fejn l-amministrazzjonijiet doganali huma, għall-inqas sa ċertu punt, dipendenti fuq żviluppi f'oqsma oħra ta' politika, speċjalment l-armonizzazzjoni tal-leġislazzjoni relatata mad-drittijiet ta' proprjetà intellettwali, kif ukoll is-sanzjonijiet applikabbli għall-kummerċ ta' merkanzija li tikser id-drittijiet ta' proprjetà intellettwali. Barra dan, huwa meħtieġ li tissaħħaħ il-kooperazzjoni ma' awtoritajiet oħra tal-infurzar tal-liġi fil-livell nazzjonali. Dawk il-ħtiġiet huma prekondizzjoni għall-Istati Membri li jirrikonoxxu t-theddid li jirriżulta mill-falsifikazzjoni u għall-kondiviżjoni tagħhom tal-interess komuni fil-ġlieda kontra dan it-theddid b'mod koordinat u armonizzat. Barra dan, Pjan ta' Azzjoni tal-UE ġdid jista' faċilment jintuża bħala bażi tajba għall-abbozzar ta' Pjan ta' Azzjoni nazzjonali għall-ġlieda kontra l-ksur tad-drittijiet ta' proprjetà intellettwali f'kull wieħed mill-Istati Membri.

Huwa wkoll innotat li l-Kummissjoni u l-Amministrazzjonijiet Doganali tal-Istati Membri għandhom kontribut sinifikanti x'jagħtu lill-Osservatorju Ewropew għall-Ġlieda Kontra l-Falsifikazzjoni fil-ġlieda kontra l-kummerċ fi prodotti ffalsifikati. Ladarba l-Osservatorju jkun ġie stabbilit, għandha tingħatalu informazzjoni adatta dwar l-attivitajiet doganali relatati mal-infurzar fuq il-fruntieri tad-drittijiet ta' proprjetà intellettwali.

Mekkaniżmu ta' reviżjoni

Il-Kummissjoni kkunsidrat ukoll li għandu jkun stabbilit mekkaniżmu ta' reviżjoni għall-monitoraġġ ta' implimentazzjoni tal-attivitajiet li jinsabu fil-pjan. Għal dan il-għan, ser tiġi ppreżentata reviżjoni mill-Kummissjoni, b'kollaborazzjoni mal-Presidenza tal-Kunsill fl-aħħar ta' kull sena tal-Pjan ta' Azzjoni. Fl-aħħar sena tal-Pjan ta' Azzjoni, ser jiġi ppreparat rapport aktar dettaljat mill-Kummissjoni, flimkien mal-Istati Membri.

Konklużjoni

Il-Pjan ta' Azzjoni Doganali tal-UE għas-snin 2009 sal-2012 għall-ġlieda kontra l-ksur tad-drittijiet ta' proprjetà intellettwali huwa anness u jikkostitwixxi reazzjoni għall-istedina tal-Kunsill, filwaqt li jipprevedi attivitajiet estensivi mid-dwana għall-ġlieda kontra l-kummerċ ta' merkanzija li tikser id-drittijiet ta' proprjetà intellettwali.

(1) Dan id-dokument juża t-terminu “falsifikazzjoni” bħala terminu ġenerali biex ikopri l-ksur tad-drittijiet ta' proprjetà intellettwali koperti mid-dispożizzjonijiet tar-Regolament tal-Kunsill (KE) Nru 1383/2003.

ANNESS GĦALL-ANNESS

Avveniment

Responsabbiltà Prinċipali

Progress

Leġislazzjoni u għodda tad-data

1.1.

