li jistabbilixxi, skond ir-Regolament (KE) Nru 842/2006 tal-Parlament Ewropew u tal-Kunsill, ir-rekwiżiti minimi u l-kondizzjonijiet għall-għarfien reċiproku għaċ-ċertifikazzjoni tal-persunal li jkun qed jagħmel xogħol ta’ rkupru ta’ ċerti gassijiet serra fluworinati minn tagħmir għat-tqassim ta’ l-elettriku (“switchgear”) b’vultaġġ għoli

Wara li kkunsidrat ir-Regolament (KE) Nru 842/2006 tal-Parlament Ewropew u tal-Kunsill tas-17 ta’ Mejju 2006 dwar ċerti gassijiet serra fluworinati (1), u b’mod partikulari l-Artikolu 5(1) tiegħu,

Dan ir-Regolament jistabbilixxi r-rekwiżiti minimi għaċ-ċertifikazzjoni tal-persunal li jkun qed jagħmel xogħol ta’ rkupru ta’ ċerti gassijiet serra fluworinati minn tagħmir għat-tqassim ta’ l-elettriku b’vultaġġ għoli kif ukoll il-kondizzjonijiet għall-għarfien reċiproku ta’ ċertifikati maħruġa skond dawk ir-rekwiżiti.

Għall-finijiet ta’ dan ir-Regolament “tagħmir għat-tqassim ta’ l-elettriku b’vultaġġ għoli” tfisser swiċċijiet u l-ikkombinar tagħhom ma’ tagħmir ta’ kontroll assoċjat, ta’ kejl, ta’ protezzjoni u ta’ rregolar, u sistemi ta’ strumenti u tagħmir bħal dawn b’interkonnessjonijiet, aċċessorji, kompartimenti u oqfsa ta’ struttura assoċjati, maħsuba għall-użu marbut mal-ġenerazzjoni, trażmissjoni, distribuzzjoni u konverżjoni ta’ l-enerġija elettrika b’vultaġġi nominali ogħla minn 1 000 V.

1. Il-persunal li jkun qed jagħmel ix-xogħol imsemmi fl-Artikolu 1 għandu jkollu ċertifikat kif imsemmi fl-Artikolu 4.

2. Għal żmien massimu ta’ sena, il-Paragrafu 1 ma għandux japplika għall-persunal li jkun qed isegwi kors ta’ taħriġ sabiex jikseb ċertifikat, dejjem jekk dan ikun issorveljat minn persuna ċċertifikata waqt li jkun qed jagħmel dan ix-xogħol.

3. L-Istati Membri jistgħu jiddeċiedu li l-Paragrafu 1 ma għandux japplika għal perjodu li ma jdumx iktar mid-data msemmija fl-Artikolu 5(4) tar-Regolament (KE) Nru 842/2006, għall-persunal li, qabel id-data msemmija fl-Artikolu 5(2) tar-Regolament (KE) Nru 842/2006, ikun diġà qed jagħmel ix-xogħol stipulat fl-Artikolu 1 ta’ dan ir-Regolament.

Għall-finijiet tar-rekwiżiti tar-Regolament (KE) Nru 842/2006, għall-perjodu msemmi fl-ewwel subparagrafu, dan il-persunal għandu jitqies iċċertifikat f’dak li għandu x’jaqsam ma’ dan ix-xogħol.

1. Kif imsemmi fl-Artikolu 5, korp ta’ ċertifikazzjoni għandu joħroġ ċertifikat lill-persunal li jkun għadda minn eżami teoretiku u prattiku li jkopri l-ħiliet minimi u l-għarfien imniżżlin fl-Anness, u li jkun organizzat minn korp ta’ evalwazzjoni kif imsemmi fl-Artikolu 6.

