DEĊIŻJONI TAL-KUNSILL

tal-24 ta’ Ottubru 2008

dwar il-konklużjoni ta’ Protokoll bejn il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar il-Ftehim bejn il-Komunità Ewropea u l-Konfederazzjoni Żvizzera dwar il-kriterji u l-mekkaniżmi sabiex jiġi stabbilit l-Istat responsabbli mill-eżami ta’ talba għal ażil mressqa fi Stat Membru jew fl-Iżvizzera

(2009/487/KE)

IL-KUNSILL TAL-UNJONI EWROPEA,

Wara li kkunsidra t-Trattat li jistabbilixxi l-Komunità Ewropea, u b’mod partikolari l-Artikolu 63 (1)(a) tiegħu, flimkien mal-ewwel sentenza tal-ewwel sub-paragrafu tal-Artikolu 300(2) u l-ewwel sub-paragrafu tal-Artikolu 300(3) tiegħu,

Wara li kkunsidra l-proposta mill-Kummissjoni,

Wara li kkunsidra l-Opinjoni tal-Parlament Ewropew (1)

Billi:

IDDEĊIEDA KIF ĠEJ:

Artikolu 1

Il-Protokoll bejn il-Komunità Ewropea, il-Konfederazzjoni Żvizzera u l-Prinċipat tal-Liechtenstein dwar il-Ftehim bejn il-Komunità Ewropea u l-Konfederazzjoni Żvizzera dwar il-kriterji u l-mekkaniżmi sabiex jiġi stabbilit l-Istat responsabbli mill-eżami ta’ talba għal ażil mressqa fi Stat Membru jew fl-Iżvizzera huwa approvat f’isem il-Komunità.

It-test tal-Protokoll huwa anness ma’ din id-Deċiżjoni.

Artikolu 2

1.   Il-President tal-Kunsill huwa b’dan awtorizzat sabiex jaħtar il-persuna(i) bis-setgħa li tiddepożita f’isem il-Komunità l-istrument ta’ approvazzjoni previst fl-Artikolu 5 tal-Protokoll, sabiex jesprimi l-kunsens tal-Komunità sabiex tintrabat fir-relazzjonijiet tagħha mal-Iżvizzera.

2.   Il-President tal-Kunsill huwa hawnhekk awtorizzat sabiex jaħtar il-persuna(i) bis-setgħa li tiddepożita f’isem il-Komunità l-istrument ta’ approvazzjoni previst fl-Artikolu 5 tal-Protokoll, sabiex jesprimi l-kunsens tal-Komunità sabiex tintrabat fir-relazzjonijiet tagħha mal-Liechtenstein. Id-depożitu ta’ dan l-istrument m’għandux isir qabel ma l-Kunsill ikun approva, f’isem il-Komunità Ewropea u f’isem l-Unjoni Ewropea, il-Protokoll dwar l-assoċjazzjoni tal-Liechtenstein mal-acquis ta’ Schengen u, f’isem il-Komunità Ewropea, il-Protokoll dwar l-assoċjazzjoni tal-Liechtenstein mal-acquis ta’ Dublin.

Artikolu 3

Din id-Deċiżjoni għandha tiġi ppubblikata f’Il-Ġurnal Uffiċjali tal-Unjoni Ewropea.

(1)  L-Opinjoni tat-8 ta’ Lulju 2008 (għadha mhix ippubblikata fil-Ġurnal Uffiċjali).

(2)  ĠU L 53, 27.2.2008, p. 52.

(3)  ĠU L 53, 27.2.2008, p. 5.

