29.12.2009   

MT

Il-Ġurnal Uffiċjali tal-Unjoni Ewropea

L 348/16

(1)

Fis-26 ta’ Ġunju 1997, il-Kunsill adotta l-Programm tal-UE għall-Prevenzjoni u l-Ġlieda kontra t-Traffikar Illeċitu ta’ Armi Konvenzjonali, li jimpenja lill-UE u lill-Istati Membri tagħha sabiex jieħdu azzjoni konċertata biex lil jassistu pajjiżi oħra fil-prevenzjoni u l-ġlieda kontra t-traffiku illeċitu tal-armi.

(2)

Fit-8 ta’ Diċembru 2008, il-Kunsill adotta l-Pożizzjoni Komuni 2008/944/PESK li tiddefinixxi regoli komuni li jirregolaw il-kontroll tal-esportazzjoni ta’ teknoloġija u tagħmir militari, li tistabbilixxi tmien kriterji għall-esportazzjoni ta’ armi konvenzjonali (1), tistabbilixxi mekkaniżmu ta’ notifika u konsultazzjoni għal ċaħdiet u tinkludi proċedura ta’ trasparenza permezz tal-pubblikazzjoni tar-rapporti annwali tal-UE dwar l-esportazzjoni tal-armi. Dik il-Pożizzjoni Komuni tikkontribwixxi sinifikament għall-armonizzazzjoni ta’ linji ta’ politika nazzjonali dwar il-kontroll tal-esportazzjoni tal-armi u l-prinċipji u l-kriterji tagħha ġew sottoskritti uffiċjalment minn diversi pajjiżi terzi.

(3)

L-Artikolu 11 tal-Pożizzjoni Komuni 2008/944/PESK jiddikjara li l-Istati Membri ser jagħmlu ħilithom kollha biex iħeġġu Stati oħra li jesportaw armi biex japplikaw il-kriterji tal-Pożizzjoni Komuni.

(4)

L-Istrateġija Ewropea ta’ Sigurtà adottata minn Kapijiet ta’ Stat u Gvern fit-12 ta’ Diċembru 2003 ssemmi ħames sfidi ewlenin li jridu jiġu ffaċċjati mill-UE fl-ambjent ta’ wara l-Gwerra Bierda: it-terroriżmu, il-proliferazzjoni tal-armi tal-qerda tal-massa, il-konflitti reġjonali, il-falliment tal-Istat u l-kriminalità organizzata. Il-konsegwenzi taċ-ċirkolazzjoni mhux ikkontrollata ta’ armi konvenzjonali huma ċentrali għal erba’ minn dawn il-ħames sfidi. Tabilħaqq, it-trasferiment mhux ikkontrollat tal-armi jikkontribwixxi fl-aggravazzjoni tat-terroriżmu u l-kriminalità organizzata, u huwa fattur prinċipali fit-tfaqqigħ u l-firxa ta’ konflitti, kif ukoll fil-waqgħa tal-istrutturi tal-Istat. Flimkien ma’ dan, l-Istrateġija tissottolinja l-importanza ta’ kontrolli ta’ esportazzjoni biex jikkontrollaw il-proliferazzjoni.

(5)

L-Istrument Internazzjonali li Jippermetti lill-Istati biex Jidentifikaw u Jintraċċaw, b’Mod f’Waqtu u Affidabbli, Armi Żgħar u Armamenti Ħfief Illeċiti, adottat mill-Assemblea Ġenerali tan-Nazzjonijiet Uniti fit-8 ta’ Diċembru 2005, jimmira li jtejjeb l-effettività ta’, u jikkumplimenta, ftehimiet eżistenti bilaterali, reġjonali u internazzjonali biex jevita, jiġġieled u jeradika l-kummerċ illeċitu ta’ armi żgħar u armamenti ħfief fl-aspetti kollha tiegħu.

(6)

L-Istrateġija tal-UE biex tiġġieled l-akkumulazzjoni u t-traffikar illeċitu ta’ armi żgħar u armamenti ħfief (SALW) u l-munizzjon tagħhom, adottata mill-Kunsill Ewropew fil-15 u fis-16 ta’ Diċembru 2005, tipprevedi li fil-livell reġjonali u internazzjonali l-UE għandha, tappoġġa t-tisħiħ tal-kontrolli tal-esportazzjoni u l-promozzjoni tal-kriterji tal-Kodiċi ta’ Kondotta dwar l-Esportazzjoni ta’ Armi, sussegwentement sostitwit mill-Pożizzjoni Komuni 2008/944/PESK, billi inter alia, tgħin pajjiżi terzi jabbozzaw leġislazzjoni nazzjonali dwar dan u tippromwovi miżuri biex tittejjeb it-trasparenza.