Reviżjoni tar-Regolament tal-Kunsill (KE) Nru 1383/2003 u d-dispożizzjonijiet implimentattivi rilevanti li jinsabu fir-Regolament tal-Kummissjoni (KE) Nru 1891/2004 bl-għan li tiġi ċċarata u armonizzata l-interpretazzjoni, b'mod partikolari fir-rigward ta':

Kummissjoni Ewropea

—	Transitu estern, Trasbord — dan il-punt jeħtieġ li jiġi eżaminat flimkien mal-leġislazzjoni l-oħra, bl-għan tal-istabbiliment possibbli ta' ksur f'każijiet fejn prodotti foloz jinsabu fi transitu;

—	Dispożizzjonijiet dwar konsenji żgħar li jinvolvu importazzjonijiet minn passiġġieri u permezz tal-posta/pakketti express — dan il-punt jista' jkun jeħtieġ li jiġi eżaminat flimkien mal-leġislazzjoni l-oħra;

—	Dispożizzjonijiet dwar l-applikazzjoni ta' proċedura simplifikata (Art. 11 tar-Regolament tal-Kunsill (KE) Nru 1383/2003);

—	Spejjeż tal-ħażna u l-qerda u t-tħassib imqajjem mid-detenturi tad-drittijiet rigward ir-responsabbiltajiet finanzjarji tagħhom taħt il-leġislazzjoni kurrenti;

—	Donazzjonijiet lil assoċjazzjonijiet tal-karità u r-riċiklar bħala alternattivi għall-qerda ta' prodotti ffalsifikati;

—	Definizzjoni ta' prodotti ffalsifikati, fir-rigward ta' estensjoni potenzjali tal-ambitu tar-Regolament tal-Kunsill (KE) Nru 1383/2003;

—	L-għoti ta' statistika addizzjonali relatata mal-valur tal-qbid biex tkun żgurata ġabra ta' data ta' kwalità għolja dwar merkanzija maqbuda u l-applikazzjoni ta' din il-proċedura fl-abbozzar tal-profili tar-riskji;

—	L-introduzzjoni tal-possibbiltà li tkun sospiża l-applikazzjoni għal azzjoni u miżuri oħra kontra l-inattività jew l-abbuż tal-informazzjoni minn detenturi tad-drittijiet;

—	L-introduzzjoni ta' kwalunkwe dispożizzjoni addizzjonali fir-rigward tal-iżvilupp ta' sistema elettronika għall-applikazzjonijiet għall-azzjoni.

1.2.

Il-preparazzjoni ta' proposta għall-immodifikar tal-leġislazzjoni doganali tal-UE, skont il-konklużjonijiet tar-reviżjoni tal-leġislazzjoni.

Kummissjoni Ewropea

1.3.

L-iżvilupp u l-introduzzjoni ta' sistema elettronika ta' livell Komunitarju għall-applikazzjonijiet għal azzjoni biex tkun sostitwitad-distribuzzjoni kurrenti tad-dokumenti fuq karti.

Kummissjoni Ewropea

1.4.

L-iżvilupp u l-introduzzjoni ta' bażi tad-data għar-reġistrazzjoni tal-qabdiet doganali u statistika relatata.

Kummissjoni Ewropea

Prestazzjoni operazzjonali

2.1.

L-iżvilupp ta' attivitajiet għall-kondiviżjoni tal-aħjar prattiki, eż., eżerċizzji ta' valutazzjoni komparattiva, taħriġ u żjarat ta' skambju biex jittejbu l-kondiviżjoni u l-iskambju reċiproku ta' informazzjoni rilevanti minn esperti mill-Istati Membri individwali.

Kummissjoni Ewropea u/jew Stati Membri

2.2.

Azzjonijiet fil-livell tal-UE, imsejsa fuq is-Sistema Komunitarja għall-Ġestjoni tar-Riskju, bl-għan li tittejjeb l-effikaċja tal-kontrolli kontra l-falsifikazzjoni, speċjalment fil-fruntieri esterni tal-UE.

Kummissjoni Ewropea

2.3.

Attivitajiet ikkoordinati tal-UE għall-:

Kummissjoni Ewropea

—	Prodotti perikolużi, bħal farmaċewtiċi, li jirrappreżentaw l-ogħla riskju għas-saħħa u s-sigurtà tal-konsumatur u għall-ambjent;

—	Operazzjonijiet konġunti u selettivi mmirati lejn id-drittijiet tal-proprjetà intellettwali li ser jiffokaw fuq il-falsifikazzjoni f'relazzjoni ma' avvenimenti kulturali, soċjali, u sportivi sinifikanti (il-Logħob Olimpiku, eċċ.).