PROTOKOLL

bejn il-Komunità Ewropea, il-Konfederazzjoni Żvizzera u l-Prinċipalità ta’ Liechtenstein għall-Ftehim bejn il-Komunità Ewropea u l-Konfederazzjoni Żvizzera dwar il-kriterji u l-mekkaniżmi sabiex jiġi stabbilit l-Istat responsabbli għall-eżami ta’ talba għall-ażil magħmula fi Stat Membru jew fl-Iżvizzera

IL-KOMUNITÀ EWROPEA (minn hawn ‘il quddiem imsejħa il-“Komunità”),

minn naħa waħda,

kif ukoll

IL-KONFEDERAZZJONI ŻVIZZERA (minn hawn ‘il quddiem imsejħa l-“Iżvizzera”),

kif ukoll

Il-Prinċipalità tal-Liechtenstein (minn hawn ‘il quddiem imsejħa “Liechtenstein”),

min-naħa l-oħra,

minn hawn ‘il quddiem imsejħa “il-Partijiet Kontraenti”,

FILWAQT LI JQISU li l-Protokoll dwar il-pożizzjoni tad-Danimarka, mehmuż mat-Trattat dwar l-Unjoni Ewropea u t-Trattat li jistabbilixxi l-Komunità Ewropea, jipprovdi li l-ebda miżura taħt it-Titolu IV tat-Trattat li jistabbilixxi l-Komunità Ewropea m’għandha torbot lid-Danimarka jew tkun applikabbli għad-Danimarka;

FILWAQT LI JIRRIFERU għad-dispożizzjoni fil-Ftehim bejn il-Komunità Ewropea u l-Konfederazzjoni Żvizzera dwar il-kriterji u l-mekkaniżmi sabiex jiġi stabbilit l-Istat responsabbli għall-eżami ta’ talba għall-ażil magħmula fi Stat Membru jew fl-Iżvizzera (1) (minn hawn ‘il quddiem imsejjaħ “il-Ftehim bejn il-Komunità Ewropea u l-Iżvizzera”), dwar il-possibbiltà għar-Renju tad-Danimarka (minn hawn ‘il quddiem imsejjaħ id-“Danimarka”) sabiex jitlob li jipparteċipa f’dan il-Ftehim;

FILWAQT LI JIKKUNSIDRAW il-Protokoll bejn il-Komunità Ewropea, il-Konfederazzjoni Żvizzera u l-Prinċipalità ta’ Liechtenstein għall-istess Ftehim bejn il-Komunità Ewropea u l-Konfederazzjoni Żvizzera dwar l-adeżjoni tal-Prinċipalità ta’ Liechtenstein ma’ dak il-Ftehim, skont l-Artikolu 15 tiegħu;

FILWAQT LI JINNUTAW li r-Renju tad-Danimarka, f’ittra datata t-8 ta’ Novembru 2004, talab sabiex jipparteċipa fl-istess Ftehim bejn il-Komunità Ewropea u l-Iżvizzera;

FILWAQT LI JIKKUNSIDRAW skont l-istess Ftehim bejn il-Komunità Ewropea u l-Iżvizzera, li miegħu aderixxiet il-Prinċipalità ta’ Liechtenstein, il-kondizzjonijiet għal tali parteċipazzjoni mir-Renju tad-Danimarka għandhom jiġu determinati mill-Partijiet Kontraenti, li jaġixxu bil-kunsens tad-Danimarka, fi Protokoll għal dak il-Ftehim;

FILWAQT LI JIKKUNSIDRAW li kien xieraq, fil-bidunett, għad-Danimarka u l-Komunità li jikkonkludu Ftehim sabiex isolvu, b’mod partikolari, kwistjonijiet relatati mal-ġurisdizzjoni tal-Qorti tal-Ġustizzja u l-koordinazzjoni bejn il-Komunità u d-Danimarka fir-rigward ta’ ftehim internazzjonali;

FILWAQT LI JIKKUNSIDRAW il-Ftehim bejn il-Komunità Ewropea u r-Renju tad-Danimarka dwar il-kriterji u l-mekkaniżmi sabiex jiġi stabbilit Stat responsabbli għall-eżami ta’ talba għall-ażil magħmula fid-Danimarka jew fi kwalunkwe Stat Membru ieħor tal-Unjoni Ewropea u l-“Eurodac” għat-tqabbil tal-marki tas-swaba’ għall-applikazzjoni effettiva tal-Konvenzjoni ta’ Dublin (2);