(7)

Fis-6 ta’ Diċembru 2006 l-Assemblea Ġenerali tan-Nazzjonijet Uniti, bl-appoġġ tal-Istati Membri kollha tal-Unjoni Ewropea, adottat ir-Riżoluzzjoni 61/89, intitolata “Lejn trattat dwar il-kummerċ fl-armi: stabbiliment ta’ standards internazzjonali komuni għall-importazzjoni, l-esportazzjoni u t-trasferiment ta’ armi konvenzjonali”. F’Diċembru 2006 u f’Ġunju u Diċembru 2007, il-Kunsill adotta konklużjonijiet li jissottolinjaw li huwa importanti għall-UE u l-Istati Membri li jkollhom rwol attiv u jikkooperaw ma’ Stati u organizzazzjonijiet reġjonali oħra fil-proċess fi ħdan in-Nazzjonijiet Uniti biex jistabbilixxu standards internazzjonali komuni għall-importazzjoni, l-esportazzjoni u t-trasferiment ta’ armi konvenzjonali, li jkunu ta’ kontribut kbir għall-indirizzar tal-proliferazzjoni mhux mixtieqa u irresponsabbli ta’ armi konvenzjonali li jimminaw il-paċi, is-sigurtà, l-iżvilupp u r-rispett sħiħ għad-drittijiet tal-bniedem.

(8)

Fis-17 ta’ Marzu 2008, il-Kunsill adotta l-Azzjoni Konġunta 2008/23/PESK dwar appoġġ għall-attivitajiet tal-UE gaħll-promozzjoni tal-kontroll tal-esportazzjoni ta’ armi u l-prinċipji u l-kriterji tal-Kodiċi ta’ Kondotta tal-UE dwar l-Esportazzjoni ta Armi bejn pajjiżi terzi (2); l-aħħar attività taħt din l-Azzjoni Konġunta seħħet fis-27 u t-28 ta’ Ottubru 2009,

—

l-Istrateġija Ewropea ta’ Sigurtà,

—

l-Istrateġija tal-UE biex tiġġieled l-akkumulazzjoni illeċita u t-traffikar tal-SALW u l-munizzjon tagħhom,

—

l-Artikolu 11 tal-Pożizzjoni Komuni 2008/944/PESK,

—

il-Programm tal-UE għall-Prevenzjoni u l-Ġlieda kontra t-Traffikar Illeċitu fl-Armi Konvenzjonali,

—

l-Istrument Internazzjonali li Jippermetti lill-Istati Jidentifikaw u Jintraċċaw, b’mod f’Waqtu u Affidabbli, Armi Żgħar u Armamenti Ħfief Illeċiti, u

—

il-Konklużjonijiet tal-Kunsill dwar Trattat Internazzjonali dwar il-Kummerċ fl-Armi,

(a)

il-promozzjoni fost il-pajjiżi terzi tal-kriterji u l-prinċipji tal-Pożizzjoni Komuni 2008/944/PESK;

(b)

l-assistenza lil pajjiżi terzi fl-abbozzar u l-implimentazzjoni ta’ leġislazzjoni biex jiġi żgurat kontroll effettiv tal-esportazzjoni ta’ armi;

(ċ)

l-assistenza lil pajjiżi terzi fit-taħriġ ta’ uffiċjali ta’ liċenzjar biex tiġi żgurata implimentazzjoni adegwata u infurzar ta’ kontrolli tal-esportazzjoni ta’ armi;

(d)

l-assistenza lil pajjiżi terzi u lir-reġjun fl-elaborazzjoni ta’ rapporti nazzjonali u reġjonali dwar l-esportazzjoni ta’ armi u l-promozzjoni ta’ forom oħra ta’ skrutinju sabiex tiġi promossa t-trasparenza u r-responsabbiltà fl-esportazzjoni ta’ armi;

(e)

it-tħeġġiġ tal-pajjiżi terzi biex jappoġġaw il-proċess tan-Nazzjonijiet Uniti bil-għan li jiġi adottat trattat internazzjonali li jorbot u li jistabbilixxi standards komuni għall-kummerċ dinji f’armi konvenzjonali, u li tassisti fl-iżgurar li dawn ikunu f’pożizzjoni biex jikkonformaw ma’ tali standards komuni possibbli.