2.4.

Il-promozzjoni tal-użu tar-RIF (Formola tal-Informazzjoni dwar ir-Riskju) għal użu usa' u aktar effiċjenti fil-qasam tal-infurzar tad-drittijiet tal-proprjetà intellettwali:

Kummissjoni Ewropea

—	L-istabbiliment ta' grupp dedikat ta' utenti tar-RIF;

—	Il-promozzjoni u stabbiliment ta' netwerk nazzjonali ta' esperti fil-livell operattiv.

2.5.

L-eżami tal-implikazzjonijiet tal-problemi li dejjem jikbru dwar il-kummerċ fil-prodotti ffalsifikati permezz tal-Internet:

Kummissjoni Ewropea u Stati Membri

—	Il-ħolqien ta' Grupp ta' Ħidma ta' esperti biex jeżaminaw id-distribuzzjoni ta' prodotti ffalsifikati permezz tal-Internet u biex jippromwovu l-kooperazzjoni bejn l-Istati Membri dwar din il-kwistjoni;

—	L-organizzazzjoni ta' seminars għad-dwana u l-partijiet interessati b'enfasi speċjali fuq analiżi dettaljata tal-fenomenu tal-Internet u fuq l-identifikazzjoni tal-aħjar prattiki f'dan il-qasam.

2.6.

L-iżvilupp ta' materjal ta' taħriġ dwar l-infurzar tad-drittijiet tal-proprjetà intellettwali, inkluż il-ħolqien ta' korsijiet dwar id-drittijiet tal-proprjetà intellettwali permezz tat-tagħlim elettroniku u l-organizzazzjoni ta' korsijiet ta' taħriġ kif ikun adatt.

Kummissjoni Ewropea u Stati Membri

2.7.

Il-kumpilazzjoni u ż-żamma ta' lista aġġornata ta' esperti doganali dwar id-drittijiet tal-proprjetà intellettwali mill-Istati Membri.

Kummissjoni Ewropea

Kooperazzjoni fin-negozju

3.1.

Il-promozzjoni tal-preżentazzjoni tal-applikazzjonijiet għall-azzjoni minn detenturi tad-drittijiet biex id-detenturi tad-drittijiet ikunu jafu b'din l-għażla.

Kummissjoni Ewropea u Stati Membri

3.2.

Il-promozzjoni ta' konklużjonijiet ta' arranġamenti speċjali mad-detenturi tad-drittijiet u partijiet interessati oħra, dwar il-kooperazzjoni u l-iskambju tal-informazzjoni:

Kummissjoni Ewropea Stati Membri u detenturi tad-drittijiet

—	Il-konklużjoni ta' Memoranda ta' Ftehim ma' partijiet interessati rilevanti, bħal fornituri tas-servizz tal-Internet;

—	Il-kollaborazzjoni mal-Kummissjoni biex jitjieb l-iskambju ta' informazzjoni u esperjenzi.

3.3.

L-organizzazzjoni għall-industrija/detenturi tad-drittijiet:

Kummissjoni Ewropea u Stati Membri

—	Seminars immirati (bħal seminars ta' taħriġ, reġjonali u operazzjonali) b'enfasi fuq xejriet u forom ġodda ta' tqassim ta' prodotti ffalsifikati, partikolarmant prodotti perikolużi u bejgħ mill-Internet;

—	Laqgħat regolari kemm fil-livell tal-UE u f'dak nazzjonali organizzati skond il-ħtiġiet u l-ħtiġijiet speċifiċi tagħhom.

3.4.

Il-promozzjoni tal-introduzzjoni ta' skambju elettroniku ta' informazzjoni mas-settur privat, bl-aħjar mod possibbli.

Kummissjoni Ewropea u Stati Membri

3.5.

Il-promozzjoni tal-użu tal-allarm aħmar/formoli tax-xejriet biex id-dwana tinżamm informata dwar l-aħħar xejriet u theddid rigward il-falsifikazzjoni.

Kummissjoni Ewropea u Stati Membri

3.6.