FILWAQT LI KKUNSIDRAW li huwa għalhekk meħtieġ li jkunu stabbiliti l-kondizzjonijiet li bihom id-Danimarka tipparteċipa fil-Ftehim bejn il-Komunità Ewropea u l-Iżvizzera, li miegħu aderixxiet Liechtenstein, u li b’mod partikolari huwa meħtieġ li jkunu stabbiliti d-drittijiet u l-obbligi bejn l-Iżvizzera, Liechtenstein u d-Danimarka;

FILWAQT LI JINNUTAW li d-dħul fis-seħħ ta’ dan il-Protokoll huwa bbażat fuq il-kunsens tad-Danimarka, skont il-ħtiġiet kostituzzjonali tagħha,

FTIEHMU KIF ĠEJ:

Artikolu 1

Ir-Renju tad-Danimarka għandu jipparteċipa fil-Ftehim bejn il-Komunità Ewropea u l-Konfederazzjoni Żvizzera dwar il-kriterji u l-mekkaniżmi sabiex jiġi stabbilit l-Istat responsabbli għall-eżami ta’ talba għall-ażil magħmula fi Stat Membru jew fl-Iżvizzera (minn hawn ‘il quddiem imsejjaħ “il-Ftehim bejn il-Komunità Ewropea u l-Iżvizzera”) li miegħu l-Prinċipalità ta’ Liechtenstein aderixxiet permezz ta’ protokoll għal dan il-Ftehim (minn hawn ‘il quddiem imsejjaħ “il-Protokoll ta’ Liechtenstein”) skont l-Artikolu 15 tal-Ftehim, taħt il-kondizzjonijiet stabbiliti bil-Ftehim bejn il-Komunità Ewropea u r-Renju tad-Danimarka dwar il-kriterji u l-mekkaniżmi sabiex jiġi stabbilit l-Istat responsabbli għall-eżami ta’ talba għall-ażil magħmula fid-Danimarka jew fi kwalunkwe Stat Membru ieħor tal-Unjoni Ewropea u l-“Eurodac” għat-tqabbil tal-marki tas-swaba’ għall-applikazzjoni effettiva tal-Konvenzjoni ta’ Dublin (minn hawn ‘il quddiem imsejjaħ “il-Ftehim bejn il-Komunità Ewropea u d-Danimarka”) u l-Protokoll preżenti.

Artikolu 2

1.   Id-dispożizzjonijiet tar-Regolament tal-Kunsill (KE) Nru 343/2003 tat-18 ta’ Frar 2003 li jistabbilixxi l-kriterji u l-mekkaniżmi sabiex ikun stabbilit l-Istat Membru responsabbli għall-eżami ta’ talba għall-ażil magħmula f’wieħed mill-Istati Membri minn ċittadin ta’ pajjiż terz (3) (ir-“Regolament ta’ Dublin”), li jinsab mehmuż ma’ dan il-Protokoll u jifforma parti minnu, flimkien mal-miżuri ta’ implimentazzjoni adottati skont l-Artikolu 27(2) tar-“Regolament ta’ Dublin” għandhom, skont il-liġi internazzjonali, japplikaw għar-relazzjonijiet bejn id-Danimarka, minn naħa waħda, u l-Iżvizzera u Liechtenstein, min-naħa l-oħra.

2.   Id-dispożizzjonijiet tar-Regolament tal-Kunsill (KE) Nru 2725/2000 tal-11 ta’ Diċembru 2000 adottat mill-Kunsill tal-Unjoni Ewropea dwar it-twaqqif tal-“Eurodac” għat-tqabbil tal-marki tas-swaba’ għall-applikazzjoni effettiva tal-Konvenzjoni ta’ Dublin (4) (“Regolament Eurodac”), li jinsab mehmuż ma’ dan il-Protokoll u jifforma parti minnu, flimkien mal-miżuri ta’ implimentazzjoni adottati skont l-Artikolu 22 jew 23(2) tar-“Regolament Eurodac” għandhom, skont il-liġi internazzjonali, japplikaw għar-relazzjonijiet bejn id-Danimarka, minn naħa waħda, u l-Iżvizzera u Liechtenstein, min-naħa l-oħra.

3.   L-emendi tal-Atti msemmija fil-paragrafi 1 u 2 notifikati mid-Danimarka lill-Kummissjoni skont l-Artikolu 3 tal-Ftehim bejn il-Komunità Ewropea u d-Danimarka u notifikati mill-Iżvizzera u Liechtenstein lill-Kummissjoni skont l-Artikolu 4 tal-Ftehim bejn il-Kumunità Ewropea u l-Iżvizzera, u l-Artikolu 5 tal-Protokoll ta’ Liechtenstein rispettivament għandhom, skont il-liġi internazzjonali, japplikaw għar-relazzjonijiet bejn id-Danimarka, minn naħa waħda, u l-Iżvizzera u Liechtenstein, min-naħa l-oħra.

4.   Il-miżuri ta’ implimentazzjoni adottati skont l-Artikolu 27 (2) tar-“Regolament ta’ Dublin” u l-miżuri ta’ implimentazzjoni adottati skont l-Artikolu 22 jew 23(2) tar-“Regolament Eurodac” notifikati mid-Danimarka lill-Kummissjoni skont l-Artikolu 4 tal-Ftehim bejn il-Kumunità Ewropea u d-Danimarka u notifikati mill-Iżvizzera u Liechtenstein lill-Kummissjoni skont l-Artikolu 4 tal-Ftehim bejn il-Komunità Ewropea u l-Iżvizzera u l-Artikolu 5 tal-Protokoll ta’ Liechtenstein rispettivament għandhom, skont il-liġi internazzjonali, japplikaw għar-relazzjonijiet bejn id-Danimarka, minn naħa waħda, u l-Iżvizzera u Liechtenstein, min-naħa l-oħra.

Artikolu 3

L-Iżvizzera u Liechtenstein għandhom ikunu intitolati jissottomettu dikjarazzjonijiet tal-fatti jew sottomissjonijiet bil-miktub lill-Qorti tal-Ġustizzja f’każi fejn tkun saritilha mistoqsija minn qorti jew tribunal Daniżi għal deċiżjoni preliminari, skont l-Artikolu 6 (1) tal-Ftehim bejn il-Komunità Ewropea u d-Danimarka.

Artikolu 4

1.   Fil-każ ta’ lment mill-Iżvizzera jew minn Liechtenstein dwar l-applikazzjoni jew l-interpretazzjoni mid-Danimarka ta’ dan il-Protokoll, l-Iżvizzera jew Liechtenstein jistgħu jitolbu li l-kwistjoni tiġi inkluża uffiċjalment bħala kwistjoni ta’ disputa fl-aġenda tal-Kumitat Imħallat.

2.   Fil-każ ta’ lment mid-Danimarka dwar l-applikazzjoni jew l-interpretazzjoni mill-Iżvizzera jew minn Liechtenstein ta’ dan il-Protokoll, id-Danimarka tista’ titlob li l-kwistjoni tiġi inkluża uffiċjalment fl-aġenda tal-Kumitat Imħallat bħala kwistjoni ta’ disputa. Il-kwistjoni għandha tiġi inkluża fl-aġenda mill-Kummissjoni.

3.   Il-Kumitat Imħallat għandu jkollu 90 jum, mid-data meta tiġi adottata l-aġenda li fiha tkun ġiet inkluża uffiċjalment id-disputa, sabiex jirriżolvi d-disputa. Għal dan il-għan, id-Danimarka tista’ tagħmel jew tippreżenta l-osservazzjonijiet tagħha lill-Kumitat Imħallat.

4.   F’każ li disputa tiġi riżolta mill-Kumitat Imħallat b’mod li tkun tinħtieġ implimentazzjoni fid-Danikarka, id-Danikarka għandha, fil-perjodu imsemmi fil-paragrafu 3, tinnotifika lill-Partijiet jekk hijiex sejra timplimenta, jew le, ir-riżoluzzjoni.

Jekk id-Danimarka tinnotifika d-deċiżjoni tagħha li m’hijiex sejra timplimenta r-riżoluzzjoni, għandu japplika l-paragrafu 5.

5.   Jekk id-disputa ma tkunx tista’ tiġi riżolta mill-Kumitat Imħallat fil-perjodu imsemmi fil-paragrafu 3, għandu jingħata perjodu ulterjuri ta’ 90 jum sabiex ikun jista’ jintlaħaq ftehim finali. Jekk il-Kumitat Imħallat ma jkunx ħa deċiżjoni sa tmiem il-perjodu, dan il-Protokoll għandu jitqies bħala terminat fit-tmiem tal-aħħar jum ta’ dak il-perjodu.

Artikolu 5

Dan il-Protkoll huwa suġġett għar-ratifika jew għall-approvazzjoni mill-Partijiet Kontraenti.

L-istrumenti ta’ ratifika jew approvazzjoni għandhom jiġu depożitati mas-Segretarju Ġenerali tal-Kunsill, li għandu jservi ta’ depożitarju.

Fir-rigward ta’ Liechtenstein, dan il-Protokoll għandu jidħol fis-seħħ fl-ewwel jum tat-tieni xahar wara n-notifika mill-Komunità u minn Liechtenstein dwar it-tlestija tal-proċeduri rispettivi tagħhom.

Fir-rigward tal-Iżvizzera, dan il-Protokoll għandu jidħol fis-seħħ fl-ewwel jum tat-tieni xahar wara n-notifika mill-Komunità u mill-Iżvizzera dwar it-tlestija tal-proċeduri rispettivi tagħhom.

Id-dħul fis-seħħ ta’ dan il-Protokoll għall-Komunità u għal-Liechtenstein, minn naħa waħda, u għall-Komunità u għall-Konfederazzjoni Żvizzera, minn naħa oħra, huwa suġġett ukoll għar-riċezzjoni minn qabel għand id-depożitarju ta’ Nota mid-Danimarka fis-sens li d-Danimarka taċċetta d-dispożizzjonijiet ta’ dan il-Protokoll u tiddikjara li għandha tapplika d-dispożizzjonijiet imsemmija fl-Artikolu 2 fir-relazzjonijiet reċiproċi tagħha mal-Iżvizzera u ma’ Liechtenstein.

Artikolu 6

Kull Parti Kontraenti tista’ tittermina dan il-Protokoll permezz ta’ dikjarazzjoni bil-miktub indirizzata lid-depożitarju. Tali dikjarazzjoni għandha jkollha effett sitt xhur wara d-depożitu.

Dan il-Protokoll għandu jintemm jekk il-Ftehim bejn il-Komunità u d-Danimarka jiġi terminat.

Dan il-Protokoll għandu jintemm jekk il-Komunità jew kemm l-Iżvizzera kif ukoll Liechtenstein jiddenunzjawh.

(1)  ĠU L 53, 27.2.2008, p. 5.

(2)  ĠU L 66, 8.3.2006, p. 38.

(3)  ĠU L 50, 25.2.2003, p. 1.

(4)  Ġ.U. L 316, 15.12.2000, p. 1.

ANNESS

Regolament tal-Kunsill (KE) Nru 343/2003 tat-18 ta’ Frar 2003 li jistabbilixxi l-kriterji u l-mekkaniżmi sabiex ikun stabbilit l-Istat Membru responsabbli għall-eżami ta’ talba għall-ażil magħmula f’wieħed mill-Istati Membri minn ċittadin ta’ pajjiż terz (ĠU L 50, 25.2.2003, p. 1).

Regolament tal-Kunsill (KE) Nru 2725/2000 tal-11 ta’ Diċembru 2000 dwar it-twaqqif tal-“Eurodac” għat-tqabbil tal-marki tas-swaba’ għall-applikazzjoni effettiva tal-Konvenzjoni ta’ Dublin (Ġ.U. L 316, 15.12.2000, p. 1).