3. Fejn diġà teżisti sistema ta’ ċertifikazzjoni bbażata fuq l-eżamijiet li tkopri l-ħiliet minimi u l-għarfien imniżżlin fl-Anness u li tissodisfa r-rekwiżiti ta’ l-Artikoli 5 u 6, imma l-attestazzjoni relatata magħha ma tinkludix l-elementi stipulati fil-Paragrafu 2 ta’ dan l-Artikolu, korp ta’ ċertifikazzjoni msemmi fl-Artikolu 5 jista’ joħroġ ċertifikat lill-persuna li għandha din il-kwalifika mingħajr il-ħtieġa li tirrepeti l-eżami.

4. Fejn diġà teżisti sistema ta’ ċertifikazzjoni bbażata fuq l-eżamijiet li tissodisfa r-rekwiżiti ta’ l-Artikoli 5 u 6, u li tkopri parzjalment il-ħiliet minimi mniżżlin fl-Anness, il-korpi ta’ ċertifikazzjoni jistgħu joħorġu ċertifikat jekk l-applikant jgħaddi minn eżami addizzjonali dwar il-ħiliet u l-għarfien li ma jkunux koperti miċ-ċertifikazzjoni eżistenti, u li jkun organizzat mill-korp ta’ evalwazzjoni msemmi fl-Artikolu 6.

1. Fil-liġijiet jew fir-regolamenti nazzjonali għandu jinħaseb għal korp ta’ ċertifikazzjoni li jkollu l-permess li joħroġ ċertifikati lill-persunal involut fix-xogħol imsemmi fl-Artikolu 1. Dan il-korp jista’ jinħatar inkella mill-awtorità kompetenti ta’ Stat Membru jew minn entitajiet oħrajn li għandhom id-dritt jagħmlu dan.

Il-korp ta’ ċertifikazzjoni għandu jkun imparzjali fit-twettiq ta’ ħidmietu.

2. Il-korp ta’ ċertifikazzjoni għandu jistabbilixxi u japplika proċeduri għall-ħruġ, għall-waqfien u għall-irtirar taċ-ċertifikati.

3. Il-korp ta’ ċertifikazzjoni għandu jżomm reġistri li jippermettu l-verifika ta’ l-istat tal-persuna ċċertifikata. Ir-reġistri għandhom juru li l-proċess ta’ ċertifikazzjoni twettaq b’mod effettiv. Ir-reġistri għandhom jinżammu għal perjodu minimu ta’ ħames snin.

1. Korp ta’ evalwazzjoni maħtur mill-awtorità kompetenti ta’ Stat Membru jew minn entitajiet oħrajn li għandhom id-dritt jagħmlu dan għandu jorganizza l-eżamijiet għall-persunal imsemmija fl-Artikolu 1. Il-korp ta’ ċertifikazzjoni msemmi fl-Artikolu 5 jista’ wkoll jikkwalifika bħala korp ta’ evalwazzjoni.

2. L-eżamijiet għandhom ikunu ppjanati u strutturati b’mod li jiżgura li jkunu koperti l-ħiliet minimi u l-għarfien imniżżlin fl-Anness.

3. Il-korp ta’ evalwazzjoni għandu jadotta proċeduri ta’ rrappurtar u jżomm reġistri sabiex ikun hemm id-dokumentazzjoni dwar il-persuna u dwar ir-riżultati globali ta’ l-evalwazzjoni.

4. Il-korp ta’ evalwazzjoni għandu jiżgura li l-eżaminaturi li jkunu ntgħażlu għal xi eżami jkollhom għarfien xieraq tal-metodi u tad-dokumenti rilevanti għall-eżami, kif ukoll kompetenza xierqa fil-qasam li se jiġi eżaminat. Huwa għandu jiżgura wkoll li t-tagħmir, l-għodda u l-materjali meħtieġa għall-eżamijiet prattiċi jkunu disponibbli.