L-għoti ta' informazzjoni lil detenturi tad-drittijiet dwar proċeduri doganali relatati mal-infurzar tad-drittijiet tal-proprjetà intellettwali.

Kummissjoni Ewropea u Stati Membri

Kooperazzjoni internazzjonali

4.1.

L-appoġġ għan-negozjati dwar l-ACTA (Ftehim Kummerċjali dwar il-Ġlieda Kontra l-Falsifikazzjoni)

Kummissjoni Ewropea u Stati Membri

—	L-istabbiliment ta' dispożizzjonijiet ambizzjużi dwar l-infurzar tal-fruntieri;

—	L-istabbiliment ta' grupp ta' esperti doganali għall-ġestjoni tal-implimentazzjonijiet ta' miżuri tal-fruntieri.

4.2.

L-Appoġġ għall-Pjan ta' Azzjoni maċ-Ċina:

Kummissjoni Ewropea u Stati Membri

—	Il-konklużjoni ta' pjan ta' azzjoni konkret;

—	L-implimentazzjoni ta' attivitajiet prinċipali tal-pjan ta' azzjoni;

—	Ir-reviżjoni tal-livell tal-implimentazzjoni tiegħu (annwalment).

4.3.

It-tisħiħ tal-kooperazzjoni mal-imsieħba prinċipali (eż. l-Istati Uniti, il-Ġappun u oħrajn):

Kummissjoni Ewropea u Stati Membri

—	It-tisħiħ tal-iskambju ta' informazzjoni (data statistika, l-aħjar prattiki, eċċ.);

—	L-organizzazzjoni ta' azzjonijiet konġunti bħal Operazzjonijiet Doganali Konġunti;

—	Il-koordinazzjoni tal-KE f'fora internazzjonali, inklużi l-WTO u l-Organizzazzjoni Dinjija Doganali (WCO);

—	Il-koordinazzjoni mill-KE tal-attivitajiet tal-bini ta' kapaċità.

Sensibilizzazzjoni u komunikazzjoni

5.1.

L-iżvilupp ta' attivitajiet ta' sensibilizzazzjoni:

Kummissjoni Ewropea u Stati Membri

—	Kampanji dwar ir-riżultati miksuba mid-Dwana fil-qasam tad-drittijiet tal-proprjetà intellettwali fil-livell tal-UE u f'dak nazzjonali relatati ma' aspetti tas-saħħa u s-sigurtà, bħas-settur farmaċewtiku. Il-konsumaturi għandhom jiġu mwissija bir-riskji assoċjati max-xiri ta' prodotti ffalsifikati;

—	Fuljetti u kartelluni fl-ajruport, portijiet, stazzjonijiet tal-ferrovija u l-qsim tal-fruntieri. Avviżi televiżivi; Avviżi ta' informazzjoni; pop-up windows fuq l-Internet; il-mezzi tax-xandir u l-esebizzjonijiet;

—	Il-ġlieda kontra l-bejgħ permezz tal-Internet billi jiġi enfasizzat ir-riskju marbut mal-bejgħ mill-Internet.

5.2.

Il-promozzjoni tal-kooperazzjoni fil-komunikazzjoni ma' aġenziji oħra tal-infurzar.

Stati Membri

5.3.

Il-koordinazzjoni tal-azzjonijiet ta' komunikazzjoni fil-livell tal-UE, inklużi:

Kummissjoni Ewropea

—	Il-pubblikazzjoni annwali tal-istatistika;

—	Ġranet ta' sensibilizzazzjoni (Ġranet għall-pubbliku, ġurnata għall-ġlieda kontra l-falsifikazzjoni, eċċ.);

—	Stqarrijiet għall-istampa;

—	Il-pubblikazzjoni ta' każijiet speċifiċi (qabdiet, xejriet ġodda, eċċ.).

5.4.

It-tisħiħ tal-kontenut tal-websajts tal-Kummissjoni u dawk nazzjonali dwar l-infurzar tad-drittijiet ta' proprjetà intellettwali.

Kummissjoni Ewropea u Stati Membri