(1)

Skond ir-Regolament (KE) Nru 178/2002, fejn huwa evidenti li ikel importat minn pajjiż terz x'aktarx huwa ta’ riskju serju għas-saħħa tal-bniedem, għas-saħħa ta’ l-annimali jew għall-ambjent hemm bżonn li jittieħdu l-miżuri neċessarji, u dan ir-riskju ma jistax jitrażżan b'mod sodisfaċenti permezz ta' miżuri meħuda mill-Istat Membru/Stati Membri kkonċernat/i.

(2)

Spezzjoni tal-Komunità li twettqet f'Gabon fl-2007 kixfet defiċjenzi serji fir-rigward ta' ċerti prodotti tas-sajd intenzjonati għall-esportazzjoni għall-Komunità Ewropea. Ġew identifikati nuqqasijiet serji, b'mod partikolari, dwar il-kapaċità ta' l-awtoritajiet ta' Gabon biex jieħdu azzjoni korretta meta jkun hemm livelli għoljin ta' metalli tqal u sulfiti.

(3)

Ir-Regolament tal-Kummissjoni (KE) 1881/2006 (2) tad-19 ta’ Diċembru 2006 li jistabbilixxi livelli massimi ta’ ċerti kontaminanti fl-oġġetti ta’ l-ikel jistipula livelli massimi ta’ metalli tqal għal ċerti prodotti tas-sajd.

(4)

Id-Direttiva tal-Kunsill u tal-Parlament Ewropew 95/2/KE (3) ta' l-20 ta' Frar 1995 dwar addittivi ta' l-ikel għajr kuluri u sustanzi li jagħtu ħlewwa tistabbilixxi livelli massimi ta' sulfiti f'ċerti prodotti tas-sajd.

(5)

L-Istati Membri għandhom għalhekk iwettqu verifiki xierqa dwar ċerti prodotti tas-sajd minn Gabon kif jaslu fil-fruntiera tal-Komunità biex jiżguraw konformità mar-Regolament (KE) Nru 1881/2006 u d-Direttiva 95/2/KE fir-rigward ta' metalli tqal u sulfiti, rispettivament.

(6)

L-Istati Membri għandhom jużaw pjanijiet ta' kampjunar u metodi analitiċi xierqa għal dawn il-verifiki. Għal kampjunar u analiżi ta' metalli tqal ir-Regolament tal-Kummissjoni (KE) Nru 333/2007 (4) għandu japplika.

(7)

Ir-Regolament (KE) Nru 178/2002 jistabbilixxi s-Sistema ta’ Allarm Rapida għall-Ikel u l-Għalf, li għandha tintuża biex tiġi implimentata l-kondizzjoni meħtieġa ta' informazzjoni reċiproka prevista fl-Artikolu 22(2) tad-Direttiva tal-Kunsill 97/78/KE (5). Flimkien ma’ dan l-Istati Membri se jżommu lill-Kummissjoni infurmata permezz ta’ rapporti perjodiċi tar-riżultati analitiċi kollha tal-kontrolli uffiċjali li twettqu fir-rigward ta’ konsenji ta’ dawk il-prodotti tas-sajd minn Gabon, koperti b'dan ir-Regolament.

(8)

Din id-Deċiżjoni għandha terġa' tiġi eżaminata wara sena fid-dawl tal-garanziji offruti mill-awtoritajiet kompetenti ta' Gabon u skond il-bażi tar-riżultati tat-testijiet imwettqa mill-Istati Membri. Spezzjoni ġdida mill-Kummissjoni tista' tkun meħtieġa biex tivverifika l-garanziji mogħtija.

(9)

L-ispejjeż kollha li jirriżultaw mill-applikazzjoni ta' dan ir-Regolament għandhom jitħallsu mill-kunsinnatur, mid-destinatarju jew mill-aġent tiegħu.

(10)

Il-miżuri previsti f’dan ir-Regolament huma skond l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali