(1)

Skont l-Artikolu 9(1)(a)(iii) tar-Regolament (KE) Nru 1290/2005, l-Istati Membri għandhom l-obbligu li jirkupraw is-somom mitlufa li jirriżultaw minn irregolaritajiet u negliġenza. Madankollu, l-Artikolu 32(6) u l-Artikolu 33(7) tal-istess Regolament jippermetti li l-Istati Membri ma jsegwux l-irkupru jekk l-ispejjeż li diġà qegħdin jew li x’aktarx se jġarrbu jammontaw għal aktar mill-ammont li għandu jiġi rkuprat. Sabiex tkun żgurata applikazzjoni effettiva u kif suppost ta’ dawn id-dispożizzjonijiet, huwa xieraq li jiġi stipulat ċertu limitu li taħtu l-Istati Membri ma jkunux obbligati jsegwu l-irkupru. Dan il-limitu għandu jiġi ffissat bħala EUR 100, mingħajr ma jinkludi l-interessi, minħabba li l-każijiet ta’ rkupru li jinvolvu ammonti taħt dan il-limitu jirrappreżentaw b’mod sinifikanti inqas minn 0,1 % tal-ammont totali ta’ pagamenti li għadhom ma tħallsux lura rrappurtati lill-Kummissjoni mill-Istati Membri skont l-Artikolu 6(h) tar-Regolament tal-Kummissjoni (KE) Nru 885/2006 (2). L-iffissar ta’ dan il-limitu ma għandux jipprevjeni lill-Istati Membri milli japplikaw id-dispożizzjonijiet imsemmija hawn fuq għall-każijiet li jaqbżu EUR 100, jekk ikunu ġġustifkati kif suppost.

(2)

Ir-regola de minimis stipulata f’dan ir-Regolament ma għandhiex tapplika għat-tnaqqis u l-esklużjonijiet imposti fuq benefiċjarji mill-Istati Membri fil-qasam tal-kundizzjonalità abbażi tal-Artikolu 6(1) tar-Regolament tal-Kunsill (KE) Nru 1782/2003 li jistabbilixxi regoli komuni għal skemi diretti ta’ appoġġ fi ħdan il-politika agrikola komuni u li jistabbilixxi ċerti skemi ta’ appoġġ għall-bdiewa (3) minħabba li l-Artikolu 6(3) ta’ dak ir-Regolament jistipula reġim speċifiku biex ma jiġux applikati tnaqqis u esklużjonijiet li jammontaw għal EUR 100 jew inqas.

(3)

L-obbligu li l-Istati Membri jirkupraw l-ammonti li għadhom ma tħallsux lura li jaqbżu EUR 100 jista’ jitwettaq b’modi differenti. Mingħajr preġudizzju għal kwalunkwe azzjoni ta’ infurzar oħra stipulata fil-liġi nazzjonali, mod effettiv u finanzjarment effikaċi kif dan isir huwa billi jitnaqqas kwalunkwe ammont li għadu ma tħallsux lura minn pagamenti futuri għad-debitur, ladarba d-dejn ikun ġie stabbilit skont il-leġiżlazzjoni nazzjonali. Dan il-metodu għandu għalhekk isir obbligatorju sabiex jiġi applikat mill-Istati Membri.

(4)

Ir-Regolament (KE) Nru 885/2006 għandu għalhekk jiġi emendat skont dan.

(5)

Il-miżuri stipulati f’dan ir-Regolament huma skont l-opinjoni tal-Kumitat għall-Fondi Agrikoli,