(1)

Ir-Regolament (KE) Nru 852/2004 jfassal ir-regoli ġenerali għall-operaturi tan-negozju tal-ikel dwar l-iġjene tal-oġġetti tal-ikel. Operaturi tan-negozju tal-ikel involuti fi kwalunkwe stadju tal-produzzjoni, l-ipproċessar u d-distribuzzjoni tal-ikel wara l-ewwel stadju ta’ produzzjoni għandhom jikkonformaw mar-rekwiżiti ta’ iġjene ġenerali stipulati fl-Anness II ta’ dak ir-Regolament.

(2)

Fir-rigward tal-forniment tal-ilma, il-Kapitolu VII ta’ dak l-Anness jistipula li għandu jintuża ilma tajjeb għax-xorb, kull fejn ikun hemm bżonn, biex jiġi żgurat li l-oġġetti tal-ikel ma jiġux kontaminati u li jista’ jintuża ilma nadif ma’ prodotti tas-sajd sħaħ. Huwa jistipula wkoll li ilma baħar nadif jista’ jintuża ma’ molluski bivalvi, ekinodermi, tunikati u gastropodi tal-baħar ħajjin u li jista’ jintuża ilma nadif għall-ħasil minn barra tagħhom.

(3)

L-użu ta’ ilma nadif ma’ prodotti tas-sajd sħaħ u għall-ħasil minn barra ta’ molluski bivalvi, ekinodermi, tunikati u gastropodi tal-baħar ħajjin ma jirrappreżentax riskju għas-saħħa pubblika sakemm ikunu ġew żviluppati u ddaħħlu fis-seħħ proċeduri ta’ kontroll ibbażati, partikolarment, fuq il-prinċipji tal-Analiżi tar-Riskju u l-Punt ta’ Kontroll Kritiku (HACCP) mill-operaturi tan-negozju tal-ikel biex jiġi żgurat li dan ma jkunx għajn ta’ kontaminazzjoni.

(4)

Ir-Regolament (KE) Nru 852/2004 għandu għalhekk jiġi emendat skont dan.

(5)

Il-miżuri stipulati f’dan ir-Regolament huma skont l-opinjoni tal-Kumitat Permanenti għall-Katina Alimentari u s-Saħħa tal-Annimali,

“(b)

Ilma nadif jista’ jintuża ma’ prodotti tas-sajd sħaħ.

Ilma baħar nadif jista’ jintuża ma’ molluski bivalvi, ekinodermi, tunikati u gastropodi tal-baħar ħajjin; ilma nadif jista’ jintuża wkoll għal ħasil minn barra.

Meta jintuża ilma nadif, iridu jkunu disponibbli faċilitajiet u proċeduri adegwati għall-forniment tiegħu biex jiġi żgurat li użu ta’ dan it-tip ma jkunx għajn ta’ kontaminazzjoni għall-oġġetti tal-ikel.”