1. Sa l-4 ta’ Jannar 2009, l-Istati Membri għandhom jgħarrfu lill-Kummissjoni dwar l-ismijiet u d-dettalji tal-kuntatt tal-korpi ta’ ċertifikazzjoni tal-persunal koperti mill-Artikolu 5 u tat-titli taċ-ċertifikati tal-persunal li huma konformi mar-rekwiżiti ta’ l-Artikolu 4, billi jużaw il-format stabbilit bir-Regolament (KE) Nru 308/2008.

2. L-Istati Membri għandhom jaġġornaw in-notifika mressqa skond il-Paragrafu 1, b’tagħrif ġdid rilevanti, u jgħadduha lill-Kummissjoni mingħajr telf ta’ żmien.

1. L-għarfien reċiproku taċ-ċertifikati maħruġa fi Stati Membri oħrajn għandu japplika fil-każ ta’ ċertifikati maħruġa skond l-Artikolu 4.

2. L-Istati Membri jistgħu jitolbu lill-persuna li nħarġilha ċ-ċertifikat fi Stat Membru ieħor tipprovdi traduzzjoni taċ-ċertifikat f’lingwa oħra uffiċjali tal-Komunità.

Dan ir-Regolament għandu jidħol fis-seħħ fl-għoxrin jum wara l-jum tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

ANNESS

Ir-rekwiżiti minimi f’dak li għandu x’jaqsam mal-ħiliet u l-għarfien li għandhom jiġu koperti mill-korpi ta’ evalwazzjoni

L-eżami msemmi fl-Artikoli 4(1) u 6(2) għandu jinkludi dan li ġej:

(a)	eżami teoretiku b’mistoqsija waħda jew iktar dwar dik il-ħila jew dak l-għarfien, kif muri b’(T) fil-kolonna msejħa “It-Tip ta’ Eżami”;

(b)	eżami prattiku li matulu l-applikant għandu jagħmel il-biċċa xogħol korrispondenti bil-materjal, l-għodda u t-tagħmir rilevanti, kif muri b’(P) fil-kolonna msejħa “It-Tip ta’ Eżami”.

Nru	L-Għarfien u l-Ħiliet Minimi	It-Tip ta’ Eżami
1	Għarfien bażiku tal-kwistjonijiet ambjentali rilevanti (it-tibdil fil-klima, il-Protokoll ta’ Kjoto, il-Potenzjal ta’ Tisħin Globali), id-dispożizzjonijiet rilevanti tar-Regolament (KE) Nru 842/2006 u tar-Regolamenti rilevanti li jimplimentaw id-dispożizzjonijiet tar-Regolament (KE) Nru 842/2006.	T
2	Il-karatteristiċi fiżiċi, kimiċi u ambjentali ta’ l-SF6	T
3	L-użu ta’ l-SF6 f’tagħmir elettriku (insulazzjoni, tifi ta’ l-ark)	T
4	Il-kwalità ta’ l-SF6, skond l-istandards industrijali rilevanti (1)	T
5	Il-fehim tad-disinn ta’ tagħmir elettriku	T
6	L-iċċekkjar tal-kwalità ta’ l-SF6	P
7	L-irkupru ta’ l-SF6 u ta’ taħlitiet ta’ l-SF6 u l-purifikazzjoni ta’ l-SF6	P
8	Il-ħżin u t-trasport ta’ l-SF6	T
9	It-tħaddim tat-tagħmir ta’ rkupru ta’ l-SF6	P
10	It-tħaddim ta’ sistemi tight drilling, jekk meħtieġ	P
11	L-użu mill-ġdid ta’ l-SF6 u l-kategoriji differenti ta’ użu mill-ġdid	T
12	Il-ħidma fuq kompartimenti ta’ l-SF6 miftuħa	P
13	In-newtralizzazzjoni ta’ prodotti sekondarji ta’ l-SF6	T
14	Il-monitoraġġ ta’ l-SF6 u l-obbligi approprjati ta’ rreġistrar ta’ dejta skond il-leġiżlazzjoni nazzjonali u Komunitarja, jew skond ftehimiet internazzjonali	T

(1) Per eżempju IEC 60376 u IEC 60480